༢༢༡. པ་ཙྪི་མ་ཝི་ཀ་པྤ་ནུ་པ་ག་ཙཱི་ཝ་རཱ་དི་ཀ་ཐཱ
༣༥༨. ཨ་ཐ ཁོ བྷི་ཀྑཱུ་ནཾ ཨེ་ཏ་ད་ཧོ་སི – ‘‘ཡཱ་ནི ཏཱ་ནི བྷ་ག་ཝ་ཏཱ ཨ་ནུ་ཉྙཱ་ཏཱ་ནི ཏི་ཙཱི་ཝ་ར་ནྟི ཝཱ ཝ་སྶི་ཀ་སཱ་ཊི་ཀཱ་ཏི ཝཱ ནི་སཱི་ད་ན་ནྟི ཝཱ པ་ཙྩ་ཏྠ་ར་ཎ་ནྟི ཝཱ ཀ་ཎྜུ་པྤ་ཊི་ཙྪཱ་དཱི་ཏི ཝཱ མུ་ཁ་པུ་ཉྪ་ན་ཙོ་ལ༹་ནྟི ཝཱ པ་རི་ཀྑཱ་ར་ཙོ་ལ༹་ནྟི ཝཱ, ས་བྦཱ་ནི ཏཱ་ནི ཨ་དྷི་ཊྛཱ་ཏ་བྦཱ་ནི ནུ ཁོ, ཨུ་དཱ་ཧུ, ཝི་ཀ་པྤེ་ཏ་བྦཱ་ནཱི’’ཏི? བྷ་ག་ཝ་ཏོ ཨེ་ཏ་མ་ཏྠཾ ཨཱ་རོ་ཙེ་སུཾ. ཨ་ནུ་ཛཱ་ནཱ་མི, བྷི་ཀྑ་ཝེ, ཏི་ཙཱི་ཝ་རཾ ཨ་དྷི་ཊྛཱ་ཏུཾ ན ཝི་ཀ་པྤེ་ཏུཾ; ཝ་སྶི་ཀ་སཱ་ཊི་ཀཾ ཝ་སྶཱ་ནཾ ཙཱ་ཏུ་མཱ་སཾ ཨ་དྷི་ཊྛཱ་ཏུཾ, ཏ་ཏོ པ་རཾ ཝི་ཀ་པྤེ་ཏུཾ; ནི་སཱི་ད་ནཾ ཨ་དྷི་ཊྛཱ་ཏུཾ ན ཝི་ཀ་པྤེ་ཏུཾ; པ་ཙྩ་ཏྠ་ར་ཎཾ ཨ་དྷི་ཊྛཱ་ཏུཾ ན ཝི་ཀ་པྤེ་ཏུཾ; ཀ་ཎྜུ་པྤ་ཊི་ཙྪཱ་དིཾ ཡཱ་ཝ་ཨཱ་བཱ་དྷཱ ཨ་དྷི་ཊྛཱ་ཏུཾ ཏ་ཏོ པ་རཾ ཝི་ཀ་པྤེ་ཏུཾ; མུ་ཁ་པུ་ཉྪ་ན་ཙོ་ལ༹ཾ ཨ་དྷི་ཊྛཱ་ཏུཾ ན ཝི་ཀ་པྤེ་ཏུཾ; པ་རི་ཀྑཱ་ར་ཙོ་ལ༹ཾ ཨ་དྷི་ཊྛཱ་ཏུཾ ན ཝི་ཀ་པྤེ་ཏུ་ནྟི.
ཨ་ཐ ཁོ བྷི་ཀྑཱུ་ནཾ ཨེ་ཏ་ད་ཧོ་སི – ‘‘ཀི་ཏྟ་ཀཾ པ་ཙྪི་མཾ ནུ ཁོ ཙཱི་ཝ་རཾ ཝི་ཀ་པྤེ་ཏ་བྦ’’ནྟི? བྷ་ག་ཝ་ཏོ ཨེ་ཏ་མ་ཏྠཾ ཨཱ་རོ་ཙེ་སུཾ. ཨ་ནུ་ཛཱ་ནཱ་མི, བྷི་ཀྑ་ཝེ, ཨཱ་ཡཱ་མེ་ན ཨ་ཊྛ་ངྒུ་ལཾ སུ་ག་ཏ་ངྒུ་ལེ་ན ཙ་ཏུ་ར་ངྒུ་ལ་ཝི་ཏྠ་ཏཾ པ་ཙྪི་མཾ ཙཱི་ཝ་རཾ ཝི་ཀ་པྤེ་ཏུ་ནྟི.
༣༥༩. ཏེ་ན ཁོ པ་ན ས་མ་ཡེ་ན ཨཱ་ཡ་སྨ་ཏོ མ་ཧཱ་ཀ་སྶ་པ་སྶ པཾ་སུ་ཀཱུ་ལ་ཀ་ཏོ ག་རུ་ཀོ ཧོ་ཏི. བྷ་ག་ཝ་ཏོ ཨེ་ཏ་མ་ཏྠཾ ཨཱ་རོ་ཙེ་སུཾ. ཨ་ནུ་ཛཱ་ནཱ་མི, བྷི་ཀྑ་ཝེ, སུ་ཏྟ་ལཱུ་ཁཾ ཀཱ་ཏུ་ནྟི. ཝི་ཀ་ཎྞོ ཧོ་ཏི. བྷ་ག་ཝ་ཏོ ཨེ་ཏ་མ་ཏྠཾ ཨཱ་རོ་ཙེ་སུཾ. ཨ་ནུ་ཛཱ་ནཱ་མི, བྷི་ཀྑ་ཝེ, ཝི་ཀ་ཎྞཾ ཨུ་དྡྷ་རི་ཏུ་ནྟི. སུ་ཏྟཱ ཨོ་ཀི་རི་ཡ་ནྟི. བྷ་ག་ཝ་ཏོ ཨེ་ཏ་མ་ཏྠཾ ཨཱ་རོ་ཙེ་སུཾ. ཨ་ནུ་ཛཱ་ནཱ་མི, བྷི་ཀྑ་ཝེ, ཨ་ནུ་ཝཱ་ཏཾ པ་རི་བྷ་ཎྜཾ ཨཱ་རོ་པེ་ཏུ་ནྟི.
ཏེ་ན ཁོ པ་ན ས་མ་ཡེ་ན ས་ངྒྷཱ་ཊི་ཡཱ པ་ཏྟཱ ལུ་ཛྫ་ནྟི. བྷ་ག་ཝ་ཏོ ཨེ་ཏ་མ་ཏྠཾ ཨཱ་རོ་ཙེ་སུཾ. ཨ་ནུ་ཛཱ་ནཱ་མི, བྷི་ཀྑ་ཝེ, ཨ་ཊྛ་པ་ད་ཀཾ ཀཱ་ཏུ་ནྟི.
༣༦༠. ཏེ་ན ཁོ པ་ན ས་མ་ཡེ་ན ཨ་ཉྙ་ཏ་ར་སྶ བྷི་ཀྑུ་ནོ ཏི་ཙཱི་ཝ་རེ ཀ་ཡི་ར་མཱ་ནེ ས་བྦཾ ཚི་ནྣ་ཀཾ ན་པྤ་ཧོ་ཏི. བྷ་ག་ཝ་ཏོ ཨེ་ཏ་མ་ཏྠཾ ཨཱ་རོ་ཙེ་སུཾ. ཨ་ནུ་ཛཱ་ནཱ་མི, བྷི་ཀྑ་ཝེ, དྭེ ཚི་ནྣ་ཀཱ་ནི ཨེ་ཀཾ ཨ་ཙྪི་ནྣ་ཀ་ནྟི.
དྭེ ཚི་ནྣ་ཀཱ་ནི ཨེ་ཀཾ ཨ་ཙྪི་ནྣ་ཀཾ ན་པྤ་ཧོ་ཏི. བྷ་ག་ཝ་ཏོ ཨེ་ཏ་མ་ཏྠཾ ཨཱ་རོ་ཙེ་སུཾ. ཨ་ནུ་ཛཱ་ནཱ་མི, བྷི་ཀྑ་ཝེ, དྭེ ཨ་ཙྪི་ནྣ་ཀཱ་ནི ཨེ་ཀཾ ཚི་ནྣ་ཀ་ནྟི.
དྭེ ཨ་ཙྪི་ནྣ་ཀཱ་ནི ཨེ་ཀཾ ཚི་ནྣ་ཀཾ ན་པྤ་ཧོ་ཏི. བྷ་ག་ཝ་ཏོ ཨེ་ཏ་མ་ཏྠཾ ཨཱ་རོ་ཙེ་སུཾ. ཨ་ནུ་ཛཱ་ནཱ་མི, བྷི་ཀྑ་ཝེ, ཨ་ནྭཱ་དྷི་ཀ་མྤི ཨཱ་རོ་པེ་ཏུཾ, ན ཙ, བྷི་ཀྑ་ཝེ, ས་བྦཾ ཨ་ཙྪི་ནྣ་ཀཾ དྷཱ་རེ་ཏ་བྦཾ. ཡོ དྷཱ་རེ་ཡྻ, ཨཱ་པ་ཏྟི དུ་ཀྐ་ཊ་སྶཱ་ཏི.
༣༦༡. ཏེ་ན ཁོ པ་ན ས་མ་ཡེ་ན ཨ་ཉྙ་ཏ་ར་སྶ བྷི་ཀྑུ་ནོ བ་ཧུཾ ཙཱི་ཝ་རཾ ཨུ་པྤ་ནྣཾ ཧོ་ཏི. སོ ཙ ཏཾ ཙཱི་ཝ་རཾ མཱ་ཏཱ་པི་ཏཱུ་ནཾ དཱ་ཏུ་ཀཱ་མོ ཧོ་ཏི. བྷ་ག་ཝ་ཏོ ཨེ་ཏ་མ་ཏྠཾ ཨཱ་རོ་ཙེ་སུཾ. མཱ་ཏཱ་པི་ཏ་རོ་ཏི [མཱ་ཏཱ་པི་ཏཱུ་ནཾ ཁོ (སཱི.)] ཁོ, བྷི་ཀྑ་ཝེ, ད་ད་མཱ་ནེ [ཝ་ད་མཱ་ནོ (ཀ.), ཝ་ད་མཱ་ནེ (?)] ཀིཾ ཝ་དེ་ཡྻཱ་མ? ཨ་ནུ་ཛཱ་ནཱ་མི, བྷི་ཀྑ་ཝེ, མཱ་ཏཱ་པི་ཏཱུ་ནཾ དཱ་ཏུཾ. ན ཙ, བྷི་ཀྑ་ཝེ, ས་དྡྷཱ་དེ་ཡྻཾ ཝི་ནི་པཱ་ཏེ་ཏ་བྦཾ. ཡོ ཝི་ནི་པཱ་ཏེ་ཡྻ, ཨཱ་པ་ཏྟི དུ་ཀྐ་ཊ་སྶཱ་ཏི.
༣༦༢. ཏེ་ན ཁོ པ་ན ས་མ་ཡེ་ན ཨ་ཉྙ་ཏ་རོ བྷི་ཀྑུ ཨ་ནྡྷ་ཝ་ནེ ཙཱི་ཝ་རཾ ནི་ཀྑི་པི་ཏྭཱ ས་ནྟ་རུ་ཏྟ་རེ་ན གཱ་མཾ པི་ཎྜཱ་ཡ པཱ་ཝི་སི. ཙོ་རཱ ཏཾ ཙཱི་ཝ་རཾ ཨ་ཝ་ཧ་རིཾ་སུ. སོ བྷི་ཀྑུ དུ་ཙྩོ་ལོ༹ ཧོ་ཏི ལཱུ་ཁ་ཙཱི་ཝ་རོ. བྷི་ཀྑཱུ ཨེ་ཝ་མཱ་ཧཾ་སུ – ‘‘ཀི་སྶ ཏྭཾ, ཨཱ་ཝུ་སོ, དུ་ཙྩོ་ལོ༹ ལཱུ་ཁ་ཙཱི་ཝ་རོ་སཱི’’ཏི? ‘‘ཨི་དྷཱ་ཧཾ [སོ ཨ་ཧཾ (ཀ་ཏྠ་ཙི)], ཨཱ་ཝུ་སོ, ཨ་ནྡྷ་ཝ་ནེ ཙཱི་ཝ་རཾ ནི་ཀྑི་པི་ཏྭཱ ས་ནྟ་རུ་ཏྟ་རེ་ན གཱ་མཾ པི་ཎྜཱ་ཡ པཱ་ཝི་སིཾ. ཙོ་རཱ ཏཾ ཙཱི་ཝ་རཾ ཨ་ཝ་ཧ་རིཾ་སུ. ཏེ་ནཱ་ཧཾ དུ་ཙྩོ་ལོ༹ ལཱུ་ཁ་ཙཱི་ཝ་རོ’’ཏི. བྷ་ག་ཝ་ཏོ ཨེ་ཏ་མ་ཏྠཾ ཨཱ་རོ་ཙེ་སུཾ. ན, བྷི་ཀྑ་ཝེ, ས་ནྟ་རུ་ཏྟ་རེ་ན གཱ་མོ པ་ཝི་སི་ཏ་བྦོ. ཡོ པ་ཝི་སེ་ཡྻ, ཨཱ་པ་ཏྟི དུ་ཀྐ་ཊ་སྶཱ་ཏི.
ཏེ་ན ཁོ པ་ན ས་མ་ཡེ་ན ཨཱ་ཡ་སྨཱ ཨཱ་ན་ནྡོ ཨ་སྶ་ཏི་ཡཱ ས་ནྟ་རུ་ཏྟ་རེ་ན གཱ་མཾ པི་ཎྜཱ་ཡ པཱ་ཝི་སི. བྷི་ཀྑཱུ ཨཱ་ཡ་སྨ་ནྟཾ ཨཱ་ན་ནྡཾ ཨེ་ཏ་ད་ཝོ་ཙུཾ – ‘‘ན་ནུ, ཨཱ་ཝུ་སོ ཨཱ་ན་ནྡ, བྷ་ག་ཝ་ཏཱ པ་ཉྙ་ཏྟཾ – ‘ན ས་ནྟ་རུ་ཏྟ་རེ་ན གཱ་མོ པ་ཝི་སི་ཏ་བྦོ’ཏི? ཀི་སྶ ཏྭཾ, ཨཱ་ཝུ་སོ ཨཱ་ན་ནྡ, ས་ནྟ་རུ་ཏྟ་རེ་ན གཱ་མཾ པ་ཝི་ཊྛོ’’ཏི? ‘‘ས་ཙྩཾ, ཨཱ་ཝུ་སོ, བྷ་ག་ཝ་ཏཱ པ་ཉྙ་ཏྟཾ – ‘ན ས་ནྟ་རུ་ཏྟ་རེ་ན གཱ་མོ པ་ཝི་སི་ཏ་བྦོ’ཏི. ཨ་པི ཙཱ་ཧཾ ཨ་སྶ་ཏི་ཡཱ པ་ཝི་ཊྛོ’’ཏི. བྷ་ག་ཝ་ཏོ ཨེ་ཏ་མ་ཏྠཾ ཨཱ་རོ་ཙེ་སུཾ.
པ་ཉྩི་མེ, བྷི་ཀྑ་ཝེ, པ་ཙྩ་ཡཱ ས་ངྒྷཱ་ཊི་ཡཱ ནི་ཀྑེ་པཱ་ཡ – གི་ལཱ་ནོ ཝཱ ཧོ་ཏི, ཝ་སྶི་ཀ་ས་ངྐེ་ཏཾ ཝཱ ཧོ་ཏི, ན་དཱི་པཱ་རཾ ག་ནྟུཾ ཝཱ ཧོ་ཏི, ཨ་གྒ་ལ༹་གུ་ཏྟི་ཝི་ཧཱ་རོ ཝཱ ཧོ་ཏི, ཨ་ཏྠ་ཏ་ཀ་ཐི་ནཾ ཝཱ ཧོ་ཏི. ཨི་མེ ཁོ, བྷི་ཀྑ་ཝེ, པ་ཉྩ པ་ཙྩ་ཡཱ ས་ངྒྷཱ་ཊི་ཡཱ ནི་ཀྑེ་པཱ་ཡ.
པ་ཉྩི་མེ, བྷི་ཀྑ་ཝེ, པ་ཙྩ་ཡཱ ཨུ་ཏྟ་རཱ་ས་ངྒ་སྶ ནི་ཀྑེ་པཱ་ཡ…པེ… ཨ་ནྟ་ར་ཝཱ་ས་ཀ་སྶ ནི་ཀྑེ་པཱ་ཡ – གི་ལཱ་ནོ ཝཱ ཧོ་ཏི, ཝ་སྶི་ཀ་ས་ངྐེ་ཏཾ ཝཱ ཧོ་ཏི, ན་དཱི་པཱ་རཾ ག་ནྟུཾ ཝཱ ཧོ་ཏི, ཨ་གྒ་ལ༹་གུ་ཏྟི་ཝི་ཧཱ་རོ ཝཱ ཧོ་ཏི, ཨ་ཏྠ་ཏ་ཀ་ཐི་ནཾ ཝཱ ཧོ་ཏི. ཨི་མེ ཁོ, བྷི་ཀྑ་ཝེ, པ་ཉྩ པ་ཙྩ་ཡཱ ཨུ་ཏྟ་རཱ་ས་ངྒ་སྶ ཨ་ནྟ་ར་ཝཱ་ས་ཀ་སྶ ནི་ཀྑེ་པཱ་ཡ.
པ་ཉྩི་མེ, བྷི་ཀྑ་ཝེ, པ་ཙྩ་ཡཱ ཝ་སྶི་ཀ་སཱ་ཊི་ཀཱ་ཡ ནི་ཀྑེ་པཱ་ཡ – གི་ལཱ་ནོ ཝཱ ཧོ་ཏི, ནི་སྶཱི་མཾ ག་ནྟུཾ ཝཱ ཧོ་ཏི, ན་དཱི་པཱ་རཾ ག་ནྟུཾ ཝཱ ཧོ་ཏི, ཨ་གྒ་ལ༹་གུ་ཏྟི་ཝི་ཧཱ་རོ ཝཱ ཧོ་ཏི, ཝ་སྶི་ཀ་སཱ་ཊི་ཀཱ ཨ་ཀ་ཏཱ ཝཱ ཧོ་ཏི ཝི་པྤ་ཀ་ཏཱ ཝཱ. ཨི་མེ ཁོ, བྷི་ཀྑ་ཝེ, པ་ཉྩ པ་ཙྩ་ཡཱ ཝ་སྶི་ཀ་སཱ་ཊི་ཀཱ་ཡ ནི་ཀྑེ་པཱ་ཡཱ་ཏི.
པ་ཙྪི་མ་ཝི་ཀ་པྤ་ནུ་པ་ག་ཙཱི་ཝ་རཱ་དི་ཀ་ཐཱ ནི་ཊྛི་ཏཱ.