༡༨༤. ཝུ་ཌྜྷ་པ་བྦ་ཛི་ཏ་ཝ་ཏྠུ
༣༠༣. ཨ་ཐ ཁོ བྷ་ག་ཝཱ ཀུ་སི་ནཱ་རཱ་ཡཾ ཡ་ཐཱ་བྷི་ར་ནྟཾ ཝི་ཧ་རི་ཏྭཱ ཡེ་ན ཨཱ་ཏུ་མཱ ཏེ་ན ཙཱ་རི་ཀཾ པ་ཀྐཱ་མི མ་ཧ་ཏཱ བྷི་ཀྑུ་ས་ངྒྷེ་ན ས་དྡྷིཾ ཨ་ཌྜྷ་ཏེ་ལ་སེ་ཧི བྷི་ཀྑུ་ས་ཏེ་ཧི. ཏེ་ན ཁོ པ་ན ས་མ་ཡེ་ན ཨ་ཉྙ་ཏ་རོ ཝུ་ཌྜྷ་པ་བྦ་ཛི་ཏོ ཨཱ་ཏུ་མཱ་ཡཾ པ་ཊི་ཝ་ས་ཏི ན་ཧཱ་པི་ཏ་པུ་བྦོ. ཏ་སྶ དྭེ དཱ་ར་ཀཱ ཧོ་ནྟི, མ་ཉྫུ་ཀཱ པ་ཊི་བྷཱ་ནེ་ཡྻ་ཀཱ, ད་ཀྑཱ པ་རི་ཡོ་དཱ་ཏ་སི་པྤཱ ས་ཀེ ཨཱ་ཙ་རི་ཡ་ཀེ ན་ཧཱ་པི་ཏ་ཀ་མྨེ. ཨ་སྶོ་སི ཁོ སོ ཝུ་ཌྜྷ་པ་བྦ་ཛི་ཏོ – ‘‘བྷ་ག་ཝཱ ཀི་ར ཨཱ་ཏུ་མཾ ཨཱ་ག་ཙྪ་ཏི མ་ཧ་ཏཱ བྷི་ཀྑུ་ས་ངྒྷེ་ན ས་དྡྷིཾ ཨ་ཌྜྷ་ཏེ་ལ་སེ་ཧི བྷི་ཀྑུ་ས་ཏེ་ཧཱི’’ཏི. ཨ་ཐ ཁོ སོ ཝུ་ཌྜྷ་པ་བྦ་ཛི་ཏོ ཏེ དཱ་ར་ཀེ ཨེ་ཏ་ད་ཝོ་ཙ – ‘‘བྷ་ག་ཝཱ ཀི་ར, ཏཱ་ཏཱ, ཨཱ་ཏུ་མཾ ཨཱ་ག་ཙྪ་ཏི མ་ཧ་ཏཱ བྷི་ཀྑུ་ས་ངྒྷེ་ན ས་དྡྷིཾ ཨ་ཌྜྷ་ཏེ་ལ་སེ་ཧི བྷི་ཀྑུ་ས་ཏེ་ཧི. ག་ཙྪ་ཐ ཏུ་མྷེ, ཏཱ་ཏཱ, ཁུ་ར་བྷ་ཎྜཾ ཨཱ་དཱ་ཡ ནཱ་ལི༹་ཡཱ་ཝཱ་པ་ཀེ་ན ཨ་ནུ་གྷ་ར་ཀཾ ཨ་ནུ་གྷ་ར་ཀཾ ཨཱ་ཧི་ཎྜ་ཐ, ལོ་ཎ་མྤི, ཏེ་ལ་མྤི, ཏ་ཎྜུ་ལ་མྤི, ཁཱ་ད་ནཱི་ཡ་མྤི སཾ་ཧ་ར་ཐ, བྷ་ག་ཝ་ཏོ ཨཱ་ག་ཏ་སྶ ཡཱ་གུ་པཱ་ནཾ ཀ་རི་སྶཱ་མཱ’’ཏི. ‘‘ཨེ་ཝཾ, ཏཱ་ཏཱ’’ཏི ཁོ ཏེ དཱ་ར་ཀཱ ཏ་སྶ ཝུ་ཌྜྷ་པ་བྦ་ཛི་ཏ་སྶ པ་ཊི་སྶུ་ཎི་ཏྭཱ ཁུ་ར་བྷ་ཎྜཾ ཨཱ་དཱ་ཡ ནཱ་ལི༹་ཡཱ་ཝཱ་པ་ཀེ་ན ཨ་ནུ་གྷ་ར་ཀཾ ཨ་ནུ་གྷ་ར་ཀཾ ཨཱ་ཧི་ཎྜ་ནྟི, ལོ་ཎ་མྤི, ཏེ་ལ་མྤི, ཏ་ཎྜུ་ལ་མྤི, ཁཱ་ད་ནཱི་ཡ་མྤི སཾ་ཧ་ར་ནྟཱ. མ་ནུ་སྶཱ ཏེ དཱ་ར་ཀེ མ་ཉྫུ་ཀེ པ་ཊི་བྷཱ་ནེ་ཡྻ་ཀེ པ་སྶི་ཏྭཱ ཡེ་པི ན ཀཱ་རཱ་པེ་ཏུ་ཀཱ་མཱ ཏེ་པི ཀཱ་རཱ་པེ་ནྟི, ཀཱ་རཱ་པེ་ཏྭཱ་པི བ་ཧུཾ དེ་ནྟི. ཨ་ཐ ཁོ ཏེ དཱ་ར་ཀཱ བ་ཧུཾ ལོ་ཎ་མྤི, ཏེ་ལ་མྤི, ཏ་ཎྜུ་ལ་མྤི, ཁཱ་ད་ནཱི་ཡ་མྤི སཾ་ཧ་རིཾ་སུ.
ཨ་ཐ ཁོ བྷ་ག་ཝཱ ཨ་ནུ་པུ་བྦེ་ན ཙཱ་རི་ཀཾ ཙ་ར་མཱ་ནོ ཡེ་ན ཨཱ་ཏུ་མཱ ཏ་ད་ཝ་ས་རི. ཏ་ཏྲ སུ་དཾ བྷ་ག་ཝཱ ཨཱ་ཏུ་མཱ་ཡཾ ཝི་ཧ་ར་ཏི བྷུ་སཱ་གཱ་རེ. ཨ་ཐ ཁོ སོ ཝུ་ཌྜྷ་པ་བྦ་ཛི་ཏོ ཏ་སྶཱ ར་ཏྟི་ཡཱ ཨ་ཙྩ་ཡེ་ན པ་ཧཱུ་ཏཾ ཡཱ་གུཾ པ་ཊི་ཡཱ་དཱ་པེ་ཏྭཱ བྷ་ག་ཝ་ཏོ ཨུ་པ་ནཱ་མེ་སི – ‘‘པ་ཊི་གྒ་ཎྷཱ་ཏུ མེ, བྷ་ནྟེ, བྷ་ག་ཝཱ ཡཱ་གུ’’ནྟི. ཛཱ་ན་ནྟཱ་པི ཏ་ཐཱ་ག་ཏཱ པུ་ཙྪ་ནྟི…པེ… སཱ་ཝ་ཀཱ་ནཾ ཝཱ སི་ཀྑཱ་པ་དཾ པ་ཉྙ་པེ་སྶཱ་མཱ་ཏི. ཨ་ཐ ཁོ བྷ་ག་ཝཱ ཏཾ ཝུ་ཌྜྷ་པ་བྦ་ཛི་ཏཾ ཨེ་ཏ་ད་ཝོ་ཙ – ‘‘ཀུ་ཏཱ་ཡཾ, བྷི་ཀྑུ ཡཱ་གཱུ’’ཏི? ཨ་ཐ ཁོ སོ ཝུ་ཌྜྷ་པ་བྦ་ཛི་ཏོ བྷ་ག་ཝ་ཏོ ཨེ་ཏ་མ་ཏྠཾ ཨཱ་རོ་ཙེ་སི. ཝི་ག་ར་ཧི བུ་དྡྷོ བྷ་ག་ཝཱ, ‘‘ཨ་ན་ནུ་ཙྪ་ཝི་ཀཾ, མོ་གྷ་པུ་རི་ས, ཨ་ན་ནུ་ལོ་མི་ཀཾ ཨ་པྤ་ཏི་རཱུ་པཾ ཨ་སྶཱ་མ་ཎ་ཀཾ ཨ་ཀ་པྤི་ཡཾ ཨ་ཀ་ར་ཎཱི་ཡཾ. ཀ་ཐ་ཉྷི ནཱ་མ ཏྭཾ, མོ་གྷ་པུ་རི་ས, པ་བྦ་ཛི་ཏོ ཨ་ཀ་པྤི་ཡེ ས་མཱ་ད་པེ་སྶ་སི [ས་མཱ་ད་པེ་སི (ཀ.)]. ནེ་ཏཾ, མོ་གྷ་པུ་རི་ས, ཨ་པྤ་ས་ནྣཱ་ནཾ ཝཱ པ་སཱ་དཱ་ཡ…པེ… ཝི་ག་ར་ཧི་ཏྭཱ དྷ་མྨིཾ ཀ་ཐཾ ཀ་ཏྭཱ བྷི་ཀྑཱུ ཨཱ་མ་ནྟེ་སི ‘ན, བྷི་ཀྑ་ཝེ, པ་བྦ་ཛི་ཏེ་ན ཨ་ཀ་པྤི་ཡེ ས་མཱ་ད་པེ་ཏ་བྦཾ, ཡོ ས་མཱ་ད་པེ་ཡྻ, ཨཱ་པ་ཏྟི དུ་ཀྐ་ཊ་སྶ. ན ཙ, བྷི་ཀྑ་ཝེ, ན་ཧཱ་པི་ཏ་པུ་བྦེ་ན ཁུ་ར་བྷ་ཎྜཾ པ་རི་ཧ་རི་ཏ་བྦཾ. ཡོ པ་རི་ཧ་རེ་ཡྻ, ཨཱ་པ་ཏྟི དུ་ཀྐ་ཊ་སྶཱ’’’ཏི.
ཨ་ཐ ཁོ བྷ་ག་ཝཱ ཨཱ་ཏུ་མཱ་ཡཾ ཡ་ཐཱ་བྷི་ར་ནྟཾ ཝི་ཧ་རི་ཏྭཱ ཡེ་ན སཱ་ཝ་ཏྠི ཏེ་ན ཙཱ་རི་ཀཾ པ་ཀྐཱ་མི. ཨ་ནུ་པུ་བྦེ་ན ཙཱ་རི་ཀཾ ཙ་ར་མཱ་ནོ ཡེ་ན སཱ་ཝ་ཏྠི ཏ་ད་ཝ་ས་རི. ཏ་ཏྲ སུ་དཾ བྷ་ག་ཝཱ སཱ་ཝ་ཏྠི་ཡཾ ཝི་ཧ་ར་ཏི ཛེ་ཏ་ཝ་ནེ ཨ་ནཱ་ཐ་པི་ཎྜི་ཀ་སྶ ཨཱ་རཱ་མེ. ཏེ་ན ཁོ པ་ན ས་མ་ཡེ་ན སཱ་ཝ་ཏྠི་ཡཾ བ་ཧུཾ ཕ་ལ་ཁཱ་ད་ནཱི་ཡཾ ཨུ་པྤ་ནྣཾ ཧོ་ཏི. ཨ་ཐ ཁོ བྷི་ཀྑཱུ་ནཾ ཨེ་ཏ་ད་ཧོ་སི – ‘‘ཀིཾ ནུ ཁོ བྷ་ག་ཝ་ཏཱ ཕ་ལ་ཁཱ་ད་ནཱི་ཡཾ ཨ་ནུ་ཉྙཱ་ཏཾ, ཀིཾ ཨ་ན་ནུ་ཉྙཱ་ཏ’’ནྟི? བྷ་ག་ཝ་ཏོ ཨེ་ཏ་མ་ཏྠཾ ཨཱ་རོ་ཙེ་སུཾ. ‘‘ཨ་ནུ་ཛཱ་ནཱ་མི, བྷི་ཀྑ་ཝེ, ས་བྦཾ ཕ་ལ་ཁཱ་ད་ནཱི་ཡ’’ནྟི.
༣༠༤. ཏེ་ན ཁོ པ་ན ས་མ་ཡེ་ན ས་ངྒྷི་ཀཱ་ནི བཱི་ཛཱ་ནི པུ་གྒ་ལི་ཀཱ་ཡ བྷཱུ་མི་ཡཱ རོ་པི་ཡ་ནྟི, པུ་གྒ་ལི་ཀཱ་ནི བཱི་ཛཱ་ནི ས་ངྒྷི་ཀཱ་ཡ བྷཱུ་མི་ཡཱ རོ་པི་ཡ་ནྟི. བྷ་ག་ཝ་ཏོ ཨེ་ཏ་མ་ཏྠཾ ཨཱ་རོ་ཙེ་སུཾ. ས་ངྒྷི་ཀཱ་ནི, བྷི་ཀྑ་ཝེ, བཱི་ཛཱ་ནི པུ་གྒ་ལི་ཀཱ་ཡ བྷཱུ་མི་ཡཱ རོ་པི་ཏཱ་ནི བྷཱ་གཾ ད་ཏྭཱ པ་རི་བྷུ་ཉྫི་ཏ་བྦཱ་ནི. པུ་གྒ་ལི་ཀཱ་ནི བཱི་ཛཱ་ནི ས་ངྒྷི་ཀཱ་ཡ བྷཱུ་མི་ཡཱ རོ་པི་ཏཱ་ནི བྷཱ་གཾ ད་ཏྭཱ པ་རི་བྷུ་ཉྫི་ཏ་བྦཱ་ནཱི་ཏི.
ཝུ་ཌྜྷ་པ་བྦ་ཛི་ཏ་ཝ་ཏྠུ ནི་ཊྛི་ཏཾ.