༡༧༢. བེ་ལ་ཊྛ་ཀ་ཙྩཱ་ན་ཝ་ཏྠུ
༢༨༤. ཨ་ཐ ཁོ བྷ་ག་ཝཱ ཨ་ནྡྷ་ཀ་ཝི་ནྡེ ཡ་ཐཱ་བྷི་ར་ནྟཾ ཝི་ཧ་རི་ཏྭཱ ཡེ་ན རཱ་ཛ་ག་ཧཾ ཏེ་ན ཙཱ་རི་ཀཾ པ་ཀྐཱ་མི, མ་ཧ་ཏཱ བྷི་ཀྑུ་ས་ངྒྷེ་ན ས་དྡྷིཾ, ཨ་ཌྜྷ་ཏེ་ལ་སེ་ཧི བྷི་ཀྑུ་ས་ཏེ་ཧི. ཏེ་ན ཁོ པ་ན ས་མ་ཡེ་ན བེ་ལ་ཊྛོ ཀ་ཙྩཱ་ནོ རཱ་ཛ་ག་ཧཱ ཨ་ནྡྷ་ཀ་ཝི་ནྡཾ ཨ་དྡྷཱ་ན་མ་གྒ་པྤ་ཊི་པ་ནྣོ ཧོ་ཏི, པ་ཉྩ་མ་ཏྟེ་ཧི ས་ཀ་ཊ་ས་ཏེ་ཧི, ས་བྦེ་ཧེ་ཝ གུ་ལ༹་ཀུ་མྦྷ་པཱུ་རེ་ཧི. ཨ་དྡ་སཱ ཁོ བྷ་ག་ཝཱ བེ་ལ་ཊྛཾ ཀ་ཙྩཱ་ནཾ དཱུ་ར་ཏོ་ཝ ཨཱ་ག་ཙྪ་ནྟཾ, དི་སྭཱ་ན མ་གྒཱ ཨོ་ཀྐ་མྨ ཨ་ཉྙ་ཏ་ར་སྨིཾ རུ་ཀྑ་མཱུ་ལེ ནི་སཱི་དི. ཨ་ཐ ཁོ བེ་ལ་ཊྛོ ཀ་ཙྩཱ་ནོ ཡེ་ན བྷ་ག་ཝཱ ཏེ་ནུ་པ་ས་ངྐ་མི, ཨུ་པ་ས་ངྐ་མི་ཏྭཱ བྷ་ག་ཝ་ནྟཾ ཨ་བྷི་ཝཱ་དེ་ཏྭཱ ཨེ་ཀ་མ་ནྟཾ ཨ་ཊྛཱ་སི. ཨེ་ཀ་མ་ནྟཾ ཋི་ཏོ ཁོ བེ་ལ་ཊྛོ ཀ་ཙྩཱ་ནོ བྷ་ག་ཝ་ནྟཾ ཨེ་ཏ་ད་ཝོ་ཙ – ‘‘ཨི་ཙྪཱ་མ་ཧཾ, བྷ་ནྟེ, ཨེ་ཀ་མེ་ཀ་སྶ བྷི་ཀྑུ་ནོ ཨེ་ཀ་མེ་ཀཾ གུ་ལ༹་ཀུ་མྦྷཾ དཱ་ཏུ’’ནྟི. ‘‘ཏེ་ན ཧི ཏྭཾ, ཀ་ཙྩཱ་ན, ཨེ་ཀཾ་ཡེ་ཝ གུ་ལ༹་ཀུ་མྦྷཾ ཨཱ་ཧ་རཱ’’ཏི. ‘‘ཨེ་ཝཾ, བྷ་ནྟེ’’ཏི ཁོ བེ་ལ་ཊྛོ ཀ་ཙྩཱ་ནོ བྷ་ག་ཝ་ཏོ པ་ཊི་སྶུ་ཎི་ཏྭཱ ཨེ་ཀཾ་ཡེ་ཝ གུ་ལ༹་ཀུ་མྦྷཾ ཨཱ་དཱ་ཡ ཡེ་ན བྷ་ག་ཝཱ ཏེ་ནུ་པ་ས་ངྐ་མི, ཨུ་པ་ས་ངྐ་མི་ཏྭཱ བྷ་ག་ཝ་ནྟཾ ཨེ་ཏ་ད་ཝོ་ཙ – ‘‘ཨཱ་བྷ་ཏོ [ཨཱ་ཧ་ཊོ (སཱི. སྱཱ. ཀ.)], བྷ་ནྟེ, གུ་ལ༹་ཀུ་མྦྷོ; ཀ་ཐཱ་ཧཾ, བྷ་ནྟེ, པ་ཊི་པ་ཛྫཱ་མཱི’’ཏི? ‘‘ཏེ་ན ཧི ཏྭཾ, ཀ་ཙྩཱ་ན, བྷི་ཀྑཱུ་ནཾ གུ་ལ༹ཾ དེ་ཧཱི’’ཏི. ‘‘ཨེ་ཝཾ, བྷ་ནྟེ’’ཏི ཁོ བེ་ལ་ཊྛོ ཀ་ཙྩཱ་ནོ བྷ་ག་ཝ་ཏོ པ་ཊི་སྶུ་ཎི་ཏྭཱ བྷི་ཀྑཱུ་ནཾ གུ་ལ༹ཾ ད་ཏྭཱ བྷ་ག་ཝ་ནྟཾ ཨེ་ཏ་ད་ཝོ་ཙ – ‘‘དི་ནྣོ, བྷ་ནྟེ, བྷི་ཀྑཱུ་ནཾ གུ་ལོ༹, བ་ཧུ ཙཱ་ཡཾ གུ་ལོ༹ ཨ་ཝ་སི་ཊྛོ. ཀ་ཐཱ་ཧཾ, བྷ་ནྟེ, པ་ཊི་པ་ཛྫཱ་མཱི’’ཏི? ‘‘ཏེ་ན ཧི ཏྭཾ, ཀ་ཙྩཱ་ན, བྷི་ཀྑཱུ་ནཾ གུ་ལ༹ཾ ཡཱ་ཝ་ད་ཏྠཾ དེ་ཧཱི’’ཏི. ‘‘ཨེ་ཝཾ, བྷ་ནྟེ’’ཏི ཁོ བེ་ལ་ཊྛོ ཀ་ཙྩཱ་ནོ བྷ་ག་ཝ་ཏོ པ་ཊི་སྶུ་ཎི་ཏྭཱ བྷི་ཀྑཱུ་ནཾ གུ་ལ༹ཾ ཡཱ་ཝ་ད་ཏྠཾ ད་ཏྭཱ བྷ་ག་ཝ་ནྟཾ ཨེ་ཏ་ད་ཝོ་ཙ – ‘‘དི་ནྣོ, བྷ་ནྟེ, བྷི་ཀྑཱུ་ནཾ གུ་ལོ༹ ཡཱ་ཝ་ད་ཏྠོ, བ་ཧུ ཙཱ་ཡཾ གུ་ལོ༹ ཨ་ཝ་སི་ཊྛོ. ཀ་ཐཱ་ཧཾ, བྷ་ནྟེ, པ་ཊི་པ་ཛྫཱ་མཱི’’ཏི? ‘‘ཏེ་ན ཧི ཏྭཾ, ཀ་ཙྩཱ་ན, བྷི་ཀྑཱུ གུ་ལེ༹་ཧི ས་ནྟ་པྤེ་ཧཱི’’ཏི. ‘‘ཨེ་ཝཾ, བྷ་ནྟེ’’ཏི ཁོ བེ་ལ་ཊྛོ ཀ་ཙྩཱ་ནོ བྷ་ག་ཝ་ཏོ པ་ཊི་སྶུ་ཎི་ཏྭཱ བྷི་ཀྑཱུ གུ་ལེ༹་ཧི ས་ནྟ་པྤེ་སི. ཨེ་ཀ་ཙྩེ བྷི་ཀྑཱུ པ་ཏྟེ་པི པཱུ་རེ་སུཾ པ་རི་སྶཱ་ཝ་ནཱ་ནི་པི ཐ་ཝི་ཀཱ་ཡོ་པི པཱུ་རེ་སུཾ. ཨ་ཐ ཁོ བེ་ལ་ཊྛོ ཀ་ཙྩཱ་ནོ བྷི་ཀྑཱུ གུ་ལེ༹་ཧི ས་ནྟ་པྤེ་ཏྭཱ བྷ་ག་ཝ་ནྟཾ ཨེ་ཏ་ད་ཝོ་ཙ – ‘‘ས་ནྟ་པྤི་ཏཱ, བྷ་ནྟེ, བྷི་ཀྑཱུ གུ་ལེ༹་ཧི, བ་ཧུ ཙཱ་ཡཾ གུ་ལོ༹ ཨ་ཝ་སི་ཊྛོ. ཀ་ཐཱ་ཧཾ, བྷ་ནྟེ, པ་ཊི་པ་ཛྫཱ་མཱི’’ཏི? ‘‘ཏེ་ན ཧི ཏྭཾ, ཀ་ཙྩཱ་ན, ཝི་གྷཱ་སཱ་དཱ་ནཾ གུ་ལ༹ཾ དེ་ཧཱི’’ཏི. ‘‘ཨེ་ཝཾ, བྷ་ནྟེ’’ཏི ཁོ བེ་ལ་ཊྛོ ཀ་ཙྩཱ་ནོ བྷ་ག་ཝ་ཏོ པ་ཊི་སྶུ་ཎི་ཏྭཱ ཝི་གྷཱ་སཱ་དཱ་ནཾ གུ་ལ༹ཾ ད་ཏྭཱ བྷ་ག་ཝ་ནྟཾ ཨེ་ཏ་ད་ཝོ་ཙ – ‘‘དི་ནྣོ, བྷ་ནྟེ, ཝི་གྷཱ་སཱ་དཱ་ནཾ གུ་ལོ༹, བ་ཧུ ཙཱ་ཡཾ གུ་ལོ༹ ཨ་ཝ་སི་ཊྛོ. ཀ་ཐཱ་ཧཾ, བྷ་ནྟེ, པ་ཊི་པ་ཛྫཱ་མཱི’’ཏི? ‘‘ཏེ་ན ཧི ཏྭཾ, ཀ་ཙྩཱ་ན, ཝི་གྷཱ་སཱ་དཱ་ནཾ གུ་ལ༹ཾ ཡཱ་ཝ་ད་ཏྠཾ དེ་ཧཱི’’ཏི. ‘‘ཨེ་ཝཾ, བྷ་ནྟེ’’ཏི ཁོ བེ་ལ་ཊྛོ ཀ་ཙྩཱ་ནོ བྷ་ག་ཝ་ཏོ པ་ཊི་སྶུ་ཎི་ཏྭཱ ཝི་གྷཱ་སཱ་དཱ་ནཾ གུ་ལ༹ཾ ཡཱ་ཝ་ད་ཏྠཾ ད་ཏྭཱ བྷ་ག་ཝ་ནྟཾ ཨེ་ཏ་ད་ཝོ་ཙ – ‘‘དི་ནྣོ, བྷ་ནྟེ, ཝི་གྷཱ་སཱ་དཱ་ནཾ གུ་ལོ༹ ཡཱ་ཝ་ད་ཏྠོ, བ་ཧུ ཙཱ་ཡཾ གུ་ལོ༹ ཨ་ཝ་སི་ཊྛོ. ཀ་ཐཱ་ཧཾ, བྷ་ནྟེ, པ་ཊི་པ་ཛྫཱ་མཱི’’ཏི? ‘‘ཏེ་ན ཧི ཏྭཾ, ཀ་ཙྩཱ་ན, ཝི་གྷཱ་སཱ་དེ གུ་ལེ༹་ཧི ས་ནྟ་པྤེ་ཧཱི’’ཏི. ‘‘ཨེ་ཝཾ, བྷ་ནྟེ’’ཏི ཁོ བེ་ལ་ཊྛོ ཀ་ཙྩཱ་ནོ བྷ་ག་ཝ་ཏོ པ་ཊི་སྶུ་ཎི་ཏྭཱ ཝི་གྷཱ་སཱ་དེ གུ་ལེ༹་ཧི ས་ནྟ་པྤེ་སི. ཨེ་ཀ་ཙྩེ ཝི་གྷཱ་སཱ་དཱ ཀོ་ལ་མྦེ་པི གྷ་ཊེ་པི པཱུ་རེ་སུཾ, པི་ཊ་ཀཱ་ནི་པི ཨུ་ཙྪ་ངྒེ་པི པཱུ་རེ་སུཾ. ཨ་ཐ ཁོ བེ་ལ་ཊྛོ ཀ་ཙྩཱ་ནོ ཝི་གྷཱ་སཱ་དེ གུ་ལེ༹་ཧི ས་ནྟ་པྤེ་ཏྭཱ བྷ་ག་ཝ་ནྟཾ ཨེ་ཏ་ད་ཝོ་ཙ – ‘‘ས་ནྟ་པྤི་ཏཱ, བྷ་ནྟེ, ཝི་གྷཱ་སཱ་དཱ གུ་ལེ༹་ཧི, བ་ཧུ ཙཱ་ཡཾ གུ་ལོ༹ ཨ་ཝ་སི་ཊྛོ. ཀ་ཐཱ་ཧཾ, བྷ་ནྟེ, པ་ཊི་པ་ཛྫཱ་མཱི’’ཏི? ‘‘ནཱ་ཧཾ ཏཾ, ཀ་ཙྩཱ་ན, པ་སྶཱ་མི ས་དེ་ཝ་ཀེ ལོ་ཀེ ས་མཱ་ར་ཀེ ས་བྲ་ཧྨ་ཀེ ས་སྶ་མ་ཎ་བྲཱ་ཧྨ་ཎི་ཡཱ པ་ཛཱ་ཡ ས་དེ་ཝ་མ་ནུ་སྶཱ་ཡ ཡ་སྶ སོ གུ་ལོ༹ པ་རི་བྷུ་ཏྟོ ས་མྨཱ པ་རི་ཎཱ་མཾ ག་ཙྪེ་ཡྻ, ཨ་ཉྙ་ཏྲ ཏ་ཐཱ་ག་ཏ་སྶ ཝཱ ཏ་ཐཱ་ག་ཏ་སཱ་ཝ་ཀ་སྶ ཝཱ. ཏེ་ན ཧི ཏྭཾ, ཀ་ཙྩཱ་ན, ཏཾ གུ་ལ༹ཾ ཨ་པྤ་ཧ་རི་ཏེ ཝཱ ཚ་ཌྜེ་ཧི, ཨ་པྤཱ་ཎ་ཀེ ཝཱ ཨུ་ད་ཀེ ཨོ་པི་ལཱ་པེ་ཧཱི’’ཏི. ‘‘ཨེ་ཝཾ, བྷ་ནྟེ’’ཏི ཁོ བེ་ལ་ཊྛོ ཀ་ཙྩཱ་ནོ བྷ་ག་ཝ་ཏོ པ་ཊི་སྶུ་ཎི་ཏྭཱ ཏཾ གུ་ལ༹ཾ ཨ་པྤཱ་ཎ་ཀེ ཨུ་ད་ཀེ ཨོ་པི་ལཱ་པེ་ཏི. ཨ་ཐ ཁོ སོ གུ་ལོ༹ ཨུ་ད་ཀེ པ་ཀྑི་ཏྟོ ཙི་ཙྩི་ཊཱ་ཡ་ཏི ཙི་ཊི་ཙི་ཊཱ་ཡ་ཏི པ་དྷཱུ་པཱ་ཡ་ཏི [ས་ནྡྷཱུ་པཱ་ཡ་ཏི (སཱི. སྱཱ.)] ས་མྤ་དྷཱུ་པཱ་ཡ་ཏི. སེ་ཡྻ་ཐཱ་པི ནཱ་མ ཕཱ་ལོ དི་ཝ་སཾ་ས་ནྟ་ཏྟོ ཨུ་ད་ཀེ པ་ཀྑི་ཏྟོ ཙི་ཙྩི་ཊཱ་ཡ་ཏི ཙི་ཊི་ཙི་ཊཱ་ཡ་ཏི པ་དྷཱུ་པཱ་ཡ་ཏི ས་མྤ་དྷཱུ་པཱ་ཡ་ཏི, ཨེ་ཝ་མེ་ཝ སོ གུ་ལོ༹ ཨུ་ད་ཀེ པ་ཀྑི་ཏྟོ ཙི་ཙྩི་ཊཱ་ཡ་ཏི ཙི་ཊི་ཙི་ཊཱ་ཡ་ཏི པ་དྷཱུ་པཱ་ཡ་ཏི ས་མྤ་དྷཱུ་པཱ་ཡ་ཏི.
ཨ་ཐ ཁོ བེ་ལ་ཊྛོ ཀ་ཙྩཱ་ནོ སཾ་ཝི་གྒོ ལོ་མ་ཧ་ཊྛ་ཛཱ་ཏོ ཡེ་ན བྷ་ག་ཝཱ ཏེ་ནུ་པ་ས་ངྐ་མི, ཨུ་པ་ས་ངྐ་མི་ཏྭཱ བྷ་ག་ཝ་ནྟཾ ཨ་བྷི་ཝཱ་དེ་ཏྭཱ ཨེ་ཀ་མ་ནྟཾ ནི་སཱི་དི. ཨེ་ཀ་མ་ནྟཾ ནི་སི་ནྣ་སྶ ཁོ བེ་ལ་ཊྛ་སྶ ཀ་ཙྩཱ་ན་སྶ བྷ་ག་ཝཱ ཨ་ནུ་པུ་བྦིཾ ཀ་ཐཾ ཀ་ཐེ་སི, སེ་ཡྻ་ཐི་དཾ – ‘‘དཱ་ན་ཀ་ཐཾ སཱི་ལ་ཀ་ཐཾ ས་གྒ་ཀ་ཐཾ, ཀཱ་མཱ་ནཾ ཨཱ་དཱི་ན་ཝཾ ཨོ་ཀཱ་རཾ སཾ་ཀི་ལེ་སཾ, ནེ་ཀྑ་མྨེ ཨཱ་ནི་སཾ་སཾ པ་ཀཱ་སེ་སི. ཡ་དཱ བྷ་ག་ཝཱ ཨ་ཉྙཱ་སི བེ་ལ་ཊྛཾ ཀ་ཙྩཱ་ནཾ ཀ་ལླ་ཙི་ཏྟཾ, མུ་དུ་ཙི་ཏྟཾ, ཝི་ནཱི་ཝ་ར་ཎ་ཙི་ཏྟཾ, ཨུ་ད་གྒ་ཙི་ཏྟཾ, པ་ས་ནྣ་ཙི་ཏྟཾ, ཨ་ཐ ཡཱ བུ་དྡྷཱ་ནཾ སཱ་མུ་ཀྐཾ་སི་ཀཱ དྷ་མྨ་དེ་ས་ནཱ, ཏཾ པ་ཀཱ་སེ་སི…པེ… ཨེ་ཝ་མེ་ཝ བེ་ལ་ཊྛ་སྶ ཀ་ཙྩཱ་ན་སྶ ཏ་སྨིཾ་ཡེ་ཝ ཨཱ་ས་ནེ ཝི་ར་ཛཾ ཝཱི་ཏ་མ་ལཾ དྷ་མྨ་ཙ་ཀྑུཾ ཨུ་ད་པཱ་དི – ཡཾ ཀི་ཉྩི ས་མུ་ད་ཡ་དྷ་མྨཾ ས་བྦཾ ཏཾ ནི་རོ་དྷ་དྷ་མྨ་ནྟི. ཨ་ཐ ཁོ བེ་ལ་ཊྛོ ཀ་ཙྩཱ་ནོ དི་ཊྛ་དྷ་མྨོ པ་ཏྟ་དྷ་མྨོ ཝི་དི་ཏ་དྷ་མྨོ པ་རི་ཡོ་གཱ་ལ༹ྷ་དྷ་མྨོ ཏི་ཎྞ་ཝི་ཙི་ཀི་ཙྪོ ཝི་ག་ཏ་ཀ་ཐཾ་ཀ་ཐོ ཝེ་སཱ་ར་ཛྫ་པྤ་ཏྟོ ཨ་པ་ར་པྤ་ཙྩ་ཡོ ས་ཏྠུ་སཱ་ས་ནེ བྷ་ག་ཝ་ནྟཾ ཨེ་ཏ་ད་ཝོ་ཙ – ‘‘ཨ་བྷི་ཀྐ་ནྟཾ, བྷ་ནྟེ. ཨ་བྷི་ཀྐ་ནྟཾ, བྷ་ནྟེ. སེ་ཡྻ་ཐཱ་པི, བྷ་ནྟེ, ནི་ཀྐུ་ཛྫི་ཏཾ ཝཱ ཨུ་ཀྐུ་ཛྫེ་ཡྻ…པེ… ཨེ་ཝ་མེ་ཝཾ ཁོ བྷ་ག་ཝ་ཏཱ ཨ་ནེ་ཀ་པ་རི་ཡཱ་ཡེ་ན དྷ་མྨོ པ་ཀཱ་སི་ཏོ. ཨེ་སཱ་ཧཾ, བྷ་ནྟེ, བྷ་ག་ཝ་ནྟཾ ས་ར་ཎཾ ག་ཙྪཱ་མི, དྷ་མྨ་ཉྩ, བྷི་ཀྑུ་ས་ངྒྷ་ཉྩ. ཨུ་པཱ་ས་ཀཾ མཾ བྷ་ག་ཝཱ དྷཱ་རེ་ཏུ ཨ་ཛྫ་ཏ་གྒེ པཱ་ཎུ་པེ་ཏཾ ས་ར་ཎ་ག་ཏ’’ནྟི.
ཨ་ཐ ཁོ བྷ་ག་ཝཱ ཨ་ནུ་པུ་བྦེ་ན ཙཱ་རི་ཀཾ ཙ་ར་མཱ་ནོ ཡེ་ན རཱ་ཛ་ག་ཧཾ ཏ་ད་ཝ་ས་རི. ཏ་ཏྲ སུ་དཾ བྷ་ག་ཝཱ རཱ་ཛ་ག་ཧེ ཝི་ཧ་ར་ཏི ཝེ་ལུ༹་ཝ་ནེ ཀ་ལ་ནྡ་ཀ་ནི་ཝཱ་པེ. ཏེ་ན ཁོ པ་ན ས་མ་ཡེ་ན རཱ་ཛ་ག་ཧེ གུ་ལོ༹ ཨུ་སྶ་ནྣོ ཧོ་ཏི. བྷི་ཀྑཱུ – གི་ལཱ་ན་སྶེ་ཝ བྷ་ག་ཝ་ཏཱ གུ་ལོ༹ ཨ་ནུ་ཉྙཱ་ཏོ, ནོ ཨ་གི་ལཱ་ན་སྶཱ་ཏི – ཀུ་ཀྐུ་ཙྩཱ་ཡ་ནྟཱ གུ་ལ༹ཾ ན བྷུ་ཉྫ་ནྟི. བྷ་ག་ཝ་ཏོ ཨེ་ཏ་མ་ཏྠཾ ཨཱ་རོ་ཙེ་སུཾ. ཨ་ནུ་ཛཱ་ནཱ་མི, བྷི་ཀྑ་ཝེ, གི་ལཱ་ན་སྶ གུ་ལ༹ཾ, ཨ་གི་ལཱ་ན་སྶ གུ་ལོ༹་ད་ཀ་ནྟི.
བེ་ལ་ཊྛ་ཀ་ཙྩཱ་ན་ཝ་ཏྠུ ནི་ཊྛི་ཏཾ.