༡༤༣. ཝ་ཏྠུ་ཋ་པ་ནཱ་དི

༢༣༩. ཨི་དྷ པ་ན, བྷི་ཀྑ་ཝེ, བྷི་ཀྑུ ཏ་ད་ཧུ པ་ཝཱ་ར་ཎཱ་ཡ ས་ངྒྷ་མ་ཛ྄ཛྷེ ཨུ་དཱ་ཧ་རེ་ཡྻ – ‘‘སུ་ཎཱ་ཏུ མེ, བྷ་ནྟེ, ས་ངྒྷོ. ཨི་དཾ ཝ་ཏྠུ པ་ཉྙཱ་ཡ་ཏི, ན པུ་གྒ་ལོ. ཡ་དི ས་ངྒྷ་སྶ པ་ཏྟ་ཀ་ལླཾ, ཝ་ཏྠུཾ ཋ་པེ་ཏྭཱ ས་ངྒྷོ པ་ཝཱ་རེ་ཡྻཱ’’ཏི. སོ ཨེ་ཝ་མ་སྶ ཝ་ཙ་ནཱི་ཡོ – ‘‘བྷ་ག་ཝ་ཏཱ ཁོ, ཨཱ་ཝུ་སོ, ཝི་སུ་དྡྷཱ་ནཾ པ་ཝཱ་ར་ཎཱ པ་ཉྙ་ཏྟཱ. ས་ཙེ ཝ་ཏྠུ པ་ཉྙཱ་ཡ་ཏི, ན པུ་གྒ་ལོ, ཨི་དཱ་ནེ་ཝ ནཾ ཝ་དེ་ཧཱི’’ཏི.

ཨི་དྷ པ་ན, བྷི་ཀྑ་ཝེ, བྷི་ཀྑུ ཏ་ད་ཧུ པ་ཝཱ་ར་ཎཱ་ཡ ས་ངྒྷ་མ་ཛ྄ཛྷེ ཨུ་དཱ་ཧ་རེ་ཡྻ – ‘‘སུ་ཎཱ་ཏུ མེ, བྷ་ནྟེ, ས་ངྒྷོ. ཨ་ཡཾ པུ་གྒ་ལོ པ་ཉྙཱ་ཡ་ཏི, ན ཝ་ཏྠུ. ཡ་དི ས་ངྒྷ་སྶ པ་ཏྟ་ཀ་ལླཾ, པུ་གྒ་ལཾ ཋ་པེ་ཏྭཱ ས་ངྒྷོ པ་ཝཱ་རེ་ཡྻཱ’’ཏི. སོ ཨེ་ཝ་མ་སྶ ཝ་ཙ་ནཱི་ཡོ – ‘‘བྷ་ག་ཝ་ཏཱ ཁོ, ཨཱ་ཝུ་སོ, ས་མ་གྒཱ་ནཾ པ་ཝཱ་ར་ཎཱ པ་ཉྙ་ཏྟཱ. ས་ཙེ པུ་གྒ་ལོ པ་ཉྙཱ་ཡ་ཏི, ན ཝ་ཏྠུ, ཨི་དཱ་ནེ་ཝ ནཾ ཝ་དེ་ཧཱི’’ཏི.

ཨི་དྷ པ་ན, བྷི་ཀྑ་ཝེ, བྷི་ཀྑུ ཏ་ད་ཧུ པ་ཝཱ་ར་ཎཱ་ཡ ས་ངྒྷ་མ་ཛ྄ཛྷེ ཨུ་དཱ་ཧ་རེ་ཡྻ – ‘‘སུ་ཎཱ་ཏུ མེ, བྷ་ནྟེ, ས་ངྒྷོ. ཨི་དཾ ཝ་ཏྠུ ཙ པུ་གྒ་ལོ ཙ པ་ཉྙཱ་ཡ་ཏི. ཡ་དི ས་ངྒྷ་སྶ པ་ཏྟ་ཀ་ལླཾ, ཝ་ཏྠུ་ཉྩ པུ་གྒ་ལ་ཉྩ ཋ་པེ་ཏྭཱ ས་ངྒྷོ པ་ཝཱ་རེ་ཡྻཱ’’ཏི. སོ ཨེ་ཝ་མ་སྶ ཝ་ཙ་ནཱི་ཡོ – ‘‘བྷ་ག་ཝ་ཏཱ ཁོ, ཨཱ་ཝུ་སོ, ཝི་སུ་དྡྷཱ་ན་ཉྩ ས་མ་གྒཱ་ན་ཉྩ པ་ཝཱ་ར་ཎཱ པ་ཉྙ་ཏྟཱ. ས་ཙེ ཝ་ཏྠུ ཙ པུ་གྒ་ལོ ཙ པ་ཉྙཱ་ཡ་ཏི, ཨི་དཱ་ནེ་ཝ ནཾ ཝ་དེ་ཧཱི’’ཏི.

པུ་བྦེ ཙེ, བྷི་ཀྑ་ཝེ, པ་ཝཱ་ར་ཎཱ་ཡ ཝ་ཏྠུ པ་ཉྙཱ་ཡ་ཏི, པ་ཙྪཱ པུ་གྒ་ལོ, ཀ་ལླཾ ཝ་ཙ་ནཱ་ཡ. པུ་བྦེ ཙེ, བྷི་ཀྑ་ཝེ, པ་ཝཱ་ར་ཎཱ་ཡ པུ་གྒ་ལོ པ་ཉྙཱ་ཡ་ཏི, པ་ཙྪཱ ཝ་ཏྠུ, ཀ་ལླཾ ཝ་ཙ་ནཱ་ཡ. པུ་བྦེ ཙེ, བྷི་ཀྑ་ཝེ, པ་ཝཱ་ར་ཎཱ་ཡ ཝ་ཏྠུ ཙ པུ་གྒ་ལོ ཙ པ་ཉྙཱ་ཡ་ཏི, ཏཾ ཙེ ཀ་ཏཱ་ཡ པ་ཝཱ་ར་ཎཱ་ཡ ཨུ་ཀྐོ་ཊེ་ཏི, ཨུ་ཀྐོ་ཊ་ན་ཀཾ པཱ་ཙི་ཏྟི་ཡ་ནྟི.

ཝ་ཏྠུ་ཋ་པ་ནཱ་དི ནི་ཊྛི་ཏཱ.