༩༤. ས་བྷཱ་གཱ་པ་ཏྟི་པ་ཊི་ཀ་མྨ་ཝི་དྷི
༡༧༡. ཏེ་ན ཁོ པ་ན ས་མ་ཡེ་ན ཨ་ཉྙ་ཏ་ར་སྨིཾ ཨཱ་ཝཱ་སེ ཏ་ད་ཧུ་པོ་ས་ཐེ ས་བྦོ ས་ངྒྷོ ས་བྷཱ་གཾ ཨཱ་པ་ཏྟིཾ ཨཱ་པ་ནྣོ ཧོ་ཏི. ཨ་ཐ ཁོ ཏེ་སཾ བྷི་ཀྑཱུ་ནཾ ཨེ་ཏ་ད་ཧོ་སི – ‘‘བྷ་ག་ཝ་ཏཱ པ་ཉྙ་ཏྟཾ ‘ན ས་བྷཱ་གཱ ཨཱ་པ་ཏྟི དེ་སེ་ཏ་བྦཱ, ན ས་བྷཱ་གཱ ཨཱ་པ་ཏྟི པ་ཊི་གྒ་ཧེ་ཏ་བྦཱ’ཏི. ཨ་ཡ་ཉྩ ས་བྦོ ས་ངྒྷོ ས་བྷཱ་གཾ ཨཱ་པ་ཏྟིཾ ཨཱ་པ་ནྣོ. ཀ་ཐཾ ནུ ཁོ ཨ་མྷེ་ཧི པ་ཊི་པ་ཛྫི་ཏ་བྦ’’ནྟི? བྷ་ག་ཝ་ཏོ ཨེ་ཏ་མ་ཏྠཾ ཨཱ་རོ་ཙེ་སུཾ.
ཨི་དྷ པ་ན, བྷི་ཀྑ་ཝེ, ཨ་ཉྙ་ཏ་ར་སྨིཾ ཨཱ་ཝཱ་སེ ཏ་ད་ཧུ་པོ་ས་ཐེ ས་བྦོ ས་ངྒྷོ ས་བྷཱ་གཾ ཨཱ་པ་ཏྟིཾ ཨཱ་པ་ནྣོ ཧོ་ཏི. ཏེ་ཧི, བྷི་ཀྑ་ཝེ, བྷི་ཀྑཱུ་ཧི ཨེ་ཀོ བྷི་ཀྑུ སཱ་མ་ནྟཱ ཨཱ་ཝཱ་སཱ ས་ཛྫུ་ཀཾ པཱ་ཧེ་ཏ་བྦོ – ག་ཙྪཱ་ཝུ་སོ, ཏཾ ཨཱ་པ་ཏྟིཾ པ་ཊི་ཀ་རི་ཏྭཱ ཨཱ་ག་ཙྪ; མ་ཡཾ ཏེ ས་ནྟི་ཀེ ཨཱ་པ་ཏྟིཾ པ་ཊི་ཀ་རི་སྶཱ་མཱ་ཏི. ཨེ་ཝ་ཉྩེ་ཏཾ ལ་བྷེ་ཐ, ཨི་ཙྩེ་ཏཾ ཀུ་ས་ལཾ. ནོ ཙེ ལ་བྷེ་ཐ, བྱ་ཏྟེ་ན བྷི་ཀྑུ་ནཱ པ་ཊི་བ་ལེ་ན ས་ངྒྷོ ཉཱ་པེ་ཏ་བྦོ –
‘‘སུ་ཎཱ་ཏུ མེ, བྷ་ནྟེ, ས་ངྒྷོ. ཨ་ཡཾ ས་བྦོ ས་ངྒྷོ ས་བྷཱ་གཾ ཨཱ་པ་ཏྟིཾ ཨཱ་པ་ནྣོ. ཡ་དཱ ཨ་ཉྙཾ བྷི་ཀྑུཾ སུ་དྡྷཾ ཨ་ནཱ་པ་ཏྟི་ཀཾ པ་སྶི་སྶ་ཏི, ཏ་དཱ ཏ་སྶ ས་ནྟི་ཀེ ཏཾ ཨཱ་པ་ཏྟིཾ པ་ཊི་ཀ་རི་སྶ་ཏཱི’’ཏི ཝ་ཏྭཱ ཨུ་པོ་ས་ཐོ ཀཱ་ཏ་བྦོ, པཱ་ཏི་མོ་ཀྑཾ ཨུ་དྡི་སི་ཏ་བྦཾ, ན ཏྭེ་ཝ ཏ་པྤ་ཙྩ་ཡཱ ཨུ་པོ་ས་ཐ་སྶ ཨ་ནྟ་རཱ་ཡོ ཀཱ་ཏ་བྦོ.
ཨི་དྷ པ་ན, བྷི་ཀྑ་ཝེ, ཨ་ཉྙ་ཏ་ར་སྨིཾ ཨཱ་ཝཱ་སེ ཏ་ད་ཧུ་པོ་ས་ཐེ ས་བྦོ ས་ངྒྷོ ས་བྷཱ་གཱ་ཡ ཨཱ་པ་ཏྟི་ཡཱ ཝེ་མ་ཏི་ཀོ ཧོ་ཏི. བྱ་ཏྟེ་ན བྷི་ཀྑུ་ནཱ པ་ཊི་བ་ལེ་ན ས་ངྒྷོ ཉཱ་པེ་ཏ་བྦོ –
‘‘སུ་ཎཱ་ཏུ མེ, བྷ་ནྟེ, ས་ངྒྷོ. ཨ་ཡཾ ས་བྦོ ས་ངྒྷོ ས་བྷཱ་གཱ་ཡ ཨཱ་པ་ཏྟི་ཡཱ ཝེ་མ་ཏི་ཀོ. ཡ་དཱ ནི་བྦེ་མ་ཏི་ཀོ བྷ་ཝི་སྶ་ཏི, ཏ་དཱ ཏཾ ཨཱ་པ་ཏྟིཾ པ་ཊི་ཀ་རི་སྶ་ཏཱི’’ཏི ཝ་ཏྭཱ ཨུ་པོ་ས་ཐོ ཀཱ་ཏ་བྦོ, པཱ་ཏི་མོ་ཀྑཾ ཨུ་དྡི་སི་ཏ་བྦཾ; ན ཏྭེ་ཝ ཏ་པྤ་ཙྩ་ཡཱ ཨུ་པོ་ས་ཐ་སྶ ཨ་ནྟ་རཱ་ཡོ ཀཱ་ཏ་བྦོ.
ཨི་དྷ པ་ན, བྷི་ཀྑ་ཝེ, ཨ་ཉྙ་ཏ་ར་སྨིཾ ཨཱ་ཝཱ་སེ ཝ་སྶཱུ་པ་ག་ཏོ ས་ངྒྷོ ས་བྷཱ་གཾ ཨཱ་པ་ཏྟིཾ ཨཱ་པ་ནྣོ ཧོ་ཏི. ཏེ་ཧི, བྷི་ཀྑ་ཝེ, བྷི་ཀྑཱུ་ཧི ཨེ་ཀོ བྷི་ཀྑུ སཱ་མ་ནྟཱ ཨཱ་ཝཱ་སཱ ས་ཛྫུ་ཀཾ པཱ་ཧེ་ཏ་བྦོ – ག་ཙྪཱ་ཝུ་སོ, ཏཾ ཨཱ་པ་ཏྟིཾ པ་ཊི་ཀ་རི་ཏྭཱ ཨཱ་ག་ཙྪ; མ་ཡཾ ཏེ ས་ནྟི་ཀེ ཏཾ ཨཱ་པ་ཏྟིཾ པ་ཊི་ཀ་རི་སྶཱ་མཱ་ཏི. ཨེ་ཝ་ཉྩེ་ཏཾ ལ་བྷེ་ཐ, ཨི་ཙྩེ་ཏཾ ཀུ་ས་ལཾ. ནོ ཙེ ལ་བྷེ་ཐ, ཨེ་ཀོ བྷི་ཀྑུ ས་ཏྟཱ་ཧ་ཀཱ་ལི་ཀཾ པཱ་ཧེ་ཏ་བྦོ – ག་ཙྪཱ་ཝུ་སོ, ཏཾ ཨཱ་པ་ཏྟིཾ པ་ཊི་ཀ་རི་ཏྭཱ ཨཱ་ག་ཙྪ; མ་ཡཾ ཏེ ས་ནྟི་ཀེ ཏཾ ཨཱ་པ་ཏྟིཾ པ་ཊི་ཀ་རི་སྶཱ་མཱ་ཏི.
ཏེ་ན ཁོ པ་ན ས་མ་ཡེ་ན ཨ་ཉྙ་ཏ་ར་སྨིཾ ཨཱ་ཝཱ་སེ ས་བྦོ ས་ངྒྷོ ས་བྷཱ་གཾ ཨཱ་པ་ཏྟིཾ ཨཱ་པ་ནྣོ ཧོ་ཏི. སོ ན ཛཱ་ནཱ་ཏི ཏ་སྶཱ ཨཱ་པ་ཏྟི་ཡཱ ནཱ་མ་གོ་ཏྟཾ. ཏ་ཏྠ ཨ་ཉྙོ བྷི་ཀྑུ ཨཱ་ག་ཙྪ་ཏི བ་ཧུ་སྶུ་ཏོ ཨཱ་ག་ཏཱ་ག་མོ དྷ་མྨ་དྷ་རོ ཝི་ན་ཡ་དྷ་རོ མཱ་ཏི་ཀཱ་དྷ་རོ པ་ཎྜི་ཏོ བྱ་ཏྟོ མེ་དྷཱ་ཝཱི ལ་ཛྫཱི ཀུ་ཀྐུ་ཙྩ་ཀོ སི་ཀྑཱ་ཀཱ་མོ. ཏ་མེ་ནཾ ཨ་ཉྙ་ཏ་རོ བྷི་ཀྑུ ཡེ་ན སོ བྷི་ཀྑུ ཏེ་ནུ་པ་ས་ངྐ་མི, ཨུ་པ་ས་ངྐ་མི་ཏྭཱ ཏཾ བྷི་ཀྑུཾ ཨེ་ཏ་ད་ཝོ་ཙ – ‘‘ཡོ ནུ ཁོ, ཨཱ་ཝུ་སོ, ཨེ་ཝ་ཉྩེ་ཝ་ཉྩ ཀ་རོ་ཏི, ཀིཾ ནཱ་མ སོ ཨཱ་པ་ཏྟིཾ ཨཱ་པ་ཛྫ་ཏཱི’’ཏི? སོ ཨེ་ཝ་མཱ་ཧ – ‘‘ཡོ ཁོ, ཨཱ་ཝུ་སོ, ཨེ་ཝ་ཉྩེ་ཝ་ཉྩ ཀ་རོ་ཏི, ཨི་མཾ ནཱ་མ སོ ཨཱ་པ་ཏྟིཾ ཨཱ་པ་ཛྫ་ཏི. ཨི་མཾ ནཱ་མ ཏྭཾ, ཨཱ་ཝུ་སོ, ཨཱ་པ་ཏྟིཾ ཨཱ་པ་ནྣོ; པ་ཊི་ཀ་རོ་ཧི ཏཾ ཨཱ་པ་ཏྟི’’ནྟི. སོ ཨེ་ཝ་མཱ་ཧ – ‘‘ན ཁོ ཨ་ཧཾ, ཨཱ་ཝུ་སོ, ཨེ་ཀོ་ཝ ཨི་མཾ ཨཱ་པ་ཏྟིཾ ཨཱ་པ་ནྣོ; ཨ་ཡཾ ས་བྦོ ས་ངྒྷོ ཨི་མཾ ཨཱ་པ་ཏྟིཾ ཨཱ་པ་ནྣོ’’ཏི. སོ ཨེ་ཝ་མཱ་ཧ – ‘‘ཀིཾ ཏེ, ཨཱ་ཝུ་སོ, ཀ་རི་སྶ་ཏི པ་རོ ཨཱ་པ་ནྣོ ཝཱ ཨ་ནཱ་པ་ནྣོ ཝཱ. ཨི་ངྒྷ, ཏྭཾ, ཨཱ་ཝུ་སོ, ས་ཀཱ་ཡ ཨཱ་པ་ཏྟི་ཡཱ ཝུ་ཊྛཱ་ཧཱི’’ཏི. ཨ་ཐ ཁོ སོ བྷི་ཀྑུ ཏ་སྶ བྷི་ཀྑུ་ནོ ཝ་ཙ་ནེ་ན ཏཾ ཨཱ་པ་ཏྟིཾ པ་ཊི་ཀ་རི་ཏྭཱ ཡེ་ན ཏེ བྷི་ཀྑཱུ ཏེ་ནུ་པ་ས་ངྐ་མི, ཨུ་པ་ས་ངྐ་མི་ཏྭཱ ཏེ བྷི་ཀྑཱུ ཨེ་ཏ་ད་ཝོ་ཙ – ‘‘ཡོ ཀི་ར, ཨཱ་ཝུ་སོ, ཨེ་ཝ་ཉྩེ་ཝ་ཉྩ ཀ་རོ་ཏི, ཨི་མཾ ནཱ་མ སོ ཨཱ་པ་ཏྟིཾ ཨཱ་པ་ཛྫ་ཏི. ཨི་མཾ ནཱ་མ ཏུ་མྷེ, ཨཱ་ཝུ་སོ, ཨཱ་པ་ཏྟིཾ ཨཱ་པ་ནྣཱ; པ་ཊི་ཀ་རོ་ཐ ཏཾ ཨཱ་པ་ཏྟི’’ནྟི. ཨ་ཐ ཁོ ཏེ བྷི་ཀྑཱུ ན ཨི་ཙྪིཾ་སུ ཏ་སྶ བྷི་ཀྑུ་ནོ ཝ་ཙ་ནེ་ན ཏཾ ཨཱ་པ་ཏྟིཾ པ་ཊི་ཀཱ་ཏུཾ. བྷ་ག་ཝ་ཏོ ཨེ་ཏ་མ་ཏྠཾ ཨཱ་རོ་ཙེ་སུཾ.
ཨི་དྷ པ་ན, བྷི་ཀྑ་ཝེ, ཨ་ཉྙ་ཏ་ར་སྨིཾ ཨཱ་ཝཱ་སེ ས་བྦོ ས་ངྒྷོ ས་བྷཱ་གཾ ཨཱ་པ་ཏྟིཾ ཨཱ་པ་ནྣོ ཧོ་ཏི. སོ ན ཛཱ་ནཱ་ཏི ཏ་སྶཱ ཨཱ་པ་ཏྟི་ཡཱ ནཱ་མ་གོ་ཏྟཾ. ཏ་ཏྠ ཨ་ཉྙོ བྷི་ཀྑུ ཨཱ་ག་ཙྪ་ཏི བ་ཧུ་སྶུ་ཏོ ཨཱ་ག་ཏཱ་ག་མོ དྷ་མྨ་དྷ་རོ ཝི་ན་ཡ་དྷ་རོ མཱ་ཏི་ཀཱ་དྷ་རོ པ་ཎྜི་ཏོ བྱ་ཏྟོ མེ་དྷཱ་ཝཱི ལ་ཛྫཱི ཀུ་ཀྐུ་ཙྩ་ཀོ སི་ཀྑཱ་ཀཱ་མོ. ཏ་མེ་ནཾ ཨ་ཉྙ་ཏ་རོ བྷི་ཀྑུ ཡེ་ན སོ བྷི་ཀྑུ ཏེ་ནུ་པ་ས་ངྐ་མི, ཨུ་པ་ས་ངྐ་མི་ཏྭཱ ཏཾ བྷི་ཀྑུཾ ཨེ་ཝཾ ཝ་དེ་ཏི – ‘‘ཡོ ནུ ཁོ, ཨཱ་ཝུ་སོ, ཨེ་ཝ་ཉྩེ་ཝ་ཉྩ ཀ་རོ་ཏི, ཀིཾ ནཱ་མ སོ ཨཱ་པ་ཏྟིཾ ཨཱ་པ་ཛྫ་ཏཱི’’ཏི? སོ ཨེ་ཝཾ ཝ་དེ་ཏི – ‘‘ཡོ ཁོ, ཨཱ་ཝུ་སོ, ཨེ་ཝ་ཉྩེ་ཝ་ཉྩ ཀ་རོ་ཏི, ཨི་མཾ ནཱ་མ སོ ཨཱ་པ་ཏྟིཾ ཨཱ་པ་ཛྫ་ཏི. ཨི་མཾ ནཱ་མ ཏྭཾ, ཨཱ་ཝུ་སོ, ཨཱ་པ་ཏྟིཾ ཨཱ་པ་ནྣོ; པ་ཊི་ཀ་རོ་ཧི ཏཾ ཨཱ་པ་ཏྟི’’ནྟི. སོ ཨེ་ཝཾ ཝ་དེ་ཏི – ‘‘ན ཁོ ཨ་ཧཾ, ཨཱ་ཝུ་སོ, ཨེ་ཀོ་ཝ ཨི་མཾ ཨཱ་པ་ཏྟིཾ ཨཱ་པ་ནྣོ. ཨ་ཡཾ ས་བྦོ ས་ངྒྷོ ཨི་མཾ ཨཱ་པ་ཏྟིཾ ཨཱ་པ་ནྣོ’’ཏི. སོ ཨེ་ཝཾ ཝ་དེ་ཏི – ‘‘ཀིཾ ཏེ, ཨཱ་ཝུ་སོ, ཀ་རི་སྶ་ཏི པ་རོ ཨཱ་པ་ནྣོ ཝཱ ཨ་ནཱ་པ་ནྣོ ཝཱ. ཨི་ངྒྷ, ཏྭཾ, ཨཱ་ཝུ་སོ, ས་ཀཱ་ཡ ཨཱ་པ་ཏྟི་ཡཱ ཝུ་ཊྛཱ་ཧཱི’’ཏི. སོ ཙེ, བྷི་ཀྑ་ཝེ, བྷི་ཀྑུ ཏ་སྶ བྷི་ཀྑུ་ནོ ཝ་ཙ་ནེ་ན ཏཾ ཨཱ་པ་ཏྟིཾ པ་ཊི་ཀ་རི་ཏྭཱ ཡེ་ན ཏེ བྷི་ཀྑཱུ ཏེ་ནུ་པ་ས་ངྐ་མི, ཨུ་པ་ས་ངྐ་མི་ཏྭཱ ཏེ བྷི་ཀྑཱུ ཨེ་ཝཾ ཝ་དེ་ཏི – ‘‘ཡོ ཀི་ར, ཨཱ་ཝུ་སོ, ཨེ་ཝ་ཉྩེ་ཝ་ཉྩ ཀ་རོ་ཏི ཨི་མཾ ནཱ་མ སོ ཨཱ་པ་ཏྟིཾ ཨཱ་པ་ཛྫ་ཏི, ཨི་མཾ ནཱ་མ ཏུ་མྷེ ཨཱ་ཝུ་སོ ཨཱ་པ་ཏྟིཾ ཨཱ་པ་ནྣཱ, པ་ཊི་ཀ་རོ་ཐ ཏཾ ཨཱ་པ་ཏྟི’’ནྟི. ཏེ ཙེ, བྷི་ཀྑ་ཝེ, བྷི་ཀྑཱུ ཏ་སྶ བྷི་ཀྑུ་ནོ ཝ་ཙ་ནེ་ན ཏཾ ཨཱ་པ་ཏྟིཾ པ་ཊི་ཀ་རེ་ཡྻུཾ, ཨི་ཙྩེ་ཏཾ ཀུ་ས་ལཾ. ནོ ཙེ པ་ཊི་ཀ་རེ་ཡྻུཾ, ན ཏེ, བྷི་ཀྑ་ཝེ, བྷི་ཀྑཱུ ཏེ་ན བྷི་ཀྑུ་ནཱ ཨ་ཀཱ་མཱ ཝ་ཙ་ནཱི་ཡཱ་ཏི.
ཙོ་ད་ནཱ་ཝ་ཏྠུ་བྷཱ་ཎ་ཝཱ་རོ ནི་ཊྛི་ཏོ དུ་ཏི་ཡོ.