༩༡. ས་ངྒྷུ་པོ་ས་ཐཱ་དི་པྤ་བྷེ་དཾ
༡༦༨. ཏེ་ན ཁོ པ་ན ས་མ་ཡེ་ན ཨ་ཉྙ་ཏ་ར་སྨིཾ ཨཱ་ཝཱ་སེ ཏ་ད་ཧུ་པོ་ས་ཐེ ཙ་ཏྟཱ་རོ བྷི་ཀྑཱུ ཝི་ཧ་ར་ནྟི. ཨ་ཐ ཁོ ཏེ་སཾ བྷི་ཀྑཱུ་ནཾ ཨེ་ཏ་ད་ཧོ་སི – ‘‘བྷ་ག་ཝ་ཏཱ པ་ཉྙ་ཏྟཾ ‘ཨུ་པོ་ས་ཐོ ཀཱ་ཏ་བྦོ’ཏི, མ་ཡ་ཉྩ་མྷཱ ཙ་ཏྟཱ་རོ ཛ་ནཱ, ཀ་ཐཾ ནུ ཁོ ཨ་མྷེ་ཧི ཨུ་པོ་ས་ཐོ ཀཱ་ཏ་བྦོ’’ཏི? བྷ་ག་ཝ་ཏོ ཨེ་ཏ་མ་ཏྠཾ ཨཱ་རོ་ཙེ་སུཾ. ཨ་ནུ་ཛཱ་ནཱ་མི, བྷི་ཀྑ་ཝེ, ཙ་ཏུ་ནྣཾ པཱ་ཏི་མོ་ཀྑཾ ཨུ་དྡི་སི་ཏུ་ནྟི.
ཏེ་ན ཁོ པ་ན ས་མ་ཡེ་ན ཨ་ཉྙ་ཏ་ར་སྨིཾ ཨཱ་ཝཱ་སེ ཏ་ད་ཧུ་པོ་ས་ཐེ ཏ་ཡོ བྷི་ཀྑཱུ ཝི་ཧ་ར་ནྟི. ཨ་ཐ ཁོ ཏེ་སཾ བྷི་ཀྑཱུ་ནཾ ཨེ་ཏ་ད་ཧོ་སི – ‘‘བྷ་ག་ཝ་ཏཱ ཨ་ནུ་ཉྙཱ་ཏཾ ཙ་ཏུ་ནྣཾ པཱ་ཏི་མོ་ཀྑཾ ཨུ་དྡི་སི་ཏུཾ, མ་ཡ་ཉྩ་མྷཱ ཏ་ཡོ ཛ་ནཱ, ཀ་ཐཾ ནུ ཁོ ཨ་མྷེ་ཧི ཨུ་པོ་ས་ཐོ ཀཱ་ཏ་བྦོ’’ཏི? བྷ་ག་ཝ་ཏོ ཨེ་ཏ་མ་ཏྠཾ ཨཱ་རོ་ཙེ་སུཾ. ཨ་ནུ་ཛཱ་ནཱ་མི, བྷི་ཀྑ་ཝེ, ཏི་ཎྞཾ པཱ་རི་སུ་དྡྷི་ཨུ་པོ་ས་ཐཾ ཀཱ་ཏུཾ. ཨེ་ཝ་ཉྩ པ་ན, བྷི་ཀྑ་ཝེ, ཀཱ་ཏ་བྦོ. བྱ་ཏྟེ་ན བྷི་ཀྑུ་ནཱ པ་ཊི་བ་ལེ་ན ཏེ བྷི་ཀྑཱུ ཉཱ་པེ་ཏ་བྦཱ –
‘‘སུ་ཎ་ནྟུ མེ ཨཱ་ཡ་སྨ་ནྟཱ. ཨ་ཛྫུ་པོ་ས་ཐོ པ་ནྣ་ར་སོ. ཡ་དཱ་ཡ་སྨ་ནྟཱ་ནཾ པ་ཏྟ་ཀ་ལླཾ, མ་ཡཾ ཨ་ཉྙ་མ་ཉྙཾ པཱ་རི་སུ་དྡྷི་ཨུ་པོ་ས་ཐཾ ཀ་རེ་ཡྻཱ་མཱ’’ཏི.
ཐེ་རེ་ན བྷི་ཀྑུ་ནཱ ཨེ་ཀཾ་སཾ ཨུ་ཏྟ་རཱ་ས་ངྒཾ ཀ་རི་ཏྭཱ ཨུ་ཀྐུ་ཊི་ཀཾ ནི་སཱི་དི་ཏྭཱ ཨ་ཉྫ་ལིཾ པ་གྒ་ཧེ་ཏྭཱ ཏེ བྷི་ཀྑཱུ ཨེ་ཝ་མ་སྶུ ཝ་ཙ་ནཱི་ཡཱ – ‘‘པ་རི་སུ་དྡྷོ ཨ་ཧཾ, ཨཱ་ཝུ་སོ; པ་རི་སུ་དྡྷོ་ཏི མཾ དྷཱ་རེ་ཐ. པ་རི་སུ་དྡྷོ ཨ་ཧཾ, ཨཱ་ཝུ་སོ; པ་རི་སུ་དྡྷོ་ཏི མཾ དྷཱ་རེ་ཐ. པ་རི་སུ་དྡྷོ ཨ་ཧཾ, ཨཱ་ཝུ་སོ; པ་རི་སུ་དྡྷོ་ཏི མཾ དྷཱ་རེ་ཐཱ’’ཏི.
ན་ཝ་ཀེ་ན བྷི་ཀྑུ་ནཱ ཨེ་ཀཾ་སཾ ཨུ་ཏྟ་རཱ་ས་ངྒཾ ཀ་རི་ཏྭཱ ཨུ་ཀྐུ་ཊི་ཀཾ ནི་སཱི་དི་ཏྭཱ ཨ་ཉྫ་ལིཾ པ་གྒ་ཧེ་ཏྭཱ ཏེ བྷི་ཀྑཱུ ཨེ་ཝ་མ་སྶུ ཝ་ཙ་ནཱི་ཡཱ – ‘‘པ་རི་སུ་དྡྷོ ཨ་ཧཾ, བྷ་ནྟེ; པ་རི་སུ་དྡྷོ་ཏི མཾ དྷཱ་རེ་ཐ. པ་རི་སུ་དྡྷོ ཨ་ཧཾ, བྷ་ནྟེ; པ་རི་སུ་དྡྷོ་ཏི མཾ དྷཱ་རེ་ཐ. པ་རི་སུ་དྡྷོ ཨ་ཧཾ, བྷ་ནྟེ; པ་རི་སུ་དྡྷོ་ཏི མཾ དྷཱ་རེ་ཐཱ’’ཏི.
ཏེ་ན ཁོ པ་ན ས་མ་ཡེ་ན ཨ་ཉྙ་ཏ་ར་སྨིཾ ཨཱ་ཝཱ་སེ ཏ་ད་ཧུ་པོ་ས་ཐེ དྭེ བྷི་ཀྑཱུ ཝི་ཧ་ར་ནྟི. ཨ་ཐ ཁོ ཏེ་སཾ བྷི་ཀྑཱུ་ནཾ ཨེ་ཏ་ད་ཧོ་སི – ‘‘བྷ་ག་ཝ་ཏཱ ཨ་ནུ་ཉྙཱ་ཏཾ ཙ་ཏུ་ནྣཾ པཱ་ཏི་མོ་ཀྑཾ ཨུ་དྡི་སི་ཏུཾ, ཏི་ཎྞ་ནྣཾ པཱ་རི་སུ་དྡྷི་ཨུ་པོ་ས་ཐཾ ཀཱ་ཏུཾ. མ་ཡ་ཉྩ་མྷཱ དྭེ ཛ་ནཱ. ཀ་ཐཾ ནུ ཁོ ཨ་མྷེ་ཧི ཨུ་པོ་ས་ཐོ ཀཱ་ཏ་བྦོ’’ཏི? བྷ་ག་ཝ་ཏོ ཨེ་ཏ་མ་ཏྠཾ ཨཱ་རོ་ཙེ་སུཾ. ཨ་ནུ་ཛཱ་ནཱ་མི, བྷི་ཀྑ་ཝེ, དྭི་ནྣཾ པཱ་རི་སུ་དྡྷི་ཨུ་པོ་ས་ཐཾ ཀཱ་ཏུཾ. ཨེ་ཝ་ཉྩ པ་ན, བྷི་ཀྑ་ཝེ, ཀཱ་ཏ་བྦོ. ཐེ་རེ་ན བྷི་ཀྑུ་ནཱ ཨེ་ཀཾ་སཾ ཨུ་ཏྟ་རཱ་ས་ངྒཾ ཀ་རི་ཏྭཱ ཨུ་ཀྐུ་ཊི་ཀཾ ནི་སཱི་དི་ཏྭཱ ཨ་ཉྫ་ལིཾ པ་གྒ་ཧེ་ཏྭཱ ན་ཝོ བྷི་ཀྑུ ཨེ་ཝ་མ་སྶ ཝ་ཙ་ནཱི་ཡོ – ‘‘པ་རི་སུ་དྡྷོ ཨ་ཧཾ, ཨཱ་ཝུ་སོ; པ་རི་སུ་དྡྷོ་ཏི མཾ དྷཱ་རེ་ཧི. པ་རི་སུ་དྡྷོ ཨ་ཧཾ, ཨཱ་ཝུ་སོ; པ་རི་སུ་དྡྷོ་ཏི མཾ དྷཱ་རེ་ཧི. པ་རི་སུ་དྡྷོ ཨ་ཧཾ, ཨཱ་ཝུ་སོ; པ་རི་སུ་དྡྷོ་ཏི མཾ དྷཱ་རེ་ཧཱི’’ཏི.
ན་ཝ་ཀེ་ན བྷི་ཀྑུ་ནཱ ཨེ་ཀཾ་སཾ ཨུ་ཏྟ་རཱ་ས་ངྒཾ ཀ་རི་ཏྭཱ ཨུ་ཀྐུ་ཊི་ཀཾ ནི་སཱི་དི་ཏྭཱ ཨ་ཉྫ་ལིཾ པ་གྒ་ཧེ་ཏྭཱ ཐེ་རོ བྷི་ཀྑུ ཨེ་ཝ་མ་སྶ ཝ་ཙ་ནཱི་ཡོ – ‘‘པ་རི་སུ་དྡྷོ ཨ་ཧཾ, བྷ་ནྟེ; པ་རི་སུ་དྡྷོ་ཏི མཾ དྷཱ་རེ་ཐ. པ་རི་སུ་དྡྷོ ཨ་ཧཾ, བྷ་ནྟེ; པ་རི་སུ་དྡྷོ་ཏི མཾ དྷཱ་རེ་ཐ. པ་རི་སུ་དྡྷོ ཨ་ཧཾ, བྷ་ནྟེ; པ་རི་སུ་དྡྷོ་ཏི མཾ དྷཱ་རེ་ཐཱ’’ཏི.
ཏེ་ན ཁོ པ་ན ས་མ་ཡེ་ན ཨ་ཉྙ་ཏ་ར་སྨིཾ ཨཱ་ཝཱ་སེ ཏ་ད་ཧུ་པོ་ས་ཐེ ཨེ་ཀོ བྷི་ཀྑུ ཝི་ཧ་ར་ཏི. ཨ་ཐ ཁོ ཏ་སྶ བྷི་ཀྑུ་ནོ ཨེ་ཏ་ད་ཧོ་སི – ‘‘བྷ་ག་ཝ་ཏཱ ཨ་ནུ་ཉྙཱ་ཏཾ ཙ་ཏུ་ནྣཾ པཱ་ཏི་མོ་ཀྑཾ ཨུ་དྡི་སི་ཏུཾ, ཏི་ཎྞ་ནྣཾ པཱ་རི་སུ་དྡྷི་ཨུ་པོ་ས་ཐཾ ཀཱ་ཏུཾ, དྭི་ནྣཾ པཱ་རི་སུ་དྡྷི་ཨུ་པོ་ས་ཐཾ ཀཱ་ཏུཾ. ཨ་ཧ་ཉྩ་མྷི ཨེ་ཀ་ཀོ. ཀ་ཐཾ ནུ ཁོ མ་ཡཱ ཨུ་པོ་ས་ཐོ ཀཱ་ཏ་བྦོ’’ཏི? བྷ་ག་ཝ་ཏོ ཨེ་ཏ་མ་ཏྠཾ ཨཱ་རོ་ཙེ་སུཾ. ཨི་དྷ པ་ན, བྷི་ཀྑ་ཝེ, ཨ་ཉྙ་ཏ་ར་སྨིཾ ཨཱ་ཝཱ་སེ ཏ་ད་ཧུ་པོ་ས་ཐེ ཨེ་ཀོ བྷི་ཀྑུ ཝི་ཧ་ར་ཏི. ཏེ་ན, བྷི་ཀྑ་ཝེ, བྷི་ཀྑུ་ནཱ ཡ་ཏྠ བྷི་ཀྑཱུ པ་ཊི་ཀྐ་མ་ནྟི ཨུ་པ་ཊྛཱ་ན་སཱ་ལཱ་ཡ ཝཱ, མ་ཎྜ་པེ ཝཱ, རུ་ཀྑ་མཱུ་ལེ ཝཱ, སོ དེ་སོ ས་མྨ་ཛྫི་ཏྭཱ པཱ་ནཱི་ཡཾ པ་རི་བྷོ་ཛ་ནཱི་ཡཾ ཨུ་པ་ཊྛཱ་པེ་ཏྭཱ ཨཱ་ས་ནཾ པ་ཉྙ་པེ་ཏྭཱ པ་དཱི་པཾ ཀ་ཏྭཱ ནི་སཱི་དི་ཏ་བྦཾ. ས་ཙེ ཨ་ཉྙེ བྷི་ཀྑཱུ ཨཱ་ག་ཙྪ་ནྟི, ཏེ་ཧི ས་དྡྷིཾ ཨུ་པོ་ས་ཐོ ཀཱ་ཏ་བྦོ. ནོ ཙེ ཨཱ་ག་ཙྪ་ནྟི, ཨ་ཛྫ མེ ཨུ་པོ་ས་ཐོ་ཏི ཨ་དྷི་ཊྛཱ་ཏ་བྦོ. ནོ ཙེ ཨ་དྷི་ཊྛ་ཧེ་ཡྻ, ཨཱ་པ་ཏྟི དུ་ཀྐ་ཊ་སྶ.
ཏ་ཏྲ, བྷི་ཀྑ་ཝེ, ཡ་ཏྠ ཙ་ཏྟཱ་རོ བྷི་ཀྑཱུ ཝི་ཧ་ར་ནྟི, ན ཨེ་ཀ་སྶ པཱ་རི་སུ་དྡྷིཾ ཨཱ་ཧ་རི་ཏྭཱ ཏཱི་ཧི པཱ་ཏི་མོ་ཀྑཾ ཨུ་དྡི་སི་ཏ་བྦཾ. ཨུ་དྡི་སེ་ཡྻུཾ ཙེ, ཨཱ་པ་ཏྟི དུ་ཀྐ་ཊ་སྶ. ཏ་ཏྲ, བྷི་ཀྑ་ཝེ, ཡ་ཏྠ ཏ་ཡོ བྷི་ཀྑཱུ ཝི་ཧ་ར་ནྟི, ན ཨེ་ཀ་སྶ པཱ་རི་སུ་དྡྷིཾ ཨཱ་ཧ་རི་ཏྭཱ དྭཱི་ཧི པཱ་རི་སུ་དྡྷི་ཨུ་པོ་ས་ཐོ ཀཱ་ཏ་བྦོ. ཀ་རེ་ཡྻུཾ ཙེ, ཨཱ་པ་ཏྟི དུ་ཀྐ་ཊ་སྶ. ཏ་ཏྲ, བྷི་ཀྑ་ཝེ, ཡ་ཏྠ དྭེ བྷི་ཀྑཱུ ཝི་ཧ་ར་ནྟི, ན ཨེ་ཀ་སྶ པཱ་རི་སུ་དྡྷིཾ ཨཱ་ཧ་རི་ཏྭཱ ཨེ་ཀེ་ན ཨ་དྷི་ཊྛཱ་ཏ་བྦོ. ཨ་དྷི་ཊྛ་ཧེ་ཡྻ ཙེ, ཨཱ་པ་ཏྟི དུ་ཀྐ་ཊ་སྶཱ་ཏི.