༨༠. ཝི་ན་ཡ་ཝི་སྶ་ཛྫ་ན་ཀ་ཐཱ

༡༥༢. ཏེ་ན ཁོ པ་ན ས་མ་ཡེ་ན ཚ་བྦ་གྒི་ཡཱ བྷི་ཀྑཱུ ས་ངྒྷ་མ་ཛ྄ཛྷེ ཨ་ས་མྨ་ཏཱ ཝི་ན་ཡཾ ཝི་སྶ་ཛྫེ་ནྟི [ཝི་སྶ་ཛྫ་ནྟི (ཀ.)]. བྷ་ག་ཝ་ཏོ ཨེ་ཏ་མ་ཏྠཾ ཨཱ་རོ་ཙེ་སུཾ. ན, བྷི་ཀྑ་ཝེ, ས་ངྒྷ་མ་ཛ྄ཛྷེ ཨ་ས་མྨ་ཏེ་ན ཝི་ན་ཡོ ཝི་སྶ་ཛྫེ་ཏ་བྦོ. ཡོ ཝི་སྶ་ཛྫེ་ཡྻ, ཨཱ་པ་ཏྟི དུ་ཀྐ་ཊ་སྶ. ཨ་ནུ་ཛཱ་ནཱ་མི, བྷི་ཀྑ་ཝེ, ས་ངྒྷ་མ་ཛ྄ཛྷེ ས་མྨ་ཏེ་ན ཝི་ན་ཡཾ ཝི་སྶ་ཛྫེ་ཏུཾ. ཨེ་ཝ་ཉྩ པ་ན, བྷི་ཀྑ་ཝེ, ས་མྨ་ནྣི་ཏ་བྦཾ. ཨ་ཏྟ་ནཱ ཝཱ [ཨ་ཏྟ་ནཱ་ཝ (སྱཱ.)] ཨ་ཏྟཱ་ནཾ ས་མྨ་ནྣི་ཏ་བྦཾ, པ་རེ་ན ཝཱ པ་རོ ས་མྨ་ནྣི་ཏ་བྦོ. ཀ་ཐ་ཉྩ ཨ་ཏྟ་ནཱ་ཝ ཨ་ཏྟཱ་ནཾ ས་མྨ་ནྣི་ཏ་བྦཾ? བྱ་ཏྟེ་ན བྷི་ཀྑུ་ནཱ པ་ཊི་བ་ལེ་ན ས་ངྒྷོ ཉཱ་པེ་ཏ་བྦོ –

‘‘སུ་ཎཱ་ཏུ མེ, བྷ་ནྟེ, ས་ངྒྷོ. ཡ་དི ས་ངྒྷ་སྶ པ་ཏྟ་ཀ་ལླཾ, ཨ་ཧཾ ཨི་ཏྠ་ནྣཱ་མེ་ན ཝི་ན་ཡཾ པུ་ཊྛོ ཝི་སྶ་ཛྫེ་ཡྻ’’ནྟི. ཨེ་ཝཾ ཨ་ཏྟ་ནཱ་ཝ ཨ་ཏྟཱ་ནཾ ས་མྨ་ནྣི་ཏ་བྦཾ.

ཀ་ཐ་ཉྩ པ་རེ་ན པ་རོ ས་མྨ་ནྣི་ཏ་བྦོ? བྱ་ཏྟེ་ན བྷི་ཀྑུ་ནཱ པ་ཊི་བ་ལེ་ན ས་ངྒྷོ ཉཱ་པེ་ཏ་བྦོ –

‘‘སུ་ཎཱ་ཏུ མེ, བྷ་ནྟེ, ས་ངྒྷོ. ཡ་དི ས་ངྒྷ་སྶ པ་ཏྟ་ཀ་ལླཾ, ཨི་ཏྠ་ནྣཱ་མོ ཨི་ཏྠ་ནྣཱ་མེ་ན ཝི་ན་ཡཾ པུ་ཊྛོ ཝི་སྶ་ཛྫེ་ཡྻཱ’’ཏི. ཨེ་ཝཾ པ་རེ་ན པ་རོ ས་མྨ་ནྣི་ཏ་བྦོ་ཏི.

ཏེ་ན ཁོ པ་ན ས་མ་ཡེ་ན པེ་ས་ལཱ བྷི་ཀྑཱུ ས་ངྒྷ་མ་ཛ྄ཛྷེ ས་མྨ་ཏཱ ཝི་ན་ཡཾ ཝི་སྶ་ཛྫེ་ནྟི. ཚ་བྦ་གྒི་ཡཱ བྷི་ཀྑཱུ ལ་བྷ་ནྟི ཨཱ་གྷཱ་ཏཾ, ལ་བྷ་ནྟི ཨ་པྤ་ཙྩ་ཡཾ, ཝ་དྷེ་ན ཏ་ཛྫེ་ནྟི. བྷ་ག་ཝ་ཏོ ཨེ་ཏ་མ་ཏྠཾ ཨཱ་རོ་ཙེ་སུཾ. ཨ་ནུ་ཛཱ་ནཱ་མི, བྷི་ཀྑ་ཝེ, ས་ངྒྷ་མ་ཛ྄ཛྷེ ས་མྨ་ཏེ་ན་པི པ་རི་སཾ ཨོ་ལོ་ཀེ་ཏྭཱ པུ་གྒ་ལཾ ཏུ་ལ་ཡི་ཏྭཱ ཝི་ན་ཡཾ ཝི་སྶ་ཛྫེ་ཏུ་ནྟི.