༢༧༨. ས་ངྒྷ་སཱ་མ་གྒཱི་ཀ་ཐཱ
༤༧༥. ཨ་ཐ ཁོ ཏེ ཨུ་ཀྑི་ཏྟཱ་ནུ་ཝ་ཏྟ་ཀཱ བྷི་ཀྑཱུ ཏཾ ཨུ་ཀྑི་ཏྟ་ཀཾ བྷི་ཀྑུཾ ཨོ་སཱ་རེ་ཏྭཱ ཡེ་ན ཨུ་ཀྑེ་པ་ཀཱ བྷི་ཀྑཱུ ཏེ་ནུ་པ་ས་ངྐ་མིཾ་སུ, ཨུ་པ་ས་ངྐ་མི་ཏྭཱ ཨུ་ཀྑེ་པ་ཀེ བྷི་ཀྑཱུ ཨེ་ཏ་ད་ཝོ་ཙུཾ – ‘‘ཡ་སྨིཾ, ཨཱ་ཝུ་སོ, ཝ་ཏྠུ་སྨིཾ ཨ་ཧོ་སི ས་ངྒྷ་སྶ བྷ་ཎྜ་ནཾ ཀ་ལ་ཧོ ཝི་གྒ་ཧོ ཝི་ཝཱ་དོ ས་ངྒྷ་བྷེ་དོ ས་ངྒྷ་རཱ་ཛི ས་ངྒྷ་ཝ་ཝ་ཏྠཱ་ནཾ ས་ངྒྷ་ནཱ་ནཱ་ཀ་ར་ཎཾ, སོ ཨེ་སོ བྷི་ཀྑུ ཨཱ་པ་ནྣོ ཙ ཨུ་ཀྑི་ཏྟོ ཙ པ་སྶི [པ་སྶཱི (ཨི་ཏི་པི)] ཙ ཨོ་སཱ་རི་ཏོ ཙ. ཧ་ནྡ མ་ཡཾ, ཨཱ་ཝུ་སོ, ཏ་སྶ ཝ་ཏྠུ་སྶ ཝཱུ་པ་ས་མཱ་ཡ ས་ངྒྷ་སཱ་མ་གྒིཾ ཀ་རོ་མཱ’’ཏི.
ཨ་ཐ ཁོ ཏེ ཨུ་ཀྑེ་པ་ཀཱ བྷི་ཀྑཱུ ཡེ་ན བྷ་ག་ཝཱ ཏེ་ནུ་པ་ས་ངྐ་མིཾ་སུ, ཨུ་པ་ས་ངྐ་མི་ཏྭཱ བྷ་ག་ཝ་ནྟཾ ཨ་བྷི་ཝཱ་དེ་ཏྭཱ ཨེ་ཀ་མ་ནྟཾ ནི་སཱི་དིཾ་སུ. ཨེ་ཀ་མ་ནྟཾ ནི་སི་ནྣཱ ཁོ ཏེ བྷི་ཀྑཱུ བྷ་ག་ཝ་ནྟཾ ཨེ་ཏ་ད་ཝོ་ཙུཾ – ‘‘ཏེ, བྷ་ནྟེ, ཨུ་ཀྑི་ཏྟཱ་ནུ་ཝ་ཏྟ་ཀཱ བྷི་ཀྑཱུ ཨེ་ཝ་མཱ་ཧཾ་སུ – ‘ཡ་སྨིཾ, ཨཱ་ཝུ་སོ, ཝ་ཏྠུ་སྨིཾ ཨ་ཧོ་སི ས་ངྒྷ་སྶ བྷ་ཎྜ་ནཾ ཀ་ལ་ཧོ ཝི་གྒ་ཧོ ཝི་ཝཱ་དོ ས་ངྒྷ་བྷེ་དོ ས་ངྒྷ་རཱ་ཛི ས་ངྒྷ་ཝ་ཝ་ཏྠཱ་ནཾ ས་ངྒྷ་ནཱ་ནཱ་ཀ་ར་ཎཾ, སོ ཨེ་སོ བྷི་ཀྑུ ཨཱ་པ་ནྣོ ཙ ཨུ་ཀྑི་ཏྟོ ཙ པ་སྶི ཙ ཨོ་སཱ་རི་ཏོ ཙ. ཧ་ནྡ མ་ཡཾ, ཨཱ་ཝུ་སོ, ཏ་སྶ ཝ་ཏྠུ་སྶ ཝཱུ་པ་ས་མཱ་ཡ ས་ངྒྷ་སཱ་མ་གྒིཾ ཀ་རོ་མཱ’ཏི. ཀ་ཐཾ ནུ ཁོ, བྷ་ནྟེ, པ་ཊི་པ་ཛྫི་ཏ་བྦ’’ནྟི? ཡ་ཏོ ཙ ཁོ སོ, བྷི་ཀྑ་ཝེ, བྷི་ཀྑུ ཨཱ་པ་ནྣོ ཙ ཨུ་ཀྑི་ཏྟོ ཙ པ་སྶི ཙ ཨོ་སཱ་རི་ཏོ ཙ, ཏེ་ན ཧི, བྷི་ཀྑ་ཝེ, ས་ངྒྷོ ཏ་སྶ ཝ་ཏྠུ་སྶ ཝཱུ་པ་ས་མཱ་ཡ ས་ངྒྷ་སཱ་མ་གྒིཾ ཀ་རོ་ཏུ. ཨེ་ཝ་ཉྩ པ་ན, བྷི་ཀྑ་ཝེ, ཀཱ་ཏ་བྦཱ. ས་བྦེ་ཧེ་ཝ ཨེ་ཀ་ཛ྄ཛྷཾ ས་ནྣི་པ་ཏི་ཏ་བྦཾ གི་ལཱ་ནེ་ཧི ཙ ཨ་གི་ལཱ་ནེ་ཧི ཙ. ན ཀེ་ཧི་ཙི ཚ་ནྡོ དཱ་ཏ་བྦོ. ས་ནྣི་པ་ཏི་ཏྭཱ བྱ་ཏྟེ་ན བྷི་ཀྑུ་ནཱ པ་ཊི་བ་ལེ་ན ས་ངྒྷོ ཉཱ་པེ་ཏ་བྦོ –
‘‘སུ་ཎཱ་ཏུ མེ, བྷ་ནྟེ, ས་ངྒྷོ. ཡ་སྨིཾ ཝ་ཏྠུ་སྨིཾ ཨ་ཧོ་སི ས་ངྒྷ་སྶ བྷ་ཎྜ་ནཾ ཀ་ལ་ཧོ ཝི་གྒ་ཧོ ཝི་ཝཱ་དོ ས་ངྒྷ་བྷེ་དོ ས་ངྒྷ་རཱ་ཛི ས་ངྒྷ་ཝ་ཝ་ཏྠཱ་ནཾ ས་ངྒྷ་ནཱ་ནཱ་ཀ་ར་ཎཾ, སོ ཨེ་སོ བྷི་ཀྑུ ཨཱ་པ་ནྣོ ཙ ཨུ་ཀྑི་ཏྟོ ཙ པ་སྶི ཙ ཨོ་སཱ་རི་ཏོ ཙ. ཡ་དི ས་ངྒྷ་སྶ པ་ཏྟ་ཀ་ལླཾ, ས་ངྒྷོ ཏ་སྶ ཝ་ཏྠུ་སྶ ཝཱུ་པ་ས་མཱ་ཡ ས་ངྒྷ་སཱ་མ་གྒིཾ ཀ་རེ་ཡྻ. ཨེ་སཱ ཉ་ཏྟི.
‘‘སུ་ཎཱ་ཏུ མེ, བྷ་ནྟེ, ས་ངྒྷོ. ཡ་སྨིཾ ཝ་ཏྠུ་སྨིཾ ཨ་ཧོ་སི ས་ངྒྷ་སྶ བྷ་ཎྜ་ནཾ ཀ་ལ་ཧོ ཝི་གྒ་ཧོ ཝི་ཝཱ་དོ ས་ངྒྷ་བྷེ་དོ ས་ངྒྷ་རཱ་ཛི ས་ངྒྷ་ཝ་ཝ་ཏྠཱ་ནཾ ས་ངྒྷ་ནཱ་ནཱ་ཀ་ར་ཎཾ, སོ ཨེ་སོ བྷི་ཀྑུ ཨཱ་པ་ནྣོ ཙ ཨུ་ཀྑི་ཏྟོ ཙ པ་སྶི ཙ ཨོ་སཱ་རི་ཏོ ཙ. ས་ངྒྷོ ཏ་སྶ ཝ་ཏྠུ་སྶ ཝཱུ་པ་ས་མཱ་ཡ ས་ངྒྷ་སཱ་མ་གྒིཾ ཀ་རོ་ཏི. ཡ་སྶཱ་ཡ་སྨ་ཏོ ཁ་མ་ཏི ཏ་སྶ ཝ་ཏྠུ་སྶ ཝཱུ་པ་ས་མཱ་ཡ ས་ངྒྷ་སཱ་མ་གྒི་ཡཱ ཀ་ར་ཎཾ, སོ ཏུ་ཎྷ་སྶ, ཡ་སྶ ན་ཀྑ་མ་ཏི སོ བྷཱ་སེ་ཡྻ.
‘‘ཀ་ཏཱ ས་ངྒྷེ་ན ཏ་སྶ ཝ་ཏྠུ་སྶ ཝཱུ་པ་ས་མཱ་ཡ ས་ངྒྷ་སཱ་མ་གྒཱི. ནི་ཧ་ཏོ ས་ངྒྷ་བྷེ་དོ, ནི་ཧ་ཏཱ ས་ངྒྷ་རཱ་ཛི, ནི་ཧ་ཏཾ ས་ངྒྷ་ཝ་ཝ་ཏྠཱ་ནཾ, ནི་ཧ་ཏཾ ས་ངྒྷ་ནཱ་ནཱ་ཀ་ར་ཎཾ. ཁ་མ་ཏི ས་ངྒྷ་སྶ, ཏ་སྨཱ ཏུ་ཎྷཱི, ཨེ་ཝ་མེ་ཏཾ དྷཱ་ར་ཡཱ་མཱི’’ཏི.
ཏཱ་ཝ་དེ་ཝ ཨུ་པོ་ས་ཐོ ཀཱ་ཏ་བྦོ, པཱ་ཏི་མོ་ཀྑཾ ཨུ་དྡི་སི་ཏ་བྦ་ནྟི.
ས་ངྒྷ་སཱ་མ་གྒཱི་ཀ་ཐཱ ནི་ཊྛི་ཏཱ.