༢༧༡. ཀོ་ས་མྦ་ཀ་ཝི་ཝཱ་ད་ཀ་ཐཱ

༤༥༡. ཏེ་ན ས་མ་ཡེ་ན བུ་དྡྷོ བྷ་ག་ཝཱ ཀོ་ས་མྦི་ཡཾ ཝི་ཧ་ར་ཏི གྷོ་སི་ཏཱ་རཱ་མེ. ཏེ་ན ཁོ པ་ན ས་མ་ཡེ་ན ཨ་ཉྙ་ཏ་རོ བྷི་ཀྑུ ཨཱ་པ་ཏྟིཾ ཨཱ་པ་ནྣོ ཧོ་ཏི. སོ ཏ་སྶཱ ཨཱ་པ་ཏྟི་ཡཱ ཨཱ་པ་ཏྟི་དི་ཊྛི [ཨཱ་པ་ཏྟི་དི་ཊྛཱི (སཱི.)] ཧོ་ཏི; ཨ་ཉྙེ བྷི་ཀྑཱུ ཏ་སྶཱ ཨཱ་པ་ཏྟི་ཡཱ ཨ་ནཱ་པ་ཏྟི་དི་ཊྛི་ནོ ཧོ་ནྟི. སོ ཨ་པ་རེ་ན ས་མ་ཡེ་ན ཏ་སྶཱ ཨཱ་པ་ཏྟི་ཡཱ ཨ་ནཱ པ་ཏྟི་དི་ཊྛི ཧོ་ཏི; ཨ་ཉྙེ བྷི་ཀྑཱུ ཏ་སྶཱ ཨཱ་པ་ཏྟི་ཡཱ ཨཱ་པ་ཏྟི་དི་ཊྛི་ནོ ཧོ་ནྟི. ཨ་ཐ ཁོ ཏེ བྷི་ཀྑཱུ ཏཾ བྷི་ཀྑུཾ ཨེ་ཏ་ད་ཝོ་ཙུཾ – ‘‘ཨཱ་པ་ཏྟིཾ ཏྭཾ, ཨཱ་ཝུ་སོ, ཨཱ་པ་ནྣོ, པ་སྶ་སེ་ཏཾ ཨཱ་པ་ཏྟི’’ནྟི? ‘‘ན་ཏྠི མེ, ཨཱ་ཝུ་སོ, ཨཱ་པ་ཏྟི ཡ་མ་ཧཾ པ་སྶེ་ཡྻ’’ནྟི. ཨ་ཐ ཁོ ཏེ བྷི་ཀྑཱུ སཱ་མ་གྒིཾ ལ་བྷི་ཏྭཱ ཏཾ བྷི་ཀྑུཾ ཨཱ་པ་ཏྟི་ཡཱ ཨ་ད་སྶ་ནེ ཨུ་ཀྑི་པིཾ་སུ. སོ ཙ བྷི་ཀྑུ བ་ཧུ་སྶུ་ཏོ ཧོ་ཏི ཨཱ་ག་ཏཱ་ག་མོ དྷ་མྨ་དྷ་རོ ཝི་ན་ཡ་དྷ་རོ མཱ་ཏི་ཀཱ་དྷ་རོ པ་ཎྜི་ཏོ བྱ་ཏྟོ མེ་དྷཱ་ཝཱི ལ་ཛྫཱི ཀུ་ཀྐུ་ཙྩ་ཀོ སི་ཀྑཱ་ཀཱ་མོ. ཨ་ཐ ཁོ སོ བྷི་ཀྑུ ས་ནྡི་ཊྛེ ས་མྦྷ་ཏྟེ བྷི་ཀྑཱུ ཨུ་པ་ས་ངྐ་མི་ཏྭཱ ཨེ་ཏ་ད་ཝོ་ཙ – ‘‘ཨ་ནཱ་པ་ཏྟི ཨེ་སཱ, ཨཱ་ཝུ་སོ, ནེ་སཱ ཨཱ་པ་ཏྟི. ཨ་ནཱ་པ་ནྣོ་མྷི, ན་མྷི ཨཱ་པ་ནྣོ. ཨ་ནུ་ཀྑི་ཏྟོ་མྷི, ན་མྷི ཨུ་ཀྑི་ཏྟོ. ཨ་དྷ་མྨི་ཀེ་ན་མྷི ཀ་མྨེ་ན ཨུ་ཀྑི་ཏྟོ ཀུ་པྤེ་ན ཨ་ཊྛཱ་ནཱ་ར་ཧེ་ན. ཧོ་ཐ མེ ཨཱ་ཡ་སྨ་ནྟོ དྷ་མྨ་ཏོ ཝི་ན་ཡ་ཏོ པ་ཀྑཱ’’ཏི. ཨ་ལ་བྷི ཁོ སོ བྷི་ཀྑུ ས་ནྡི་ཊྛེ ས་མྦྷ་ཏྟེ བྷི་ཀྑཱུ པ་ཀྑེ. ཛཱ་ན་པ་དཱ་ན་མྤི ས་ནྡི་ཊྛཱ་ནཾ ས་མྦྷ་ཏྟཱ་ནཾ བྷི་ཀྑཱུ་ནཾ ས་ནྟི་ཀེ དཱུ་ཏཾ པཱ་ཧེ་སི – ཨ་ནཱ་པ་ཏྟི ཨེ་སཱ, ཨཱ་ཝུ་སོ, ནེ་སཱ ཨཱ་པ་ཏྟི. ཨ་ནཱ་པ་ནྣོ་མྷི, ན་མྷི ཨཱ་པ་ནྣོ. ཨ་ནུ་ཀྑི་ཏྟོ་མྷི, ན་མྷི ཨུ་ཀྑི་ཏྟོ. ཨ་དྷ་མྨི་ཀེ་ན་མྷི ཀ་མྨེ་ན ཨུ་ཀྑི་ཏྟོ ཀུ་པྤེ་ན ཨ་ཊྛཱ་ནཱ་ར་ཧེ་ན. ཧོ་ནྟུ མེ ཨཱ་ཡ་སྨ་ནྟོ དྷ་མྨ་ཏོ ཝི་ན་ཡ་ཏོ པ་ཀྑཱ’’ཏི. ཨ་ལ་བྷི ཁོ སོ བྷི་ཀྑུ ཛཱ་ན་པ་དེ་པི ས་ནྡི་ཊྛེ ས་མྦྷ་ཏྟེ བྷི་ཀྑཱུ པ་ཀྑེ. ཨ་ཐ ཁོ ཏེ ཨུ་ཀྑི་ཏྟཱ་ནུ་ཝ་ཏྟ་ཀཱ བྷི་ཀྑཱུ ཡེ་ན ཨུ་ཀྑེ་པ་ཀཱ བྷི་ཀྑཱུ ཏེ་ནུ་པ་ས་ངྐ་མིཾ་སུ, ཨུ་པ་ས་ངྐ་མི་ཏྭཱ ཨུ་ཀྑེ་པ་ཀེ བྷི་ཀྑཱུ ཨེ་ཏ་ད་ཝོ་ཙུཾ – ‘‘ཨ་ནཱ་པ་ཏྟི ཨེ་སཱ, ཨཱ་ཝུ་སོ, ནེ་སཱ ཨཱ་པ་ཏྟི. ཨ་ནཱ་པ་ནྣོ ཨེ་སོ བྷི་ཀྑུ, ནེ་སོ བྷི་ཀྑུ ཨཱ་པ་ནྣོ. ཨ་ནུ་ཀྑི་ཏྟོ ཨེ་སོ བྷི་ཀྑུ, ནེ་སོ བྷི་ཀྑུ ཨུ་ཀྑི་ཏྟོ. ཨ་དྷ་མྨི་ཀེ་ན ཀ་མྨེ་ན ཨུ་ཀྑི་ཏྟོ ཀུ་པྤེ་ན ཨ་ཊྛཱ་ནཱ་ར་ཧེ་ནཱ’’ཏི. ཨེ་ཝཾ ཝུ་ཏྟེ ཨུ་ཀྑེ་པ་ཀཱ བྷི་ཀྑཱུ ཨུ་ཀྑི་ཏྟཱ་ནུ་ཝ་ཏྟ་ཀེ བྷི་ཀྑཱུ ཨེ་ཏ་ད་ཝོ་ཙུཾ – ‘‘ཨཱ་པ་ཏྟི ཨེ་སཱ ཨཱ་ཝུ་སོ, ནེ་སཱ ཨ་ནཱ་པ་ཏྟི. ཨཱ་པ་ནྣོ ཨེ་སོ བྷི་ཀྑུ, ནེ་སོ བྷི་ཀྑུ ཨ་ནཱ་པ་ནྣོ. ཨུ་ཀྑི་ཏྟོ ཨེ་སོ བྷི་ཀྑུ, ནེ་སོ བྷི་ཀྑུ ཨ་ནུ་ཀྑི་ཏྟོ. དྷ་མྨི་ཀེ་ན ཀ་མྨེ་ན ཨུ་ཀྑི་ཏྟོ ཨ་ཀུ་པྤེ་ན ཋཱ་ནཱ་ར་ཧེ་ན. མཱ ཁོ ཏུ་མྷེ ཨཱ་ཡ་སྨ་ནྟོ ཨེ་ཏཾ ཨུ་ཀྑི་ཏྟ་ཀཾ བྷི་ཀྑུཾ ཨ་ནུ་ཝ་ཏྟི་ཏྠ ཨ་ནུ་པ་རི་ཝཱ་རེ་ཐཱ’’ཏི. ཨེ་ཝ་མྤི ཁོ ཏེ ཨུ་ཀྑི་ཏྟཱ་ནུ་ཝ་ཏྟ་ཀཱ བྷི་ཀྑཱུ ཨུ་ཀྑེ་པ་ཀེ་ཧི བྷི་ཀྑཱུ་ཧི ཝུ་ཙྩ་མཱ་ནཱ ཏ་ཐེ་ཝ ཏཾ ཨུ་ཀྑི་ཏྟ་ཀཾ བྷི་ཀྑུཾ ཨ་ནུ་ཝ་ཏྟིཾ་སུ ཨ་ནུ་པ་རི་ཝཱ་རེ་སུཾ.

༤༥༢. ཨ་ཐ ཁོ ཨ་ཉྙ་ཏ་རོ བྷི་ཀྑུ ཡེ་ན བྷ་ག་ཝཱ ཏེ་ནུ་པ་ས་ངྐ་མི, ཨུ་པ་ས་ངྐ་མི་ཏྭཱ བྷ་ག་ཝ་ནྟཾ ཨ་བྷི་ཝཱ་དེ་ཏྭཱ ཨེ་ཀ་མ་ནྟཾ ནི་སཱི་དི. ཨེ་ཀ་མ་ནྟཾ ནི་སི་ནྣོ ཁོ སོ བྷི་ཀྑུ བྷ་ག་ཝ་ནྟཾ ཨེ་ཏ་ད་ཝོ་ཙ – ‘‘ཨི་དྷ, བྷ་ནྟེ, ཨ་ཉྙ་ཏ་རོ བྷི་ཀྑུ ཨཱ་པ་ཏྟིཾ ཨཱ་པ་ནྣོ ཨ་ཧོ་སི. སོ ཏ་སྶཱ ཨཱ་པ་ཏྟི་ཡཱ ཨཱ་པ་ཏྟི་དི་ཊྛི ཨ་ཧོ་སི, ཨ་ཉྙེ བྷི་ཀྑཱུ ཏ་སྶཱ ཨཱ་པ་ཏྟི་ཡཱ ཨ་ནཱ་པ་ཏྟི་དི་ཊྛི་ནོ ཨ་ཧེ་སུཾ. སོ ཨ་པ་རེ་ན ས་མ་ཡེ་ན ཏ་སྶཱ ཨཱ་པ་ཏྟི་ཡཱ ཨ་ནཱ་པ་ཏྟི་དི་ཊྛི ཨ་ཧོ་སི, ཨ་ཉྙེ བྷི་ཀྑཱུ ཏ་སྶཱ ཨཱ་པ་ཏྟི་ཡཱ ཨཱ་པ་ཏྟི་དི་ཊྛི་ནོ ཨ་ཧེ་སུཾ. ཨ་ཐ ཁོ ཏེ, བྷ་ནྟེ, བྷི་ཀྑཱུ ཏཾ བྷི་ཀྑུཾ ཨེ་ཏ་ད་ཝོ་ཙུཾ – ‘ཨཱ་པ་ཏྟིཾ ཏྭཾ, ཨཱ་ཝུ་སོ, ཨཱ་པ་ནྣོ, པ་སྶ་སེ་ཏཾ ཨཱ་པ་ཏྟི’ནྟི? ‘‘ན་ཏྠི མེ, ཨཱ་ཝུ་སོ, ཨཱ་པ་ཏྟི ཡ་མ་ཧཾ པ་སྶེ་ཡྻ’’ནྟི. ཨ་ཐ ཁོ ཏེ, བྷ་ནྟེ, བྷི་ཀྑཱུ སཱ་མ་གྒིཾ ལ་བྷི་ཏྭཱ ཏཾ བྷི་ཀྑུཾ ཨཱ་པ་ཏྟི་ཡཱ ཨ་ད་སྶ་ནེ ཨུ་ཀྑི་པིཾ་སུ. སོ ཙ, བྷ་ནྟེ, བྷི་ཀྑུ བ་ཧུ་སྶུ་ཏོ ཨཱ་ག་ཏཱ་ག་མོ དྷ་མྨ་དྷ་རོ ཝི་ན་ཡ་དྷ་རོ མཱ་ཏི་ཀཱ་དྷ་རོ པ་ཎྜི་ཏོ བྱ་ཏྟོ མེ་དྷཱ་ཝཱི ལ་ཛྫཱི ཀུ་ཀྐུ་ཙྩ་ཀོ སི་ཀྑཱ་ཀཱ་མོ. ཨ་ཐ ཁོ སོ, བྷ་ནྟེ, བྷི་ཀྑུ ས་ནྡི་ཊྛེ ས་མྦྷ་ཏྟེ བྷི་ཀྑཱུ ཨུ་པ་ས་ངྐ་མི་ཏྭཱ ཨེ་ཏ་ད་ཝོ་ཙ – ‘ཨ་ནཱ་པ་ཏྟི ཨེ་སཱ, ཨཱ་ཝུ་སོ; ནེ་སཱ ཨཱ་པ་ཏྟི. ཨ་ནཱ་པ་ནྣོ་མྷི, ན་མྷི ཨཱ་པ་ནྣོ. ཨ་ནུ་ཀྑི་ཏྟོ་མྷི, ན་མྷི ཨུ་ཀྑི་ཏྟོ. ཨ་དྷ་མྨི་ཀེ་ན་མྷི ཀ་མྨེ་ན ཨུ་ཀྑི་ཏྟོ ཀུ་པྤེ་ན ཨ་ཊྛཱ་ནཱ་ར་ཧེ་ན. ཧོ་ཐ མེ ཨཱ་ཡ་སྨ་ནྟོ དྷ་མྨ་ཏོ ཝི་ན་ཡ་ཏོ པ་ཀྑཱ’ཏི. ཨ་ལ་བྷི ཁོ སོ, བྷ་ནྟེ, བྷི་ཀྑུ ས་ནྡི་ཊྛེ ས་མྦྷ་ཏྟེ བྷི་ཀྑཱུ པ་ཀྑེ. ཛཱ་ན་པ་དཱ་ན་མྤི ས་ནྡི་ཊྛཱ་ནཾ ས་མྦྷ་ཏྟཱ་ནཾ བྷི་ཀྑཱུ་ནཾ ས་ནྟི་ཀེ དཱུ་ཏཾ པཱ་ཧེ་སི – ‘ཨ་ནཱ་པ་ཏྟི ཨེ་སཱ, ཨཱ་ཝུ་སོ; ནེ་སཱ ཨཱ་པ་ཏྟི. ཨ་ནཱ་པ་ནྣོ་མྷི, ན་མྷི ཨཱ་པ་ནྣོ. ཨ་ནུ་ཀྑི་ཏྟོ་མྷི, ན་མྷི ཨུ་ཀྑི་ཏྟོ. ཨ་དྷ་མྨི་ཀེ་ན་མྷི ཀ་མྨེ་ན ཨུ་ཀྑི་ཏྟོ ཀུ་པྤེ་ན ཨ་ཊྛཱ་ནཱ་ར་ཧེ་ན. ཧོ་ནྟུ མེ ཨཱ་ཡ་སྨ་ནྟོ དྷ་མྨ་ཏོ ཝི་ན་ཡ་ཏོ པ་ཀྑཱ’ཏི. ཨ་ལ་བྷི ཁོ སོ, བྷ་ནྟེ, བྷི་ཀྑུ ཛཱ་ན་པ་དེ་པི ས་ནྡི་ཊྛེ ས་མྦྷ་ཏྟེ བྷི་ཀྑཱུ པ་ཀྑེ. ཨ་ཐ ཁོ ཏེ, བྷ་ནྟེ, ཨུ་ཀྑི་ཏྟཱ་ནུ་ཝ་ཏྟ་ཀཱ བྷི་ཀྑཱུ ཡེ་ན ཨུ་ཀྑེ་པ་ཀཱ བྷི་ཀྑཱུ ཏེ་ནུ་པ་ས་ངྐ་མིཾ་སུ, ཨུ་པ་ས་ངྐ་མི་ཏྭཱ ཨུ་ཀྑེ་པ་ཀེ བྷི་ཀྑཱུ ཨེ་ཏ་ད་ཝོ་ཙུཾ – ‘ཨ་ནཱ་པ་ཏྟི ཨེ་སཱ, ཨཱ་ཝུ་སོ; ནེ་སཱ ཨཱ་པ་ཏྟི. ཨ་ནཱ་པ་ནྣོ ཨེ་སོ བྷི་ཀྑུ, ནེ་སོ བྷི་ཀྑུ ཨཱ་པ་ནྣོ. ཨ་ནུ་ཀྑི་ཏྟོ ཨེ་སོ བྷི་ཀྑུ, ནེ་སོ བྷི་ཀྑུ ཨུ་ཀྑི་ཏྟོ. ཨ་དྷ་མྨི་ཀེ་ན ཀ་མྨེ་ན ཨུ་ཀྑི་ཏྟོ ཀུ་པྤེ་ན ཨ་ཊྛཱ་ནཱ་ར་ཧེ་ནཱ’ཏི. ཨེ་ཝཾ ཝུ་ཏྟེ ཏེ, བྷ་ནྟེ, ཨུ་ཀྑེ་པ་ཀཱ བྷི་ཀྑཱུ ཨུ་ཀྑི་ཏྟཱ་ནུ་ཝ་ཏྟ་ཀེ བྷི་ཀྑཱུ ཨེ་ཏ་ད་ཝོ་ཙུཾ – ‘ཨཱ་པ་ཏྟི ཨེ་སཱ, ཨཱ་ཝུ་སོ; ནེ་སཱ ཨ་ནཱ་པ་ཏྟི. ཨཱ་པ་ནྣོ ཨེ་སོ བྷི་ཀྑུ, ནེ་སོ བྷི་ཀྑུ ཨ་ནཱ་པ་ནྣོ. ཨུ་ཀྑི་ཏྟོ ཨེ་སོ བྷི་ཀྑུ, ནེ་སོ བྷི་ཀྑུ ཨ་ནུ་ཀྑི་ཏྟོ. དྷ་མྨི་ཀེ་ན ཀ་མྨེ་ན ཨུ་ཀྑི་ཏྟོ ཨ་ཀུ་པྤེ་ན ཋཱ་ནཱ་ར་ཧེ་ན. མཱ ཁོ ཏུ་མྷེ ཨཱ་ཡ་སྨ་ནྟོ ཨེ་ཏཾ ཨུ་ཀྑི་ཏྟ་ཀཾ བྷི་ཀྑུཾ ཨ་ནུ་ཝ་ཏྟི་ཏྠ ཨ་ནུ་པ་རི་ཝཱ་རེ་ཐཱ’ཏི. ཨེ་ཝ་མྤི ཁོ ཏེ, བྷ་ནྟེ, ཨུ་ཀྑི་ཏྟཱ་ནུ་ཝ་ཏྟ་ཀཱ བྷི་ཀྑཱུ ཨུ་ཀྑེ་པ་ཀེ་ཧི བྷི་ཀྑཱུ་ཧི ཝུ་ཙྩ་མཱ་ནཱ ཏ་ཐེ་ཝ ཏཾ ཨུ་ཀྑི་ཏྟ་ཀཾ བྷི་ཀྑུཾ ཨ་ནུ་ཝ་ཏྟ་ནྟི ཨ་ནུ་པ་རི་ཝཱ་རེ་ནྟཱི’’ཏི.

༤༥༣. ཨ་ཐ ཁོ བྷ་ག་ཝཱ ‘བྷི་ནྣོ བྷི་ཀྑུ་ས་ངྒྷོ, བྷི་ནྣོ བྷི་ཀྑུ་ས་ངྒྷོ’ཏི – ཨུ་ཊྛཱ་ཡཱ་ས་ནཱ ཡེ་ན ཨུ་ཀྑེ་པ་ཀཱ བྷི་ཀྑཱུ ཏེ་ནུ་པ་ས་ངྐ་མི, ཨུ་པ་ས་ངྐ་མི་ཏྭཱ པ་ཉྙ་ཏྟེ ཨཱ་ས་ནེ ནི་སཱི་དི, ནི་ས་ཛྫ ཁོ བྷ་ག་ཝཱ ཨུ་ཀྑེ་པ་ཀེ བྷི་ཀྑཱུ ཨེ་ཏ་ད་ཝོ་ཙ – ‘‘མཱ ཁོ ཏུ་མྷེ, བྷི་ཀྑ་ཝེ, ‘པ་ཊི་བྷཱ་ཏི ནོ, པ་ཊི་བྷཱ་ཏི ནོ’ཏི ཡ་སྨིཾ ཝཱ ཏ་སྨིཾ ཝཱ བྷི་ཀྑུཾ ཨུ་ཀྑི་པི་ཏ་བྦཾ མ་ཉྙི་ཏྠ’’.

‘‘ཨི་དྷ པ་ན, བྷི་ཀྑ་ཝེ, བྷི་ཀྑུ ཨཱ་པ་ཏྟིཾ ཨཱ་པ་ནྣོ ཧོ་ཏི. སོ ཏ་སྶཱ ཨཱ་པ་ཏྟི་ཡཱ ཨ་ནཱ་པ་ཏྟི་དི་ཊྛི ཧོ་ཏི, ཨ་ཉྙེ བྷི་ཀྑཱུ ཏ་སྶཱ ཨཱ་པ་ཏྟི་ཡཱ ཨཱ་པ་ཏྟི་དི་ཊྛི་ནོ ཧོ་ནྟི. ཏེ ཙེ, བྷི་ཀྑ་ཝེ, བྷི་ཀྑཱུ ཏཾ བྷི་ཀྑུཾ ཨེ་ཝཾ ཛཱ་ན་ནྟི – ‘ཨ་ཡཾ ཁོ ཨཱ་ཡ་སྨཱ བ་ཧུ་སྶུ་ཏོ ཨཱ་ག་ཏཱ་ག་མོ དྷ་མྨ་དྷ་རོ ཝི་ན་ཡ་དྷ་རོ མཱ་ཏི་ཀཱ་དྷ་རོ པ་ཎྜི་ཏོ བྱ་ཏྟོ མེ་དྷཱ་ཝཱི ལ་ཛྫཱི ཀུ་ཀྐུ་ཙྩ་ཀོ སི་ཀྑཱ་ཀཱ་མོ. ས་ཙེ མ་ཡཾ ཨི་མཾ བྷི་ཀྑུཾ ཨཱ་པ་ཏྟི་ཡཱ ཨ་ད་སྶ་ནེ ཨུ་ཀྑི་པི་སྶཱ་མ, ན མ་ཡཾ ཨི་མི་ནཱ བྷི་ཀྑུ་ནཱ ས་དྡྷིཾ པ་ཝཱ་རེ་སྶཱ་མ, ཝི་ནཱ ཨི་མི་ནཱ བྷི་ཀྑུ་ནཱ པ་ཝཱ་རེ་སྶཱ་མ. ན མ་ཡཾ ཨི་མི་ནཱ བྷི་ཀྑུ་ནཱ ས་དྡྷིཾ ས་ངྒྷ་ཀ་མྨཾ ཀ་རི་སྶཱ་མ, ཝི་ནཱ ཨི་མི་ནཱ བྷི་ཀྑུ་ནཱ ས་ངྒྷ་ཀ་མྨཾ ཀ་རི་སྶཱ་མ. ན མ་ཡཾ ཨི་མི་ནཱ བྷི་ཀྑུ་ནཱ ས་དྡྷིཾ ཨཱ་ས་ནེ ནི་སཱི་དི་སྶཱ་མ, ཝི་ནཱ ཨི་མི་ནཱ བྷི་ཀྑུ་ནཱ ཨཱ་ས་ནེ ནི་སཱི་དི་སྶཱ་མ. ན མ་ཡཾ ཨི་མི་ནཱ བྷི་ཀྑུ་ནཱ ས་དྡྷིཾ ཡཱ་གུ་པཱ་ནེ ནི་སཱི་དི་སྶཱ་མ, ཝི་ནཱ ཨི་མི་ནཱ བྷི་ཀྑུ་ནཱ ཡཱ་གུ་པཱ་ནེ ནི་སཱི་དི་སྶཱ་མ. ན མ་ཡཾ ཨི་མི་ནཱ བྷི་ཀྑུ་ནཱ ས་དྡྷིཾ བྷ་ཏྟ་གྒེ ནི་སཱི་དི་སྶཱ་མ, ཝི་ནཱ ཨི་མི་ནཱ བྷི་ཀྑུ་ནཱ བྷ་ཏྟ་གྒེ ནི་སཱི་དི་སྶཱ་མ. ན མ་ཡཾ ཨི་མི་ནཱ བྷི་ཀྑུ་ནཱ ས་དྡྷིཾ ཨེ་ཀ་ཙྪ་ནྣེ ཝ་སི་སྶཱ་མ, ཝི་ནཱ ཨི་མི་ནཱ བྷི་ཀྑུ་ནཱ ཨེ་ཀ་ཙྪ་ནྣེ ཝ་སི་སྶཱ་མ. ན མ་ཡཾ ཨི་མི་ནཱ བྷི་ཀྑུ་ནཱ ས་དྡྷིཾ ཡ་ཐཱ་ཝུ་ཌྜྷཾ ཨ་བྷི་ཝཱ་ད་ནཾ པ་ཙྩུ་ཊྛཱ་ནཾ ཨ་ཉྫ་ལི་ཀ་མྨཾ སཱ་མཱི་ཙི་ཀ་མྨཾ ཀ་རི་སྶཱ་མ, ཝི་ནཱ ཨི་མི་ནཱ བྷི་ཀྑུ་ནཱ ཡ་ཐཱ་ཝུ་ཌྜྷཾ ཨ་བྷི་ཝཱ་ད་ནཾ པ་ཙྩུ་ཊྛཱ་ནཾ ཨ་ཉྫ་ལི་ཀ་མྨཾ སཱ་མཱི་ཙི་ཀ་མྨཾ ཀ་རི་སྶཱ་མ. བྷ་ཝི་སྶ་ཏི ས་ངྒྷ་སྶ ཏ་ཏོ་ནི་དཱ་ནཾ བྷ་ཎྜ་ནཾ ཀ་ལ་ཧོ ཝི་གྒ་ཧོ ཝི་ཝཱ་དོ ས་ངྒྷ་བྷེ་དོ ས་ངྒྷ་རཱ་ཛི ས་ངྒྷ་ཝ་ཝ་ཏྠཱ་ནཾ ས་ངྒྷ་ནཱ་ནཱ་ཀ་ར་ཎ’ནྟི, བྷེ་ད་ག་རུ་ཀེ་ཧི, བྷི་ཀྑ་ཝེ, བྷི་ཀྑཱུ་ཧི ན སོ བྷི་ཀྑུ ཨཱ་པ་ཏྟི་ཡཱ ཨ་ད་སྶ་ནེ ཨུ་ཀྑི་པི་ཏ་བྦོ’’ཏི.

༤༥༤. ཨ་ཐ ཁོ བྷ་ག་ཝཱ ཨུ་ཀྑེ་པ་ཀཱ་ནཾ བྷི་ཀྑཱུ་ནཾ ཨེ་ཏ་མ་ཏྠཾ བྷཱ་སི་ཏྭཱ ཨུ་ཊྛཱ་ཡཱ་ས་ནཱ ཡེ་ན ཨུ་ཀྑི་ཏྟཱ་ནུ་ཝ་ཏྟ་ཀཱ བྷི་ཀྑཱུ ཏེ་ནུ་པ་ས་ངྐ་མི, ཨུ་པ་ས་ངྐ་མི་ཏྭཱ པ་ཉྙ་ཏྟེ ཨཱ་ས་ནེ ནི་སཱི་དི, ནི་ས་ཛྫ ཁོ བྷ་ག་ཝཱ ཨུ་ཀྑི་ཏྟཱ་ནུ་ཝ་ཏྟ་ཀེ བྷི་ཀྑཱུ ཨེ་ཏ་ད་ཝོ་ཙ – ‘‘མཱ ཁོ ཏུ་མྷེ, བྷི་ཀྑ་ཝེ, ཨཱ་པ་ཏྟིཾ ཨཱ་པ་ཛྫི་ཏྭཱ ‘ནཱ་མྷ ཨཱ་པ་ནྣཱ, ནཱ་མྷ ཨཱ་པ་ནྣཱ’ཏི ཨཱ་པ་ཏྟིཾ ན པ་ཊི་ཀཱ་ཏ་བྦཾ མ་ཉྙི་ཏྠ’’.

‘‘ཨི་དྷ པ་ན, བྷི་ཀྑ་ཝེ, བྷི་ཀྑུ ཨཱ་པ་ཏྟིཾ ཨཱ་པ་ནྣོ ཧོ་ཏི. སོ ཏ་སྶཱ ཨཱ་པ་ཏྟི་ཡཱ ཨ་ནཱ་པ་ཏྟི་དི་ཊྛི ཧོ་ཏི, ཨ་ཉྙེ བྷི་ཀྑཱུ ཏ་སྶཱ ཨཱ་པ་ཏྟི་ཡཱ ཨཱ་པ་ཏྟི་དི་ཊྛི་ནོ ཧོ་ནྟི. སོ ཙེ, བྷི་ཀྑ་ཝེ, བྷི་ཀྑུ ཏེ བྷི་ཀྑཱུ ཨེ་ཝཾ ཛཱ་ནཱ་ཏི – ‘ཨི་མེ ཁོ ཨཱ་ཡ་སྨ་ནྟོ བ་ཧུ་སྶུ་ཏཱ ཨཱ་ག་ཏཱ་ག་མཱ དྷ་མྨ་དྷ་རཱ ཝི་ན་ཡ་དྷ་རཱ མཱ་ཏི་ཀཱ་དྷ་རཱ པ་ཎྜི་ཏཱ བྱ་ཏྟཱ མེ་དྷཱ་ཝི་ནོ ལ་ཛྫི་ནོ ཀུ་ཀྐུ་ཙྩ་ཀཱ སི་ཀྑཱ་ཀཱ་མཱ, ནཱ་ལཾ མ་མཾ ཝཱ ཀཱ་ར་ཎཱ ཨ་ཉྙེ་སཾ ཝཱ ཀཱ་ར་ཎཱ ཚ་ནྡཱ དོ་སཱ མོ་ཧཱ བྷ་ཡཱ ཨ་ག་ཏིཾ ག་ནྟུཾ. ས་ཙེ མཾ ཨི་མེ བྷི་ཀྑཱུ ཨཱ་པ་ཏྟི་ཡཱ ཨ་ད་སྶ་ནེ ཨུ་ཀྑི་པི་སྶ་ནྟི, ན མ་ཡཱ ས་དྡྷིཾ པ་ཝཱ་རེ་སྶ་ནྟི, ཝི་ནཱ མ་ཡཱ པ་ཝཱ་རེ་སྶ་ནྟི. ན མ་ཡཱ ས་དྡྷིཾ ས་ངྒྷ་ཀ་མྨཾ ཀ་རི་སྶ་ནྟི, ཝི་ནཱ མ་ཡཱ ས་ངྒྷ་ཀ་མྨཾ ཀ་རི་སྶ་ནྟི. ན མ་ཡཱ ས་དྡྷིཾ ཨཱ་ས་ནེ ནི་སཱི་དི་སྶ་ནྟི, ཝི་ནཱ མ་ཡཱ ཨཱ་ས་ནེ ནི་སཱི་དི་སྶ་ནྟི. ན མ་ཡཱ ས་དྡྷིཾ ཡཱ་གུ་པཱ་ནེ ནི་སཱི་དི་སྶ་ནྟི, ཝི་ནཱ མ་ཡཱ ཡཱ་གུ་པཱ་ནེ ནི་སཱི་དི་སྶ་ནྟི. ན མ་ཡཱ ས་དྡྷིཾ བྷ་ཏྟ་གྒེ ནི་སཱི་དི་སྶ་ནྟི ཝི་ནཱ མ་ཡཱ བྷ་ཏྟ་གྒེ ནི་སཱི་དི་སྶ་ནྟི. ན མ་ཡཱ ས་དྡྷིཾ ཨེ་ཀ་ཙྪ་ནྣེ ཝ་སི་སྶ་ནྟི, ཝི་ནཱ མ་ཡཱ ཨེ་ཀ་ཙྪ་ནྣེ ཝ་སི་སྶ་ནྟི. ན མ་ཡཱ ས་དྡྷིཾ ཡ་ཐཱ་ཝུ་ཌྜྷཾ ཨ་བྷི་ཝཱ་ད་ནཾ པ་ཙྩུ་ཊྛཱ་ནཾ ཨ་ཉྫ་ལི་ཀ་མྨཾ སཱ་མཱི་ཙི་ཀ་མྨཾ ཀ་རི་སྶ་ནྟི, ཝི་ནཱ མ་ཡཱ ཡ་ཐཱ་ཝུ་ཌྜྷཾ ཨ་བྷི་ཝཱ་ད་ནཾ པ་ཙྩུ་ཊྛཱ་ནཾ ཨ་ཉྫ་ལི་ཀ་མྨཾ སཱ་མཱི་ཙི་ཀ་མྨཾ ཀ་རི་སྶ་ནྟི, བྷ་ཝི་སྶ་ཏི ས་ངྒྷ་སྶ ཏ་ཏོ་ནི་དཱ་ནཾ བྷ་ཎྜ་ནཾ ཀ་ལ་ཧོ ཝི་གྒ་ཧོ ཝི་ཝཱ་དོ ས་ངྒྷ་བྷེ་དོ ས་ངྒྷ་རཱ་ཛི ས་ངྒྷ་ཝ་ཝ་ཏྠཱ་ནཾ ས་ངྒྷ་ནཱ་ནཱ་ཀ་ར་ཎ’ནྟི, བྷེ་ད་ག་རུ་ཀེ་ན, བྷི་ཀྑ་ཝེ, བྷི་ཀྑུ་ནཱ པ་རེ་ས་མྤི ས་དྡྷཱ་ཡ སཱ ཨཱ་པ་ཏྟི དེ་སེ་ཏ་བྦཱ’’ཏི. ཨ་ཐ ཁོ བྷ་ག་ཝཱ ཨུ་ཀྑི་ཏྟཱ་ནུ་ཝ་ཏྟ་ཀཱ་ནཾ བྷི་ཀྑཱུ་ནཾ ཨེ་ཏ་མ་ཏྠཾ བྷཱ་སི་ཏྭཱ ཨུ་ཊྛཱ་ཡཱ་ས་ནཱ པ་ཀྐཱ་མི.

༤༥༥. ཏེ་ན ཁོ པ་ན ས་མ་ཡེ་ན ཨུ་ཀྑི་ཏྟཱ་ནུ་ཝ་ཏྟ་ཀཱ བྷི་ཀྑཱུ ཏ་ཏྠེ་ཝ ཨ་ནྟོ་སཱི་མཱ་ཡ ཨུ་པོ་ས་ཐཾ ཀ་རོ་ནྟི, ས་ངྒྷ་ཀ་མྨཾ ཀ་རོ་ནྟི. ཨུ་ཀྑེ་པ་ཀཱ པ་ན བྷི་ཀྑཱུ ནི་སྶཱི་མཾ ག་ནྟྭཱ ཨུ་པོ་ས་ཐཾ ཀ་རོ་ནྟི, ས་ངྒྷ་ཀ་མྨཾ ཀ་རོ་ནྟི. ཨ་ཐ ཁོ ཨ་ཉྙ་ཏ་རོ ཨུ་ཀྑེ་པ་ཀོ བྷི་ཀྑུ ཡེ་ན བྷ་ག་ཝཱ ཏེ་ནུ་པ་ས་ངྐ་མི, ཨུ་པ་ས་ངྐ་མི་ཏྭཱ བྷ་ག་ཝ་ནྟཾ ཨ་བྷི་ཝཱ་དེ་ཏྭཱ ཨེ་ཀ་མ་ནྟཾ ནི་སཱི་དི. ཨེ་ཀ་མ་ནྟཾ ནི་སི་ནྣོ ཁོ སོ བྷི་ཀྑུ བྷ་ག་ཝ་ནྟཾ ཨེ་ཏ་ད་ཝོ་ཙ – ‘‘ཏེ, བྷ་ནྟེ, ཨུ་ཀྑི་ཏྟཱ་ནུ་ཝ་ཏྟ་ཀཱ བྷི་ཀྑཱུ ཏ་ཏྠེ་ཝ ཨ་ནྟོ་སཱི་མཱ་ཡ ཨུ་པོ་ས་ཐཾ ཀ་རོ་ནྟི, ས་ངྒྷ་ཀ་མྨཾ ཀ་རོ་ནྟི. མ་ཡཾ པ་ན ཨུ་ཀྑེ་པ་ཀཱ བྷི་ཀྑཱུ ནི་སྶཱི་མཾ ག་ནྟྭཱ ཨུ་པོ་ས་ཐཾ ཀ་རོ་མ, ས་ངྒྷ་ཀ་མྨཾ ཀ་རོ་མཱ’’ཏི. ‘‘ཏེ ཙེ, བྷི་ཀྑུ, ཨུ་ཀྑི་ཏྟཱ་ནུ་ཝ་ཏྟ་ཀཱ བྷི་ཀྑཱུ ཏ་ཏྠེ་ཝ ཨ་ནྟོ་སཱི་མཱ་ཡ ཨུ་པོ་ས་ཐཾ ཀ་རི་སྶ་ནྟི, ས་ངྒྷ་ཀ་མྨཾ ཀ་རི་སྶ་ནྟི, ཡ་ཐཱ མ་ཡཱ ཉ་ཏྟི ཙ ཨ་ནུ་སྶཱ་ཝ་ནཱ ཙ པ་ཉྙ་ཏྟཱ, ཏེ་སཾ ཏཱ་ནི ཀ་མྨཱ་ནི དྷ་མྨི་ཀཱ་ནི ཀ་མྨཱ་ནི བྷ་ཝི་སྶ’’ནྟི ཨ་ཀུ་པྤཱ་ནི ཋཱ་ནཱ་ར་ཧཱ་ནི. ཏུ་མྷེ ཙེ, བྷི་ཀྑུ, ཨུ་ཀྑེ་པ་ཀཱ བྷི་ཀྑཱུ ཏ་ཏྠེ་ཝ ཨ་ནྟོ་སཱི་མཱ་ཡ ཨུ་པོ་ས་ཐཾ ཀ་རི་སྶ་ཐ, ས་ངྒྷ་ཀ་མྨཾ ཀ་རི་སྶ་ཐ, ཡ་ཐཱ མ་ཡཱ ཉ་ཏྟི ཙ ཨ་ནུ་སྶཱ་ཝ་ནཱ ཙ པ་ཉྙ་ཏྟཱ, ཏུ་མྷཱ་ཀ་མྤི ཏཱ་ནི ཀ་མྨཱ་ནི དྷ་མྨི་ཀཱ་ནི ཀ་མྨཱ་ནི བྷ་ཝི་སྶ་ནྟི ཨ་ཀུ་པྤཱ་ནི ཋཱ་ནཱ་ར་ཧཱ་ནི. ཏཾ ཀི་སྶ ཧེ་ཏུ? ནཱ་ནཱ་སཾ་ཝཱ་ས་ཀཱ ཨེ་ཏེ [ཏེ (སྱཱ.)] བྷི་ཀྑཱུ [བྷི་ཀྑུ (སཱི. སྱཱ.)] ཏུ་མྷེ་ཧི, ཏུ་མྷེ ཙ ཏེ་ཧི ནཱ་ནཱ་སཾ་ཝཱ་ས་ཀཱ.

‘‘དྭེ་མཱ, བྷི་ཀྑུ, ནཱ་ནཱ་སཾ་ཝཱ་ས་ཀ་བྷཱུ་མི་ཡོ – ཨ་ཏྟ་ནཱ ཝཱ ཨ་ཏྟཱ་ནཾ ནཱ་ནཱ་སཾ་ཝཱ་ས་ཀཾ ཀ་རོ་ཏི, ས་མ་གྒོ ཝཱ ནཾ ས་ངྒྷོ ཨུ་ཀྑི་པ་ཏི ཨ་ད་སྶ་ནེ ཝཱ ཨ་པྤ་ཊི་ཀ་མྨེ ཝཱ ཨ་པྤ་ཊི་ནི་སྶ་གྒེ ཝཱ. ཨི་མཱ ཁོ, བྷི་ཀྑུ, དྭེ ནཱ་ནཱ་སཾ་ཝཱ་ས་ཀ་བྷཱུ་མི་ཡོ. དྭེ་མཱ, བྷི་ཀྑུ, ས་མཱ་ན་སཾ་ཝཱ་ས་ཀ་བྷཱུ་མི་ཡོ – ཨ་ཏྟ་ནཱ ཝཱ ཨ་ཏྟཱ་ནཾ ས་མཱ་ན་སཾ་ཝཱ་སཾ ཀ་རོ་ཏི, ས་མ་གྒོ ཝཱ ནཾ ས་ངྒྷོ ཨུ་ཀྑི་ཏྟཾ ཨོ་སཱ་རེ་ཏི ཨ་ད་སྶ་ནེ ཝཱ ཨ་པྤ་ཊི་ཀ་མྨེ ཝཱ ཨ་པྤ་ཊི་ནི་སྶ་གྒེ ཝཱ. ཨི་མཱ ཁོ, བྷི་ཀྑུ, དྭེ ས་མཱ་ན་སཾ་ཝཱ་ས་ཀ་བྷཱུ་མི་ཡོ’’ཏི.

༤༥༦. ཏེ་ན ཁོ པ་ན ས་མ་ཡེ་ན བྷི་ཀྑཱུ བྷ་ཏྟ་གྒེ ཨ་ནྟ་ར་གྷ་རེ བྷ་ཎྜ་ན་ཛཱ་ཏཱ ཀ་ལ་ཧ་ཛཱ་ཏཱ ཝི་ཝཱ་དཱ་པ་ནྣཱ ཨ་ཉྙ་མ་ཉྙཾ ཨ་ན་ནུ་ལོ་མི་ཀཾ ཀཱ་ཡ་ཀ་མྨཾ ཝ་ཙཱི་ཀ་མྨཾ ཨུ་པ་དཾ་སེ་ནྟི, ཧ་ཏྠ་པ་རཱ་མཱ་སཾ ཀ་རོ་ནྟི. མ་ནུ་སྶཱ ཨུ་ཛ྄ཛྷཱ་ཡ་ནྟི ཁི་ཡྻ་ནྟི ཝི་པཱ་ཙེ་ནྟི – ‘‘ཀ་ཐ་ཉྷི ནཱ་མ ས་མ་ཎཱ ས་ཀྱ་པུ་ཏྟི་ཡཱ བྷ་ཏྟ་གྒེ ཨ་ནྟ་ར་གྷ་རེ བྷ་ཎྜ་ན་ཛཱ་ཏཱ ཀ་ལ་ཧ་ཛཱ་ཏཱ ཝི་ཝཱ་དཱ་པ་ནྣཱ ཨ་ཉྙ་མ་ཉྙཾ ཨ་ན་ནུ་ལོ་མི་ཀཾ ཀཱ་ཡ་ཀ་མྨཾ ཝ་ཙཱི་ཀ་མྨཾ ཨུ་པ་དཾ་སེ་སྶ་ནྟི, ཧ་ཏྠ་པ་རཱ་མཱ་སཾ ཀ་རི་སྶ་ནྟཱི’’ཏི. ཨ་སྶོ་སུཾ ཁོ བྷི་ཀྑཱུ ཏེ་སཾ མ་ནུ་སྶཱ་ནཾ ཨུ་ཛ྄ཛྷཱ་ཡ་ནྟཱ་ནཾ ཁི་ཡྻ་ནྟཱ་ནཾ ཝི་པཱ་ཙེ་ནྟཱ་ནཾ. ཡེ ཏེ བྷི་ཀྑཱུ ཨ་པྤི་ཙྪཱ ཏེ ཨུ་ཛ྄ཛྷཱ་ཡ་ནྟི ཁི་ཡྻ་ནྟི ཝི་པཱ་ཙེ་ནྟི – ‘‘ཀ་ཐ་ཉྷི ནཱ་མ བྷི་ཀྑཱུ བྷ་ཏྟ་གྒེ ཨ་ནྟ་ར་གྷ་རེ བྷ་ཎྜ་ན་ཛཱ་ཏཱ ཀ་ལ་ཧ་ཛཱ་ཏཱ ཝི་ཝཱ་དཱ་པ་ནྣཱ ཨ་ཉྙ་མ་ཉྙཾ ཨ་ན་ནུ་ལོ་མི་ཀཾ ཀཱ་ཡ་ཀ་མྨཾ ཝ་ཙཱི་ཀ་མྨཾ ཨུ་པ་དཾ་སེ་སྶ་ནྟི, ཧ་ཏྠ་པ་རཱ་མཱ་སཾ ཀ་རི་སྶ་ནྟཱི’’ཏི. ཨ་ཐ ཁོ ཏེ བྷི་ཀྑཱུ བྷ་ག་ཝ་ཏོ ཨེ་ཏ་མ་ཏྠཾ ཨཱ་རོ་ཙེ་སུཾ…པེ… ‘‘ས་ཙྩཾ ཀི་ར, བྷི་ཀྑ་ཝེ, བྷི་ཀྑཱུ བྷ་ཏྟ་གྒེ ཨ་ནྟ་ར་གྷ་རེ བྷ་ཎྜ་ན་ཛཱ་ཏཱ…པེ… ཧ་ཏྠ་པ་རཱ་མཱ་སཾ ཀ་རོ་ནྟཱི’’ཏི? ‘‘ས་ཙྩཾ, བྷ་ག་ཝཱ’’ཏི. ཝི་ག་ར་ཧི བུ་དྡྷོ བྷ་ག་ཝཱ…པེ… ཝི་ག་ར་ཧི་ཏྭཱ དྷ་མྨིཾ ཀ་ཐཾ ཀ་ཏྭཱ བྷི་ཀྑཱུ ཨཱ་མ་ནྟེ་སི – ‘‘བྷི་ནྣེ, བྷི་ཀྑ་ཝེ, ས་ངྒྷེ ཨ་དྷ་མྨི་ཡཱ་ཡ་མཱ་ནེ [ཨ་དྷ་མྨི་ཡ་མཱ་ནེ (སཱི. སྱཱ. ཀ་ཏྠ་ཙི) ཨ་དྷ་མྨཱི་ཡ་མཱ་ནེ (ཀ.)] ཨ་ས་མྨོ་དི་ཀཱ་ཡ ཝ་ཏྟ་མཱ་ནཱ་ཡ [-‘‘ཨ་ས་མྨོ་དི་ཀཱ་ཝ་ཏྟ་མཱ་ནཱ་ཡ’’ ཨི་ཏི ཨ་ཊྛ་ཀ་ཐཱ་ཡཾ སཾ་ཝ་ཎྞེ་ཏ་བྦ་པཱ་ཋོ] ‘ཨེ་ཏྟཱ་ཝ་ཏཱ ན ཨ་ཉྙ་མ་ཉྙཾ ཨ་ན་ནུ་ལོ་མི་ཀཾ ཀཱ་ཡ་ཀ་མྨཾ ཝ་ཙཱི་ཀ་མྨཾ ཨུ་པ་དཾ་སེ་སྶཱ་མ, ཧ་ཏྠ་པ་རཱ་མཱ་སཾ ཀ་རི་སྶཱ་མཱ’ཏི ཨཱ་ས་ནེ ནི་སཱི་དི་ཏ་བྦཾ. བྷི་ནྣེ, བྷི་ཀྑ་ཝེ, ས་ངྒྷེ དྷ་མྨི་ཡཱ་ཡ་མཱ་ནེ ས་མྨོ་དི་ཀཱ་ཡ ཝ་ཏྟ་མཱ་ནཱ་ཡ ཨཱ་ས་ན་ནྟ་རི་ཀཱ་ཡ ནི་སཱི་དི་ཏ་བྦ’’ནྟི.

༤༥༧. [མ. ནི. ༣.༢༣༦ ཐོ་ཀཾ ཝི་ས་དི་སཾ] ཏེ་ན ཁོ པ་ན ས་མ་ཡེ་ན བྷི་ཀྑཱུ ས་ངྒྷ་མ་ཛ྄ཛྷེ བྷ་ཎྜ་ན་ཛཱ་ཏཱ ཀ་ལ་ཧ་ཛཱ་ཏཱ ཝི་ཝཱ་དཱ་པ་ནྣཱ ཨ་ཉྙ་མ་ཉྙཾ མུ་ཁ་ས་ཏྟཱི་ཧི ཝི་ཏུ་ད་ནྟཱ ཝི་ཧ་ར་ནྟི. ཏེ ན ས་ཀྐོ་ནྟི ཏཾ ཨ་དྷི་ཀ་ར་ཎཾ ཝཱུ་པ་ས་མེ་ཏུཾ. ཨ་ཐ ཁོ ཨ་ཉྙ་ཏ་རོ བྷི་ཀྑུ ཡེ་ན བྷ་ག་ཝཱ ཏེ་ནུ་པ་ས་ངྐ་མི, ཨུ་པ་ས་ངྐ་མི་ཏྭཱ བྷ་ག་ཝ་ནྟཾ ཨ་བྷི་ཝཱ་དེ་ཏྭཱ ཨེ་ཀ་མ་ནྟཾ ཨ་ཊྛཱ་སི. ཨེ་ཀ་མ་ནྟཾ ཋི་ཏོ ཁོ སོ བྷི་ཀྑུ བྷ་ག་ཝ་ནྟཾ ཨེ་ཏ་ད་ཝོ་ཙ – ‘‘ཨི་དྷ, བྷ་ནྟེ, བྷི་ཀྑཱུ ས་ངྒྷ་མ་ཛ྄ཛྷེ བྷ་ཎྜ་ན་ཛཱ་ཏཱ ཀ་ལ་ཧ་ཛཱ་ཏཱ ཝི་ཝཱ་དཱ་པ་ནྣཱ ཨ་ཉྙ་མ་ཉྙཾ མུ་ཁ་ས་ཏྟཱི་ཧི ཝི་ཏུ་ད་ནྟཱ ཝི་ཧ་ར་ནྟི. ཏེ ན ས་ཀྐོ་ནྟི ཏཾ ཨ་དྷི་ཀ་ར་ཎཾ ཝཱུ་པ་ས་མེ་ཏུཾ. སཱ་དྷུ, བྷ་ནྟེ, བྷ་ག་ཝཱ ཡེ་ན ཏེ བྷི་ཀྑཱུ ཏེ་ནུ་པ་ས་ངྐ་མ་ཏུ ཨ་ནུ་ཀ་མྤཾ ཨུ་པཱ་དཱ་ཡཱ’’ཏི. ཨ་དྷི་ཝཱ་སེ་སི བྷ་ག་ཝཱ ཏུ་ཎྷཱི་བྷཱ་ཝེ་ན. ཨ་ཐ ཁོ བྷ་ག་ཝཱ ཡེ་ན ཏེ བྷི་ཀྑཱུ ཏེ་ནུ་པ་ས་ངྐ་མི, ཨུ་པ་ས་ངྐ་མི་ཏྭཱ པ་ཉྙ་ཏྟེ ཨཱ་ས་ནེ ནི་སཱི་དི, ནི་ས་ཛྫ ཁོ བྷ་ག་ཝཱ ཏེ བྷི་ཀྑཱུ ཨེ་ཏ་ད་ཝོ་ཙ – ‘‘ཨ་ལཾ, བྷི་ཀྑ་ཝེ, མཱ བྷ་ཎྜ་ནཾ མཱ ཀ་ལ་ཧཾ མཱ ཝི་གྒ་ཧཾ མཱ ཝི་ཝཱ་ད’’ནྟི. ཨེ་ཝཾ ཝུ་ཏྟེ ཨ་ཉྙ་ཏ་རོ ཨ་དྷ་མྨ་ཝཱ་དཱི བྷི་ཀྑུ བྷ་ག་ཝ་ནྟཾ ཨེ་ཏ་ད་ཝོ་ཙ – ‘‘ཨཱ་ག་མེ་ཏུ, བྷ་ནྟེ, བྷ་ག་ཝཱ དྷ་མྨ་སྶཱ་མཱི; ཨ་པྤོ་སྶུ་ཀྐོ, བྷ་ནྟེ, བྷ་ག་ཝཱ དི་ཊྛ་དྷ་མྨ་སུ་ཁ་ཝི་ཧཱ་ར་མ་ནུ་ཡུ་ཏྟོ ཝི་ཧ་ར་ཏུ. མ་ཡ་མེ་ཏེ་ན བྷ་ཎྜ་ནེ་ན ཀ་ལ་ཧེ་ན ཝི་གྒ་ཧེ་ན ཝི་ཝཱ་དེ་ན པ་ཉྙཱ་ཡི་སྶཱ་མཱ’’ཏི. དུ་ཏི་ཡ་མྤི ཁོ བྷ་ག་ཝཱ ཏེ བྷི་ཀྑཱུ ཨེ་ཏ་ད་ཝོ་ཙ – ‘‘ཨ་ལཾ, བྷི་ཀྑ་ཝེ, མཱ བྷ་ཎྜ་ནཾ མཱ ཀ་ལ་ཧཾ མཱ ཝི་གྒ་ཧཾ མཱ ཝི་ཝཱ་ད’’ནྟི. དུ་ཏི་ཡ་མྤི ཁོ སོ ཨ་དྷ་མྨ་ཝཱ་དཱི བྷི་ཀྑུ བྷ་ག་ཝ་ནྟཾ ཨེ་ཏ་ད་ཝོ་ཙ – ‘‘ཨཱ་ག་མེ་ཏུ, བྷ་ནྟེ, བྷ་ག་ཝཱ དྷ་མྨ་སྶཱ་མཱི; ཨ་པྤོ་སྶུ་ཀྐོ, བྷ་ནྟེ, བྷ་ག་ཝཱ དི་ཊྛ་དྷ་མྨ་སུ་ཁ་ཝི་ཧཱ་ར་མ་ནུ་ཡུ་ཏྟོ ཝི་ཧ་ར་ཏུ. མ་ཡ་མེ་ཏེ་ན བྷ་ཎྜ་ནེ་ན ཀ་ལ་ཧེ་ན ཝི་གྒ་ཧེ་ན ཝི་ཝཱ་དེ་ན པ་ཉྙཱ་ཡི་སྶཱ་མཱ’’ཏི.

ཀོ་ས་མྦ་ཀ་ཝི་ཝཱ་ད་ཀ་ཐཱ ནི་ཊྛི་ཏཱ.