༦༥. ཙ་ཏྟཱ་རི ཨ་ཀ་ར་ཎཱི་ཡཱ་ནི

༡༢༩. ཏེ་ན ཁོ པ་ན ས་མ་ཡེ་ན བྷི་ཀྑཱུ ཨ་ཉྙ་ཏ་རཾ བྷི་ཀྑུཾ ཨུ་པ་ས་མྤཱ་དེ་ཏྭཱ ཨེ་ཀ་ཀཾ ཨོ་ཧཱ་ཡ པ་ཀྐ་མིཾ་སུ. སོ པ་ཙྪཱ ཨེ་ཀ་ཀོ་ཝ ཨཱ་ག་ཙྪ་ནྟོ ཨ་ནྟ་རཱ་མ་གྒེ པུ་རཱ་ཎ་དུ་ཏི་ཡི་ཀཱ་ཡ ས་མཱ་ག་ཉྪི. སཱ ཨེ་ཝ་མཱ་ཧ – ‘‘ཀིཾ་དཱ་ནི པ་བྦ་ཛི་ཏོ་སཱི’’ཏི? ‘‘ཨཱ་མ, པ་བྦ་ཛི་ཏོ་མྷཱི’’ཏི. ‘‘དུ་ལླ་བྷོ ཁོ པ་བྦ་ཛི་ཏཱ་ནཾ མེ་ཐུ་ནོ དྷ་མྨོ; ཨེ་ཧི, མེ་ཐུ་ནཾ དྷ་མྨཾ པ་ཊི་སེ་ཝཱ’’ཏི. སོ ཏ་སྶཱ མེ་ཐུ་ནཾ དྷ་མྨཾ པ་ཊི་སེ་ཝི་ཏྭཱ ཙི་རེ་ན ཨ་ག་མཱ་སི. བྷི་ཀྑཱུ ཨེ་ཝ་མཱ་ཧཾ་སུ – ‘‘ཀི་སྶ ཏྭཾ, ཨཱ་ཝུ་སོ, ཨེ་ཝཾ ཙི་རཾ ཨ་ཀཱ་སཱི’’ཏི? ཨ་ཐ ཁོ སོ བྷི་ཀྑུ བྷི་ཀྑཱུ་ནཾ ཨེ་ཏ་མ་ཏྠཾ ཨཱ་རོ་ཙེ་སི. བྷི་ཀྑཱུ བྷ་ག་ཝ་ཏོ ཨེ་ཏ་མ་ཏྠཾ ཨཱ་རོ་ཙེ་སུཾ. ཨ་ནུ་ཛཱ་ནཱ་མི, བྷི་ཀྑ་ཝེ, ཨུ་པ་ས་མྤཱ་དེ་ཏྭཱ དུ་ཏི་ཡཾ དཱ་ཏུཾ, ཙ་ཏྟཱ་རི ཙ ཨ་ཀ་ར་ཎཱི་ཡཱ་ནི ཨཱ་ཙི་ཀྑི་ཏུཾ –

‘‘ཨུ་པ་ས་མྤ་ནྣེ་ན བྷི་ཀྑུ་ནཱ མེ་ཐུ་ནོ དྷ་མྨོ ན པ་ཊི་སེ་ཝི་ཏ་བྦོ, ཨ་ནྟ་མ་སོ ཏི་ར་ཙྪཱ་ན་ག་ཏཱ་ཡ་པི. ཡོ བྷི་ཀྑུ མེ་ཐུ་ནཾ དྷ་མྨཾ པ་ཊི་སེ་ཝ་ཏི, ཨ་སྶ་མ་ཎོ ཧོ་ཏི ཨ་ས་ཀྱ་པུ་ཏྟི་ཡོ. སེ་ཡྻ་ཐཱ་པི ནཱ་མ པུ་རི་སོ སཱི་ས་ཙྪི་ནྣོ ཨ་བྷ་བྦོ ཏེ་ན ས་རཱི་ར་བ་ནྡྷ་ནེ་ན ཛཱི་ཝི་ཏུཾ, ཨེ་ཝ་མེ་ཝ བྷི་ཀྑུ མེ་ཐུ་ནཾ དྷ་མྨཾ པ་ཊི་སེ་ཝི་ཏྭཱ ཨ་སྶ་མ་ཎོ ཧོ་ཏི ཨ་ས་ཀྱ་པུ་ཏྟི་ཡོ. ཏཾ ཏེ ཡཱ་ཝ་ཛཱི་ཝཾ ཨ་ཀ་ར་ཎཱི་ཡཾ.

‘‘ཨུ་པ་ས་མྤ་ནྣེ་ན བྷི་ཀྑུ་ནཱ ཨ་དི་ནྣཾ ཐེ་ཡྻ་ས་ངྑཱ་ཏཾ ན ཨཱ་དཱ་ཏ་བྦཾ, ཨ་ནྟ་མ་སོ ཏི་ཎ་ས་ལཱ་ཀཾ ཨུ་པཱ་དཱ་ཡ. ཡོ བྷི་ཀྑུ པཱ་དཾ ཝཱ པཱ་དཱ་ར་ཧཾ ཝཱ ཨ་ཏི་རེ་ཀ་པཱ་དཾ ཝཱ ཨ་དི་ནྣཾ ཐེ་ཡྻ་ས་ངྑཱ་ཏཾ ཨཱ་དི་ཡ་ཏི, ཨ་སྶ་མ་ཎོ ཧོ་ཏི ཨ་ས་ཀྱ་པུ་ཏྟི་ཡོ. སེ་ཡྻ་ཐཱ་པི ནཱ་མ པ་ཎྜུ་པ་ལཱ་སོ བ་ནྡྷ་ནཱ པ་མུ་ཏྟོ ཨ་བྷ་བྦོ ཧ་རི་ཏ་ཏྠཱ་ཡ, ཨེ་ཝ་མེ་ཝ བྷི་ཀྑུ པཱ་དཾ ཝཱ པཱ་དཱ་ར་ཧཾ ཝཱ ཨ་ཏི་རེ་ཀ་པཱ་དཾ ཝཱ ཨ་དི་ནྣཾ ཐེ་ཡྻ་ས་ངྑཱ་ཏཾ ཨཱ་དི་ཡི་ཏྭཱ ཨ་སྶ་མ་ཎོ ཧོ་ཏི ཨ་ས་ཀྱ་པུ་ཏྟི་ཡོ. ཏཾ ཏེ ཡཱ་ཝ་ཛཱི་ཝཾ ཨ་ཀ་ར་ཎཱི་ཡཾ.

‘‘ཨུ་པ་ས་མྤ་ནྣེ་ན བྷི་ཀྑུ་ནཱ ས་ཉྩི་ཙྩ པཱ་ཎོ ཛཱི་ཝི་ཏཱ ན ཝོ་རོ་པེ་ཏ་བྦོ, ཨ་ནྟ་མ་སོ ཀུ་ནྠ་ཀི་པི་ལླི་ཀཾ ཨུ་པཱ་དཱ་ཡ. ཡོ བྷི་ཀྑུ ས་ཉྩི་ཙྩ མ་ནུ་སྶ་ཝི་གྒ་ཧཾ ཛཱི་ཝི་ཏཱ ཝོ་རོ་པེ་ཏི, ཨ་ནྟ་མ་སོ ག་བྦྷ་པཱ་ཏ་ནཾ ཨུ་པཱ་དཱ་ཡ, ཨ་སྶ་མ་ཎོ ཧོ་ཏི ཨ་ས་ཀྱ་པུ་ཏྟི་ཡོ. སེ་ཡྻ་ཐཱ་པི ནཱ་མ པུ་ཐུ་སི་ལཱ དྭེ་དྷཱ བྷི་ནྣཱ ཨ་པྤ་ཊི་ས་ནྡྷི་ཀཱ ཧོ་ཏི, ཨེ་ཝ་མེ་ཝ བྷི་ཀྑུ ས་ཉྩི་ཙྩ མ་ནུ་སྶ་ཝི་གྒ་ཧཾ ཛཱི་ཝི་ཏཱ ཝོ་རོ་པེ་ཏྭཱ ཨ་སྶ་མ་ཎོ ཧོ་ཏི ཨ་ས་ཀྱ་པུ་ཏྟི་ཡོ. ཏཾ ཏེ ཡཱ་ཝ་ཛཱི་ཝཾ ཨ་ཀ་ར་ཎཱི་ཡཾ.

‘‘ཨུ་པ་ས་མྤ་ནྣེ་ན བྷི་ཀྑུ་ནཱ ཨུ་ཏྟ་རི་མ་ནུ་སྶ་དྷ་མྨོ ན ཨུ་ལླ་པི་ཏ་བྦོ, ཨ་ནྟ་མ་སོ ‘སུ་ཉྙཱ་གཱ་རེ ཨ་བྷི་ར་མཱ་མཱི’ཏི. ཡོ བྷི་ཀྑུ པཱ་པི་ཙྪོ ཨི་ཙྪཱ་པ་ཀ་ཏོ ཨ་ས་ནྟཾ ཨ་བྷཱུ་ཏཾ ཨུ་ཏྟ་རི་མ་ནུ་སྶ་དྷ་མྨཾ ཨུ་ལླ་པ་ཏི ཛྷཱ་ནཾ ཝཱ ཝི་མོ་ཀྑཾ ཝཱ ས་མཱ་དྷིཾ ཝཱ ས་མཱ་པ་ཏྟིཾ ཝཱ མ་གྒཾ ཝཱ ཕ་ལཾ ཝཱ, ཨ་སྶ་མ་ཎོ ཧོ་ཏི ཨ་ས་ཀྱ་པུ་ཏྟི་ཡོ. སེ་ཡྻ་ཐཱ་པི ནཱ་མ ཏཱ་ལོ མ་ཏྠ་ཀ་ཙྪི་ནྣོ ཨ་བྷ་བྦོ པུ་ན ཝི་རུ་ལ༹ྷི་ཡཱ, ཨེ་ཝ་མེ་ཝ བྷི་ཀྑུ པཱ་པི་ཙྪོ ཨི་ཙྪཱ་པ་ཀ་ཏོ ཨ་ས་ནྟཾ ཨ་བྷཱུ་ཏཾ ཨུ་ཏྟ་རི་མ་ནུ་སྶ་དྷ་མྨཾ ཨུ་ལླ་པི་ཏྭཱ ཨ་སྶ་མ་ཎོ ཧོ་ཏི ཨ་ས་ཀྱ་པུ་ཏྟི་ཡོ. ཏཾ ཏེ ཡཱ་ཝ་ཛཱི་ཝཾ ཨ་ཀ་ར་ཎཱི་ཡ’’ནྟི.

ཙ་ཏྟཱ་རི ཨ་ཀ་ར་ཎཱི་ཡཱ་ནི ནི་ཊྛི་ཏཱ་ནི.