༥༡. པི་ཏུ་གྷཱ་ཏ་ཀ་ཝ་ཏྠུ

༡༡༣. ཏེ་ན ཁོ པ་ན ས་མ་ཡེ་ན ཨ་ཉྙ་ཏ་རོ མཱ་ཎ་ཝ་ཀོ པི་ཏ་རཾ ཛཱི་ཝི་ཏཱ ཝོ་རོ་པེ་སི. སོ ཏེ་ན པཱ་པ་ཀེ་ན ཀ་མྨེ་ན ཨ་ཊྚཱི་ཡ་ཏི ཧ་རཱ་ཡ་ཏི ཛི་གུ་ཙྪ་ཏི. ཨ་ཐ ཁོ ཏ་སྶ མཱ་ཎ་ཝ་ཀ་སྶ ཨེ་ཏ་ད་ཧོ་སི ‘‘ཀེ་ན ནུ ཁོ ཨ་ཧཾ ཨུ་པཱ་ཡེ་ན ཨི་མ་སྶ པཱ་པ་ཀ་སྶ ཀ་མྨ་སྶ ནི་ཀྑ་ནྟིཾ ཀ་རེ་ཡྻ’’ནྟི. ཨ་ཐ ཁོ ཏ་སྶ མཱ་ཎ་ཝ་ཀ་སྶ ཨེ་ཏ་ད་ཧོ་སི ‘‘ཨི་མེ ཁོ ས་མ་ཎཱ ས་ཀྱ་པུ་ཏྟི་ཡཱ དྷ་མྨ་ཙཱ་རི་ནོ ས་མ་ཙཱ་རི་ནོ བྲ་ཧྨ་ཙཱ་རི་ནོ ས་ཙྩ་ཝཱ་དི་ནོ སཱི་ལ་ཝ་ནྟོ ཀ་ལྱཱ་ཎ་དྷ་མྨཱ, ས་ཙེ ཁོ ཨ་ཧཾ ས་མ་ཎེ་སུ ས་ཀྱ་པུ་ཏྟི་ཡེ་སུ པ་བྦ་ཛེ་ཡྻཾ, ཨེ་ཝཱ་ཧཾ ཨི་མ་སྶ པཱ་པ་ཀ་སྶ ཀ་མྨ་སྶ ནི་ཀྑ་ནྟིཾ ཀ་རེ་ཡྻ’’ནྟི. ཨ་ཐ ཁོ སོ མཱ་ཎ་ཝ་ཀོ བྷི་ཀྑཱུ ཨུ་པ་ས་ངྐ་མི་ཏྭཱ པ་བྦ་ཛྫཾ ཡཱ་ཙི. བྷི་ཀྑཱུ ཨཱ་ཡ་སྨ་ནྟཾ ཨུ་པཱ་ལིཾ ཨེ་ཏ་ད་ཝོ་ཙུཾ – ‘‘པུ་བྦེ་པི ཁོ, ཨཱ་ཝུ་སོ ཨུ་པཱ་ལི, ནཱ་གོ མཱ་ཎ་ཝ་ཀ་ཝ་ཎྞེ་ན བྷི་ཀྑཱུ་སུ པ་བྦ་ཛི་ཏོ, ཨི་ངྒྷཱ་ཝུ་སོ, ཨུ་པཱ་ལི, ཨི་མཾ མཱ་ཎ་ཝ་ཀཾ ཨ་ནུ་ཡུ་ཉྫཱ་ཧཱི’’ཏི. ཨ་ཐ ཁོ སོ མཱ་ཎ་ཝ་ཀོ ཨཱ་ཡ་སྨ་ཏཱ ཨུ་པཱ་ལི་ནཱ ཨ་ནུ་ཡུ་ཉྫཱི་ཡ་མཱ་ནོ ཨེ་ཏ་མ་ཏྠཾ ཨཱ་རོ་ཙེ་སི. ཨཱ་ཡ་སྨཱ ཨུ་པཱ་ལི བྷི་ཀྑཱུ་ནཾ ཨེ་ཏ་མ་ཏྠཾ ཨཱ་རོ་ཙེ་སི. བྷི་ཀྑཱུ བྷ་ག་ཝ་ཏོ ཨེ་ཏ་མ་ཏྠཾ ཨཱ་རོ་ཙེ་སུཾ. པི་ཏུ་གྷཱ་ཏ་ཀོ, བྷི་ཀྑ་ཝེ, ཨ་ནུ་པ་ས་མྤ་ནྣོ ན ཨུ་པ་ས་མྤཱ་དེ་ཏ་བྦོ, ཨུ་པ་ས་མྤ་ནྣོ ནཱ་སེ་ཏ་བྦོ་ཏི.