༣༩. ཨཱ་ཧུ་ནྡ་རི་ཀ་ཝ་ཏྠུ

༡༠༢. ཏེ་ན ཁོ པ་ན ས་མ་ཡེ་ན བྷ་ག་ཝཱ ཏ་ཏྠེ་ཝ རཱ་ཛ་ག་ཧེ ཝ་སྶཾ ཝ་སི, ཏ་ཏྠ ཧེ་མ་ནྟཾ, ཏ་ཏྠ གི་མྷཾ. མ་ནུ་སྶཱ ཨུ་ཛ྄ཛྷཱ་ཡ་ནྟི ཁི་ཡྻ་ནྟི ཝི་པཱ་ཙེ་ནྟི – ‘‘ཨཱ་ཧུ་ནྡ་རི་ཀཱ ས་མ་ཎཱ་ནཾ ས་ཀྱ་པུ་ཏྟི་ཡཱ་ནཾ དི་སཱ ཨ་ནྡྷ་ཀཱ་རཱ, ན ཨི་མེ་སཾ དི་སཱ པ་ཀྑཱ་ཡ་ནྟཱི’’ཏི. ཨ་སྶོ་སུཾ ཁོ བྷི་ཀྑཱུ ཏེ་སཾ མ་ནུ་སྶཱ་ནཾ ཨུ་ཛ྄ཛྷཱ་ཡ་ནྟཱ་ནཾ ཁི་ཡྻ་ནྟཱ་ནཾ ཝི་པཱ་ཙེ་ནྟཱ་ནཾ. ཨ་ཐ ཁོ ཏེ བྷི་ཀྑཱུ བྷ་ག་ཝ་ཏོ ཨེ་ཏ་མ་ཏྠཾ ཨཱ་རོ་ཙེ་སུཾ. ཨ་ཐ ཁོ བྷ་ག་ཝཱ ཨཱ་ཡ་སྨ་ནྟཾ ཨཱ་ན་ནྡཾ ཨཱ་མ་ནྟེ་སི – ‘‘ག་ཙྪཱ་ན་ནྡ, ཨ་ཝཱ་པུ་ར་ཎཾ [ཨ་པཱ་པུ་ར་ཎཾ (ཀ.)] ཨཱ་དཱ་ཡ ཨ་ནུ་པ་རི་ཝེ་ཎི་ཡཾ བྷི་ཀྑཱུ་ནཾ ཨཱ་རོ་ཙེ་ཧི – ‘‘ཨི་ཙྪ་ཏཱ་ཝུ་སོ བྷ་ག་ཝཱ ད་ཀྑི་ཎཱ་གི་རིཾ ཙཱ་རི་ཀཾ པ་ཀྐ་མི་ཏུཾ. ཡ་སྶཱ་ཡ་སྨ་ཏོ ཨ་ཏྠོ, སོ ཨཱ་ག་ཙྪ་ཏཱུ’’ཏི. ཨེ་ཝཾ, བྷ་ནྟེ, ཏི ཁོ ཨཱ་ཡ་སྨཱ ཨཱ་ན་ནྡོ བྷ་ག་ཝ་ཏོ པ་ཊི་སྶུ་ཎི་ཏྭཱ ཨ་ཝཱ་པུ་ར་ཎཾ ཨཱ་དཱ་ཡ ཨ་ནུ་པ་རི་ཝེ་ཎི་ཡཾ བྷི་ཀྑཱུ་ནཾ ཨཱ་རོ་ཙེ་སི – ‘ཨི་ཙྪ་ཏཱ་ཝུ་སོ བྷ་ག་ཝཱ ད་ཀྑི་ཎཱ་གི་རིཾ ཙཱ་རི་ཀཾ པ་ཀྐ་མི་ཏུཾ. ཡ་སྶཱ་ཡ་སྨ་ཏོ ཨ་ཏྠོ, སོ ཨཱ་ག་ཙྪ་ཏཱུ’’’ཏི. བྷི་ཀྑཱུ ཨེ་ཝ་མཱ་ཧཾ་སུ – ‘‘བྷ་ག་ཝ་ཏཱ, ཨཱ་ཝུ་སོ ཨཱ་ན་ནྡ, པ་ཉྙ་ཏྟཾ ད་ས་ཝ་སྶཱ་ནི ནི་སྶཱ་ཡ ཝ་ཏྠུཾ, ད་ས་ཝ་སྶེ་ན ནི་སྶ་ཡཾ དཱ་ཏུཾ. ཏ་ཏྠ ཙ ནོ ག་ནྟ་བྦཾ བྷ་ཝི་སྶ་ཏི, ནི་སྶ་ཡོ ཙ ག་ཧེ་ཏ་བྦོ བྷ་ཝི་སྶ་ཏི, ཨི་ཏྟ་རོ ཙ ཝཱ་སོ བྷ་ཝི་སྶ་ཏི, པུ་ན ཙ པ་ཙྩཱ་ག་ནྟ་བྦཾ བྷ་ཝི་སྶ་ཏི, པུ་ན ཙ ནི་སྶ་ཡོ ག་ཧེ་ཏ་བྦོ བྷ་ཝི་སྶ་ཏི. ས་ཙེ ཨ་མྷཱ་ཀཾ ཨཱ་ཙ་རི་ཡུ་པ་ཛ྄ཛྷཱ་ཡཱ ག་མི་སྶ་ནྟི, མ་ཡ་མྤི ག་མི་སྶཱ་མ; ནོ ཙེ ཨ་མྷཱ་ཀཾ ཨཱ་ཙ་རི་ཡུ་པ་ཛ྄ཛྷཱ་ཡཱ ག་མི་སྶ་ནྟི, མ་ཡ་མྤི ན ག་མི་སྶཱ་མ. ལ་ཧུ་ཙི་ཏྟ་ཀ་ཏཱ ནོ, ཨཱ་ཝུ་སོ ཨཱ་ན་ནྡ, པ་ཉྙཱ་ཡི་སྶ་ཏཱི’’ཏི. ཨ་ཐ ཁོ བྷ་ག་ཝཱ ཨོ་ག་ཎེ་ན བྷི་ཀྑུ་ས་ངྒྷེ་ན ད་ཀྑི་ཎཱ་གི་རིཾ ཙཱ་རི་ཀཾ པ་ཀྐཱ་མི.

ཨཱ་ཧུ་ནྡ་རི་ཀ་ཝ་ཏྠུ ནི་ཊྛི་ཏཾ.