༣༧. ཨ་ཧི་ཝཱ་ཏ་ཀ་རོ་ག་ཝ་ཏྠུ

༡༠༠. ཏེ་ན ཁོ པ་ན ས་མ་ཡེ་ན ཨ་ཉྙ་ཏ་རཾ ཀུ་ལཾ ཨ་ཧི་ཝཱ་ཏ་ཀ་རོ་གེ་ན ཀཱ་ལ་ངྐ་ཏཾ ཧོ་ཏི. ཏ་སྶ པི་ཏཱ་པུ་ཏྟ་ཀཱ སེ་སཱ ཧོ་ནྟི. ཏེ བྷི་ཀྑཱུ་སུ པ་བྦ་ཛི་ཏྭཱ ཨེ་ཀ་ཏོ་ཝ པི་ཎྜཱ་ཡ ཙ་ར་ནྟི. ཨ་ཐ ཁོ སོ དཱ་ར་ཀོ པི་ཏུ་ནོ བྷི་ཀྑཱ་ཡ དི་ནྣཱ་ཡ ཨུ་པ་དྷཱ་ཝི་ཏྭཱ ཨེ་ཏ་ད་ཝོ་ཙ – ‘‘མ་ཡ྄ཧ་མྤི, ཏཱ་ཏ, དེ་ཧི; མ་ཡ྄ཧ་མྤི, ཏཱ་ཏ, དེ་ཧཱི’’ཏི. མ་ནུ་སྶཱ ཨུ་ཛ྄ཛྷཱ་ཡ་ནྟི ཁི་ཡྻ་ནྟི ཝི་པཱ་ཙེ་ནྟི – ‘‘ཨ་བྲ་ཧྨ་ཙཱ་རི་ནོ ཨི་མེ ས་མ་ཎཱ ས་ཀྱ་པུ་ཏྟི་ཡཱ. ཨ་ཡ་མྤི དཱ་ར་ཀོ བྷི་ཀྑུ་ནི་ཡཱ ཛཱ་ཏོ’’ཏི. ཨ་སྶོ་སུཾ ཁོ བྷི་ཀྑཱུ ཏེ་སཾ མ་ནུ་སྶཱ་ནཾ ཨུ་ཛ྄ཛྷཱ་ཡ་ནྟཱ་ནཾ ཁི་ཡྻ་ནྟཱ་ནཾ ཝི་པཱ་ཙེ་ནྟཱ་ནཾ. ཨ་ཐ ཁོ ཏེ བྷི་ཀྑཱུ བྷ་ག་ཝ་ཏོ ཨེ་ཏ་མ་ཏྠཾ ཨཱ་རོ་ཙེ་སུཾ. ན, བྷི་ཀྑ་ཝེ, ཨཱུ་ན་པ་ནྣ་ར་ས་ཝ་སྶོ དཱ་ར་ཀོ པ་བྦཱ་ཛེ་ཏ་བྦོ. ཡོ པ་བྦཱ་ཛེ་ཡྻ, ཨཱ་པ་ཏྟི དུ་ཀྐ་ཊ་སྶཱ་ཏི.

ཏེ་ན ཁོ པ་ན ས་མ་ཡེ་ན ཨཱ་ཡ་སྨ་ཏོ ཨཱ་ན་ནྡ་སྶ ཨུ་པ་ཊྛཱ་ཀ་ཀུ་ལཾ ས་དྡྷཾ པ་ས་ནྣཾ ཨ་ཧི་ཝཱ་ཏ་ཀ་རོ་གེ་ན ཀཱ་ལ་ངྐ་ཏཾ ཧོ་ཏི, དྭེ ཙ དཱ་ར་ཀཱ སེ་སཱ ཧོ་ནྟི. ཏེ པོ་རཱ་ཎ་ཀེ་ན ཨཱ་ཙི་ཎྞ་ཀ་པྤེ་ན བྷི་ཀྑཱུ པ་སྶི་ཏྭཱ ཨུ་པ་དྷཱ་ཝ་ནྟི. བྷི་ཀྑཱུ ཨ་པ་སཱ་དེ་ནྟི. ཏེ བྷི་ཀྑཱུ་ཧི ཨ་པ་སཱ་དི་ཡ་མཱ་ནཱ རོ་ད་ནྟི. ཨ་ཐ ཁོ ཨཱ་ཡ་སྨ་ཏོ ཨཱ་ན་ནྡ་སྶ ཨེ་ཏ་ད་ཧོ་སི – ‘‘བྷ་ག་ཝ་ཏཱ པ་ཉྙ་ཏྟཾ ‘ན ཨཱུ་ན་པ་ནྣ་ར་ས་ཝ་སྶོ དཱ་ར་ཀོ པ་བྦཱ་ཛེ་ཏ་བྦོ’ཏི. ཨི་མེ ཙ དཱ་ར་ཀཱ ཨཱུ་ན་པ་ནྣ་ར་ས་ཝ་སྶཱ. ཀེ་ན ནུ ཁོ ཨུ་པཱ་ཡེ་ན ཨི་མེ དཱ་ར་ཀཱ ན ཝི་ན་སྶེ་ཡྻུ’’ནྟི? ཨ་ཐ ཁོ ཨཱ་ཡ་སྨཱ ཨཱ་ན་ནྡོ བྷ་ག་ཝ་ཏོ ཨེ་ཏ་མ་ཏྠཾ ཨཱ་རོ་ཙེ་སི. ཨུ་སྶ་ཧ་ནྟི པ་ན ཏེ, ཨཱ་ན་ནྡ, དཱ་ར་ཀཱ ཀཱ་ཀེ ཨུ་ཌྜཱ་པེ་ཏུ་ནྟི? ཨུ་སྶ་ཧ་ནྟི, བྷ་ག་ཝཱ་ཏི. ཨ་ཐ ཁོ བྷ་ག་ཝཱ ཨེ་ཏ་སྨིཾ ནི་དཱ་ནེ ཨེ་ཏ་སྨིཾ པ་ཀ་ར་ཎེ དྷ་མྨིཾ ཀ་ཐཾ ཀ་ཏྭཱ བྷི་ཀྑཱུ ཨཱ་མ་ནྟེ་སི – ‘‘ཨ་ནུ་ཛཱ་ནཱ་མི, བྷི་ཀྑ་ཝེ, ཨཱུ་ན་པ་ནྣ་ར་ས་ཝ་སྶཾ དཱ་ར་ཀཾ ཀཱ་ཀུ་ཌྜེ་པ་ཀཾ པ་བྦཱ་ཛེ་ཏུ’’ནྟི.

ཨ་ཧི་ཝཱ་ཏ་ཀ་རོ་ག་ཝ་ཏྠུ ནི་ཊྛི་ཏཾ.