༣. མུ་ཙ་ལི་ནྡ་ཀ་ཐཱ

༥. [ཨུ་དཱ. ༡༡] ཨ་ཐ ཁོ བྷ་ག་ཝཱ ས་ཏྟཱ་ཧ་སྶ ཨ་ཙྩ་ཡེ་ན ཏ་མྷཱ ས་མཱ་དྷི་མྷཱ ཝུ་ཊྛ་ཧི་ཏྭཱ ཨ་ཛ་པཱ་ལ་ནི་གྲོ་དྷ་མཱུ་ལཱ ཡེ་ན མུ་ཙ་ལི་ནྡོ ཏེ་ནུ་པ་ས་ངྐ་མི, ཨུ་པ་ས་ངྐ་མི་ཏྭཱ མུ་ཙ་ལི་ནྡ་མཱུ་ལེ ས་ཏྟཱ་ཧཾ ཨེ་ཀ་པ་ལླ་ངྐེ་ན ནི་སཱི་དི ཝི་མུ་ཏྟི་སུ་ཁ་པ་ཊི་སཾ་ཝེ་དཱི. ཏེ་ན ཁོ པ་ན ས་མ་ཡེ་ན མ་ཧཱ ཨ་ཀཱ་ལ་མེ་གྷོ ཨུ་ད་པཱ་དི, ས་ཏྟཱ་ཧ་ཝ་དྡ་ལི་ཀཱ སཱི་ཏ་ཝཱ་ཏ་དུ་དྡི་ནཱི. ཨ་ཐ ཁོ མུ་ཙ་ལི་ནྡོ ནཱ་ག་རཱ་ཛཱ ས་ཀ་བྷ་ཝ་ནཱ ནི་ཀྑ་མི་ཏྭཱ བྷ་ག་ཝ་ཏོ ཀཱ་ཡཾ ས་ཏྟ་ཀྑ་ཏྟུཾ བྷོ་གེ་ཧི པ་རི་ཀྑི་པི་ཏྭཱ ཨུ་པ་རི་མུ་དྡྷ་ནི མ་ཧ་ནྟཾ ཕ་ཎཾ ཀ་རི་ཏྭཱ ཨ་ཊྛཱ་སི – ‘‘མཱ བྷ་ག་ཝ་ནྟཾ སཱི་ཏཾ, མཱ བྷ་ག་ཝ་ནྟཾ ཨུ་ཎྷཾ, མཱ བྷ་ག་ཝ་ནྟཾ ཌཾ་ས་མ་ཀ་ས་ཝཱ་ཏཱ་ཏ་པ་ས་རཱི་ས་པ་ས་མྥ་སྶོ’’ཏི […སི་རིཾ ས་པ… (སཱི. སྱཱ. ཀཾ.)]. ཨ་ཐ ཁོ མུ་ཙ་ལི་ནྡོ ནཱ་ག་རཱ་ཛཱ ས་ཏྟཱ་ཧ་སྶ ཨ་ཙྩ་ཡེ་ན ཝི་དྡྷཾ ཝི་ག་ཏ་ཝ་ལཱ་ཧ་ཀཾ དེ་ཝཾ ཝི་དི་ཏྭཱ བྷ་ག་ཝ་ཏོ ཀཱ་ཡཱ བྷོ་གེ ཝི་ནི་ཝེ་ཋེ་ཏྭཱ ས་ཀ་ཝ་ཎྞཾ པ་ཊི་སཾ་ཧ་རི་ཏྭཱ མཱ་ཎ་ཝ་ཀ་ཝ་ཎྞཾ ཨ་བྷི་ནི་མྨི་ནི་ཏྭཱ བྷ་ག་ཝ་ཏོ པུ་ར་ཏོ ཨ་ཊྛཱ་སི པ་ཉྫ་ལི་ཀོ བྷ་ག་ཝ་ནྟཾ ན་མ་སྶ་མཱ་ནོ. ཨ་ཐ ཁོ བྷ་ག་ཝཱ ཨེ་ཏ་མ་ཏྠཾ ཝི་དི་ཏྭཱ ཏཱ་ཡཾ ཝེ་ལཱ་ཡཾ ཨི་མཾ ཨུ་དཱ་ནཾ ཨུ་དཱ་ནེ་སི –

[ཀ་ཐཱ. ༣༣༨ ཀ་ཐཱ་ཝ་ཏྠུ་པཱ་ལི༹་ཡ་མྤི]‘‘སུ་ཁོ ཝི་ཝེ་ཀོ ཏུ་ཊྛ་སྶ, སུ་ཏ་དྷ་མྨ་སྶ པ་སྶ་ཏོ;

ཨ་བྱཱ་པ་ཛྫཾ སུ་ཁཾ ལོ་ཀེ, པཱ་ཎ་བྷཱུ་ཏེ་སུ སཾ་ཡ་མོ.

[ཀ་ཐཱ. ༣༣༨ ཀ་ཐཱ་ཝ་ཏྠུ་པཱ་ལི༹་ཡ་མྤི]‘‘སུ་ཁཱ ཝི་རཱ་ག་ཏཱ ལོ་ཀེ, ཀཱ་མཱ་ནཾ ས་མ་ཏི་ཀྐ་མོ;

ཨ་སྨི་མཱ་ན་སྶ ཡོ ཝི་ན་ཡོ, ཨེ་ཏཾ ཝེ པ་ར་མཾ སུ་ཁ’’ནྟི.

མུ་ཙ་ལི་ནྡ་ཀ་ཐཱ ནི་ཊྛི་ཏཱ.