༡༨. ཨཱ་ཙ་རི་ཡ་ཝ་ཏྟ་ཀ་ཐཱ
༧༤. ཏེ་ན ཁོ པ་ན ས་མ་ཡེ་ན ཨ་ཉྙ་ཏ་རོ མཱ་ཎ་ཝ་ཀོ བྷི་ཀྑཱུ ཨུ་པ་ས་ངྐ་མི་ཏྭཱ པ་བྦ་ཛྫཾ ཡཱ་ཙི. ཏ་སྶ བྷི་ཀྑཱུ པ་ཊི་ཀ་ཙྩེ་ཝ ནི་སྶ་ཡེ ཨཱ་ཙི་ཀྑིཾ་སུ. སོ ཨེ་ཝ་མཱ་ཧ – ‘‘ས་ཙེ མེ, བྷ་ནྟེ, པ་བྦ་ཛི་ཏེ ནི་སྶ་ཡེ ཨཱ་ཙི་ཀྑེ་ཡྻཱ་ཐ, ཨ་བྷི་ར་མེ་ཡྻཱ་མ་ཧཾ [ཨ་བྷི་ར་མེ་ཡྻ་ཉྩཱ་ཧཾ (སཱི.), ཨ་བྷི་ར་མེ་ཡྻཾ སྭཱ་ཧཾ (ཀ.)]. ན དཱ་ནཱ་ཧཾ, བྷ་ནྟེ, པ་བྦ་ཛི་སྶཱ་མི; ཛེ་གུ་ཙྪཱ མེ ནི་སྶ་ཡཱ པ་ཊི་ཀཱུ་ལཱ’’ཏི. བྷ་ག་ཝ་ཏོ ཨེ་ཏ་མ་ཏྠཾ ཨཱ་རོ་ཙེ་སུཾ. ན, བྷི་ཀྑ་ཝེ, པ་ཊི་ཀ་ཙྩེ་ཝ ནི་སྶ་ཡཱ ཨཱ་ཙི་ཀྑི་ཏ་བྦཱ. ཡོ ཨཱ་ཙི་ཀྑེ་ཡྻ, ཨཱ་པ་ཏྟི དུ་ཀྐ་ཊ་སྶ. ཨ་ནུ་ཛཱ་ནཱ་མི, བྷི་ཀྑ་ཝེ, ཨུ་པ་ས་མྤ་ནྣ་ས་མ་ན་ནྟ་རཱ ནི་སྶ་ཡེ ཨཱ་ཙི་ཀྑི་ཏུ་ནྟི.
ཏེ་ན ཁོ པ་ན ས་མ་ཡེ་ན བྷི་ཀྑཱུ དུ་ཝ་གྒེ་ན་པི ཏི་ཝ་གྒེ་ན་པི ག་ཎེ་ན ཨུ་པ་ས་མྤཱ་དེ་ནྟི. བྷ་ག་ཝ་ཏོ ཨེ་ཏ་མ་ཏྠཾ ཨཱ་རོ་ཙེ་སུཾ. ན, བྷི་ཀྑ་ཝེ, ཨཱུ་ན་ད་ས་ཝ་གྒེ་ན ག་ཎེ་ན ཨུ་པ་ས་མྤཱ་དེ་ཏ་བྦོ. ཡོ ཨུ་པ་ས་མྤཱ་དེ་ཡྻ, ཨཱ་པ་ཏྟི དུ་ཀྐ་ཊ་སྶ. ཨ་ནུ་ཛཱ་ནཱ་མི, བྷི་ཀྑ་ཝེ, ད་ས་ཝ་གྒེ་ན ཝཱ ཨ་ཏི་རེ་ཀ་ད་ས་ཝ་གྒེ་ན ཝཱ ག་ཎེ་ན ཨུ་པ་ས་མྤཱ་དེ་ཏུ་ནྟི.
༧༥. ཏེ་ན ཁོ པ་ན ས་མ་ཡེ་ན བྷི་ཀྑཱུ ཨེ་ཀ་ཝ་སྶཱ་པི དུ་ཝ་སྶཱ་པི ས་དྡྷི་ཝི་ཧཱ་རི་ཀཾ ཨུ་པ་ས་མྤཱ་དེ་ནྟི. ཨཱ་ཡ་སྨཱ་པི ཨུ་པ་སེ་ནོ ཝ་ངྒ་ནྟ་པུ་ཏྟོ ཨེ་ཀ་ཝ་སྶོ ས་དྡྷི་ཝི་ཧཱ་རི་ཀཾ ཨུ་པ་ས་མྤཱ་དེ་སི. སོ ཝ་སྶཾ་ཝུ་ཊྛོ དུ་ཝ་སྶོ ཨེ་ཀ་ཝ་སྶཾ ས་དྡྷི་ཝི་ཧཱ་རི་ཀཾ ཨཱ་དཱ་ཡ ཡེ་ན བྷ་ག་ཝཱ ཏེ་ནུ་པ་ས་ངྐ་མི, ཨུ་པ་ས་ངྐ་མི་ཏྭཱ བྷ་ག་ཝ་ནྟཾ ཨ་བྷི་ཝཱ་དེ་ཏྭཱ ཨེ་ཀ་མ་ནྟཾ ནི་སཱི་དི. ཨཱ་ཙི་ཎྞཾ ཁོ པ་ནེ་ཏཾ བུ་དྡྷཱ་ནཾ བྷ་ག་ཝ་ནྟཱ་ནཾ ཨཱ་ག་ནྟུ་ཀེ་ཧི བྷི་ཀྑཱུ་ཧི ས་དྡྷིཾ པ་ཊི་ས་མྨོ་དི་ཏུཾ. ཨ་ཐ ཁོ བྷ་ག་ཝཱ ཨཱ་ཡ་སྨ་ནྟཾ ཨུ་པ་སེ་ནཾ ཝ་ངྒ་ནྟ་པུ་ཏྟཾ ཨེ་ཏ་ད་ཝོ་ཙ – ‘‘ཀ་ཙྩི, བྷི་ཀྑུ, ཁ་མ་ནཱི་ཡཾ, ཀ་ཙྩི ཡཱ་པ་ནཱི་ཡཾ, ཀ་ཙྩི ཏྭཾ ཨ་པྤ་ཀི་ལ་མ་ཐེ་ན ཨ་དྡྷཱ་ནཾ ཨཱ་ག་ཏོ’’ཏི? ‘‘ཁ་མ་ནཱི་ཡཾ, བྷ་ག་ཝཱ, ཡཱ་པ་ནཱི་ཡཾ, བྷ་ག་ཝཱ. ཨ་པྤ་ཀི་ལ་མ་ཐེ་ན མ་ཡཾ, བྷ་ནྟེ, ཨ་དྡྷཱ་ནཾ ཨཱ་ག་ཏཱ’’ཏི. ཛཱ་ན་ནྟཱ་པི ཏ་ཐཱ་ག་ཏཱ པུ་ཙྪ་ནྟི, ཛཱ་ན་ནྟཱ་པི ན པུ་ཙྪ་ནྟི, ཀཱ་ལཾ ཝི་དི་ཏྭཱ པུ་ཙྪ་ནྟི, ཀཱ་ལཾ ཝི་དི་ཏྭཱ ན པུ་ཙྪ་ནྟི; ཨ་ཏྠ་སཾ་ཧི་ཏཾ ཏ་ཐཱ་ག་ཏཱ པུ་ཙྪ་ནྟི; ནོ ཨ་ན་ཏྠ་སཾ་ཧི་ཏཾ. ཨ་ན་ཏྠ་སཾ་ཧི་ཏེ སེ་ཏུ་གྷཱ་ཏོ ཏ་ཐཱ་ག་ཏཱ་ནཾ. དྭཱི་ཧི ཨཱ་ཀཱ་རེ་ཧི བུ་དྡྷཱ བྷ་ག་ཝ་ནྟོ བྷི་ཀྑཱུ པ་ཊི་པུ་ཙྪ་ནྟི – དྷ་མྨཾ ཝཱ དེ་སེ་སྶཱ་མ, སཱ་ཝ་ཀཱ་ནཾ ཝཱ སི་ཀྑཱ་པ་དཾ པ་ཉྙ་པེ་སྶཱ་མཱ་ཏི. ཨ་ཐ ཁོ བྷ་ག་ཝཱ ཨཱ་ཡ་སྨ་ནྟཾ ཨུ་པ་སེ་ནཾ ཝ་ངྒ་ནྟ་པུ་ཏྟཾ ཨེ་ཏ་ད་ཝོ་ཙ – ‘‘ཀ་ཏི་ཝ་སྶོ་སི ཏྭཾ, བྷི་ཀྑཱུ’’ཏི? ‘‘དུ་ཝ་སྶོ་ཧཾ, བྷ་ག་ཝཱ’’ཏི. ‘‘ཨ་ཡཾ པ་ན བྷི་ཀྑུ ཀ་ཏི་ཝ་སྶོ’’ཏི? ‘‘ཨེ་ཀ་ཝ་སྶོ, བྷ་ག་ཝཱ’’ཏི. ‘‘ཀིཾ ཏཱ་ཡཾ བྷི་ཀྑུ ཧོ་ཏཱི’’ཏི? ‘‘ས་དྡྷི་ཝི་ཧཱ་རི་ཀོ མེ, བྷ་ག་ཝཱ’’ཏི. ཝི་ག་ར་ཧི བུ་དྡྷོ བྷ་ག་ཝཱ – ‘‘ཨ་ན་ནུ་ཙྪ་ཝི་ཀཾ, མོ་གྷ་པུ་རི་ས, ཨ་ན་ནུ་ལོ་མི་ཀཾ ཨ་པྤ་ཏི་རཱུ་པཾ ཨ་སྶཱ་མ་ཎ་ཀཾ ཨ་ཀ་པྤི་ཡཾ ཨ་ཀ་ར་ཎཱི་ཡཾ. ཀ་ཐ་ཉྷི ནཱ་མ ཏྭཾ, མོ་གྷ་པུ་རི་ས, ཨ་ཉྙེ་ཧི ཨོ་ཝ་དི་ཡོ ཨ་ནུ་སཱ་སི་ཡོ ཨ་ཉྙཾ ཨོ་ཝ་དི་ཏུཾ ཨ་ནུ་སཱ་སི་ཏུཾ མ་ཉྙི་སྶ་སི. ཨ་ཏི་ལ་ཧུཾ ཁོ ཏྭཾ, མོ་གྷ་པུ་རི་ས, བཱ་ཧུ་ལླཱ་ཡ ཨཱ་ཝ་ཏྟོ, ཡ་དི་དཾ ག་ཎ་བ་ནྡྷི་ཀཾ. ནེ་ཏཾ, མོ་གྷ་པུ་རི་ས, ཨ་པྤ་ས་ནྣཱ་ནཾ ཝཱ པ་སཱ་དཱ་ཡ པ་ས་ནྣཱ་ནཾ ཝཱ བྷི་ཡྻོ་བྷཱ་ཝཱ་ཡ’’…པེ… ཝི་ག་ར་ཧི་ཏྭཱ…པེ… དྷ་མྨིཾ ཀ་ཐཾ ཀ་ཏྭཱ བྷི་ཀྑཱུ ཨཱ་མ་ནྟེ་སི – ‘‘ན, བྷི་ཀྑ་ཝེ, ཨཱུ་ན་ད་ས་ཝ་སྶེ་ན ཨུ་པ་ས་མྤཱ་དེ་ཏ་བྦོ. ཡོ ཨུ་པ་ས་མྤཱ་དེ་ཡྻ, ཨཱ་པ་ཏྟི དུ་ཀྐ་ཊ་སྶ. ཨ་ནུ་ཛཱ་ནཱ་མི, བྷི་ཀྑ་ཝེ, ད་ས་ཝ་སྶེ་ན ཝཱ ཨ་ཏི་རེ་ཀ་ད་ས་ཝ་སྶེ་ན ཝཱ ཨུ་པ་ས་མྤཱ་དེ་ཏུ’’ནྟི.
༧༦. ཏེ་ན ཁོ པ་ན ས་མ་ཡེ་ན བྷི་ཀྑཱུ – ད་ས་ཝ་སྶ་མྷཱ ད་ས་ཝ་སྶ་མྷཱ་ཏི – བཱ་ལཱ ཨ་བྱ་ཏྟཱ ཨུ་པ་ས་མྤཱ་དེ་ནྟི. དི་སྶ་ནྟི ཨུ་པ་ཛ྄ཛྷཱ་ཡཱ བཱ་ལཱ, ས་དྡྷི་ཝི་ཧཱ་རི་ཀཱ པ་ཎྜི་ཏཱ. དི་སྶ་ནྟི ཨུ་པ་ཛ྄ཛྷཱ་ཡཱ ཨ་བྱ་ཏྟཱ, ས་དྡྷི་ཝི་ཧཱ་རི་ཀཱ བྱ་ཏྟཱ. དི་སྶ་ནྟི ཨུ་པ་ཛ྄ཛྷཱ་ཡཱ ཨ་པྤ་སྶུ་ཏཱ, ས་དྡྷི་ཝི་ཧཱ་རི་ཀཱ བ་ཧུ་སྶུ་ཏཱ. དི་སྶ་ནྟི ཨུ་པ་ཛ྄ཛྷཱ་ཡཱ དུ་པྤ་ཉྙཱ, ས་དྡྷི་ཝི་ཧཱ་རི་ཀཱ པ་ཉྙ་ཝ་ནྟོ. ཨ་ཉྙ་ཏ་རོ་པི ཨ་ཉྙ་ཏི་ཏྠི་ཡ་པུ་བྦོ ཨུ་པ་ཛ྄ཛྷཱ་ཡེ་ན ས་ཧ་དྷ་མྨི་ཀཾ ཝུ་ཙྩ་མཱ་ནོ ཨུ་པ་ཛ྄ཛྷཱ་ཡ་སྶ ཝཱ་དཾ ཨཱ་རོ་པེ་ཏྭཱ ཏཾ་ཡེ་ཝ ཏི་ཏྠཱ་ཡ་ཏ་ནཾ ས་ངྐ་མི. ཡེ ཏེ བྷི་ཀྑཱུ ཨ་པྤི་ཙྪཱ…པེ… ཏེ ཨུ་ཛ྄ཛྷཱ་ཡ་ནྟི ཁི་ཡྻ་ནྟི ཝི་པཱ་ཙེ་ནྟི – ཀ་ཐ་ཉྷི ནཱ་མ བྷི་ཀྑཱུ – ད་ས་ཝ་སྶ་མྷཱ ད་ས་ཝ་སྶ་མྷཱ་ཏི – བཱ་ལཱ ཨ་བྱ་ཏྟཱ ཨུ་པ་ས་མྤཱ་དེ་སྶ་ནྟི. དི་སྶ་ནྟི ཨུ་པ་ཛ྄ཛྷཱ་ཡཱ བཱ་ལཱ ས་དྡྷི་ཝི་ཧཱ་རི་ཀཱ པ་ཎྜི་ཏཱ, དི་སྶ་ནྟི ཨུ་པ་ཛ྄ཛྷཱ་ཡཱ ཨ་བྱ་ཏྟཱ ས་དྡྷི་ཝི་ཧཱ་རི་ཀཱ བྱ་ཏྟཱ, དི་སྶ་ནྟི ཨུ་པ་ཛ྄ཛྷཱ་ཡཱ ཨ་པྤ་སྶུ་ཏཱ ས་དྡྷི་ཝི་ཧཱ་རི་ཀཱ བ་ཧུ་སྶུ་ཏཱ, དི་སྶ་ནྟི ཨུ་པ་ཛ྄ཛྷཱ་ཡཱ དུ་པྤ་ཉྙཱ, ས་དྡྷི་ཝི་ཧཱ་རི་ཀཱ པ་ཉྙ་ཝ་ནྟོ་ཏི. ཨ་ཐ ཁོ ཏེ བྷི་ཀྑཱུ བྷ་ག་ཝ་ཏོ ཨེ་ཏ་མ་ཏྠཾ ཨཱ་རོ་ཙེ་སུཾ. ‘‘ས་ཙྩཾ ཀི་ར, བྷི་ཀྑ་ཝེ, བྷི་ཀྑཱུ – ད་ས་ཝ་སྶ་མྷཱ ད་ས་ཝ་སྶ་མྷཱ་ཏི – བཱ་ལཱ ཨ་བྱ་ཏྟཱ ཨུ་པ་ས་མྤཱ་དེ་ནྟི. དི་སྶ་ནྟི ཨུ་པ་ཛ྄ཛྷཱ་ཡཱ བཱ་ལཱ, ས་དྡྷི་ཝི་ཧཱ་རི་ཀཱ པ་ཎྜི་ཏཱ, དི་སྶ་ནྟི ཨུ་པ་ཛ྄ཛྷཱ་ཡཱ ཨ་བྱ་ཏྟཱ ས་དྡྷི་ཝི་ཧཱ་རི་ཀཱ བྱ་ཏྟཱ, དི་སྶ་ནྟི ཨུ་པ་ཛ྄ཛྷཱ་ཡཱ ཨ་པྤ་སྶུ་ཏཱ, ས་དྡྷི་ཝི་ཧཱ་རི་ཀཱ བ་ཧུ་སྶུ་ཏཱ, དི་སྶ་ནྟི ཨུ་པ་ཛ྄ཛྷཱ་ཡཱ དུ་པྤ་ཉྙཱ, ས་དྡྷི་ཝི་ཧཱ་རི་ཀཱ པ་ཉྙ་ཝ་ནྟོ’’ཏི? ‘‘ས་ཙྩཾ, བྷ་ག་ཝཱ’’ཏི. ཝི་ག་ར་ཧི བུ་དྡྷོ བྷ་ག་ཝཱ…པེ… ཀ་ཐ་ཉྷི ནཱ་མ ཏེ, བྷི་ཀྑ་ཝེ, མོ་གྷ་པུ་རི་སཱ – ད་ས་ཝ་སྶ་མྷཱ ད་ས་ཝ་སྶ་མྷཱ་ཏི – བཱ་ལཱ ཨ་བྱ་ཏྟཱ ཨུ་པ་ས་མྤཱ་དེ་སྶ་ནྟི. དི་སྶ་ནྟི ཨུ་པ་ཛ྄ཛྷཱ་ཡཱ བཱ་ལཱ, ས་དྡྷི་ཝི་ཧཱ་རི་ཀཱ པ་ཎྜི་ཏཱ, དི་སྶ་ནྟི ཨུ་པ་ཛ྄ཛྷཱ་ཡཱ ཨ་བྱ་ཏྟཱ ས་དྡྷི་ཝི་ཧཱ་རི་ཀཱ བྱ་ཏྟཱ, དི་སྶ་ནྟི ཨུ་པ་ཛ྄ཛྷཱ་ཡཱ ཨ་པྤ་སྶུ་ཏཱ, ས་དྡྷི་ཝི་ཧཱ་རི་ཀཱ བ་ཧུ་སྶུ་ཏཱ, དི་སྶ་ནྟི ཨུ་པ་ཛ྄ཛྷཱ་ཡཱ དུ་པྤ་ཉྙཱ, ས་དྡྷི་ཝི་ཧཱ་རི་ཀཱ པ་ཉྙ་ཝ་ནྟོ. ནེ་ཏཾ, བྷི་ཀྑ་ཝེ, ཨ་པྤ་ས་ནྣཱ་ནཾ ཝཱ པ་སཱ་དཱ་ཡ…པེ… ཝི་ག་ར་ཧི་ཏྭཱ…པེ… དྷ་མྨིཾ ཀ་ཐཾ ཀ་ཏྭཱ བྷི་ཀྑཱུ ཨཱ་མ་ནྟེ་སི – ‘‘ན, བྷི་ཀྑ་ཝེ, བཱ་ལེ་ན ཨ་བྱ་ཏྟེ་ན ཨུ་པ་ས་མྤཱ་དེ་ཏ་བྦོ. ཡོ ཨུ་པ་ས་མྤཱ་དེ་ཡྻ, ཨཱ་པ་ཏྟི དུ་ཀྐ་ཊ་སྶ. ཨ་ནུ་ཛཱ་ནཱ་མི, བྷི་ཀྑ་ཝེ, བྱ་ཏྟེ་ན བྷི་ཀྑུ་ནཱ པ་ཊི་བ་ལེ་ན ད་ས་ཝ་སྶེ་ན ཝཱ ཨ་ཏི་རེ་ཀ་ད་ས་ཝ་སྶེ་ན ཝཱ ཨུ་པ་ས་མྤཱ་དེ་ཏུ’’ནྟི.
༧༧. ཏེ་ན ཁོ པ་ན ས་མ་ཡེ་ན བྷི་ཀྑཱུ ཨུ་པ་ཛ྄ཛྷཱ་ཡེ་སུ པ་ཀྐ་ནྟེ་སུ་པི ཝི་བྦྷ་ནྟེ་སུ་པི ཀཱ་ལ་ངྐ་ཏེ་སུ་པི པ་ཀྑ་ས་ངྐ་ནྟེ་སུ་པི ཨ་ནཱ་ཙ་རི་ཡ་ཀཱ ཨ་ནོ་ཝ་དི་ཡ་མཱ་ནཱ ཨ་ན་ནུ་སཱ་སི་ཡ་མཱ་ནཱ དུ་ནྣི་ཝ་ཏྠཱ དུ་པྤཱ་རུ་ཏཱ ཨ་ནཱ་ཀ་པྤ་ས་མྤ་ནྣཱ པི་ཎྜཱ་ཡ ཙ་ར་ནྟི, མ་ནུ་སྶཱ་ནཾ བྷུ་ཉྫ་མཱ་ནཱ་ནཾ ཨུ་པ་རི་བྷོ་ཛ་ནེ་པི ཨུ་ཏྟི་ཊྛ་པ་ཏྟཾ ཨུ་པ་ནཱ་མེ་ནྟི, ཨུ་པ་རི་ཁཱ་ད་ནཱི་ཡེ་པི – ཨུ་པ་རི་སཱ་ཡ་ནཱི་ཡེ་པི – ཨུ་པ་རི་པཱ་ནཱི་ཡེ་པི ཨུ་ཏྟི་ཊྛ་པ་ཏྟཾ ཨུ་པ་ནཱ་མེ་ནྟི; སཱ་མཾ སཱུ་པ་མྤི ཨོ་ད་ན་མྤི ཝི་ཉྙཱ་པེ་ཏྭཱ བྷུ་ཉྫ་ནྟི; བྷ་ཏྟ་གྒེ་པི ཨུ་ཙྩཱ་ས་དྡཱ མ་ཧཱ་ས་དྡཱ ཝི་ཧ་ར་ནྟི. མ་ནུ་སྶཱ ཨུ་ཛ྄ཛྷཱ་ཡ་ནྟི ཁི་ཡྻ་ནྟི ཝི་པཱ་ཙེ་ནྟི – ‘‘ཀ་ཐ་ཉྷི ནཱ་མ ས་མ་ཎཱ ས་ཀྱ་པུ་ཏྟི་ཡཱ དུ་ནྣི་ཝ་ཏྠཱ དུ་པྤཱ་རུ་ཏཱ ཨ་ནཱ་ཀ་པྤ་ས་མྤ་ནྣཱ པི་ཎྜཱ་ཡ ཙ་རི་སྶ་ནྟི; མ་ནུ་སྶཱ་ནཾ བྷུ་ཉྫ་མཱ་ནཱ་ནཾ ཨུ་པ་རི་བྷོ་ཛ་ནེ་པི ཨུ་ཏྟི་ཊྛ་པ་ཏྟཾ ཨུ་པ་ནཱ་མེ་སྶ་ནྟི, ཨུ་པ་རི་ཁཱ་ད་ནཱི་ཡེ་པི – ཨུ་པ་རི་སཱ་ཡ་ནཱི་ཡེ་པི – ཨུ་པ་རི་པཱ་ནཱི་ཡེ་པི ཨུ་ཏྟི་ཊྛ་པ་ཏྟཾ ཨུ་པ་ནཱ་མེ་སྶ་ནྟི; སཱ་མཾ སཱུ་པ་མྤི ཨོ་ད་ན་མྤི ཝི་ཉྙཱ་པེ་ཏྭཱ བྷུ་ཉྫི་སྶ་ནྟི; བྷ་ཏྟ་གྒེ་པི ཨུ་ཙྩཱ་ས་དྡཱ མ་ཧཱ་ས་དྡཱ ཝི་ཧ་རི་སྶ་ནྟི, སེ་ཡྻ་ཐཱ་པི བྲཱ་ཧྨ་ཎཱ བྲཱ་ཧྨ་ཎ་བྷོ་ཛ་ནེ’’ཏི. ཨ་སྶོ་སུཾ ཁོ བྷི་ཀྑཱུ ཏེ་སཾ མ་ནུ་སྶཱ་ནཾ ཨུ་ཛ྄ཛྷཱ་ཡ་ནྟཱ་ནཾ ཁི་ཡྻ་ནྟཱ་ནཾ ཝི་པཱ་ཙེ་ནྟཱ་ནཾ …པེ… ཨ་ཐ ཁོ ཏེ བྷི་ཀྑཱུ བྷ་ག་ཝ་ཏོ ཨེ་ཏ་མ་ཏྠཾ ཨཱ་རོ་ཙེ་སུཾ. ས་ཙྩཾ ཀི་ར, བྷི་ཀྑ་ཝེ…པེ… ས་ཙྩཾ, བྷ་ག་ཝཱ་ཏི…པེ… ཝི་ག་ར་ཧི་ཏྭཱ དྷ་མྨིཾ ཀ་ཐཾ ཀ་ཏྭཱ བྷི་ཀྑཱུ ཨཱ་མ་ནྟེ་སི –
‘‘ཨ་ནུ་ཛཱ་ནཱ་མི, བྷི་ཀྑ་ཝེ, ཨཱ་ཙ་རི་ཡཾ. ཨཱ་ཙ་རི་ཡོ, བྷི་ཀྑ་ཝེ, ཨ་ནྟེ་ཝཱ་སི་ཀ་མྷི པུ་ཏྟ་ཙི་ཏྟཾ ཨུ་པ་ཊྛཱ་པེ་སྶ་ཏི, ཨ་ནྟེ་ཝཱ་སི་ཀོ ཨཱ་ཙ་རི་ཡ་མྷི པི་ཏུ་ཙི་ཏྟཾ ཨུ་པ་ཊྛཱ་པེ་སྶ་ཏི. ཨེ་ཝཾ ཏེ ཨ་ཉྙ་མ་ཉྙཾ ས་གཱ་ར་ཝཱ ས་པྤ་ཏི་སྶཱ ས་བྷཱ་ག་ཝུ་ཏྟི་ནོ ཝི་ཧ་ར་ནྟཱ ཨི་མ་སྨིཾ དྷ་མྨ་ཝི་ན་ཡེ ཝུ་དྡྷིཾ ཝི་རུ་ལ༹ྷིཾ ཝེ་པུ་ལླཾ ཨཱ་པ་ཛྫི་སྶ་ནྟི. ཨ་ནུ་ཛཱ་ནཱ་མི, བྷི་ཀྑ་ཝེ, ད་ས་ཝ་སྶཾ ནི་སྶཱ་ཡ ཝ་ཏྠུཾ, ད་ས་ཝ་སྶེ་ན ནི་སྶ་ཡཾ དཱ་ཏུཾ. ཨེ་ཝ་ཉྩ པ་ན, བྷི་ཀྑ་ཝེ, ཨཱ་ཙ་རི་ཡོ ག་ཧེ་ཏ་བྦོ. ཨེ་ཀཾ་སཾ ཨུ་ཏྟ་རཱ་ས་ངྒཾ ཀ་རི་ཏྭཱ པཱ་དེ ཝ་ནྡི་ཏྭཱ ཨུ་ཀྐུ་ཊི་ཀཾ ནི་སཱི་དི་ཏྭཱ ཨ་ཉྫ་ལིཾ པ་གྒ་ཧེ་ཏྭཱ ཨེ་ཝ་མ་སྶ ཝ་ཙ་ནཱི་ཡོ – ‘ཨཱ་ཙ་རི་ཡོ མེ, བྷ་ནྟེ, ཧོ་ཧི, ཨཱ་ཡ་སྨ་ཏོ ནི་སྶཱ་ཡ ཝ་ཙྪཱ་མི; ཨཱ་ཙ་རི་ཡོ མེ, བྷ་ནྟེ, ཧོ་ཧི, ཨཱ་ཡ་སྨ་ཏོ ནི་སྶཱ་ཡ ཝ་ཙྪཱ་མི; ཨཱ་ཙ་རི་ཡོ མེ, བྷ་ནྟེ, ཧོ་ཧི, ཨཱ་ཡ་སྨ་ཏོ ནི་སྶཱ་ཡ ཝ་ཙྪཱ་མཱི’ཏི. ‘སཱ་ཧཱུ་ཏི’ ཝཱ ‘ལ་ཧཱུ་ཏི’ ཝཱ ‘ཨོ་པཱ་ཡི་ཀ’ནྟི ཝཱ ‘པ་ཏི་རཱུ་པ’ནྟི ཝཱ ‘པཱ་སཱ་དི་ཀེ་ན ས་མྤཱ་དེ་ཧཱི’ཏི ཝཱ ཀཱ་ཡེ་ན ཝི་ཉྙཱ་པེ་ཏི, ཝཱ་ཙཱ་ཡ ཝི་ཉྙཱ་པེ་ཏི, ཀཱ་ཡེ་ན ཝཱ་ཙཱ་ཡ ཝི་ཉྙཱ་པེ་ཏི, ག་ཧི་ཏོ ཧོ་ཏི ཨཱ་ཙ་རི་ཡོ; ན ཀཱ་ཡེ་ན ཝི་ཉྙཱ་པེ་ཏི, ན ཝཱ་ཙཱ་ཡ ཝི་ཉྙཱ་པེ་ཏི, ན ཀཱ་ཡེ་ན ཝཱ་ཙཱ་ཡ ཝི་ཉྙཱ་པེ་ཏི, ན ག་ཧི་ཏོ ཧོ་ཏི ཨཱ་ཙ་རི་ཡོ.
༧༨. [ཙཱུ་ལ༹་ཝ. ༣༨༠ ཨཱ་ད་ཡོ] ‘‘ཨ་ནྟེ་ཝཱ་སི་ཀེ་ན, བྷི་ཀྑ་ཝེ, ཨཱ་ཙ་རི་ཡ་མྷི ས་མྨཱ ཝ་ཏྟི་ཏ་བྦཾ. ཏ་ཏྲཱ་ཡཾ ས་མྨཱ་ཝ་ཏྟ་ནཱ –
‘‘ཀཱ་ལ་སྶེ་ཝ ཨུ་ཊྛཱ་ཡ ཨུ་པཱ་ཧ་ནཾ ཨོ་མུ་ཉྩི་ཏྭཱ ཨེ་ཀཾ་སཾ ཨུ་ཏྟ་རཱ་ས་ངྒཾ ཀ་རི་ཏྭཱ ད་ནྟ་ཀ་ཊྛཾ དཱ་ཏ་བྦཾ, མུ་ཁོ་ད་ཀཾ དཱ་ཏ་བྦཾ, ཨཱ་ས་ནཾ པ་ཉྙ་པེ་ཏ་བྦཾ. ས་ཙེ ཡཱ་གུ ཧོ་ཏི, བྷཱ་ཛ་ནཾ དྷོ་ཝི་ཏྭཱ ཡཱ་གུ ཨུ་པ་ནཱ་མེ་ཏ་བྦཱ. ཡཱ་གུཾ པཱི་ཏ་སྶ ཨུ་ད་ཀཾ ད་ཏྭཱ བྷཱ་ཛ་ནཾ པ་ཊི་གྒ་ཧེ་ཏྭཱ ནཱི་ཙཾ ཀ་ཏྭཱ སཱ་དྷུ་ཀཾ ཨ་པྤ་ཊི་གྷཾ་ས་ནྟེ་ན དྷོ་ཝི་ཏྭཱ པ་ཊི་སཱ་མེ་ཏ་བྦཾ. ཨཱ་ཙ་རི་ཡ་མྷི ཝུ་ཊྛི་ཏེ ཨཱ་ས་ནཾ ཨུ་དྡྷ་རི་ཏ་བྦཾ. ས་ཙེ སོ དེ་སོ ཨུ་ཀླཱ་པོ ཧོ་ཏི, སོ དེ་སོ ས་མྨ་ཛྫི་ཏ་བྦོ.
‘‘ས་ཙེ ཨཱ་ཙ་རི་ཡོ གཱ་མཾ པ་ཝི་སི་ཏུ་ཀཱ་མོ ཧོ་ཏི, ནི་ཝཱ་ས་ནཾ དཱ་ཏ་བྦཾ, པ་ཊི་ནི་ཝཱ་ས་ནཾ པ་ཊི་གྒ་ཧེ་ཏ་བྦཾ, ཀཱ་ཡ་བ་ནྡྷ་ནཾ དཱ་ཏ་བྦཾ, ས་གུ་ཎཾ ཀ་ཏྭཱ ས་ངྒྷཱ་ཊི་ཡོ དཱ་ཏ་བྦཱ, དྷོ་ཝི་ཏྭཱ པ་ཏྟོ སོ་ད་ཀོ དཱ་ཏ་བྦོ. ས་ཙེ ཨཱ་ཙ་རི་ཡོ པ་ཙྪཱ་ས་མ་ཎཾ ཨཱ་ཀ་ངྑ་ཏི, ཏི་མ་ཎྜ་ལཾ པ་ཊི་ཙྪཱ་དེ་ནྟེ་ན པ་རི་མ་ཎྜ་ལཾ ནི་ཝཱ་སེ་ཏྭཱ ཀཱ་ཡ་བ་ནྡྷ་ནཾ བ་ནྡྷི་ཏྭཱ ས་གུ་ཎཾ ཀ་ཏྭཱ ས་ངྒྷཱ་ཊི་ཡོ པཱ་རུ་པི་ཏྭཱ ག་ཎྛི་ཀཾ པ་ཊི་མུ་ཉྩི་ཏྭཱ དྷོ་ཝི་ཏྭཱ པ་ཏྟཾ ག་ཧེ་ཏྭཱ ཨཱ་ཙ་རི་ཡ་སྶ པ་ཙྪཱ་ས་མ་ཎེ་ན ཧོ་ཏ་བྦཾ. ནཱ་ཏི་དཱུ་རེ ག་ནྟ་བྦཾ, ནཱ་ཙྩཱ་ས་ནྣེ ག་ནྟ་བྦཾ, པ་ཏྟ་པ་རི་ཡཱ་པ་ནྣཾ པ་ཊི་གྒ་ཧེ་ཏ་བྦཾ. ན ཨཱ་ཙ་རི་ཡ་སྶ བྷ་ཎ་མཱ་ན་སྶ ཨ་ནྟ་ར་ནྟ་རཱ ཀ་ཐཱ ཨོ་པཱ་ཏེ་ཏ་བྦཱ. ཨཱ་ཙ་རི་ཡོ ཨཱ་པ་ཏྟི་སཱ་མ་ནྟཱ བྷ་ཎ་མཱ་ནོ ནི་ཝཱ་རེ་ཏ་བྦོ.
‘‘ནི་ཝ་ཏྟ་ནྟེ་ན པ་ཋ་མ་ཏ་རཾ ཨཱ་ག་ནྟྭཱ ཨཱ་ས་ནཾ པ་ཉྙ་པེ་ཏ་བྦཾ, པཱ་དོ་ད་ཀཾ པཱ་ད་པཱི་ཋཾ པཱ་ད་ཀ་ཐ་ལི་ཀཾ ཨུ་པ་ནི་ཀྑི་པི་ཏ་བྦཾ, པ་ཙྩུ་གྒ་ནྟྭཱ པ་ཏྟ་ཙཱི་ཝ་རཾ པ་ཊི་གྒ་ཧེ་ཏ་བྦཾ, པ་ཊི་ནི་ཝཱ་ས་ནཾ དཱ་ཏ་བྦཾ, ནི་ཝཱ་ས་ནཾ པ་ཊི་གྒ་ཧེ་ཏ་བྦཾ. ས་ཙེ ཙཱི་ཝ་རཾ སི་ནྣཾ ཧོ་ཏི, མུ་ཧུ་ཏྟཾ ཨུ་ཎྷེ ཨོ་ཏཱ་པེ་ཏ་བྦཾ, ན ཙ ཨུ་ཎྷེ ཙཱི་ཝ་རཾ ནི་ད་ཧི་ཏ་བྦཾ. ཙཱི་ཝ་རཾ ས་ངྒྷ་རི་ཏ་བྦཾ. ཙཱི་ཝ་རཾ ས་ངྒྷ་ར་ནྟེ་ན ཙ་ཏུ་ར་ངྒུ་ལཾ ཀ་ཎྞཾ ཨུ་སྶཱ་རེ་ཏྭཱ ཙཱི་ཝ་རཾ ས་ངྒྷ་རི་ཏ་བྦཾ – མཱ མ་ཛ྄ཛྷེ བྷ་ངྒོ ཨ་ཧོ་སཱི་ཏི. ཨོ་བྷོ་གེ ཀཱ་ཡ་བ་ནྡྷ་ནཾ ཀཱ་ཏ་བྦཾ.
‘‘ས་ཙེ པི་ཎྜ་པཱ་ཏོ ཧོ་ཏི, ཨཱ་ཙ་རི་ཡོ ཙ བྷུ་ཉྫི་ཏུ་ཀཱ་མོ ཧོ་ཏི, ཨུ་ད་ཀཾ ད་ཏྭཱ པི་ཎྜ་པཱ་ཏོ ཨུ་པ་ནཱ་མེ་ཏ་བྦོ. ཨཱ་ཙ་རི་ཡོ པཱ་ནཱི་ཡེ་ན པུ་ཙྪི་ཏ་བྦོ. བྷུ་ཏྟཱ་ཝི་སྶ ཨུ་ད་ཀཾ ད་ཏྭཱ པ་ཏྟཾ པ་ཊི་གྒ་ཧེ་ཏྭཱ ནཱི་ཙཾ ཀ་ཏྭཱ སཱ་དྷུ་ཀཾ ཨ་པྤ་ཊི་གྷཾ་ས་ནྟེ་ན དྷོ་ཝི་ཏྭཱ ཝོ་ད་ཀཾ ཀ་ཏྭཱ མུ་ཧུ་ཏྟཾ ཨུ་ཎྷེ ཨོ་ཏཱ་པེ་ཏ་བྦོ, ན ཙ ཨུ་ཎྷེ པ་ཏྟོ ནི་ད་ཧི་ཏ་བྦོ. པ་ཏྟ་ཙཱི་ཝ་རཾ ནི་ཀྑི་པི་ཏ་བྦཾ. པ་ཏྟཾ ནི་ཀྑི་པ་ནྟེ་ན ཨེ་ཀེ་ན ཧ་ཏྠེ་ན པ་ཏྟཾ ག་ཧེ་ཏྭཱ ཨེ་ཀེ་ན ཧ་ཏྠེ་ན ཧེ་ཊྛཱ་མ་ཉྩཾ ཝཱ ཧེ་ཊྛཱ་པཱི་ཋཾ ཝཱ པ་རཱ་མ་སི་ཏྭཱ པ་ཏྟོ ནི་ཀྑི་པི་ཏ་བྦོ. ན ཙ ཨ་ན་ནྟ་ར་ཧི་ཏཱ་ཡ བྷཱུ་མི་ཡཱ པ་ཏྟོ ནི་ཀྑི་པི་ཏ་བྦོ. ཙཱི་ཝ་རཾ ནི་ཀྑི་པ་ནྟེ་ན ཨེ་ཀེ་ན ཧ་ཏྠེ་ན ཙཱི་ཝ་རཾ ག་ཧེ་ཏྭཱ ཨེ་ཀེ་ན ཧ་ཏྠེ་ན ཙཱི་ཝ་ར་ཝཾ་སཾ ཝཱ ཙཱི་ཝ་ར་ར་ཛྫུཾ ཝཱ པ་མ་ཛྫི་ཏྭཱ པཱ་ར་ཏོ ཨ་ནྟཾ ཨོ་ར་ཏོ བྷོ་གཾ ཀ་ཏྭཱ ཙཱི་ཝ་རཾ ནི་ཀྑི་པི་ཏ་བྦཾ. ཨཱ་ཙ་རི་ཡ་མྷི ཝུ་ཊྛི་ཏེ ཨཱ་ས་ནཾ ཨུ་དྡྷ་རི་ཏ་བྦཾ, པཱ་དོ་ད་ཀཾ པཱ་ད་པཱི་ཋཾ པཱ་ད་ཀ་ཐ་ལི་ཀཾ པ་ཊི་སཱ་མེ་ཏ་བྦཾ. ས་ཙེ སོ དེ་སོ ཨུ་ཀླཱ་པོ ཧོ་ཏི, སོ དེ་སོ ས་མྨ་ཛྫི་ཏ་བྦོ.
‘‘ས་ཙེ ཨཱ་ཙ་རི་ཡོ ན་ཧཱ་ཡི་ཏུ་ཀཱ་མོ ཧོ་ཏི, ན་ཧཱ་ནཾ པ་ཊི་ཡཱ་དེ་ཏ་བྦཾ. ས་ཙེ སཱི་ཏེ་ན ཨ་ཏྠོ ཧོ་ཏི, སཱི་ཏཾ པ་ཊི་ཡཱ་དེ་ཏ་བྦཾ. ས་ཙེ ཨུ་ཎྷེ་ན ཨ་ཏྠོ ཧོ་ཏི, ཨུ་ཎྷཾ པ་ཊི་ཡཱ་དེ་ཏ་བྦཾ.
‘‘ས་ཙེ ཨཱ་ཙ་རི་ཡོ ཛ་ནྟཱ་གྷ་རཾ པ་ཝི་སི་ཏུ་ཀཱ་མོ ཧོ་ཏི, ཙུ་ཎྞཾ ས་ནྣེ་ཏ་བྦཾ, མ་ཏྟི་ཀཱ ཏེ་མེ་ཏ་བྦཱ, ཛ་ནྟཱ་གྷ་ར་པཱི་ཋཾ ཨཱ་དཱ་ཡ ཨཱ་ཙ་རི་ཡ་སྶ པི་ཊྛི་ཏོ པི་ཊྛི་ཏོ ག་ནྟྭཱ ཛ་ནྟཱ་གྷ་ར་པཱི་ཋཾ ད་ཏྭཱ ཙཱི་ཝ་རཾ པ་ཊི་གྒ་ཧེ་ཏྭཱ ཨེ་ཀ་མ་ནྟཾ ནི་ཀྑི་པི་ཏ་བྦཾ, ཙུ་ཎྞཾ དཱ་ཏ་བྦཾ, མ་ཏྟི་ཀཱ དཱ་ཏ་བྦཱ. ས་ཙེ ཨུ་སྶ་ཧ་ཏི, ཛ་ནྟཱ་གྷ་རཾ པ་ཝི་སི་ཏ་བྦཾ. ཛ་ནྟཱ་གྷ་རཾ པ་ཝི་ས་ནྟེ་ན མ་ཏྟི་ཀཱ་ཡ མུ་ཁཾ མ་ཀྑེ་ཏྭཱ པུ་ར་ཏོ ཙ པ་ཙྪ་ཏོ ཙ པ་ཊི་ཙྪཱ་དེ་ཏྭཱ ཛ་ནྟཱ་གྷ་རཾ པ་ཝི་སི་ཏ་བྦཾ. ན ཐེ་རེ བྷི་ཀྑཱུ ཨ་ནུ་པ་ཁ་ཛྫ ནི་སཱི་དི་ཏ་བྦཾ. ན ན་ཝཱ བྷི་ཀྑཱུ ཨཱ་ས་ནེ་ན པ་ཊི་བཱ་ཧི་ཏ་བྦཱ. ཛ་ནྟཱ་གྷ་རེ ཨཱ་ཙ་རི་ཡ་སྶ པ་རི་ཀ་མྨཾ ཀཱ་ཏ་བྦཾ. ཛ་ནྟཱ་གྷ་རཱ ནི་ཀྑ་མ་ནྟེ་ན ཛ་ནྟཱ་གྷ་ར་པཱི་ཋཾ ཨཱ་དཱ་ཡ པུ་ར་ཏོ ཙ པ་ཙྪ་ཏོ ཙ པ་ཊི་ཙྪཱ་དེ་ཏྭཱ ཛ་ནྟཱ་གྷ་རཱ ནི་ཀྑ་མི་ཏ་བྦཾ.
‘‘ཨུ་ད་ཀེ་པི ཨཱ་ཙ་རི་ཡ་སྶ པ་རི་ཀ་མྨཾ ཀཱ་ཏ་བྦཾ. ན་ཧཱ་ཏེ་ན པ་ཋ་མ་ཏ་རཾ ཨུ་ཏྟ་རི་ཏྭཱ ཨ་ཏྟ་ནོ ག་ཏྟཾ ཝོ་ད་ཀཾ ཀ་ཏྭཱ ནི་ཝཱ་སེ་ཏྭཱ ཨཱ་ཙ་རི་ཡ་སྶ ག་ཏྟ་ཏོ ཨུ་ད་ཀཾ པ་མ་ཛྫི་ཏ་བྦཾ, ནི་ཝཱ་ས་ནཾ དཱ་ཏ་བྦཾ, ས་ངྒྷཱ་ཊི དཱ་ཏ་བྦཱ, ཛ་ནྟཱ་གྷ་ར་པཱི་ཋཾ ཨཱ་དཱ་ཡ པ་ཋ་མ་ཏ་རཾ ཨཱ་ག་ནྟྭཱ ཨཱ་ས་ནཾ པ་ཉྙ་པེ་ཏ་བྦཾ, པཱ་དོ་ད་ཀཾ པཱ་ད་པཱི་ཋཾ པཱ་ད་ཀ་ཐ་ལི་ཀཾ ཨུ་པ་ནི་ཀྑི་པི་ཏ་བྦཾ. ཨཱ་ཙ་རི་ཡོ པཱ་ནཱི་ཡེ་ན པུ་ཙྪི་ཏ་བྦོ. ས་ཙེ ཨུ་དྡི་སཱ་པེ་ཏུ་ཀཱ་མོ ཧོ་ཏི, ཨུ་དྡི་སཱ་པེ་ཏ་བྦོ. ས་ཙེ པ་རི་པུ་ཙྪི་ཏུ་ཀཱ་མོ ཧོ་ཏི, པ་རི་པུ་ཙྪི་ཏ་བྦོ.
‘‘ཡ་སྨིཾ ཝི་ཧཱ་རེ ཨཱ་ཙ་རི་ཡོ ཝི་ཧ་ར་ཏི, ས་ཙེ སོ ཝི་ཧཱ་རོ ཨུ་ཀླཱ་པོ ཧོ་ཏི, ས་ཙེ ཨུ་སྶ་ཧ་ཏི, སོ་དྷེ་ཏ་བྦོ. ཝི་ཧཱ་རཾ སོ་དྷེ་ནྟེ་ན པ་ཋ་མཾ པ་ཏྟ་ཙཱི་ཝ་རཾ ནཱི་ཧ་རི་ཏྭཱ ཨེ་ཀ་མ་ནྟཾ ནི་ཀྑི་པི་ཏ་བྦཾ; ནི་སཱི་ད་ན་པ་ཙྩ་ཏྠ་ར་ཎཾ ནཱི་ཧ་རི་ཏྭཱ ཨེ་ཀ་མ་ནྟཾ ནི་ཀྑི་པི་ཏ་བྦཾ; བྷི་སི་བི་བྦོ་ཧ་ནཾ ནཱི་ཧ་རི་ཏྭཱ ཨེ་ཀ་མ་ནྟཾ ནི་ཀྑི་པི་ཏ་བྦཾ; མ་ཉྩོ ནཱི་ཙཾ ཀ་ཏྭཱ སཱ་དྷུ་ཀཾ ཨ་པྤ་ཊི་གྷཾ་ས་ནྟེ་ན, ཨ་ས་ངྒྷ་ཊྚེ་ནྟེ་ན ཀ་ཝཱ་ཊ་པི་ཊྛཾ, ནཱི་ཧ་རི་ཏྭཱ ཨེ་ཀ་མ་ནྟཾ ནི་ཀྑི་པི་ཏ་བྦོ; པཱི་ཋཾ ནཱི་ཙཾ ཀ་ཏྭཱ སཱ་དྷུ་ཀཾ ཨ་པྤ་ཊི་གྷཾ་ས་ནྟེ་ན, ཨ་ས་ངྒྷ་ཊྚེ་ནྟེ་ན ཀ་ཝཱ་ཊ་པི་ཊྛཾ, ནཱི་ཧ་རི་ཏྭཱ ཨེ་ཀ་མ་ནྟཾ ནི་ཀྑི་པི་ཏ་བྦཾ; མ་ཉྩ་པ་ཊི་པཱ་ད་ཀཱ ནཱི་ཧ་རི་ཏྭཱ ཨེ་ཀ་མ་ནྟཾ ནི་ཀྑི་པི་ཏ་བྦཱ; ཁེ་ལ༹་མ་ལླ་ཀོ ནཱི་ཧ་རི་ཏྭཱ ཨེ་ཀ་མ་ནྟཾ ནི་ཀྑི་པི་ཏ་བྦོ; ཨ་པ་སྶེ་ན་ཕ་ལ་ཀཾ ནཱི་ཧ་རི་ཏྭཱ ཨེ་ཀ་མ་ནྟཾ ནི་ཀྑི་པི་ཏ་བྦཾ; བྷཱུ་མ་ཏྠ་ར་ཎཾ ཡ་ཐཱ་པ་ཉྙ་ཏྟཾ ས་ལླ་ཀྑེ་ཏྭཱ ནཱི་ཧ་རི་ཏྭཱ ཨེ་ཀ་མ་ནྟཾ ནི་ཀྑི་པི་ཏ་བྦཾ. ས་ཙེ ཝི་ཧཱ་རེ ས་ནྟཱ་ན་ཀཾ ཧོ་ཏི, ཨུ་ལློ་ཀཱ པ་ཋ་མཾ ཨོ་ཧཱ་རེ་ཏ་བྦཾ, ཨཱ་ལོ་ཀ་ས་ནྡྷི་ཀ་ཎྞ་བྷཱ་གཱ པ་མ་ཛྫི་ཏ་བྦཱ. ས་ཙེ གེ་རུ་ཀ་པ་རི་ཀ་མྨ་ཀ་ཏཱ བྷི་ཏྟི ཀ་ཎྞ་ཀི་ཏཱ ཧོ་ཏི, ཙོ་ལ༹་ཀཾ ཏེ་མེ་ཏྭཱ པཱི་ལེ༹་ཏྭཱ པ་མ་ཛྫི་ཏ་བྦཱ. ས་ཙེ ཀཱ་ལ༹་ཝ་ཎྞ་ཀ་ཏཱ བྷཱུ་མི ཀ་ཎྞ་ཀི་ཏཱ ཧོ་ཏི, ཙོ་ལ༹་ཀཾ ཏེ་མེ་ཏྭཱ པཱི་ལེ༹་ཏྭཱ པ་མ་ཛྫི་ཏ་བྦཱ. ས་ཙེ ཨ་ཀ་ཏཱ ཧོ་ཏི བྷཱུ་མི, ཨུ་ད་ཀེ་ན པ་རི་པྥོ་སི་ཏྭཱ ས་མྨ་ཛྫི་ཏ་བྦཱ – མཱ ཝི་ཧཱ་རོ ར་ཛེ་ན ཨུ་ཧ་ཉྙཱི་ཏི. ས་ངྐཱ་རཾ ཝི་ཙི་ནི་ཏྭཱ ཨེ་ཀ་མ་ནྟཾ ཚ་ཌྜེ་ཏ་བྦཾ.
‘‘བྷཱུ་མ་ཏྠ་ར་ཎཾ ཨོ་ཏཱ་པེ་ཏྭཱ སོ་དྷེ་ཏྭཱ པ་པྥོ་ཊེ་ཏྭཱ ཨ་ཏི་ཧ་རི་ཏྭཱ ཡ་ཐཱ་པ་ཉྙ་ཏྟཾ པ་ཉྙ་པེ་ཏ་བྦཾ. མ་ཉྩ་པ་ཊི་པཱ་ད་ཀཱ ཨོ་ཏཱ་པེ་ཏྭཱ པ་མ་ཛྫི་ཏྭཱ ཨ་ཏི་ཧ་རི་ཏྭཱ ཡ་ཐཱ་ཋཱ་ནེ ཋ་པེ་ཏ་བྦཱ. མ་ཉྩོ ཨོ་ཏཱ་པེ་ཏྭཱ སོ་དྷེ་ཏྭཱ པ་པྥོ་ཊེ་ཏྭཱ ནཱི་ཙཾ ཀ་ཏྭཱ སཱ་དྷུ་ཀཾ ཨ་པྤ་ཊི་གྷཾ་ས་ནྟེ་ན, ཨ་ས་ངྒྷ་ཊྚེ་ནྟེ་ན ཀ་ཝཱ་ཊ་པི་ཊྛཾ, ཨ་ཏི་ཧ་རི་ཏྭཱ ཡ་ཐཱ་པ་ཉྙ་ཏྟཾ པ་ཉྙ་པེ་ཏ་བྦོ. པཱི་ཋཾ ཨོ་ཏཱ་པེ་ཏྭཱ སོ་དྷེ་ཏྭཱ པ་པྥོ་ཊེ་ཏྭཱ ནཱི་ཙཾ ཀ་ཏྭཱ སཱ་དྷུ་ཀཾ ཨ་པྤ་ཊི་གྷཾ་ས་ནྟེ་ན, ཨ་ས་ངྒྷ་ཊྚེ་ནྟེ་ན ཀ་ཝཱ་ཊ་པི་ཊྛཾ, ཨ་ཏི་ཧ་རི་ཏྭཱ ཡ་ཐཱ་པ་ཉྙ་ཏྟཾ པ་ཉྙ་པེ་ཏ་བྦཾ. བྷི་སི་བི་བྦོ་ཧ་ནཾ ཨོ་ཏཱ་པེ་ཏྭཱ སོ་དྷེ་ཏྭཱ པ་པྥོ་ཊེ་ཏྭཱ ཨ་ཏི་ཧ་རི་ཏྭཱ ཡ་ཐཱ་པ་ཉྙ་ཏྟཾ པ་ཉྙ་པེ་ཏ་བྦཾ. ནི་སཱི་ད་ན་པ་ཙྩ་ཏྠ་ར་ཎཾ ཨོ་ཏཱ་པེ་ཏྭཱ སོ་དྷེ་ཏྭཱ པ་པྥོ་ཊེ་ཏྭཱ ཨ་ཏི་ཧ་རི་ཏྭཱ ཡ་ཐཱ་པ་ཉྙ་ཏྟཾ པ་ཉྙ་པེ་ཏ་བྦཾ. ཁེ་ལ༹་མ་ལླ་ཀོ ཨོ་ཏཱ་པེ་ཏྭཱ པ་མ་ཛྫི་ཏྭཱ ཨ་ཏི་ཧ་རི་ཏྭཱ ཡ་ཐཱ་ཋཱ་ནེ ཋ་པེ་ཏ་བྦོ. ཨ་པ་སྶེ་ན་ཕ་ལ་ཀཾ ཨོ་ཏཱ་པེ་ཏྭཱ པ་མ་ཛྫི་ཏྭཱ ཨ་ཏི་ཧ་རི་ཏྭཱ ཡ་ཐཱ་ཋཱ་ནེ ཋ་པེ་ཏ་བྦཾ. པ་ཏྟ་ཙཱི་ཝ་རཾ ནི་ཀྑི་པི་ཏ་བྦཾ. པ་ཏྟཾ ནི་ཀྑི་པ་ནྟེ་ན ཨེ་ཀེ་ན ཧ་ཏྠེ་ན པ་ཏྟཾ ག་ཧེ་ཏྭཱ ཨེ་ཀེ་ན ཧ་ཏྠེ་ན ཧེ་ཊྛཱ་མ་ཉྩཾ ཝཱ ཧེ་ཊྛཱ་པཱི་ཋཾ ཝཱ པ་རཱ་མ་སི་ཏྭཱ པ་ཏྟོ ནི་ཀྑི་པི་ཏ་བྦོ. ན ཙ ཨ་ན་ནྟ་ར་ཧི་ཏཱ་ཡ བྷཱུ་མི་ཡཱ པ་ཏྟོ ནི་ཀྑི་པི་ཏ་བྦོ. ཙཱི་ཝ་རཾ ནི་ཀྑི་པ་ནྟེ་ན ཨེ་ཀེ་ན ཧ་ཏྠེ་ན ཙཱི་ཝ་རཾ ག་ཧེ་ཏྭཱ ཨེ་ཀེ་ན ཧ་ཏྠེ་ན ཙཱི་ཝ་ར་ཝཾ་སཾ ཝཱ ཙཱི་ཝ་ར་ར་ཛྫུཾ ཝཱ པ་མ་ཛྫི་ཏྭཱ པཱ་ར་ཏོ ཨ་ནྟཾ ཨོ་ར་ཏོ བྷོ་གཾ ཀ་ཏྭཱ ཙཱི་ཝ་རཾ ནི་ཀྑི་པི་ཏ་བྦཾ.
‘‘ས་ཙེ པུ་ར་ཏྠི་མཱ ས་ར་ཛཱ ཝཱ་ཏཱ ཝཱ་ཡ་ནྟི, པུ་ར་ཏྠི་མཱ ཝཱ་ཏ་པཱ་ནཱ ཐ་ཀེ་ཏ་བྦཱ. ས་ཙེ པ་ཙྪི་མཱ ས་ར་ཛཱ ཝཱ་ཏཱ ཝཱ་ཡ་ནྟི, པ་ཙྪི་མཱ ཝཱ་ཏ་པཱ་ནཱ ཐ་ཀེ་ཏ་བྦཱ. ས་ཙེ ཨུ་ཏྟ་རཱ ས་ར་ཛཱ ཝཱ་ཏཱ ཝཱ་ཡ་ནྟི, ཨུ་ཏྟ་རཱ ཝཱ་ཏ་པཱ་ནཱ ཐ་ཀེ་ཏ་བྦཱ. ས་ཙེ ད་ཀྑི་ཎཱ ས་ར་ཛཱ ཝཱ་ཏཱ ཝཱ་ཡ་ནྟི, ད་ཀྑི་ཎཱ ཝཱ་ཏ་པཱ་ནཱ ཐ་ཀེ་ཏ་བྦཱ. ས་ཙེ སཱི་ཏ་ཀཱ་ལོ ཧོ་ཏི, དི་ཝཱ ཝཱ་ཏ་པཱ་ནཱ ཝི་ཝ་རི་ཏ་བྦཱ, ར་ཏྟིཾ ཐ་ཀེ་ཏ་བྦཱ. ས་ཙེ ཨུ་ཎྷ་ཀཱ་ལོ ཧོ་ཏི, དི་ཝཱ ཝཱ་ཏ་པཱ་ནཱ ཐ་ཀེ་ཏ་བྦཱ, ར་ཏྟིཾ ཝི་ཝ་རི་ཏ་བྦཱ.
‘‘ས་ཙེ པ་རི་ཝེ་ཎཾ ཨུ་ཀླཱ་པཾ ཧོ་ཏི, པ་རི་ཝེ་ཎཾ ས་མྨ་ཛྫི་ཏ་བྦཾ. ས་ཙེ ཀོ་ཊྛ་ཀོ ཨུ་ཀླཱ་པོ ཧོ་ཏི, ཀོ་ཊྛ་ཀོ ས་མྨ་ཛྫི་ཏ་བྦོ. ས་ཙེ ཨུ་པ་ཊྛཱ་ན་སཱ་ལཱ ཨུ་ཀླཱ་པཱ ཧོ་ཏི, ཨུ་པ་ཊྛཱ་ན་སཱ་ལཱ ས་མྨ་ཛྫི་ཏ་བྦཱ. ས་ཙེ ཨ་གྒི་སཱ་ལཱ ཨུ་ཀླཱ་པཱ ཧོ་ཏི, ཨ་གྒི་སཱ་ལཱ ས་མྨ་ཛྫི་ཏ་བྦཱ. ས་ཙེ ཝ་ཙྩ་ཀུ་ཊི ཨུ་ཀླཱ་པཱ ཧོ་ཏི, ཝ་ཙྩ་ཀུ་ཊི ས་མྨ་ཛྫི་ཏ་བྦཱ. ས་ཙེ པཱ་ནཱི་ཡཾ ན ཧོ་ཏི, པཱ་ནཱི་ཡཾ ཨུ་པ་ཊྛཱ་པེ་ཏ་བྦཾ. ས་ཙེ པ་རི་བྷོ་ཛ་ནཱི་ཡཾ ན ཧོ་ཏི, པ་རི་བྷོ་ཛ་ནཱི་ཡཾ ཨུ་པ་ཊྛཱ་པེ་ཏ་བྦཾ. ས་ཙེ ཨཱ་ཙ་མ་ན་ཀུ་མྦྷི་ཡཾ ཨུ་ད་ཀཾ ན ཧོ་ཏི, ཨཱ་ཙ་མ་ན་ཀུ་མྦྷི་ཡཱ ཨུ་ད་ཀཾ ཨཱ་སི་ཉྩི་ཏ་བྦཾ.
‘‘ས་ཙེ ཨཱ་ཙ་རི་ཡ་སྶ ཨ་ན་བྷི་ར་ཏི ཨུ་པྤ་ནྣཱ ཧོ་ཏི, ཨ་ནྟེ་ཝཱ་སི་ཀེ་ན ཝཱུ་པ་ཀཱ་སེ་ཏ་བྦོ, ཝཱུ་པ་ཀཱ་སཱ་པེ་ཏ་བྦོ, དྷ་མྨ་ཀ་ཐཱ ཝཱ་སྶ ཀཱ་ཏ་བྦཱ. ས་ཙེ ཨཱ་ཙ་རི་ཡ་སྶ ཀུ་ཀྐུ་ཙྩཾ ཨུ་པྤ་ནྣཾ ཧོ་ཏི, ཨ་ནྟེ་ཝཱ་སི་ཀེ་ན ཝི་ནོ་དེ་ཏ་བྦཾ, ཝི་ནོ་དཱ་པེ་ཏ་བྦཾ, དྷ་མྨ་ཀ་ཐཱ ཝཱ་སྶ ཀཱ་ཏ་བྦཱ. ས་ཙེ ཨཱ་ཙ་རི་ཡ་སྶ དི་ཊྛི་ག་ཏཾ ཨུ་པྤ་ནྣཾ ཧོ་ཏི, ཨ་ནྟེ་ཝཱ་སི་ཀེ་ན ཝི་ཝེ་ཙེ་ཏ་བྦཾ, ཝི་ཝེ་ཙཱ་པེ་ཏ་བྦཾ, དྷ་མྨ་ཀ་ཐཱ ཝཱ་སྶ ཀཱ་ཏ་བྦཱ. ས་ཙེ ཨཱ་ཙ་རི་ཡོ ག་རུ་དྷ་མྨཾ ཨ་ཛ྄ཛྷཱ་པ་ནྣོ ཧོ་ཏི པ་རི་ཝཱ་སཱ་ར་ཧོ, ཨ་ནྟེ་ཝཱ་སི་ཀེ་ན ཨུ་སྶུ་ཀྐཾ ཀཱ་ཏ་བྦཾ – ཀི་ནྟི ནུ ཁོ ས་ངྒྷོ ཨཱ་ཙ་རི་ཡ་སྶ པ་རི་ཝཱ་སཾ ད་དེ་ཡྻཱ་ཏི. ས་ཙེ ཨཱ་ཙ་རི་ཡོ མཱུ་ལཱ་ཡ པ་ཊི་ཀ་སྶ་ནཱ་ར་ཧོ ཧོ་ཏི, ཨ་ནྟེ་ཝཱ་སི་ཀེ་ན ཨུ་སྶུ་ཀྐཾ ཀཱ་ཏ་བྦཾ – ཀི་ནྟི ནུ ཁོ ས་ངྒྷོ ཨཱ་ཙ་རི་ཡཾ མཱུ་ལཱ་ཡ པ་ཊི་ཀ་སྶེ་ཡྻཱ་ཏི. ས་ཙེ ཨཱ་ཙ་རི་ཡོ མཱ་ན་ཏྟཱ་ར་ཧོ ཧོ་ཏི, ཨ་ནྟེ་ཝཱ་སི་ཀེ་ན ཨུ་སྶུ་ཀྐཾ ཀཱ་ཏ་བྦཾ – ཀི་ནྟི ནུ ཁོ ས་ངྒྷོ ཨཱ་ཙ་རི་ཡ་སྶ མཱ་ན་ཏྟཾ ད་དེ་ཡྻཱ་ཏི. ས་ཙེ ཨཱ་ཙ་རི་ཡོ ཨ་བྦྷཱ་ནཱ་ར་ཧོ ཧོ་ཏི, ཨ་ནྟེ་ཝཱ་སི་ཀེ་ན ཨུ་སྶུ་ཀྐཾ ཀཱ་ཏ་བྦཾ – ཀི་ནྟི ནུ ཁོ ས་ངྒྷོ ཨཱ་ཙ་རི་ཡཾ ཨ་བྦྷེ་ཡྻཱ་ཏི. ས་ཙེ ས་ངྒྷོ ཨཱ་ཙ་རི་ཡ་སྶ ཀ་མྨཾ ཀ་ཏྟུ་ཀཱ་མོ ཧོ་ཏི, ཏ་ཛྫ་ནཱི་ཡཾ ཝཱ ནི་ཡ་སྶཾ ཝཱ པ་བྦཱ་ཛ་ནཱི་ཡཾ ཝཱ པ་ཊི་སཱ་ར་ཎཱི་ཡཾ ཝཱ ཨུ་ཀྑེ་པ་ནཱི་ཡཾ ཝཱ, ཨ་ནྟེ་ཝཱ་སི་ཀེ་ན ཨུ་སྶུ་ཀྐཾ ཀཱ་ཏ་བྦཾ – ཀི་ནྟི ནུ ཁོ ས་ངྒྷོ ཨཱ་ཙ་རི་ཡ་སྶ ཀ་མྨཾ ན ཀ་རེ་ཡྻ, ལ་ཧུ་ཀཱ་ཡ ཝཱ པ་རི་ཎཱ་མེ་ཡྻཱ་ཏི. ཀ་ཏཾ ཝཱ པ་ན་སྶ ཧོ་ཏི ས་ངྒྷེ་ན ཀ་མྨཾ, ཏ་ཛྫ་ནཱི་ཡཾ ཝཱ ནི་ཡ་སྶཾ ཝཱ པ་བྦཱ་ཛ་ནཱི་ཡཾ ཝཱ པ་ཊི་སཱ་ར་ཎཱི་ཡཾ ཝཱ ཨུ་ཀྑེ་པ་ནཱི་ཡཾ ཝཱ, ཨ་ནྟེ་ཝཱ་སི་ཀེ་ན ཨུ་སྶུ་ཀྐཾ ཀཱ་ཏ་བྦཾ – ཀི་ནྟི ནུ ཁོ ཨཱ་ཙ་རི་ཡོ ས་མྨཱ ཝ་ཏྟེ་ཡྻ, ལོ་མཾ པཱ་ཏེ་ཡྻ, ནེ་ཏྠཱ་རཾ ཝ་ཏྟེ་ཡྻ, ས་ངྒྷོ ཏཾ ཀ་མྨཾ པ་ཊི་པྤ་སྶ་མྦྷེ་ཡྻཱ་ཏི.
‘‘ས་ཙེ ཨཱ་ཙ་རི་ཡ་སྶ ཙཱི་ཝ་རཾ དྷོ་ཝི་ཏ་བྦཾ ཧོ་ཏི, ཨ་ནྟེ་ཝཱ་སི་ཀེ་ན དྷོ་ཝི་ཏ་བྦཾ, ཨུ་སྶུ་ཀྐཾ ཝཱ ཀཱ་ཏ་བྦཾ – ཀི་ནྟི ནུ ཁོ ཨཱ་ཙ་རི་ཡ་སྶ ཙཱི་ཝ་རཾ དྷོ་ཝི་ཡེ་ཐཱ་ཏི. ས་ཙེ ཨཱ་ཙ་རི་ཡ་སྶ ཙཱི་ཝ་རཾ ཀཱ་ཏ་བྦཾ ཧོ་ཏི, ཨ་ནྟེ་ཝཱ་སི་ཀེ་ན ཀཱ་ཏ་བྦཾ, ཨུ་སྶུ་ཀྐཾ ཝཱ ཀཱ་ཏ་བྦཾ – ཀི་ནྟི ནུ ཁོ ཨཱ་ཙ་རི་ཡ་སྶ ཙཱི་ཝ་རཾ ཀ་རི་ཡེ་ཐཱ་ཏི. ས་ཙེ ཨཱ་ཙ་རི་ཡ་སྶ ར་ཛ་ནཾ པ་ཙི་ཏ་བྦཾ ཧོ་ཏི, ཨ་ནྟེ་ཝཱ་སི་ཀེ་ན པ་ཙི་ཏ་བྦཾ, ཨུ་སྶུ་ཀྐཾ ཝཱ ཀཱ་ཏ་བྦཾ – ཀི་ནྟི ནུ ཁོ ཨཱ་ཙ་རི་ཡ་སྶ ར་ཛ་ནཾ པ་ཙི་ཡེ་ཐཱ་ཏི. ས་ཙེ ཨཱ་ཙ་རི་ཡ་སྶ ཙཱི་ཝ་རཾ ར་ཛི་ཏ་བྦཾ ཧོ་ཏི, ཨ་ནྟེ་ཝཱ་སི་ཀེ་ན ར་ཛི་ཏ་བྦཾ, ཨུ་སྶུ་ཀྐཾ ཝཱ ཀཱ་ཏ་བྦཾ – ཀི་ནྟི ནུ ཁོ ཨཱ་ཙ་རི་ཡ་སྶ ཙཱི་ཝ་རཾ ར་ཛི་ཡེ་ཐཱ་ཏི. ཙཱི་ཝ་རཾ ར་ཛ་ནྟེ་ན སཱ་དྷུ་ཀཾ ས་མྤ་རི་ཝ་ཏྟ་ཀཾ ས་མྤ་རི་ཝ་ཏྟ་ཀཾ ར་ཛི་ཏ་བྦཾ, ན ཙ ཨ་ཙྪི་ནྣེ ཐེ་ཝེ པ་ཀྐ་མི་ཏ་བྦཾ.
‘‘ན ཨཱ་ཙ་རི་ཡཾ ཨ་ནཱ་པུ་ཙྪཱ ཨེ་ཀ་ཙྩ་སྶ པ་ཏྟོ དཱ་ཏ་བྦོ, ན ཨེ་ཀ་ཙྩ་སྶ པ་ཏྟོ པ་ཊི་གྒ་ཧེ་ཏ་བྦོ; ན ཨེ་ཀ་ཙྩ་སྶ ཙཱི་ཝ་རཾ དཱ་ཏ་བྦཾ; ན ཨེ་ཀ་ཙྩ་སྶ ཙཱི་ཝ་རཾ པ་ཊི་གྒ་ཧེ་ཏ་བྦཾ; ན ཨེ་ཀ་ཙྩ་སྶ པ་རི་ཀྑཱ་རོ དཱ་ཏ་བྦོ; ན ཨེ་ཀ་ཙྩ་སྶ པ་རི་ཀྑཱ་རོ པ་ཊི་གྒ་ཧེ་ཏ་བྦོ; ན ཨེ་ཀ་ཙྩ་སྶ ཀེ་སཱ ཚེ་དེ་ཏ་བྦཱ; ན ཨེ་ཀ་ཙྩེ་ན ཀེ་སཱ ཚེ་དཱ་པེ་ཏ་བྦཱ; ན ཨེ་ཀ་ཙྩ་སྶ པ་རི་ཀ་མྨཾ ཀཱ་ཏ་བྦཾ; ན ཨེ་ཀ་ཙྩེ་ན པ་རི་ཀ་མྨཾ ཀཱ་རཱ་པེ་ཏ་བྦཾ; ན ཨེ་ཀ་ཙྩ་སྶ ཝེ་ཡྻཱ་ཝ་ཙྩོ ཀཱ་ཏ་བྦོ; ན ཨེ་ཀ་ཙྩེ་ན ཝེ་ཡྻཱ་ཝ་ཙྩོ ཀཱ་རཱ་པེ་ཏ་བྦོ; ན ཨེ་ཀ་ཙྩ་སྶ པ་ཙྪཱ་ས་མ་ཎེ་ན ཧོ་ཏ་བྦཾ; ན ཨེ་ཀ་ཙྩོ པ་ཙྪཱ་ས་མ་ཎོ ཨཱ་དཱ་ཏ་བྦོ; ན ཨེ་ཀ་ཙྩ་སྶ པི་ཎྜ་པཱ་ཏོ ནཱི་ཧ་རི་ཏ་བྦོ; ན ཨེ་ཀ་ཙྩེ་ན པི་ཎྜ་པཱ་ཏོ ནཱི་ཧ་རཱ་པེ་ཏ་བྦོ. ན ཨཱ་ཙ་རི་ཡཾ ཨ་ནཱ་པུ་ཙྪཱ གཱ་མོ པ་ཝི་སི་ཏ་བྦོ, ན སུ་སཱ་ནཾ ག་ནྟ་བྦཾ, ན དི་སཱ པ་ཀྐ་མི་ཏ་བྦཱ. ས་ཙེ ཨཱ་ཙ་རི་ཡོ གི་ལཱ་ནོ ཧོ་ཏི, ཡཱ་ཝ་ཛཱི་ཝཾ ཨུ་པ་ཊྛཱ་ཏ་བྦོ, ཝུ་ཊྛཱ་ན་མ་སྶ ཨཱ་ག་མེ་ཏ་བྦ’’ནྟི.
ཨཱ་ཙ་རི་ཡ་ཝ་ཏྟཾ ནི་ཊྛི་ཏཾ.