པ་ཉྩ་ཝ་གྒོ

ཀ་མྨ་ཝ་གྒ་ཝ་ཎྞ་ནཱ

༤༨༣. ཀ་མྨ་ཝ་གྒེ ཨུ་མྨ་ཏྟ་ཀ་སྶ བྷི་ཀྑུ་ནོ ཨུ་མྨ་ཏྟ་ཀ་ས་མྨུ་ཏི ཨུ་མྨ་ཏྟ་ཀེ ཡཱ་ཙི་ཏྭཱ ག་ཏེ ཨ་ས་མྨུ་ཁཱ་པི དཱ་ཏུཾ ཝ་ཊྚ་ཏི, ཏ་ཏྠ ནི་སི་ནྣེ་པི ན ཀུ་པྤ་ཏི ནི་ཡ་མཱ་བྷཱ་ཝ་ཏོ. ཨ་ས་མྨུ་ཁཱ ཀ་ཏེ པ་ན དོ་སཱ་བྷཱ་ཝཾ ད་སྶེ་ཏུཾ ‘‘ཨ་ས་མྨུ་ཁཱ་ཀ་ཏཾ སུ་ཀ་ཏཾ ཧོ་ཏཱི’’ཏི ཝུ་ཏྟཾ. དཱུ་ཏེ་ན ཨུ་པ་ས་མྤ་དཱ པ་ན ས་མྨུ་ཁཱ ཀཱ་ཏུཾ ན ས་ཀྐཱ ཀ་མྨ་ཝཱ་ཙཱ་ནཱ་ན་ཏྟ་ས་མྦྷ་ཝ་ཏོ. པ་ཏྟ་ནི་ཀྐུ་ཛྫ་ནཱ་ད་ཡོ ཧ་ཏྠ་པཱ་ས་ཏོ ཨ་པ་ནཱི་ཏ་མ་ཏྟེ་པི ཀཱ་ཏུཾ ཝ་ཊྚ་ནྟི. ས་ངྒྷ་ས་མྨུ་ཁ་ཏཱཏི་ཨཱ་དཱི་སུ ཡཱ་ཝ་ཏི་ཀཱ བྷི་ཀྑཱུ ཀ་མྨ་པྤ་ཏྟཱ, ཏེ ཨཱ་ག་ཏཱ ཧོ་ནྟི, ཚ་ནྡཱ་ར་ཧཱ་ནཾ ཚ་ནྡོ ཨཱ་ཧ་ཊོ ཧོ་ཏི, ས་མྨུ་ཁཱི་བྷཱུ་ཏཱ ན པ་ཊི་ཀྐོ་ས་ནྟི, ཨ་ཡཾ ས་ངྒྷ་ས་མྨུ་ཁ་ཏཱ. ཡེ་ན དྷ་མྨེ་ན ཡེ་ན ཝི་ན་ཡེ་ན ཡེ་ན ས་ཏྠུ་སཱ་ས་ནེ་ན ས་ངྒྷོ ཀ་མྨཾ ཀ་རོ་ཏི, ཨ་ཡཾ དྷ་མྨ་ས་མྨུ་ཁ་ཏཱ. ཏ་ཏྠ དྷ་མྨོཏི བྷཱུ་ཏཾ ཝ་ཏྠུ. ཝི་ན་ཡོཏི ཙོ་ད་ནཱ ཙེ་ཝ སཱ་ར་ཎཱ ཙ. ས་ཏྠུ་སཱ་ས་ནཾ ནཱ་མ ཉ་ཏྟི་ས་མྤ་དཱ ཙེ་ཝ ཨ་ནུ་སྶཱ་ཝ་ན་ས་མྤ་དཱ ཙ. ཡ་སྶ ས་ངྒྷོ ཀ་མྨཾ ཀ་རོ་ཏི, ཏ་སྶ ས་མྨུ་ཁ་བྷཱ་ཝོ པུ་གྒ་ལ་ས་མྨུ་ཁ་ཏཱ. ཀ་ཏྟི་ཀ་མཱ་ས་སྶ པ་ཝཱ་ར་ཎ་མཱ་ས་ཏྟཱ ‘‘ཋ་པེ་ཏྭཱ ཀ་ཏྟི་ཀ་མཱ་ས’’ནྟི ཝུ་ཏྟཾ. པ་ཙྩུ་ཀྐ་ཌྜྷི་ཏྭཱ ཋ་པི་ཏ་དི་ཝ་སོ ཙཱཏི ཀཱ་ལ༹་པ་ཀྑེ ཙཱ་ཏུ་དྡ་སིཾ ཝཱ པ་ནྣ་ར་སིཾ ཝཱ ས་ནྡྷཱ་ཡ ཝུ་ཏྟཾ. དྭེ ཙ པུ་ཎྞ་མཱ་སི་ཡོཏི པ་ཋ་མ་པ་ཙྪི་མ་ཝ་སྶཱུ་པ་ག་ཏཱ་ནཾ ཝ་སེ་ན ཝུ་ཏྟཾ.

༤༨༥. ཋཱ་ན་ཀ་ར་ཎཱ་ནི སི་ཐི་ལཱ་ནི ཀ་ཏྭཱ ཨུ་ཙྩཱ་རེ་ཏ་བྦཾ ཨ་ཀྑ་རཾ སི་ཐི་ལཾ, ཏཱ་ནི་ཡེ་ཝ དྷ་ནི་ཏཱ་ནི ཨ་སི་ཐི་ལཱ་ནི ཀ་ཏྭཱ ཨུ་ཙྩཱ་རེ་ཏ་བྦཾ ཨ་ཀྑ་རཾ དྷ་ནི་ཏཾ. དྭི་མ་ཏྟ་ཀཱ་ལཾ དཱི་གྷཾ, ཨེ་ཀ་མ་ཏྟ་ཀཱ་ལཾ ར་སྶཾ. ད་ས་དྷཱ བྱ་ཉྫ་ན་བུ་དྡྷི་ཡཱ པ་བྷེ་དོཏི ཨེ་ཝཾ སི་ཐི་ལཱ་དི་ཝ་སེ་ན བྱ་ཉྫ་ན་བུ་དྡྷི་ཡཱ ཨ་ཀྑ་རུ་པྤཱ་ད་ཀ་ཙི་ཏྟ་སྶ ད་ས་པྤ་ཀཱ་རེ་ན པ་བྷེ་དོ. ས་བྦཱ་ནི ཧི ཨ་ཀྑ་རཱ་ནི ཙི་ཏྟ་ས་མུ་ཊྛཱ་ནཱ་ནི ཡ་ཐཱ་དྷི་པྤེ་ཏ་ཏྠ་བྱ་ཉྫ་ན་ཏོ བྱ་ཉྫ་ནཱ་ནི ཙ. སཾ་ཡོ་གོ པ་རོ ཨེ་ཏ་སྨཱ་ཏི སཾ་ཡོ་ག་པ་རོ, ན སཾ་ཡོ་ག་པ་རོ ཨ་སཾ་ཡོ་ག་པ་རོ. ཨཱ་ཡ་སྨ་ཏོ བུ་དྡྷ་ར་ཀྑི་ཏ་ཐེ་ར་སྶ ཡ་སྶ ན ཁ་མ་ཏཱིཏི ཨེ་ཏྠ ཏ-ཀཱ་ར ན-ཀཱ་ར་ས་ཧི་ཏཱ་ཀཱ་རོ ཨ་སཾ་ཡོ་ག་པ་རོ. ཀ་ར་ཎཱ་ནཱིཏི ཀ་ཎྛཱ་དཱི་ནི.

༤༨༨. ཨ་ནུ་ཀྑི་ཏྟཱ པཱ་རཱ་ཛི་ཀཾ ཨ་ནཱ་པ་ནྣཱ ཙ པ་ཀ་ཏ་ཏྟཱ་ཏི ཨཱ་ཧ ‘‘པ་ཀ་ཏ་ཏྟཱ ཨ་ནུ་ཀྑི་ཏྟཱ’’ཏི་ཨཱ་དི. ཏ་ཏྠ ཨ་ནི་སྶཱ་རི་ཏཱཏི པུ་རི་མ་པ་ད་སྶེ་ཝ ཝེ་ཝ་ཙ་ནཾ. པ་རི་སུ་དྡྷ་སཱི་ལཱཏི པཱ་རཱ་ཛི་ཀཾ ཨ་ནཱ་པ་ནྣཱ. ན ཏེ་སཾ ཚ་ནྡོ ཝཱ པཱ་རི་སུ་དྡྷི ཝཱ ཨེ་ཏཱིཏི ཏཱི་སུ དྭཱི་སུ ཝཱ ནི་སི་ནྣེ་སུ ཨེ་ཀ་སྶ ཝཱ དྭི་ནྣཾ ཝཱ ཚ་ནྡ་པཱ་རི་སུ་དྡྷི ཨཱ་ཧ་ཊཱ་པི ཨ་ནཱ་ཧ་ཊཱ་ཝ ཧོ་ཏཱི་ཏི ཨ་དྷི་པྤཱ་ཡོ.

ཨ་པ་ལོ་ཀ་ན་ཀ་མྨ་ཀ་ཐཱ་ཝ་ཎྞ་ནཱ

༤༩༥-༤༩༦. ཀཱ་ཡ་ས་མྦྷོ་ག་སཱ་མ་གྒཱིཏི ས་ཧ་སེ་ཡྻ་པ་ཊི་གྒ་ཧ་ཎཱ་དི. སོ ར་ཏོཏི སུ་བྷེ ར་ཏོ. སུ་ཊྛུ ཨོ་ར་ཏོ་ཏི ཝཱ སོ་ར་ཏོ. ནི་ཝཱ་ཏ་ཝུ་ཏྟཱིཏི ནཱི་ཙ་ཝུ་ཏྟི. པ་ཊི་ས་ངྑཱཏི པ་ཊི་ས་ངྑཱ་ཡ ཉཱ་ཎེ་ན ཨུ་པ་པ་རི་ཀྑི་ཏྭཱ. ཡཾ ཏཾ ཨ་ཝ་ནྡི་ཡ་ཀ་མྨཾ ཨ་ནུ་ཉྙཱ་ཏ་ནྟི ས་མྦ་ནྡྷོ. ཨི་མ་སྶ ཨ་པ་ལོ་ཀ་ན་ཀ་མྨ་སྶ ཋཱ་ནཾ ཧོ་ཏཱིཏི ཨེ་ཝ་མྤི ཨ་པ་ལོ་ཀ་ན་ཀ་མྨཾ པ་ཝ་ཏྟ་ཏཱི་ཏི ཨ་ཏྠོ. ཀ་མྨ་མེ་ཝ ལ་ཀྑ་ཎ་ནྟི ཀ་མྨ་ལ་ཀྑ་ཎཾ. ཨོ་སཱ་ར་ཎ་ནི་སྶཱ་ར་ཎ་བྷ་ཎྜུ་ཀ་མྨཱ་ད་ཡོ ཝི་ཡ ཀ་མྨ་ཉྩ ཧུ་ཏྭཱ ཨ་ཉྙ་ཉྩ ནཱ་མཾ ན ལ་བྷ་ཏི, ཀ་མྨ་མེ་ཝ ཧུ་ཏྭཱ ཨུ་པ་ལ་ཀྑཱི་ཡ་ཏཱི་ཏི ‘‘ཀ་མྨ་ལ་ཀྑ་ཎ’’ནྟི ཝུ་ཙྩ་ཏི. ཨེ་ཏ་མྤི ཀ་མྨ་ལ་ཀྑ་ཎ་མེ་ཝཱཏི ཝུ་ཏྟ་ཀ་མྨ་ལ་ཀྑ་ཎཾ ད་སྶེ་ཏུཾ ‘‘ཨ་ཙྪི་ནྣ་ཙཱི་ཝ་ར་ཛི་ཎྞ་ཙཱི་ཝ་ར་ན་ཊྛ་ཙཱི་ཝ་རཱ་ན’’ནྟི་ཨཱ་དི ཝུ་ཏྟཾ. ཨི་ཎ་པ་ལི་བོ་དྷ་མྤཱིཏི ཨི་ཎ་མེ་ཝ པ་ལི་བོ་དྷོ ཨི་ཎ་པ་ལི་བོ་དྷོ, ཏ་མྤི དཱ་ཏུཾ ཝ་ཊྚ་ཏི. ས་ཙེ ཏཱ་དི་སཾ བྷི་ཀྑུཾ ཨི་ཎཱ་ཡི་ཀཱ པ་ལི་བུ་ནྡྷ་ནྟི, ཏ་ཏྲུ་པྤཱ་ད་ཏོ་པི ཏ་སྶ ཨི་ཎཾ སོ་དྷེ་ཏུཾ ཝ་ཊྚ་ཏཱི་ཏི ཨ་དྷི་པྤཱ་ཡོ.

ཚ་ཏྟཾ ཝཱ ཝེ་དི་ཀཾ ཝཱཏི ཨེ་ཏྠ ཝེ་དི་ཀཱཏི ཙེ་ཏི་ཡ་སྶ ཨུ་པ་རི ཙ་ཏུ་ར་སྶ་ཙ་ཡོ ཝུ་ཙྩ་ཏི. ཚ་ཏྟནྟི ཏ་ཏོ ཨུ་དྡྷཾ ཝ་ལ་ཡཱ་ནི ད་སྶེ་ཏྭཱ ཀ་ཏོ ཨ་གྒ་ཙ་ཡོ ཝུ་ཙྩ་ཏི. ཙེ་ཏི་ཡ་སྶ ཨུ་པ་ནི་ཀྑེ་པ་ཏོཏི ཙེ་ཏི་ཡེ ན་ཝ་ཀ་མྨ་ཏྟཱ་ཡ ཨུ་པ་ནི་ཀྑི་ཏྟ་ཏོ, ཙེ་ཏི་ཡ་ས་ནྟ་ཀ་ཏོ་ཏི ཝུ་ཏྟཾ ཧོ་ཏི. ཨ་ཉྙཱ ཀ་ཏི་ཀཱ ཀཱ་ཏ་བྦཱཏི པུ་རི་མ་ཀ་ཏི་ཀཱ་ཡ ཨ་ས་ངྒ་ཧི་ཏ་ཏྟཱ ཝུ་ཏྟཾ. ཏེ་ཧཱིཏི ཡེ་སཾ པུ་གྒ་ལི་ཀ་ཊྛཱ་ནེ ཏི་ཊྛ་ནྟི, ཏེ་ཧི. ད་ས་བྷཱ་གནྟི ད་ས་མ་བྷཱ་གཾ. ཏ་ཏྠཱཏི ཏ་སྨིཾ ཝི་ཧཱ་རེ. མཱུ་ལེཏི པུ་བྦེ. ‘‘ཨི་ཏོ པ་ཊྛཱ་ཡ བྷཱ་ཛེ་ཏྭཱ ཁཱ་ད་ནྟཱུ’’ཏི ཝ་ཙ་ནེ་ནེ་ཝ ཡ་ཐཱ་སུ་ཁཾ པ་རི་བྷོ་གོ པ་ཊི་ཀྑི་ཏྟོ ཧོ་ཏཱི་ཏི ཨཱ་ཧ ‘‘པུ་རི་མ་ཀ་ཏི་ཀཱ པ་ཊི་པྤ་སྶ་མྦྷ་ཏཱི’’ཏི.

ཨ་ནུ་ཝི་ཙ་རི་ཏྭཱཏི པ་ཙྪ་ཏོ པ་ཙྪ་ཏོ ག་ནྟྭཱ. ཨ་པ་ཙྩཱ་སཱི་ས་ནྟེ་ནཱཏི ཏེ་སཾ ས་ནྟི་ཀཱ

པ་ཙྩ་ཡཾ ཨ་པ་ཙྩཱ་སཱི་ས་ནྟེ་ན. མཱུ་ལ་བྷཱ་གནྟི ཝུ་ཏྟ་མེ་ཝ་ཏྠཾ ཝི་བྷཱ་ཝེ་ཏི ‘‘ད་ས་བྷཱ་ག་མ་ཏྟ’’ནྟི. ཨ་ཀ་ཏཱ་ཝཱ་སཾ ཝཱ ཀ་ཏྭཱཏི ཏ་ཏོ ཨུ་པྤ་ནྣ་ཨཱ་ཡེ་ན ཀ་ཏྭཱ. ཛ་གྒི་ཏ་ཀཱ་ལེ ཙ ན ཝཱ་རེ་ཏ་བྦཱཏི ཛ་གྒི་ཏཱ་ནཾ པུ་པྥ་ཕ་ལ་བྷ་རི་ཏ་ཀཱ་ལེ ན ཝཱ་རེ་ཏ་བྦཱ. ཛ་གྒ་ན་ཀཱ་ལེཏི ཛ་གྒི་ཏུཾ ཨཱ་ར་དྡྷ་ཀཱ་ལེ. ཉ་ཏྟི་ཀ་མྨ་ཊྛཱ་ན་བྷེ་དེཏི ཉ་ཏྟི་ཀ་མྨ་སྶ ཋཱ་ན་བྷེ་དེ.

ཀ་མྨ་ཝ་གྒ་ཝ་ཎྞ་ནཱ ནི་ཊྛི་ཏཱ.

ཨ་པ་ཉྙ་ཏྟེ པ་ཉྙ་ཏྟ་ཝ་གྒ་ཝ་ཎྞ་ནཱ

༥༠༠. ས་ཏྟ ཨཱ་པ་ཏྟི་ཀྑ་ནྡྷཱ པ་ཉྙ་ཏྟཾ ནཱ་མཱ་ཏི ས་མྦ་ནྡྷོ. ཀ་ཀུ་ས་ནྡྷ་ཀོ་ཎཱ་ག་མ་ན་ཀ་སྶ་པཱ ཨེ་ཝ ས་ཏྟ ཨཱ་པ་ཏྟི་ཀྑ་ནྡྷེ པ་ཉྙ་པེ་སུཾ, ཝི་པ་སྶཱི་ཨཱ་ད་ཡོ པ་ན ཨོ་ཝཱ་ད་པཱ་ཏི་མོ་ཀྑཾ ཨུ་དྡི་སིཾ་སུ, ན སི་ཀྑཱ་པ་དཾ པ་ཉྙ་པེ་སུ་ནྟི ཨཱ་ཧ ‘‘ཀ་ཀུ་ས་ནྡྷ་ཉྩ…པེ… ཨ་ནྟ་རཱ ཀེ་ན་ཙི ཨ་པ་ཉྙ་ཏྟེ སི་ཀྑཱ་པ་དེ’’ཏི. སེ་ས་མེ་ཏྠ སུ་ཝི་ཉྙེ་ཡྻ་མེ་ཝ.

ཨི་ཏི ས་མ་ནྟ་པཱ་སཱ་དི་ཀཱ་ཡ ཝི་ན་ཡ་ཊྛ་ཀ་ཐཱ་ཡ སཱ་ར་ཏྠ་དཱི་པ་ནི་ཡཾ

པ་རི་ཝཱ་ར་ཊྛ་ཀ་ཐཱ་ཝ་ཎྞ་ནཱ ས་མ་ཏྟཱ.

ནི་ག་མ་ན་ཀ་ཐཱ་ཝ་ཎྞ་ནཱ

ཨ་ཝ་སཱ་ན་གཱ་ཐཱ་སུ པ་ན ཨ་ཡ་མ་ཏྠོ. ཝི་བྷ་ཏྟ་དེ་ས་ནནྟི ཨུ་བྷ་ཏོ་ཝི་བྷ་ངྒ་ཁ་ནྡྷ་ཀ་པ་རི་ཝཱ་རེ་ཧི ཝི་བྷ་ཏྟ་དེ་ས་ནཾ ཝི་ན་ཡ་པི་ཊ་ཀ་ནྟི ཡོ་ཛེ་ཏ་བྦཾ. ཏ་སྶཱཏི ཏ་སྶ ཝི་ན་ཡ་སྶ.

ཏ་ཏྲི་དནྟི་ཨཱ་དི པ་ཋ་མ་པཱ་རཱ་ཛི་ཀ་ཝ་ཎྞ་ནཱ་ཡཾ ཝུ་ཏྟ་ན་ཡ་མེ་ཝ.

ས་ཏྠུ་མ་ཧཱ་བོ་དྷི་ཝི་བྷཱུ་སི་ཏོཏི ས་ཏྠུ་ནཱ པ་རི་བྷུ་ཏྟ་མ་ཧཱ་བོ་དྷི་ཝི་བྷཱུ་སི་ཏོ མ་ཎྜི་ཏོ, ཏ་སྶ མ་ཧཱ་ཝི་ཧཱ་ར་སྶ ད་ཀྑི་ཎ་བྷཱ་གེ ཨུ་ཏྟ་མཾ ཡཾ པ་དྷཱ་ན་གྷ་ར་ནྟི ས་མྦ་ནྡྷོ. ཏ་ཏྠ པ་དྷཱ་ན་གྷ་རནྟི ཏཾ་ནཱ་མ་ཀཾ པ་རི་ཝེ་ཎཾ. སུ་ཙི་ཙཱ་རི་ཏྟ་སཱི་ལེ་ན, བྷི་ཀྑུ་ས་ངྒྷེ་ན སེ་ཝི་ཏནྟི ཨི་ད་མྤི པ་དྷཱ་ན་གྷ་ར་ཝི་སེ་ས་ནཾ.

ཏ་ཏྠཱཏི ཏ་སྨིཾ པ་དྷཱ་ན་གྷ་རེ. ཙཱ་རུ་པཱ་ཀཱ་ར་ས་ཉྩི་ཏནྟི མ་ནཱ་པེ་ན པཱ་ཀཱ་རེ་ན པ་རི་ཀྑི་ཏྟཾ. སཱི་ཏ་ཙྪཱ་ཡ་ཏ་རཱུ་པེ་ཏནྟི གྷ་ན་ནི་ཙི་ཏ་པ་ཏྟ་ས་ཉྪ་ནྣ་སཱ་ཁཱ་པ་སཱ་ཁ་ཏཱ་ཡ སཱི་ཏ་ཙྪཱ་ཡེ་ཧི རུ་ཀྑེ་ཧི ཨུ་པེ་ཏཾ. ཝི་ཀ་སི་ཏ་ཀ་མ་ལ་ཀུ་ཝ་ལ་ཡ་པུ་ཎྜ་རཱི་ཀ་སོ་ག་ནྡྷི་ཀཱ་དི་པུ་པྥ་ས་ཉྪ་ནྣ་མ་དྷུ་ར་སཱི་ཏ་ལུ་ད་ཀ་པུ་ཎྞ་ཏཱ་ཡ ས་མྤ་ནྣཱ ས་ལི་ལཱ་ས་ཡཱ ཨ་སྶཱ་ཏི ས་མྤ་ནྣ་ས་ལི་ལཱ་ས་ཡོ. ཨུ་དྡི་སི་ཏྭཱཏི བུ་དྡྷ་སི་རིཾ ནཱ་མ ཐེ་རཾ ནི་སྶཱ་ཡ, ཏ་སྶ ཨ་ཛ྄ཛྷེ་ས་ནཾ ནི་སྶཱ་ཡཱ་ཏི ཝུ་ཏྟཾ ཧོ་ཏི. ཨི་དྡྷཱཏི ཨ་ཏྠ་ཝི་ནི་ཙྪ་ཡཱ་དཱི་ཧི ཨི་དྡྷཱ ཕཱི་ཏཱ པ་རི་པུ་ཎྞཱ.

སི་རི་ནི་ཝཱ་ས་སྶཱཏི སི་རི་ཡཱ ནི་ཝཱ་ས་ཊྛཱ་ན་བྷཱུ་ཏ་སྶ. ཛ་ཡ་སཾ་ཝ་ཙྪ་རེཏི ཛ་ཡ་པྤ་ཏྟ་སཾ་ཝ་ཙྪ་རེ. ཨ་ཡནྟི ཐེ་རཾ བུ་དྡྷ་སི་རིཾ ཨུ་དྡི་སྶ ཡཱ ཝི་ན་ཡ་ཝ་ཎྞ་ནཱ ཨཱ་ར་དྡྷཱ, ཨ་ཡཾ. དྷ་མྨཱུ་པ་སཾ་ཧི་ཏཱཏི ཀུ་ས་ལ་ས་ནྣི་སྶི་ཏཱ. ཨི་དཱ་ནི ས་དེ་ཝ་ཀ་སྶ ལོ་ཀ་སྶ ཨ་ཙྩ་ནྟ་སུ་ཁཱ་དྷི་ག་མཱ་ཡ ཨ་ཏྟ་ནོ པུ་ཉྙཾ པ་རི་ཎཱ་མེ་ནྟོ ‘‘ཙི་ར་ཊྛི་ཏ་ཏྠ དྷ་མྨ་སྶཱ’’ཏི་ཨཱ་དི་མཱ་ཧ. ཏ་ཏྠ ས་མཱ་ཙི་ཏནྟི ཨུ་པ་ཙི་ཏཾ. ས་བྦ་སྶ ཨཱ་ནུ་བྷཱ་ཝེ་ནཱཏི ས་བྦ་སྶ ཏ་སྶ པུ་ཉྙ་སྶ ཏེ་ཛེ་ན. ས་བྦེ་པི པཱ་ཎི་ནོཏི ཀཱ་མཱ་ཝ་ཙ་རཱ་དི་བྷེ་དཱ ས་བྦེ ས་ཏྟཱ. ས་དྡྷ་མྨ་ར་ས་སེ་ཝི་ནོཏི ཡ་ཐཱ་ར་ཧཾ བོ་དྷི་ཏྟ་ཡཱ་དྷི་ག་མ་ཝ་སེ་ན ས་དྡྷ་མྨ་ར་ས་སེ་ཝི་ནོ བྷ་ཝ་ནྟུ. སེ་ས་མེ་ཏྠ སུ་ཝི་ཉྙེ་ཡྻ་མེ་ཝ.

ནི་ག་མ་ན་ཀ་ཐཱ་ཝ་ཎྞ་ནཱ ནི་ཊྛི་ཏཱ.

ནི་ག་མ་ན་ཀ་ཐཱ

ཨེ་ཏྟཱ་ཝ་ཏཱ ཙ –

ཝི་ན་ཡེ པཱ་ཊ་ཝ་ཏྠཱ་ཡ, སཱ་ས་ན་སྶ ཙ ཝུ་ཌྜྷི་ཡཱ;

ཝ་ཎྞ་ནཱ ཡཱ ས་མཱ་ར་དྡྷཱ, ཝི་ན་ཡ་ཊྛ་ཀ་ཐཱ་ཡ སཱ.

སཱ་ར་ཏྠ་དཱི་པ་ནཱི ནཱ་མ, ས་བྦ་སོ པ་རི་ནི་ཊྛི་ཏཱ;

ཏིཾ་ས་ས་ཧ་སྶ་མ་ཏྟེ་ཧི, ག་ནྠེ་ཧི པ་རི་མཱ་ཎ་ཏོ.

ཨ་ཛ྄ཛྷེ་སི་ཏོ ན་རི་ནྡེ་ན, སོ་ཧཾ པ་ར་ཀྐ་མ་བཱ་ཧུ་ནཱ;

ས་དྡྷ་མྨ་ཊྛི་ཏི་ཀཱ་མེ་ན, སཱ་ས་ནུ་ཛྫོ་ཏ་ཀཱ་རི་ནཱ.

ཏེ་ནེ་ཝ ཀཱ་རི་ཏེ ར་མྨེ, པཱ་སཱ་ད་ས་ཏ་མ་ཎྜི་ཏེ;

ནཱ་ནཱ་དུ་མ་ག་ཎཱ་ཀི་ཎྞེ, བྷཱ་ཝ་ནཱ་བྷི་ར་ཏཱ་ལ་ཡེ.

སཱི་ཏ་ལཱུ་ད་ཀ་ས་མྤ་ནྣེ, ཝ་སཾ ཛེ་ཏ་ཝ་ནེ ཨི་མཾ;

ཨ་ཏྠ་བྱ་ཉྫ་ན་ས་མྤ་ནྣཾ, ཨ་ཀཱ་སིཾ སུ་ཝི་ནི་ཙྪ་ཡཾ.

ཡཾ སི་དྡྷཾ ཨི་མི་ནཱ པུ་ཉྙཾ, ཡཾ ཙ་ཉྙཾ པ་སུ་ཏཾ མ་ཡཱ;

ཨེ་ཏེ་ན པུ་ཉྙ་ཀ་མྨེ་ན, དུ་ཏི་ཡེ ཨ་ཏྟ་ས་མྦྷ་ཝེ.

ཏཱ་ཝ་ཏིཾ་སེ པ་མོ་དེ་ནྟོ, སཱི་ལཱ་ཙཱ་ར་གུ་ཎེ ར་ཏོ;

ཨ་ལ་གྒོ པ་ཉྩ་ཀཱ་མེ་སུ, པ་ཏྭཱ་ན པ་ཋ་མཾ ཕ་ལཾ.

ཨ་ནྟི་མེ ཨ་ཏྟ་བྷཱ་ཝ་མྷི, མེ་ཏྟེ་ཡྻཾ མུ་ནི་པུ་ངྒ་ཝཾ;

ལོ་ཀ་གྒ་པུ་གྒ་ལཾ ནཱ་ཐཾ, ས་བྦ་ས་ཏྟ་ཧི་ཏེ ར་ཏཾ.

དི་སྭཱ་ན ཏ་སྶ དྷཱི་ར་སྶ, སུ་ཏྭཱ ས་དྡྷ་མྨ་དེ་ས་ནཾ;

ཨ་དྷི་ག་ནྟྭཱ ཕ་ལཾ ཨ་གྒཾ, སོ་བྷེ་ཡྻཾ ཛི་ན་སཱ་ས་ནཾ.

ས་དཱ ར་ཀྑ་ནྟུ རཱ་ཛཱ་ནོ, དྷ་མྨེ་ནེ་ཝ ཨི་མཾ པ་ཛཾ;

ནི་ར་ཏཱ པུ་ཉྙ་ཀ་མྨེ་སུ, ཛོ་ཏེ་ནྟུ ཛི་ན་སཱ་ས་ནཾ.

ཨི་མེ ཙ པཱ་ཎི་ནོ ས་བྦེ, ས་བྦ་དཱ ནི་རུ་པ་དྡ་ཝཱ;

ནི་ཙྩཾ ཀ་ལྱཱ་ཎ་ས་ངྐ་པྤཱ, པ་པྤོ་ནྟུ ཨ་མ་ཏཾ པ་ད་ནྟི.

སཱ་ར་ཏྠ་དཱི་པ་ནཱི ནཱ་མ ཝི་ན་ཡ་ཊཱི་ཀཱ ནི་ཊྛི་ཏཱ.