༡. ཀ་མྨ་ཀྑ་ནྡྷ་ཀཾ
ཏ་ཛྫ་ནཱི་ཡ་ཀ་མྨ་ཀ་ཐཱ་ཝ་ཎྞ་ནཱ
༡. ཙཱུ་ལ༹་ཝ་གྒ་སྶ པ་ཋ་མེ ཀ་མྨ་ཀྑ་ནྡྷ་ཀེ ཏཱ་ཝ ‘‘ཡ་ཊྛིཾ པ་ཝེ་ས་ཡ, ཀུ་ནྟེ པ་ཝེ་ས་ཡཱ’’ཏི་ཨཱ་དཱི་སུ ཝི་ཡ ས་ཧ་ཙ་ར་ཎ་ཉཱ་ཡེ་ན ‘‘མ་ཉྩཱ ཨུ་ཀྐུ་ཊྛིཾ ཀ་རོ་ནྟཱི’’ཏི་ཨཱ་དཱི་སུ ཝི་ཡ ནི་སྶི་ཏེ་སུ ནི་སྶ་ཡ་ཝོ་ཧཱ་ར་ཝ་སེ་ན ཝཱ པ་ཎྜུ་ཀ་ལོ་ཧི་ཏ་ཀ་ནི་སྶི་ཏཱ པ་ཎྜུ་ཀ་ལོ་ཧི་ཏ་ཀ་ས་དྡེ་ན ཝུ་ཏྟཱ་ཏི ཨཱ་ཧ ‘‘ཏེ་སཾ ནི་སྶི་ཏ་ཀཱ་པི པ་ཎྜུ་ཀ་ལོ་ཧི་ཏ་ཀཱ་ཏྭེ་ཝ པ་ཉྙཱ་ཡ་ནྟཱི’’ཏི. པ་ཊི་ཝ་ད་ཐཱཏི པ་ཊི་ཝ་ཙ་ནཾ དེ་ཐ.
ཨ་དྷ་མྨ་ཀ་མྨ་དྭཱ་ད་ས་ཀ་ཀ་ཐཱ་ཝ་ཎྞ་ནཱ
༤. ཏཱི་ཧི ཨ་ངྒེ་ཧི ས་མ་ནྣཱ་ག་ཏནྟི པ་ཙྩེ་ཀཾ ས་མུ་དི་ཏེ་ཧི ཝཱ ཏཱི་ཧི ཨ་ངྒེ་ཧི ས་མ་ནྣཱ་ག་ཏཾ. ན ཧི ཏི་ཎྞཾ ཨེ་ཝ ཨ་ངྒཱ་ནཾ ས་མོ་དྷཱ་ནེ་ན ཨ་དྷ་མྨ་ཀ་མྨཾ ཧོ་ཏི, ཨེ་ཀེ་ན་པི ཧོ་ཏི་ཡེ་ཝ. ‘‘ཨ་པྤ་ཊི་ཉྙཱ་ཡ ཀ་ཏཾ ཧོ་ཏཱི་ཏི ལ་ཛྫིཾ ས་ནྡྷཱ་ཡ ཝུ་ཏྟ’’ནྟི ག་ཎྛི་པ་དེ་སུ ཀ་ཐི་ཏཾ.
ན་ནུ ཙ ‘‘ཨ་དེ་ས་ནཱ་གཱ་མི་ནི་ཡཱ ཨཱ་པ་ཏྟི་ཡཱ ཀ་ཏཾ ཧོ་ཏཱི’’ཏི ཨི་དཾ པ་ར་ཏོ ‘‘ཏཱི་ཧི, བྷི་ཀྑ་ཝེ, ཨ་ངྒེ་ཧི ས་མ་ནྣཱ་ག་ཏ་སྶ བྷི་ཀྑུ་ནོ ཨཱ་ཀ་ངྑ་མཱ་ནོ ས་ངྒྷོ ཏ་ཛྫ་ནཱི་ཡ་ཀ་མྨཾ ཀ་རེ་ཡྻ, ཨ་དྷི་སཱི་ལེ སཱི་ལ་ཝི་པ་ནྣོ ཧོ་ཏཱི’’ཏི ཨི་མི་ནཱ ཝི་རུ་ཛ྄ཛྷ་ཏི. ཨ་དེ་ས་ནཱ་གཱ་མི་ནིཾ ཨཱ་པ་ནྣོ ཧི ‘‘ཨ་དྷི་སཱི་ལེ སཱི་ལ་ཝི་པ་ནྣོ’’ཏི ཝུ་ཙྩ་ཏཱི་ཏི? ཏ་ཏྠ ཀེ་ཙི ཝ་ད་ནྟི ‘‘ཏ་ཛྫ་ནཱི་ཡ་ཀ་མྨ་སྶ ཧི ཝི་སེ་སེ་ན བྷ་ཎྜ་ན་ཀཱ་ར་ཀ་ཏྟཾ ཨ་ངྒ’ནྟི ཨ་ཊྛ་ཀ་ཐཱ་ཡཾ ཝུ་ཏྟཾ, ཏཾ པཱ་ལི༹་ཡཱ ཨཱ་ག་ཏ་ནི་དཱ་ནེ་ན ས་མེ་ཏི, ཏ་སྨཱ ས་བྦ་ཏི་ཀེ་སུ་པི བྷ་ཎྜ་ནཾ ཨཱ་རོ་པེ་ཏྭཱ བྷ་ཎྜ་ན་པ་ཙྩ་ཡཱ ཨཱ་པ་ནྣཱ་པ་ཏྟི་ཝ་སེ་ན ཨི་དཾ ཀ་མྨཾ ཀཱ་ཏ་བྦཾ. ཏ་སྨཱ ‘ཨ་དྷི་སཱི་ལེ སཱི་ལ་ཝི་པ་ནྣོ’ཏི ཨེ་ཏྠཱ་པི པུ་བྦ་བྷཱ་གེ ཝཱ པ་ར་བྷཱ་གེ ཝཱ ཙོ་ད་ནཱ་སཱ་ར་ཎཱ་དི་ཀཱ་ལེ བྷ་ཎྜ་ན་པ་ཙྩ་ཡཱ ཨཱ་པ་ནྣཱ་པ་ཏྟི་ཝ་སེ་ནེ་ཝ ཀཱ་ཏ་བྦཾ, ན ཀེ་ཝ་ལཾ ས་ངྒྷཱ་དི་སེ་ས་པ་ཙྩ་ཡཱ ཀཱ་ཏ་བྦ’’ནྟི. ཨ་པ་རེ པ་ན ཝ་ད་ནྟི ‘‘ཨ་དེ་ས་ནཱ་གཱ་མི་ནི་ཡཱ་ཏི ཨི་དཾ པཱ་རཱ་ཛི་ཀཱ་པ་ཏྟིཾ་ཡེ་ཝ ས་ནྡྷཱ་ཡ ཝུ་ཏྟཾ, ན ས་ངྒྷཱ་དི་སེ་སཾ. ཨ་ཊྛ་ཀ་ཐཱ་ཡཾ པ་ན ‘ཨ་དེ་ས་ནཱ་གཱ་མི་ནི་ཡཱ་ཏི པཱ་རཱ་ཛི་ཀཱ་པ་ཏྟི་ཡཱ ཝཱ ས་ངྒྷཱ་དི་སེ་སཱ་པ་ཏྟི་ཡཱ ཝཱ’ཏི ཝུ་ཏྟཾ. ཏ་ཏྠ ས་ངྒྷཱ་དི་སེ་སཱ་པ་ཏྟི་ཡཱ ཝཱ་ཏི ཨ་ཏྠུ་དྡྷཱ་ར་ཝ་སེ་ན ཝུ་ཏྟཾ, ‘ཨ་དྷི་སཱི་ལེ སཱི་ལ་ཝི་པ་ནྣོ’ཏི ཙ ཨི་དཾ ས་ངྒྷཱ་དི་སེ་སཾ་ཡེ་ཝ ས་ནྡྷཱ་ཡ ཝུ་ཏྟཾ, ན པཱ་རཱ་ཛི་ཀཾ. ཏ་སྨཱ པཱ་རཱ་ཛི་ཀཱ་པ་ཏྟི་པ་ཙྩ་ཡཱ ན ཏ་ཛྫ་ནཱི་ཡ་ཀ་མྨཾ ཀཱ་ཏ་བྦཾ པ་ཡོ་ཛ་ནཱ་བྷཱ་ཝཱ, ས་ངྒྷཱ་དི་སེ་ས་པ་ཙྩ་ཡཱ ཀཱ་ཏ་བྦ་ནྟི ཨ་ཡ་མ་ཏྠོ སི་དྡྷོ ཧོ་ཏི. སུ་ཀྐ་པ་ཀྑེ ‘དེ་ས་ནཱ་གཱ་མི་ནི་ཡཱ ཨཱ་པ་ཏྟི་ཡཱ ཀ་ཏཾ ཧོ་ཏཱི’ཏི ཨི་མི་ནཱ ཝི་རུ་ཛ྄ཛྷ་ཏཱི་ཏི ཙེ? ན ཨེ་ཀེ་ན པ་རི་ཡཱ་ཡེ་ན ས་ངྒྷཱ་དི་སེ་ས་སྶ་པི དེ་ས་ནཱ་གཱ་མི་ནཱི་ཝོ་ཧཱ་ར་ས་མྦྷ་ཝ་ཏོ’’ཏི, ཏཾ ཡུ་ཏྟཾ ཝི་ཡ དི་སྶ་ཏི.
ན་པྤ་ཊི་པྤ་སྶ་མྦྷེ་ཏ་བྦ་ཨ་ཊྛཱ་ར་ས་ཀ་ཀ་ཐཱ་ཝ་ཎྞ་ནཱ
༨. ལོ་མཾ པཱ་ཏེ་ནྟཱིཏི་ཨཱ་དི ས་མྨཱ་ཝ་ཏྟ་ནཱ་ཡ པ་རི་ཡཱ་ཡ་ཝ་ཙ་ནཾ.
ནི་ཡ་སྶ་ཀ་མྨ་ཀ་ཐཱ་ཝ་ཎྞ་ནཱ
༡༡. ནི་ཡ་སྶ་ཀ་མྨེ ‘‘ནི་སྶཱ་ཡ ཏེ ཝ་ཏྠ་བྦནྟི ག་རུ་ནི་སྶ་ཡཾ ས་ནྡྷཱ་ཡ ཝུ་ཏྟཾ, ན ཨི་ཏ་ར’’ནྟི ཀེ་ན་ཙི ལི་ཁི་ཏཾ. ག་ཎྛི་པ་དེ པ་ན ‘‘ནི་ཡ་སྶ་ཀ་མྨཾ ཡ་སྨཱ བཱ་ལ་ཝ་སེ་ན ཀ་རཱི་ཡ་ཏི, ཏ་སྨཱ ནི་སྶཱ་ཡ ཝ་ཏྠ་བྦ་ནྟི ནི་སྶ་ཡཾ གཱ་ཧཱ་པེ་ཏ་བྦོ’’ཏི ཝུ་ཏྟཾ, ཝཱི་མཾ་སི་ཏྭཱ ཡུ་ཏྟ་ཏ་རཾ ག་ཧེ་ཏ་བྦཾ. ཨ་པི་སྶཱུཏི ཨེ་ཏྠ སུཨི་ཏི ནི་པཱ་ཏ་མ་ཏྟཾ, བྷི་ཀྑཱུ ཨ་པི ནི་ཙྩ་བྱཱ་ཝ་ཊཱ ཧོ་ནྟཱི་ཏི ཝུ་ཏྟཾ ཧོ་ཏི.
པ་བྦཱ་ཛ་ནཱི་ཡ་ཀ་མྨ་ཀ་ཐཱ་ཝ་ཎྞ་ནཱ
༢༩. པ་བྦཱ་ཛ་ནཱི་ཡ་ཀ་མྨེ ཏེ་ན ཧི, བྷི་ཀྑ་ཝེ, ས་ངྒྷོ པ་བྦཱ་ཛ་ནཱི་ཡ་ཀ་མྨཾ པ་ཊི་པྤ་སྶ་མྦྷེ་ཏཱུཏི ཨི་དཾ ཏེ་སུ ཝི་བྦྷ་མ་ནྟེ་སུ་པི པ་ཀྐ་མ་ནྟེ་སུ་པི ས་མྨཱ་ཝ་ཏྟ་ནྟེ་ཡེ་ཝ ས་ནྡྷཱ་ཡ ཝུ་ཏྟཾ.
པ་ཊི་སཱ་ར་ཎཱི་ཡ་ཀ་མྨ་ཀ་ཐཱ་ཝ་ཎྞ་ནཱ
༣༣. སུ་དྷ་མྨ་ཝ་ཏྠུ་སྨིཾ མ་ཙྪི་ཀཱ་ས་ཎྜེཏི ཨེ་ཝཾ་ནཱ་མ་ཀེ ན་ག་རེ. ཏ་ཏྠ ཀི་ར (དྷ. པ. ཨ་ཊྛ. ༡.༧༢ ཙི་ཏྟ་ག་ཧ་པ་ཏི་ཝ་ཏྠུ) ཙི་ཏྟོ ག་ཧ་པ་ཏི པ་ཉྩ་ཝ་གྒི་ཡཱ་ནཾ ཨ་བྦྷ་ནྟ་རཾ མ་ཧཱ་ནཱ་མ་ཏྠེ་རཾ པི་ཎྜཱ་ཡ ཙ་ར་མཱ་ནཾ དི་སྭཱ ཏ་སྶ ཨི་རི་ཡཱ་པ་ཐེ པ་སཱི་དི་ཏྭཱ པ་ཏྟཾ ཨཱ་དཱ་ཡ གེ་ཧཾ པ་ཝེ་སེ་ཏྭཱ བྷོ་ཛེ་ཏྭཱ བྷ་ཏྟ་ཀི་ཙྩཱ་ཝ་སཱ་ནེ དྷ་མྨ་ཀ་ཐཾ སུ་ཎ་ནྟོ སོ་ཏཱ་པ་ཏྟི་ཕ་ལཾ པ་ཏྭཱ ཨ་ཙ་ལ་ས་དྡྷོ ཧུ་ཏྭཱ ཨ་མྦཱ་ཊ་ཀ་ཝ་ནཾ ནཱ་མ ཨ་ཏྟ་ནོ ཨུ་ཡྻཱ་ནཾ ས་ངྒྷཱ་རཱ་མཾ ཀཱ་ཏུ་ཀཱ་མོ ཐེ་ར་སྶ ཧ་ཏྠེ ཨུ་ད་ཀཾ པཱ་ཏེ་ཏྭཱ ནི་ཡྻཱ་ཏེ་སི. ཏ་སྨིཾ ཁ་ཎེ ‘‘པ་ཏི་ཊྛི་ཏཾ བུ་དྡྷ་སཱ་ས་ན’’ནྟི ཨུ་ད་ཀ་པ་རི་ཡ་ནྟཾ ཀ་ཏྭཱ མ་ཧཱ་པ་ཐ་ཝཱི ཀ་མྤི, མ་ཧཱ་སེ་ཊྛི ཨུ་ཡྻཱ་ནེ མ་ཧཱ་ཝི་ཧཱ་རཾ ཀཱ་རེ་སི. ཏ་ཏྠཱ་ཡཾ སུ་དྷ་མྨོ བྷི་ཀྑུ ཨཱ་ཝཱ་སི་ཀོ ཨ་ཧོ་སི. ཏཾ ས་ནྡྷཱ་ཡ ཝུ་ཏྟཾ ‘‘ཨཱ་ཡ་སྨཱ སུ་དྷ་མྨོ མ་ཙྪི་ཀཱ་ས་ཎྜེ ཙི་ཏྟ་སྶ ག་ཧ་པ་ཏི་ནོ ཨཱ་ཝཱ་སི་ཀོ ཧོ་ཏཱི’’ཏི་ཨཱ་དི. ཏ་ཏྠ དྷུ་ཝ་བྷ་ཏྟི་ཀོཏི ནི་ཙྩ་བྷ་ཏྟི་ཀོ.
ཨ་པ་རེ་ན ས་མ་ཡེ་ན ཙི་ཏྟ་སྶ གུ་ཎ་ཀ་ཐཾ སུ་ཏྭཱ བྷི་ཀྑུ་ས་ཧ་སྶེ་ན ས་དྡྷིཾ དྭེ ཨ་གྒ་སཱ་ཝ་ཀཱ ཏ་སྶ ས་ངྒ་ཧཾ ཀ་ཏྟུ་ཀཱ་མཱ མ་ཙྪི་ཀཱ་ས་ཎྜཾ ཨ་ག་མཾ་སུ. ཏཾ ས་ནྡྷཱ་ཡ ཝུ་ཏྟཾ ‘‘ཏེ་ན ཁོ པ་ན ས་མ་ཡེ་ན ས་མྦ་ཧུ་ལཱ ཐེ་རཱ’’ཏི་ཨཱ་དི. ཙི་ཏྟོ ག་ཧ་པ་ཏི ཏེ་སཾ ཨཱ་ག་མ་ནཾ སུ་ཏྭཱ ཨ་དྡྷ་ཡོ་ཛ་ན་མ་ཏྟཾ པ་ཙྩུ་གྒ་ནྟྭཱ ཏེ ཨཱ་དཱ་ཡ ཨ་ཏྟ་ནོ ཝི་ཧཱ་རཾ པ་ཝེ་སེ་ཏྭཱ ཨཱ་ག་ནྟུ་ཀ་ཝ་ཏྟཾ ཀ་ཏྭཱ ‘‘བྷ་ནྟེ, ཐོ་ཀཾ དྷ་མྨ་ཀ་ཐཾ སོ་ཏུ་ཀཱ་མོ་མྷཱི’’ཏི དྷ་མྨ་སེ་ནཱ་པ་ཏིཾ ཡཱ་ཙི. ཨ་ཐ ནཾ ཐེ་རོ ‘‘ཨུ་པཱ་ས་ཀ, ཨ་དྡྷཱ་ནེ་ནཱ་མྷཱ ཀི་ལ་ནྟ་རཱུ་པཱ, ཨ་པི་ཙ ཐོ་ཀཾ སུ་ཎཱ་ཧཱི’’ཏི ཏ་སྶ དྷ་མྨ་ཀ་ཐཾ ཀ་ཐེ་སི. ཏེ་ན ཝུ་ཏྟཾ ‘‘ཨེ་ཀ་མ་ནྟཾ ནི་སི་ནྣཾ ཁོ ཙི་ཏྟཾ ག་ཧ་པ་ཏིཾ ཨཱ་ཡ་སྨཱ སཱ་རི་པུ་ཏྟོ དྷ་མྨི་ཡཱ ཀ་ཐཱ་ཡ ས་ནྡ་སྶེ་སཱི’’ཏི་ཨཱ་དི. སོ ཐེ་ར་སྶ དྷ་མྨ་ཀ་ཐཾ སུ་ཎ་ནྟོ་ཝ ཨ་ནཱ་གཱ་མི་ཕ་ལཾ པཱ་པུ་ཎི.
༤༡. ནཱ་ས་ཀྑི ཙི་ཏྟཾ ག་ཧ་པ་ཏིཾ ཁ་མཱ་པེ་ཏུནྟི སོ ཏ་ཏྠ ག་ནྟྭཱ ‘‘ག་ཧ་པ་ཏི, མ་ཡ྄ཧ་མེ་ཝ སོ དོ་སོ, ཁ་མཱ་ཧི མེ’’ཏི ཝ་ཏྭཱ་པི ‘‘ནཱ་ཧཾ ཁ་མཱ་མཱི’’ཏི ཏེ་ན པ་ཊི་ཀྑི་ཏྟོ མ་ངྐུ་བྷཱུ་ཏོ ཏཾ ཁ་མཱ་པེ་ཏུཾ ནཱ་ས་ཀྑི. པུ་ན་དེ་ཝ ས་ཏྠུ ས་ནྟི་ཀཾ པ་ཙྩཱ་ག་མཱ་སི. ས་ཏྠཱ ‘‘ནཱ་སྶ ཨུ་པཱ་ས་ཀོ ཁ་མི་སྶ་ཏཱི’’ཏི ཛཱ་ན་ནྟོ་པི ‘‘མཱ་ན་ཐ་དྡྷོ ཨེ་ས ཏིཾ་ས་ཡོ་ཛ་ནཾ ག་ནྟྭཱ་ཝ པ་ཙྩཱ་ག་ཙྪ་ཏཱུ’’ཏི ཁ་མ་ནུ་པཱ་ཡཾ ཨ་ནཱ་ཙི་ཀྑི་ཏྭཱ་ཝ ཨུ་ཡྻོ་ཛེ་སི. ཨ་ཐ་སྶ པུ་ན ཨཱ་ག་ཏ་ཀཱ་ལེ ནི་ཧ་ཏ་མཱ་ན་སྶ ཨ་ནུ་དཱུ་ཏཾ ད་ཏྭཱ ‘‘ག་ཙྪ, ཨི་མི་ནཱ ས་དྡྷིཾ ག་ནྟྭཱ ཨུ་པཱ་ས་ཀཾ ཁ་མཱ་པེ་ཧཱི’’ཏི ཝ་ཏྭཱ ‘‘ས་མ་ཎེ་ན ནཱ་མ ‘མ་ཡ྄ཧཾ ཝི་ཧཱ་རོ, མ་ཡ྄ཧཾ ནི་ཝཱ་ས་ཊྛཱ་ནཾ, མ་ཡ྄ཧཾ ཨུ་པཱ་ས་ཀོ, མ་ཡ྄ཧཾ ཨུ་པཱ་སི་ཀཱ’ཏི མཱ་ནཾ ཝཱ ཨི་སྶཾ ཝཱ ཀཱ་ཏུཾ ན ཝ་ཊྚ་ཏི. ཨེ་ཝཾ ཀ་རོ་ནྟ་སྶ ཧི ཨི་ཙྪཱ་མཱ་ནཱ་ད་ཡོ ཀི་ལེ་སཱ ཝ་ཌྜྷ་ནྟཱི’’ཏི ཨོ་ཝ་ད་ནྟོ –
‘‘ཨ་ས་ནྟཾ བྷཱ་ཝ་ན་མི་ཙྪེ་ཡྻ, པུ་རེ་ཀྑཱ་ར་ཉྩ བྷི་ཀྑུ་སུ;
ཨཱ་ཝཱ་སེ་སུ ཙ ཨི་སྶ་རི་ཡཾ, པཱུ་ཛཱ པ་ར་ཀུ་ལེ་སུ ཙ.
‘‘མ་མེ་ཝ ཀ་ཏ མ་ཉྙ་ནྟུ, གི་ཧཱི པ་བྦ་ཛི་ཏཱ ཨུ་བྷོ;
མ་མེ་ཝཱ་ཏི་ཝ་སཱ ཨ་སྶུ, ཀི་ཙྩཱ་ཀི་ཙྩེ་སུ ཀི་སྨི་ཙི;
ཨི་ཏི བཱ་ལ་སྶ ས་ངྐ་པྤོ, ཨི་ཙྪཱ མཱ་ནོ ཙ ཝ་ཌྜྷ་ཏཱི’’ཏི. (དྷ. པ. ༧༣-༧༤) –
དྷ་མྨ་པ་དེ ཨི་མཱ གཱ་ཐཱ ཨ་བྷཱ་སི.
སུ་དྷ་མྨ་ཏྠེ་རོ་པི ཨི་མཾ ཨོ་ཝཱ་དཾ སུ་ཏྭཱ ས་ཏྠཱ་རཾ ཝ་ནྡི་ཏྭཱ ཨུ་ཊྛཱ་ཡཱ་ས་ནཱ པ་ད་ཀྑི་ཎཾ ཀ་ཏྭཱ ཏེ་ན ཨ་ནུ་དཱུ་ཏེ་ན བྷི་ཀྑུ་ནཱ ས་དྡྷིཾ ག་ནྟྭཱ ཨུ་པཱ་ས་ཀ་སྶ ཙ་ཀྑུ་པ་ཐེ ཨཱ་པ་ཏྟིཾ པ་ཊི་ཀ་རི་ཏྭཱ ཨུ་པཱ་ས་ཀཾ ཁ་མཱ་པེ་སི. སོ ཨུ་པཱ་ས་ཀེ་ན ‘‘ཁ་མཱ་མ་ཧཾ བྷ་ནྟེ, ས་ཙེ མ་ཡ྄ཧཾ དོ་སོ ཨ་ཏྠི, ཁ་མ་ཐ མེ’’ཏི པ་ཊི་ཁ་མཱ་པི་ཏོ ས་ཏྠཱ་རཱ དི་ནྣ་ཨོ་ཝཱ་དེ ཋ་ཏྭཱ ཀ་ཏི་པཱ་ཧེ་ནེ་ཝ ས་ཧ པ་ཊི་ས་མྦྷི་དཱ་ཧི ཨ་ར་ཧ་ཏྟཾ པཱ་པུ་ཎི.
ཨཱ་པ་ཏྟི་ཡཱ ཨ་ད་སྶ་ནེ ཨུ་ཀྑེ་པ་ནཱི་ཡ་ཀ་མྨ་ཀ་ཐཱ་ཝ་ཎྞ་ནཱ
༥༠. ཏ་སྶཱ ཨ་ད་སྶ་ནེ་ཡེ་ཝ ཀ་མྨཾ ཀཱ་ཏ་བྦནྟི ཏ་སྶཱ ཨ་ད་སྶ་ནེ་ཡེ་ཝ ཨུ་ཀྑེ་པ་ནཱི་ཡ་ཀ་མྨཾ ཀཱ་ཏ་བྦཾ. ཏ་ཛྫ་ནཱི་ཡཱ་དི་ཀ་མྨཾ པ་ན ཨཱ་པ་ཏྟིཾ ཨཱ་རོ་པེ་ཏྭཱ ཏ་སྶཱ ཨ་ད་སྶ་ནེ ཨ་པྤ་ཊི་ཀ་མྨེ ཝཱ བྷ་ཎྜ་ན་ཀཱ་ར་ཀཱ་དི་ཨ་ངྒེ་ཧི ཀཱ་ཏ་བྦཾ. སེ་ས་མེ་ཏྠ ཨུ་ཏྟཱ་ན་མེ་ཝ.
ཀ་མྨ་ཀྑ་ནྡྷ་ཀ་ཝ་ཎྞ་ནཱ ནི་ཊྛི་ཏཱ.