༡༠. ཀོ་ས་མྦ་ཀ་ཀྑ་ནྡྷ་ཀཾ
ཀོ་ས་མྦ་ཀ་ཝི་ཝཱ་ད་ཀ་ཐཱ་ཝ་ཎྞ་ནཱ
༤༥༡. ཀོ་ས་མྦ་ཀ་ཀྑ་ནྡྷ་ཀེ ས་ཙེ ཧོ་ཏི, དེ་སེ་སྶཱ་མཱིཏི སུ་བྦ་ཙ་ཏཱ་ཡ སི་ཀྑཱ་ཀཱ་མ་ཏཱ་ཡ ཙ ཨཱ་པ་ཏྟིཾ པ་སྶི. ན་ཏྠི ཨཱ་པ་ཏྟཱིཏི ཨ་ནཱ་པ་ཏྟི་པ་ཀྑོ་པི ཨེ་ཏྠ ས་མྦྷ་ཝ་ཏཱི་ཏི ཨ་དྷི་པྤཱ་ཡེ་ནཱ་ཧ. སཱ པ་ནཱ་པ་ཏྟི ཨེ་ཝ. ཏེ་ནཱ་ཧ ‘‘སོ ཏ་སྶཱ ཨཱ་པ་ཏྟི་ཡཱ ཨ་ནཱ་པ་ཏྟི་དི་ཊྛི ཨ་ཧོ་སཱི’’ཏི.
༤༥༣-༤༥༤. ས་མྦྷ་མ་ཨ་ཏྠ་ཝ་སེ་ནཱཏི ཏུ་རི་ཏ་ཏྠ་ཝ་སེ་ན. ‘‘ཨ་ཀཱ་ར་ཎེ ཏུ་མྷེ་ཧི སོ བྷི་ཀྑུ ཨུ་ཀྑི་ཏྟོ’’ཏི ཝ་དེ་ཡྻཱཏི ཡ་སྨཱ པུ་བྦེ ཝི་ན་ཡ་དྷ་ར་སྶ ཝ་ཙ་ནེ་ན ‘‘ས་ཙེ ཨཱ་པ་ཏྟི ཧོ་ཏི, དེ་སེ་སྶཱ་མཱི’’ཏི ཨ་ནེ་ན པ་ཊི་ཉྙཱ་ཏཾ, ཨི་དཱ་ནི་པི ཏ་སྶེ་ཝ ཝ་ཙ་ནེ་ན ‘‘ཨ་ས་ཉྩི་ཙྩ ཨ་སྶ་ཏི་ཡཱ ཀ་ཏ་ཏྟཱ ན་ཏྠེ་ཏྠ ཨཱ་པ་ཏྟཱི’’ཏི ཨ་ནཱ་པ་ཏྟི་ས་ཉྙཱི, ཏ་སྨཱ ‘‘ཨ་ཀཱ་ར་ཎེ ཏུ་མྷེ་ཧི སོ བྷི་ཀྑུ ཨུ་ཀྑི་ཏྟོ’’ཏི ཨུ་ཀྑེ་པ་ཀེ བྷི་ཀྑཱུ ཡ་དི ཝ་དེ་ཡྻཱ་ཏི ཨ་དྷི་པྤཱ་ཡོ. ཨུ་ཀྑི་ཏྟཱ་ནུ་ཝ་ཏྟ་ཀེ ཝཱ ‘‘ཏུ་མྷེ ཨཱ་པ་ཏྟིཾ ཨཱ་པ་ནྣཱ’’ཏི ཝ་དེ་ཡྻཱཏི ཡ་སྨཱ ཝ་ཏྠུ་ཛཱ་ན་ན་ཙི་ཏྟེ་ནཱ་ཡཾ ས་ཙི་ཏྟ་ཀཱ ཨཱ་པ་ཏྟི, ཨ་ཡ་ཉྩ ཨུ་ད་ཀཱ་ཝ་སེ་སེ ཨུ་ད་ཀཱ་ཝ་སེ་ས་ས་ཉྙཱི, ཏ་སྨཱ སཱ་པ་ཏྟི་ཀ་སྶེ་ཝ ‘‘ཏུ་མྷེ ཚ་ནྡཱ་ག་ཏིཾ ག་ཙྪ་ཐཱ’’ཏི ཨ་དྷི་པྤཱ་ཡེ་ན ‘‘ཏུ་མྷེ ཨཱ་པ་ཏྟིཾ ཨཱ་པ་ནྣཱ’’ཏི ཨུ་ཀྑི་ཏྟཱ་ནུ་ཝ་ཏྟ་ཀེ ཝ་དེ་ཡྻ.
༤༥༥-༤༥༦. ཀ་མྨཾ ཀོ་པེ་ཏཱིཏི ‘‘ནཱ་ནཱ་སཾ་ཝཱ་ས་ཀ་ཙ་ཏུ་ཏྠོ ཙེ, བྷི་ཀྑ་ཝེ, ཀ་མྨཾ ཀ་རེ་ཡྻ, ཨ་ཀ་མྨཾ ན ཙ ཀ་ར་ཎཱི་ཡ’’ནྟི་ཨཱ་དི་ཝ་ཙ་ན་ཏོ (མ་ཧཱ་ཝ. ༣༨༩) ས་ཙེ ས་ངྒྷོ ཏཾ ག་ཎ་པཱུ་ར་ཀཾ ཀ་ཏྭཱ ཀ་མྨཾ ཀ་རེ་ཡྻ, ཨ་ཡཾ ཏ་ཏྠ ནི་སི་ནྣོ་པི ཏཾ ཀ་མྨཾ ཀོ་པེ་ཏཱི་ཏི ཨ་དྷི་པྤཱ་ཡོ. ཨུ་པ་ཙཱ་རཾ མུ་ཉྩི་ཏྭཱཏི ཨེ་ཏྠ ཨུ་པ་ཙཱ་རོ ནཱ་མ ཨ་ཉྙ་མ་ཉྙཾ ཧ་ཏྠེ་ན པཱ་པུ་ཎ་ན་ཊྛཱ་ནཾ.
༤༥༧. བྷ་ཎྜ་ན་ཛཱ་ཏཱཏི་ཨཱ་དཱི་སུ ཀ་ལ་ཧ་སྶ པུ་བྦ་བྷཱ་གོ བྷ་ཎྜ་ནཾ ནཱ་མ, ཏཾ ཛཱ་ཏཾ ཨེ་ཏེ་ས་ནྟི བྷ་ཎྜ་ན་ཛཱ་ཏཱ, ཧ་ཏྠ་པ་རཱ་མཱ་སཱ་དི་ཝ་སེ་ན མ་ཏྠ་ཀཾ པ་ཏྟོ ཀ་ལ་ཧོ ཛཱ་ཏོ ཨེ་ཏེ་ས་ནྟི ཀ་ལ་ཧ་ཛཱ་ཏཱ, ཝི་རུ་དྡྷ་ཝཱ་ད་བྷཱུ་ཏཾ ཝཱ་དཾ ཨཱ་པ་ནྣཱ་ཏི ཝི་ཝཱ་དཱ་པ་ནྣཱ. མུ་ཁ་ས་ཏྟཱི་ཧཱིཏི ཝཱ་ཙཱ་ས་ཏྟཱི་ཧི. ཝི་ཏུ་ད་ནྟཱཏི ཝི་ཛ྄ཛྷ་ནྟཱ. བྷ་ག་ཝ་ནྟཾ ཨེ་ཏ་ད་ཝོ་ཙཱཏི ‘‘ཨི་དྷ, བྷ་ནྟེ, ཀོ་ས་མྦི་ཡཾ བྷི་ཀྑཱུ བྷ་ཎྜ་ན་ཛཱ་ཏཱ’’ཏི་ཨཱ་དི་ཝ་ཙ་ནཾ ཨ་ཝོ་ཙ, ཏ་ཉྩ ཁོ ནེ་ཝ པི་ཡ་ཀ་མྱ་ཏཱ་ཡ, ན བྷེ་དཱ་དྷི་པྤཱ་ཡེ་ན, ཨ་ཐ ཁོ ཨ་ཏྠ་ཀཱ་མ་ཏཱ་ཡ ཧི་ཏ་ཀཱ་མ་ཏཱ་ཡ. སཱ་མ་གྒཱི་ཀཱ་ར་ཀོ ཀི་རེ་ས བྷི་ཀྑུ, ཏ་སྨཱ་སྶ ཨེ་ཏ་ད་ཧོ་སི ‘‘ཡ་ཐཱ ཨི་མེ བྷི་ཀྑཱུ ཝི་ཝཱ་དཾ ཨཱ་ར་དྡྷཱ, ན ས་ཀྐཱ མ་ཡཱ, ནཱ་པི ཨ་ཉྙེ་ན བྷི་ཀྑུ་ནཱ ས་མ་གྒེ ཀཱ་ཏུཾ, ཨ་པྤེ་ཝ ནཱ་མ ས་དེ་ཝ་ཀེ ལོ་ཀེ ཨ་གྒ་པུ་གྒ་ལོ བྷ་ག་ཝཱ ས་ཡཾ ཝཱ ག་ནྟྭཱ ཨ་ཏྟ་ནོ ཝཱ ས་ནྟི་ཀཾ པ་ཀྐོ་སཱ་པེ་ཏྭཱ ཨེ་ཏེ་སཾ བྷི་ཀྑཱུ་ནཾ ཁ་ནྟི་མེ་ཏྟཱ་པ་ཊི་སཾ་ཡུ་ཏྟཾ སཱ་ར་ཎཱི་ཡ་དྷ་མྨ་དེ་ས་ནཾ ཀ་ཐེ་ཏྭཱ སཱ་མ་གྒིཾ ཀ་རེ་ཡྻཱ’’ཏི ཨ་ཏྠ་ཀཱ་མ་ཏཱ་ཡ ཧི་ཏ་ཀཱ་མ་ཏཱ་ཡ ག་ནྟྭཱ ཨ་ཝོ་ཙ. ཏ་སྨཱ ཨེ་ཝ་མཱ་ཧཱཏི ཨ་ཏྠ་ཀཱ་མ་ཏྟཱ ཨེ་ཝ་མཱ་ཧ, ན བྷ་ག་ཝ་ཏོ ཝ་ཙ་ནཾ ཨ་ནཱ་དི་ཡ་ནྟོ. ཡེ པ་ན ཏ་དཱ ས་ཏྠུ ཝ་ཙ་ནཾ ན ག་ཎྷིཾ་སུ, ཏེ ཀི་ཉྩི ཨ་ཝ་ཏྭཱ ཏུ་ཎྷཱི་བྷཱུ་ཏཱ མ་ངྐུ་བྷཱུ་ཏཱ ཨ་ཊྛཾ་སུ, ཏ་སྨཱ ཨུ་བྷ་ཡེ་ས་མྤི ས་ཏྠ་རི ཨ་གཱ་ར་ཝ་པ་ཊི་པ་ཏྟི ནཱ་ཧོ་སི.
ཀོ་ས་མྦ་ཀ་ཝི་ཝཱ་ད་ཀ་ཐཱ་ཝ་ཎྞ་ནཱ ནི་ཊྛི་ཏཱ.
དཱི་གྷཱ་ཝུ་ཝ་ཏྠུ་ཀ་ཐཱ་ཝ་ཎྞ་ནཱ
༤༥༨. ཨ་ཐ ཁོ བྷ་ག་ཝཱ བྷི་ཀྑཱུ ཨཱ་མ་ནྟེ་སཱིཏི་ཨཱ་དཱི་སུ བྷཱུ་ཏ་པུ་བྦནྟི ཨི་དཾ བྷ་ག་ཝཱ པ་ཐ་ཝཱི་ག་ཏཾ ནི་དྷིཾ ཨུ་དྡྷ་རི་ཏྭཱ པུ་ར་ཏོ རཱ་སིཾ ཀ་རོ་ནྟོ ཝི་ཡ བྷ་ཝ་པ་ཊི་ཙྪ་ནྣཾ པུ་རཱ་ཝུ་ཏྠཾ ད་སྶེ་ནྟོ ཨཱ་ཧ. ཨ་ཌྜྷོཏི ཨི་སྶ་རོ. ཡོ ཀོ་ཙི ཨ་ཏྟ་ནོ ས་ནྟ་ཀེ་ན ཝི་བྷ་ཝེ་ན ཨ་ཌྜྷོ ཧོ་ཏི, ཨ་ཡཾ པ་ན ན ཀེ་ཝ་ལཾ ཨ་ཌྜྷོ་ཡེ་ཝ, མ་ཧ་དྡྷ་ནོ མ་ཧ་ཏཱ ཨ་པ་རི་མཱ་ཎ་ས་ངྑེ་ན དྷ་ནེ་ན ས་མ་ནྣཱ་ག་ཏོ་ཏི ཨཱ་ཧ ‘‘མ་ཧ་དྡྷ་ནོ’’ཏི. བྷུ་ཉྫི་ཏ་བྦ་ཏོ པ་རི་བྷུ་ཉྫི་ཏ་བྦ་ཏོ ཝི་སེ་ས་ཏོ ཀཱ་མཱ བྷོ་གཱ ནཱ་མ, ཏ་སྨཱ པ་ཉྩ་ཀཱ་མ་གུ་ཎ་ཝ་སེ་ན མ་ཧ་ནྟཱ ཨུ་ལཱ༹་རཱ བྷོ་གཱ ཨ་སྶཱ་ཏི མ་ཧཱ་བྷོ་གོ. མ་ཧ་ནྟཾ སེ་ནཱ་བ་ལ་ཉྩེ་ཝ ཐཱ་མ་བ་ལ་ཉྩ ཨེ་ཏ་སྶཱ་ཏི མ་ཧ་བྦ་ལོ. མ་ཧ་ནྟོ ཧ་ཏྠི་ཨ་སྶཱ་དི་ཝཱ་ཧ་ནོ ཨེ་ཏ་སྶཱ་ཏི མ་ཧཱ་ཝཱ་ཧ་ནོ. མ་ཧ་ནྟཾ ཝི་ཛི་ཏཾ ར་ཊྛཾ ཨེ་ཏ་སྶཱ་ཏི མ་ཧཱ་ཝི་ཛི་ཏོ. པ་རི་པུ་ཎྞ་ཀོ་ས་ཀོ་ཊྛཱ་གཱ་རོཏི ཀོ་སོ ཝུ་ཙྩ་ཏི བྷ་ཎྜཱ་གཱ་ར་སཱ་ར་ག་བྦྷོ, ཀོ་ཊྛཾ ཝུ་ཙྩ་ཏི དྷ་ཉྙ་སྶ ཨཱ་ཋ་པ་ན་ཊྛཱ་ནཾ, ཀོ་ཊྛ་བྷཱུ་ཏཾ ཨ་གཱ་རཾ ཀོ་ཊྛཱ་གཱ་རཾ, ནི་ད་ཧི་ཏྭཱ ཋ་པི་ཏེ་ན དྷ་ནེ་ན པ་རི་པུ་ཎྞ་ཀོ་སོ དྷ་ཉྙཱ་ན་ཉྩ པ་རི་པུ་ཎྞ་ཀོ་ཊྛཱ་གཱ་རོ་ཏི ཨ་ཏྠོ.
ཨ་ཐ ཝཱ ཙ་ཏུ་བྦི་དྷོ ཀོ་སོ ཧ་ཏྠཱི ཨ་སྶཱ ར་ཐཱ པ་ཏྟཱི་ཏི. ཡ་ཐཱ ཧི ཨ་སི་ནོ ཏི་ཀྑ་བྷཱ་ཝ་པ་རི་པཱ་ལ་ཀོ པ་རི་ཙྪ་དོ ‘‘ཀོ་སོ’’ཏི ཝུ་ཙྩ་ཏི, ཨེ་ཝཾ ར་ཉྙོ ཏི་ཀྑ་བྷཱ་ཝ་པ་རི་པཱ་ལ་ཀ་ཏྟཱ ཙ་ཏུ་ར་ངྒི་ནཱི སེ་ནཱ ‘‘ཀོ་སོ’’ཏི ཝུ་ཙྩ་ཏི. ཏི་ཝི་དྷཾ ཀོ་ཊྛཱ་གཱ་རཾ དྷ་ན་ཀོ་ཊྛཱ་གཱ་རཾ དྷ་ཉྙ་ཀོ་ཊྛཱ་གཱ་རཾ ཝ་ཏྠ་ཀོ་ཊྛཱ་གཱ་ར་ནྟི. ཏཾ ས་བྦ་མྤི པ་རི་པུ་ཎྞ་མ་སྶཱ་ཏི པ་རི་པུ་ཎྞ་ཀོ་ས་ཀོ་ཊྛཱ་གཱ་རོ. ཙ་ཏུ་ར་ངྒི་ནིཾ སེ་ནནྟི ཧ་ཏྠི་ཨ་སྶ་ར་ཐ་པ་ཏྟི་ས་ངྑཱ་ཏེ་ཧི ཙ་ཏཱུ་ཧི ཨ་ངྒེ་ཧི ས་མ་ནྣཱ་ག་ཏཾ སེ་ནཾ. ས་ནྣ་ཡ྄ཧི་ཏྭཱཏི ཙ་མྨ་པ་ཊི་མུ་ཉྩ་ནཱ་དཱི་ཧི ས་ནྣཱ་ཧཾ ཀཱ་རེ་ཏྭཱ. ཨ་བྦྷུ་ཡྻཱ་སཱིཏི ཨ་བྷི་ཨུ་ཡྻཱ་སི, ཨ་བྷི་མུ་ཁོ ཧུ་ཏྭཱ ནི་ཀྑ་མཱི་ཏི ཨ་ཏྠོ. ཨེ་ཀ་ས་ངྒྷཱ་ཏ་མྤཱིཏི ཨེ་ཀ་པྤ་ཧཱ་ར་མྤི. དྷོ་ཝ་ནནྟི དྷོ་ཝ་ནུ་ད་ཀཾ. པ་རི་ནེ་ཏྭཱཏི ནཱི་ཧ་རི་ཏྭཱ. ‘‘ཨ་ན་ཏྠ་དོ’’ཏི ཝ་ཏྟ་བྦེ ད-ཀཱ་ར་སྶ ཏ-ཀཱ་རཾ ཀ་ཏྭཱ ‘‘ཨ་ན་ཏྠ་ཏོ’’ཏི ཝུ་ཏྟ་ནྟི ཨཱ་ཧ ‘‘ཨ་ཐ ཝཱ’’ཏི་ཨཱ་དི.
༤༦༤. ཝ་གྒ་བྷཱ་ཝེ་ན ཝཱ པུ་ཐུ ནཱ་ནཱ ས་དྡོ ཨ་སྶཱ་ཏི པུ་ཐུ་ས་དྡོ. ས་མ་ཛ་ནོཏི བྷ་ཎྜ་ནེ ས་མ་ཛ྄ཛྷཱ་ས་ཡོ ཛ་ནོ. ཏ་ཏྠཱཏི ཏ་སྨིཾ ཛ་ན་ཀཱ་ཡེ. ཨ་ཧཾ བཱ་ལོ་ཏི ན མ་ཉྙི་ཏྠཱཏི བཱ་ལ་ལ་ཀྑ་ཎེ ཋི་ཏོ་པི ‘‘ཨ་ཧཾ བཱ་ལོ’’ཏི ན མ་ཉྙི. བྷི་ཡྻོ ཙཱཏི ཨ་ཏྟ་ནོ བཱ་ལ་བྷཱ་ཝ་སྶ ཨ་ཛཱ་ན་ན་ཏོ བྷི་ཡྻོ ཙ བྷ་ཎྜ་ན་སྶ ཨུ་པ་རི་ཕོ་ཊོ ཝི་ཡ ས་ངྒྷ་བྷེ་ད་སྶ ཨ་ཏྟ་ནོ ཀཱ་ར་ཎ་བྷཱ་ཝ་མྤི ཨུ་པྤ་ཛྫ་མཱ་ནཾ ན མ་ཉྙི་ཏྠ ནཱ་ཉྙཱ་སི.
ཀ་ལ་ཧ་ཝ་སེ་ན པ་ཝ་ཏྟ་ཝཱ་ཙཱ་ཡེ་ཝ གོ་ཙ་རཱ ཨེ་ཏེ་ས་ནྟི ཝཱ་ཙཱ་གོ་ཙ་རཱ. མུ་ཁཱ་ཡཱ་མནྟི ཝི་ཝ་ད་ན་ཝ་སེ་ན མུ་ཁཾ ཨཱ་ཡཱ་མེ་ཏྭཱ བྷཱ་ཎི་ནོ. ན ཏཾ ཛཱ་ན་ནྟཱིཏི ཏཾ ཀ་ལ་ཧཾ ན ཛཱ་ན་ནྟི. ཀ་ལ་ཧཾ ཀ་རོ་ནྟོ ཙ ཏཾ ན ཛཱ་ན་ནྟོ ནཱ་མ ན་ཏྠི. ཡ་ཐཱ པ་ན ན ཛཱ་ན་ནྟི, ཏཾ ད་སྶེ་ཏུཾ ཨཱ་ཧ ‘‘ཨེ་ཝཾ སཱ་དཱི་ན་ཝོ ཨ་ཡ’’ནྟི, ཨ་ཡཾ ཀ་ལ་ཧོ ནཱ་མ ཨ་ཏྟ་ནོ པ་རེ་ས་ཉྩ ཨ་ཏྠ་ཧཱ་པ་ན་ཏོ ཨ་ན་ཏྠུ་པྤཱ་ད་ན་ཏོ དི་ཊྛེ་ཝ དྷ་མྨེ ས་མྤ་རཱ་ཡེ ཙ སཱ་དཱི་ན་ཝོ ས་དོ་སོ་ཏི ཨ་ཏྠོ. ཏཾ ན ཛཱ་ན་ནྟཱིཏི ཏཾ ཀ་ལ་ཧཾ ན ཛཱ་ན་ནྟི. ཀ་ཐཾ ན ཛཱ་ན་ནྟཱི་ཏི ཨཱ་ཧ ‘‘ཨེ་ཝཾ སཱ་དཱི་ན་ཝོ ཨ་ཡ’’ནྟི, ‘‘ཨེ་ཝཾ སཱ་དཱི་ན་ཝོ ཨ་ཡཾ ཀ་ལ་ཧོ’’ཏི ཨེ་ཝཾ ཏཾ ཀ་ལ་ཧཾ ན ཛཱ་ན་ནྟཱི་ཏི ཨ་ཏྠོ.
ཨ་ཀྐོ་ཙྪི མནྟི་ཨཱ་དཱི་སུ ཨ་ཀྐོ་ཙྪཱིཏི ཨ་ཀྐོ་སི. ཨ་ཝ་དྷཱིཏི པ་ཧ་རི. ཨ་ཛི་ནཱིཏི ཀཱུ་ཊ་ས་ཀྑི་ཨོ་ཏཱ་ར་ཎེ་ན ཝཱ ཝཱ་ད་པ་ཊི་ཝཱ་དེ་ན ཝཱ ཀ་ར་ཎུ་ཏྟ་རི་ཡ་ཀ་ར་ཎེ་ན ཝཱ ཨ་ཛེ་སི. ཨ་ཧཱ་སཱིཏི མ་མ ས་ནྟ་ཀཾ པ་ཏྟཱ་དཱི་སུ ཀི་ཉྩི་དེ་ཝ ཨ་ཝ་ཧ་རི. ཡེ ཙ ཏནྟི ཡེ ཀེ་ཙི དེ་ཝཱ ཝཱ མ་ནུ་སྶཱ ཝཱ ག་ཧ་ཊྛཱ ཝཱ པ་བྦ་ཛི་ཏཱ ཝཱ ཏཾ ‘‘ཨ་ཀྐོ་ཙྪི མ’’ནྟི་ཨཱ་དི་ཝ་ཏྠུ་ཀཾ ཀོ་དྷཾ ས་ཀ་ཊ་དྷུ་རཾ ཝི་ཡ ན་དྡྷི་ནཱ པཱུ་ཏི་མ་ཙྪཱ་དཱི་ནི ཝི་ཡ ཙ ཀུ་སཱ་དཱི་ཧི པུ་ན་པྤུ་ནཾ ཝེ་ཋེ་ནྟཱ ཨུ་པ་ན་ཡ྄ཧ་ནྟི ཨུ་པ་ནཱ་ཧ་ཝ་སེ་ན ཨ་ནུ་བ་ནྡྷ་ནྟི, ཏེ་སཾ ས་ཀིཾ ཨུ་པྤ་ནྣཾ ཝེ་རཾ ན ས་མྨ་ཏཱི་ཏི ཨ་ཏྠོ.
ཡེ ཙ ཏཾ ནུ་པ་ན་ཡ྄ཧ་ནྟཱིཏི ཨ་སྶ་ཏི་ཡཱ ཨ་མ་ན་སི་ཀཱ་ར་ཝ་སེ་ན ཝཱ ཀ་མྨ་པ་ཙྩ་ཝེ་ཀྑ་ཎཱ་དི་ཝ་སེ་ན ཝཱ ཡེ ཏཾ ཨ་ཀྐོ་སཱ་དི་ཝ་ཏྠུ་ཀཾ ཀོ་དྷཾ ‘‘ཏ་ཡཱ་པི ཀོ་ཙི ནི་དྡོ་སོ པུ་རི་མ་བྷ་ཝེ ཨ་ཀྐུ་ཊྛོ བྷ་ཝི་སྶ་ཏི, པ་ཧ་ཊོ བྷ་ཝི་སྶ་ཏི, ཀཱུ་ཊ་ས་ཀྑིཾ ཨོ་ཏཱ་རེ་ཏྭཱ ཛི་ཏོ བྷ་ཝི་སྶ་ཏི, ཀ་སྶ་ཙི ཏེ པ་ས་ཡ྄ཧ ཀི་ཉྩི ཨ་ཙྪི་ནྣཾ བྷ་ཝི་སྶ་ཏི, ཏ་སྨཱ ནི་དྡོ་སོ ཧུ་ཏྭཱ་པི ཨ་ཀྐོ་སཱ་དཱི་ནི པཱ་པུ་ཎཱ་སཱི’’ཏི ཨེ་ཝཾ ན ཨུ་པ་ན་ཡ྄ཧ་ནྟི, ཏེ་སུ པ་མཱ་དེ་ན ཨུ་པྤ་ནྣ་མྤི ཝེ་རཾ ཨི་མི་ནཱ ཨ་ནུ་པ་ན་ཡ྄ཧ་ནེ་ན ནི་རི་ནྡྷ་ནོ ཝི་ཡ ཛཱ་ཏ་ཝེ་དོ ཨུ་པ་ས་མྨ་ཏི.
ན ཧི ཝེ་རེ་ན ཝེ་རཱ་ནཱིཏི ཡ་ཐཱ ཧི ཁེ་ལ༹་སི་ངྒྷཱ་ཎི་ཀཱ་དི་ཨ་སུ་ཙི་མ་ཀྑི་ཏཾ ཋཱ་ནཾ ཏེ་ཧེ་ཝ ཨ་སུ་ཙཱི་ཧི དྷོ་ཝ་ནྟོ སུ་དྡྷཾ ནི་གྒ་ནྡྷཾ ཀཱ་ཏུཾ ན ས་ཀྐོ་ཏི, ཨ་ཐ ཁོ ཏཾ ཋཱ་ནཾ བྷི་ཡྻོ་སོ མ་ཏྟཱ་ཡ ཨ་སུ་དྡྷ་ཏ་ར་ཉྩ དུ་གྒ་ནྡྷ་ཏ་ར་ཉྩ ཧོ་ཏི, ཨེ་ཝ་མེ་ཝ ཨ་ཀྐོ་ས་ནྟཾ པ་ཙྩ་ཀྐོ་ས་ནྟོ པ་ཧ་ར་ནྟཾ པ་ཊི་པ་ཧ་ར་ནྟོ ཝེ་རེ་ན ཝེ་རཾ ཝཱུ་པ་ས་མེ་ཏུཾ ན ས་ཀྐོ་ཏི, ཨ་ཐ ཁོ བྷི་ཡྻོ ཝེ་ར་མེ་ཝ ཀ་རོ་ཏི. ཨི་ཏི ཝེ་རཱ་ནི ནཱ་མ ཝེ་རེ་ན ཀི་སྨི་ཉྩི་པི ཀཱ་ལེ ན ས་མྨ་ནྟི, ཨ་ཐ ཁོ ཝ་ཌྜྷ་ནྟི་ཡེ་ཝ. ཨ་ཝེ་རེ་ན ཙ ས་མྨ་ནྟཱིཏི ཡ་ཐཱ པ་ན ཏཱ་ནི ཁེ་ལཱ༹་དཱི་ནི ཨ་སུ་ཙཱི་ནི ཝི་པྤ་ས་ནྣེ་ན ཨུ་ད་ཀེ་ན དྷོ་ཝི་ཡ་མཱ་ནཱ་ནི ན་སྶ་ནྟི, ཏཾ ཋཱ་ནཾ སུ་དྡྷཾ ཧོ་ཏི ནི་གྒ་ནྡྷཾ, ཨེ་ཝ་མེ་ཝ ཨ་ཝེ་རེ་ན ཁ་ནྟི་མེ་ཏྟོ་ད་ཀེ་ན ཡོ་ནི་སོ་མ་ན་སི་ཀཱ་རེ་ན པ་ཊི་ས་ངྑཱ་ནེ་ན པ་ཙྩ་ཝེ་ཀྑ་ཎེ་ན ཝེ་རཱ་ནི ཝཱུ་པ་ས་མྨ་ནྟི པ་ཊི་པྤ་སྶ་མྦྷ་ནྟི ཨ་བྷཱ་ཝཾ ག་ཙྪ་ནྟི. ཨེ་ས དྷ་མྨོ ས་ན་ནྟ་ནོཏི ཨེ་ས ཨ་ཝེ་རེ་ན ཝེ་རཱུ་པ་ས་མ་ན་ས་ངྑཱ་ཏོ པོ་རཱ་ཎ་ཀོ དྷ་མྨོ ས་བྦེ་སཾ བུ་དྡྷ་པ་ཙྩེ་ཀ་བུ་དྡྷ་ཁཱི་ཎཱ་ས་ཝཱ་ནཾ ག་ཏ་མ་གྒོ.
ན ཛཱ་ན་ནྟཱིཏི ཨ་ནི་ཙྩ་ས་ཉྙཾ ན པ་ཙྩུ་པ་ཊྛཱ་པེ་ནྟཱི་ཏི ཨ་དྷི་པྤཱ་ཡོ. ཏ་ཏོ ས་མྨ་ནྟི མེ་དྷ་གཱཏི ཏ་ཏོ ཏ་སྨཱ ཀཱ་ར་ཎཱ མེ་དྷ་གཱ ཀ་ལ་ཧཱ ས་མྨ་ནྟི ཝཱུ་པ་ས་མཾ ག་ཙྪ་ནྟི. ཀ་ཐཾ ཏེ ས་མྨ་ནྟཱི་ཏི ཨཱ་ཧ ‘‘ཨེ་ཝ་ཉྷཱི’’ཏི་ཨཱ་དི. ཏ་ཏྠ ཨེ་ཝ་ཉྷི ཏེ ཛཱ་ན་ནྟཱཏི ཏེ པ་ཎྜི་ཏཱ ‘‘མ་ཡཾ མ་ཙྩུ་ས་མཱི་པཾ ག་ཙྪཱ་མཱ’’ཏི ཨེ་ཝཾ ཛཱ་ན་ནྟཱ ཡོ་ནི་སོ་མ་ན་སི་ཀཱ་རཾ ཨུ་པྤཱ་དེ་ཏྭཱ མེ་དྷ་གཱ་ནཾ ཀ་ལ་ཧཱ་ནཾ ཝཱུ་པ་ས་མཱ་ཡ པ་ཊི་པ་ཛྫ་ནྟི, ཨ་ཐ ནེ་སཾ ཏཱ་ཡ པ་ཊི་པ་ཏྟི་ཡཱ ཏེ མེ་དྷ་གཱ ས་མྨ་ནྟཱི་ཏི ཨ་དྷི་པྤཱ་ཡོ.
ཏེ་ས་མྤི ཧོ་ཏི ས་ངྒ་ཏཱིཏི ཡེ མཱ་ཏཱ་པི་ཏཱུ་ནཾ ཨ་ཊྛཱི་ནི ཚི་ནྡ་ནྟི, པཱ་ཎེ ཧ་ར་ནྟི, ག་ཝཱ་དཱི་ནི ཙ པ་ས་ཡ྄ཧ ག་ཎྷ་ནྟི, ཨེ་ཝཾ ར་ཊྛཾ ཝི་ལུ་མྤ་མཱ་ནཱ་ནཾ ཏེ་ས་མྤི ས་ངྒ་ཏི ཧོ་ཏི, ཀི་མ་ངྒཾ པ་ན ཏུ་མྷཱ་ཀཾ ན སི་ཡཱ་ཏི ཨ་དྷི་པྤཱ་ཡོ.
ཝ་ཎྞཱ་ཝ་ཎྞ་དཱི་པ་ན་ཏྠཾ ཝུ་ཏྟཱཏི ‘‘བཱ་ལ་ས་ཧཱ་ཡ་ཏཱ་ཡ ཨི་མེ བྷི་ཀྑཱུ ཀ་ལ་ཧ་པ་སུ་ཏཱ, པ་ཎྜི་ཏ་ས་ཧཱ་ཡཱ་ནཾ པ་ན ཨི་དཾ ན སི་ཡཱ’’ཏི པ་ཎྜི་ཏ་ས་ཧཱ་ཡ་སྶ བཱ་ལ་ས་ཧཱ་ཡ་སྶ ཙ ཝ་ཎྞཱ་ཝ་ཎྞ་དཱི་པ་ན་ཏྠཾ ཝུ་ཏྟཱ. ནི་པ་ཀནྟི ནེ་པ་ཀྐ་པ་ཉྙཱ་ཡ ས་མ་ནྣཱ་ག་ཏཾ. སཱ་དྷུ་ཝི་ཧཱ་རི དྷཱི་རནྟི བྷ་དྡ་ཀ་ཝི་ཧཱ་རིཾ པ་ཎྜི་ཏཾ. པཱ་ཀ་ཊ་པ་རི་སྶ་ཡེ ཙ པ་ཊི་ཙྪ་ནྣ་པ་རི་སྶ་ཡེ ཙ ཨ་བྷི་བྷ་ཝི་ཏྭཱཏི སཱི་ཧ་བྱ་གྒྷཱ་ད་ཡོ པཱ་ཀ་ཊ་པ་རི་སྶ་ཡེ ཙ རཱ་ག་བྷ་ཡ་དོ་ས་བྷ་ཡཱ་ད་ཡོ པ་ཊི་ཙྪ་ནྣ་པ་རི་སྶ་ཡེ ཙཱ་ཏི ས་བྦེ་ཝ པ་རི་སྶ་ཡེ ཨ་བྷི་བྷ་ཝི་ཏྭཱ.
ཨེ་ཀ་ཀཱ ཙ་རིཾ་སཱུཏི ‘‘ཨི་དཾ ར་ཛྫཾ ནཱ་མ མ་ཧ་ནྟཾ པ་མཱ་ད་ཊྛཱ་ནཾ, ཀིཾ ཨ་མྷཱ་ཀཾ ར་ཛྫེ་ན ཀཱ་རི་ཏེ་ནཱ’’ཏི ར་ཊྛཾ པ་ཧཱ་ཡ ཏ་ཏོ མ་ཧཱ་ཨ་ར་ཉྙཾ པ་ཝི་སི་ཏྭཱ ཏཱ་པ་ས་པ་བྦ་ཛྫཾ པ་བྦ་ཛི་ཏྭཱ ཙ་ཏཱུ་སུ ཨི་རི་ཡཱ་པ་ཐེ་སུ ཨེ་ཀ་ཀཱ ཙ་རིཾ་སཱུ་ཏི ཨ་ཏྠོ.
ཨེ་ཀ་སྶ ཙ་རི་ཏཾ སེ་ཡྻོཏི པ་བྦ་ཛི་ཏ་སྶ པ་བྦ་ཛི་ཏ་ཀཱ་ལ་ཏོ པ་ཊྛཱ་ཡ ཨེ་ཀཱི་བྷཱ་ཝཱ་བྷི་ར་ཏ་སྶ ཨེ་ཀ་ཀ་སྶེ་ཝ ཙ་རི་ཏཾ སེ་ཡྻོ་ཏི ཨ་ཏྠོ. ན་ཏྠི བཱ་ལེ ས་ཧཱ་ཡ་ཏཱཏི ཙཱུ་ལ༹་སཱི་ལཾ མ་ཛ྄ཛྷི་མ་སཱི་ལཾ མ་ཧཱ་སཱི་ལཾ ད་ས ཀ་ཐཱ་ཝ་ཏྠཱུ་ནི ཏེ་ར་ས དྷུ་ཏ་གུ་ཎཱ ཝི་པ་སྶ་ནཱ་ཉཱ་ཎཾ ཙ་ཏྟཱ་རོ མ་གྒཱ ཙ་ཏྟཱ་རི ཕ་ལཱ་ནི ཏི་སྶོ ཝི་ཛྫཱ ཚ ཨ་བྷི་ཉྙཱ ཨ་མ་ཏ་མ་ཧཱ་ནི་བྦཱ་ན་ནྟི ཨ་ཡཾ ས་ཧཱ་ཡ་ཏཱ ནཱ་མ, སཱ བཱ་ལཾ ནི་སྶཱ་ཡ ཨ་དྷི་ག་ནྟུཾ ན ས་ཀྐཱ་ཏི ན་ཏྠི བཱ་ལེ ས་ཧཱ་ཡ་ཏཱ. མཱ་ཏ་ངྒོ ཨ་ར་ཉྙེ མཱ་ཏ་ངྒ་ར་ཉྙེཏི ས་ར་ལོ་པེ་ན ས་ནྡྷི. ‘‘མཱ་ཏ་ངྒ་ར་ཉྙོ’’ཏི་པི པཱ་ཋོ, ཨ་ར་ཉྙ་ཀོ མཱ་ཏ་ངྒོ ཝི་ཡཱ་ཏི ཨ་ཏྠོ. མཱ་ཏ་ངྒ-ས་དྡེ་ནེ་ཝ ཧ་ཏྠི་བྷཱ་ཝ་སྶ ཝུ་ཏྟ་ཏྟཱ ནཱ་ག་ཝ་ཙ་ནཾ ཏ་སྶ མ་ཧ་ཏྟ་ཝི་བྷཱ་ཝ་ན་ཏྠ་ནྟི ཨཱ་ཧ ‘‘ནཱ་གོ་ཏི མ་ཧ་ནྟཱ་དྷི་ཝ་ཙ་ན་མེ་ཏ’’ནྟི. མ་ཧ་ནྟ་པ་རི་ཡཱ་ཡོ ཧི ནཱ་ག-ས་དྡོ ཧོ་ཏི ‘‘ཨེ་ཏཾ ནཱ་ག་སྶ ནཱ་གེ་ན, ཨཱི་སཱ་ད་ནྟ་སྶ ཧ་ཏྠི་ནོ’’ཏི་ཨཱ་དཱི་སུ (ཨུ་དཱ. ༣༥).
དཱི་གྷཱ་ཝུ་ཝ་ཏྠུ་ཀ་ཐཱ་ཝ་ཎྞ་ནཱ ནི་ཊྛི་ཏཱ.
བཱ་ལ་ཀ་ལོ་ཎ་ཀ་ག་མ་ན་ཀ་ཐཱ་ཝ་ཎྞ་ནཱ
༤༦༥. བཱ་ལ་ཀ་ལོ་ཎ་ཀཱ་ར་གཱ་མོཏི ཨུ་པཱ་ལི་ག་ཧ་པ་ཏི་སྶ ཨེ་ཝཾ་ནཱ་མ་ཀོ བྷོ་ག་གཱ་མོ. ཏེ་ནུ་པ་ས་ངྐ་མཱིཏི དྷ་མྨ་སེ་ནཱ་པ་ཏི་མ་ཧཱ་མོ་གྒ་ལླཱ་ན་ཏྠེ་རེ་སུ ཝཱ ཨ་སཱི་ཏི་མ་ཧཱ་སཱ་ཝ་ཀེ་སུ ཝཱ ཨ་ནྟ་མ་སོ དྷ་མྨ་བྷ་ཎྜཱ་གཱ་རི་ཀཾ ཨཱ་ན་ནྡ་ཏྠེ་ར་མྤི ཀ་ཉྩི ཨ་ནཱ་མ་ནྟེ་ཏྭཱ ས་ཡ་མེ་ཝ པ་ཏྟ་ཙཱི་ཝ་ར་མཱ་དཱ་ཡ ཨ་ནཱི་ཀ་ནི་སྶ་ཊོ ཧ་ཏྠཱི ཝི་ཡ ཡཱུ་ཐ་ནི་སྶ་ཊོ ཀཱ་ལ༹་སཱི་ཧོ ཝི་ཡ ཝཱ་ཏ་ཙྪི་ནྣོ ཝ་ལཱ་ཧ་ཀོ ཝི་ཡ ཙ ཨེ་ཀ་ཀོ་ཝ ཨུ་པ་ས་ངྐ་མི. ཀ་སྨཱ ཨུ་པ་ས་ངྐ་མི? ག་ཎེ ཀི་ར་སྶ ཨཱ་དཱི་ན་ཝཾ དི་སྭཱ ཨེ་ཀ་ཝི་ཧཱ་རིཾ བྷི་ཀྑུཾ པ་སྶི་ཏུ་ཀཱ་མ་ཏཱ ཨུ་ད་པཱ་དི, ཏ་སྨཱ སཱི་ཏཱ་དི་པཱི་ལི༹་ཏོ ཨུ་ཎྷཱ་དིཾ པ་ཏྠ་ཡ་མཱ་ནོ ཝི་ཡ ཨུ་པ་ས་ངྐ་མི. ཨ་ཐ ཝཱ བྷ་ག་ཝ་ཏཱ སོ ཨཱ་དཱི་ན་ཝོ པ་གེ་ཝ པ་རི་ཉྙཱ་ཏོ, ན ཏེ་ན ས་ཏྠཱ ནི་བྦི་ནྣོ, ཏ་སྨིཾ པ་ན ཨ་ནྟོ་ཝ་སྶེ ཀེ་ཙི བུ་དྡྷ་ཝེ་ནེ་ཡྻཱ ནཱ་ཧེ་སུཾ, ཏེ་ན ཨ་ཉྙ་ཏྠ ག་མ་ནཾ ཏེ་སཾ བྷི་ཀྑཱུ་ནཾ ད་མ་ནུ་པཱ་ཡོ་ཏི པཱ་ལི་ལེ་ཡྻ་ཀཾ ཨུ་དྡི་སྶ ག་ཙྪ་ནྟོ ཨེ་ཀ་ཝི་ཧཱ་རིཾ ཨཱ་ཡ་སྨ་ནྟཾ བྷ་གུཾ ས་མྤ་ཧཾ་སེ་ཏུཾ ཏ་ཏྠ ག་ཏོ. ཨེ་ཝཾ ག་ཏེ ཙ ས་ཏྠ་རི པ་ཉྩ་ས་ཏཱ བྷི་ཀྑཱུ ཨཱ་ཡ་སྨ་ནྟཾ ཨཱ་ན་ནྡཾ ཨཱ་ཧཾ་སུ ‘‘ཨཱ་ཝུ་སོ ཨཱ་ན་ནྡ ས་ཏྠཱ ཨེ་ཀ་ཀོ་ཝ ག་ཏོ, མ་ཡཾ ཨ་ནུ་བ་ནྡྷི་སྶཱ་མཱ’’ཏི. ‘‘ཨཱ་ཝུ་སོ, ཡ་དཱ བྷ་ག་ཝཱ སཱ་མཾ སེ་ནཱ་ས་ནཾ སཾ་སཱ་མེ་ཏྭཱ པ་ཏྟ་ཙཱི་ཝ་ར་མཱ་དཱ་ཡ ཨ་ནཱ་མ་ནྟེ་ཏྭཱ ཨུ་པ་ཊྛཱ་ཀེ ཨ་ན་པ་ལོ་ཀེ་ཏྭཱ བྷི་ཀྑུ་ས་ངྒྷཾ ཨ་དུ་ཏི་ཡོ ག་ཙྪ་ཏི, ཏ་དཱ ཨེ་ཀ་ཙཱ་རི་ཀཾ ཙ་རི་ཏུཾ བྷ་ག་ཝ་ཏོ ཨ་ཛ྄ཛྷཱ་ས་ཡོ, སཱ་ཝ་ཀེ་ན ནཱ་མ ས་ཏྠུ ཨ་ཛ྄ཛྷཱ་ས་ཡཱ་ནུ་རཱུ་པཾ པ་ཊི་པ་ཛྫི་ཏ་བྦཾ, ཏ་སྨཱ ན ཨི་མེ་སུ དི་ཝ་སེ་སུ བྷ་ག་ཝཱ ཨ་ནུ་ག་ནྟ་བྦོ’’ཏི ནི་ཝཱ་རེ་སི, ས་ཡ་མྤི ནཱ་ནུ་ག་ཉྪི. དྷ་མྨི་ཡཱ ཀ་ཐཱ་ཡཱཏི ཨེ་ཀཱི་བྷཱ་ཝེ ཨཱ་ནི་སཾ་ས་པ་ཊི་སཾ་ཡུ་ཏྟཱ་ཡ དྷ་མྨ་ཀ་ཐཱ་ཡ.
བཱ་ལ་ཀ་ལོ་ཎ་ཀ་ག་མ་ན་ཀ་ཐཱ་ཝ་ཎྞ་ནཱ ནི་ཊྛི་ཏཱ.
པཱ་ཙཱི་ན་ཝཾ་ས་དཱ་ཡ་ག་མ་ན་ཀ་ཐཱ་ཝ་ཎྞ་ནཱ
༤༦༦. ཡེ་ན པཱ་ཙཱི་ན་ཝཾ་ས་དཱ་ཡོཏི ཏ་ཏྠ ཀ་སྨཱ ཨུ་པ་ས་ངྐ་མི? ཡ་ཐཱ ནཱ་མ ཛི་གྷ་ཙྪི་ཏ་སྶ བྷོ་ཛ་ནེ, པི་པཱ་སི་ཏ་སྶ པཱ་ནཱི་ཡེ, སཱི་ཏེ་ན ཕུ་ཊྛ་སྶ ཨུ་ཎྷེ, ཨུ་ཎྷེ་ན ཕུ་ཊྛ་སྶ སཱི་ཏེ, དུ་ཀྑི་ཏ་སྶ སུ་ཁེ ཨ་བྷི་རུ་ཙི ཨུ་པྤ་ཛྫ་ཏི, ཨེ་ཝ་མེ་ཝ བྷ་ག་ཝ་ཏོ ཀོ་ས་མྦ་ཀེ བྷི་ཀྑཱུ ཨ་ཉྙ་མ་ཉྙཾ ཝི་ཝཱ་དཱ་པ་ནྣེ ཨ་ས་མ་གྒ་ཝཱ་སཾ ཝ་ས་ནྟེ, ས་མ་གྒ་ཝཱ་སཾ ཝ་ས་ནྟེ ཨཱ་ཝ་ཛྫེ་ནྟ་སྶ ཨི་མེ ཏ་ཡོ ཀུ་ལ་པུ་ཏྟཱ ཨཱ་པཱ་ཐ་མཱ་ག་མིཾ་སུ, ཨ་ཐ ནེ་སཾ པ་གྒ་ཎྷི་ཏུ་ཀཱ་མོ ཨུ་པ་ས་ངྐ་མི ‘‘ཨེ་ཝཱ་ཡཾ པ་ཊི་པ་ཏྟི་ཨ་ནུ་ཀྐ་མེ་ན ཀོ་ས་མྦ་ཀཱ་ནཾ བྷི་ཀྑཱུ་ནཾ ཝི་ན་ཡ་ནཱུ་པཱ་ཡོ ཧོ་ཏཱི’’ཏི. ཝི་ཧ་ར་ནྟཱིཏི སཱ་མ་གྒི་ར་སཾ ཨ་ནུ་བྷ་ཝ་མཱ་ནཱ ཝི་ཧ་ར་ནྟི.
དཱ་ཡ་པཱ་ལོཏི (མ. ནི. ཨ་ཊྛ. ༡.༣༢༥) ཨ་ར་ཉྙ་པཱ་ལོ. སོ ཨ་ར་ཉྙཾ ཡ་ཐཱ ཨི་ཙྪི་ཏི་ཙྪི་ཏ་པྤ་དེ་སེ་ན མ་ནུ་སྶཱ པ་ཝི་སི་ཏྭཱ ཏ་ཏྠ པུ་པྥཾ ཝཱ ཕ་ལཾ ཝཱ ནི་ཡྻཱ་སཾ ཝཱ ད་བྦ་ས་མྦྷཱ་རཾ ཝཱ ན ཧ་ར་ནྟི, ཨེ་ཝཾ ཝ་ཏི་ཡཱ པ་རི་ཀྑི་ཏྟ་སྶ ཨ་ར་ཉྙ་སྶ ཡོ་ཛི་ཏེ དྭཱ་རེ ནི་སཱི་དི་ཏྭཱ ཨ་ར་ཉྙཾ ར་ཀྑ་ཏི, ཏ་སྨཱ ‘‘དཱ་ཡ་པཱ་ལོ’’ཏི ཝུ་ཏྟོ. ཨ་ཏྟ་ཀཱ་མ་རཱུ་པཱ ཝི་ཧ་ར་ནྟཱིཏི ཨ་ཏྟ་ནོ ཧི་ཏཾ ཀཱ་མ་ཡ་མཱ་ན་ས་བྷཱ་ཝཱ ཧུ་ཏྭཱ ཝི་ཧ་ར་ནྟི. ཡོ ཧི ཨི་མ་སྨིཾ སཱ་ས་ནེ པ་བྦ་ཛི་ཏྭཱ་པི ཝེ་ཛྫ་ཀ་མྨ་དཱུ་ཏ་ཀ་མྨ་པ་ཧི་ཎ་ག་མ་ནཱ་དཱི་ནཾ ཝ་སེ་ན ཨེ་ཀ་ཝཱི་ས་ཏི་ཨ་ནེ་ས་ནཱ་ཧི ཛཱི་ཝི་ཀཾ ཀ་པྤེ་ཏི, ཨ་ཡཾ ན ཨ་ཏྟ་ཀཱ་མ་རཱུ་པོ ནཱ་མ. ཡོ པ་ན ཨི་མ་སྨིཾ སཱ་ས་ནེ པ་བྦ་ཛི་ཏྭཱ ཨེ་ཀ་ཝཱི་ས་ཏི་ཨ་ནེ་ས་ནཾ པ་ཧཱ་ཡ ཙ་ཏུ་པཱ་རི་སུ་དྡྷི་སཱི་ལེ པ་ཏི་ཊྛཱ་ཡ བུ་དྡྷ་ཝ་ཙ་ནཾ ཨུ་གྒ་ཎྷི་ཏྭཱ ས་པྤཱ་ཡ་དྷུ་ཏ་ངྒཾ ཨ་དྷི་ཊྛཱ་ཡ ཨ་ཊྛ་ཏིཾ་སཱ་ཡ ཨཱ་ར་མྨ་ཎེ་སུ ཙི་ཏྟ་རུ་ཙི་ཡཾ ཀ་མྨ་ཊྛཱ་ནཾ ག་ཧེ་ཏྭཱ གཱ་མ་ནྟཾ པ་ཧཱ་ཡ ཨ་ར་ཉྙཾ པ་ཝི་སི་ཏྭཱ ས་མཱ་པ་ཏྟི་ཡོ ནི་བྦ་ཏྟེ་ཏྭཱ ཝི་པ་སྶ་ནཱ་ཡ ཀ་མྨཾ ཀུ་རུ་མཱ་ནོ ཝི་ཙ་ར་ཏི, ཨ་ཡཾ ཨ་ཏྟ་ཀཱ་མོ ནཱ་མ. ཏེ་པི ཏ་ཡོ ཀུ་ལ་པུ་ཏྟཱ ཨེ་ཝ་རཱུ་པཱ ཨ་ཧེ་སུཾ. ཏེ་ན ཝུ་ཏྟཾ ‘‘ཨ་ཏྟ་ཀཱ་མ་རཱུ་པཱ ཝི་ཧ་ར་ནྟཱི’’ཏི.
མཱ ཏེ་སཾ ཨ་ཕཱ་སུ་མ་ཀཱ་སཱིཏི ཏེ་སཾ ཨ་ཕཱ་སུ་ཀཾ མཱ ཨ་ཀཱ་སཱི་ཏི བྷ་ག་ཝ་ནྟཾ ཝཱ་རེ་སི. ཨེ་ཝཾ ཀི་ར་སྶ ཨ་ཧོ་སི ‘‘ཨི་མེ ཀུ་ལ་པུ་ཏྟཱ ས་མ་གྒཱ ཝི་ཧ་ར་ནྟི, ཨེ་ཀ་ཙྩ་སྶ ཙ ག་ཏ་ཊྛཱ་ནེ བྷ་ཎྜ་ན་ཀ་ལ་ཧ་ཝི་ཝཱ་དཱ ཝ་ཏྟ་ནྟི, ཏི་ཁི་ཎ་སི་ངྒོ ཙ་ཎྜ་གོ་ཎོ ཝི་ཡ ཨོ་ཝི་ཛ྄ཛྷ་ནྟོ ཝི་ཙ་ར་ཏི, ཨ་ཐེ་ཀ་མ་གྒེ་ན དྭི་ནྣཾ ག་མ་ནཾ ན ཧོ་ཏི, ཀ་དཱ་ཙི ཨ་ཡ་མྤི ཨེ་ཝཾ ཀ་རོ་ནྟོ ཨི་མེ་སཾ ཀུ་ལ་པུ་ཏྟཱ་ནཾ ས་མ་གྒ་ཝཱ་སཾ བྷི་ནྡེ་ཡྻ, པཱ་སཱ་དི་ཀོ ཙ པ་ནེ་ས སུ་ཝ་ཎྞ་ཝ་ཎྞོ ར་ས་གི་དྡྷོ མ་ཉྙེ, ག་ཏ་ཀཱ་ལ་ཏོ པ་ཊྛཱ་ཡ པ་ཎཱི་ཏ་དཱ་ཡ་ཀཱ་ནཾ ཨ་ཏྟ་ནོ ཨུ་པ་ཊྛཱ་ཀཱ་ནཾ ཝ་ཎྞ་ཀ་ཐ་ནཱ་དཱི་ཧི ཨི་མེ་སཾ ཀུ་ལ་པུ་ཏྟཱ་ནཾ ཨ་པྤ་མཱ་ད་ཝི་ཧཱ་རཾ བྷི་ནྡེ་ཡྻ, ཝ་ས་ན་ཊྛཱ་ནཱ་ནི ཙཱ་པི ཨེ་ཏེ་སཾ ཀུ་ལ་པུ་ཏྟཱ་ནཾ ནི་བ་དྡྷཱ་ནི པ་རི་ཙྪི་ནྣཱ་ནི ཏི་སྶོ་ཝ པ་ཎྞ་སཱ་ལཱ ཏ་ཡོ ཙ་ངྐ་མཱ ཏཱི་ཎི དི་ཝཱ་ཊྛཱ་ནཱ་ནི ཏཱི་ཎི མ་ཉྩ་པཱི་ཋཱ་ནི, ཨ་ཡཾ པ་ན ས་མ་ཎོ མ་ཧཱ་ཀཱ་ཡོ ཝུ་ཌྜྷ་ཏ་རོ མ་ཉྙེ བྷ་ཝི་སྶ་ཏི, སོ ཨ་ཀཱ་ལེ ཨི་མེ ཀུ་ལ་པུ་ཏྟེ སེ་ནཱ་ས་ནཱ ཝུ་ཊྛ་པེ་སྶ་ཏི, ཨེ་ཝཾ ས་བྦ་ཐཱ་པི ཨེ་ཏེ་སཾ ཨ་ཕཱ་སུ བྷ་ཝི་སྶ་ཏཱི’’ཏི. ཏཾ ཨ་ནི་ཙྪ་ནྟོ ‘‘མཱ ཏེ་སཾ ཨ་ཕཱ་སུ་མ་ཀཱ་སཱི’’ཏི བྷ་ག་ཝ་ནྟཾ ཝཱ་རེ་ཏི.
ཀིཾ པ་ནེ་ས ཛཱ་ན་ནྟོ ཝཱ་རེ་སི ཨ་ཛཱ་ན་ནྟོ་ཏི? ཨ་ཛཱ་ན་ནྟོ. ས་མྨཱ་ས་མྦུ་དྡྷོ ཧི ནཱ་མ ཡ་དཱ ཨ་ནེ་ཀ་བྷི་ཀྑུ་ས་ཧ་སྶ་པ་རི་ཝཱ་རོ བྱཱ་མ་པྤ་བྷཱ་ཡ ཨ་སཱི་ཏི་ཨ་ནུ་བྱ་ཉྫ་ནེ་ཧི དྭ་ཏྟིཾ་ས་མ་ཧཱ་པུ་རི་ས་ལ་ཀྑ་ཎ་སི་རི་ཡཱ ཙ བུ་དྡྷཱ་ནུ་བྷཱ་ཝཾ ད་སྶེ་ནྟོ ཝི་ཙ་ར་ཏི, ཏ་དཱ ‘‘ཀོ ཨེ་སོ’’ཏི ཨ་པུ་ཙྪི་ཏྭཱ་ཝ ཛཱ་ནི་ཏ་བྦོ ཧོ་ཏི. ཏ་དཱ པ་ན བྷ་ག་ཝཱ ‘‘མཱ་སྶུ ཀོ་ཙི མ་མ བུ་དྡྷཱ་ནུ་བྷཱ་ཝཾ ཨ་ཉྙཱ་སཱི’’ཏི ཏ་ཐཱ་རཱུ་པེ་ན ཨི་དྡྷཱ་བྷི་ས་ངྑཱ་རེ་ན ས་བྦ་མྤི ཏཾ བུ་དྡྷཱ་ནུ་བྷཱ་ཝཾ ཙཱི་ཝ་ར་ག་བྦྷེ་ན ཝི་ཡ པ་ཊི་ཙྪཱ་དེ་ཏྭཱ ཝ་ལཱ་ཧ་ཀ་ག་བྦྷེ་ན པ་ཊི་ཙྪ་ནྣོ པུ་ཎྞ་ཙ་ནྡོ ཝི་ཡ ས་ཡ་མེ་ཝ པ་ཏྟ་ཙཱི་ཝ་ར་མཱ་དཱ་ཡ ཨ་ཉྙཱ་ཏ་ཀ་ཝེ་སེ་ན ཨ་ག་མཱ་སི. ཨི་ཏི ཏཾ ཨ་ཛཱ་ན་ནྟོ་ཝ དཱ་ཡ་པཱ་ལོ ཝཱ་རེ་སི.
ཨེ་ཏ་ད་ཝོ་ཙཱཏི ཐེ་རོ ཀི་ར ‘‘མཱ ས་མ་ཎཱ’’ཏི དཱ་ཡ་པཱ་ལ་སྶ ཀ་ཐཾ སུ་ཏྭཱ ཙི་ནྟེ་སི ‘‘མ་ཡཾ ཏ་ཡོ ཛ་ནཱ ཨི་དྷ ཝི་ཧ་རཱ་མ, ཨ་ཉྙོ པ་བྦ་ཛི་ཏོ ནཱ་མ ན་ཏྠི, ཨ་ཡ་ཉྩ དཱ་ཡ་པཱ་ལོ པ་བྦ་ཛི་ཏེ་ན ཝི་ཡ ས་དྡྷིཾ ཀ་ཐེ་ཏི, ཀོ ནུ ཁོ བྷ་ཝི་སྶ་ཏཱི’’ཏི དི་ཝཱ་ཊྛཱ་ན་ཏོ ཨུ་ཊྛཱ་ཡ དྭཱ་རེ ཋ་ཏྭཱ མ་གྒཾ ཨོ་ལོ་ཀེ་ནྟོ བྷ་ག་ཝ་ནྟཾ ཨ་དྡ་ས. བྷ་ག་ཝཱ་པི ཐེ་ར་སྶ ས་ཧ ད་སྶ་ནེ་ནེ་ཝ ས་རཱི་རོ་བྷཱ་སཾ མུ་ཉྩི, ཨ་སཱི་ཏི་ཨ་ནུ་བྱ་ཉྫ་ན་ཝི་རཱ་ཛི་ཏཱ བྱཱ་མ་པྤ་བྷཱ པ་སཱ་རི་ཏ་སུ་ཝ་ཎྞ་པ་ཊོ ཝི་ཡ ཝི་རོ་ཙི་ཏྠ. ཐེ་རོ ‘‘ཨ་ཡཾ དཱ་ཡ་པཱ་ལོ ཕ་ཎ་ཀ་ཏ་ཨཱ་སཱི་ཝི་སཾ གཱི་ཝཱ་ཡ ག་ཧེ་ཏུཾ ཧ་ཏྠཾ པ་སཱ་རེ་ནྟོ ཝི་ཡ ལོ་ཀེ ཨ་གྒ་པུ་གྒ་ལེ་ན ས་དྡྷིཾ ཀ་ཐེ་ནྟོ་ཝ ན ཛཱ་ནཱ་ཏི, ཨ་ཉྙ་ཏ་ར་བྷི་ཀྑུ་ནཱ ཝི་ཡ ས་དྡྷིཾ ཀ་ཐེ་ཏཱི’’ཏི ནི་ཝཱ་རེ་ནྟོ ཨེ་ཏཾ ‘‘མཱ་ཝུ་སོ, དཱ་ཡ་པཱ་ལཱ’’ཏི་ཨཱ་དི་ཝ་ཙ་ནཾ ཨ་ཝོ་ཙ.
ཏེ་ནུ་པ་ས་ངྐ་མཱིཏི ཀ་སྨཱ བྷ་ག་ཝ་ཏོ པ་ཙྩུ་གྒ་མ་ནཾ ཨ་ཀ་ཏྭཱ་ཝ ཨུ་པ་ས་ངྐ་མི? ཨེ་ཝཾ ཀི་ར་སྶ ཨ་ཧོ་སི ‘‘མ་ཡཾ ཏ་ཡོ ཛ་ནཱ ས་མ་གྒ་ཝཱ་སཾ ཝ་སཱ་མ, ས་ཙཱ་ཧཾ ཨེ་ཀ་ཀོ་ཝ པ་ཙྩུ་གྒ་མ་ནཾ ཀ་རི་སྶཱ་མི, ས་མ་གྒ་ཝཱ་སོ ནཱ་མ ན བྷ་ཝི་སྶ་ཏི, པི་ཡ་མི་ཏྟེ ག་ཧེ་ཏྭཱ་ཝ པ་ཙྩུ་གྒ་མ་ནཾ ཀ་རི་སྶཱ་མི. ཡ་ཐཱ ཙ བྷ་ག་ཝཱ མ་ཡ྄ཧཾ པི་ཡོ, ཨེ་ཝཾ ས་ཧཱ་ཡཱ་ན་མྤི མེ པི་ཡོ’’ཏི ཏེ་ཧི ས་དྡྷིཾ པ་ཙྩུ་གྒ་མ་ནཾ ཀཱ་ཏུ་ཀཱ་མོ ས་ཡཾ ཨ་ཀ་ཏྭཱ ཨུ་པ་ས་ངྐ་མི. ཀེ་ཙི པ་ན ‘‘ཏེ་སཾ ཐེ་རཱ་ནཾ པ་ཎྞ་སཱ་ལ་དྭཱ་རེ ཙ་ངྐ་མ་ན་ཀོ་ཊི་ཡཱ བྷ་ག་ཝ་ཏོ ཨཱ་ག་མ་ན་མ་གྒོ ཧོ་ཏི, ཏ་སྨཱ ཐེ་རོ ཏེ་སཾ ས་ཉྙཾ ད་ད་མཱ་ནོ་ཝ ག་ཏོ’’ཏི ཝ་ད་ནྟི. ཨ་བྷི་ཀྐ་མ་ཐཱཏི ཨི་ཏོ ཨཱ་ག་ཙྪ་ཐ. པཱ་དེ པ་ཀྑཱ་ལེ་སཱིཏི ཝི་ཀ་སི་ཏ་པ་དུ་མ་ས་ནྣི་བྷེ་ཧི ཛཱ་ལ་ཧ་ཏྠེ་ཧི མ་ཎི་ཝ་ཎྞཾ ཨུ་ད་ཀཾ ག་ཧེ་ཏྭཱ སུ་ཝ་ཎྞ་ཝ་ཎྞེ་སུ པི་ཊྛི་པཱ་དེ་སུ ཨུ་ད་ཀཾ ཨཱ་སི་ཉྩི་ཏྭཱ པཱ་དེ་ན པཱ་དཾ གྷཾ་སེ་ནྟོ པ་ཀྑཱ་ལེ་སི. བུ་དྡྷཱ་ནཾ ཀཱ་ཡེ ར་ཛོ་ཛ་ལླཾ ནཱ་མ ན ཨུ་པ་ལི་མྤ་ཏི, ཀ་སྨཱ པ་ཀྑཱ་ལེ་སཱི་ཏི? ས་རཱི་ར་སྶ ཨུ་ཏུ་གྒ་ཧ་ཎ་ཏྠཾ ཏེ་ས་ཉྩ ཙི་ཏྟ་ས་མྤ་ཧཾ་ས་ན་ཏྠཾ. ཨ་མྷེ་ཧི ཨ་བྷི་ཧ་ཊེ་ན ཨུ་ད་ཀེ་ན བྷ་ག་ཝཱ པཱ་དེ པ་ཀྑཱ་ལེ་སི, པ་རི་བྷོ་གཾ ཨ་ཀཱ་སཱི་ཏི ཏེ་སཾ བྷི་ཀྑཱུ་ནཾ བ་ལ་ཝ་སོ་མ་ན་སྶ་ཝ་སེ་ན ཙི་ཏྟཾ པཱི་ཎི་ཏཾ ཧོ་ཏི, ཏ་སྨཱ པ་ཀྑཱ་ལེ་སི.
ཨཱ་ཡ་སྨ་ནྟཾ ཨ་ནུ་རུ་དྡྷཾ བྷ་ག་ཝཱ ཨེ་ཏ་ད་ཝོ་ཙཱཏི སོ ཀི་ར ཏེ་སཾ ཝུ་ཌྜྷ་ཏ་རོ, ཏ་སྶ ས་ངྒ་ཧེ ཀ་ཏེ སེ་སཱ་ནཾ ཀ་ཏོ་ཝ ཧོ་ཏཱི་ཏི ཐེ་ར་ཉྙེ་ཝ ཨེ་ཏཾ ‘‘ཀ་ཙྩི ཝོ ཨ་ནུ་རུ་དྡྷཱ’’ཏི་ཨཱ་དི་ཝ་ཙ་ནཾ ཨ་ཝོ་ཙ. ཨ་ནུ་རུ་དྡྷཱཏི ཝཱ ཨེ་ཀ་སེ་ས་ན་ཡེ་ན ཝུ་ཏྟཾ ཝི་རཱུ་པེ་ཀ་སེ་ས་སྶ་པི ཨི་ཙྪི་ཏ་བྦ་ཏྟཱ, ཨེ་ཝ་ཉྩ ཀ་ཏྭཱ བ་ཧུ་ཝ་ཙ་ན་ནི་དྡེ་སོ ཙ ས་མ་ཏྠི་ཏོ ཧོ་ཏི. ཀ་ཙྩཱིཏི པུ་ཙྪ་ན་ཏྠེ ནི་པཱ་ཏོ. ཝོཏི སཱ་མི་ཝ་ཙ་ནཾ. ཨི་དཾ ཝུ་ཏྟཾ ཧོ་ཏི – ཀ་ཙྩི ཨ་ནུ་རུ་དྡྷཱ ཏུ་མྷཱ་ཀཾ ཁ་མ་ནཱི་ཡཾ, ཨི་རི་ཡཱ་པ་ཐོ ཝོ ཁ་མ་ཏི, ཀ་ཙྩི ཡཱ་པ་ནཱི་ཡཾ, ཀ་ཙྩི ཝོ ཛཱི་ཝི་ཏཾ ཡཱ་པེ་ཏི གྷ་ཊི་ཡ་ཏི, ཀ་ཙྩི པི་ཎྜ་ཀེ་ན ན ཀི་ལ་མ་ཐ, ཀ་ཙྩི ཏུ་མྷཱ་ཀཾ སུ་ལ་བྷ་པི་ཎྜཾ, ས་མྤ་ཏྟེ ཝོ དི་སྭཱ མ་ནུ་སྶཱ ཨུ་ལུ༹་ངྐ་ཡཱ་གུཾ ཝཱ ཀ་ཊ་ཙྪུ་བྷི་ཀྑཾ ཝཱ དཱ་ཏ་བྦཾ མ་ཉྙ་ནྟཱི་ཏི བྷི་ཀྑཱ་ཙཱ་ར་ཝ་ཏྟཾ པུ་ཙྪ་ཏི. ཀ་སྨཱ? ཡ་སྨཱ པ་ཙྩ་ཡེ་ན ཨ་ཀི་ལ་མ་ནྟེ་ན ས་ཀྐཱ ས་མ་ཎ་དྷ་མྨོ ཀཱ་ཏུཾ, ཝ་ཏྟ་མེ་ཝ ཝཱ ཨེ་ཏཾ པ་བྦ་ཛི་ཏཱ་ནཾ.
ཨ་ཐ ཏེ་ན པ་ཊི་ཝ་ཙ་ནེ དི་ནྣེ ‘‘ཨ་ནུ་རུ་དྡྷཱ ཏུ་མྷེ རཱ་ཛ་པ་བྦ་ཛི་ཏཱ མ་ཧཱ་པུ་ཉྙཱ, མ་ནུ་སྶཱ ཏུ་མྷཱ་ཀཾ ཨ་ར་ཉྙེ ཝ་ས་ནྟཱ་ནཾ ཨ་ད་ཏྭཱ ཀ་སྶ ཨ་ཉྙ་སྶ དཱ་ཏ་བྦཾ མ་ཉྙི་སྶ་ནྟི, ཏུ་མྷེ པ་ན ཨེ་ཏཾ བྷུ་ཉྫི་ཏྭཱ ཀིཾ ནུ ཁོ མི་ག་པོ་ཏ་ཀཱ ཝི་ཡ ཨ་ཉྙ་མ་ཉྙཾ གྷ་ཊྚེ་ནྟཱ ཝི་ཧ་ར་ཐ, ཨུ་དཱ་ཧུ སཱ་མ་གྒི་བྷཱ་ཝོ ཝོ ཨ་ཏྠཱི’’ཏི སཱ་མ་གྒི་ར་སཾ པུ་ཙྪ་ནྟོ ‘‘ཀ་ཙྩི པ་ན ཝོ ཨ་ནུ་རུ་དྡྷཱ ས་མ་གྒཱ’’ཏི་ཨཱ་དི་མཱ་ཧ. ཏ་ཏྠ ཁཱི་རོ་ད་ཀཱི་བྷཱུ་ཏཱཏི ཡ་ཐཱ ཁཱི་ར་ཉྩ ཨུ་ད་ཀ་ཉྩ ཨ་ཉྙ་མ་ཉྙཾ སཾ་ས་ནྡ་ཏི, ཝི་སུཾ ན ཧོ་ཏི, ཨེ་ཀ་ཏྟཾ ཝི་ཡ ཨུ་པེ་ཏི, ཀ་ཙྩི ཨེ་ཝཾ སཱ་མ་གྒི་ཝ་སེ་ན ཨེ་ཀ་ཏྟུ་པ་ག་ཏ་ཙི་ཏྟུ་པྤཱ་དཱ ཝི་ཧ་ར་ཐཱ་ཏི པུ་ཙྪ་ཏི. པི་ཡ་ཙ་ཀྑཱུ་ཧཱིཏི མེ་ཏྟ་ཙི་ཏྟཾ པ་ཙྩུ་པ་ཊྛཱ་པེ་ཏྭཱ ཨོ་ལོ་ཀ་ན་ཏོ པི་ཡ་བྷཱ་ཝ་དཱི་པ་ཀཱ་ནི ཙ་ཀྑཱུ་ནི པི་ཡ་ཙ་ཀྑཱུ་ནི ནཱ་མ, ‘‘ཀ་ཙྩི ཏ་ཐཱ་རཱུ་པེ་ཧི ཙ་ཀྑཱུ་ཧི ཨ་ཉྙ་མ་ཉྙཾ པ་སྶ་ནྟཱ ཝི་ཧ་ར་ཐཱ’’ཏི པུ་ཙྪ་ཏི. ཏ་གྒྷཱཏི ཨེ་ཀཾ་ས་ཏྠེ ནི་པཱ་ཏོ, ཨེ་ཀཾ་སེ་ན མ་ཡཾ བྷ་ནྟེ་ཏི ཝུ་ཏྟཾ ཧོ་ཏི. ཡ་ཐཱ ཀ་ཐཾ པ་ནཱཏི ཨེ་ཏྠ ཡ་ཐཱཏི ནི་པཱ་ཏ་མ་ཏྟཾ, ཀ་ཐནྟི ཀཱ་ར་ཎ་པུ་ཙྪཱ, ཀ་ཐཾ པ་ན ཏུ་མྷེ ཨེ་ཝཾ ཝི་ཧ་ར་ཐ, ཀེ་ན ཀཱ་ར་ཎེ་ན ཝི་ཧ་ར་ཐ, ཏཾ མེ ཀཱ་ར་ཎཾ བྲཱུ་ཧཱི་ཏི ཝུ་ཏྟཾ ཧོ་ཏི.
མེ་ཏྟཾ ཀཱ་ཡ་ཀ་མྨནྟི མེ་ཏྟ་ཙི་ཏྟ་ཝ་སེ་ན པ་ཝ་ཏྟཾ ཀཱ་ཡ་ཀ་མྨཾ. ཨཱ་ཝི ཙེ་ཝ ར་ཧོ ཙཱཏི ས་མྨུ་ཁཱ ཙེ་ཝ པ་ར་མྨུ་ཁཱ ཙ. ཨི་ཏ་རེ་སུ་པི ཨེ་སེ་ཝ ན་ཡོ. ཏ་ཏྠ ས་མྨུ་ཁཱ ཀཱ་ཡ་ཝ་ཙཱི་ཀ་མྨཱ་ནི ས་ཧ་ཝཱ་སེ ལ་བྦྷ་ནྟི, ཨི་ཏ་རཱ་ནི ཝི་པྤ་ཝཱ་སེ, མ་ནོ་ཀ་མྨཾ ས་བྦ་ཏྠ ལ་བྦྷ་ཏི. ཡ་ཉྷི ས་ཧེ་ཝ ཝ་ས་ནྟེ་སུ ཨེ་ཀེ་ན མ་ཉྩ་པཱི་ཋཾ ཝཱ དཱ་རུ་བྷ་ཎྜཾ ཝཱ མ་ཏྟི་ཀཱ་བྷ་ཎྜཾ ཝཱ བ་ཧི དུ་ནྣི་ཀྑི་ཏྟཾ ཧོ་ཏི, ཏཾ དི་སྭཱ ‘‘ཀེ་ནི་དཾ ཝ་ལ༹་ཉྫི་ཏ’’ནྟི ཨ་ཝ་ཉྙཾ ཨ་ཀ་ཏྭཱ ཨ་ཏྟ་ནཱ དུ་ནྣི་ཀྑི་ཏྟཾ ཝི་ཡ ག་ཧེ་ཏྭཱ པ་ཊི་སཱ་མེ་ནྟ་སྶ པ་ཊི་ཛ་གྒི་ཏ་བྦ་ཡུ་ཏྟཾ ཝཱ པ་ན ཋཱ་ནཾ པ་ཊི་ཛ་གྒ་ནྟ་སྶ ས་མྨུ་ཁཱ མེ་ཏྟཾ ཀཱ་ཡ་ཀ་མྨཾ ནཱ་མ ཧོ་ཏི. ཨེ་ཀ་སྨིཾ པ་ཀྐ་ནྟེ ཏེ་ན དུ་ནྣི་ཀྑི་ཏྟཾ སེ་ནཱ་ས་ན་པ་རི་ཀྑཱ་རཾ ཏ་ཐེ་ཝ ནི་ཀྑི་པ་ནྟ་སྶ པ་ཊི་ཛ་གྒི་ཏ་བྦ་ཡུ་ཏྟཾ ཝཱ པ་ན ཋཱ་ནཾ པ་ཊི་ཛ་གྒ་ནྟ་སྶ པ་ར་མྨུ་ཁཱ མེ་ཏྟཾ ཀཱ་ཡ་ཀ་མྨཾ ནཱ་མ ཧོ་ཏི. ས་ཧ་ཝ་ས་ནྟ་སྶ པ་ན ཐེ་རེ་ཧི ས་དྡྷིཾ མ་དྷུ་རཾ ས་མྨོ་ད་ནཱི་ཡ་ཀ་ཐཾ པ་ཊི་ས་ནྠཱ་ར་ཀ་ཐཾ སཱ་ར་ཎཱི་ཡ་ཀ་ཐཾ དྷ་མྨ་ཀ་ཐཾ ས་ར་བྷ་ཉྙཾ སཱ་ཀ་ཙྪཾ པ་ཉྷ་པུ་ཙྪ་ནཾ པ་ཉྷ་ཝི་སྶ་ཛྫ་ན་ནྟི ཨེ་ཝ་མཱ་དི་ཀ་ར་ཎེ ས་མྨུ་ཁཱ མེ་ཏྟཾ ཝ་ཙཱི་ཀ་མྨཾ ནཱ་མ ཧོ་ཏི. ཐེ་རེ་སུ པ་ན པ་ཀྐ་ནྟེ་སུ ‘‘མ་ཡ྄ཧཾ པི་ཡ་ས་ཧཱ་ཡོ ན་ནྡི་ཡ་ཏྠེ་རོ ཀི་མི་ལ་ཏྠེ་རོ ཨེ་ཝཾ སཱི་ལ་ས་མྤ་ནྣོ ཨེ་ཝཾ ཨཱ་ཙཱ་ར་ས་མྤ་ནྣོ’’ཏི་ཨཱ་དི་གུ་ཎ་ཀ་ཐ་ནེ པ་ར་མྨུ་ཁཱ མེ་ཏྟཾ ཝ་ཙཱི་ཀ་མྨཾ ནཱ་མ ཧོ་ཏི. ‘‘མ་ཡ྄ཧཾ པི་ཡ་མི་ཏྟོ ན་ནྡི་ཡ་ཏྠེ་རོ ཀི་མི་ལ་ཏྠེ་རོ ཨ་ཝེ་རོ ཧོ་ཏུ ཨ་བྱཱ་པ་ཛྫོ སུ་ཁཱི’’ཏི ཨེ་ཝཾ ས་མ་ནྣཱ་ཧ་ར་ཏོ པ་ན ས་མྨུ་ཁཱ་པི པ་ར་མྨུ་ཁཱ་པི མེ་ཏྟཾ མ་ནོ་ཀ་མྨཾ ཧོ་ཏི་ཡེ་ཝ.
ནཱ་ནཱ ཧི ཁོ ནོ བྷ་ནྟེ ཀཱ་ཡཱཏི ཨ་ཡ་ཉྷི ཀཱ་ཡོ པི་ཊྛཾ ཝི་ཡ མ་ཏྟི་ཀཱ ཝི་ཡ ཙ ཨོ་མ་དྡི་ཏྭཱ ཨེ་ཀ་ཏོ ཀཱ་ཏུཾ ན ས་ཀྐཱ. ཨེ་ཀ་ཉྩ པ་ན མ་ཉྙེ ཙི་ཏྟནྟི ཙི་ཏྟཾ པ་ན ནོ ཨ་ཏྟ་ནོ ཝི་ཡ ཨ་ཉྙ་མ་ཉྙ་སྶ ཧི་ཏ་བྷཱ་ཝེ་ན ཨ་ཝི་རོ་དྷ་བྷཱ་ཝེ་ན བྷེ་དཱ་བྷཱ་ཝེ་ན ས་མ་གྒ་བྷཱ་ཝེ་ན ཨེ་ཀ་མེ་ཝཱ་ཏི ད་སྶེ་ཏི. ཀ་ཐཾ པ་ནེ་ཏེ ས་ཀཾ ཙི་ཏྟཾ ནི་ཀྑི་པི་ཏྭཱ ཨི་ཏ་རེ་སཾ ཙི་ཏྟ་ཝ་སེ་ན ཝ་ཏྟིཾ་སཱུ་ཏི? ཨེ་ཀ་སྶ པ་ཏྟེ མ་ལཾ ཨུ་ཊྛ་ཧ་ཏི, ཨེ་ཀ་སྶ ཙཱི་ཝ་རཾ ཀི་ལི་ཊྛཾ ཧོ་ཏི, ཨེ་ཀ་སྶ པ་རི་བྷ་ཎྜ་ཀ་མྨཾ ཧོ་ཏི. ཏ་ཏྠ ཡ་སྶ པ་ཏྟེ མ་ལཾ ཨུ་ཊྛི་ཏཾ, ཏེ་ན ‘‘མ་མཱ་ཝུ་སོ པ་ཏྟེ མ་ལཾ ཨུ་ཊྛི་ཏཾ, པ་ཙི་ཏུཾ ཝ་ཊྚ་ཏཱི’’ཏི ཝུ་ཏྟེ ཨི་ཏ་རེ ‘‘མ་ཡ྄ཧཾ ཙཱི་ཝ་རཾ ཀི་ལི་ཊྛཾ དྷོ་ཝི་ཏ་བྦཾ, མ་ཡ྄ཧཾ པ་རི་བྷ་ཎྜཾ ཀཱ་ཏ་བྦ’’ནྟི ཨ་ཝ་ཏྭཱ ཨ་ར་ཉྙཾ པ་ཝི་སི་ཏྭཱ དཱ་རཱུ་ནི ཨཱ་ཧ་རི་ཏྭཱ བྷི་ནྡི་ཏྭཱ པ་ཏྟ་ཀ་ཊཱ་ཧེ བ་ཧ་ལ་ཏ་ནུ་མ་ཏྟི་ཀཱ་ཧི ལེ་པཾ ཀ་ཏྭཱ པ་ཏྟཾ པ་ཙི་ཏྭཱ ཏ་ཏོ པ་རཾ ཙཱི་ཝ་རཾ ཝཱ དྷོ་ཝ་ནྟི, པ་རི་བྷ་ཎྜཾ ཝཱ ཀ་རོ་ནྟི. ‘‘མ་མཱ་ཝུ་སོ ཙཱི་ཝ་རཾ ཀི་ལི་ཊྛཾ, དྷོ་ཝི་ཏུཾ ཝ་ཊྚ་ཏཱི’’ཏི ‘‘མ་མ པ་ཎྞ་སཱ་ལཱ ཨུ་ཀླཱ་པཱ, པ་རི་བྷ་ཎྜཾ ཀཱ་ཏུཾ ཝ་ཊྚ་ཏཱི’’ཏི པ་ཋ་མ་ཏ་རཾ ཨཱ་རོ་ཙི་ཏེ་པི ཨེ་སེ་ཝ ན་ཡོ.
ཨི་དཱ་ནི ཏེ་སཾ ཨ་པྤ་མཱ་ད་ལ་ཀྑ་ཎཾ པུ་ཙྪ་ནྟོ ‘‘ཀ་ཙྩི པ་ན ཝོ ཨ་ནུ་རུ་དྡྷཱ’’ཏི་ཨཱ་དི་མཱ་ཧ. ཏ་ཏྠ ཝོཏི ནི་པཱ་ཏ་མ་ཏྟཾ, པ་ཙྩ་ཏྟ་ཝ་ཙ་ནཾ ཝཱ, ཀ་ཙྩི ཏུ་མྷེ་ཏི ཨ་ཏྠོ. ཨ་མྷཱ་ཀནྟི ཨ་མྷེ་སུ ཏཱི་སུ ཛ་ནེ་སུ. པི་ཎྜཱ་ཡ པ་ཊི་ཀྐ་མ་ཏཱིཏི གཱ་མེ པི་ཎྜཱ་ཡ ཙ་རི་ཏྭཱ པ་ཙྩཱ་ག་ཙྪ་ཏི. ཨ་ཝ་ཀྐཱ་ར་པཱ་ཏིནྟི ཨ་ཏི་རེ་ཀ་པི་ཎྜ་པཱ་ཏཾ ཨ་པ་ནེ་ཏྭཱ ཋ་པ་ན་ཏྠཱ་ཡ ཨེ་ཀཾ ས་མུ་གྒ་པཱ་ཏིཾ དྷོ་ཝི་ཏྭཱ ཋ་པེ་ཏི. ཡོ པ་ཙྪཱཏི ཏེ ཀི་ར ཐེ་རཱ ན ཨེ་ཀ་ཏོ་ཝ བྷི་ཀྑཱ་ཙཱ་རཾ པ་ཝི་ས་ནྟི. ཕ་ལ་ས་མཱ་པ་ཏྟི་ར་ཏཱ ཧེ་ཏེ པཱ་ཏོ་ཝ ས་རཱི་ར་པ་ཊི་ཛ་གྒ་ནཾ ཀ་ཏྭཱ ཝ་ཏྟ་པ་ཊི་པ་ཏྟིཾ པཱུ་རེ་ཏྭཱ སེ་ནཱ་ས་ནཾ པ་ཝི་སི་ཏྭཱ ཀཱ་ལ་པ་རི་ཙྪེ་དཾ ཀ་ཏྭཱ ཕ་ལ་ས་མཱ་པ་ཏྟིཾ ཨ་པྤེ་ཏྭཱ ནི་སཱི་ད་ནྟི. ཏེ་སུ ཡོ པ་ཋ་མ་ཏ་རཾ ནི་སི་ནྣོ ཨ་ཏྟ་ནོ ཀཱ་ལ་པ་རི་ཙྪེ་ད་ཝ་སེ་ན པ་ཋ་མ་ཏ་རཾ ཨུ་ཊྛཱ་ཏི, སོ པི་ཎྜཱ་ཡ ཙ་རི་ཏྭཱ པ་ཊི་ནི་ཝ་ཏྟོ བྷ་ཏྟ་ཀི་ཙྩ་ཊྛཱ་ནཾ ཨཱ་ག་ནྟྭཱ ཛཱ་ནཱ་ཏི ‘‘དྭེ བྷི་ཀྑཱུ པ་ཙྪ་ཏོ, ཨ་ཧཾ པ་ཋ་མ་ཏ་རཾ ཨཱ་ག་ཏོ’’ཏི. ཨ་ཐ པ་ཏྟཾ པི་ད་ཧི་ཏྭཱ ཨཱ་ས་ན་པ་ཉྙཱ་པ་ནཱ་དཱི་ནི ཀ་ཏྭཱ ཡ་དི པ་ཏྟེ པ་ཊི་ཝཱི་ས་མ་ཏྟ་མེ་ཝ ཧོ་ཏི, ནི་སཱི་དི་ཏྭཱ བྷུ་ཉྫ་ཏི, ཡ་དི ཨ་ཏི་རེ་ཀཾ ཧོ་ཏི, ཨ་ཝ་ཀྐཱ་ར་པཱ་ཏི་ཡཾ པ་ཀྑི་པི་ཏྭཱ པཱ་ཏིཾ པི་དྷཱ་ཡ བྷུ་ཉྫ་ཏི, ཀ་ཏ་བྷ་ཏྟ་ཀི་ཙྩོ པ་ཏྟཾ དྷོ་ཝི་ཏྭཱ ཝོ་ད་ཀཾ ཀ་ཏྭཱ ཐ་ཝི་ཀཱ་ཡ ཨོ་སཱ་པེ་ཏྭཱ པ་ཏྟ་ཙཱི་ཝ་རཾ ག་ཧེ་ཏྭཱ ཨ་ཏྟ་ནོ ཝ་ས་ན་ཊྛཱ་ནཾ པ་ཝི་ས་ཏི.
དུ་ཏི་ཡོ་པི ཨཱ་ག་ནྟྭཱ་ཝ ཛཱ་ནཱ་ཏི ‘‘ཨེ་ཀོ པ་ཋ་མཾ ཨཱ་ག་ཏོ, ཨེ་ཀོ པ་ཙྪ་ཏོ’’ཏི. སོ ས་ཙེ པ་ཏྟེ བྷ་ཏྟཾ པ་མཱ་ཎ་མེ་ཝ ཧོ་ཏི, བྷུ་ཉྫ་ཏི. ས་ཙེ མ་ནྡཾ, ཨ་ཝ་ཀྐཱ་ར་པཱ་ཏི་ཏོ ག་ཧེ་ཏྭཱ བྷུ་ཉྫ་ཏི. ས་ཙེ ཨ་ཏི་རེ་ཀཾ ཧོ་ཏི, ཨ་ཝ་ཀྐཱ་ར་པཱ་ཏི་ཡཾ པ་ཀྑི་པི་ཏྭཱ པ་མཱ་ཎ་མེ་ཝ བྷུ་ཉྫི་ཏྭཱ པུ་རི་མ་ཏྠེ་རོ ཝི་ཡ ཝ་ས་ན་ཊྛཱ་ནཾ པ་ཝི་ས་ཏི. ཏ་ཏི་ཡོ་པི ཨཱ་ག་ནྟྭཱ་ཝ ཛཱ་ནཱ་ཏི ‘‘དྭེ པ་ཋ་མཾ ཨཱ་ག་ཏཱ, ཨ་ཧཾ པ་ཙྪི་མོ’’ཏི. སོ་པི དུ་ཏི་ཡ་ཏྠེ་རོ ཝི་ཡ བྷུ་ཉྫི་ཏྭཱ ཀ་ཏ་བྷ་ཏྟ་ཀི་ཙྩོ པ་ཏྟཾ དྷོ་ཝི་ཏྭཱ ཝོ་ད་ཀཾ ཀ་ཏྭཱ ཐ་ཝི་ཀཱ་ཡ ཨོ་སཱ་པེ་ཏྭཱ ཨཱ་ས་ནཱ་ནི ཨུ་ཀྑི་པི་ཏྭཱ པ་ཊི་སཱ་མེ་ཏི, པཱ་ནཱི་ཡ་གྷ་ཊེ ཝཱ པ་རི་བྷོ་ཛ་ནཱི་ཡ་གྷ་ཊེ ཝཱ ཨ་ཝ་སེ་ས་ཨུ་ད་ཀཾ ཚ་ཌྜེ་ཏྭཱ གྷ་ཊེ ནི་ཀུ་ཛྫི་ཏྭཱ ཨ་ཝ་ཀྐཱ་ར་པཱ་ཏི་ཡཾ ས་ཙེ ཨ་ཝ་སེ་ས་བྷ་ཏྟཾ ཧོ་ཏི, ཏཾ ཝུ་ཏྟ་ན་ཡེ་ན ཛ་ཧི་ཏྭཱ པཱ་ཏིཾ དྷོ་ཝི་ཏྭཱ པ་ཊི་སཱ་མེ་ཏི, བྷ་ཏྟ་གྒཾ ས་མྨ་ཛྫ་ཏི, སོ ཀ་ཙ་ཝ་རཾ ཚ་ཌྜེ་ཏྭཱ ས་མྨ་ཛྫ་ནིཾ ཨུ་ཀྑི་པི་ཏྭཱ ཨུ་པ་ཙི་ཀཱ་ཧི མུ་ཏྟ་ཊྛཱ་ནེ ཋ་པེ་ཏྭཱ པ་ཏྟ་ཙཱི་ཝ་ར་མཱ་དཱ་ཡ ཝ་ས་ན་ཊྛཱ་ནཾ པ་ཝི་ས་ཏི. ཨི་དཾ ཐེ་རཱ་ནཾ བ་ཧི་ཝི་ཧཱ་རེ ཨ་ར་ཉྙེ བྷ་ཏྟ་ཀི་ཙྩ་ཀ་ར་ཎ་ཊྛཱ་ནེ བྷོ་ཛ་ན་སཱ་ལཱ་ཡ ཝ་ཏྟཾ. ཨི་དཾ ས་ནྡྷཱ་ཡ ‘‘ཡོ པ་ཙྪཱ’’ཏི་ཨཱ་དི ཝུ་ཏྟཾ.
ཡོ པ་སྶ་ཏཱིཏི་ཨཱ་དི པ་ན ནེ་སཾ ཨ་ནྟོ་ཝི་ཧཱ་རེ ཝ་ཏྟ་ནྟི ཝེ་དི་ཏ་བྦཾ. ཏ་ཏྠ ཝ་ཙྩ་གྷ་ཊནྟི ཨཱ་ཙ་མ་ན་ཀུ་མྦྷིཾ. རི་ཏྟནྟི རི་ཏྟ་ཀཾ. ཏུ་ཙྪནྟི ཏ་སྶེ་ཝ ཝེ་ཝ་ཙ་ནཾ. ཨ་ཝི་ས་ཡ྄ཧནྟི ཨུ་ཀྑི་པི་ཏུཾ ཨ་ས་ཀྐུ་ཎེ་ཡྻཾ ཨ་ཏི་བྷཱ་རི་ཡཾ. ཧ་ཏྠ་ཝི་ཀཱ་རེ་ནཱཏི ཧ་ཏྠ་ས་ཉྙཱ་ཡ. ཏེ ཀི་ར པཱ་ནཱི་ཡ་གྷ་ཊཱ་དཱི་སུ ཡཾ་ཀི་ཉྩི ཏུ་ཙྪ་ཀཾ ག་ཧེ་ཏྭཱ པོ་ཀྑ་ར་ཎིཾ ག་ནྟྭཱ ཨ་ནྟོ ཙ བ་ཧི ཙ དྷོ་ཝི་ཏྭཱ ཨུ་ད་ཀཾ པ་རི་སྶཱ་ཝེ་ཏྭཱ ཏཱི་རེ ཋ་པེ་ཏྭཱ ཨ་ཉྙཾ བྷི་ཀྑུཾ ཧ་ཏྠ་ཝི་ཀཱ་རེ་ན ཨཱ་མ་ནྟེ་ནྟི, ཨོ་དི་སྶ ཝཱ ཨ་ནོ་དི་སྶ ཝཱ ས་དྡཾ ན ཀ་རོ་ནྟི. ཀ་སྨཱ ཨོ་དི་སྶ ན ཀ་རོ་ནྟི? ཏ་ཉྷི བྷི་ཀྑུཾ ས་དྡོ བཱ་དྷེ་ཡྻཱ་ཏི. ཀ་སྨཱ ཨ་ནོ་དི་སྶ ན ཀ་རོ་ནྟི? ཨ་ནོ་དི་སྶ ས་དྡེ དི་ནྣེ ‘‘ཨ་ཧཾ པུ་རེ, ཨ་ཧཾ པུ་རེ’’ཏི དྭེ་པི ནི་ཀྑ་མེ་ཡྻུཾ. ཏ་ཏོ དྭཱི་ཧི ཀ་ཏྟ་བྦ་ཀ་མྨེ ཏ་ཏི་ཡ་སྶ ཀ་མྨ་ཙྪེ་དོ བྷ་ཝེ་ཡྻ. སཾ་ཡ་ཏ་པ་ད་ས་དྡོ པ་ན ཧུ་ཏྭཱ ཨ་པ་ར་སྶ བྷི་ཀྑུ་ནོ དི་ཝཱ་ཊྛཱ་ན་ས་ནྟི་ཀཾ ག་ནྟྭཱ ཏེ་ན དི་ཊྛ་བྷཱ་ཝཾ ཉ་ཏྭཱ ཧ་ཏྠ་ས་ཉྙཾ ཀ་རོ་ཏི, ཏཱ་ཡ ས་ཉྙཱ་ཡ ཨི་ཏ་རོ ཨཱ་ག་ཙྪ་ཏི, ཏ་ཏོ དྭེ ཛ་ནཱ ཧ་ཏྠེ་ན ཧ་ཏྠཾ སཾ་སི་བྦ་ནྟཱ དྭཱི་སུ ཧ་ཏྠེ་སུ ཋ་པེ་ཏྭཱ ཨུ་ཊྛཱ་པེ་ནྟི. ཏཾ ས་ནྡྷཱ་ཡཱ་ཧ ‘‘ཧ་ཏྠ་ཝི་ཀཱ་རེ་ན དུ་ཏི་ཡཾ ཨཱ་མ་ནྟེ་ཏྭཱ ཧ་ཏྠ་ཝི་ལ་ངྒྷ་ཀེ་ན ཨུ་པ་ཊྛཱ་པེ་མཱ’’ཏི.
པ་ཉྩཱ་ཧི་ཀཾ ཁོ པ་ནཱཏི ཙཱ་ཏུ་དྡ་སེ པ་ནྣ་ར་སེ ཨ་ཊྛ་མི་ཡ་ནྟི ཨི་དཾ ཏཱ་ཝ པ་ཀ་ཏི་དྷ་མྨ་སྶ་ཝ་ན་མེ་ཝ, ཏཾ ཨ་ཁ་ཎྜཾ ཀ་ཏྭཱ པ་ཉྩ་མེ པ་ཉྩ་མེ དི་ཝ་སེ དྭེ ཐེ་རཱ ནཱ་ཏི་ཝི་ཀཱ་ལེ ན་ཧཱ་ཡི་ཏྭཱ ཨ་ནུ་རུ་དྡྷ་ཏྠེ་ར་སྶ ཝ་ས་ན་ཊྛཱ་ནཾ ག་ཙྪ་ནྟི. ཏ་ཏྠ ཏ་ཡོ་པི ནི་སཱི་དི་ཏྭཱ ཏི་ཎྞཾ པི་ཊ་ཀཱ་ནཾ ཨ་ཉྙ་ཏ་ར་སྨིཾ ཨ་ཉྙ་མ་ཉྙཾ པ་ཉྷཾ པུ་ཙྪ་ནྟི, ཨ་ཉྙ་མ་ཉྙཾ ཝི་སྶ་ཛྫེ་ནྟི. ཏེ་སཾ ཨེ་ཝཾ ཀ་རོ་ནྟཱ་ནཾ་ཡེ་ཝ ཨ་རུ་ཎཾ ཨུ་གྒ་ཙྪ་ཏི. ཏཾ ས་ནྡྷཱ་ཡེ་ཏཾ ཝུ་ཏྟཾ. ཨེ་ཏྟཱ་ཝ་ཏཱ ཐེ་རེ་ན བྷ་ག་ཝ་ཏཱ ཨ་པྤ་མཱ་ད་ལ་ཀྑ་ཎཾ པུ་ཙྪི་ཏེ་ན པ་མཱ་ད་ཊྛཱ་ནེ་སུ་ཡེ་ཝ ཨ་པྤ་མཱ་ད་ལ་ཀྑ་ཎཾ ཝི་སྶ་ཛྫི་ཏཾ ཧོ་ཏི. ཨ་ཉྙེ་ས་ཉྷི བྷི་ཀྑཱུ་ནཾ བྷི་ཀྑཱ་ཙཱ་ར་པ་ཝི་ས་ན་ཀཱ་ལོ ནི་ཀྑ་མ་ན་ཀཱ་ལོ ནི་ཝཱ་ས་ན་པ་རི་ཝ་ཏྟ་ནཾ ཙཱི་ཝ་ར་པཱ་རུ་པ་ནཾ ཨ་ནྟོ་གཱ་མེ པི་ཎྜཱ་ཡ ཙ་ར་ཎཾ དྷ་མྨ་ཀ་ཐ་ནཾ ཨ་ནུ་མོ་ད་ནཾ ཨ་ནྟོ་གཱ་མ་ཏོ ནི་ཀྑ་མི་ཏྭཱ བྷ་ཏྟ་ཀི་ཙྩ་ཀ་ར་ཎཾ པ་ཏྟ་དྷོ་ཝ་ནཾ པ་ཏྟ་ཨོ་སཱ་པ་ནཾ པ་ཏྟ་ཙཱི་ཝ་ར་པ་ཊི་སཱ་མ་ན་ནྟི པ་པ་ཉྩ་ཀ་ར་ཎ་ཊྛཱ་ནཱ་ནི ཨེ་ཏཱ་ནི. ཏ་སྨཱ ཐེ་རོ ‘‘ཨ་མྷཱ་ཀཾ ཨེ་ཏྟ་ཀཾ ཋཱ་ནཾ མུ་ཉྩི་ཏྭཱ ཝི་སྶ་ཊྛ་ཀ་ཐཱ་པ་ཝ་ཏྟ་ནེ་ན ཀ་མྨ་ཊྛཱ་ནེ པ་མ་ཛྫ་ན་ཊྛཱ་ནཱ་ནི, ཏ་ཏྠཱ་པི མ་ཡཾ, བྷ་ནྟེ, ཀ་མྨ་ཊྛཱ་ན་ཝི་རུ་དྡྷཾ ན པ་ཊི་པ་ཛྫཱ་མཱ’’ཏི ཨ་ཉྙེ་སཾ པ་མཱ་ད་ཊྛཱ་ནེ་སུ་ཡེ་ཝ སི་ཁཱ་པྤ་ཏྟཾ ཨ་ཏྟ་ནོ ཨ་པྤ་མཱ་ད་ལ་ཀྑ་ཎཾ ཝི་སྶ་ཛྫེ་སི. ཨི་མི་ནཱ་ཝ ཨེ་ཏཱ་ནི ཋཱ་ནཱ་ནི མུ་ཉྩི་ཏྭཱ ཨ་ཉྙ་ཏྠ ཝི་ཧཱ་ར་ས་མཱ་པ་ཏྟཱི་ནཾ ཨ་ཝ་ལ༹་ཉྫ་ན་ཝ་སེ་ན པ་མཱ་ད་ཀཱ་ལོ ནཱ་མ ཨ་མྷཱ་ཀཾ ན་ཏྠཱི་ཏི དཱི་པེ་ཏི.
པཱ་ཙཱི་ན་ཝཾ་ས་དཱ་ཡ་ག་མ་ན་ཀ་ཐཱ་ཝ་ཎྞ་ནཱ ནི་ཊྛི་ཏཱ.
པཱ་ལི་ལེ་ཡྻ་ཀ་ག་མ་ན་ཀ་ཐཱ་ཝ་ཎྞ་ནཱ
༤༦༧. དྷ་མྨི་ཡཱ ཀ་ཐཱ་ཡཱཏི ས་མ་གྒ་ཝཱ་སེ ཨཱ་ནི་སཾ་ས་པ་ཊི་སཾ་ཡུ་ཏྟཱ་ཡ དྷ་མྨ་ཀ་ཐཱ་ཡ. ཨ་ནུ་པུ་བྦེ་ན (ཨུ་དཱ. ཨ་ཊྛ. ༣༥) ཙཱ་རི་ཀཾ ཙ་ར་མཱ་ནོཏི ཨ་ནུ་ཀྐ་མེ་ན གཱ་མ་ནི་ག་མ་པ་ཊི་པཱ་ཊི་ཡཱ ཙཱ་རི་ཀཾ ཙ་ར་མཱ་ནོ. ཡེ་ན པཱ་ལི་ལེ་ཡྻ་ཀཾ ཏ་ད་ཝ་ས་རཱིཏི ཨེ་ཀ་ཀོ་ཝ ཡེ་ན པཱ་ལི་ལེ་ཡྻ་ཀ་གཱ་མོ, ཏཾ ཨ་ཝ་ས་རི. པཱ་ལི་ལེ་ཡྻ་ཀ་གཱ་མ་ཝཱ་སི་ནོ་པི པ་ཙྩུ་གྒ་ནྟྭཱ བྷ་ག་ཝ་ཏོ དཱ་ནཾ ད་ཏྭཱ པཱ་ལི་ལེ་ཡྻ་ཀ་གཱ་མ་སྶ ཨ་ཝི་དཱུ་རེ ར་ཀྑི་ཏ་ཝ་ན་ས་ཎྜོ ནཱ་མ ཨ་ཏྠི, ཏ་ཏྠ བྷ་ག་ཝ་ཏོ པ་ཎྞ་སཱ་ལཾ ཀ་ཏྭཱ ‘‘ཨེ་ཏྠ བྷ་ག་ཝཱ ཝ་ས་ཏཱུ’’ཏི ཡཱ་ཙི་ཏྭཱ ཝཱ་ས་ཡིཾ་སུ. བྷ་དྡ་སཱ་ལོཏི པ་ན ཏ་ཏྠེ་ཀོ མ་ནཱ་པོ ལ་ཊྛི་ཀོ སཱ་ལ་རུ་ཀྑོ. བྷ་ག་ཝཱ ཏཾ གཱ་མཾ ཨུ་པ་ནི་སྶཱ་ཡ ཝ་ན་ས་ཎྜེ པ་ཎྞ་སཱ་ལཱ་ཡ ས་མཱི་པེ ཏ་སྨིཾ རུ་ཀྑ་མཱུ་ལེ ཝི་ཧཱ་སི. ཏེ་ན ཝུ་ཏྟཾ ‘‘པཱ་ལི་ལེ་ཡྻ་ཀེ ཝི་ཧ་ར་ཏི ར་ཀྑི་ཏ་ཝ་ན་ས་ཎྜེ བྷ་དྡ་སཱ་ལ་མཱུ་ལེ’’ཏི.
ཨ་ཐ ཁོ བྷ་ག་ཝ་ཏོ ར་ཧོ་ག་ཏ་སྶཱཏི་ཨཱ་དི བྷ་ག་ཝ་ཏོ ཝི་ཝེ་ཀ་སུ་ཁ་པ་ཙྩ་ཝེ་ཀྑ་ཎ་ད་སྶ་ནཾ. ཨཱ་ཀི་ཎྞོ ན ཕཱ་སུ ཝི་ཧཱ་སིནྟི ས་མྦཱ་དྷ་པྤ་ཏྟོ ཨཱ་ཀི་ཎྞོ ཝི་ཧཱ་སིཾ. ཀིཾ པ་ན བྷ་ག་ཝ་ཏོ ས་མྦཱ་དྷོ ཨ་ཏྠི སཾ་ས་གྒོ ཝཱ་ཏི? ན་ཏྠི. ན ཧི ཀོ་ཙི བྷ་ག་ཝ་ནྟཾ ཨ་ནི་ཙྪཱ་ཡ ཨུ་པ་ས་ངྐ་མི་ཏུཾ ས་ཀྐོ་ཏི. དུ་རཱ་ས་དཱ ཧི བུ་དྡྷཱ བྷ་ག་ཝ་ནྟོ ས་བྦ་ཏྠ ཙ ཨ་ནུ་པ་ལི་ཏྟཱ, ཧི་ཏེ་སི་ཏཱ་ཡ པ་ན ས་ཏྟེ་སུ ཨ་ནུ་ཀ་མྤཾ ཨུ་པཱ་དཱ་ཡ ‘‘མུ་ཏྟོ མོ་ཙེ་སྶཱ་མཱི’’ཏི པ་ཊི་ཉྙཱ་ནུ་རཱུ་པཾ ཙ་ཏུ་རོ་གྷ་ནི་ཏྠ་ར་ཎ་ཏྠཾ ཨ་ཊྛ་ནྣཾ པ་རི་སཱ་ནཾ ཨ་ཏྟ་ནོ ས་ནྟི་ཀཾ ཀཱ་ལེ་ན ཀཱ་ལཾ ཨུ་པ་ས་ངྐ་མ་ནཾ ཨ་དྷི་ཝཱ་སེ་ཏི, ས་ཡ་ཉྩ མ་ཧཱ་ཀ་རུ་ཎཱ་ས་མུ་སྶཱ་ཧི་ཏོ ཀཱ་ལ་ཉྙཱུ ཧུ་ཏྭཱ ཏ་ཏྠ ཨུ་པ་ས་ངྐ་མཱི་ཏི ཨི་དཾ ས་བྦ་བུ་དྡྷཱ་ནཾ ཨཱ་ཙི་ཎྞཾ. ནཱ་ཡ་མི་དྷ ཨཱ་ཀི་ཎྞ་ཝི་ཧཱ་རོ ཨ་དྷི་པྤེ་ཏོ, ཨི་དྷ པ་ན ཏེ་ཧི ཀ་ལ་ཧ་ཀཱ་ར་ཀེ་ཧི ཀོ་ས་མྦ་ཀ་བྷི་ཀྑཱུ་ཧི ས་དྡྷིཾ ཨེ་ཀ་ཝི་ཧཱ་རེ ཝཱ་སཾ ཝི་ཧཱ་སི, ཏ་དཱ ཝི་ནེ་ཏ་བྦཱ་བྷཱ་ཝ་ཏོ ཨཱ་ཀི་ཎྞ་ཝི་ཧཱ་རཾ ཀ་ཏྭཱ ཝུ་ཏྟཾ ‘‘ཨ་ཧཾ ཁོ པུ་བྦེ ཨཱ་ཀི་ཎྞོ ན ཕཱ་སུ ཝི་ཧཱ་སི’’ནྟི. ཏེ་ནེ་ཝཱ་ཧ ‘‘ཏེ་ཧི ཀོ་ས་མྦ་ཀེ་ཧི བྷི་ཀྑཱུ་ཧི བྷ་ཎྜ་ན་ཀཱ་ར་ཀེ་ཧཱི’’ཏི་ཨཱ་དི.
ད་ཧ་ར་པོ་ཏ་ཀེ་ཧཱིཏི ད་ཧ་རེ་ཧི ཧ་ཏྠི་པོ་ཏ་ཀེ་ཧི, ཡེ བྷི་ངྐཱ་ཏི་པི ཝུ་ཙྩ་ནྟི. ཏེ་ཧཱིཏི ཧ་ཏྠི་ཨཱ་དཱི་ཧི. ཀ་དྡ་མོ་ད་ཀཱ་ནཱིཏི ཀ་དྡ་མ་མི་སྶཱ་ནི ཨུ་ད་ཀཱ་ནི. ཨོ་གཱ་ཧཱཏི ཨེ་ཏྠ ‘‘ཨོ་གཱ་ཧ’’ནྟི་པི པཱ་ལི༹. ཨ་སྶཱཏི ཧ་ཏྠི་ནཱ་ག་སྶ. ཨུ་པ་ནི་གྷཾ་ས་ནྟི་ཡོཏི གྷ་ཊྚེ་ནྟི་ཡོ. ཨུ་པ་ནི་གྷཾ་སི་ཡ་མཱ་ནོ་པི ཨ་ཏྟ་ནོ ཨུ་ལཱ༹་ར་བྷཱ་ཝེ་ན ན ཀུ་ཛ྄ཛྷ་ཏི, ཏེ་ན ཏཱ གྷཾ་ས་ནྟི་ཡེ་ཝ. ཝཱུ་པ་ཀ་ཊྛོཏི ཝཱུ་པ་ཀ་ཊྛོ དཱུ་རཱི་བྷཱུ་ཏོ.
ཡཱུ་ཐཱཏི ཧ་ཏྠི་གྷ་ཊཱ་ཡ. ཡེ་ན བྷ་ག་ཝཱ ཏེ་ནུ་པ་ས་ངྐ་མཱིཏི སོ ཀི་ར ཧ་ཏྠི་ནཱ་གོ ཡཱུ་ཐ་ཝཱ་སེ ཨུ་ཀྐ་ཎྛི་ཏོ ཏཾ ཝ་ན་ས་ཎྜཾ པ་ཝི་ཊྛོ. ཏ་ཏྠ བྷ་ག་ཝ་ནྟཾ དི་སྭཱ གྷ་ཊ་ས་ཧ་སྶེ་ན ནི་བྦཱ་པི་ཏ་ས་ནྟཱ་པོ ཝི་ཡ ནི་བྦུ་ཏོ ཧུ་ཏྭཱ པ་ས་ནྣ་ཙི་ཏྟོ བྷ་ག་ཝ་ཏོ ས་ནྟི་ཀེ ཨ་ཊྛཱ་སི, ཏ་ཏོ པ་ཊྛཱ་ཡ ཝ་ཏྟ་སཱི་སེ ཋ་ཏྭཱ བྷ་དྡ་སཱ་ལ་སྶ པ་ཎྞ་སཱ་ལཱ་ཡ ཙ ས་མ་ནྟ་ཏོ ཨ་པྤ་ཧ་རི་ཏཾ ཀ་ཏྭཱ སཱ་ཁཱ་བྷ་ངྒེ་ན ས་མྨ་ཛྫ་ཏི, བྷ་ག་ཝ་ཏོ མུ་ཁ་དྷོ་ཝ་ནཾ དེ་ཏི, ན་ཧཱ་ནོ་ད་ཀཾ ཨཱ་ཧ་ར་ཏི, ད་ནྟ་ཀ་ཊྛཾ དེ་ཏི, ཨ་ར་ཉྙ་ཏོ མ་དྷུ་རཱ་ནི ཕ་ལཱ་ཕ་ལཱ་ནི ཨཱ་ཧ་རི་ཏྭཱ ས་ཏྠུ ཨུ་པ་ནེ་ཏི. ས་ཏྠཱ ཏཱ་ནི པ་རི་བྷུ་ཉྫ་ཏི. ཏེ་ན ཝུ་ཏྟཾ ‘‘སོ་ཎྜཱ་ཡ བྷ་ག་ཝ་ཏོ པཱ་ནཱི་ཡཾ པ་རི་བྷོ་ཛ་ནཱི་ཡཾ ཨུ་པ་ཊྛཱ་པེ་ཏཱི’’ཏི་ཨཱ་དི. སོ ཀི་ར སོ་ཎྜཱ་ཡ དཱ་རཱུ་ནི ཨཱ་ཧ་རི་ཏྭཱ ཨ་ཉྙ་མ་ཉྙཾ གྷཾ་སི་ཏྭཱ ཨ་གྒིཾ ཨུ་ཊྛཱ་པེ་ཏྭཱ དཱ་རཱུ་ནི ཛཱ་ལཱ་པེ་ཏྭཱ ཏ་ཏྠ པཱ་སཱ་ཎ་ཁ་ཎྜཱ་ནི ཏཱ་པེ་ཏྭཱ ཏཱ་ནི ད་ཎྜ་ཀེ་ཧི ཝ་ཊྚེ་ཏྭཱ སོ་ཎྜི་ཡཾ ཁི་པི་ཏྭཱ ཨུ་ད་ཀ་སྶ ཏ་ཏྟ་བྷཱ་ཝཾ ཉ་ཏྭཱ བྷ་ག་ཝ་ཏོ ས་ནྟི་ཀཾ ཨུ་པ་ག་ནྟྭཱ ཏི་ཊྛ་ཏི. བྷ་ག་ཝཱ ‘‘ཧ་ཏྠི་ནཱ་གོ མ་མ ན་ཧཱ་ནཾ ཨི་ཙྪ་ཏཱི’’ཏི ཏ་ཏྠ ག་ནྟྭཱ ན་ཧཱ་ན་ཀི་ཙྩཾ ཀ་རོ་ཏི. པཱ་ནཱི་ཡེ་པི ཨེ་སེ་ཝ ན་ཡོ. ཏ་སྨིཾ པ་ན སཱི་ཏ་ལེ ཛཱ་ཏེ ཨུ་པ་ས་ངྐ་མ་ཏི. ཏཾ ས་ནྡྷཱ་ཡ ཝུ་ཏྟཾ ‘‘སོ་ཎྜཱ་ཡ བྷ་ག་ཝ་ཏོ པཱ་ནཱི་ཡཾ པ་རི་བྷོ་ཛ་ནཱི་ཡཾ ཨུ་པ་ཊྛཱ་པེ་ཏཱི’’ཏི.
ཨ་ཏྟ་ནོ ཙ པ་ཝི་ཝེ་ཀཾ ཝི་དི་ཏྭཱཏི ཀེ་ཧི་ཙི ཨ་ནཱ་ཀི་ཎྞ་བྷཱ་ཝ་ལ་དྡྷཾ ཀཱ་ཡ་ཝི་ཝེ་ཀཾ ཛཱ་ནི་ཏྭཱ. ཨི་ཏ་རེ པ་ན ཝི་ཝེ་ཀཱ བྷ་ག་ཝ་ཏོ ས་བྦ་ཀཱ་ལཾ ཝི་ཛྫ་ནྟི་ཡེ་ཝ. ཨི་མཾ ཨུ་དཱ་ནཾ ཨུ་དཱ་ནེ་སཱིཏི ཨི་མཾ ཨ་ཏྟ་ནོ ཧ་ཏྠི་ནཱ་ག་སྶ ཙ ཝི་ཝེ་ཀཱ་བྷི་ར་ཏི་ཡཱ ས་མཱ་ན་ཛ྄ཛྷཱ་ས་ཡ་བྷཱ་ཝ་དཱི་པ་ནཾ ཨུ་དཱ་ནཾ ཨུ་དཱ་ནེ་སི.
གཱ་ཐཱ་ཡ པ་ན ཨེ་ཝ་མ་ཏྠ་ཡོ་ཛ་ནཱ ཝེ་དི་ཏ་བྦཱ (ཨུ་དཱ. ཨ་ཊྛ. ༣༥) – ཨེ་ཏཾ ཨཱི་སཱ་ད་ནྟ་སྶ ར་ཐ་ཨཱི་སཱ་ས་དི་ས་ད་ནྟ་སྶ ཧ་ཏྠི་ནཱ་ག་སྶ ཙི་ཏྟཾ ནཱ་གེ་ན བུ་དྡྷ་ནཱ་ག་སྶ ཙི་ཏྟེ་ན ས་མེ་ཏི སཾ་ས་ནྡ་ཏི. ཀ་ཐཾ ས་མེ་ཏི ཙེ? ཡ་དེ་ཀོ ར་མ་ཏཱི ཝ་ནེ, ཡ་སྨཱ བུ་དྡྷ་ནཱ་གོ ‘‘ཨ་ཧཾ ཁོ པུ་བྦེ ཨཱ་ཀི་ཎྞོ ཝི་ཧཱ་སི’’ནྟི པུ་རི་མཾ ཨཱ་ཀི་ཎྞ་ཝི་ཧཱ་རཾ ཛི་གུ་ཙྪི་ཏྭཱ ཝི་ཝེ་ཀཾ ཨུ་པ་བྲཱུ་ཧ་ཡ་མཱ་ནོ ཨི་དཱ་ནི ཡ་ཐཱ ཨེ་ཀོ ཨ་དུ་ཏི་ཡོ ཝ་ནེ ཨ་ར་ཉྙེ ར་མ་ཏི ཨ་བྷི་ར་མ་ཏི, ཨེ་ཝཾ ཨ་ཡ་མྤི ཧ་ཏྠི་ནཱ་གོ པུ་བྦེ ཨ་ཏྟ་ནོ ཧ་ཏྠི་ཨཱ་དཱི་ཧི ཨཱ་ཀི་ཎྞ་ཝི་ཧཱ་རཾ ཛི་གུ་ཙྪི་ཏྭཱ ཨི་དཱ་ནི ཨེ་ཀོ ཨ་ས་ཧཱ་ཡོ ཝ་ནེ ཨེ་ཀ་ཝི་ཧཱ་རཾ ར་མ་ཏི ཨ་བྷི་ན་ནྡ་ཏི, ཏ་སྨཱ་སྶ ཙི་ཏྟཾ ནཱ་གེ་ན ས་མེ་ཏི, ཏ་སྶ ཙི་ཏྟེ་ན ས་མེ་ཏཱི་ཏི ཀ་ཏྭཱ ཨེ་ཀཱི་བྷཱ་ཝ་ར་ཏི་ཡཱ ཨེ་ཀ་ས་དི་སཾ ཧོ་ཏཱི་ཏི ཨ་ཏྠོ.
པཱ་ལི་ལེ་ཡྻ་ཀ་ག་མ་ན་ཀ་ཐཱ་ཝ་ཎྞ་ནཱ ནི་ཊྛི་ཏཱ.
ཨ་ཊྛཱ་ར་ས་ཝ་ཏྠུ་ཀ་ཐཱ་ཝ་ཎྞ་ནཱ
༤༧༣. ཡོ པ་ཊི་བཱ་ཧེ་ཡྻ, ཨཱ་པ་ཏྟི དུ་ཀྐ་ཊ་སྶཱཏི ཨེ་ཏྠ ཡོ སེ་ནཱ་ས་ནཱ་ར་ཧ་སྶ སེ་ནཱ་ས་ནཾ པ་ཊི་བཱ་ཧ་ཏི, ཏ་སྶེ་ཝ ཨཱ་པ་ཏྟི. ཀ་ལ་ཧ་ཀཱ་ར་ཀཱ་དཱི་ནཾ པ་ནེ་ཏྠ ‘‘ཨོ་ཀཱ་སོ ན་ཏྠཱི’’ཏི་ཨཱ་དི་ཀཾ ས་ངྒྷ་སྶ ཀ་ཏི་ཀཾ ཨཱ་རོ་ཙེ་ཏྭཱ ན པ་ཉྙ་པེ་ནྟ་སྶ ‘‘ཨ་ཧཾ ཝུ་ཌྜྷོ’’ཏི པ་ས་ཡ྄ཧ ཨ་ཏྟ་ནཱ་ཝ ཨ་ཏྟ་ནོ པ་ཉྙ་པེ་ཏྭཱ ག་ཎྷ་ནྟཾ ‘‘ཡུ་ཏྟི་ཡཱ ག་ཎྷ་ཐཱ’’ཏི ཝ་ཏྭཱ ཝཱ་རེ་ནྟ་སྶ ཙ ན་ཏྠི ཨཱ་པ་ཏྟི. ‘‘བྷ་ཎྜ་ན་ཀཱ་ར་ཀཾ ནི་ཀྐ་ཌྜྷ་ཏཱི་ཏི ཝ་ཙ་ན་ཏོ ཀུ་ལ་དཱུ་ས་ཀ་སྶ པ་བྦཱ་ཛ་ནཱི་ཡ་ཀ་མྨཱ་ནུ་ཉྙཱ་ཡ ཙ ཨི་དྷ ཀ་ལ་ཧ་ཝཱུ་པ་ས་མ་ན་ཏྠཾ ཨཱ་ག་ཏཱ་ནཾ ཀོ་ས་མྦ་ཀཱ་ན་མྤི ‘ཡ་ཐཱ་ཝུ་ཌྜྷ’ནྟི ཨ་ཝ་ཏྭཱ ‘ཝི་ཝི་ཏྟེ ཨ་ས་ཏི ཝི་ཝི་ཏྟཾ ཀ་ཏྭཱ་པི དཱ་ཏ་བྦ’ནྟི ཝུ་ཏྟ་ཏྟཱ ཝི་ཝི་ཏྟཾ ཀ་ཏྭཱ དེ་ནྟཾ པ་ཊི་བཱ་ཧ་ནྟ་སྶེ་ཝ ཨཱ་པ་ཏྟཱི’’ཏི ག་ཎྛི་པ་དེ་སུ ཝུ་ཏྟཾ.
ཨུ་པཱ་ལི་ས་ངྒྷ་སཱ་མ་གྒཱི་པུ་ཙྪཱ་ཝ་ཎྞ་ནཱ
༤༧༦. ན མཱུ་ལཱ མཱུ་ལཾ ག་ནྟྭཱཏི མཱུ་ལ་ཏོ མཱུ་ལཾ ཨ་ག་ནྟྭཱ. ཨ་ཏྠ་ཏོ ཨ་པ་ག་ཏཱཏི སཱ་མ་གྒི་ས་ངྑཱ་ཏ་ཨ་ཏྠ་ཏོ ཨ་པ་ག་ཏཱ.
༤༧༧. ཡེ་ན ནཾ པ་ཙྩ་ཏྠི་ཀཱ ཝ་དེ་ཡྻུཾ, ཏཾ ན ཧི ཧོ་ཏཱི་ཏི ས་མྦ་ནྡྷོ. ཨ་ན་པ་ག་ཏནྟི ཀཱ་ར་ཎ་ཏོ ཨ་ན་པེ་ཏཾ, ས་ཀཱ་ར་ཎ་ནྟི ཝུ་ཏྟཾ ཧོ་ཏི.
ཨུ་སཱུ་ཡཱ་ཡཱཏི ཨི་མི་ནཱ དོ་སཱ་ག་ཏི་ག་མ་ན་སྶ ས་ངྒ་ཧི་ཏ་ཏྟཱ ‘‘ཨ་ག་ཏི་ག་མ་ནེ་ནཱ’’ཏི ཨ་ཝ་སེ་ས་ཨ་ག་ཏི་ག་མ་ནཾ ད་སྶི་ཏ་ནྟི ཝེ་དི་ཏ་བྦཾ. ཨ་ཊྛ་ཧི དཱུ་ཏ་ངྒེ་ཧཱིཏི ‘‘སོ་ཏཱ ཙ ཧོ་ཏི སཱ་ཝེ་ཏཱ ཙ ཨུ་གྒ་ཧེ་ཏཱ ཙ དྷཱ་རེ་ཏཱ ཙ ཝི་ཉྙཱ་པེ་ཏཱ ཙ ཀུ་ས་ལོ ཙ ས་ཧི་ཏཱ་ས་ཧི་ཏ་ད་སྶ་ནོ ཙ ཨ་ཀ་ལ་ཧ་ཀཱ་ར་ཀོ ཙཱ’’ཏི ཨེ་ཝཾ ཝུ་ཏྟེ་ཧི ཨ་ཊྛ་ཧི དཱུ་ཏ་ངྒེ་ཧི. སེ་ས་མེ་ཏྠ པཱ་ལི༹་ཏོ ཨ་ཊྛ་ཀ་ཐཱ་ཏོ ཙ སུ་ཝི་ཉྙེ་ཡྻ་མེ་ཝ.
ཀོ་ས་མྦ་ཀ་ཀྑ་ནྡྷ་ཀ་ཝ་ཎྞ་ནཱ ནི་ཊྛི་ཏཱ.
ཨི་ཏི ས་མ་ནྟ་པཱ་སཱ་དི་ཀཱ་ཡ ཝི་ན་ཡ་ཊྛ་ཀ་ཐཱ་ཡ སཱ་ར་ཏྠ་དཱི་པ་ནི་ཡཾ
མ་ཧཱ་ཝ་གྒ་ཝ་ཎྞ་ནཱ ནི་ཊྛི་ཏཱ.
ན་མོ ཏ་སྶ བྷ་ག་ཝ་ཏོ ཨ་ར་ཧ་ཏོ ས་མྨཱ་ས་མྦུ་དྡྷ་སྶ