༩. ཙ་མྤེ་ཡྻ་ཀྑ་ནྡྷ་ཀཾ

ཀ་སྶ་པ་གོ་ཏྟ་བྷི་ཀྑུ་ཝ་ཏྠུ་ཀ་ཐཱ་ཝ་ཎྞ་ནཱ

༣༨༠. ཙ་མྤེ་ཡྻ་ཀྑ་ནྡྷ་ཀེ ཙ་མྤཱ་ཡནྟི ཨེ་ཝཾ་ནཱ་མ་ཀེ ན་ག་རེ. ཏ་སྶ ཧི ན་ག་ར་སྶ ཨཱ་རཱ་མ་པོ་ཀྑ་ར་ཎཱི་ཨཱ་དཱི་སུ ཏེ་སུ ཏེ་སུ ཋཱ་ནེ་སུ ཙ་མྤ་ཀ་རུ་ཀྑཱ་ཝ ཨུ་སྶ་ནྣཱ ཨ་ཧེ་སུཾ, ཏ་སྨཱ ‘‘ཙ་མྤཱ’’ཏི ས་ངྑཾ ཨ་ག་མཱ་སི. ག་གྒ་རཱ་ཡ པོ་ཀྑ་ར་ཎི་ཡཱ ཏཱི་རེཏི ཏ་སྶ ཙ་མྤཱ་ན་ག་ར་སྶ ཨ་ཝི་དཱུ་རེ ག་གྒ་རཱ་ཡ ནཱ་མ རཱ་ཛ་མ་ཧེ་སི་ཡཱ ཁ་ཎི་ཏ་ཏྟཱ ‘‘ག་གྒ་རཱ’’ཏི ལ་དྡྷ་ཝོ་ཧཱ་རཱ པོ་ཀྑ་ར་ཎཱི ཨ་ཏྠི, ཏ་སྶཱ ཏཱི་རེ ས་མ་ནྟ་ཏོ ནཱི་ལཱ་དི་པ་ཉྩ་ཝ་ཎྞ་ཀུ་སུ་མ་པ་ཊི་མ་ཎྜི་ཏཾ མ་ཧ་ནྟཾ ཙ་མྤ་ཀ་ཝ་ནཾ, ཏ་སྨིཾ བྷ་ག་ཝཱ ཀུ་སུ་མ་ག་ནྡྷ་སུ་ག་ནྡྷེ ཙ་མྤ་ཀ་ཝ་ནེ ཝི་ཧ་ར་ཏི. ཏཾ ས་ནྡྷཱ་ཡ ‘‘ག་གྒ་རཱ་ཡ པོ་ཀྑ་ར་ཎི་ཡཱ ཏཱི་རེ’’ཏི ཝུ་ཏྟཾ. ཏ་ནྟི་བ་དྡྷོཏི ཏ་ནྟི ཝུ་ཙྩ་ཏི བྱཱ་པཱ་རོ, ཏ་ཏྠ བ་དྡྷོ པ་སུ་ཏོ ཨུ་སྶུ་ཀྐཾ ཨཱ་པ་ནྣོ་ཏི ཨ་ཏྠོ, ཏ་སྨིཾ ཨཱ་ཝཱ་སེ ཨ་ཀ་ཏཾ སེ་ནཱ་ས་ནཾ ཀ་རོ་ཏི, ཛི་ཎྞཾ པ་ཊི་ས་ངྑ་རོ་ཏི, ཀ་ཏེ ཨི་སྶ་རོ ཧོ་ཏཱི་ཏི ཨ་དྷི་པྤཱ་ཡོ. ཏེ་ནཱ་ཧ ‘‘ཏ་སྨིཾ ཨཱ་ཝཱ་སེ ཀ་ཏྟ་བྦ་ཏྟཱ ཏ་ནྟི་པ་ཊི་བ་དྡྷོ’’ཏི, ཀ་ཏྟ་བྦ་ཀ་མྨེ ཨུ་སྶཱ་ཧ་མཱ་པ་ནྣོ་ཏི ཨ་ཏྠོ.

ཉ་ཏྟི་ཝི་པ་ནྣ་ཀ་མྨཱ་དི་ཀ་ཐཱ་ཝ་ཎྞ་ནཱ

༣༨༥-༣༨༧. པ་ཊི་ཀྐོ་ས་ནྟེ་སཱུཏི ནི་ཝཱ་རེ་ནྟེ་སུ. ཧཱ་པ་ནཾ ཝཱ ཨ་ཉྙ་ཐཱ ཀ་ར་ཎཾ ཝཱ ན་ཏྠཱིཏི ཉ་ཏྟི་ཀ་མྨ་སྶ ཨེ་ཀཱ་ཡ ཨེ་ཝ ཉ་ཏྟི་ཡཱ ཀ་ཏྟ་བྦ་ཏྟཱ ཏ་ཏོ ཧཱ་པ་ནཾ ན ས་མྦྷ་ཝ་ཏི, ཨ་ནུ་སྶཱ་ཝ་ནཱ་ཡ ཨ་བྷཱ་ཝ་ཏོ པ་ཙྪཱ ཉ་ཏྟི་ཋ་པ་ན་ཝ་སེ་ན དྭཱི་ཧི ཉ་ཏྟཱི་ཧི ཀ་ར་ཎ་ཝ་སེ་ན ཙ ཨ་ཉྙ་ཐཱ ཀ་ར་ཎཾ ན་ཏྠི.

ཙ་ཏུ་ཝ་གྒ་ཀ་ར་ཎཱ་དི་ཀ་ཐཱ་ཝ་ཎྞ་ནཱ

༣༨༩. ཨུ་ཀྑེ་པ་ནཱི་ཡ་ཀ་མྨ་ཀ་ཏོ ཀ་མྨ་ནཱ་ནཱ་སཾ་ཝཱ་ས་ཀོ, ཨུ་ཀྑི་ཏྟཱ་ནུ་ཝ་ཏྟ་ཀོ ལ་དྡྷི་ནཱ་ནཱ་སཾ་ཝཱ་ས་ཀོ.

དྭེ་ནི་སྶཱ་ར་ཎཱ་དི་ཀ་ཐཱ་ཝ་ཎྞ་ནཱ

༣༩༥. ཨ་པྤ་ཏྟོ ནི་སྶཱ་ར་ཎནྟི ཨེ་ཏྠ ནི་སྶཱ་ར་ཎ་ཀ་མྨཾ ནཱ་མ ཀུ་ལ་དཱུ་ས་ཀཱ་ན་ཉྙེ་ཝ ཨ་ནུ་ཉྙཱ་ཏཾ, ཨ་ཡ་ཉྩ ‘‘བཱ་ལོ ཧོ་ཏི ཨ་བྱ་ཏྟོ’’ཏི་ཨཱ་དི་ནཱ ནི་དྡི་ཊྛོ ཀུ་ལ་དཱུ་ས་ཀོ ན ཧོ་ཏི, ཏ་སྨཱ ‘‘ཨ་པྤ་ཏྟོ’’ཏི ཝུ་ཏྟོ. ཡ་དི ཨེ་ཝཾ ཀ་ཐཾ སུ་ནི་སྶཱ་རི་ཏོ ཧོ་ཏཱི་ཏི? བཱ་ལ་ཨ་བྱ་ཏྟ་ཏཱ་དི་ཡུ་ཏྟ་སྶ་པི ཀ་མྨ་ཀྑ་ནྡྷ་ཀེ ‘‘ཨཱ་ཀ་ངྑ་མཱ་ནོ ས་ངྒྷོ པ་བྦཱ་ཛ་ནཱི་ཡ་ཀ་མྨཾ ཀ་རེ་ཡྻཱ’’ཏི (ཙཱུ་ལ༹་ཝ. ༢༧) ཝུ་ཏྟ་ཏྟཱ. ཏེ་ནེ་ཝཱ་ཧ ‘‘ཏ་ཉྩེ་ས…པེ… ཏ་སྨཱ སུ་ནི་སྶཱ་རི་ཏོ ཧོ་ཏཱི’’ཏི. ཏ་ཏྠ ཏནྟི པ་བྦཱ་ཛ་ནཱི་ཡ་ཀ་མྨཾ. ཨེ་སོཏི ‘‘བཱ་ལོ’’ཏི་ཨཱ་དི་ནཱ ནི་དྡི་ཊྛོ. ཨཱ་ཝེ་ཎི་ཀེ་ན ལ་ཀྑ་ཎེ་ནཱཏི པ་བྦཱ་ཛ་ནཱི་ཡ་ཀ་མྨ་སྶ ཨཱ་ཝེ་ཎི་ཀ་བྷཱུ་ཏེ་ན ཀུ་ལ་དཱུ་ས་ཀ་བྷཱ་ཝ་ལ་ཀྑ་ཎེ་ན.

ཏ་ཉྩེ ས་ངྒྷོ ནི་སྶཱ་རེ་ཏི, སུ་ནི་སྶཱ་རི་ཏོཏི ཨེ་ཏྠ ཨ་དྷི་པྤེ་ཏ་སྶ པ་བྦཱ་ཛ་ནཱི་ཡ་ཀ་མྨ་སྶ ཝ་སེ་ན ཨ་ཏྠཾ ད་སྶེ་ཏྭཱ ཨི་དཱ་ནི ཡ་དི ‘‘ཏ་ཉྩེ ས་ངྒྷོ ནི་སྶཱ་རེ་ཏཱི’’ཏི ཏ་ཛྫ་ནཱི་ཡཱ་དི་ཀ་མྨ་ཝ་སེ་ན ནི་སྶཱ་ར་ཎཱ ཨ་དྷི་པྤེ་ཏཱ, ཏ་དཱ ནི་སྶཱ་ར་ཎཾ ས་མྤ་ཏྟོ་ཡེ་ཝ ཏ་ཛྫ་ནཱི་ཡཱ་དི་ཝ་སེ་ན སུ་ནི་སྶཱ་རི་ཏོ་ཏི བྱ་ཏི་རེ་ཀ་མུ་ཁེ་ན ཨ་ཏྠཾ ད་སྶེ་ཏུཾ པུ་ན ‘‘ཏ་ཉྩེ ས་ངྒྷོ ནི་སྶཱ་རེ་ཏཱི’’ཏི ཨུ་ལླི་ངྒེ་ཏྭཱ ཨ་ཏྠོ ཀ་ཐི་ཏོ. ན་ཏྠི ཨེ་ཏ་སྶ ཨ་པ་དཱ་ནཾ ཨ་ཝ་ཁ་ཎྜ་ནཾ ཨཱ་པ་ཏྟི་པ་རི་ཡ་ནྟོ་ཏི ཨ་ན་པ་དཱ་ནོ. ཨེ་ཀེ་ཀེ་ན་པི ཨ་ངྒེ་ན ནི་སྶཱ་ར་ཎཱ ཨ་ནུ་ཉྙཱ་ཏཱཏི ཀ་མྨ་ཀྑ་ནྡྷ་ཀེ ཨ་ནུ་ཉྙཱ་ཏཱ. སེ་ས་མེ་ཏྠ པཱ་ལི༹་ཏོ ཨ་ཊྛ་ཀ་ཐཱ་ཏོ ཙ སུ་ཝི་ཉྙེ་ཡྻ་མེ་ཝ.

དྭེ་ནི་སྶཱ་ར་ཎཱ་དི་ཀ་ཐཱ་ཝ་ཎྞ་ནཱ ནི་ཊྛི་ཏཱ.

ཙ་མྤེ་ཡྻ་ཀྑ་ནྡྷ་ཀ་ཝ་ཎྞ་ནཱ ནི་ཊྛི་ཏཱ.