༦. ཙཱི་ཝ་ར་སི་བྦཱ་པ་ན་སི་ཀྑཱ་པ་ད་ཝ་ཎྞ་ནཱ

༡༧༥. ཚ་ཊྛེ ས་ཙེ སཱ བྷི་ཀྑུ་ནཱི ཏཾ ཙཱི་ཝ་རཾ ཨཱ་དི་ཏོ་ཝ པཱ་རུ་པེ་ཡྻ, ཨ་ཉྙཱ བྷི་ཀྑུ་ནི་ཡོ དི་སྭཱ ཨུ་ཛ྄ཛྷཱ་པེ་ཡྻུཾ, ཏ་ཏོ མ་ཧཱ་ཛ་ནོ པ་སྶི་ཏུཾ ན ལ་བྷ་ཏཱི་ཏི མ་ཉྙ་མཱ་ནོ ‘‘ཡ་ཐཱ་སཾ་ཧ་ཊཾ ཧ་རི་ཏྭཱ ནི་ཀྑི་པི་ཏྭཱ’’ཏི་ཨཱ་དི་མཱ་ཧ.

༡༧༦. ནཱི་ཧ་ར་ཏཱིཏི ས་ཀིཾ ནཱི་ཧ་ར་ཏི. ཡེ་པི ཏེ་སཾ ནི་སྶི་ཏ་ཀཱ་ཏི ས་མྦ་ནྡྷོ. ཀ་ཐི་ན་ཝ་ཏྟནྟི ‘‘ས་བྲ་ཧྨ་ཙཱ་རཱི་ནཾ ཀཱ་ཏུཾ ཝ་ཊྚ་ཏཱི’’ཏི ཨི་ཏི་ཀ་ཏྟ་བྦ་ཏཱ་ཝ་སེ་ན སཱུ་ཙི་ཀ་མྨ་ཀ་ར་ཎཾ. ཨཱ་ཙ་རི་ཡུ་པ་ཛ྄ཛྷཱ་ཡཱ་ནཾ དུ་ཀྐ་ཊནྟི ཨ་ཀ་པྤི་ཡ་ས་མཱ་དཱ་ན་ཝ་སེ་ན དུ་ཀྐ་ཊཾ. ཝ་ཉྩེ་ཏྭཱཏི ‘‘ཏ་ཝ ཉཱ་ཏི་ཀཱ་ཡཱ’’ཏི ཨ་ཝ་ཏྭཱ ‘‘ཨེ་ཀི་སྶཱ བྷི་ཀྑུ་ནི་ཡཱ’’ཏི ཨེ་ཏྟ་ཀ་མེ་ཝ ཝ་ཏྭཱ. ‘‘ཨེ་ཀི་སྶཱ བྷི་ཀྑུ་ནི་ཡཱ’’ཏི སུ་ཏྭཱ ཏེ ཨ་ཉྙཱ་ཏི་ཀ་ས་ཉྙི་ནོ བྷ་ཝེ་ཡྻུ་ནྟི ཨཱ་ཧ ‘‘ཨ་ཀ་པྤི་ཡེ ནི་ཡོ་ཛི་ཏ་ཏྟཱ’’ཏི. ‘‘ཨི་དཾ ཏེ མཱ་ཏུ ཙཱི་ཝ་ར’’ནྟི་ཨཱ་དཱི་ནི ཨ་ཝ་ཏྭཱ་པི ‘‘ཨི་དཾ ཙཱི་ཝ་རཾ སི་བྦེ་ཧཱི’’ཏི སུ་དྡྷ་ཙི་ཏྟེ་ན སི་བྦཱ་པེ་ནྟ་སྶ་པི ཨ་ནཱ་པ་ཏྟི.

༡༧༩. ཨུ་པཱ་ཧ་ན་ཏྠ་ཝི་ཀཱ་དིནྟི ཨཱ་དི-ས་དྡེ་ན ཡཾ ཙཱི་ཝ་རཾ ནི་ཝཱ་སེ་ཏུཾ ཝཱ པཱ་རུ་པི་ཏུཾ ཝཱ ན ས་ཀྐཱ ཧོ་ཏི, ཏ་མྤི ས་ངྒ་ཎྷཱ་ཏི. སེ་ས་མེ་ཏྠ ཨུ་ཏྟཱ་ན་མེ་ཝ. ཨ་ཉྙཱ་ཏི་ཀཱ་ཡ བྷི་ཀྑུ་ནི་ཡཱ ས་ནྟ་ཀ་ཏཱ, ནི་ཝཱ་ས་ན་པཱ་རུ་པ་ནཱུ་པ་ག་ཏཱ, ཝུ་ཏྟ་ན་ཡེ་ན སི་བྦ་ནཾ ཝཱ སི་བྦཱ་པ་ནཾ ཝཱ་ཏི ཨི་མཱ་ནི པ་ནེ་ཏྠ ཏཱི་ཎི ཨ་ངྒཱ་ནི.

ཙཱི་ཝ་ར་སི་བྦཱ་པ་ན་སི་ཀྑཱ་པ་ད་ཝ་ཎྞ་ནཱ ནི་ཊྛི་ཏཱ.