ཨེ་ཀུ་ཏྟ་རི་ཀ་ན་ཡཾ
ཨེ་ཀ་ཀ་ཝཱ་ར་ཝ་ཎྞ་ནཱ
༣༢༡. ཨེ་ཀུ་ཏྟ་རི་ཀ་ན་ཡེ པ་ན ཨ་ཛཱ་ན་ནྟེ་ན ཝཱི་ཏི་ཀྐ་ནྟཱཏི པ་ཎྞ་ཏྟིཾ ཝཱ ཝ་ཏྠུཾ ཝཱ ཨ་ཛཱ་ན་ནྟེ་ན ཝཱི་ཏི་ཀྐ་ནྟཱ པ་ཐ་ཝཱི་ཁ་ཎ་ན་ས་ཧ་སེ་ཡྻཱ་དི་ཀཱ, སཱ་པི པ་ཙྪཱ ཨཱ་པ་ནྣ་བྷཱ་ཝཾ ཉ་ཏྭཱ པ་ཊི་ཀ་མྨཾ ཨ་ཀ་རོ་ནྟ་སྶ ཨ་ནྟ་རཱ་ཡི་ཀཱ་ཝ ཧོ་ཏི.
པཱ་རི་ཝཱ་སི་ཀཱ་དཱི་ཧི པ་ཙྪཱ ཨཱ་པ་ནྣཱཏི ཝ་ཏྟ་བྷེ་དེ་སུ དུ་ཀྐ་ཊཱ་ནི ས་ནྡྷཱ་ཡ ཝུ་ཏྟཾ. ཏ་སྨིཾ ཁ་ཎེ ཨཱ་པ་ཛྫི་ཏ་བྦ་ཨ་ནྟ་རཱ་པ་ཏྟི་ཡོ ས་ནྡྷཱ་ཡཱ་ཏི ཀེ་ཙི ཝ་ད་ནྟི, ཏ་སྶ པུ་བྦཱ་པ་ཏྟཱི་ནཾ་ཨ་ནྟ་རཱ་པ་ཏྟི-པ་དེ་ནེ་ཝ ཝ་ཀྑ་མཱ་ན་ཏྟཱ པུ་རི་མ་མེ་ཝ ཡུ་ཏྟ་ཏ་རཾ. མཱུ་ལ་ཝི་སུ་དྡྷི་ཡཱ ཨ་ནྟ་རཱ་པ་ཏྟཱིཏི མཱུ་ལཱ་ཡ་པ་ཊི་ཀ་སྶ་ནཱ་དཱི་ནི ཨ་ཀ་ཏྭཱ ས་བྦ་པ་ཋ་མཾ དི་ནྣ་པ་རི་ཝཱ་ས་མཱ་ན་ཏྟ་ཝི་སུ་དྡྷི་ཡཱ ཙ་ར་ཎ་ཀཱ་ལེ ཨཱ་པ་ནྣ་ཨ་ནྟ་རཱ་པ་ཏྟི་ས་ངྑཱ་ཏ་ས་ངྒྷཱ་དི་སེ་སོ. ཨ་གྒྷ་ཝི་སུ་དྡྷི་ཡཱཏི ཨ་ནྟ་རཱ་པ་ཏྟིཾ ཨཱ་པ་ནྣ་སྶ མཱུ་ལཱ་ཡ པ་ཊི་ཀ་སྶི་ཏྭཱ ཨོ་དྷཱ་ན་ས་མོ་དྷཱ་ན་ཝ་སེ་ན ཨོ་དྷུ་ནི་ཏྭཱ པུ་རི་མཱ་པ་ཏྟི་ཡཱ ས་མོ་དྷཱ་ཡ ཏ་ད་གྒྷ་ཝ་སེ་ན པུ་ན དི་ནྣ་པ་རི་ཝཱ་སཱ་དི་སུ་དྡྷི་ཡཱ ཙ་ར་ཎ་ཀཱ་ལེ པུ་ན ཨཱ་པ་ནྣཱ ཨ་ནྟ་རཱ་པ་ཏྟི.
ས་ཨུ་སྶཱ་ཧེ་ནེ་ཝཱཏི པུ་ན་པི ཏཾ ཨཱ་པ་ཏྟིཾ ཨཱ་པ་ཛྫི་ཏུ་ཀཱ་མ་ཏཱ་ཙི་ཏྟེ་ན, ཨེ་ཝཾ དེ་སི་ཏཱ་པི ཨཱ་པ་ཏྟི ན ཝུ་ཊྛཱ་ཏཱི་ཏི ཨ་དྷི་པྤཱ་ཡོ. དྷུ་ར་ནི་ཀྑེ་པཾ ཨ་ཀ་ཏྭཱ ཨཱ་པ་ཛྫ་ནེ སི་ཁཱ་པྤ་ཏྟ་དོ་སཾ ད་སྶེ་ནྟོ ཨཱ་ཧ ‘‘ཨ་ཊྛ་མེ ཝ་ཏྠུ་སྨིཾ བྷི་ཀྑུ་ནི་ཡཱ པཱ་རཱ་ཛི་ཀ་མེ་ཝཱ’’ཏི. ན ཀེ་ཝ་ལ་ཉྩ བྷི་ཀྑུ་ནི་ཡཱ ཨེ་ཝ, བྷི་ཀྑཱུ་ན་མྤི དྷུ་ར་ནི་ཀྑེ་པཾ ཨ་ཀ་ཏྭཱ ཐོ་ཀཾ ཐོ་ཀཾ ས་པྤི་ཨཱ་དི་ཀཾ ཐེ་ཡྻཱ་ཡ ག་ཎྷ་ནྟཱ་ནཾ པཱ་ད་གྒྷ་ན་ཀེ པུ་ཎྞེ པཱ་རཱ་ཛི་ཀ་མེ་ཝ. ཀེ་ཙི པ་ན ‘‘ཨ་ཊྛ་མེ ཝ་ཏྠུ་སྨིཾ བྷི་ཀྑུ་ནི་ཡཱ པཱ་རཱ་ཛི་ཀ་མེ་ཝ ཧོ་ཏཱི་ཏི ཝུ་ཏྟ་ཏྟཱ ཨ་ཊྛ་ཝ་ཏྠུ་ཀ་མེ་ཝེ་ཏཾ ས་ནྡྷཱ་ཡ ཝུ་ཏྟ’’ནྟི ཝ་ད་ནྟི.
དྷ་མྨི་ཀ་སྶ པ་ཊི་སྶ་ཝ་སྶཱཏི ‘‘ཨི་དྷ ཝ་སྶཾ ཝ་སི་སྶཱ་མཱི’’ཏི་ཨཱ་དི་ནཱ གི་ཧཱི་ནཾ ས་མྨུ་ཁཱ ཀ་ཏ་སྶ དྷ་མྨི་ཀ་སྶ པ་ཊི་སྶ་ཝ་སྶ, ཨ་དྷ་མྨི་ཀ་སྶ པ་ན ‘‘ཨ་སུ་ཀཾ པ་ཧ་རི་སྶཱ་མཱི’’ཏི་ཨཱ་དི་ཀ་སྶ པ་ཊི་སྶ་ཝ་སྶ ཨ་ས་ཙྩཱ་པ་ནེ་ན ཨཱ་པ་ཏྟི ན་ཏྠི.
ཏ་ཐཱ ཙོ་དི་ཏོཏི ཨ་དྷ་མྨེ་ན ཙོ་དི་ཏོ, ས་ཡཾ ས་ཙྩེ, ཨ་ཀུ་པྤེ ཙ ཨ་ཊྛ་ཏྭཱ པ་ཊི་ཙྪཱ་དེ་ནྟོ་པི ཨ་དྷ་མྨ་ཙུ་དི་ཏ་ཀོ ཨེ་ཝ. པ་ཉྩཱ་ན་ནྟ་རི་ཡ་ནི་ཡ་ཏ་མི་ཙྪཱ་དི་ཊྛི་ཡེ་ཝ མི་ཙྪ་ཏྟ་ནི་ཡ་ཏཱ ནཱ་མ. ཙ་ཏྟཱ་རོ མ་གྒཱ ས་མྨ་ཏྟ་ནི་ཡ་ཏཱ ནཱ་མ.
ཨེ་ཀ་ཀ་ཝཱ་ར་ཝ་ཎྞ་ནཱ ནི་ཊྛི་ཏཱ.
དུ་ཀ་ཝཱ་ར་ཝ་ཎྞ་ནཱ
༣༢༢. དུ་ཀེ་སུ ས་ཡ་མེ་ཝ ས་པུ་གྒ་ལོ་ཏི ཨཱ་ཧ ‘‘མུ་དུ་པི་ཊྛི་ཀ་སྶཱ’’ཏི་ཨཱ་དི. ཨཱ་དི-ས་དྡེ་ན ཨ་ངྒ་ཛཱ་ཏ་ཙྪེ་ད་ཨ་ཏྟ་གྷཱ་ཏཱ་དི་ཨཱ་པ་ཏྟི་ཡོ ས་ངྒ་ཧི་ཏཱ.
བྷ་ཎྜཱ་གཱ་རི་ཀ་ཙི་ཏྟ་ཀ་མྨཱ་ནི ཝཱཏི ག་ཧ་ཊྛཱ་ནཾ བྷ་ཎྜ་པ་ཊི་སཱ་མ་ནཾ, ཨི་ཏྠི་པུ་རི་སཱ་དི་པ་ཊི་བྷཱ་ན་ཙི་ཏྟ་ཀ་མྨཱ་ནི ཝཱ. ‘‘ཙཱི་ཝ་རཱ་དཱི་ནི ཨ་དེ་ནྟོ ཨཱ་པ་ཛྫ་ཏཱི’’ཏི ཨི་དཾ ‘‘ཨུ་པ་ཛ྄ཛྷཱ་ཡེ་ན, བྷི་ཀྑ་ཝེ, ས་དྡྷི་ཝི་ཧཱ་རི་ཀོ ས་ངྒ་ཧེ་ཏ་བྦོ ཨ་ནུ་གྒ་ཧེ་ཏ་བྦོ…པེ… པ་ཏྟོ དཱ་ཏ་བྦོ’’ཏི་ཨཱ་དི (མ་ཧཱ་ཝ. ༦༧) ཝ་ཙ་ན་ཏོ ཨ་ནཱ་ད་རི་ཡེ་ན ཨཱ་མི་ས་ས་ངྒ་ཧཾ ཨ་ཀ་རོ་ནྟ་སྶ དུ་ཀྐ་ཊཾ, བྷི་ཀྑུ་ནི་ཡཱ པཱ་ཙི་ཏྟི་ཡ་ཉྩ ས་ནྡྷཱ་ཡ ཝུ་ཏྟཾ. ནི་སྶ་ཊྛ་ཙཱི་ཝ་རཱ་དཱི་ནཾ ཨ་དཱ་ན་ཨཱ་པ་ཏྟི་པི ཨེ་ཏྠེ་ཝ ས་ངྒ་ཧི་ཏཱ.
པཱ་ལི༹་ཡཾ དེ་སེ་ནྟོཏི ས་བྷཱ་གཱ་པ་ཏྟིཾ, ཨ་དེ་ས་ནཱ་གཱ་མི་ནི་ཨཱ་དི་ཉྩ དེ་སེ་ནྟོ. ནི་དཱ་ནུ་དྡེ་སེ ཨཱ་པ་ཏྟིཾ ཨ་ནཱ་ཝི་ཀ་རོ་ནྟོ, ན དེ་སེ་ནྟོ ཙ ཨཱ་པ་ཛྫ་ཏི ནཱ་མ. ཨོ་ཝཱ་དཾ ཨ་ག་ཎྷ་ནྟོཏི བྷི་ཀྑཱུ་ཧི བྷི་ཀྑུ་ནི་ཨོ་ཝཱ་ད་ཏྠཱ་ཡ ཝུ་ཏྟཾ ཝ་ཙ་ནཾ ཨ་ག་ཎྷ་ནྟོ བཱ་ལ་གི་ལཱ་ན་ག་མི་ཡ་ཝི་ཝ་ཛྫི་ཏོ. ཨ་ཏྟ་ནོ པ་རི་བྷོ་ག་ཏྠཾ དི་ནྣཾ ཨ་ཉྙ་སྶ དཱ་ནེ, ས་ངྒྷཱ་ཊིཾ ཨ་པཱ་རུ་པི་ཏྭཱ ས་ནྟ་རུ་ཏྟ་རེ་ན གཱ་མ་པྤ་ཝེ་ས་ནཱ་དཱི་སུ ཙ ཨཱ་པ་ཏྟི་ཡོ་པི ཨ་པ་རི་བྷོ་གེ་ན ཨཱ་པ་ཛྫི་ཏ་བྦཱ་པ་ཏྟི་ཡོ་ཝ. པ་མཱ་ཎནྟི ས་ངྒྷ་བྷེ་དཱ་ན་ནྟ་རི་ཡ་ནི་པྥ་ཏྟི་ཡཱ ལ་ཀྑ་ཎཾ. བཱ་ལ་སྶཱཏི ནི་སྶ་ཡ་གྒ་ཧ་ཎ་ཝི་དྷིཾ ཨ་ཛཱ་ན་ནྟ་སྶ ལ་ཛྫི་བཱ་ལ་སྶེ་ཝ. ལ་ཛྫི་སྶཱཏི བྱ་ཏྟ་སྶ ནི་སྶ་ཡ་དཱ་ཡ་ཀ་ས་བྷཱ་ག་ཏཾ པ་རི་ཝཱི་མཾ་ས་ནྟ་སྶ. ཝི་ན་ཡེ ཨཱ་ག་ཏཱ ཨ་ཏྠཱ ཝེ་ན་ཡི་ཀཱ་ཏི ཨཱ་ཧ ‘‘དྭེ ཨ་ཏྠཱ ཝི་ན་ཡ་སི་དྡྷཱ’’ཏི.
པཱ་ལི༹་ཡཾ ཨ་པྤ་ཏྟོ ནི་སྶཱ་ར་ཎནྟི ཨེ་ཏྠ པ་བྦཱ་ཛ་ནཱི་ཡ་ཀ་མྨཾ ཝི་ཧཱ་ར་ཏོ ནི་སྶཱ་ར་ཎ་ཏྟཱ ནི་སྶཱ་ར་ཎ་ནྟི ཨ་དྷི་པྤེ་ཏཾ, ཏ་ཉྩ ཡ་སྨཱ ཀུ་ལ་དཱུ་ས་ཀཾ ཨ་ཀ་རོ་ནྟོ པུ་གྒ་ལོ ཨཱ་པ་ཏྟི་བ་ཧུ་ལོ་པི ཨཱ་ཝེ་ཎི་ཀ་ལ་ཀྑ་ཎེ་ན ཨ་པྤ་ཏྟོ ནཱ་མ ཧོ་ཏི, ཏ་སྨཱ ཨ་པྤ་ཏྟོ ནི་སྶཱ་ར་ཎཾ. ཡ་སྨཱ པ་ན ཨཱ་པ་ཏྟཱ་དི་བ་ཧུ་ལ་སྶཱ་པི ‘‘ཨཱ་ཀ་ངྑ་མཱ་ནོ ས་ངྒྷོ པ་བྦཱ་ཛ་ནཱི་ཡ་ཀ་མྨཾ ཀ་རེ་ཡྻཱ’’ཏི (ཙཱུ་ལ༹་ཝ. ༢༧) ཝུ་ཏྟཾ, ཏ་སྨཱ སུ་ནི་སྶཱ་རི་ཏོ, ས་བྦ་ཐཱ པ་ན སུ་དྡྷོ ནི་རཱ་པ་ཏྟི་ཀོ དུ་ནྣི་སྶཱ་རི་ཏོ་ཏི ད་ཊྛ་བྦོ.
ཨ་པྤ་ཏྟོ ཨོ་སཱ་ར་ཎནྟི་ཨཱ་དཱི་སུ ཨུ་པ་ས་མྤ་དཱ་ཀ་མྨཾ ཨེ་ཏྠ ཨོ་སཱ་ར་ཎཾ ཨ་དྷི་པྤེ་ཏཾ, ཏ་ཉྩ ཧ་ཏྠ་ཙྪི་ནྣཱ་དི་ཀོ ཨེ་ཀ་ཙྩོ པ་ཊི་ཀྑི་ཏྟ་ཏྟཱ ཨ་པྤ་ཏྟོ་པི སོ་སཱ་རི་ཏོ, པ་ཎྜ་ཀཱ་དི་ཀོ དོ་སཱ་རི་ཏོ་ཏི ཨ་ཏྠོ.
དུ་ཀ་ཝཱ་ར་ཝ་ཎྞ་ནཱ ནི་ཊྛི་ཏཱ.
ཏི་ཀ་ཝཱ་ར་ཝ་ཎྞ་ནཱ
༣༢༣. ཏི་ཀེ་སུ ལོ་ཧི་ཏུ་པྤཱ་དཱ་པ་ཏྟིནྟི པཱ་རཱ་ཛི་ཀཱ་པ་ཏྟིཾ. ཨཱ་ཝུ་སོ་ཝཱ་དེ་ནཱཏི ‘‘ཨཱ་ཝུ་སོ’’ཏི ཨཱ་ལ་པ་ནེ་ན. ཨཱ་པ་ཏྟིནྟི དུ་ཀྐ་ཊཱ་པ་ཏྟིཾ. སེ་སཱ ར་ཏྟི་ཉྩེ་ཝ དི་ཝཱ ཙཱཏི ཨེ་ཏྠ ཨ་རུ་ཎུ་གྒ་མ་ནེ ཨཱ་པ་ཛྫི་ཏ་བྦཱ པ་ཋ་མ་ཀ་ཐི་ནཱ་དཱི (པཱ་རཱ. ༤༥༩) ས་བྦཱ ཨཱ་པ་ཏྟི་ཡོ་པི ར་ཏྟི་ནྡི་ཝཱ་ནཾ ཝེ་མ་ཛ྄ཛྷེ་ཡེ་ཝ ཨཱ་པ་ཛྫི་ཏ་བྦ་ཏྟཱ ཏ་ཏི་ཡ་ཀོ་ཊྛཱ་ས་ཉྙེ་ཝ པ་ཝི་ཊྛཱ་ཏི ད་ཊྛ་བྦཱ. ཨ་ཐ ཝཱ ཨུ་དྡྷ་སྟེ ཨ་རུ་ཎེ ཨཱ་པ་ཛྫི་ཏ་བྦ་ཏྟཱ དི་ཝཱ ཨཱ་པ་ཛྫི་ཏ་བྦེ་སུ ཨེ་ཝ པ་ཝི་ཊྛཱ་ཏི ད་ཊྛ་བྦཱ, ཨ་ཏྠ་ངྒ་ཏེ སཱུ་རི་ཡེ བྷི་ཀྑུ་ནི་ཡོ ཨོ་ཝཱ་ད་ནཱ་པ་ཏྟི་ཡོ, པ་ན ར་ཏྟ་ནྡྷ་ཀཱ་རེ པུ་རི་སེ་ན ས་དྡྷིཾ ས་ནྟི་ཊྛ་ནཱ་པ་ཏྟི ཙ ར་ཏྟི་ཡ་ཉྙེ་ཝ ཨཱ་པ་ཛྫི་ཏ་བྦཱ.
པུ་རེ་བྷ་ཏྟཾ ཀུ་ལཱ་ནི ཨུ་པ་ས་ངྐ་མ་ན་ཨ་ན་ཏི་རི་ཏྟ་བྷོ་ཛ་ནཱ་དཱི་ནི དི་ཝཱ ཨེ་ཝ ཨཱ་པ་ཛྫི་ཏ་བྦཱ་ནི. ཀེ་ཙི པ་ན ‘‘བྷོ་ཛ་ན་པ་ཊི་སཾ་ཡུ་ཏྟཱ་ནི སེ་ཁི་ཡཱ་ནི, ག་ཎ་བྷོ་ཛ་ནཱ་དཱི་ནི ཙ དི་ཝཱ ཨེ་ཝ ཨཱ་པ་ཛྫི་ཏ་བྦཱ་ནཱི’’ཏི ཝ་ད་ནྟི. ཏ་སྨཱ ཨཱི་དི་སཱ ཨཱ་པ་ཏྟི་ཡོ མུ་ཉྩི་ཏྭཱ སེ་སཱ་ཝ ཏ་ཏི་ཡ་ཀོ་ཊྛཱ་སཾ བྷ་ཛ་ནྟཱི་ཏི ཝེ་དི་ཏ་བྦཾ.
ན ཨཱུ་ན་ད་ས་ཝ་སྶོཏི ད་ས་ཝ་སྶ་སྶ བཱ་ལ་སྶེ་ཝ པ་ཉྙ་ཏྟ་སི་ཀྑཱ་པ་ད་ཏྟཱ ཝུ་ཏྟཾ. ས་དྡྷི་ཝི་ཧཱ་རི་ཀ་ཨ་ནྟེ་ཝཱ་སི་ཀེ་སུ ཨ་ས་མྨཱ་ཝ་ཏྟ་ནཱ་པ་ཏྟིཾ, ཨ་ལ་ཛྫཱི་ནཾ ནི་སྶ་ཡ་དཱ་ནཱ་དི་མྤི ད་ས་ཝ་སྶོ་ཝ ཨཱ་པ་ཛྫ་ཏི, ཝུ་ཊྛཱ་པི་ནིཾ དྭེ ཝ་སྶཱ་ནི ཨ་ན་ནུ་བ་ནྡྷཱ་དི་མྤི ཨཱུ་ན་ད་ས་ཝ་སྶཱ ཨཱ་པ་ཛྫ་ནྟི. ཨ་བྱཱ་ཀ་ཏ་ཙི་ཏྟོཏི སུ་པ་ནྟ་སྶ བྷ་ཝ་ངྒ་ཙི་ཏྟཾ ས་ནྡྷཱ་ཡ ཝུ་ཏྟཾ.
ཨ་པྤ་ཝཱ་རེ་ནྟོཏི ཨ་ནཱ་ད་རི་ཡེ་ན ཨ་པྤ་ཝཱ་རེ་ནྟོ ཀེ་ན་ཙི པ་ཙྩ་ཡེ་ན ཨ་པྤ་ཝཱ་རེ་ཏྭཱ ཀཱ་ལ༹་པ་ཀྑ་ཙཱ་ཏུ་དྡ་སེ ས་ངྒྷེ པ་ཝཱ་རེ་ནྟེ ཏ་ཏྠ ཨ་ནཱ་ད་རི་ཡེ་ན ཨ་པྤ་ཝཱ་རེ་ནྟོ ཏ་མེ་ཝ ཨཱ་པ་ཏྟིཾ ཀཱ་ལེ༹་པི ཨཱ་པ་ཛྫ་ཏཱི་ཏི ཛུ་ཎྷེ ཨེ་ཝཱ་ཏི ནི་ཡ་མོ ན དི་སྶ་ཏི, པ་ཙྪི་མ་ཝ་སྶཾ་ཝུ་ཏྠོ པ་ན པ་ཙྪི་མ་ཀ་ཏྟི་ཀ་པུ་ཎྞ་མི་ཡ་མེ་ཝ པ་ཝཱ་རེ་ཏུཾ ལ་བྦྷ་ཏཱི་ཏི ཏ་ཏྠ ཨ་པྤ་ཝཱ་ར་ཎཱ་པ་ཙྩ་ཡཱ ཨཱ་པ་ཏྟིཾ ཨཱ་པ་ཛྫ་མཱ་ནོ ཨེ་ཝ ཛུ་ཎྷེ ཨཱ་པ་ཛྫ་ཏཱི་ཏི ནི་ཡ་མེ་ཏ་བྦོ་ཏི ད་ཊྛ་བྦཾ. ཛུ་ཎྷེ ཀ་པྤ་ཏཱིཏི ཨེ་ཏྠཱ་པི ཨེ་སེ་ཝ ན་ཡོ.
‘‘ཨ་པ་ཙྩུ་དྡྷ་རི་ཏྭཱ ཧེ་མ་ནྟེ ཨཱ་པ་ཛྫ་ཏཱི’’ཏི ཨི་མི་ནཱ ‘‘ཝ་སྶཱ་ནཾ ཙཱ་ཏུ་མཱ་སཾ ཨ་དྷི་ཊྛཱ་ཏུ’’ནྟི ནི་ཡ་མ་ཝ་ཙ་ནེ་ནེ་ཝ ཨ་པ་ཙྩུ་དྡྷ་ར་ནྟ་སྶ དུ་ཀྐ་ཊ་ནྟི ད་སྶེ་ཏི. ཝ་སྶཱ་ནུ་པ་ག་མ་ན་ཨ་ཀ་ར་ཎཱི་ཡེ་ན པ་ཀྐ་མཱ་ད་ཡོ་པི ཝ་སྶེ ཨེ་ཝ ཨཱ་པ་ཛྫ་ཏི. ཝ་ཏྠི་ཀ་མྨཱ་དི་མྤི གི་ལཱ་ནོ ཨེ་ཝ. ཨ་དྷོ་ཏ་པཱ་དེ་ཧི ཨ་ཀྐ་མ་ནཱ་དཱི་ནི་པི ཨ་ནྟོ ཨེ་ཝ ཨཱ་པ་ཛྫ་ཏི. བྷི་ཀྑུ་ནི་ཡཱ ཨ་ནཱ་པུ་ཙྪཱ ཨཱ་རཱ་མ་པྤ་ཝེ་ས་ནཱ་དི ཙ ཨ་ནྟོ་སཱི་མཱ་ཡ་མེ་ཝ. ནི་སྶ་ཡ་པ་ཊི་པ་ནྣ་སྶ ཨ་ནཱ་པུ་ཙྪཱ་དི་སཱ་པ་ཀྐ་མ་ནཱ་དི ཙ བ་ཧི་སཱི་མཱ་ཡ་མེ་ཝ. པཱ་ཏི་མོ་ཀྑུ་དྡེ་སེ ས་ནྟི་ཡཱ ཨཱ་པ་ཏྟི་ཡཱ ཨ་ནཱ་ཝི་ཀ་ར་ཎཱ་པ་ཏྟི་ས་མ་ནུ་བྷཱ་ས་ན་ཨཱུ་ན་ཝཱི་ས་ཏི་ཝ་སྶཱུ་པ་ས་མྤཱ་ད་ནཱ་དི་ས་བྦ་ཨ་དྷ་མྨ་ཀ་མྨཱ་པ་ཏྟི་ཡོ་པི ས་ངྒྷེ ཨེ་ཝ. ཨ་དྷ་མྨེ་ན ག་ཎུ་པོ་ས་ཐཱ་དཱི་སུ་པི ག་ཎཱ་དི་མ་ཛ྄ཛྷེ ཨེ་ཝ. ཨ་ལ་ཛྫི་སྶ ས་ནྟི་ཀེ ནི་སྶ་ཡ་གྒ་ཧ་ཎཱ་དི་པི པུ་གྒ་ལ་སྶ ས་ནྟི་ཀེ ཨེ་ཝ ཨཱ་པ་ཛྫ་ཏི.
ཏཱི་ཎི ཨ་དྷ་མྨི་ཀཱ་ནི ཨ་མཱུ་ལ༹ྷ་ཝི་ན་ཡ་སྶ དཱ་ནཱ་ནཱིཏི ཡོ ཨུ་མྨ་ཏྟ་ཀོ་པི ཝཱི་ཏི་ཀྐ་མ་ཀཱ་ལེ, ཨ་ནུ་མྨ་ཏྟོ ས་ཉྩི་ཙྩེ་ཝ ཨཱ་པ་ཏྟིཾ ཨཱ་པ་ཛྫི་ཏྭཱ བྷི་ཀྑཱུ་ཧི པ་ཙྪཱ ཙོ་དི་ཏོ ས་ར་མཱ་ནོ ཨེ་ཝ ‘‘ན ས་རཱ་མཱི’’ཏི ཝ་ད་ཏི, ཡོ ཙ ‘‘སུ་པི་ནཾ ཝི་ཡ ས་རཱ་མཱི’’ཏི ཝཱ མུ་སཱ ཝ་ད་ཏི, ཡོ ཙ ཨུ་མྨ་ཏྟ་ཀ་ཀཱ་ལེ ཀ་ཏཾ ས་བྦ་མྤི ས་བྦེ་སཾ ཝ་ཊྚ་ཏཱི་ཏི ཝ་ད་ཏི, ཨི་མེ་སཾ ཏི་ཎྞཾ དི་ནྣཱ་ནི ཏཱི་ཎི ཨ་མཱུ་ལ༹ྷ་ཝི་ན་ཡ་སྶ དཱ་ནཱ་ནི ཨ་དྷ་མྨི་ཀཱ་ནི.
ཨ་པ་ཀ་ཏ་ཏྟོཏི ཝི་ན་ཡེ ཨ་པ་ཀ་ཏ་ཉྙཱུ. ཏེ་ནཱ་ཧ ‘‘ཨཱ་པ་ཏྟཱ་ནཱ་པ་ཏྟིཾ ན ཛཱ་ནཱ་ཏཱི’’ཏི (པ་རི. ༣༢༥). ‘‘དི་ཊྛི་ཉྩ ཨ་ནི་སྶ་ཛྫ་ནྟཱ་ནཾ་ཡེ་ཝ ཀ་མྨཾ ཀཱ་ཏ་བྦ’’ནྟི ཨི་དཾ བྷི་ཀྑཱུ་ཧི ཨོ་ཝ་དི་ཡ་མཱ་ན་སྶ དི་ཊྛི་ཡཱ ཨ་ནི་སྶ་ཛྫ་ན་པ་ཙྩ་ཡཱ དུ་ཀྐ་ཊཾ, པཱ་ཙི་ཏྟི་ཡ་མྤི ཝཱ ཨ་ཝ་སྶ་མེ་ཝ ས་མྦྷ་ཝ་ཏཱི་ཏི ཝུ་ཏྟཾ.
མུ་ཁཱ་ལ་མྦ་ར་ཀ་ར་ཎཱ་དི་བྷེ་དོཏི མུ་ཁ་བྷེ་རཱི་ཝཱ་ད་ནཱ་དི་པྤ་བྷེ་དོ. ཨུ་པ་གྷཱ་ཏེ་ཏཱིཏི ཝི་ནཱ་སེ་ཏི. བཱི་ཛ་ནི་གྒཱ་ཧཱ་དི་ཀེཏི ཙི་ཏྟཾ བཱི་ཛ་ནིཾ གཱ་ཧེ་ཏྭཱ ཨ་ནུ་མོ་ད་ནཱ་དི་ཀ་ར་ཎེ་ཏི ཨ་ཏྠོ.
ཏི་ཀ་ཝཱ་ར་ཝ་ཎྞ་ནཱ ནི་ཊྛི་ཏཱ.
ཙ་ཏུ་ཀྐ་ཝཱ་ར་ཝ་ཎྞ་ནཱ
༣༢༤. ཙ་ཏུ་ཀྐེ་སུ སོཏི གི་ཧི་པ་རི་ཀྑཱ་རོ. ཨ་ཝཱ་པུ་ར་ཎཾ དཱ་ཏུནྟི ག་བྦྷཾ ཝི་ཝ་རི་ཏྭཱ ཨ་ནྟོ པ་རི་ཀྑཱ་ར་ཊྛ་པ་ན་ཏྠཱ་ཡ ཝི་ཝ་ར་ཎ་ཀུ་ཉྩི་ཀཾ དཱ་ཏུཾ. ས་ངྒྷ་ཏྠཱ་ཡ ཨུ་པ་ནཱི་ཏཾ ས་ཡ་མེ་ཝ ཨ་ནྟོ པ་ཊི་སཱ་མི་ཏུ་མྤི ཝ་ཊྚ་ཏི. ཏེ་ནཱ་ཧ ‘‘ཨ་ནྟོ ཋ་པཱ་པེ་ཏུ་ཉྩ ཝ་ཊྚ་ཏཱི’’ཏི.
ཨཱ་དི་ཀ་མྨི་ཀེ་སུ པ་ཋ་མཾ པུ་རི་ས་ལི་ངྒཾ ཨུ་པྤ་ཛྫ་ཏཱི་ཏི ཨཱ་ཧ ‘‘པ་ཋ་མཾ ཨུ་པྤ་ནྣ་ཝ་སེ་ནཱ’’ཏི. པཱ་ལི༹་ཡཾ ཨ་ནཱ་པ་ཏྟི ཝ་སྶ་ཙྪེ་ད་སྶཱཏི ཝ་སྶ་ཙྪེ་ད་ས་མྦ་ནྡྷི་ནི་ཡཱ ཨ་ནཱ་པ་ཏྟི་ཡཱ ཨེ་ཝ་མ་ཏྠོ. མ་ནྟ་བྷཱ་སཱཏི མ་ནྟཱ་ཡ པ་ཉྙཱ་ཡ ཀ་ཐ་ནཾ. ‘‘ན་ཝ་མ་བྷི་ཀྑུ་ནི་ཏོ པ་ཊྛཱ་ཡཱ’’ཏི ཨི་དཾ ‘‘ཨ་ནུ་ཛཱ་ནཱ་མི, བྷི་ཀྑ་ཝེ, ཨ་ཊྛ་ནྣཾ བྷི་ཀྑུ་ནཱི་ནཾ ཡ་ཐཱ་ཝུ་ཌྜྷཾ ཨ་ཝ་སེ་སཱ་ནཾ ཡ་ཐཱ་ཀ་ཏི་ཀ’’ནྟི (ཙཱུ་ལ༹་ཝ. ༤༢༦) ཝ་ཙ་ན་ཏོ ཨཱ་དི་ཏོ ཨ་ཊྛ་ནྣཾ བྷི་ཀྑུ་ནཱི་ནཾ པ་ཙྩུ་ཊྛཱ་ཏ་བྦ་ཏྟཱ ཝུ་ཏྟཾ.
‘‘ཨི་དྷ ན ཀ་པྤ་ནྟཱི་ཏི ཝ་ད་ནྟོ་པི པ་ཙྩ་ནྟི་མེ་སུ ཨཱ་པ་ཛྫ་ཏཱི’’ཏི་ཨཱ་དི་ནཱ ས་ཉྩི་ཙྩ ཀ་པྤི་ཡཾ ཨ་ཀ་པྤི་ཡ་ནྟི ཝཱ ཨ་ཀ་པྤི་ཡཾ ཀ་པྤི་ཡ་ནྟི ཝཱ ཀ་ཐེ་ནྟ་སྶ ས་བྦ་ཏྠ དུ་ཀྐ་ཊ་ནྟི ད་སྶེ་ཏི.
པུ་བྦ་ཀ་ར་ཎ་ནྟི ཝུ་ཙྩ་ཏཱིཏི ཨ་ཊྛ་ཀ་ཐཱ་སུ ཝུ་ཏྟཾ, ཏཱ་ནི ཨི་དྷ པ་རི་ཝཱ་རེ ཨུ་དྡྷ་ཊཱ་ནཱི་ཏི ཨ་དྷི་པྤཱ་ཡོ. ཨི་དྷཱ་དྷི་པྤེ་ཏཱ་ནི པ་ན ད་སྶེ་ནྟོ ‘‘ཚ་ནྡ་པཱ་རི་སུ་དྡྷཱི’’ཏི་ཨཱ་དི་མཱ་ཧ.
ཙ་ཏུ་ཀྐ་ཝཱ་ར་ཝ་ཎྞ་ནཱ ནི་ཊྛི་ཏཱ.
པ་ཉྩ་ཀ་ཝཱ་ར་ཝ་ཎྞ་ནཱ
༣༢༥. པ་ཉྩ་ཀེ་སུ ཨཱ་པུ་ཙྪི་ཏྭཱ ཙཱ་ར་སྶ ཨ་བྷཱ་ཝོཏི པི་ཎྜ་པཱ་ཏི་ཀ་སྶ ‘‘ནི་མ་ནྟི་ཏོ ས་བྷ་ཏྟོ’’ཏི ཨི་མ་སྶ ཨ་ངྒ་སྶ ཨ་བྷཱ་ཝཱ ཏེ་ན སི་ཀྑཱ་པ་དེ་ན ཏ་སྶ ས་བྦ་ཐཱ ཨ་ནཱ་པ་ཏྟཱི་ཏི ཨ་དྷི་པྤཱ་ཡོ. སུ་སཱ་ནཾ ནེ་ཏྭཱ པུ་ན ཨཱ་ནཱི་ཏ་ཀནྟི སུ་སཱ་ནེ པེ་ཏ་ཀི་ཙྩཾ ཀ་ཏྭཱ ནི་ཀྑ་ནྟེ་ཧི ནྷ་ཏྭཱ ཚ་ཌྜི་ཏཱ་ནི ནི་ཝ་ཏྠ་པཱ་རུ་ཏ་ཝ་ཏྠཱ་ནི ཨེ་ཝཾ ཝུ་ཙྩ་ནྟི.
པཱ་ལི༹་ཡཾ པ་ཉྩ་ཧཱ་ཀཱ་རེ་ཧཱིཏི པ་ཉྩ་ཧི ཨ་ཝ་ཧཱ་ར་ངྒེ་ཧི. ཝ་ཏྠུ་ཏོ པ་ན ག་རུ་ཀ་ལ་ཧུ་ཀ་བྷེ་དེ་ན པཱ་རཱ་ཛི་ཀ་ཐུ་ལླ་ཙྩ་ཡ་དུ་ཀྐ་ཊཱ་ནི ཝུ་ཏྟཱ་ནི. ཨི་ཏྠི་པུ་རི་ས་སཾ་ཡོ་གཱ་དི་ཀཾ ཀི་ལེ་ས་ས་མུ་དཱ་ཙཱ་ར་ཧེ་ཏུ་ཀཾ པ་ཊི་བྷཱ་ན་ཙི་ཏྟ་ཀ་མྨཾ ནཱ་མ. པ་ཉྷཱ་ས་ཧ་སྶཾ པུ་ཙྪཱིཏི ས་མ་ཐ་ཝི་པ་སྶ་ནཱ་ཀ་མྨ་ཊྛཱ་ནེ་སུ པ་ཉྷཱ་ས་ཧ་སྶཾ ས་མྨ་ཛྫི་ཏྭཱ ཋི་ཏཾ ད་ཧ་རཾ པུ་ཙྪི. ཨི་ཏ་རོ་པི ད་ཧ་རོ ཨ་ཏྟ་ནོ ག་ཏ་མ་གྒ་ཏྟཱ ས་བྦཾ ཝི་སྶ་ཛྫེ་སི, ཏེ་ན ཐེ་རོ པ་སཱི་དི. ཝ་ཏྟཾ པ་རི་ཙྪི་ནྡཱིཏི ཝ་ཏྟཾ ནི་ཊྛཱ་པེ་སི. ཀིཾ ཏྭཾ ཨཱ་ཝུ་སོཏི་ཨཱ་དི་ཀཾ ཐེ་རོ ཁཱི་ཎཱ་ས་ཝོ ས་མྨ་ཛྫ་ནཱ་ནི་སཾ་སཾ ས་བྦེ་སཾ པཱ་ཀ་ཊཾ ཀཱ་ཏུཾ ཨ་ཝོ་ཙཱ་ཏི ད་ཊྛ་བྦཾ.
‘‘ཛ་ཎྞུ་ཀེ་ཧི པ་ཏི་ཊྛཱ་ཡ པ་ད་ཙེ་ཏི་ཡ’’ནྟི པཱ་ཋ་སེ་སོ. ཙོ་ད་ནཾ ཀཱ་རེ་སྶཱ་མཱིཏི བྷ་ག་ཝ་ཏཱ ཨ་ཏྟཱ་ནཾ ཙོ་དཱ་པེ་སྶཱ་མི, ཨ་ཏྟཱ་ནཾ ནི་གྒ་ཎྷཱ་པེ་སྶཱ་མཱི་ཏི ཨ་ཏྠོ.
ཨེ་ཏྟ་ཀཾ ག་ཡ྄ཧཱུ་པ་གནྟི ཨེ་ཏྟ་ཀཾ ཨ་དྷི་ཀ་ར་ཎ་ཝཱུ་པ་ས་མ་ཏྠཱ་ཡ ག་ཧེ་ཏ་བྦ་ཝ་ཙ་ན་ནྟི ཡ་ཐཱ སུ་ཏྭཱ ཝི་ཉྙཱ་ཏུཾ ས་ཀྐོ་ཏི, ཨེ་ཝཾ ཨ་ནུ་གྒ་ཎྷ་ནྟོ་ཏི ཡོ་ཛ་ནཱ. ཨེ་ཏྠ ཙ ‘‘ཨ་ཏྟ་ནོ བྷཱ་ས་པ་རི་ཡ་ནྟཾ ཨ་ནུ་གྒ་ཧེ་ཏྭཱ པ་ར་སྶ བྷཱ་ས་པ་རི་ཡ་ནྟཾ ཨ་ནུ་གྒ་ཧེ་ཏྭཱ’’ཏི ཨེ་ཀཾ, ‘‘ཨ་དྷ་མྨེ་ན ཀ་རོ་ཏཱི’’ཏི ཨེ་ཀཾ, ‘‘ཨ་པྤ་ཊི་ཉྙཱ་ཡཱ’’ཏི ཨེ་ཀ་ཉྩ ཀ་ཏྭཱ པུ་རི་མེ་ཧི དྭཱི་ཧི པ་ཉྩ་ངྒཱ་ནི ཝེ་དི་ཏ་བྦཱ་ནི. ཝ་ཏྠུནྟི མེ་ཐུ་ནཱ་དི་ཝཱི་ཏི་ཀྐ་མཾ. ཀ་ཐཱ་ནུ་ས་ནྡྷི་ཝི་ནི་ཙྪ་ཡཱ་ནུ་ལོ་མ་ས་ནྡྷི་ཝ་སེ་ན ཝ་ཏྠུཾ ན ཛཱ་ནཱ་ཏཱིཏི ཙོ་ད་ཀེ་ན ཝཱ ཙུ་དི་ཏ་ཀེ་ན ཝཱ ཝུ་ཏྟ་ཀ་ཐཱ་ནུ་ས་ནྡྷི་ནཱ ཏེ་སཾ ཝ་ཙ་ན་པ་ཊི་ཝ་ཙ་ནཱ་ནུ་རཱུ་པེ་ན ཝ་ད་ནྟོ ཀ་ཐཱ་ནུ་ས་ནྡྷི་ནཱ ཝ་ཏྠུཾ ན ཛཱ་ནཱ་ཏི ནཱ་མ, ཏ་ཉྩ སུ་ཏྟ་ཝི་བྷ་ངྒེ ཝི་ནཱི་ཏ་ཝ་ཏྠུ་ས་ངྑཱ་ཏེ་ན ཝི་ནི་ཙྪ་ཡཱ་ནུ་ལོ་མེ་ནེ་ཝ ཝ་ད་ནྟོ ཝི་ནི་ཙྪ་ཡཱ་ནུ་ལོ་མ་ས་ནྡྷི་ཝ་སེ་ན ཝ་ཏྠུཾ ན ཛཱ་ནཱ་ཏི ནཱ་མ. ཉ་ཏྟི་ཀ་མྨཾ ནཱ་མ ཧོ་ཏཱིཏི ཉ་ཏྟི་ཀ་མྨཾ ནི་ཊྛི་ཏཾ ནཱ་མ ཧོ་ཏཱི་ཏི ན ཛཱ་ནཱ་ཏཱི་ཏི ས་མྦ་ནྡྷོ. ཉ་ཏྟི་ཡཱ ཀ་མྨ་པྤ་ཏྟོཏི ཉ་ཏྟི་ཡཱ ནི་ཊྛི་ཏཱ་ཡ་པི ཀ་མྨ་པྤ་ཏྟོ ཨེ་ཝ ཧོ་ཏི. ཨ་ནུ་སྶཱ་ཝ་ན་ཊྛཱ་ནེ ཨེ་ཝ ཀ་མྨཾ ནི་ཊྛི་ཏཾ ཧོ་ཏཱི་ཏི ཉ་ཏྟི་ཀ་མྨཾ ནི་ཊྛི་ཏཾ ནཱ་མ ཧོ་ཏི, ཏཾ ཉ་ཏྟི་ཡཱ ཀཱ་ར་ཎཾ ན ཛཱ་ནཱ་ཏཱི་ཏི ཨ་ཏྠོ.
པཱ་ལི༹་ཡཾ པ་ཉྩ ཝི་སུ་དྡྷི་ཡོཏི ཨཱ་པ་ཏྟི་ཏོ ཝི་སུ་དྡྷི་ཧེ་ཏུ་ཏྟཱ, ཝི་སུ་དྡྷེ་ཧི ཀ་ཏྟ་བྦ་ཏོ ཙ པཱ་ཏི་མོ་ཀྑུ་དྡེ་སཱ ཝུ་ཏྟཱ.
པ་ཉྩ་ཀ་ཝཱ་ར་ཝ་ཎྞ་ནཱ ནི་ཊྛི་ཏཱ.
ཚ་ཀྐ་ཝཱ་རཱ་དི་ཝ་ཎྞ་ནཱ
༣༢༦. ཚ་ཀྐཱ་དཱི་སུ པཱ་ལི༹་ཡཾ ཚ ཨ་གཱ་ར་ཝཱཏི བུ་དྡྷ་དྷ་མྨ་ས་ངྒྷ་སི་ཀྑཱ་སུ, ཨ་པྤ་མཱ་དེ, པ་ཊི་ས་ནྠཱ་རེ ཙ ཚ ཨ་གཱ་ར་ཝཱ, ཏེ་སུ ཨེ་ཝ ཙ ཚ གཱ་ར་ཝཱ ཝེ་དི་ཏ་བྦཱ. ‘‘ཚ་བྦ་སྶ་པ་ར་མ་ཏཱ དྷཱ་རེ་ཏ་བྦ’’ནྟི ཨི་དཾ ཝི་བྷ་ངྒེ ཨཱ་ག་ཏ་སྶ པ་ར་མ་སྶ ད་སྶ་ནཾ.
༣༢༨. པཱ་ལི༹་ཡཾ ཨཱ་ག་ཏེ་ཧི ས་ཏྟ་ཧཱིཏི ‘‘པུ་བྦེ་ཝ་སྶ ཧོ་ཏི མུ་སཱ བྷ་ཎི་སྶ’’ནྟི་ཨཱ་དི་ནཱ མུ་སཱ་ཝཱ་ད་སི་ཀྑཱ་པ་དེ (པཱ་ཙི. ༤) ཨཱ་ག་ཏེ་ཧི ས་ཏྟ་ཧི.
༣༢༩. ཏཾ ཀུ་ཏེ་ཏྠ ལ་བྦྷཱཏི ཏཾ ཨ་ན་ཏྠ་སྶ ཨ་ཙ་ར་ཎཾ ཨེ་ཏྠ ཨེ་ཏ་སྨིཾ པུ་གྒ་ལེ, ལོ་ཀ་ས་ནྣི་ཝཱ་སེ ཝཱ ཀུ་ཏོ ཀེ་ན ཀཱ་ར་ཎེ་ན ས་ཀྐཱ ལ་དྡྷུ་ནྟི ཨཱ་གྷཱ་ཏཾ པ་ཊི་ཝི་ནེ་ཏི.
༣༣༠. ས་སྶ་ཏོ ལོ་ཀོ་ཏི་ཨཱ་དི་ནཱ ཝ་སེ་ནཱཏི ‘‘ས་སྶ་ཏོ ལོ་ཀོ, ཨ་ས་སྶ་ཏོ ལོ་ཀོ. ཨ་ནྟ་ཝཱ ལོ་ཀོ, ཨ་ན་ནྟ་ཝཱ ལོ་ཀོ. ཏཾ ཛཱི་ཝཾ ཏཾ ས་རཱི་ར་ནྟི ཝཱ, ཨ་ཉྙཾ ཛཱི་ཝཾ ཨ་ཉྙཾ ས་རཱི་ར་ནྟི ཝཱ. ཧོ་ཏི ཏ་ཐཱ་ག་ཏོ པ་ར་མྨ་ར་ཎཱ, ན ཧོ་ཏི ཏ་ཐཱ་ག་ཏོ པ་ར་མྨ་ར་ཎཱ. ཧོ་ཏི ཙ ན ཧོ་ཏི ཙ ཏ་ཐཱ་ག་ཏོ པ་ར་མྨ་ར་ཎཱ, ནེ་ཝ ཧོ་ཏི ན ན ཧོ་ཏི ཏ་ཐཱ་ག་ཏོ པ་ར་མྨ་ར་ཎཱ’’ཏི (མ. ནི. ༡.༢༦༩) ཨེ་ཝཾ ཨཱ་ག་ཏཱ ད་ས ཨ་ནྟ་གྒཱ་ཧི་ཀཱ དི་ཊྛི་ཡོ ས་ནྡྷཱ་ཡ ཝུ་ཏྟཾ. མི་ཙྪཱ་དི་ཊྛི་ཨཱ་ད་ཡོཏི མི་ཙྪཱ་དི་ཊྛི་མི་ཙྪཱ་ས་ངྐ་པྤཱ་ད་ཡོ ཨ་ཊྛ་མི་ཙྪཱ་ཉཱ་ཎ་མི་ཙྪཱ་ཝི་མུ་ཏྟཱི་ཧི ས་དྡྷིཾ ད་ས མི་ཙྪ་ཏྟཱ. ཏ་ཏྠ མི་ཙྪཱ་ཉཱ་ཎནྟི མི་ཙྪཱ་དི་ཊྛི་ས་མྤ་ཡུ་ཏྟོ མོ་ཧོ. ཨ་ཝི་མུ་ཏྟ་སྶེ་ཝ ཝི་མུ་ཏྟ་ས་ཉྙི་ཏཱ མི་ཙྪཱ་ཝི་མུ་ཏྟི ནཱ་མ.
ཝི་པ་རཱི་ཏཱཏི ས་མྨཱ་དི་ཊྛི་ཨཱ་ད་ཡོ ས་མྨཱ་ཉཱ་ཎ་ས་མྨཱ་ཝི་མུ་ཏྟི་པ་རི་ཡོ་སཱ་ནཱ ད་ས. ཏ་ཏྠ ས་མྨཱ་ཝི་མུ་ཏྟི ཨ་ར་ཧ་ཏྟ་ཕ་ལཾ, ཏཾ་ས་མྤ་ཡུ་ཏྟཾ པ་ན ཉཱ་ཎཾ ཝཱ པ་ཙྩ་ཝེ་ཀྑ་ཎ་ཉཱ་ཎཾ ཝཱ ས་མྨཱ་ཉཱ་ཎནྟི ཝེ་དི་ཏ་བྦཾ.
ཨེ་ཀུ་ཏྟ་རི་ཀ་ན་ཡོ ནི་ཊྛི་ཏོ.