༤. ཨ་ཙྩེ་ནྟི་སུ་ཏྟ་ཝ་ཎྞ་ནཱ

༤. ཀཱ་ལ་ཡ་ནྟི ཁེ་པེ་ནྟཱི་ཏི ཀཱ་ལཱ. པུ་རེ་བྷ་ཏྟཱ་ད་ཡོ ཧི ཀཱ་ལཱ དྷ་མྨ་པྤ་ཝ་ཏྟི་མ་ཏྟ་ཏཱ་ཡ པ་ར་མ་ཏྠ་ཏོ ཨ་ཝི་ཛྫ་མཱ་ནཱ་པི ལོ་ཀ་ས་ངྐེ་ཏ་མ་ཏྟ་སི་དྡྷཱ ཏ་སྶཱ་ཡེ་ཝ དྷ་མྨ་པྤ་ཝ་ཏྟི་ཡཱ ག་ཏ་ག་ཏཱ་ཡ ཨ་ནི་ཝ་ཏྟ་ན་ཏོ ཏཾ ཏཾ དྷ་མྨ་པྤ་ཝ་ཏྟིཾ ཁེ་པེ་ནྟཱ ཝི་ནཱ་ས་ཡ་ནྟཱ ཝི་ཡ ས་ཡ་ཉྩ ཏཱ་ཧི ས་དྡྷིཾ ཨ་ཙྩེ་ནྟཱ ཝི་ཡ ཧོ་ནྟི. ཏེ་ནཱ་ཧ – ‘‘ཀཱ་ལོ གྷ་ས་ཏི བྷཱུ་ཏཱ་ནི, ས་བྦཱ་ནེ་ཝ ས་ཧ་ཏྟ་ནཱ’’ཏི (ཛཱ. ༡.༢.༡༩༠). ‘‘ཏ་ར་ཡ་ནྟི ར་ཏྟི་ཡོ’’ཏི ཨེ་ཏྠཱ་པི ཝུ་ཏྟ་ན་ཡེ་ནེ་ཝ ཨ་ཏྠོ ཝེ་དི་ཏ་བྦོ. ‘‘ཨེ་ཏཾ བྷ་ཡཾ མ་ར་ཎེ པེ་ཀྑ་མཱ་ནོ’’ཏི ཝུ་ཙྩ་མཱ་ན་ཏྟཱ པུ་གྒ་ལཾ མ་ར་ཎཱུ་པ་ག་མ་ནཱ་ཡ ཏ་ར་ཡ་ནྟཱི་ཏི ཨ་ཏྠོ ཝུ་ཏྟོ. ཝ་ཡོ་གུ་ཎཱཏི ཨེ་ཏྠ ཀོ་ཊྛཱ་སཱ གུ་ཎཱ. ཏི་ཏྠི་ཡཱ་ནཾ ཧི ཙ་རི་མ་ཙི་ཏྟེ་ན ས་ཀ་ལ་ཙི་ཏྟེ ཝ་ཡ་ས་མཱུ་ཧེ ཝ་ཡ་ས་མ་ཉྙཱ་ཏི ཨཱ་ཧ – ‘‘པ་ཋ་མ་མ་ཛ྄ཛྷི་མ་པ་ཙྪི་མ་ཝ་ཡཱ་ནཾ གུ་ཎཱ, རཱ་ས་ཡོ་ཏི ཨ་ཏྠོ’’ཏི. ཨཱ་ནི་སཾ་ས་ཊྛོ གུ་ཎ་ཊྛོ ‘‘ཝཱ་ཀ་ཙི་རཾ ནི་ཝཱ་སེ་སིཾ, དྭཱ་ད་ས་གུ་ཎ་མུ་པཱ་ག་ཏ’’ནྟི་ཨཱ་དཱི་སུ (བུ. ཝཾ. ༢.༣༠) ཝི་ཡ. ‘‘ཏ་ནྡི་གུ་ཎཱ་ཧཾ ཀ་རི་སྶཱ་མི, དི་གུ་ཎཾ དི་གུ་ཎཾ ཝ་དྡྷེ་ཡྻཱ’’ཏི ཙ ཨེ་ཝ་མཱ་དཱི་སུ པ་ན ཏ་བྦྷཱ་ཝ་ཝུ་ཏྟི་ཨ་ཏྠོ གུ་ཎ་ཊྛོ.

‘‘ཨ་ས་ངྑྱེ་ཡྻཱ་ནི ནཱ་མཱ་ནི, ས་གུ་ཎེ་ན མ་ཧེ་སི་ནོ;

གུ་ཎེ་ན ནཱ་མ་མུ་དྡྷེ་ཡྻཾ, ཨ་པི ནཱ་མ ས་ཧ་སྶ་ཏོ’’ཏི. (དྷ. ས. ཨ་ཊྛ. ༡༣༡༣; ཨུ་དཱ. ༥༣; པ་ཊི. མ. ཨ་ཊྛ. ༡.༡.༧༦) –

ཨཱ་དཱི་སུ པ་སཾ་ས་ཊྛོ གུ་ཎ་ཊྛོ ད་ཊྛ་བྦོ. ‘‘ཝ་ཡོ་གུ་ཎཱ ཨ་ནུ་པུ་བྦཾ ཛ་ཧ་ནྟཱི’’ཏི ཨེ་ཏྠ ཨ་ཏྠོ ‘‘ཨ་ཙྩེ་ནྟི ཀཱ་ལཱ’’ཏི ཨེ་ཏྠ ཝུ་ཏྟ་ན་ཡོ ཨེ་ཝ. པ་ཋ་མ་མ་ཛ྄ཛྷི་མ་ཝ་ཡཱཏི པ་ཋ་མ་གྒ་ཧ་ཎ་ཉྩེ་ཏྠ ཝ་ཡ་སྶ ག་ཏ་སྶ ཨ་པུ་ན་རཱ་ཝ་ཏྟི་ད་སྶ་ན་ཏྠཾ ཀ་ཏཾ. ཏེ་ནེ་ཝཱ་ཧ – ‘‘མ་ར་ཎ་ཀྑ་ཎེ པ་ན ཏ་ཡོ་པི ཝ་ཡཱ ཛ་ཧ་ནྟེ་ཝཱ’’ཏི.

ཨེ་ཏྠ ཙ པཱ་ལི༹་ཡཾ ‘‘ཨ་ཙྩེ་ནྟི ཀཱ་ལཱ’’ཏི སཱ་མ་ཉྙ་ཏོ ཀཱ་ལ་སྶ ཨ་པ་ག་མ་ནཾ ད་སྶི་ཏཾ, པུ་ན ཏཾ ཝི་སེ་ས་ཏོ་པི ད་སྶེ་ཏུཾ ཨི་ཏ་ར་དྭ་ཡཾ ཝུ་ཏྟཾ. ཨ་ཊྛ་ཀ་ཐཱ་ཡཾ པ་ན མུ་དི་ནྡྲི་ཡ་སྶ ཝ་སེ་ན ‘‘ཝ་ཡོ་གུ་ཎཱ ཨ་ནུ་པུ་བྦཾ ཛ་ཧ་ནྟཱི’’ཏི ཝུ་ཏྟཾ, མ་ཛ྄ཛྷི་མི་ནྡྲི་ཡ་སྶ ཝ་སེ་ན ‘‘ཏ་ར་ཡ་ནྟི ར་ཏྟི་ཡོ’’ཏི ཝུ་ཏྟ་ནྟི ཨ་དྷི་པྤཱ་ཡེ་ན ‘‘ཀཱ་ལཱ་ཏི པུ་རེ་བྷ་ཏྟཱ་ད་ཡོ ཀཱ་ལཱ’’ཏི ཝུ་ཏྟཾ. ཏ་སྨཱ ཏ་ཏྠ ཨཱ་དི-ས་དྡེ་ན པ་ཙྪཱ་བྷ་ཏྟ་པ་ཋ་མ་ཡཱ་མ-མུ་ཧུ་ཏྟ་ཀཱ་ལཱ་དི-ཀཱ་ལ་ཀོ་ཊྛཱ་སོ ཨེ་ཝ ཨ་ཎུ་པ་བྷེ་དོ ཀཱ་ལ་ཝི་བྷཱ་གོ ག་ཧི་ཏོ་ཏི ཝེ་དི་ཏ་བྦོ. སེ་སནྟི ཨི་དྷ དྭཱི་སུ གཱ་ཐཱ་སུ པ་ཙྪི་མ་དྡྷོ. སོ ཧི ཨི་དྷ ཨ་ཏྠ་ཏོ ཨ་དྷི་ག་ཏ་ཏྟཱ ཨ་ན་ནྟ་ར་སུ་ཏྟེ ཙ ཝུ་ཏྟ་ཏྟཱ ཨ་ཏི་དི་སི་ཏོ.

ཨ་ཙྩེ་ནྟི་སུ་ཏྟ་ཝ་ཎྞ་ནཱ ནི་ཊྛི་ཏཱ.