༢. མ་ཧཱ་རཱ་ཧུ་ལོ་ཝཱ་ད་སུ་ཏྟ་ཝ་ཎྞ་ནཱ

༡༡༣. ཨི་རི་ཡཱ་པ་ཐཱ་ནུ་བ་ནྡྷ་ནེ་ནཱཏི ཨི་རི་ཡཱ་པ་ཐ་ག་མ་ནཱ་ནུ་བ་ནྡྷ་ནེ་ན, ན པ་ཊི་པ་ཏྟི་ག་མ་ནཱ་ནུ་བ་ནྡྷ་ནེ་ན. ཨ་ཉྙ་མེ་ཝ ཧི བུ་དྡྷཱ་ནཾ པ་ཊི་པ་ཏྟི་ག་མ་ནཾ ཨ་ཉྙཾ སཱ་ཝ་ཀཱ་ནཾ. ཝི་ལཱ་སི་ཏ་ག་མ་ནེ་ནཱཏི – ‘‘དཱུ་རེ པཱ་དཾ ན ཨུ་དྡྷ་ར་ཏི, ན ཨ་ཙྩཱ་ས་ནྣེ པཱ་དཾ ནི་ཀྑི་པ་ཏི, ནཱ་ཏི་སཱི་གྷཾ ག་ཙྪ་ཏི ནཱ་ཏི་ས་ཎི་ཀ’’ནྟི་ཨཱ་དི་ནཱ (སཾ. ནི. ཨ་ཊྛ. ༣.༤.༢༤༣; ཨུ་དཱ. ཨ་ཊྛ. ༧༦; སཱ་ར་ཏྠ. ཊཱི. མ་ཧཱ་ཝ་གྒ ༣.༢༨༥) ཝུ་ཏྟེ་ན ས་བྷཱ་ཝ་སཱི་ལེ་ན བུ་དྡྷཱ་ནཾ ཙཱ་ཏུ་རི་ཡ་ག་མ་ནེ་ན. ཏ་དེ་ཝ ཧི ས་ནྡྷཱ་ཡ ‘‘པ་དེ པ་དཾ ནི་ཀྑི་པ་ནྟོ’’ཏི ཝུ་ཏྟཾ. པ་དཱ་ནུ་པ་དི་ཀོཏི རཱ་ཧུ་ལ་ཏྠེ་ར་སྶ་པི ལ་ཀྑ་ཎ་པཱ་རི་པཱུ་རི་ཡཱ ཏཱ་དི་ས་མེ་ཝ ག་མ་ན་ནྟི ཡ་ཏྟ་ཀཾ པ་དེ་སཾ ཨ་ནྟ་རཾ ཨ་ད་ཏྭཱ བྷ་ག་ཝ་ཏོ པི་ཊྛི་ཏོ ག་ནྟུཾ ཨཱ་ར་དྡྷོ, ས་བྦ་ཏྠ ཏ་མེ་ཝ ག་མ་ན་པ་དཱ་ནུ་པ་དཾ ག་ཙྪ་ཏཱི་ཏི པ་དཱ་ནུ་པ་དི་ཀོ.

ཝ་ཎྞ་ནཱ་བྷཱུ་མི ཙཱ་ཡཾ ཏ་ཏྠ བྷ་ག་ཝ་ནྟཾ ཐེ་ར་ཉྩ ཨ་ནེ་ཀ་རཱུ་པཱ་ཧི ཨུ་པ་མཱ་ཧི ཝ་ཎྞེ་ནྟོ ‘‘ཏ་ཏྠ བྷ་ག་ཝཱ’’ཏི་ཨཱ་དི་མཱ་ཧ. ནི་ཀྑ་ནྟ་ག་ཛ་པོ་ཏ་ཀོ ཝི་ཡ ཝི་རོ་ཙི་ཏྠཱ་ཏི པ་དཾ ཨཱ་ནེ་ཏྭཱ ཡོ་ཛ་ནཱ. ཨེ་ཝཾ ཏཾ ཀེ་ས་ར་སཱི་ཧོ ཝི་ཡཱཏི་ཨཱ་དཱི་སུ་པི ཨཱ་ནེ་ཏྭཱ ཡོ་ཛེ་ཏ་བྦཾ. ཏཱ་ར་ཀ་རཱ་ཛཱ ནཱ་མ ཙ་ནྡོ. དྭི་ནྣཾ ཙ་ནྡ་མ་ཎྜ་ལཱ་ནནྟི་ཨཱ་དི པ་རི་ཀ་པྤ་ཝ་ཙ་ནཾ, བུ་དྡྷཱ་ཝེ་ཎི་ཀ་ས་ནྟ་ཀཾ ཝི་ཡ བུ་དྡྷཱ་ནཾ ཨཱ་ཀ་པྤ་སོ་བྷཱ ཨ་ཧོ་སི, ཨ་ཧོ སི་རཱི་ས་མྤ་ཏྟཱི་ཏི ཡོ་ཛ་ནཱ.

ཨཱ་དི་ཡ་མཱ་ནཱཏི ག་ཎྷ་ནྟི. ‘‘པ་ཙྪཱ ཛཱ་ནི་སྶཱ་མཱ’’ཏི ན ཨ་ཛྫུ་པེ་ཀྑི་ཏ་བྦོ. ཨི་དཾ ན ཀ་ཏྟ་བྦ་ནྟི ཝུ་ཏྟེཏི ཨི་དཾ པཱ་ཎ་ཨ་ཏི་པཱ་ཏ་ནཾ ན ཀ་ཏྟ་བྦ་ནྟི ཝུ་ཏྟེ ཨི་དཾ ད་ཎྜེ་ན ཝཱ ལེ་ཌྜུ་ནཱ ཝཱ ཝི་ཧེ་ཋ་ནཾ ན ཀ་ཏྟ་བྦཾ, ཨི་དཾ པཱ་ཎི་ནཱ ད་ཎྜ་ཀ་དཱ་ན་ཉྩ ཨ་ནྟ་མ་སོ ཀུ་ཛ྄ཛྷི་ཏྭཱ ཨོ་ལོ་ཀ་ན་མ་ཏྟ་མྤི ན ཀ་ཏྟ་བྦ་མེ་ཝཱ་ཏི ན་ཡ་ས་ཏེ་ན་པི ན་ཡ་ས་ཧ་སྶེ་ན་པི པ་ཊི་ཝི་ཛ྄ཛྷ་ཏི, ཏ་ཐཱ ཨི་དྷ ཏཱ་ཝ ས་མྨ་ཛྫ་ནཾ ཀ་ཏྟ་བྦ་ནྟི ཝུ་ཏྟེ་པི ཏ་ཏྠ པ་རི་བྷ་ཎྜ་ཀ་ར་ཎཾ ཝི་ཧཱ་ར་ངྒ་ཎ་ས་མྨ་ཛྫ་ནཾ ཀ་ཙ་ཝ་ར་ཚ་ཌྜ་ནཾ ཝཱ་ལི་ཀཱ་ས་མ་ཀི་ར་ཎ་ནྟི ཨེ་ཝ་མཱ་དི་ནཱ ན་ཡ་ས་ཏེ་ན ན་ཡ་ས་ཧ་སྶེ་ན པ་ཊི་ཝི་ཛ྄ཛྷ་ཏི. ཏེ་ནཱ་ཧ – ‘‘ཨི་དཾ ཀ་ཏྟ་བྦ་ནྟི ཝུ་ཏྟེ་པི ཨེ་སེ་ཝ ན་ཡོ’’ཏི. པ་རི་བྷཱ་སནྟི ཏ་ཛྫ་ནཾ. ལ་བྷཱ་མཱིཏི པ་ཙྩཱ་སཱི་ས་ཏི.

ས་བྦ་མེ་ཏནྟི ས་བྦཾ ཨེ་ཏཾ མ་ཡི ལ་བྦྷ་མཱ་ནཾ སི་ཀྑཱ་ཀཱ་མ་ཏཾ. ཨ་བྷི་ཉྙཱ་ཡཱཏི ཛཱ་ནི་ཏྭཱ. ས་ཧཱ་ཡོཏི ར་ཊྛ་པཱ་ལ་ཏྠེ་རཾ ས་ནྡྷཱ་ཡཱ་ཧ. སོ ཧི བྷ་ག་ཝ་ཏཱ ས་དྡྷཱ་པ་བྦ་ཛི་ཏ་བྷཱ་ཝེ ཨེ་ཏ་ད་གྒེ ཋ་པི་ཏོ. དྷ་མྨཱ་ར་ཀྑོཏི ས་ཏྠུ ས་དྡྷ་མྨ་ར་ཏ་ནཱ་ནུ་པཱ་ལ་ཀོ དྷ་མྨ་བྷ་ཎྜཱ་གཱ་རི་ཀོ. པེ་ཏྟི་ཡོཏི ཙཱུ་ལ༹་པི་ཏཱ. ས་བྦཾ མེ ཛི་ན་སཱ་ས་ནནྟི ས་བྦ་མྤི བུ་དྡྷ་སཱ་ས་ནཾ མ་ཡ྄ཧ་མེ་ཝ.

ཚ་ནྡ་རཱ་གཾ ཉ་ཏྭཱཏི ཚ་ནྡ་རཱ་གཾ མ་མ ཙི་ཏྟེ ཨུ་པྤ་ནྣཾ ཉ་ཏྭཱ. ཨ་ཉྙ་ཏ་ར་སྨིཾ རུ་ཀྑ་མཱུ་ལེཏི ཝི་ཧཱ་ར་པ་རི་ཡ་ནྟེ ཨ་ཉྙ་ཏ་ར་སྨིཾ རུ་ཀྑ་མཱུ་ལ་ཊྛཱ་ནེ ཨ་ནུ་ཙྪ་ཝི་ཀེ.

ཏ་དཱཏི ཨ་གྒ་སཱ་ཝ་ཀེ་ཧི པ་སཱ་དཱ་པ་ན་ཀཱ་ལེ. ཨ་ཉྙ་ཀ་མྨ་ཊྛཱ་ནཱ་ནི ཙ་ངྐ་མ་ན་ཨི་རི་ཡཱ་པ་ཐེ་པི པི་ཊྛི་པ་སཱ་ར་ཎ་ཀཱ་ལེ་པི ས་མི་ཛ྄ཛྷ་ནྟི, ན ཨེ་ཝ་མི་ད་ནྟི ཨཱ་ཧ – ‘‘ཨི་ད་མ་སྶ ཨེ་ཏི་སྶཱ ནི་ས་ཛྫཱ་ཡ ཀ་མྨ་ཊྛཱ་ནཾ ཨ་ནུ་ཙྪ་ཝི་ཀ’’ནྟི. ཨཱ་ནཱ་པཱ་ན་སྶ་ཏིནྟི ཨཱ་ནཱ་པཱ་ན་སྶ་ཏི་ཀ་མྨ་ཊྛཱ་ནཾ.

ས་མ་སཱི་སཱི ཧོ་ཏཱིཏི ས་ཙེ ས་མ་སཱི་སཱི ཧུ་ཏྭཱ ན པ་རི་ནི་བྦཱ་ཡ་ཏི. པ་ཙྩེ་ཀ་བོ་དྷིཾ ས་ཙྪི་ཀ་རོ་ཏི ནོ ཙེ པ་ཙྩེ་ཀ་བོ་དྷིཾ ས་ཙྪི་ཀ་རོ་ཏི. ཁི་པྤཱ་བྷི་ཉྙོཏི ཁི་པྤཾ ལ་ཧུཾ་ཡེ་ཝ པ་ཏྟ་བྦ་ཚ་ལ༹་བྷི་ཉྙོ.

པ་རི་པུ་ཎྞཱཏི སོ་ལ༹་ས་སུ ཨཱ་ཀཱ་རེ་སུ ཀ་སྶ་ཙི་པི ཨ་ཏཱ་པ་ནེ་ན ས་བྦ་སོ པུ་ཎྞཱ. སུ་བྷཱ་ཝི་ཏཱཏི ས་མ་ཐ་བྷཱ་ཝ་ནཱ་ཡ ཝི་པ་སྶ་ནཱ་བྷཱ་ཝ་ནཱ་ཡ ཙ ཨ་ནུ་པུ་བྦ་ས་མྤཱ་ད་ནེ་ན སུ་བྷཱ་ཝི་ཏཱ. ག་ཎ་ནཱ་ཝི་དྷཱ་ནཱ་ནུ་པུ་བྦི་ཡཱ ཨཱ་སེ་ཝི་ཏ་ཏྟཱ ཨ་ནུ་པུ་བྦཾ པ་རི་ཙི་ཏཱ.

ཨོ་མཱ་ནཾ ཝཱཏི ཨ་ཝ་ཛཱ་ན་ནཾ ཨུ་ཉྙཱ་ཏ་ནྟི ཨེ་ཝཾ་ཝི་དྷཾ མཱ་ནཾ ཝཱ. ཨ་ཏི་མཱ་ནཾ ཝཱཏི ‘‘ཀིཾ ཨི་མེ་ཧི, མ་མེ་ཝ ཨཱ་ནུ་བྷཱ་ཝེ་ན ཛཱི་ཝི་སྶཱ་མཱི’’ཏི ཨེ་ཝཾ ཨ་ཏི་མཱ་ནཾ ཝཱ ཀུ་ཏོ ཛ་ནེ་སྶ་ཏཱི་ཏི.

༡༡༤. ཝི་ས་ངྑ་རི་ཏྭཱཏི ཝི་སཾ་ཡུ་ཏྟེ ཀ་ཏྭཱ, ཡ་ཐཱ ས་ངྒཱ་ཀཱ་རེ་ན ག་ཧ་ཎཾ ན ག་ཙྪ་ཏི, ཨེ་ཝཾ ཝི་ནི་བྷུ་ཉྫི་ཏྭཱ་ཏི ཨ་ཏྠོ. མ་ཧཱ་བྷཱུ་ཏཱ་ནི ཏཱ་ཝ ཝི་ཏྠཱ་རེ་ཏུ, ས་མྨ་ས་ནཱུ་པ་ག་ཏྟཱ, ཨ་ས་མྨ་ས་ནཱུ་པ་གཾ ཨཱ་ཀཱ་ས་དྷཱ་ཏུཾ ཨ་ཐ ཀ་སྨཱ ཝི་ཏྠཱ་རེ་སཱི་ཏི ཨཱ་ཧ ‘‘ཨུ་པཱ་དཱ་རཱུ་པ་ད་སྶ་ན་ཏྠ’’ནྟི. ཨཱ་པོ་དྷཱ་ཏུ སུ་ཁུ་མ་རཱུ་པཾ. ཨི་ཏ་རཱ་སུ ཨོ་ལཱ༹་རི་ཀ་སུ་ཁུ་མ་ཏཱ་པི ལ་བྦྷ་ཏཱི་ཏི ཨཱ་ཧ ‘‘ཨུ་པཱ་དཱ་རཱུ་པ་ད་སྶ་ན་ཏྠ’’ནྟི. ཧེ་ཊྛཱ ཙ་ཏྟཱ་རི མ་ཧཱ་བྷཱུ་ཏཱ་ནེ་ཝ ཀ་ཐི་ཏཱ་ནི, ན ཨུ་པཱ་དཱ་རཱུ་པནྟི ཏ་སྶ པ་ནེ་ཏྠ ལ་ཀྑ་ཎ་ཧཱ་ར་ན་ཡེ་ན ཨཱ་ཀཱ་ས་ད་སྶ་ནེ་ན ད་སྶི་ཏ་ཏཱ ཝེ་དི་ཏ་བྦཱ. ཏེ་ནཱ་ཧ ‘‘ཨི་མི་ནཱ མུ་ཁེ་ན ཏཾ ད་སྶེ་ཏུ’’ནྟི. ན ཀེ་ཝ་ལཾ ཨུ་པཱ་དཱ་རཱུ་པ་གྒ་ཧ་ཎ་ད་སྶ་ན་ཏྠ་མེ་ཝ ཨཱ་ཀཱ་ས་དྷཱ་ཏུ ཝི་ཏྠཱ་རི་ཏཱ, ཨ་ཐ ཁོ པ་རི་གྒ་ཧ་སུ་ཁ་ཏཱ་ཡ་པཱི་ཏི ད་སྶེ་ནྟོ ‘‘ཨ་པི་ཙཱ’’ཏི་ཨཱ་དི་མཱ་ཧ. ཏ་ཏྠ པ་རི་ཙྪི་ནྡི་ཏ་བྦ་སྶ རཱུ་པ་སྶ ནི་ར་ཝ་སེ་ས་པ་རི་ཡཱ་དཱ་ན་ཏྠཾ ‘‘ཨ་ཛ྄ཛྷ་ཏྟི་ཀེ་ནཱ’’ཏི ཝི་སེ་ས་ན་མཱ་ཧ. ཨཱ་ཀཱ་སེ་ནཱཏི ཨཱ་ཀཱ་ས་དྷཱ་ཏུ་ཡཱ ག་ཧི་ཏཱ་ཡ. པ་རི་ཙྪི་ནྣ་རཱུ་པནྟི ཏཱ་ཡ པ་རི་ཙྪི་ནྡི་ཏ་ཀ་ལཱ་པ་ག་ཏ་མྤི པཱ་ཀ་ཊཾ ཧོ་ཏི ཝི་བྷཱུ་ཏཾ ཧུ་ཏྭཱ ཨུ་པ་ཊྛཱ་ཏི.

ཨི་དཱ་ནི ཝུ་ཏྟ་མེ་ཝ་ཏྠཾ སུ་ཁ་གྒ་ཧ་ཎ་ཏྠཾ གཱ་ཐཱ་ཡ ད་སྶེ་ཏི. ཏ་སྶཱཏི ཨུ་པཱ་དཱ་ཡ་རཱུ་པ་སྶ. ཨེ་ཝཾ ཨཱ་ཝི་བྷཱ་ཝ་ཏྠནྟི ཨེ་ཝཾ པ་རི་ཙྪི་ནྣ་ཏཱ་ཡ ཨཱ་ཀཱ་ས་སྶ ཝ་སེ་ན ཝི་བྷཱུ་ཏ་བྷཱ་ཝ་ཏྠཾ. ཏནྟི ཨཱ་ཀཱ་ས་དྷཱ་ཏུཾ.

༡༡༨. ཨཱ་ཀཱ་ས་བྷཱ་ཝཾ ག་ཏནྟི ཙ་ཏཱུ་ཧི མ་ཧཱ་བྷཱུ་ཏེ་ཧི ཨ་ས་མྥུ་ཊྛཱ་ནཾ ཏེ་སཾ པ་རི་ཙྪེ་ད་ཀ་བྷཱ་ཝེ་ན ཨཱ་ཀཱ་ས་ནྟི ག་ཧེ་ཏ་བྦ་ཏཾ ག་ཏཾ, ཨཱ་ཀཱ་ས་མེ་ཝ ཝཱ ཨཱ་ཀཱ་ས་ག་ཏཾ ཡ་ཐཱ ‘‘དི་ཊྛི་ག་ཏཾ (དྷ. ས. ༣༨༡; མ་ཧཱ་ནི. ༡༢), ཨ་ཏྠ་ངྒ་ཏ’’ནྟི (ཨ. ནི. ཨ་ཊྛ. ༡.༡.༡༣༠) ཙ. ཨཱ་དི་ནྣནྟི ཨི་མ་ནྟི ཏ་ཎྷཱ་དི་ཊྛཱི་ཧི ཨཱ་དི་ནྣཾ. ཏེ་ནཱ་ཧ ‘‘ག་ཧི་ཏཾ པ་རཱ་མ་ཊྛ’’ནྟི. ཨ་ཉྙ་ཏྠ ཀ་མྨ་ཛཾ ‘‘ཨུ་པཱ་དི་ནྣ’’ནྟི ཝུ་ཙྩ་ཏི, ན ཏ་ཐཱ ཨི་དྷཱ་ཏི ཨཱ་ཧ ‘‘ས་རཱི་ར་ཊྛ་ཀ་ནྟི ཨ་ཏྠོ’’ཏི. པ་ཐ་ཝཱི་དྷཱ་ཏུ་ཨཱ་དཱི་སུ ཝུ་ཏྟ་ན་ཡེ་ནེ་ཝཱཏི མ་ཧཱ་ཧ་ཏྠི་པ་དོ་པ་མེ (མ. ནི. ༡.༣༠༠ ཨཱ་ད་ཡོ) ཝུ་ཏྟ་ན་ཡ་ད་སྶ་ནཾ ས་ནྡྷཱ་ཡ ཝ་ད་ཏི.

༡༡༩. ཏཱ་དི་བྷཱ་ཝོ ནཱ་མ ནི་ཊྛི་ཏ་ཀི་ཙྩ་སྶ ཧོ་ཏི, ཨ་ཡ་ཉྩ ཝི་པ་སྶ་ནཾ ཨ་ནུ་ཡུ་ཉྫ་ཏི, ཨ་ཐ ཀི་མ་ཏྠཾ ཏཱ་དི་བྷཱ་ཝ་ཏཱ ཝུ་ཏྟཱ་ཏི? པ་ཐ་ཝཱི་ས་མ་ཏཱ་དི་ལ་ཀྑ་ཎཱ་ཙི་ཀྑ་ཎཱ་ཧི ཝི་པ་སྶ་ནཱ་ཡ སུ་ཁ་པྤ་ཝ་ཏྟི་ཨ་ཏྠཾ. ཏེ་ནཱ་ཧ ‘‘ཨི་ཊྛཱ་ནི་ཊྛེ་སཱུ’’ཏི་ཨཱ་དི. ག་ཧེ་ཏྭཱཏི ཀུ་ས་ལ་པྤ་ཝ་ཏྟི་ཡཱ ཨོ་ཀཱ་ས་དཱ་ན་ཝ་སེ་ན པ་རི་གྒ་ཧེ་ཏྭཱ. ན པ་ཏི་ཊྛི་ཏོཏི ན ནི་སྶི་ཏོ ན ལ་གྒོ.

༡༢༠. བྲ་ཧྨ་ཝི་ཧཱ་ར་བྷཱ་ཝ་ནཱ ཨ་སུ་བྷ་བྷཱ་ཝ་ནཱ ཨཱ་ནཱ་པཱ་ན་སྶ་ཏི་བྷཱ་ཝ་ནཱ ཙ ཨུ་པ་ཙཱ་རཾ ཝཱ ཨ་པྤ་ནཾ ཝཱ པཱ་པེ་ནྟོ ཝི་པ་སྶ་ནཱ་ཡ པཱ་ད་ཀ་བྷཱ་ཝཱ་ཡ ཨ་ནི་ཙྩཱ་དི་ས་ཉྙཱ་ཡ ཝི་པ་སྶ་ནཱ་བྷཱ་ཝེ་ན ཨུ་སྶ་ཀྐི་ཏྭཱ མ་གྒ་པ་ཊི་པཱ་ཊི་ཡཱ ཨ་ར་ཧ་ཏྟཱ་དྷི་ག་མཱ་ཡ ཧོ་ཏཱི་ཏི ‘‘མེ་ཏྟཱ་དི་བྷཱ་ཝ་ནཱ་ཡ པ་ན ཧོ་ཏཱི’’ཏི ཝུ་ཏྟཾ. ཡ་ཏྠ ཀ་ཏྠ་ཙི ས་ཏྟེ་སུ ས་ངྑཱ་རེ་སུ ཙ པ་ཊི་ཧ་ཉྙ་ན་ཀི་ལེ་སོཏི ཨཱ་གྷཱ་ཏ་བྷཱ་ཝ་མེ་ཝ ཝ་ད་ཏི ཉཱ་ཡ་བྷཱ་ཝ་ཏོ ཨ་ཉྙེ་ས་མྤི. ཨ་སྨི་མཱ་ནོཏི རཱུ་པཱ་དི་ཀེ པ་ཙྩེ་ཀཾ ཨེ་ཀ་ཛ྄ཛྷཾ ག་ཧེ་ཏྭཱ ‘‘ཨ་ཡ་མ་ཧ་མ་སྨཱི’’ཏི ཨེ་ཝཾ པ་ཝ་ཏྟ་མཱ་ནོ.

༡༢༡. ཨི་དཾ ཀ་མྨ་ཊྛཱ་ནནྟི ཨེ་ཏྠ ག་ཎ་ནཱ་དི་ཝ་སེ་ན ཨཱ་སེ་ཝི་ཡ་མཱ་ནཱ ཨ་སྶཱ་ས་པ་སྶཱ་སཱ ཡོ་ག་ཀ་མྨ་སྶ པ་ཏི་ཊྛཱ་ན་ཏཱ་ཡ ཀ་མྨ་ཊྛཱ་ནཾ. ཏ་ཏྠ པ་ན ཏ་ཐཱ་པ་ཝ་ཏྟོ མ་ན་སི་ཀཱ་རོ བྷཱ་ཝ་ནཱ. ཨེ་ཏྠ ཙ ཏ་སྶེ་ཝ ཐེ་ར་སྶ བྷ་ག་ཝ་ཏཱ བ་ཧཱུ་ནཾ ཀ་མྨ་ཊྛཱ་ནཱ་ནཾ དེ་སི་ཏ་ཏྟཱ ཙ་རི་ཏཾ ཨ་ནཱ་དི་ཡི་ཏྭཱ ཀ་མྨ་ཊྛཱ་ནཱ་ནི ས་བྦེ་སཾ པུ་གྒ་ལཱ་ནཾ ས་པྤཱ་ཡཱ་ནཱི་ཏི ཨ་ཡ་མ་ཏྠོ སི་དྡྷོ, ཨ་ཏི་ས་པྤཱ་ཡ་ཝ་སེ་ན པ་ན ཀ་མྨ་ཊྛཱ་ནེ་སུ ཝི་བྷཱ་ག་ཀ་ཐཱ ཀ་ཐི་ཏཱ་ཏི ཝེ་དི་ཏ་བྦཱ.

མ་ཧཱ་རཱ་ཧུ་ལོ་ཝཱ་ད་སུ་ཏྟ་ཝ་ཎྞ་ནཱ་ཡ ལཱི་ན་ཏྠ་པྤ་ཀཱ་ས་ནཱ ས་མ་ཏྟཱ.