༥. པ་ཏྟ་ནི་དྡེ་ས་ཝ་ཎྞ་ནཱ
༦༠. ཨ་ཡོ་པ་ཏྟོ ནཱ་མ ཨ་ཡ་སཱ ཀཱ་ལ༹་ལོ་ཧེ་ན ནི་བྦ་ཏྟོ པ་ཏྟོ. ཛཱ་ཏི་ཡཱ ཨུ་ཀྐ་ཊྛཱ་དཱི་ནཾ སཱ་མ་ཉྙ་ཝ་སེ་ན. པ་མཱ་ཎ་ཏོཏི པ་རི་ཙྪེ་ད་ཏོ. ཏ་ཡོ པ་ཏྟཱ་ཏི པཱ་ཋ་སེ་སོ.
༦༡. ‘‘མ་ག་དྷེ་སཱུ’’ཏི ཝ་ཏྟ་བྦེ མ་ག་དྷེཏི ཝ་ཙ་ན་ཝི་པ་ལླཱ་སེ་ན ཝཱ ‘‘པ་ཙྩཱ་སཱ ས་ཏཱི’’ཏི་ཨཱ་དཱི་སུ ཝི་ཡ སུ-ས་དྡ་ལོ་པེ་ན ཝཱ ཝུ་ཏྟཾ. ནཱ་ལི༹་དྭ་ཡ་ཏ་ཎྜུ་ལ་སཱ་དྷི་ཏནྟི ཨེ་ཏྠ མ་ག་དྷཱ་པེ་ཀྑོ་པི ནཱ་ལི༹-ས་དྡོ དྭ་ཡ-ས་དྡེ་ན ས་མཱ་སོ ཧོ་ཏི ག་མྨ་ཀ་ཏྟཱ་ཏི ནཱ་ལི༹་ཡཱ དྭ་ཡཾ ནཱ་ལི༹་དྭ་ཡཾ. ཏ་ཏྠ མ་ག་དྷ་ནཱ་ལི༹ ནཱ་མ ཨ་ཌྜྷ་ཏེ་ར་ས་པ་ལཱ ཧོ་ཏི. ཨེ་ཏྠ ཙ ཨ་ཌྜྷ་ཏེ་ར་ས་པ་ལཱ་ནི མཱ་སཱ་ན་ནྟི ཝ་ད་ནྟི. ནཱ་ལི༹་དྭ་ཡེ་ན པ་མི་ཏཱ ཏ་ཎྜུ་ལཱ སུ་ཀོ་ཊྚི་ཏ་པ་རི་སུ་དྡྷཱ ཨ་ནུ་པ་ཧ་ཏ་པུ་རཱ་ཎ་སཱ་ལི་ཏ་ཎྜུ་ལཱ ནཱ་ལི༹་དྭ་ཡ་ཏ་ཎྜུ་ལཱ, ཏེ་ཧི སཱ་དྷི་ཏཾ པ་ཙི་ཏ་ནྟི ཨ་ཏྠོ. ཨོ་ད་ནནྟི ས་མྨཱ ས་མྤཱ་དི་ཏཾ ཨ་ཝ་སྶཱ་ཝི་ཏོ་ད་ནཾ. སཱུ་པནྟི ཨོ་ད་ན་སྶ ཙ་ཏུ་ཏྠ་བྷཱ་ག་པྤ་མཱ་ཎཾ ནཱ་ཏི་གྷ་ནཾ ནཱ་ཏི་ཏ་ནུ་ཀཾ ཧ་ཏྠ་ཧཱ་རི་ཡཾ ས་བྦ་ས་མྦྷཱ་ར་ས་ངྑ་ཏཾ མུ་གྒ་སུ་པཾ. བྱ་ཉྫ་ན་ཉྩ ཏ་དཱུ་པི་ཡནྟི ཏ་སྶ ཨོ་ད་ན་སྶ ཨུ་པི་ཡཾ ཨ་ནུ་རཱུ་པཾ ཡཱ་ཝ ཙ་རི་མཱ་ལོ་པ་པྤ་ཧོ་ན་ཀཾ མ་ཙྪ་མཾ་སཱ་དི་བྱ་ཉྫ་ན་ཉྩ ཨུ་ཀྐ་ཊྛོ ག་ཎྷཱ་ཏཱི་ཏི ས་མྦ་ནྡྷོ.
༦༢. ཏ་སྶཱཏི ཡ་ཐཱ་ཝུ་ཏྟ་ཨོ་ད་ནཱ་དི་ནོ. ཨུ་པ་ཌྜྷོཏི ཨུ་པ་ཌྜྷཾ ནཱ་ལི༹་ཀོ་ད་ནཱ་དི ཨ་སྶ ཨ་ཏྠཱི་ཏི ཨུ་པ་ཌྜྷོ. ཨེ་ཝ-ཀཱ་རེ་ན ཨ་ཏི་རེ་ཀཾ ནི་ཝ་ཏྟེ་ཏི. ཏ་ཏོཏི ཡ་ཐཱ་ཝུ་ཏྟ་ནཱ་ལི༹་ཀོ་ད་ནཱ་དི་ཏོ. ཨུ་ཀྐ་ཊྛ་ཏོ ཨུ་ཀྐ་ཊྛོ ཙ ཨོ་མ་ཀོ་མ་ཀོ ཙ ཨ་པ་ཏྟོ་ཏི ཡོ་ཛ་ནཱ. ཨོ་མ་ཀ་ཏོ ཨོ་མ་ཀོ ཨོ་མ་ཀོ་མ་ཀོ. ཨི་མི་ནཱ པུ་ན པ་ཏྟ་དྭ་ཡ་ད་སྶ་ནེ་ན པ་མཱ་ཎ་ཏོ ཏ་ཡོ་པི པ་ཏྟཱ ཝི་བྷཱ་ག་ཏོ ན་ཝ ཧོ་ནྟཱི་ཏི དཱི་པེ་ཏི. ཏ་ཏྠ ཡ་སྨིཾ མ་ག་དྷ་ནཱ་ལི༹་དྭ་ཡ་ཏ་ཎྜུ་ལོ་ད་ནཱ་དི་ཀཾ ས་བྦ་མྤི ཝ་ཌྜྷ་ན་པ་ཀྑེ ཋི་ཏཾ པ་ཀྑི་ཏྟཾ ས་ཙེ པ་ཏྟ་སྶ མུ་ཁ་ཝ་ཊྚི་ཡཱ ཧེ་ཊྛི་མ་རཱ་ཛི་ས་མཾ ཏི་ཊྛ་ཏི, སུ་ཏྟེ་ན ཝཱ ཧཱི་རེ་ན ཝཱ ཚི་ནྡ་ནྟ་སྶ སུ་ཏྟ་སྶ ཝཱ ཧཱི་ར་སྶ ཝཱ ཧེ་ཊྛི་མ་ནྟཾ ཕུ་ས་ཏི, ཨ་ཡཾ ཨུ་ཀྐ་ཊྛོ ནཱ་མ པ་ཏྟོ. ས་ཙེ ཏཾ རཱ་ཛིཾ ཨ་ཏི་ཀྐ་མྨ ཐཱུ་པཱི་ཀ་ཏཾ ཏི་ཊྛ་ཏི, ཨ་ཡཾ ཨུ་ཀྐ་ཊྛོ་མ་ཀོ ནཱ་མ པ་ཏྟོ. ས་ཙེ ཏཾ རཱ་ཛིཾ ན ས་མྤཱ་པུ་ཎཱ་ཏི ཨ་ནྟོ་ག་ཏ་མེ་ཝ, ཨ་ཡཾ ཨུ་ཀྐ་ཊྛུ་ཀྐ་ཊྛོ ནཱ་མ པ་ཏྟོ. ‘‘ཨེ་ཀཾ ནཱ་ལི༹་ཀོ་ད་ནཱ་དི ས་བྦ་མྤི པ་ཀྑི་ཏྟཾ ཝུ་ཏྟ་ན་ཡེ་ནེ་ཝ ཧེ་ཊྛི་མ་རཱ་ཛི་ས་མཾ ཏི་ཊྛ་ཏི, ཨ་ཡཾ མ་ཛ྄ཛྷི་མོ ནཱ་མ པ་ཏྟོ’’ཏི་ཨཱ་དི་ནཱ མ་ཛ྄ཛྷི་མ་མ་ཛ྄ཛྷི་མོ་མ་ཀ་མ་ཛ྄ཛྷི་མུ་ཀྐ་ཊྛཱ ཙ ‘‘ཡ་ཏྠ ཨུ་པ་ཌྜྷ་ནཱ་ལི༹་ཀོ་ད་ནཱ་དི ས་བྦ་མྤི པ་ཀྑི་ཏྟཾ ཧེ་ཊྛི་མ་རཱ་ཛི་ས་མཾ ཏི་ཊྛ་ཏི, ཨ་ཡཾ ཨོ་མ་ཀོ ནཱ་མ པ་ཏྟོ’’ཏི་ཨཱ་དི་ནཱ ཨོ་མ་ཀ་ཨོ་མ་ཀོ་མ་ཀ་ཨོ་མ་ཀུ་ཀྐ་ཊྛཱ ཙ པ་ཏྟཱ ཨུ་ཀྐ་ཊྛེ ཝུ་ཏྟ་ན་ཡེ་ནེ་ཝ ཝེ་དི་ཏ་བྦཱ. ཏེ་སུ དྭེ ཨ་པ་ཏྟཱ བྷཱ་ཛ་ན་པ་རི་བྷོ་གེ་ན པ་རི་བྷུ་ཉྫི་ཏ་བྦཱ, ནཱ་དྷི་ཊྛཱ་ནཱུ་པ་གཱ, ན ཝི་ཀ་པྤ་ནཱུ་པ་གཱ.
༦༣. ཀ་པྤོ ས་ཀོ ཨ་ཏི་རེ་ཀ་པ་ཏྟོ ད་སཱ་ཧ་པ་ར་མཾ དྷཱ་རེ་ཡྻཱ་ཏི ཡོ་ཛ་ནཱ. ཏ་ཏྠ ཀ་པྤོཏི ཀ་པྤི་ཡོ. ས་ཀོཏི ཨ་ཏྟ་ནོ ས་ནྟ་ཀོ. ཀ་པྤི་ཡ་ཏྟཱ པ་ན ཨ་ཏྟ་ས་ནྟ་ཀ་ཏྟཱ ཙ ས་ཏྟ་ནྣ་མྤི ཨ་དྷི་ཊྛཱ་ན་ཝི་ཀ་པྤ་ནཱུ་པ་ག་ཏཱ ཝེ་དི་ཏ་བྦཱ. ཏ་ཏྠ ཨ་ཡོ་པ་ཏྟོ པ་ཉྩ་ཧི པཱ་ཀེ་ཧི, མ་ཏྟི་ཀཱ་པ་ཏྟོ དྭཱི་ཧི པཱ་ཀེ་ཧི པ་ཀྐོ ཨ་དྷི་ཊྛཱ་ནཱུ་པ་གོ ཙ ཝི་ཀ་པྤ་ནཱུ་པ་གོ ཙ, ཏ་ཐཱ ཨུ་བྷོ་པི ཀཱ་ཀ་ཎི་ཀ་མ་ཏྟ་སྶཱ་པི མཱུ་ལ་སྶ ཨ་ན་ཝ་སེ་སེ་ཏྭཱ དི་ནྣེ, ས་བྦ་སོ ཨ་ཏྟ་ས་ནྟ་ཀ་ཏྟེ ཝི་ཉྙཱ་ཏེ ཙ ཨ་དྷི་ཊྛཱ་ན་ཝི་ཀ་པྤ་ནཱུ་པ་གཱ་ཏི ད་ཊྛ་བྦཾ. ཨ་ཏི་རེ་ཀ་པ་ཏྟོཏི ཨ་ན་དྷི་ཊྛི་ཏཱ་ཝི་ཀ་པྤི་ཏ་ཏཱ་ཡ ཨ་ཏི་རེ་ཀ་པ་ཏྟོ. ཨ་དྷི་ཊྛཱ་ན་པ་ཙྩུ་དྡྷཱ་རཱ པ་ནེ་ཏྠ ཙཱི་ཝ་རེ ཝུ་ཏྟཱ་ཝ. ཝི་ཀ་པྤེ་ནྟེ་ན པ་ན པ་ཏྟཱ་ནཾ ཨེ་ཀ་བ་ཧུ་བྷཱ་ཝཾ, ས་ནྣི་ཧི་ཏཱ་ས་ནྣི་ཧི་ཏ་བྷཱ་ཝ་ཉྩ ཉ་ཏྭཱ ‘‘ཨི་མཾ པ་ཏྟ’’ནྟི ཝཱ ‘‘ཨི་མེ པ་ཏྟེ’’ཏི ཝཱ ‘‘ཨེ་ཏཾ པ་ཏྟ’’ནྟི ཝཱ ‘‘ཨེ་ཏེ པ་ཏྟེ’’ཏི ཝཱ ཝ་ཏྭཱ ‘‘ཏུ་ཡ྄ཧཾ ཝི་ཀ་པྤེ་མཱི’’ཏི ཝ་ཏྟ་བྦཾ. ས་མྨུ་ཁཱ་དི་བྷེ་དོ པ་ནེ་ཏྠ ཙཱི་ཝ་རེ ཝ་ཀྑ་མཱ་ན་ན་ཡེ་ན ཝེ་དི་ཏ་བྦོ. ད་སཱ་ཧ་པ་ར་མནྟི ད་ས ཨ་ཧཱ་ནི པ་ར་མོ པ་རི་ཙྪེ་དོ ཨ་སྶཱ་ཏི ད་ཧཱ་ཧ་པ་ར་མོ, ཀཱ་ལོ, ཏཾ. ཨ་ཙྩ་ནྟ་སཾ་ཡོ་གེ ཨུ་པ་ཡོ་ག་ཝ་ཙ་ནཾ. དྷཱ་རེ་ཡྻོཏི པ་རི་བྷོ་ག་ཝ་སེ་ན དྷཱ་རེ་ཏ་བྦོ. ཏ་སྨིཾ་ཀཱ་ལེ ཨ་ཏི་ནཱ་མི་ཏེ པ་ཏྟོ ནི་སྶ་གྒི་ཡོ ཧོ་ཏཱི་ཏི ཡོ་ཛ་ནཱ. ཨ་ཏི་ནཱ་མི་ཏེཏི ཨ་ཏི་ཀྐཱ་མི་ཏེ ནི་སྶ་གྒི་ཡོ ཧོ་ཏི, ཨེ་ཀཱ་ད་སེ ཨ་རུ་ཎུ་གྒ་མ་ནེ ས་ངྒྷ་སྶ ཝཱ ག་ཎ་སྶ ཝཱ པུ་གྒ་ལ་སྶ ཝཱ པ་ད་བྷཱ་ཛ་ནཱི་ཡེ (པཱ་རཱ. ༦༠༢) ཝུ་ཏྟ་ན་ཡེ་ན པ་ཏྟོ ནི་སྶ་ཛྫི་ཏ་བྦོ ཧོ་ཏི, ཏ་ཐཱ ས་ཏི པཱ་ཙི་ཏྟི་ཡཱ་པ་ཏྟི ཙ་སྶ ཧོ་ཏཱི་ཏི ཨ་དྷི་པྤཱ་ཡོ.
༦༤. ‘‘ཨ་ཙྪེ་དཱ’’ཏི་ཨཱ་དི ཙཱི་ཝ་རེ ཝུ་ཏྟ་ན་ཡ་ཏྟཱ ཨུ་ཏྟཱ་ན་མེ་ཝ. ཨ་ཡཾ པ་ན ཝི་སེ་སོ – མ་ར་ཎུ་དྡྷ་ཊཱཏི ཨུ་དྡྷ་ར་ཎཾ ཨུ་དྡྷ་ལ༹ཾ, པ་ཙྩུ་དྡྷཱ་རོ. མ་ར་ཎ་ཉྩ ཨུ་དྡྷ་ཊ་ཉྩ མ་ར་ཎུ་དྡྷ་ཊཱ, ཏ་སྨཱ. ཚི་དྡེ་ནཱཏི ཡེ་ན ཀ་ངྒུ་སི་ཏྠཾ ནི་ཀྑ་མ་ཏི ཙེ་ཝ པ་ཝི་ས་ཏི ཙ, ཏེ་ན མུ་ཁ་ཝ་ཊྚི་ཏོ ཧེ་ཊྛཱ དྭ་ངྒུ་ལ་ཚི་དྡེ་ན. པ་ཏྟཱ་དྷི་ཊྛཱ་ན་མུ་ཛ྄ཛྷ་ཏཱིཏི པ་ཏྟོ ཨ་དྷི་ཊྛཱ་ནཾ ཨུ་ཛ྄ཛྷ་ཏི ཝི་སྶ་ཛྫ་ཏི.
༦༥. ཨི་དཱ་ནི ‘‘པ་ཏྟ’’ནྟི་ཨཱ་དི་ནཱ ཨ་ཉྙ་ཐཱ པ་རི་ཧ་ར་ཎེ དུ་ཀྐ་ཊཾ ད་སྶེ་ཏི. ཏ་ཏྠ སོ་ད་ཀཾ པ་ཏྟཾ ན པ་ཊི་སཱ་མེ་ཡྻཱ་ཏི ཡོ་ཛ་ནཱ. ན པ་ཊི་སཱ་མེ་ཡྻཱཏི གུ་ཏྟ་ཊྛཱ་ནེ ན ནི་ཀྑི་པེ་ཡྻ, ‘‘སོ་ད་ཀཾ པ་ཏྟཾ ཨུ་ཎྷེ ན ཙ ཨོ་ཏ་པེ’’ཏི་ཨཱ་དི་ནཱ ཙ ཡོ་ཛ་ནཱི་ཡཾ. ན ཙ ཨོ་ཏ་པེཏི ནེ་ཝ ཨཱི་ས་ཀཾ ཏཱ་པེ་ཡྻ. ན ནི་ད་ཧེཏི ནི་རུ་ད་ཀཾ ཀ་ཏྭཱ་པི བྷུ་སཾ ན ནི་ད་ཧེ་ཡྻ, ཝོ་ད་ཀཾ ཀ་ཏྭཱ ཨཱི་ས་ཀཾ ཏཱ་པེ་ཡྻཱ་ཏི་པི བྱ་ཏི་རེ་ཀ་ཏྠོ. བྷཱུ་མྱཱ ན ཋ་པེཏི ཁ་རཱ་ཡ བྷཱུ་མི་ཡཱ ན ཋ་པེ་ཡྻ. ཡ་ཏྠ པ་ན ཝ་ཎྞོ ན དུ་སྶ་ཏི, ཨེ་ཝ་རཱུ་པཱ་ཡ མ་ཏྟི་ཀཱ་ཡ པ་རི་བྷ་ཎྜ་ཀ་ཏཱ་ཡ བྷཱུ་མི་ཡཱ ཝཱ ཏ་ཐཱ་རཱུ་པཱ་ཡ ཨེ་ཝ ཝཱ་ལི་ཀཱ་ཡ ཝཱ ནི་ཀྐུ་ཛྫི་ཏྭཱ ཨུ་ཀྐུ་ཛྫི་ཏྭཱ ཋ་པེ་ཏུཾ ཝ་ཊྚ་ཏི. ནོ ཙ ལ་གྒ་ཡེཏི བྷི་ཏྟི་ཁི་ལཱ་དཱི་སུ ན ཨོ་ལ་མྦེ་ཡྻ.
༦༦. ‘‘མི་ཌྜྷ་ནྟེ ཝཱ’’ཏི་ཨཱ་དི་ནཱ ཝ་ཏྭཱ པ་ཏྟཾ ཋ་པེ་ཏུཾ ན ཙ ཀ་པྤ་ཏཱི་ཏི ཡོ་ཛེ་ཏ་བྦཾ. མི་ཌྜྷ་ནྟེཏི ཨཱ་ལི༹་ནྡ་ཀ་མི་ཌྜྷི་ཀཱ་དཱི་ནཾ མི་ཌྜྷཱི་ནཾ ཨ་ནྟེ. ས་ཙེ པ་ན པ་རི་ཝ་ཏྟེ་ཏྭཱ ཏ་ཏྠེ་ཝ པ་ཏི་ཊྛཱ་ཏི, ཨེ་ཝ་རཱུ་པཱ་ཡ ཝི་ཏྠི་ཎྞཱ་ཡ མི་ཌྜྷི་ཡཱ ཋ་པེ་ཏུཾ ཝ་ཊྚ་ཏི. པ་རི་བྷ་ཎྜ་ནྟེ ཝཱཏི བཱ་ཧི་ར་པ་སྶེ ཀ་ཏཱ་ཡ ཏ་ནུ་ཀཱ་ཡ མི་ཌྜྷི་ཀཱ་ཡ ཨ་ནྟེ ཝཱ. ཨེ་ཏྠ ཝཱ-ས་དྡོ ས་མུ་ཙྩ་ཡེ, སོ ཙ པ་ཙྩེ་ཀཾ ཡོ་ཛེ་ཏ་བྦོ. ཨ་ངྐེ པ་ན ཨཾ་ས་བ་དྡྷ་ཀེ་ན ཨཾ་ས་ཀཱུ་ཊེ ལ་གྒེ་ཏྭཱ ཋ་པེ་ཏུ་ཉྩ ཝ་ཊྚ་ཏི. ཚ་ཏྟེ་པི བྷ་ཎྜ་ཀེ་ན ས་དྡྷིཾ བ་ནྡྷི་ཏྭཱ ཝཱ ཨ་ཊྚཾ ཀ་ཏྭཱ ཝཱ ཋ་པེ་ཏུཾ ཝ་ཊྚ་ཏི. མ་ཉྩེ་པི ཨ་ཉྙེ་ན ས་དྡྷིཾ བ་ནྡྷི་ཏྭཱ ཋ་པེ་ཏུཾ, ཨ་ཊ་ནི་ཡཾ བ་ནྡྷི་ཏྭཱ ཨོ་ལ་མྦེ་ཏུཾ ཝ་ཊྚ་ཏི.
༦༧. པ་ཏྟེ་ན ཨུ་ཙྪི་ཊྛོ་ད་ཀ་ཉྩ ཙ་ལ་ཀ་ཊྛི་ཀ་ཉྩ ན ནཱི་ཧ་རེ་ཡྻཱ་ཏི ས་མྦ་ནྡྷོ. ཨུ་ཙྪི་ཊྛོ་ད་ཀནྟི མུ་ཁ་ཝི་ཀྑཱ་ལ་ནོ་ད་ཀཾ. ཙ་ལ་ཀཱ་ནི ཙ ཙ་བྦེ་ཏྭཱ ཨ་པ་ཝི་དྡྷཱ་མི་སཱ་ནི ཨ་ཊྛི་ཀཱ་ནི མ་ཙྪ་མཾ་ས་ཨ་ཊྛི་ཀཱ་ནི ཙ ཙ་ལ་ཀ་ཊྛི་ཀཾ. པ་ཏྟཾ པ་ཊི་གྒ་ཧཾ ཀ་ཏྭཱ ཧ་ཏྠཾ དྷོ་ཝི་ཏུ་མྤི ཧ་ཏྠ་དྷོ་ཏཱ་དི ཨུ་ད་ཀ་མྤི པ་ཏྟེ ཨཱ་ཀི་རི་ཏྭཱ ནཱི་ཧ་རི་ཏུ་མྤི ཨ་ནུ་ཙྪི་ཊྛཾ སུ་དྡྷ་པ་ཏྟཾ ཨུ་ཙྪི་ཊྛ་ཧ་ཏྠེ་ན ག་ཎྷི་ཏུ་མྤི ན ཝ་ཊྚ་ཏི. མ་ཙྪ་མཾ་ས་ཕ་ལཱ་ཕ་ལཱ་དཱི་ནི ཁཱ་ད་ནྟོ ཡཾ ཏ་ཏྠ ཨ་ཊྛིཾ ཝཱ ཙ་ལ་ཀཾ ཝཱ ཚ་ཌྜེ་ཏུ་ཀཱ་མོ ཧོ་ཏི, ཏཾ པ་ཏྟེ ཋ་པེ་ཏུཾ ན ལ་བྷ་ཏི. མུ་ཁ་ཏོ ནཱི་ཧ་ཊཾ པ་ན ཡཾ ཀི་ཉྩི པུ་ན ཨ་ཁཱ་དི་ཏུ་ཀཱ་མོ པ་ཏྟེ ཋ་པེ་ཏུཾ ན ལ་བྷ་ཏི. སི་ངྒི་ཝེ་རཱ་དཱི་ནི ཌཾ་སི་ཏྭཱ པུ་ན ཋ་པེ་ཏུཾ ལ་བྷ་ཏི. པ་ཏྟ་ཧ་ཏྠོཏི པ་ཏྟོ ཧ་ཏྠེ ཡ་སྶཱ་ཏི ཝི་གྒ་ཧོ. ‘‘པ་ཏྟ་ཧ་ཏྠོ, ཀ་ཝཱ་ཊ’’ནྟི ཙ ཨུ་པ་ལ་ཀྑ་ཎ་མེ་ཏཾ. ཡ་ཏྠ ཀ་ཏྠ་ཙི ས་རཱི་རཱ་ཝ་ཡ་ཝེ པ་ན པ་ཏྟ་སྨིཾ ས་ཏི ཡེ་ན ཀེ་ན་ཙི ས་རཱི་རཱ་ཝ་ཡ་ཝེ་ན ཀ་ཝཱ་ཊཾ པ་ཎཱ་མེ་ཏུཾ, གྷ་ཊི་ཀཾ ཝཱ ཨུ་ཀྑི་པི་ཏུཾ, སཱུ་ཙིཾ ཝཱ ཀུ་ཉྩི་ཀཱ་ཡ ཨ་ཝཱ་པུ་རི་ཏུཾ ན ལ་བྷ་ཏི. ཨཾ་ས་ཀཱུ་ཊེ པ་ན པ་ཏྟཾ ལ་གྒེ་ཏྭཱ ཡ་ཐཱ་སུ་ཁཾ ཨ་ཝཱ་པུ་རི་ཏུཾ ལ་བྷ་ཏི.
༦༨. བྷཱུ་མི་ཡཱ བྷཱུ་མི་ས་མྦ་ནྡྷཱི ཨཱ་དྷཱ་ར་ཀོ, ཏ་སྨིཾ ད་ནྟ་ཝ་ལླི་ཝེ་ཏྟཱ་དཱི་ཧི ཀ་ཏེ ཝ་ལ་ཡཱ་དྷཱ་ར་ཀེ ཙ ཨེ་ཀ་དཱ་རུ་ནཱ ཀ་ཏེ དཱ་རུ་ཨཱ་དྷཱ་ར་ཀེ ཙ བ་ཧཱུ་ཧི ད་ཎྜེ་ཧི ཀ་ཏེ ད་ཎྜཱ་དྷཱ་ར་ཀེ ཙ ཡ་ཏྠ ཋ་པི་ཏོ པ་ཏྟོ ཡ་ཐཱ པ་རི་ཝ་ཏྟི་ཏྭཱ ན པ་རི་པ་ཏ་ཏི, ཏ་ཐཱ སུ་ཊྛུ ས་ཛྫི་ཏེ ཏ་སྨིཾ པ་ཏྟ་སྶུ་པ་རི པ་ཏྟོ་ཏི ཨེ་ཝ་རཱུ་པེ དུ་ཝེ པ་ཏྟེ ཋ་པེ་ཡྻཱ་ཏི པ་ད་ཏྠ་ཡོ་ཛ་ནཱ. བྷ་མ་ཀོ་ཊི་ས་དི་སོ པ་ན དཱ་རུ་ཨཱ་དྷཱ་ར་ཀོ ཏཱི་ཧི ད་ཎྜ་ཀེ་ཧི བ་དྡྷོ ད་ཎྜཱ་དྷཱ་ར་ཀོ ཙ ཨེ་ཀ་སྶ་པི པ་ཏྟ་སྶ ཨ་ནོ་ཀཱ་སོ, ཏ་ཏྠ ཋ་པེ་ཏྭཱ་པི ཧ་ཏྠེ་ན ག་ཧེ་ཏྭཱ ནི་སཱི་དི་ཏ་བྦཾ. བྷཱུ་མི་ཡནྟི ཀ་ཊ་སཱ་ར་ཀཱ་དི་ནཱ ཨ་ཏྠ་ཏཱ་ཡ བྷཱུ་མི་ཡཱ པ་ན ནི་ཀྐུ་ཛྫི་ཏྭཱ ཝཱ པ་ཊི་ཀུ་ཛྫི་ཏྭཱ ཝཱ ཨེ་ཀཾ པ་ཏྟཾ ཋ་པེ་ཡྻཱ་ཏི ཡོ་ཛ་ནཱ.
༦༩. ཨི་དཱ་ནི ཨ་ཀ་པྤི་ཡ་པ་ཏྟེ ད་སྶེ་ཏི ‘‘དཱ་རཱུ’’ཏི་ཨཱ་དི་ནཱ. ཏ་ཏྠ སུ་ཝ་ཎྞ་མེ་ཝ སོ་ཝ་ཎྞཾ. དཱ་རུ ཙ རཱུ་པི་ཡ་ཉྩ སོ་ཝ་ཎྞ་ཉྩ མ་ཎི ཙ ཝེ་ལུ༹་རི་ཡ་ཉྩ དཱ་རུ…པེ… ཝེ་ལུ༹་རི་ཡཱ་ནི, ཏེ་ཧི ནི་བྦ་ཏྟཱ དཱ་རུ…པེ… མ་ཡཱ. དཱི་གྷོ པ་ན ‘‘ཝེ་ལུ༹་རི་ཡཱ་མ་ཡཱ’’ཏི གཱ་ཐཱ་བ་ནྡྷ་སུ་ཁ་ཏྠཾ ཀ་ཏོ. ཨེ་ཝ་མུ་པ་རི་པི ཏཱ་དི་སཾ ཝི་ཉྙེ་ཡྻཾ. ཏ་ཏྠ ཨི་ནྡ་ནཱི་ལཱ་དི མ་ཎི ནཱ་མ. ཀཾ་སོ ཙ ཀཱ་ཙོ ཙ ཏི་པུ ཙ སཱི་ས་ཉྩ ཕ་ལི་ཀཱ ཙ ཏ་མྦ་ལོ་ཧོ ཙཱ་ཏི དྭ་ནྡོ, ཏེ་ཧི ཛཱ་ཏཱ ཀཾ་ས…པེ… ཛཱ. ཏ་ཏྠ ཀཾ་ས-ས་དྡེ་ན ཝ་ཊྚ་ལོ་ཧོ་པི ས་ངྒ་ཧི་ཏོ. སེ་ཏཾ ཏི་པུ, ཀ་ཎྷཾ སཱི་སཾ.
༧༠. ཚ་ཝ་སཱི་ས་མ་ཡོཏི ཚ་ཝ་སྶ མ་ཏ་མ་ནུ་སྶ་སྶ སཱི་སཾ སཱི་ས་ཀ་པཱ་ལཾ, ཏེ་ན ནི་བྦ་ཏྟོ ཚ་ཝ་སཱི་ས་མ་ཡོ. གྷ་ཊི ཙ ཏུ་མྦ་ཉྩ, ཏེ་སཾ ཀ་ཊཱ་ཧོ, ཏེ་ཧི ཛཱ་ཏཱ་ཏི གྷ་ཊི་ཏུ་མྦ་ཀ་ཊཱ་ཧ་ཛཱ. ཏ་ཏྠ གྷ་ཊཱིཏི གྷ་ཊོ་ཡེ་ཝ. ཏུ་མྦཾ ཨ་ལཱ་བུ. ཨི་ཏི ཨི་མེ ས་བྦེ པ་ཏྟཱ ཨ་ཀ་པྤི་ཡཱ ཝུ་ཏྟཱ, དུ་ཀྐ་ཊ་ཝ་ཏྠུ་ཀཱ ཙ ཝུ་ཏྟཱ་ཏི ཡོ་ཛ་ནཱ. ཏ་ཏྠ རཱུ་པི་ཡཱ་དཱི་སུ ཙ་ཏཱུ་སུ ས་ཙེ གི་ཧཱི བྷ་ཏྟ་གྒེ་སུ སུ་ཝ་ཎྞ་ཏ་ཊྚ་ཀཱ་དཱི་སུ བྱ་ཉྫ་ནཾ ཀ་ཏྭཱ ཨུ་པ་ནཱ་མེ་ནྟི, ཨཱ་མ་སི་ཏུཾ ན ཝ་ཊྚ་ཏི. ཀཾ་ས་ཀཱ་ཙ་ཕ་ལི་ཀ་ཛཱ་ནི པ་ན ཏ་ཊྚ་ཀཱ་དཱི་ནི བྷཱ་ཛ་ནཱ་ནི པུ་གྒ་ལི་ཀ་པ་རི་བྷོ་གེ་ནེ་ཝ ན ཝ་ཊྚ་ནྟི, ས་ངྒྷི་ཀ་པ་རི་བྷོ་གེ་ན ཝཱ གི་ཧི་ཝི་ཀ་ཊཱ་ནི ཝཱ ཝ་ཊྚ་ནྟི. གྷ་ཊི་ཏུ་མྦ་ཀ་ཊཱ་ཧ་ཛཱ པ་ན ལ་བྷི་ཏྭཱ པ་རི་ཧ་རི་ཏུཾ ན ཝ་ཊྚ་ནྟི, ཏཱ་ཝ་ཀཱ་ལི་ཀཾ པ་རི་བྷུ་ཉྫི་ཏུཾ ཝ་ཊྚ་ནྟི.
པ་ཏྟ་ནི་དྡེ་ས་ཝ་ཎྞ་ནཱ ནི་ཊྛི་ཏཱ.