༣༤. པ་ཐ་ཝཱི་ནི་དྡེ་ས་ཝ་ཎྞ་ནཱ
༢༤༢. ཛཱ་ཏཱ་ཛཱ་ཏཱ་ཏི དུ་ཝི་དྷཱཏི ཛཱ་ཏཱ པ་ཐ་ཝཱི ཨ་ཛཱ་ཏཱ པ་ཐ་ཝཱི་ཏི པ་ཐ་ཝཱི དུ་ཝི་དྷཱ་ཏི ཨ་ཏྠོ. ཨི་མི་ནཱ ཛཱ་ཏ་པ་ཐ་ཝི་ཉྩ ཨ་ཛཱ་ཏ་པ་ཐ་ཝི་ཉྩ ད་སྶེ་ཏི. ཏཱ་སཾ ཝི་བྷཱ་གཾ ད་སྶེ་ཏི ‘‘སུ་དྡྷཱ’’ཏི་ཨཱ་དི་ནཱ. སུ་དྡྷ་མ་ཏྟི་ཀ་པཾ་སུ་ཀཱ ཙ ཨ་ད་ཌྜྷཱ ཙ བ་ཧུ་མ་ཏྟི་ཀ་པཾ་སུ་ཀཱ ཙ ཙཱ་ཏུ་མཱ་སཱ་དྷི་ཀོ་ཝ་ཊྛ་པཾ་སུ་མ་ཏྟི་ཀ་རཱ་སི ཙ ཛཱ་ཏཱ པ་ཐ་ཝཱི་ཏི ས་མྦ་ནྡྷོ. མ་ཏྟི་ཀཱ ཙ པཾ་སུ ཙཱ་ཏི དྭ་ནྡོ. སུ་དྡྷཱ ཨ་པྤ་ས་ཀྑ་རཱ་དི་ཏཱ་ཡ མ་ཏྟི་ཀཱ པཾ་ས་ཝོ ཡ་སྶཱ་ཏི བཱ་ཧི་ར་ཏྠོ. ཨ་ད་ཌྜྷཱཏི ཨུ་དྡྷ་ན་པ་ཙ་ནཱ་དི་ཝ་སེ་ན ཏ་ཐཱ ཏ་ཐཱ ཨ་ད་ཌྜྷཱ. སཱ པ་ན ཝི་སུཾ ན་ཏྠི, སུ་དྡྷ་མ་ཏྟི་ཀཱ་དཱི་སུ ཨ་ཉྙ་ཏ་རཱ་ཝ ཝེ་དི་ཏ་བྦཱ. ཙ་ཏྟཱ་རོ མཱ་སཱ, ཏེ་ཧི ས་ཧི་ཏོ ཨ་ཏི་རེ་ཀོ ཀཱ་ལོ, ཏ་སྨིཾ ཨོ་ཝ་ཊྛོ་ཏི ས་མཱ་སོ. ཨོ་ཝ་ཊྛོཏི ཡེ་ན ཀེ་ན་ཙི ཨུ་ད་ཀེ་ན ཨོ་ཝ་ཊྛོ. བུ་དྷཱ པ་ན ‘‘ཨཱ་ཀཱ་ས་ཏོ ཝུ་ཊྛ་ཨུ་ད་ཀེ་ནེ་ཝ, ན ཨ་ཉྙ་ཏྠ པ་ཧ་རི་ཏྭཱ པ་ཏི་ཏ་བི་ནྡུ་ནཱ’’ཏི ཝ་ད་ནྟི, ‘‘ཨོ་ཝ་ཊྛོ’’ཏི སཱ་མ་ཉྙེ་ན ཝུ་ཏྟ་ཏྟཱ ཙ ‘‘པོ་ཀྑ་ར་ཎི་ཡཱ ཋི་ཏ་ཏ་ནུ་ཀ་དྡ་མོ ཝ་ཊྚ་ཏི, བ་ཧ་ལོ ཏུ ན ཝ་ཊྚ་ཏཱི’’ཏི (པཱ་ཙི. ཨ་ཊྛ. ༨༦) ཝུ་ཏྟ་ཏྟཱ ཙ ‘‘ཝི་ན་ཡ་ཝི་ནི་ཙྪ་ཡེ ས་མྤ་ཏྟེ ག་རུ་ཀེ ཋཱ་ཏ་བྦ’’ནྟི ཝི་ན་ཡ་ལ་ཀྑ་ཎ་ཏོ ཙ ན ཏཾ ཡུ་ཛྫ་ཏཱི་ཏི ཨ་མྷཱ་ཀཾ ཁ་ནྟི. པཾ་སུ་མ་ཏྟི་ཀཱ་ནཾ རཱ་སི པཾ་སུ་མ་ཏྟི་ཀ་རཱ་སི. ཙ་ཏུ…པེ… ཝ་ཊྛོ པཾ་སུ་མ་ཏྟི་ཀ་རཱ་སི ཡ་སྶཱ་ཏི ཨ་ཉྙ་པ་ད་ཏྠོ, ཀ་མྨ་དྷཱ་ར་ཡོ ཝཱ.
༢༤༣. ཝཱ་ལུ་ཀཱ ཙ ད་ཌྜྷཱ ཙ ཡེ་བྷུ་ཡྻ་ས་ཀྑ་རཱ་དི་མ་ཧཱི་པི ཙ ཙཱ་ཏུ་མཱ་སོ་མ་ཝ་ཊྛ་ཀོ ཝུ་ཏྟ་རཱ་སི ཙ དུ་ཏི་ཡཱ བྷཱུ་མཱི་ཏི ས་མྦ་ནྡྷོ ས་ཀྑ་རཱ ཙ པཱ་སཱ་ཎཱ ཙ མ་རུ་མྦཱ ཙ ཀ་ཐ་ལཱ ཙ ཝཱ་ལུ་ཀཱ ཙཱ་ཏི དྭ་ནྡོ. སུ་དྡྷཱ ས་ཀྑ་ར…པེ… ཝཱ་ལུ་ཀཱ ཡ་སྶཱ་ཏི ཝི་གྒ་ཧོ. ཧ་ཏྠ་མུ་ཊྛི་ནཱ ག་ཧེ་ཏ་བྦ་པྤ་མཱ་ཎཱ ས་ཀྑ་རཱ, ཏ་ཏོ ཨུ་པ་རི པཱ་སཱ་ཎཱ, ཀ་ཊ་ས་ཀྑ་རཱ མ་རུ་མྦཱ, ཀ་པཱ་ལ་ཁ་ཎྜཱ་ནི ཀ་ཐ་ལཱཏི ཝེ་དི་ཏ་བྦཱ. དུ་ཏི་ཡཱཏི ཨ་ཛཱ་ཏཱ. ཝུ་ཏྟ་རཱ་སཱིཏི ཝུ་ཏྟོ མ་ཏྟི་ཀ་པཾ་སུ་སི་རཱ.
༢༤༤. ཀཱི་དི་སཱི ཡེ་བྷུ་ཡུ་མ་ཏྟི་ཀཱ་དཱི་ཏི ཨཱ་ཧ ‘‘དྭེ བྷཱ་གཱ’’ཏི་ཨཱ་དི. ཡ་སྶ བྷཱུ་མི་ཡཱཏི ཡ་སྶཱ བྷཱུ་མི་ཡཱ. སེ་སེ་སུ་པཱིཏི ཡེ་བྷུ་ཡྻ་པཾ་སུ་ཡེ་བྷུ་ཡྻ་ས་ཀྑ་ར་ཡེ་བྷུ་ཡྻ་པཱ་སཱ་ཎཱ་དཱི་སུ.
༢༤༥. ‘‘པཱ་ཙི་ཏྟཱི’’ཏི་ཨཱ་དི་ནཱ ཏ་ཏྠ ཝི་ནི་ཙྪ་ཡཾ ད་སྶེ་ཏི. ཛཱ་ཏེ ཛཱ་ཏ་ས་ཉྙི་སྶ ཁ་ཎ་ནེ པཱ་ཙི་ཏྟཱི་ཏི ས་མྦ་ནྡྷོ. ཛཱ་ཏེཏི ཛཱ་ཏེ བྷཱུ་མི་བྷཱ་གེ, ལི་ངྒ་ཝི་པ་ལླཱ་སོ ཝཱ, ཛཱ་ཏཱ་ཡཱ་ཏི ཝུ་ཏྟཾ ཧོ་ཏི. ཛཱ་ཏེ དྭེ་ལ༹ྷ་སྶ ཝི་མ་ཏི་སྶ དུ་ཀྐ་ཊ་ནྟི ས་མྦ་ནྡྷོ. ཛཱ་ཏེ ཨ་ཛཱ་ཏ་ས་ཉྙི་སྶ ཨ་ནཱ་པ་ཏྟི. ཏ་ཐཱ ཨཱ་ཎཱ་པ་ནེ ཨ་ནཱ་པ་ཏྟཱི་ཏི ཡོ་ཛ་ནཱ. ཨ་ཛཱ་ཏ་ས་ཉྙི་སྶཱཏི ཨ་ཛཱ་ཏཱ་ཏི ས་ཉྙཱ ཨ་ཛཱ་ཏ་ས་ཉྙཱ, སཱ ཨ་སྶ ཨ་ཏྠཱི་ཏི ཨ་ཛཱ་ཏ་ས་ཉྙཱི, ཏ་སྶ.
༢༤༦. ཨེ་ཀཱ་ཡཱ་ཎ་ཏྟི་ཡཱ ཨེ་ཀཱཏི ས་ཙེ ས་ཀིཾ ཨཱ་ཎ་ཏྟོ དི་ཝ་ས་མྤི ཁ་ཎ་ཏི, ཨཱ་ཎཱ་པ་ཀ་སྶ ཨེ་ཀཱ ཨེ་ཝ ཨཱ་པ་ཏྟཱི་ཏི ཨ་ཏྠོ. ཝཱ་ཙ་སོ ཨཱ་པ་ཏྟཱི་ཏི ས་མྦ་ནྡྷོ. ཝཱ་ཙ་སོཏི ཝི་ཙྪཱ་ཡཾ སོ, ཝཱ་ཙཱ་ཡ ཝཱ་ཙཱ་ཡཱ་ཏི ཨ་ཏྠོ.
༢༤༧. ‘‘ཨི་མཾ ཋཱ་ནཾ ཁ་ཎ ཝཱ’’ཏི་ཨཱ་དི་ནཱ ཡོ་ཛེ་ཏ་བྦཾ. ‘‘ཨེ་ཏྠ ཨ་གྒིཾ ཛཱ་ལེ་ཧི ཝཱ’’ཏི ཡོ་ཛ་ནཱ. ‘‘ཝ་ཏྟུ’’ནྟི ཨི་དཾ ‘‘ན ཝ་ཊྚ་ཏཱི’’ཏི ཨི་མ་སྶ ཀ་ཏྟུ་པ་ད་ཝ་ཙ་ན་ནྟི ཨ་ཏྠོ. ཨ་ཐ ཝཱ ‘‘ཨི་མཾ ཋཱ་ནཾ ཁ་ཎཱ’’ཏི་ཨཱ་དི་པྤ་ཀཱ་རོ ཝ་ཙ་ནཱ་ཡ ན ཝ་ཊྚ་ཏཱི་ཏི ཨ་ཏྠོ. ནི་ཡ་མེ་ཏྭཱཏི ཨི་མི་ནཱ ‘‘ཨཱ་ཝཱ་ཊཾ ཁ་ཎ, ཀ་ནྡཾ ཁ་ཎཱ’’ཏི་ཨཱ་དི་ནཱ ཨ་ནི་ཡ་མེ་ཏྭཱ ཝ་ཏྟུཾ ཝ་ཊྚ་ཏཱི་ཏི དཱི་པེ་ཏི.
༢༤༨. ‘‘ཨི་མ་སྶ ཐ་མྦྷ་སྶ ཨཱ་ཝཱ་ཊཾ ཛཱ་ན ཝཱ, ཀ་པྤི་ཡཾ ཀ་རོ་ཧི ཝཱ’’ཏི ཙ ‘‘མ་ཏྟི་ཀཾ ཛཱ་ན ཝཱ, མ་ཏྟི་ཀཾ ཨཱ་ཧ་ར ཝཱ, མ་ཏྟི་ཀཾ ཀ་པྤི་ཡཾ ཀ་རོ་ཧི ཝཱ’’ཏི ཙ ཨེ་དི་སཾ ཝ་ཙ་ནཾ ཝ་ཊྚ་ཏཱི་ཏི ས་མྦ་ནྡྷོ. ཨེ་ཏཾ ཝི་ཡ དི་སྶ་ཏཱི་ཏི ཨེ་དི་སཾ, ཀིཾ ཏཾ? ‘‘མ་ཏྟི་ཀཾ དེ་ཧཱི’’ཏི་ཨཱ་དི་ཀཾ ཨུ་པ་མེ་ཡྻཾ. ‘‘མ་ཏྟི་ཀཾ ཛཱ་ནཱ’’ཏི་ཨཱ་དི་ཀཾ པ་ན ཨུ་པ་མཱ་ནཾ, ཏེ་སཾ ཨུ་པ་མཱ་ནོ་པ་མེ་ཡྻཱ་ནཾ ཡཱ ཀ་པྤི་ཡ་ས་ངྑཱ་ཏཱ ས་མཱ་ན་དྷ་མྨ་ཏཱ, སཱ ཨུ་པ་མཱ. ཏ་ཐཱ ཙ ཝུ་ཏྟཾ ཨ་མྷེ་ཧི སུ་བོ་དྷཱ་ལ་ངྐཱ་རེ ‘‘ཨུ་པ་མཱ་ནོ་པ་མེ་ཡྻཱ་ནཾ, ས་དྷ་མྨ་ཏྟཾ སི་ཡོ་པ་མཱ’’ཏི. ཨ་ཉྙ་ཐཱ ཨུ་པ་མཱ་ན་བྷཱུ་ཏ་ཨ་ཀྑ་རཱ་ཝ་ལི༹་ས་དི་སཱི་ཡེ་ཝ, ཨ་ཀྑ་རཱ་ཝ་ལི༹ ཨུ་པ་མེ་ཡྻཾ སི་ཡཱ. ཝཱ་ཀྱེ ཝི་ཡ-ས་དྡོ་ཡེ་ཝ པ་ན ཨུ་པ་མཱ་ནཾ ཛོ་ཏེ་ཏཱི་ཏི ཝེ་དི་ཏ་བྦཾ.
༢༤༩. པ་ཐ་ཝི་ཡཱ ཨ་ས་མྦ་དྡྷཾ སུ་ཀྑ་ཀ་དྡ་མ་ཨཱ་དི་ཀ་ཉྩ ཏ་ནུ་ཀཾ ཨུ་སྶི་ཉྩ་ནཱི་ཡ་ཀ་དྡ་མ་ཉྩ ཀོ་པེ་ཏུཾ ལ་བྦྷ་ནྟི ས་མྦ་ནྡྷོ. ཀ་དྡ་མ་ཨཱ་དི་ཀནྟི ཨེ་ཏྠ ཨཱ་དི-ས་དྡེ་ན ཨུ་ད་ཀེ་ན ག་ཏ་ཊྛཱ་ནེ ཨུ་ད་ཀ་པ་པྤ་ཊ་ཀོ ནཱ་མ ཧོ་ཏི, ཡཾ ཝཱ་ཏ་པྤ་ཧཱ་རེ་ན ཙ་ལ་ཏི, ཏཾ ས་ངྒ་ཎྷཱ་ཏི. ཨུ་སྶི་ཉྩ་ནཱི་ཡ་ཀ་དྡ་མནྟི གྷ་ཊེ་ཧི ཨུ་སྶི་ཉྩི་ཏུཾ ས་ཀྐུ་ཎེ་ཡྻ་ཀ་དྡ་མཾ.
༢༥༠. ‘‘ཙཱ་ཏུ་མཱ་སཱ་དྷི་ཀོ་ཝ་ཊྛཾ ག་ཎྜུ་པྤཱ་ད’’ནྟི་ཨཱ་དི་ནཱ ས་མྦ་ནྡྷི་ཏ་བྦཾ. ག་ཎྜཾ པ་ཐ་ཝི་ཡཱ ག་ཎྜ་ས་དི་སཾ མ་ཏྟི་ཀ་རཱ་སིཾ ཨུ་པྤཱ་དེ་ནྟཱི་ཏི ག་ཎྜུ་པྤཱ་དཱ. ཨི་དྷ པ་ན ཏེ་ཧི ཨུ་ཊྛཱ་པི་ཏོ གཱུ་ཐོ ‘‘ག་ཎྜུ་པྤཱ་ད’’ནྟི ནི་དྡི་ཊྛོ. པོ་ཏྠ་ཀེ་སུ པ་ན ‘‘ག་ཎྜུ་པྤཱ་དོ’’ཏི པཱ་ཋོ དི་སྶ་ཏི. ཏཾ ‘‘ན ཀོ་པ་ཡེ’’ཏི ཨེ་ཏྠ ཀ་མྨེ་ན བྷ་ཝི་ཏ་བྦ་ནྟི ན ཡུ་ཛྫ་ཏི. མཱུ་སི་ཀུ་ཀྐི་རནྟི མཱུ་སི་ཀཱ་ནཾ ཨུ་ཀྐི་རོ ཁ་ཎི་ཏྭཱ བ་ཧི ཀ་ཏཾ པཾ་སུ་རཱ་སི མཱུ་སི་ཀུ་ཀྐི་རོ་ཏི. ལེ་ཌྜཱ་དིནྟི ཨེ་ཏྠ ལེ་ཌྜུནྟི ཀ་སི་ཏ་ཊྛཱ་ནེ ན་ངྒ་ལ་ཙྪི་ནྣ་མ་ཏྟི་ཀཱ་པི་ཎྜཾ. ཨཱ་དི-ས་དྡེ་ན གཱ་ཝཱི་ནཾ ཁུ་ར་ཙྪི་ནྣཾ ཀ་དྡ་མཾ ས་ངྒ་ཎྷཱ་ཏི.
༢༥༡-༢. ཨུ་ད་ཀ་ས་ནྟི་ཀེ པ་ཏི་ཏེ ཝཱ་པི་ཨཱ་དཱི་ནཾ ཀཱུ་ལེ ཙ པཱ་སཱ་ཎེ ལ་གྒེ ར་ཛེ ཙ ན་ཝ་སོ་ཎྜི་ཡཱ པ་ཏི་ཏེ ར་ཛེ ཙ ཨ་བྦྷོ་ཀཱ་སུ་ཊྛི་ཏེ ཝ་མྨི་ཀེ ཙ མ་ཏྟི་ཀཱ་ཀུ་ཊྚེ ཙ ཏ་ཐཱ་ཏི ས་མྦ་ནྡྷོ. ཏ་ཐཱཏི ཨི་མི་ནཱ ཀཱུ་ལཱ་དི་ཀེ ཙཱ་ཏུ་མཱ་སཱ་དྷི་ཀོ་ཝ་ཊྛཾ ཝཱ ས་བྦཾ ན ཀོ་པ་ཡེ་ཏི ཨི་དཾ ཨ་ཏི་དི་ས་ཏི. ཨི་ཊྛ་ཀ་ཀུ་ཊྚ་ཀོ ཝ་ཊྚ་ཏཱི་ཏི ཨཱ་ཧ ‘‘ཡེ་བྷུ་ཡྻཱ’’ཏི་ཨཱ་དི. ཡེ་བྷུ་ཡྻེ་ན ཀ་ཐ་ལཱ ཨེ་ཏྠཱ་ཏི ཡེ་བྷུ་ཡྻ་ཀ་ཐ་ལཱ, བྷཱུ་མི, ཏི་ཊྛ་ཏི ཨེ་ཏྠཱ་ཏི ཋཱ་ནཾ, ཡེ་བྷུ་ཡྻ་ཀ་ཐ་ལཱ་ཡ ཋཱ་ནཾ, ཏ་སྨིཾ. ཨི་ཊྛ་ཀ་ཀུ་ཊྚ་ཀོ ཡེ་བྷུ་ཡྻ་ཀ་ཐ་ལཱ ཝི་ཡ ཧོ་ཏཱི་ཏི ཨ་དྷི་པྤཱ་ཡོ. ཀུ་ཊྚ་ཀཾ ཀོ་པེ་ནྟ་སྶ ཨ་ནཱ་པ་ཏྟཱི་ཏི ཨ་དྷི་པྤཱ་ཡོ. ཨི་ཊྛ་ཀཱ་ཡ ཀ་ཏོ ཀུ་ཊྚ་ཀོ་ཏི ས་མཱ་སོ.
༢༥༣-༥. ས་ཉྩཱ་ལེ་ཏྭཱ བྷཱུ་མིཾ ཝི་ཀོ་པ་ཡཾ ཐ་མྦྷཱ་དིཾ ག་ཎྷི་ཏུཾ ཝཱ་ཏི ས་མྦ་ནྡྷོ. ཏ་ཏྠ ཝི་ཀོ་པ་ཡནྟི ཀ་ར་ཎ་ཏྠེ པ་ཙྩ་ཏྟ་ཝ་ཙ་ནཾ, ཝི་ཀོ་པ་ཡ་ཏཱ་ཏི ཨ་ཏྠོ. ཨ་ཉྙ་ཐཱ ཀ་ཐ་མེ་ཏྠ པ་ཋ་མཱ་པ་ས་ངྒོ. པ་ཋ་མཱ ཧི ‘‘བྷ་ཝ’’ནྟི ཝུ་ཏྟེ སི་ཡཱ, ན ཙ ‘‘ག་ཎྷི་ཏུ’’ནྟི་ཨཱ་དཱི་སུ ཏུཾ-པ་ཙྩ་ཡེ་ཧི ཝུ་ཏྟོ ཀོ་ཙི ཨ་ཏྠི, ཡ་དཱ བྷཱ་ཝེ ཏུཾ-པ་ཙྩ་ཡོ, ཏ་དཱ ན ཀི་ཉྩི ཝུ་ཏྟཾ ཧོ་ཏཱི་ཏི, ‘‘ན ཀ་པྤ་ཏཱི’’ཏི པ་དྷཱ་ན་ཀི་རི་ཡཱ་ཡ་པི ཧེ་ཊྛཱ ཝུ་ཏྟ་ན་ཡེ་ན ཀ་ཏྟཱ ཨ་ཉྙོ་ཡེ་ཝཱ་ཏི ཨེ་ཝཾ ས་བྦ་ཏྠ. ཏ་ཏི་ཡ་ཏྠེ ཏུ ས་ཏི ཨི་ཏོ ཙི་ཏོ ས་ཉྩཱ་ལེ་ཏྭཱ བྷཱུ་མིཾ ཝི་ཀོ་པ་ཡ་ཏཱ ཐ་མྦྷཱ་དིཾ ག་ཎྷི་ཏུཾ ན ཀ་པྤ་ཏཱི་ཏི ཨ་ཏཱི་ཝ ཡུ་ཛྫ་ཏི. དྷཱ་རཱ་ཡཱཏི པ་སྶཱ་ཝ་དྷཱ་རཱ་ཡ. ཝི་ས་མཾ ས་མཾ ཀཱ་ཏུཾ ས་མྨུ་ཉྫ་ནཱི་ཧི གྷཾ་སི་ཏུཾ ཝཱ་ཏི ཡོ་ཛ་ནཱ. ཝི་ས་མནྟི ཝི་ས་མ་ཊྛཱ་ནཾ. ‘‘པ་དཾ ད་སྶེ་སྶཱ་མཱི’’ཏི བྷཱུ་མིཾ བྷི་ནྡ་ནྟོ ཙ་ངྐ་མི་ཏུཾ ཝཱ་ཏི ས་མྦ་ནྡྷོ. བྷི་ནྡ་ནྟོཏི བྷི་ནྡ་ཏཱ. ཀ་ཎྜུ་རོ་གཱི ཝཱ ཏ་ཊཱ་དཱི་སུ ཨ་ངྒ་པ་ཙྩ་ངྒཾ གྷཾ་སི་ཏུ་ནྟི ཡོ་ཛ་ནཱ. ཀ་ཎྜུ་རོ་གཱིཏི ཀ་ཎྜུ་རོ་གི་ནཱ. ཙ-ས་དྡོ ཨ་ཝ་དྷཱ་ར་ཎེ.
༢༥༦-༧. སུ་དྡྷ་ཙི་ཏྟ་སྶཱཏི པ་ཐ་ཝི་བྷེ་དཱ་དྷི་པྤཱ་ཡ་ཝི་ར་ཧེ་ན པ་རི་སུ་དྡྷ་ཙི་ཏྟ་སྶ.
༢༥༨. ཨ་གྒི་སྶ ཨ་ནུ་པཱ་དཱ་ནེ ཀ་པཱ་ལེ ཝཱ ཨ་ནུ་པཱ་དཱ་ནཱ་ཡ ཨི་ཊྛ་ཀཱ་ཡ ཝཱ ཨ་གྒིཾ པཱ་ཏེ་ཏུཾ ཝཱ ཨ་ཝ་སེ ས་ཏི བྷཱུ་མི་ཡཾ པཱ་ཏེ་ཏུཾ ཝཱ ལ་བྦྷ་ཏེ་ཏི ས་མྦ་ནྡྷོ. ཨུ་པཱ་དཱ་ནཾ ཨི་ནྡྷ་ནཾ, ན ཨུ་པཱ་དཱ་ནཾ ཨ་ནུ་པཱ་དཱ་ནཾ, ཏ་སྨིཾ. ཝ་སོ པ་བྷུ་ཏྟཾ. ‘‘ཝ་སོ པ་བྷུ་ཏྟེ ཨཱ་ཡ་ཏྟེ’’ཏི ཧི ནི་གྷ་ཎྜུ. ན ཝ་སོ ཨ་ཝ་སོ, ཏ་སྨིཾ ཨ་པ་བྷུ་ཏྟེ་ཏི ཨ་ཏྠོ. པ་ཏི་ཏ་ཊྛཱ་ནེ་ཡེ་ཝ ཨུ་པཱ་དཱ་ནཾ ད་ཏྭཱ ཨ་གྒིཾ ཀཱ་ཏུཾ ཝ་ཊྚ་ཏི. སུ་ཀྑ་ཁཱ་ཎུ་ཀ་སུ་ཀྑ་རུ་ཀྑཱ་དཱི་སུ ཙ ཨ་གྒིཾ དཱ་ཏུཾ ན ཝ་ཊྚ་ཏི. ས་ཙེ པ་ན ‘‘པ་ཐ་ཝིཾ ཨ་པྤ་ཏྟ་མེ་ཝ ནི་བྦཱ་པེ་ཏྭཱ ག་མི་སྶཱ་མཱི’’ཏི དེ་ཏི, ཝ་ཊྚ་ཏི, པ་ཙྪཱ ནི་བྦཱ་པེ་ཏུཾ ན ས་ཀྐོ་ཏི, ཨ་ཝི་ས་ཡ་ཏྟཱ ཨ་ནཱ་པ་ཏྟི. ‘‘བྷཱུ་མི་ཡཾ པཱ་ཏེ་ཧཱི’’ཏི ཨེ་ཝ་མྤི ཝ་ཏྟུཾ ན ཝ་ཊྚ་ཏཱི་ཏི.
པ་ཐ་ཝཱི་ནི་དྡེ་ས་ཝ་ཎྞ་ནཱ ནི་ཊྛི་ཏཱ.