༢༢. ཨུ་པཱ་ཧ་ན་ནི་དྡེ་ས་ཝ་ཎྞ་ནཱ
༡༧༥. ན་ཝཱ གུ་ཎ་ངྒུ་ཎཱུ་པཱ་ཧ་ནཱ མ་ཛ྄ཛྷ་དེ་སེ ན ཀ་པྤ་ནྟཱི་ཏི ས་མྦ་ནྡྷོ. ན་ཝཱཏི ཨེ་ཀ་ཝཱ་ར་མྤི ཨ་པྤ་ཊི་མུ་ཀྐཱ. ཏ་ཏྠ གུ་ཎ་ངྒུ་ཎཱུ་པཱ་ཧ་ནཱ ཙ་ཏུ་པ་ཊ་ལ་ཏོ པ་ཊྛཱ་ཡ ཝུ་ཙྩ་ནྟི. ས་མྦྷ་ཝེ བྱ་བྷི་ཙཱ་རེ ཙ ཝི་སེ་ས་ནཾ སཱ་ཏྠ་ཀཾ བྷ་ཝ་ཏཱི་ཏི ‘‘མ་ཛ྄ཛྷ་དེ་སེ’’ཏི ཝི་སེ་ས་ནཾ ཨ་མ་ཛ྄ཛྷ་དེ་སཾ བྱ་བྷི་ཙ་ར་ཏཱི་ཏི ཨ་མ་ཛ྄ཛྷ་དེ་སེ གུ་ཎ་ངྒུ་ཎཱུ་པཱ་ཧ་ནཱ ཀ་པྤ་ནྟཱི་ཏི ཝེ་དི་ཏ་བྦཾ. ཏ་ཐཱ ན་ཝཱཏི ཨི་མི་ནཱ ཨ་ན་ཝཱ མ་ཛ྄ཛྷ་དེ་སེ་པི. ཨི་མི་ནཱ པ་ན ཝཱ་ཀྱེ་ན མ་ཛ྄ཛྷ་དེ་སེ་པི ཨེ་ཀ་ཝཱ་ར་མྤི པ་ཊི་མུ་ཀྐཱ, ཨ་ཉྙ་ཏྠ ཏུ ས་བྦཱ་པི གུ་ཎ་ངྒུ་ཎཱུ་པཱ་ཧ་ནཱ ཝ་ཊྚ་ནྟི, ན སེ་སཱ་ཏི ཨཱ་པ་ནྣཾ, ཏ་ཐཱ་པི ‘‘ཨ་ནུ་ཛཱ་ནཱ་མི, བྷི་ཀྑ་ཝེ, ཨེ་ཀ་པ་ལཱ་སི་ཀཾ ཨུ་པཱ་ཧ་ན’’ནྟི (མ་ཧཱ་ཝ. ༢༤༥) ཝུ་ཏྟ་ཏྟཱ ཨེ་ཀ་པ་ཊ་ལི་ཀཱ་པི ཝ་ཊྚ་ཏཱི་ཏི ཝེ་དི་ཏ་བྦཾ. ས་བྦ་སྶཱཏི མ་ཛ྄ཛྷ་དེ་སེ པ་ཙྩ་ནྟི་མེ་པི གི་ལཱ་ནཱ་གི་ལཱ་ན་སྶ ས་བྦ་སྶ. ‘‘ཨ་ནུ་ཛཱ་ནཱ་མི, བྷི་ཀྑ་ཝེ, ཨ་ཛ྄ཛྷཱ་རཱ་མེ ཨུ་པཱ་ཧ་ནཾ དྷཱ་རེ་ཏུ’’ནྟི (མ་ཧཱ་ཝ. ༢༤༩) ཧི སཱ་མ་ཉྙེ་ན ཨ་ནུ་ཉྙཱ་ཏཾ. ས་བྦ་ཏྠཱཏི གཱ་མེ ཝཱ ཨ་ར་ཉྙེ ཝཱ ཨཱ་རཱ་མ་ཏོ ཨ་ཉྙ་ཏྲ. ཨ་ཀ་ལླ་ཀ་སྶ ཙཱཏི གི་ལཱ་ན་སྶེ་ཝ.
༡༧༦-༩. ས་བྦ…པེ… ར་ཏྟཱ ཙ ཨུ་པཱ་ཧ་ནཱ ས་བྦ…པེ… ཝི་ཙྪི་ཀཱ་ལི༹་ཀཱ ཙ…པེ… དཱི་པཱི་ནཾ ཙ་མྨེ་ཧི ཙ མ་ཛྫཱ་ར…པེ… ཙ་མྨེ་ཧི ཙ པ་རི་ཀྑ་ཊཱ ཙ ཨུ་པཱ་ཧ་ནཱ ས་ངྐ་མ་ནཱི་ཡཱ པཱ་དུ་ཀཱ ཙ ཀོ་ཙི དྷཱ་རེ་ཡྻ, དུ་ཀྐ་ཊ་ནྟི ཡོ་ཛ་ནཱ. ཨོ་དཱ་ཏཱ་ཡ པཱ་ལི༹་ཡཱ ཨ་ཊྛ་ཀ་ཐཱ་ཡ ཙ ཨ་བྷཱ་ཝེ་པི ཨ་ནུ་ལོ་མ་ཝ་སེ་ནེ་ཏྠ ཝུ་ཏྟཾ ཝི་ཡ དི་སྶ་ཏི. ནཱི་ལ་ཀོ ཙ ཨོ་དཱ་ཏོ ཙཱ་ཏི་ཨཱ་དི་ནཱ དྭ་ནྡོ. ས་བྦེ་ཝ ནཱི་ལ་ཀ…པེ… ཀ་ཎྷ་ཀཱ ཡཱ་ས་ནྟི ས་མཱ་སོ. ‘‘མ་ཧཱ་ར་ངྒཱ’’ཏི་ཨཱ་དཱི་སུ ཨ་པྤ་ཡུ་ཏྟེ་པི ས་བྦ-ས་དྡེ པ་ཀ་ར་ཎ་ཝ་སེ་ན ཡོ་ཛེ་ཏྭཱ ཨ་ཏྠོ ཝེ་དི་ཏ་བྦོ.
‘‘ཨ་ཏྠཱ པ་ཀ་ར་ཎཱ ལི་ངྒཱ, ཨོ་ཙི་ཏྱཱ ཀཱ་ལ་དེ་ས་ཏོ;
ས་དྡ་ཏྠཱ ཝི་བྷ་ཛཱི་ཡ་ནྟི, ན ས་དྡཱ་ཡེ་ཝ ཀེ་ཝ་ལཱ’’ཏི. –
ཧི ཝུ་ཏྟཾ. ཙི་ཏྲཱཏི ཝི་ཙི་ཏྲཱ. ནཱི་ལ་པཱི་ཏཱ་དཱི ཝ་དྡྷཱ་ཡེ་ཝ ཡཱ་ས་ནྟི ས་མཱ་སོ. ཨཱ་དི-ས་དྡེ་ན ཨོ་དཱ་ཏཱ་དཱི་ནཾ ག་ཧ་ཎཾ. ཏི་ཏྟི་ར་པ་ཏྟ་ས་དི་སོ ཝི་ཙི་ཏྟོ ཝ་ཎྞོ ཏི་ཏྟི་ར་པ་ཏྟ-ས་དྡེ་ན ག་ཧི་ཏོ. ཏ་མེ་ཏེ་ས་མ་ཏྠཱི་ཏི ཏི་ཏྟི་ར་པ་ཏྟི་ཀཱ. མེ་ཎྜ་སྶ ཙ ཨ་ཛ་སྶ ཙ ཝི་སཱ་ཎ་ས་དི་སཱ ཝ་དྡྷཱ ཡཱ་ས་ནྟི བཱ་ཧི་ར་ཏྠོ. ཏཱ པ་ན ཀ་ཎྞི་ཀ་ཊྛཱ་ནེ མེ་ཎྜ་ཀ་ཨ་ཛ་ཝི་སཱ་ཎ་ས་ཎྛཱ་ནེ ཝ་དྡྷེ ཡོ་ཛེ་ཏྭཱ ཀ་ཏཱ. ཨེ་ས ན་ཡོ ཝི་ཙྪི་ཀཱ་ལི༹་ཀཱདཱི་སུ. པ་ཎྷི་པི་དྷཱ་ན་ཏྠཾ ཏ་ལེ ཁ་ལླཾ བ་དྡྷཾ ཡཱ་ས་ནྟི ཝི་གྒ་ཧོ. ཛ་ངྒྷ་ཏོ ས་བྦ་པཱ་ད་པྤ་ཊི་ཙྪཱ་ད་ན་ཀཾ པུ་ཊཾ བ་དྡྷཾ ཡཱ་ས་ནྟི བ་ཧུ་བྦཱི་ཧི. ཏཱུ་ལཾ པི་ཙུ པུ་ཎྞཾ ཡཱ་ས་ནྟི ཨ་ཉྙ་པ་ད་ཏྠོ. པ་ལི་གུ་ཎྛེ་ཏཱི་ཏི པ་ལི་གུ་ཎྛོ, ཨུ་པ་རི་པཱ་ད་ཏ་ལ་མ་ཏྟ་པྤ་ཊི་ཙྪཱ་ད་ཀ་བ་ནྡྷོ, ཏེ་ན ཡོ་ཛེ་ཏྭཱ ཀ་ཏཱ པཱ་ལི་གུ་ཎྛི་མཱ, ཝི་ཙི་ཏྲཱ ཧི ཏ་དྡྷི་ཏ་ཝུ་ཏྟི. ཝི་ཙྪི་ཀཱ་ནཾ ཨ་ལ༹་ས་དི་སཾ ན་ངྒུ་ཊྛ་ས་དི་སཾ བ་དྡྷ་མེ་ཏཱ་ས་ནྟི ཝི་ཙྪི་ཀཱ་ལི༹་ཀཱ. སཱི་ཧ་བྱ་གྒྷུ་དྡཱ་ཛི་ན་དཱི་པཱི་ནཾ ཙ་མྨེ་ཧི ཙཱ་ཏི པ་ཀ་ར་ཎ་ཏོ ཨ་ཛི་ནཱ ནཱ་མ མི་གཱ. ཨུ་ལཱུ་ཀཱ པ་ཀྑི་བི་ལཱ༹་རཱ. ས་ངྐ་མ་ནྟི ག་ཙྪ་ནྟི ཨེ་ཏཱ་ཧཱི་ཏི ས་ངྐ་མ་ནཱི་ཡཱ. ཏཱ པ་ན ཏཱ་ལ་པ་ཎྞཱ་དཱི་ཧི ཀ་ཏཱ སཾ་ཧཱ་རི་ཡཱ.
༡༨༠. ས་ཀ་ལཾ ཨེ་ཀ་དེ་སཾ ཝཱ པུ་ཉྪི་ཏྭཱ་ཝཱ་ཏི ཡོ་ཛ་ནཱ. ཁ་ལླ་ཀཱ་དི་ཀནྟི ཨཱ་དི-ས་དྡེ་ན མེ་ཎྜ་ཝི་སཱ་ཎ་ཝ་དྡྷི་ཀཱ་དི་ཀཾ ས་བྦཾ ས་ངྒ་ཎྷཱ་ཏཱི་ཏི.
ཨུ་པཱ་ཧ་ན་ནི་དྡེ་ས་ཝ་ཎྞ་ནཱ ནི་ཊྛི་ཏཱ.