༡༩. ནྷཱ་ན་ཀ་པྤ་ནི་དྡེ་ས་ཝ་ཎྞ་ནཱ

༡༦༨. ཀ་པྤ་ནཾ ཀ་པྤི་ཡ་ཏཱ ཀ་པྤོ, ནྷཱ་ནེ ཀ་པྤོ ནྷཱ་ན་ཀ་པྤོ. ན་ཝ་ཀོ ཐེ་རཱ་ནཾ པུ་ར་ཏོ ཨུ་པ་རི ཝཱ ན ཙ ནྷཱ་ཡེ་ཡྻཱ་ཏི ས་མྦ་ནྡྷོ. ན ཙཱཏི ན་ཡེ་ཝ. པུ་ར་ཏོཏི ཨ་བྷི་མུ་ཁེ. ཨུ་པ་རཱིཏི ན་དི་ཡཱ ཨུ་པ་རི.

༡༦༩-༡༧༡. ཀུ་ཊྚ་ཏྠ་མྦྷ་ཏ་རུ་ཊྚཱ་ནེ ཀཱ་ཡཾ ན གྷཾ་ས་ཡེ་ཏི ས་མྦ་ནྡྷོ. ཏ་ཏྠ ཀུ་ཊྚཾ ནཱ་མ ཨི་ཊྛ་ཀ་དཱ་རུ་སི་ལཱ་བྷི་ཏྟི. ཐ་མྦྷོ ནཱ་མ ན་ཧཱ་ན་ཏི་ཏྠེ ནི་ཁ་ནི་ཏྭཱ ཋ་པི་ཏོ. ཏ་རཱུཏི རུ་ཀྑོ. ཨ་ཊྚཱ་ནཾ ནཱ་མ ཏ་ཙྪེ་ཏྭཱ ཨ་ཊྛ་པ་དཱ་ཀཱ་རེ་ན རཱ་ཛི་ཡོ ཚི་ནྡི་ཏྭཱ ན་ཧཱ་ན་ཏི་ཏྠེ ནི་ཁཱ་ཏ་ཕ་ལ་ཀཾ. ག་ནྡྷ་བྦ་ཧ་ཏྠེ་ན ཝཱ…པེ… མ་ལླ་ཀེ་ན ཝཱ ཀཱ་ཡཾ ས་རཱི་རེ་ན ཝཱ ཨ་ཉྙ་མ་ཉྙཾ ན གྷཾ་ས་ཡེ་ཏི ས་མྦ་ནྡྷོ. ག་ནྡྷ་བྦ་ཧ་ཏྠེ་ནཱཏི དཱ་རུ་མ་ཡ་ཧ་ཏྠེ་ན. ཀུ་རུ་ཝི་ནྡ་ཀ་སུ་ཏྟི་ཡཱཏི ཀུ་རུ་ཝི་ནྡ་ཀ་པཱ་སཱ་ཎ་ཙུ་ཎྞཱ་ནི ལཱ་ཁཱ་ཡ བ་ནྡྷི་ཏྭཱ ཀ་ཏ་གུ་ལི༹་ཀཱ་ཝ་ལི་ཡཱ སུ་ཏྟེ་ན ཨཱ་ཝུ་ཎི་ཏ་སུ་ཏྟི་ཡཱ. མ་ལླ་ཀེ་ནཱཏི མ་ཀ་ར་ད་ནྟ་ཀེ ཚི་ནྡི་ཏྭཱ པ་དུ་མ་ཀ་ཎྞི་ཀ་ས་ཎྛཱ་ནེ་ན ཀ་ཏ་མ་ལླ་ཀེ་ན. ས་རཱི་རེ་ནཱཏི ཨ་ཏྟ་ནོ ཀཱ་ཡེ་ན. ཨ་ཉྙ་མ་ཉྙ་སྶ ཨ་ཉྙ་མ་ཉྙཾ ཀི་རི་ཡཱ་ཀ་ར་ཎ་ས་ངྑཱ་ཏེ ཀི་རི་ཡཱ་བྱ་བྷི་ཧཱ་རེ དྭི་ཏྟཾ. ཀ་པཱ་ལ…པེ… པུ་ཐུ་པཱ་ཎི ཙ ས་བྦེ་སཾ ཝ་ཊྚ་ཏཱི་ཏི ས་མྦ་ནྡྷོ. ཀ་པཱ་ལ་ཉྩ ཨི་ཊྛ་ཀཱ ཙ, ཏཱ་སཾ ཁ་ཎྜཱ་ནི. པུ་ཐུ་པཱ་ཎཱིཏི པུ་ཐུ ནཱ་ནཱ པཱ་ཎི པུ་ཐུ་པཱ་ཎི, ཧ་ཏྠ་པ་རི་ཀ་མྨཾ རུ་ལ༹ྷཱི་ཝ་སེ་ན. ས་བྦེ་སནྟི གི་ལཱ་ནཱ་གི་ལཱ་ནཱ་ནཾ. གི་ལཱ་ན་སྶ ཨ་ཀ་ཏ་མ་ལླ་ཀཾ ཝ་ཊྚ་ཏཱི་ཏི ས་མྦ་ནྡྷོ. ཨ་ཀ་ཏ་མ་ལླ་ཀཾ ནཱ་མ ཀ་ཏ་མ་ལླ་ཀ་ཝི་པ་རཱི་ཏཾ. ཕེ་ཎཾ ནཱ་མ ས་མུ་དྡ་ཕེ་ཎ་ནྟི.

ནྷཱ་ན་ཀ་པྤ་ནི་དྡེ་ས་ཝ་ཎྞ་ནཱ ནི་ཊྛི་ཏཱ.