༢༢. ཨུ་པཱ་ཧ་ན་ནི་དྡེ་ས་ཝ་ཎྞ་ནཱ
༡༧༥. གུ་ཎ་ངྒུ་ཎཱུ་པཱ་ཧ་ནཱཏི (མ་ཧཱ་ཝ. ཨ་ཊྛ. ༢༤༥) ཙ་ཏུ་པ་ཊ་ལ་ཏོ པ་ཊྛཱ་ཡ ཝུ་ཙྩ་ཏི, ན ཨེ་ཀ་དྭི་ཏི་པ་ཊ་ལ་ཏོ པ་ཊྛཱ་ཡ ‘‘ཨ་ནུ་ཛཱ་ནཱ་མི, བྷི་ཀྑ་ཝེ, ཨེ་ཀ་པ་ལཱ་སི་ཀཾ ཨུ་པཱ་ཧ་ནཾ, ན བྷི་ཀྑ་ཝེ དི་གུ་ཎཱ ཨུ་པཱ་ཧ་ནཱ དྷཱ་རེ་ཏ་བྦཱ, ན ཏི་གུ་ཎཱ ཨུ་པཱ་ཧ་ནཱ དྷཱ་རེ་ཏ་བྦཱ, ན གུ་ཎ་ངྒུ་ཎཱུ་པཱ་ཧ་ནཱ དྷཱ་རེ་ཏ་བྦཱ, ཡོ དྷཱ་རེ་ཡྻ, ཨཱ་པ་ཏྟི དུ་ཀྐ་ཊ་སྶཱ’’ཏི (མ་ཧཱ་ཝ. ༢༤༥) ཝུ་ཏྟ་ཏྟཱ. ‘‘ཨ་ནུ་ཛཱ་ནཱ་མི, བྷི་ཀྑ་ཝེ, ཨོ་མུ་ཀྐཾ གུ་ཎ་ངྒུ་ཎཱུ་པཱ་ཧ་ནཾ, ན བྷི་ཀྑ་ཝེ ན་ཝཱ གུ་ཎ་ངྒུ་ཎཱུ་པཱ་ཧ་ནཱ དྷཱ་རེ་ཏ་བྦཱ, ཡོ དྷཱ་རེ་ཡྻ, ཨཱ་པ་ཏྟི དུ་ཀྐ་ཊ་སྶཱ’’ཏི (མ་ཧཱ་ཝ. ༢༤༧) ཝུ་ཏྟ་ཏྟཱ ‘‘ན་ཝཱ’’ཏི ཝུ་ཏྟཾ. ས་བྦ་ཏྠཱ་པི མ་ཛ྄ཛྷི་མ་དེ་སེ གི་ལཱ་ནོ་པི ན་ཝཾ གུ་ཎ་ངྒུ་ཎཱུ་པཱ་ཧ་ནཾ ན ལ་བྷ་ཏི, ཨེ་ཀ་ཝཱ་ར་མྤི ཨ་ཉྙེ་ཧི པ་རི་བྷུ་ཏྟཾ ཨོ་མུ་ཀྐ་ཨུ་པཱ་ཧ་ན་ས་ངྑཱ་ཏཾ ལ་བྷ་ཏི, པ་ཙྩ་ནྟི་མེ་སུ ཛ་ན་པ་དེ་སུ གི་ལཱ་ནོ ན་ཝ་མྤི ལ་བྷ་ཏཱི་ཏི ཝེ་དི་ཏ་བྦཾ ‘‘ཨ་ནུ་ཛཱ་ནཱ་མི, བྷི་ཀྑ་ཝེ, ས་བྦ་པ་ཙྩ་ནྟི་མེ་སུ ཛ་ན་པ་དེ་སུ གུ་ཎ་ངྒུ་ཎཱུ་པཱ་ཧ་ན’’ནྟི (མ་ཧཱ་ཝ. ༢༥༩) ཨ་ཝི་སེ་སེ་ན ཝུ་ཏྟ་ཏྟཱ.
ས་བྦ་སྶཱཏི གི་ལཱ་ན་སྶཱ་པི ཨ་གི་ལཱ་ན་སྶཱ་པཱི་ཏི ཨ་ཏྠོ. མ་ཛ྄ཛྷི་མ་དེ་སེ་པི པ་ཙྩ་ནྟི་མ་དེ་སེ་པི ཨཱ་རཱ་མེ ཨཱ་རཱ་མཱུ་པ་ཙཱ་རེ གི་ལཱ་ན་སྶཱ་པི ཨ་གི་ལཱ་ན་སྶཱ་པི ‘‘ཨ་ནུ་ཛཱ་ནཱ་མི, བྷི་ཀྑ་ཝེ, ཨ་ཛ྄ཛྷཱ་རཱ་མེ ཨུ་པཱ་ཧ་ནཾ དྷཱ་རེ་ཏུ’’ནྟི (མ་ཧཱ་ཝ. ༢༤༩) ཝུ་ཏྟ་ཏྟཱ ཀ་པྤི་ཡ་ནྟི ཨ་ཏྠོ. ས་བྦ་ཏྠཱཏི ཨཱ་རཱ་མེ་པི གཱ་མེ་པི. ཨ་ཀ་ལླ་ཀ་སྶཱཏི གི་ལཱ་ན་སྶ. ཨེ་ཏྠ པ་ན མ་ཛ྄ཛྷི་མ་དེ་སེ གི་ལཱ་ན་སྶ གུ་ཎ་ངྒུ་ཎཱུ་པཱ་ཧ་ནཱ པ་རི་བྷུ་ཏྟཱ་ཝ ཨཱ་རཱ་མེ་པི གཱ་མེ་པི ཝ་ཊྚ་ཏི, པ་ཙྩ་ནྟི་མ་དེ་སེ ཨ་པ་རི་བྷུ་ཏྟཱ་པི. མ་ཛ྄ཛྷི་མ་དེ་སེ་པི པ་ཙྩ་ནྟི་མ་དེ་སེ་པི བྷ་ག་ཝ་ཏཱ གི་ལཱ་ན་སྶེ་ཝ ཨུ་པཱ་ཧ་ནཱ ཨ་ནུ་ཉྙཱ་ཏཱ ‘‘ཨ་ནུ་ཛཱ་ནཱ་མི, བྷི་ཀྑ་ཝེ, ཡ་སྶ པཱ་དཱ ཝཱ དུ་ཀྑཱ, པཱ་དཱ ཝཱ ཕ་ལི་ཏཱ, པཱ་ད་ཁི་ལོ ཝཱ ཨཱ་བཱ་དྷོ, ཨུ་པཱ་ཧ་ནཾ དྷཱ་རེ་ཏུ’’ནྟི (མ་ཧཱ་ཝ. ༢༤༩) ཙ ‘‘ཨ་ནུ་ཛཱ་ནཱ་མི, བྷི་ཀྑ་ཝེ, གི་ལཱ་ནེ་ན བྷི་ཀྑུ་ནཱ ས་ཨུ་པཱ་ཧ་ནེ་ན གཱ་མཾ པ་ཝི་སི་ཏུ’’ནྟི (མ་ཧཱ་ཝ. ༢༥༦) ཝུ་ཏྟ་ཏྟཱ ཙ. མ་ཛ྄ཛྷི་མ་དེ་སེ ཙ གི་ལཱ་ནོ ན་ཝཾ གུ་ཎ་ངྒུ་ཎཱུ་པཱ་ཧ་ནཾ དྷཱ་རེ་ཏུཾ ཡ་དི ལ་བྷ་ཏི, ཀ་ཐཾ པ་དེ་ས་པ་ཉྙ་ཏྟི ཧོ་ཏཱི་ཏི? ས་བྦ་ཏྠ པ་ན བྷ་ག་ཝ་ཏཱ གི་ལཱ་ན་སྶེ་ཝ ཨུ་པཱ་ཧ་ནཱ ཨ་ནུ་ཉྙཱ་ཏཱ, ཏ་སྨཱ མ་ཛ྄ཛྷི་མ་དེ་སེ གི་ལཱ་ནོ ན་ཝཾ གུ་ཎ་ངྒུ་ཎཱུ་པཱ་ཧ་ནཾ ལ་བྷ་ཏཱི་ཏི ག་ཧེ་ཏ་བྦ་ནྟི ཝ་ད་ནྟི.
༡༧༦-༩. ས་བྦཱ་ཝ ནཱི་ལ་ཀཱ (མ་ཧཱ་ཝ. ༢༤༦; མ་ཧཱ་ཝ. ཨ་ཊྛ. ༢༤༦) ས་བྦ་ནཱི་ལ་ཀཱ. ཨེ་ས ན་ཡོ ས་བྦ་ཏྠ ཨོ་དཱ་ཏ་ཀཱདཱི་སུ་པི. ཨོ་དཱ་ཏཾ པ་ན ནེ་ཝ པཱ་ལི༹་ཡཾ, ན ཨ་ཊྛ་ཀ་ཐཱ་ཡཾ པ་ཊི་ཀྑི་ཏྟཾ, ཨ་ནུ་ལོ་མ་ཝ་སེ་ན པ་ན ཨི་དྷ པ་ཊི་ཀྑི་ཏྟ་ནྟི ཝེ་དི་ཏ་བྦཾ. མ་ཧཱ་ར་ངྒ་ར་ཏྟཱ ས་ཏ་པ་དི་པི་ཊྛི་ཝ་ཎྞཱ. མ་ཧཱ་ནཱ་མ་ར་ངྒ་ར་ཏྟཱ མ་ནྡ་ར་ཏྟཱ. མ་ཉྫེ་ཊྛི་ཀཱ ཀ་ཎ་ཝེ་ར་པུ་པྥ་ཝ་ཎྞཱ. པུ་པྥ་ལ་ཏཱ་དཱི་ཧི ཝི་ཙི་ཏྟཱ ཙི་ཏྲཱ. ནཱི་ལ་པཱི་ཏཱ་དི་ཝ་དྡྷི་ཀཱཏི ཨེ་ཏྠ ཨཱ་དི-ས་དྡེ་ན ཨོ་དཱ་ཏ་ལོ་ཧི་ཏ་མ་ཉྫེ་ཊྛི་ཀ་མ་ཧཱ་ར་ངྒ་མ་ཧཱ་ནཱ་མ་ར་ངྒ་ར་ཏྟཱ་དི་ཝ་སེ་ན ཝ་དྡྷི་ཀཱ ག་ཧི་ཏཱ. སཱི་ཧ་བྱ་གྒྷུ་དྡཱ་ཛི་ན་དཱི་པཱི་ནཾ ཙ་མྨེ་ཧི ཙཱ་ཏི ས་མྦ་ནྡྷོ. ཀོ་ཙཱིཏི གི་ལཱ་ནོ་པི ཨ་གི་ལཱ་ནོ་པི.
༡༨༠. ས་ཀ་ལཾ ཝཱ ཨེ་ཀ་དེ་ས་ཀཾ ཝཱ ར་ཛ་ནཾ ཙོ་ལེ༹་ན (མ་ཧཱ་ཝ. ཨ་ཊྛ. ༢༤༦) པུ་ཉྪི་ཏྭཱ ཝ་ལ༹་ཉྫེ་ཡྻཱ་ཏི ཨ་ཏྠོ. ཁ་ལླ་ཀཱ་དི་ཀཾ པ་ན ས་བྦཾ ཧཱ་རི་ཏྭཱ ཝ་ལ༹་ཉྫེ་ཏ་བྦཾ. ཨུ་པཱ་ཧ་ན་ཝི་ནི་ཙྪ་ཡོ.
ཨུ་པཱ་ཧ་ན་ནི་དྡེ་ས་ཝ་ཎྞ་ནཱ ནི་ཊྛི་ཏཱ.