༣. ཙཱི་ཝ་ར་ནི་དྡེ་སོ
ཙཱི་ཝ་རནྟི –
༣༠. ཁོ་མ་ཀོ་སེ་ཡྻ་ཀ་པྤཱ་ས-སཱ་ཎ་བྷ་ངྒཱ་ནི ཀ་མྦ་ལཾ;
ཀ་པྤི་ཡཱ་ནི ཚ་ལེ༹་ཏཱ་ནི, སཱ་ནུ་ལོ་མཱ་ནི ཛཱ་ཏི་ཏོ.
༣༡. དུ་ཀཱུ་ལ་ཉྩེ་ཝ པ་ཊྚུ་ཎྞ-པ་ཊཾ སོ་མཱ་ར་ཙཱི་ན་ཛཾ;
ཨི་དྡྷི་ཛཾ དེ་ཝ་དི་ནྣ་ཉྩ, ཏ་སྶ ཏ་སྶཱ་ནུ་ལོ་མི་ཀཾ.
༣༢. ཏི་ཙཱི་ཝ་རཾ པ་རི་ཀྑཱ་ར-ཙོ་ལ༹ཾ ཝ་སྶི་ཀ་སཱ་ཊི་ཀཾ;
ཨ་དྷི་ཊྛེ ན ཝི་ཀ་པྤེ་ཡྻ, མུ་ཁ་པུ་ཉྪ་ན་ནི་སཱི་ད་ནཾ.
༣༣. པ་ཙྩ་ཏྠ་ར་ཎ་ཀཾ ཀ་ཎྜུ-ཙྪཱ་དི་མེ་ཏྠ ཏི་ཙཱི་ཝ་རཾ;
ན ཝ་སེ་ཡྻ ཝི་ནེ་ཀཱ་ཧཾ, ཙཱ་ཏུ་མཱ་སཾ ནི་སཱི་ད་ནཾ.
༣༤. ‘‘ཨི་མཾ ས་ངྒྷཱ་ཊིཾ་དྷི་ཊྛཱ་མི’’, ས་ངྒྷཱ་ཊི་མི་ཙྩ་དྷི་ཊྛ་ཡེ;
ཨ་ཧ་ཏྠ་པཱ་ས་མེ་ཏ་ནྟི, སེ་སེ་སུ་པི ཨ་ཡཾ ན་ཡོ.
༣༥. ཨ་དྷི་ཊྛ་ཧ་ནྟོ ས་ངྒྷཱ་ཊི-པྤ་བྷུ་ཏིཾ པུ་བྦ་ཙཱི་ཝ་རཾ;
པ་ཙྩུ་དྡྷ་རི་ཏྭཱ་དྷི་ཊྛེ་ཡྻ, པ་ཏྟཱ་དྷི་ཊྛ་ཧ་ནེ ཏ་ཐཱ.
༣༦. ཨེ་ཏཾ ཨི་མཾ ཝ ས་ངྒྷཱ་ཊིཾ, སཾ་སེ པ་ཙྩུ་དྡྷ་རཱ་མི་ཏི;
ཨེ་ཝཾ ས་བྦཱ་ནི ནཱ་མེ་ན, ཝ་ཏྭཱ པ་ཙྩུ་དྡྷ་རེ ཝི་དཱུ.
༣༧. ས་ངྒྷཱ་ཊི པ་ཙྪི་མ་ནྟེ་ན, དཱི་གྷ་སོ མུ་ཊྛི་པ་ཉྩ་ཀོ;
ཨུ་ཏྟ་མ་ནྟེ་ན སུ་ག་ཏ-ཙཱི་ཝ་རཱུ་ནཱ་པི ཝ་ཊྚ་ཏི.
༣༨. མུ་ཊྛི་ཏྟི་ཀ་ཉྩ ཏི་རི་ཡཾ, ཏ་ཐཱ ཨེ་ཀཾ་སི་ཀ་སྶ་པི;
ཨ་ནྟ་ར་ཝཱ་ས་ཀོ ཙཱ་པི, དཱི་གྷ་སོ མུ་ཊྛི་པ་ཉྩ་ཀོ;
ཨ་ཌྜྷ་ཏེ་ཡྻོ དྭི་ཧ་ཏྠོ ཝཱ, ཏི་རི་ཡ་ནྟེ་ན ཝ་ཊྚ་ཏི.
༣༩. ནི་སཱི་ད་ན་སྶ དཱི་གྷེ་ན, ཝི་ད་ཏྠི དྭེ ཝི་སཱ་ལ་ཏོ;
དི་ཡ་ཌྜྷཾ ད་སཱ ཝི་ད་ཏྠི, སུ་ག་ཏ་སྶ ཝི་ད་ཏྠི་ཡཱ.
༤༠. ཀ་ཎྜུ་པྤ་ཊི་ཙྪཱ་དི་ཀ་སྶ, ཏི་རི་ཡཾ དྭེ ཝི་ད་ཏྠི་ཡོ;
དཱི་གྷ་ནྟ་ཏོ ཙ་ཏ་སྶོ་ཝ, སུ་ག་ཏ་སྶ ཝི་ད་ཏྠི་ཡཱ.
༤༡. ཝ་སྶི་ཀ་སཱ་ཊི་ཀཱ་ཡཱ་པི, དཱི་གྷ་སོ ཚ ཝི་ད་ཏྠི་ཡོ;
ཏི་རི་ཡཾ ཨ་ཌྜྷ་ཏེ་ཡྻཱ་ཝ, སུ་ག་ཏ་སྶ ཝི་ད་ཏྠི་ཡཱ.
༤༢. ཨེ་ཏྠ ཚེ་ད་ན་པཱ་ཙི་ཏྟི, ཀ་རོ་ནྟ་སྶ ཏ་དུ་ཏྟ་རི;
པ་ཙྩ་ཏྠ་ར་ཎ མུ་ཁ་ཙོ་ལཱ༹, ཨཱ་ཀ་ངྑི་ཏ་པྤ་མཱ་ཎི་ཀཱ.
༤༣. པ་རི་ཀྑཱ་ར་ཙོ་ལེ༹ ག་ཎ་ནཱ, པ་མཱ་ཎཾ ཝཱ ན དཱི་པི་ཏཾ;
ཏ་ཐཱ ཝ་ཏྭཱ ཨ་དྷི་ཊྛེ་ཡྻ, ཐ་ཝི་ཀཱ་དིཾ ཝི་ཀ་པྤི་ཡཾ.
༤༤. ཨ་ཧ་ཏཱ་ཧ་ཏ་ཀ་པྤཱ་ནཾ, ས་ངྒྷཱ་ཊི དི་གུ་ཎཱ སི་ཡཱ;
ཨེ་ཀ་ཙྩི་ཡོ་ཏྟ་རཱ་ས་ངྒོ, ཏ་ཐཱ ཨ་ནྟ་ར་ཝཱ་ས་ཀོ.
༤༥. ཨུ་ཏུ་དྡྷ་ཊཱ་ན དུ་སྶཱ་ནཾ, ས་ངྒྷཱ་ཊི ཙ ཙ་ཏུ་གྒུ་ཎཱ;
བྷ་ཝེ་ཡྻུཾ དི་གུ་ཎཱ སེ་སཱ, པཾ་སུ་ཀཱུ་ལེ ཡ་ཐཱ་རུ་ཙི.
༤༦. ཏཱི་སུ དྭེ ཝཱ་པི ཨེ་ཀཾ ཝཱ, ཚི་ནྡི་ཏ་བྦཾ པ་ཧོ་ཏི ཡཾ;
ས་བྦེ་སུ ཨ་པྤ་ཧོ་ནྟེ་སུ, ཨ་ནྭཱ་དྷི་མཱ་དི་ཡེ་ཡྻ ཝཱ;
ཨ་ཙྪི་ནྣ་ཉྩ ཨ་ནཱ་དི་ཎྞཾ, ན དྷཱ་རེ་ཡྻ ཏི་ཙཱི་ཝ་རཾ.
༤༧. གཱ་མེ ནི་ཝེ་ས་ནེ ཨུ་དྡོ-སི་ཏ་པཱ་སཱ་ད་ཧ་མྨི་ཡེ;
ནཱ་ཝཱ་ཊྚ་མཱ་ལ༹་ཨཱ་རཱ་མེ, ས་ཏྠ་ཁེ་ཏྟ་ཁ་ལེ དུ་མེ.
༤༨. ཨ་ཛ྄ཛྷོ་ཀཱ་སེ ཝི་ཧཱ་རེ ཝཱ, ནི་ཀྑི་པི་ཏྭཱ ཏི་ཙཱི་ཝ་རཾ;
བྷི་ཀྑུ་ས་མྨུ་ཏི་ཡཱ་ཉྙ་ཏྲ, ཝི་པྤ་ཝ་ཏྠུཾ ན ཝ་ཊྚ་ཏི.
༤༩. རོ་ག་ཝ་སྶཱ་ན་པ་རི་ཡ་ནྟཱ, ཀ་ཎྜུ་ཙྪཱ་དི་ཀ་སཱ་ཊི་ཀཱ;
ཏ་ཏོ པ་རཾ ཝི་ཀ་པྤེ་ཡྻ, སེ་སཱ ཨ་པ་རི་ཡ་ནྟི་ཀཱ.
༥༠. པ་ཙྩ་ཏྠ་ར་ཎ པ་རི་ཀྑཱ་ར-མུ་ཁ་པུ་ཉྪ་ན་ཙོ་ལ༹་ཀཾ;
ད་སཾ པྱ་ར་ཏྟ་ནཱ་དི་ཎྞ་ཀ་པྤཾ ལ་བྦྷཾ ནི་སཱི་ད་ནཾ.
༥༡. ཨ་ད་སཾ ར་ཛི་ཏཾ་ཡེ་ཝ, སེ་ས་ཙཱི་ཝ་ར་པ་ཉྩ་ཀཾ;
ཀ་པྤ་ཏཱ་དི་ཎྞ་ཀ་པྤཾ་ཝ, ས་ད་སཾ་ཝ ནི་སཱི་ད་ནཾ.
༥༢. ཨ་ན་དྷི་ཊྛི་ཏ་ནི་སྶ་ཊྛཾ, ཀ་པྤེ་ཏྭཱ པ་རི་བྷུ་ཉྫ་ཡེ;
ཧ་ཏྠ་དཱི་གྷཾ ཏ་ཏོ་པ་ཌྜྷ-ཝི་ཏྠཱ་ར་ཉྩ ཝི་ཀ་པྤི་ཡཾ.
༥༣. ཏི་ཙཱི་ཝ་ར་སྶ བྷི་ཀྑུ་སྶ, ས་བྦ་མེ་ཏཾ པ་ཀཱ་སི་ཏཾ;
པ་རི་ཀྑཱ་ར་ཙོ་ལི༹་ཡོ ས་བྦཾ, ཏ་ཐཱ ཝ་ཏྭཱ ཨ་དྷི་ཊྛ་ཏི.
༥༤. ཨ་ཙྪེ་ད་ཝི་སྶ་ཛྫ་ན་གཱ་ཧ་ཝི་བྦྷ་མཱ,
པ་ཙྩུ་དྡྷ་རོ མཱ་ར་ཎ་ལི་ངྒ་སི་ཀྑཱ;
ས་བྦེ་སྭ་དྷི་ཊྛཱ་ན་ཝི་ཡོ་ག་ཀཱ་ར་ཎཱ,
ཝི་ནི་ཝི་དྡྷ་ཚི་དྡ་ཉྩ ཏི་ཙཱི་ཝ་ར་སྶ.
༥༥. ཀུ་ས་ཝཱ་ཀ་ཕ་ལ་ཀཱ་ནི, ཀ་མྦ་ལཾ ཀེ་ས་ཝཱ་ལ་ཛཾ;
ཐུ་ལླ་ཙྩ་ཡཾ དྷཱ་ར་ཡ་ཏོ་ལཱུ་ཀ་པ་ཀྑཱ་ཛི་ན་ཀྑི་པེ.
༥༦. ཀ་ད་ལེ་ར་ཀ་ཀྐ་དུ་སྶེ, པོ་ཏྠ་ཀེ ཙཱ་པི དུ་ཀྐ་ཊཾ;
ས་བྦ་ནཱི་ལ་ཀ་མ་ཉྫེ་ཊྛ-པཱི་ཏ་ལོ་ཧི་ཏ་ཀ་ཎྷ་ཀེ.
༥༧. མ་ཧཱ་ར་ངྒ་མ་ཧཱ་ནཱ་མ-ར་ངྒ་ར་ཏྟེ ཏི་རཱི་ཊ་ཀེ;
ཨ་ཙྪི་ནྣ་དཱི་གྷ་ད་ས་ཀེ, ཕ་ལ་པུ་པྥ་ད་སེ ཏ་ཐཱ;
ཀ་ཉྩུ་ཀེ ཝེ་ཋ་ནེ ས་བྦཾ, ལ་བྷ་ཏི་ཙྪི་ནྣ་ཙཱི་ཝ་རོ་ཏི.