༢. ཨ་ཀཱ་ལ་ཙཱི་ཝ་ར་སི་ཀྑཱ་པ་ད་ཝ་ཎྞ་ནཱ

དུ་ཏི་ཡེ ཨ་ཀཱ་ལ་ཙཱི་ཝ་རནྟི ཨ་ཏྠ་ཏེ ཀ་ཐི་ནེ ཀ་ཐི་ན་མཱ་སེ་ཧི, ཨ་ན་ཏྠ་ཏེ ཙཱི་ཝ་ར་མཱ་ས་ཏོ ཨ་ཉྙ་སྨིཾ ཀཱ་ལེ ཨུ་པྤ་ནྣཾ, ཡཾ ཝཱ པ་ན ཀཱ་ལེ་པི ཨཱ་དི་སྶ དི་ནྣཾ. ཨཱ་དི་སྶ དི་ནྣཾ ནཱ་མ ‘‘ས་མྤ་ཏྟཱ བྷཱ་ཛེ་ནྟཱུ’’ཏི ཝ་ཏྭཱ ཝཱ, ‘‘ཨི་དཾ ག་ཎ་སྶ, ཨི་དཾ ཏུ་མྷཱ་ཀཾ ད་མྨཱི’’ཏི ཝ་ཏྭཱ ཝཱ, དཱ་ཏུ་ཀཱ་མ་ཏཱ་ཡ པཱ་ད་མཱུ་ལེ ཋ་པེ་ཏྭཱ ཝཱ དི་ནྣཾ. ཨི་ཙྩེ་ཏཾ ཨ་ཀཱ་ལ་ཙཱི་ཝ་རཾ ‘‘ཀཱ་ལ་ཙཱི་ཝ་ར’’ནྟི ཨ་དྷི་ཊྛ་ཧི་ཏྭཱ བྷཱ་ཛཱ་པེ་ནྟི་ཡཱ པ་ཡོ་གེ དུ་ཀྐ་ཊཾ, ཡཾ ཨ་ཏྟ་ནཱ ལ་དྡྷཾ, ཏཾ ནི་སྶ་གྒི་ཡཾ ཧོ་ཏི. ནི་སྶ་ཊྛཾ པ་ཊི་ལ་བྷི་ཏྭཱ་པི ཡ་ཐཱ་དཱ་ནེ་ཡེ་ཝ ཨུ་པ་ནེ་ཏ་བྦཾ, ཨ་ཉྙ་སྨི་མྤི ཨེ་ཝ་རཱུ་པེ སི་ཀྑཱ་པ་དེ ཨེ་སེ་ཝ ན་ཡོ.

སཱ་ཝ་ཏྠི་ཡཾ ཐུ་ལླ་ན་ནྡཾ ཨཱ་ར་བྦྷ ཨ་ཀཱ་ལ་ཙཱི་ཝ་རཾ ‘‘ཀཱ་ལ་ཙཱི་ཝ་ར’’ནྟི ཨ་དྷི་ཊྛ་ཧི་ཏྭཱ བྷཱ་ཛ་ན་ཝ་ཏྠུ་སྨིཾ པ་ཉྙ་ཏྟཾ, ཨ་ཀཱ་ལ་ཙཱི་ཝ་རེ ཝེ་མ་ཏི་ཀཱ་ཡ, ཀཱ་ལ་ཙཱི་ཝ་རེ ཨ་ཀཱ་ལ་ཙཱི་ཝ་ར་ས་ཉྙཱ་ཡ ཙེ་ཝ ཝེ་མ་ཏི་ཀཱ་ཡ ཙ དུ་ཀྐ་ཊཾ. ཨུ་བྷོ་སུ ཀཱ་ལ་ཙཱི་ཝ་ར་ས་ཉྙཱ་ཡ, ཨུ་མྨ་ཏྟི་ཀཱ་དཱི་ན་ཉྩ ཨ་ནཱ་པ་ཏྟི. ཨ་ཀཱ་ལ་ཙཱི་ཝ་ར་ཏཱ, ཏ་ཐཱ་ས་ཉྙི་ཏཱ, ‘‘ཀཱ་ལ་ཙཱི་ཝ་ར’’ནྟི ཨ་དྷི་ཊྛཱ་ཡ ལེ་སེ་ན བྷཱ་ཛཱ་པ་ནཾ, པ་ཊི་ལཱ་བྷོ་ཏི ཨི་མཱ་ནེ་ཏྠ ཙ་ཏྟཱ་རི ཨ་ངྒཱ་ནི. ས་མུ་ཊྛཱ་ནཱ་དཱི་ནི ཨ་དི་ནྣཱ་དཱ་ན་ས་དི་སཱ་ནཱི་ཏི.

ཨ་ཀཱ་ལ་ཙཱི་ཝ་ར་སི་ཀྑཱ་པ་ད་ཝ་ཎྞ་ནཱ ནི་ཊྛི་ཏཱ.