ཨ་སཱ་དྷཱ་ར་ཎ་པཱ་རཱ་ཛི་ཀཾ

༥. ཨུ་བྦྷ་ཛཱ་ཎུ་མ་ཎྜ་ལི་ཀཱ་སི་ཀྑཱ་པ་ད་ཝ་ཎྞ་ནཱ

ཨ་སཱ་དྷཱ་ར་ཎེ་སུ པ་ན ཙ་ཏུ་ནྣཾ ཏཱ་ཝ པཱ་རཱ་ཛི་ཀཱ་ནཾ པ་ཋ་མེ ཨ་ཝ་སྶུ་ཏཱཏི ཀཱ་ཡ་སཾ་ས་གྒ་རཱ་གེ་ན ཏི་ནྟཱ, ཀི་ལི་ནྣཱ་ཏི ཨ་ཏྠོ. དུ་ཏི་ཡ་པ་དེ་པི ཨེ་སེ་ཝ ན་ཡོ. པུ་རི་ས་པུ་གྒ་ལ་སྶཱཏི ཀཱ་ཡ་སཾ་ས་གྒཾ ས་མཱ་པ་ཛྫི་ཏུཾ ཝི་ཉྙུ་སྶ མ་ནུ་སྶ་ཛཱ་ཏི་ཀ་སྶ པུ་རི་ས་ས་ངྑཱ་ཏ་སྶ པུ་གྒ་ལ་སྶ. ཨ་དྷ་ཀྑ་ཀནྟི ཨ་ཏྟ་ནོ ཨ་ཀྑ་ཀཱ་ནཾ ཨ་དྷོ. ཨུ་བྦྷ་ཛཱ་ཎུ་མ་ཎྜ་ལནྟི ཛཱ་ཎུ་མ་ཎྜ་ལཱ་ནཾ ཨུ་པ་རི, ཨེ་ཏྠ ཙ ཨུ་བྦྷ་ཀ་པྤ་ར་མྤི ཨུ་བྦྷ་ཛཱ་ཎུ་མ་ཎྜ་ལེ་ནེ་ཝ ས་ངྒ་ཧི་ཏཾ. ཨཱ་མ་ས་ནནྟི ཨཱ་མ་ཛྫ་ནཾ ཕུ་ཊྛོ་ཀཱ་སཾ ཨ་ན་ཏི་ཀྐ་མི་ཏྭཱ ཏ་ཏྠེ་ཝ ས་ངྒྷ་ཊྚ་ནཾ. པ་རཱ་མ་ས་ནནྟི ཨི་ཏོ ཙི་ཏོ ཙ ས་ཉྩ་ར་ཎཾ. ག་ཧ་ཎནྟི ག་ཧི་ཏ་མ་ཏྟཾ. ཚུ་པ་ནནྟི ཨ་ས་ངྒྷ་ཊྚེ་ཏྭཱ ཕུ་ཊྛ་མ་ཏྟཾ. པ་ཊི་པཱི་ལ༹་ནནྟི ཨ་ངྒེ ག་ཧེ་ཏྭཱ ནི་པྤཱི་ལ༹་ནཾ. སཱ་དི་ཡེ་ཡྻཱཏི ཡཱ བྷི་ཀྑུ་ནཱི ཨ་ཏྟ་ནོ ཡ་ཐཱ་པ་རི་ཙྪི་ནྣེ ཀཱ་ཡེ པུ་རི་ས་སྶ ཨེ་ཏཾ ཨཱ་མ་ས་ནཱ་དིཾ སཱ་དི་ཡ་ཏི, ས་ཡཾ ཝཱ པ་ན ཏེ་ན ཀཱ་ཡེ་ན པུ་རི་ས་སྶ ཡཾ་ཀི་ཉྩི ཀཱ་ཡ་པྤ་དེ་སཾ སཱ་ད་ཡ་མཱ་ནཱ ཚུ་པ་ཏི, ཨ་ཡཾ ཨུ་བྦྷ་ཛཱ་ཎུ་མ་ཎྜ་ལི་ཀཱ ནཱ་མ པཱ་རཱ་ཛི་ཀཱ་ཏི ཨ་ཡ་མེ་ཏྠ ས་ངྑེ་པོ.

‘‘ནི་དཱ་ནཾ པུ་གྒ་ལཾ ཝ་ཏྠུ’’ནྟི་ཨཱ་དི་ཀེ (ཀ་ངྑཱ. ཨ་ཊྛ. པ་ཋ་མ་པཱ་རཱ་ཛི་ཀ་ཝ་ཎྞ་ནཱ) ཏེ་ན ཝི་ཏྠཱ་ར་ཝི་ནི་ཙྪ་ཡེ ཡ་སྨཱ ས་བྦཱ་ནེ་ཝ ཨ་སཱ་དྷཱ་ར་ཎ་པ་ཉྙ་ཏྟི་ཡོ ཧོ་ནྟི, ཏ་སྨཱ ཨི་ཏོ པ་ཊྛཱ་ཡ ས་ནྟིཾ ཨ་ནུ་པ་ཉྙ་ཏྟིཾ ཝ་ཏྭཱ སཱ་དྷཱ་ར་ཎ་པ་ཉྙ་ཏྟཱི་ཏི ཝཱ ཨ་སཱ་དྷཱ་ར་ཎ་པ་ཉྙ་ཏྟཱི་ཏི ཝཱ ན ཝ་ཀྑཱ་མ, ཨཱ་ཎ་ཏྟི་ཡཾ ཡ་ཏྠ ཨཱ་ཎ་ཏྟི ན་ཏྠི, ཏ་ཏྠ ཀི་ཉྩི ཨ་ཝ་ཏྭཱ ཡ་ཏྠ ཨ་ཏྠི, ཏ་ཏྠེ་ཝ ཝ་ཀྑཱ་མ, ཝི་པ་ཏྟི་ཝི་ཙཱ་ར་ཎཱ ཝུ་ཏྟཱ་ཡེ་ཝ.

ཨ་ཝ་སེ་སཾ པ་ན ས་བྦ་ཏྠ ཝ་ཏྟ་བྦཾ, ཏ་ཡི་དཾ ཝུ་ཙྩ་ཏི, ཨི་དཾ ཏཱ་ཝ སི་ཀྑཱ་པ་དཾ སཱ་ཝ་ཏྠི་ཡཾ སུ་ནྡ་རཱི་ན་ནྡཾ ཨཱ་ར་བྦྷ ཀཱ་ཡ་སཾ་ས་གྒཾ ས་མཱ་པ་ཛྫ་ན་ཝ་ཏྠུ་སྨིཾ པ་ཉྙ་ཏྟཾ, ཨེ་ཀ་ཏོ་ཨ་ཝ་སྶུ་ཏེ ཡ་ཐཱ་པ་རི་ཙྪི་ནྣེ་ན ཀཱ་ཡེ་ན པུ་རི་ས་སྶ ཀཱ་ཡཾ, ཨུ་བྷ་ཏོ་ཨ་ཝ་སྶུ་ཏེ་པི ཀཱ་ཡེ་ན ཀཱ་ཡ་པྤ་ཊི་བ་དྡྷཾ, ཡ་ཐཱ་པ་རི་ཙྪི་ནྣ་ཀཱ་ཡ་པྤ་ཊི་བ་དྡྷེ་ན ཝཱ ཨ་ཝ་སེ་ས་ཀཱ་ཡེ་ན ཝཱ ཏ་སྶ ཀཱ་ཡཾ ཨཱ་མ་ས་ནྟི་ཡཱ ཐུ་ལླ་ཙྩ་ཡཾ, ཡ་ཀྑ་པེ་ཏ་པ་ཎྜ་ཀ་ཏི་ར་ཙྪཱ་ན་ག་ཏ་མ་ནུ་སྶ་ཝི་གྒ་ཧཱ་ནཾ ཨུ་བྷ་ཏོ་ཨ་ཝ་སྶུ་ཏེ ཡ་ཐཱ་པ་རི་ཙྪི་ནྣེ་ན ཀཱ་ཡེ་ན ཀཱ་ཡཾ ཨཱ་མ་ས་ནྟི་ཡཱ་པི ཐུ་ལླ་ཙྩ་ཡཾ, ས་ཙེ པ་ན པུ་རི་ས་སྶ ཀཱ་ཡ་སཾ་ས་གྒ་རཱ་གོ ན་ཏྠི, པཱ་རཱ་ཛི་ཀ་ཀྑེ་ཏྟེ་པི ཐུ་ལླ་ཙྩ་ཡ་མེ་ཝ. ཨ་ཝ་སེ་སེ པ་ན ཀཱ་ཡ་པྤ་ཊི་བ་དྡྷེ་ན ཀཱ་ཡ་པྤ་ཊི་བ་དྡྷཱ་དི་བྷེ་དེ, མེ་ཐུ་ན་རཱ་ག་གེ་ཧ་སི་ཏ་པེ་མེ་སུ ཙ ས་བྦ་ཏྠ དུ་ཀྐ་ཊཾ. ཨ་ས་ཉྩི་ཙྩ, ཨ་སྶ་ཏི་ཡཱ, ཨ་ཛཱ་ན་ནྟི་ཡཱ, ཨ་སཱ་དི་ཡ་ནྟི་ཡཱ, ཨུ་མྨ་ཏྟི་ཀཱ་དཱི་ན་ཉྩ ཨ་ནཱ་པ་ཏྟི. ཨ་ངྒཱ་ནི ས་མུ་ཊྛཱ་ནཱ་དཱི་ནི ཙ བྷི་ཀྑུ་པཱ་ཏི་མོ་ཀྑེ ཀཱ་ཡ་སཾ་ས་གྒེ ཝུ་ཏྟ་ན་ཡེ་ནེ་ཝ ཝེ་དི་ཏ་བྦཱ་ནཱི་ཏི.

ཨུ་བྦྷ་ཛཱ་ཎུ་མ་ཎྜ་ལི་ཀཱ་སི་ཀྑཱ་པ་ད་ཝ་ཎྞ་ནཱ ནི་ཊྛི་ཏཱ.

༦. ཝ་ཛྫ་པྤ་ཊི་ཙྪཱ་དི་ཀཱ་སི་ཀྑཱ་པ་ད་ཝ་ཎྞ་ནཱ

དུ་ཏི་ཡེ ག་ཎ་སྶཱཏི ཨ་ཉྙཱ་སཾ བྷི་ཀྑུ་ནཱི་ནཾ. ཋི་ཏཱཏི ས་ལི་ངྒེ ཋི་ཏཱ. ཙུ་ཏཱཏི ཀཱ་ལ་ངྐ་ཏཱ. ནཱ་སི་ཏཱཏི ལི་ངྒ་ནཱ་ས་ནཱ་ཡ ས་ཡཾ ཝཱ ན་ཊྛཱ, ཨ་ཉྙེ་ཧི ཝཱ ནཱ་སི་ཏཱ. ཨ་ཝ་སྶ་ཊཱཏི ཏི་ཏྠཱ་ཡ་ཏ་ནཾ ས་ངྐ་ནྟཱ. པུ་བྦེ་ཝཱ་ཧཾ ཨ་ཡྻེ ཨ་ཉྙཱ་སིནྟི ཨི་དཾ ཏ་སྶཱ ཝ་ཙ་ན་ཀཱ་ལ་ད་སྶ་ནཾ, ས་ལི་ངྒེ ཋི་ཏཱ་ཡ པ་ན པཱ་རཱ་ཛི་ཀ་བྷཱ་ཝཾ ཉ་ཏྭཱ ‘‘ན དཱ་ནི ནཾ ཀ་སྶ་ཙི ཨཱ་རོ་ཙེ་སྶཱ་མཱི’’ཏི དྷུ་རེ ནི་ཀྑི་ཏྟ་མ་ཏྟེ་ཡེ་ཝ ཨ་ཡཾ ཝ་ཛྫ་པྤ་ཊི་ཙྪཱ་དི་ཀཱ ནཱ་མ པཱ་རཱ་ཛི་ཀཱ ཧོ་ཏཱི་ཏི.

སཱ་ཝ་ཏྠི་ཡཾ ཐུ་ལླ་ན་ནྡཾ ཨཱ་ར་བྦྷ ནེ་ཝ་ཨ་ཏྟ་ནཱ་པ་ཊི་ཙོ་ད་ནཱ ན་ག་ཎ་སྶ ཨཱ་རོ་ཙ་ན་ཝ་ཏྠུ་སྨིཾ པ་ཉྙ་ཏྟཾ, སེ་ས་མེ་ཏྠ ས་པྤཱ་ཎ་ཀ་ཝ་གྒ་མྷི དུ་ཊྛུ་ལླཱ་པ་ཏྟི་པྤ་ཊི་ཙྪཱ་ད་ན་སི་ཀྑཱ་པ་དེ ཝུ་ཏྟ་ན་ཡེ་ནེ་ཝ ཝེ་དི་ཏ་བྦཾ. ཏ་ཏྲ ཧི པཱ་ཙི་ཏྟི་ཡཾ, ཨི་དྷ པཱ་རཱ་ཛི་ཀ་ནྟི ཨ་ཡ་མེ་ཝ ཝི་སེ་སོ, སེ་སཾ ཏཱ་དི་ས་མེ་ཝཱ་ཏི.

ཝ་ཛྫ་པྤ་ཊི་ཙྪཱ་དི་ཀཱ་སི་ཀྑཱ་པ་ད་ཝ་ཎྞ་ནཱ ནི་ཊྛི་ཏཱ.

༧. ཨུ་ཀྑི་ཏྟཱ་ནུ་ཝ་ཏྟི་ཀཱ་སི་ཀྑཱ་པ་ད་ཝ་ཎྞ་ནཱ

ཏ་ཏི་ཡེ ཨུ་ཀྑི་ཏྟནྟི ཨཱ་པ་ཏྟི་ཡཱ ཨ་ད་སྶ་ནཱ་དཱི་སུ ཨུ་ཀྑི་ཏྟཾ. དྷ་མྨེ་ནཱཏི བྷཱུ་ཏེ་ན ཝ་ཏྠུ་ནཱ. ཝི་ན་ཡེ་ནཱཏི ཙོ་དེ་ཏྭཱ སཱ་རེ་ཏྭཱ. ས་ཏྠུ་སཱ་ས་ནེ་ནཱཏི ཨི་དྷཱ་པི ཙོ་དེ་ཏྭཱ སཱ་རེ་ཏྭཱ ཀ་ར་ཎ་མེ་ཝ ས་ཏྠུ་སཱ་ས་ནཾ ནཱ་མ. ཨ་ནཱ་ད་རནྟི ཡེ་ན ས་ངྒྷེ་ན ཨུ་ཀྑེ་པ་ནི་ཡ་ཀ་མྨཾ ཀ་ཏཾ, ཏ་སྨིཾ ཝཱ, ཏ་ཏྠ པ་རི་ཡཱ་པ་ནྣ་ག་ཎེ ཝཱ ཨེ་ཀ་པུ་གྒ་ལེ ཝཱ ཏ་སྨིཾ ཝཱ ཀ་མྨེ ཨཱ་ད་ར་ཝི་ར་ཧི་ཏཾ, ས་མྨཱ་ཝ་ཏྟ་ནཱ་ཡ ཨ་ཝ་ཏྟ་མཱ་ན་ནྟི ཨ་ཏྠོ. ཨ་པྤ་ཊི་ཀཱ་རནྟི པ་ཊི་ཀཱ་ར་ར་ཧི་ཏཾ, ཨ་ནོ་སཱ་རི་ཏ་ནྟི ཨ་ཏྠོ. ཨ་ཀ་ཏ་ས་ཧཱ་ཡནྟི ཨེ་ཀ་ཀ་མྨཱ་དི་ཀེ སཾ་ཝཱ་སེ ས་ཧ ཨ་ཡ་ན་བྷཱ་ཝེ་ན ས་མཱ་ན་སཾ་ཝཱ་ས་ཀཱ བྷི་ཀྑཱུ ས་ཧཱ་ཡཱ ནཱ་མ, ཡ་སྶ པ་ན སོ སཾ་ཝཱ་སོ ཏེ་ཧི ས་དྡྷིཾ ན་ཏྠི ན ཏེ་ན ཏེ ས་ཧཱ་ཡཱ ཀ་ཏཱ ཧོ་ནྟི, ཨི་ཏི སོ ཨ་ཀ་ཏ་ས་ཧཱ་ཡོ ནཱ་མ, ཏཾ ཨ་ཀ་ཏ་ས་ཧཱ་ཡཾ, ས་མཱ་ན་སཾ་ཝཱ་ས་ཀ་བྷཱ་ཝཾ ཨ་ནུ་པ་ག་ཏ་ནྟི ཨ་ཏྠོ. ཏ་མ་ནུ་ཝ་ཏྟེ་ཡྻཱཏི ཏཾ ཨུ་ཀྑི་ཏྟ་ཀཾ ཨུ་ཀྑི་ཏྟ་ཀ་བྷཱ་ཝེ་ཡེ་ཝ ཋི་ཏཾ བྷི་ཀྑུཾ ཡཱ བྷི་ཀྑུ་ནཱི ཡཾ་དི་ཊྛི་ཀོ སོ ཧོ་ཏི, ཏཱ་ཡ དི་ཊྛི་ཡཱ ག་ཧ་ཎ་བྷཱ་ཝེ་ན ཨ་ནུ་ཝ་ཏྟེ་ཡྻ. སཱ བྷི་ཀྑུ་ནཱི བྷི་ཀྑུ་ནཱི་ཧི ས་ངྒྷ་བྷེ་ད་སི་ཀྑཱ་པ་དཱ་དཱི་སུ ཝུ་ཏྟ་ན་ཡེ་ན ཝི་སུཾ ས་ངྒྷ་མ་ཛ྄ཛྷེ ཙ ཝུ་ཙྩ་མཱ་ནཱ ཏཾ ཝ་ཏྠུཾ ཨ་པྤ་ཊི་ནི་སྶ་ཛྫ་ནྟཱི ས་མ་ནུ་བྷཱ་ས་ན་ཀ་མྨ་པ་རི་ཡོ་སཱ་ནེ ཨུ་ཀྑི་ཏྟཱ་ནུ་ཝ་ཏྟི་ཀཱ ནཱ་མ པཱ་རཱ་ཛི་ཀཱ ཧོ་ཏཱི་ཏི.

སཱ་ཝ་ཏྠི་ཡཾ ཐུ་ལླ་ན་ནྡཾ ཨཱ་ར་བྦྷ ཨུ་ཀྑི་ཏྟཱ་ནུ་ཝ་ཏྟ་ན་ཝ་ཏྠུ་སྨིཾ པ་ཉྙ་ཏྟཾ, ཉ་ཏྟི་ཡཱ དུ་ཀྐ་ཊཾ, དྭཱི་ཧི ཀ་མྨ་ཝཱ་ཙཱ་ཧི དྭེ ཐུ་ལླ་ཙྩ་ཡཱ, ‘‘ཡ་སྶཱ ན་ཀྑ་མ་ཏི, སཱ བྷཱ་སེ་ཡྻཱ’’ཏི ཨེ་ཝཾ ཡྻ-ཀཱ་ར་པྤ་ཏྟཱ་ཡ ཏ་ཏི་ཡ་ཀ་མྨ་ཝཱ་ཙཱ་ཡ པཱ་རཱ་ཛི་ཀཾ, ཨ་དྷ་མྨ་ཀ་མྨེ ཏི་ཀ་དུ་ཀྐ་ཊཾ, སེ་སཾ ས་ངྒྷ་བྷེ་ད་སི་ཀྑཱ་པ་དཱ་དཱི་སུ ཝུ་ཏྟ་ན་ཡེ་ནེ་ཝ ཝེ་དི་ཏ་བྦཾ.

ཨུ་ཀྑི་ཏྟཱ་ནུ་ཝ་ཏྟི་ཀཱ་སི་ཀྑཱ་པ་ད་ཝ་ཎྞ་ནཱ ནི་ཊྛི་ཏཱ.

༨. ཨ་ཊྛ་ཝ་ཏྠུ་ཀཱ་སི་ཀྑཱ་པ་ད་ཝ་ཎྞ་ནཱ

ཙ་ཏུ་ཏྠེ ཨ་ཝ་སྶུ་ཏཱཏི ལོ་ཀ་སྶཱ་ད་མི་ཏྟ་ས་ནྠ་ཝ་ཝ་སེ་ན ཀཱ་ཡ་སཾ་ས་གྒ་རཱ་གེ་ན ཏི་ནྟཱ. ཨ་ཡ་མེ་ཝ ཧི ཨ་ཏྠོ སཱི་ཧ་ལ༹་མཱ་ཏི་ཀཱ་ཊྛ་ཀ་ཐཱ་ཡཾ ཝུ་ཏྟོ, ས་མ་ནྟ་པཱ་སཱ་དི་ཀཱ་ཡཾ (པཱ་ཙི. ཨ་ཊྛ. ༦༧༥) པ་ན་སྶ ཝི་ཙཱ་ར་ཎཱ ཀ་ཏཱ, དུ་ཏི་ཡ་པ་དེ་པི ཨེ་སེ་ཝ ན་ཡོ. པུ་རི་ས་པུ་གྒ་ལ་སྶ ཧ་ཏྠ་གྒ་ཧ་ཎཾ ཝཱཏི་ཨཱ་དཱི་སུ པ་ན ཡཾ པུ་རི་ས་པུ་གྒ་ལེ་ན ཧ་ཏྠེ ག་ཧ་ཎཾ ཀ་ཏཾ, ཏཾ ‘‘པུ་རི་ས་པུ་གྒ་ལ་སྶ ཧ་ཏྠ་གྒ་ཧ་ཎ’’ནྟི ཝུ་ཏྟཾ, ཨེ་སེ་ཝ ན་ཡོ ས་ངྒྷཱ་ཊི་ཀ་ཎྞ་གྒ་ཧ་ཎེ་པི. ཧ་ཏྠ་གྒ་ཧ་ཎནྟི ཨེ་ཏྠ ཙ ཡ་སྶ ཀ་སྶ་ཙི ཨ་པཱ་རཱ་ཛི་ཀ་ཀྑེ་ཏྟ་བྷཱུ་ཏ་སྶ ཨ་ངྒ་སྶ ག་ཧ་ཎཾ ཧ་ཏྠ་གྒ་ཧ་ཎཾ, ཡ་སྶ ཀ་སྶ་ཙི ནི་ཝ་ཏྠ་སྶ ཝཱ པཱ་རུ་ཏ་སྶ ཝཱ ག་ཧ་ཎཾ ས་ངྒྷཱ་ཊི་ཀ་ཎྞ་གྒ་ཧ་ཎཾ. ས་ནྟི་ཊྛེ་ཡྻ ཝཱཏི་ཨཱ་དཱི་སུ ཀཱ་ཡ་སཾ་ས་གྒ་ས་ངྑཱ་ཏ་སྶ ཨ་ས་དྡྷ་མྨ་སྶ པ་ཊི་སེ་ཝ་ན་ཏྠཱ་ཡ པུ་རི་ས་སྶ ཧ་ཏྠ་པཱ་སེ ས་ནྟི་ཊྛེ་ཡྻ ཝཱ, ཏ་ཏྠ ཋི་ཏཱ ས་ལླ་པེ་ཡྻ ཝཱ, པུ་རི་སེ་ན ཝཱ ‘‘ཨི་ཏྠ་ནྣཱ་མཾ ཋཱ་ནཾ ཨཱ་ག་ཙྪཱ’’ཏི ཝུ་ཏྟཱ ཏཾ ས་ངྐེ་ཏཾ ག་ཙྪེ་ཡྻ, ཏ་སྶ ཝཱ པུ་རི་ས་སྶ ཨ་བྦྷཱ་ག་མ་ནཾ སཱ་དི་ཡེ་ཡྻ, ཡེ་ན ཀེ་ན་ཙི ཝཱ པ་ཊི་ཙྪ་ནྣཾ ཨོ་ཀཱ་སཾ པ་ཝི་སེ་ཡྻ, པུ་རི་ས་སྶ ཧ་ཏྠ་པཱ་སེ ཋ་ཏྭཱ ཀཱ་ཡཾ ཨུ་པ་སཾ་ཧ་རེ་ཡྻཱ་ཏི ཨེ་ཝ་མ་ཏྠོ ད་ཊྛ་བྦོ. ཨ་ཡ་མྤི པཱ་རཱ་ཛི་ཀཱཏི ཡ་ཐཱ པུ་རི་མཱ་ཡོ, ཨེ་ཝཾ ཨ་ཡ་མྤི བྷི་ཀྑུ་ནཱི ཨེ་ཏ་སྶ ཀཱ་ཡ་སཾ་ས་གྒ་ས་ངྑཱ་ཏ་སྶ ཨ་ས་དྡྷ་མྨ་སྶ པ་ཊི་སེ་ཝ་ན་ཏྠཱ་ཡ ཨེ་ཏཱ་ནི ཨ་ཊྛ ཝ་ཏྠཱུ་ནི པ་ཊི་པཱ་ཊི་ཡཱ ཝཱ ཨུ་པྤ་ཊི་པཱ་ཊི་ཡཱ ཝཱ པཱུ་རེ་ཏྭཱ ཨ་ཊྛ་ཝ་ཏྠུ་ཀཱ ནཱ་མ པཱ་རཱ་ཛི་ཀཱ ཧོ་ཏཱི་ཏི.

སཱ་ཝ་ཏྠི་ཡཾ ཚ་བྦ་གྒི་ཡཱ བྷི་ཀྑུ་ནི་ཡོ ཨཱ་ར་བྦྷ ཨ་ཊྛ་མཾ ཝ་ཏྠུཾ པ་རི་པཱུ་ར་ཎ་ཝ་ཏྠུ་སྨིཾ པ་ཉྙ་ཏྟཾ, ས་ངྐེ་ཏ་ག་མ་ནེ པ་དེ པ་དེ དུ་ཀྐ་ཊཾ, པུ་རི་ས་སྶ ཧ་ཏྠ་པཱ་སཾ ཨོ་ཀྐ་ནྟ་མ་ཏྟེ ཐུ་ལླ་ཙྩ་ཡཾ, པུ་རི་ས་སྶ ཨ་བྦྷཱ་ག་མ་ན་སཱ་ད་ཡ་མཱ་ནེ་པི དུ་ཀྐ་ཊཾ. ཧ་ཏྠ་པཱ་སོ་ཀྐ་མ་ནེ ཐུ་ལླ་ཙྩ་ཡཾ, སེ་སེ་སུ ཨེ་ཀེ་ཀ་སྨིཾ ཐུ་ལླ་ཙྩ་ཡ་མེ་ཝ, ཨ་ཊྛ་མེ པ་རི་པུ་ཎྞེ པཱ་རཱ་ཛི་ཀཾ. ཨེ་ཀེ་ཀ་སྨིཾ པ་ན ཝ་ཏྠུ་སྨིཾ ས་ཏ་ཀྑ་ཏྟུ་མྤི ཝཱི་ཏི་ཀྐ་ནྟེ ཏཱ ཨཱ་པ་ཏྟི་ཡོ དེ་སེ་ཏྭཱ མུ་ཙྩ་ཏི, ཨ་པི་ཙེ་ཏྠ ག་ཎ་ནཱུ་པི་ཀཱ ཨཱ་པ་ཏྟི ཝེ་དི་ཏ་བྦཱ, ‘‘ཨི་དཱ་ནི ནཱ་པ་ཛྫི་སྶཱ་མཱི’’ཏི ཧི དྷུ་ར་ནི་ཀྑེ་པཾ ཀ་ཏྭཱ དེ་སི་ཏཱ ག་ཎ་ནཱུ་པི་ཀཱ, དེ་སི་ཏ་ག་ཎ་ནཾ ཨུ་པེ་ཏི, པཱ་རཱ་ཛི་ཀ་སྶ ཨ་ངྒཾ ན ཧོ་ཏི. ཏ་སྨཱ ཡཱ ཨེ་ཀཾ ཨཱ་པ་ནྣཱ དྷུ་ར་ནི་ཀྑེ་པཾ ཀ་ཏྭཱ དེ་སེ་ཏྭཱ པུ་ན ཀི་ལེ་ས་ཝ་སེ་ན ཨཱ་པ་ཛྫ་ཏི, པུ་ན་པི དེ་སེ་ཏི, ཨེ་ཝཾ ཨ་ཊྛ་མཾ པ་རི་པཱུ་རེ་ནྟཱི་པི པཱ་རཱ་ཛི་ཀཱ ན ཧོ་ཏི. ཡཱ པ་ན ཨཱ་པ་ཛྫི་ཏྭཱ ‘‘པུ་ན་པི ཨ་ཉྙཾ ཝ་ཏྠུཾ ཨཱ་པ་ཛྫི་སྶཱ་མཱི’’ཏི ས་ཨུ་སྶཱ་ཧཱ་ཝ དེ་སེ་ཏི, ཏ་སྶཱ སཱ ཨཱ་པ་ཏྟི ཨ་ག་ཎ་ནཱུ་པི་ཀཱ, དེ་སི་ཏཱ་པི ཨ་དེ་སི་ཏཱ ཧོ་ཏི, པཱ་རཱ་ཛི་ཀ་སྶ ཨ་ངྒཾ ཧོ་ཏི. ཨ་ས་ཉྩི་ཙྩ, ཨ་སྶ་ཏི་ཡཱ, ཨ་ཛཱ་ན་ནྟི་ཡཱ ཨ་སཱ་དི་ཡ་ནྟི་ཡཱ, ཨུ་མྨ་ཏྟི་ཀཱ་དཱི་ན་ཉྩ ཨ་ནཱ་པ་ཏྟི. ཀཱ་ཡ་སཾ་ས་གྒ་རཱ་གོ, ས་ཨུ་སྶཱ་ཧ་ཏཱ, ཨ་ཊྛ་མ་སྶ ཝ་ཏྠུ་སྶ པཱུ་ར་ཎ་ནྟི ཨི་མཱ་ནེ་ཏྠ ཏཱི་ཎི ཨ་ངྒཱ་ནི. ས་མ་ནུ་བྷཱ་ས་ན་ས་མུ་ཊྛཱ་ནཾ, ཀི་རི་ཡཱ་ཀི་རི་ཡཾ, ས་ཉྙཱ་ཝི་མོ་ཀྑཾ, ས་ཙི་ཏྟ་ཀཾ, ལོ་ཀ་ཝ་ཛྫཾ, ཀཱ་ཡ་ཀ་མྨཾ, ཝ་ཙཱི་ཀ་མྨཾ, ཨ་ཀུ་ས་ལ་ཙི་ཏྟཾ, དྭི་ཝེ་ད་ན་ནྟི.

ཨ་ཊྛ་ཝ་ཏྠུ་ཀཱ་སི་ཀྑཱ་པ་ད་ཝ་ཎྞ་ནཱ ནི་ཊྛི་ཏཱ.

ཨུ་དྡི་ཊྛཱ ཁོ ཨ་ཡྻཱ་ཡོ ཨ་ཊྛ པཱ་རཱ་ཛི་ཀཱ དྷ་མྨཱཏི བྷི་ཀྑཱུ ཨཱ་ར་བྦྷ པ་ཉྙ་ཏྟཱ སཱ་དྷཱ་ར་ཎཱ ཙ་ཏྟཱ་རོ, ཨི་མེ ཙ་ཏྟཱ་རོ་ཏི ཨེ་ཝཾ པཱ་ཏི་མོ་ཀྑུ་དྡེ་ས་མ་གྒེ་ན ཨ་ཊྛ པཱ་རཱ་ཛི་ཀཱ དྷ་མྨཱ ཨུ་དྡི་ཊྛཱ་ཏི ཨེ་ཝ་མེ་ཏྠ ཨ་ཏྠོ ཝེ་དི་ཏ་བྦོ, སེ་སཾ བྷི་ཀྑུ་པཱ་ཏི་མོ་ཀྑ་ཝ་ཎྞ་ནཱ་ཡཾ ཝུ་ཏྟ་ན་ཡ་མེ་ཝཱ་ཏི.

ཀ་ངྑཱ་ཝི་ཏ་ར་ཎི་ཡཱ པཱ་ཏི་མོ་ཀྑ་ཝ་ཎྞ་ནཱ་ཡ

བྷི་ཀྑུ་ནི་པཱ་ཏི་མོ་ཀྑེ

པཱ་རཱ་ཛི་ཀ་ཝ་ཎྞ་ནཱ ནི་ཊྛི་ཏཱ.