༢. ཨུ་པྤ་ཏྟཱ་ནུ་པྤ་ཏྟི་ཝཱ་ར་ཝ་ཎྞ་ནཱ

༩༩༡. ཀཱ་མ་དྷཱ་ཏུ་ས་མྦྷཱུ་ཏཱ་ན་ཉྩཱཏི ཨི་དྡྷི་ཡཱ རཱུ་པ་དྷཱ་ཏུ་ག་ཏཱ་ནཾ ཀཱ་མཱ་ཝ་ཙ་ར་ས་ཏྟཱ་ན་ཉྩཱ་ཏི ཨ་ཏྠོ. གྷཱ་ནཱ་ཡ་ཏ་ནཱ་དཱི་ནཾ ཨ་བྷཱ་ཝེ་ནཱཏི ཨེ་ཏྠ ཡ་དི ཏ་ད་བྷཱ་ཝེ་ན ག་ནྡྷཱ་ཡ་ཏ་ནཱ་དཱི་ནི ཨཱ་ཡ་ཏ་ནཱ་དི་ཀི་ཙྩཾ ན ཀ་རོ་ནྟི, ཨ་ས་ཉྙ་ས་ཏྟེ་སུ ཙ་ཀྑཱ་ཡ་ཏ་ན་སྶ ཨ་བྷཱ་ཝེ་ན རཱུ་པཱ་ཡ་ཏ་ནཾ ཨཱ་ཡ་ཏ་ནཱ་དི་ཀི་ཙྩཾ ན ཀ་རེ་ཡྻ. ཏ་ཏོ ‘‘ཨ་ས་ཉྙ་ས་ཏྟཱ་ནཾ དེ་ཝཱ་ནཾ ཨུ་པ་པ་ཏྟི་ཀྑ་ཎེ དྭཱ་ཡ་ཏ་ནཱ་ནི པཱ་ཏུ་བྷ་ཝ་ནྟཱི’’ཏི་ཨཱ་དི་ཝ་ཙ་ནཾ ན ཝ་ཏྟ་བྦཾ སི་ཡཱ. ཀཱ་མཱ་ཝ་ཙ་རཱ་དི་ཨོ་ཀཱ་སཱ ཏ་ཏྠ ཨུ་པྤ་ཛྫ་མཱ་ན་ས་ཏྟཱ་ནཾ, ཏ་ཏྠ པ་རི་ཡཱ་པ་ནྣ་དྷ་མྨཱ་ནཾ ཝཱ ཨ་དྷི་ཊྛཱ་ན་བྷཱ་ཝེ་ན ‘‘དྷཱ་ཏཱུ’’ཏི ཝུ་ཙྩ་ནྟི, ཏ་ཐཱ ཡེ་སུ ཀཱ་མཱ་ཝ་ཙ་རཱ་དི་ས་ཏྟ་ནི་ཀཱ་ཡེ་སུ ཀཱ་མཱ་ཝ་ཙ་རཱ་དི་ས་ཏྟཱ ཨུ་པྤ་ཛྫ་ནྟི, ཏེ་སཾ ས་ཏྟཱ་ནཾ ཨུ་པྤ་ཏྟི ཨེ་ཏྠཱ་ཏི ས་ཏྟུ་པྤ་ཏྟཱི་ཏི ཝུ་ཙྩ་མཱ་ནཱ ཏེ ས་ཏྟ་ནི་ཀཱ་ཡཱ ཙ, ན པ་ནེ་ཏྠ ཨ་པ་རི་ཡཱ་པ་ནྣོ་ཀཱ་སོ ཨ་པ་རི་ཡཱ་པ་ནྣ་ས་ཏྟ་ནི་ཀཱ་ཡོ ཙ ཨ་ཏྠི, ཡོ ‘‘དྷཱ་ཏཱུ’’ཏི ཝུ་ཙྩེ་ཡྻཱ་ཏི ཨི་མ་མ་ཏྠཾ ད་སྶེ་ནྟོ ‘‘ཨོ་ཀཱ་ས་ཝ་སེ་ན ཝཱ ས་ཏྟུ་པྤ་ཏྟི་ཝ་སེ་ན ཝཱ ཨ་པ་རི་ཡཱ་པ་ནྣ་དྷཱ་ཏུ ནཱ་མ ན་ཏྠཱི’’ཏི ཨཱ་ཧ. ས་ཏྟུ་པྤ་ཏྟི་ཝ་སེ་ནཱཏི ཨི་མི་ནཱ ཝཱ ཨོ་ཀཱ་ས་ས་ཏྟ་ལོ་ཀ་དྭ་ཡཾ ས་ཧ ག་ཧེ་ཏྭཱ ཏཱ་དི་སཱ་ཡ ཨ་པ་རི་ཡཱ་པ་ནྣ་དྷཱ་ཏུ་ཡཱ ཨ་བྷཱ་ཝཾ ད་སྶེ་ཏི, ས་ཏྟ་བྷཱ་ཝེ་ན ཝཱ ཨུ་པྤ་ཏྟི ས་ཏྟུ་པྤ་ཏྟི, ས་ཏྟཱ་ཝཱ་ས་ཝ་སེ་ན ཏཾ་ཏཾ་བྷ་ཝ་ཝ་སེ་ན ཨུ་པྤ་ཛྫ་མཱ་ནཱ ཨུ་པཱ་དི་ནྣ་ཀ་ཀྑ་ནྡྷཱ ཏཾ་ཏཾ་པ་རི་ཡཱ་པ་ནྣཱ་ནཾ ས་དི་སཱ་དྷི་ཊྛཱ་ན་བྷཱ་ཝེ་ན དྷཱ་ཏཱུ་ཏི ཝུ་ཙྩ་ནྟཱི་ཏི ཨེ་ཝཾ ཨ་པ་རི་ཡཱ་པ་ནྣ་དྷཱ་ཏུ ན་ཏྠཱི་ཏི ཨ་ཏྠོ.