༦. སེ་ཝ་ནཱ་སུ་ཏྟ་ཝ་ཎྞ་ནཱ

༦. ཚ་ཊྛེ ཛཱི་ཝི་ཏ་ས་མྦྷཱ་རཱཏི ཛཱི་ཝི་ཏ་པྤ་ཝ་ཏྟི་ཡཱ ས་མྦྷཱ་རཱ པ་ཙྩ་ཡཱ. ས་མུ་དཱ་ནེ་ཏ་བྦཱཏི ས་མྨཱ ཉཱ་ཡེ་ན ཨ་ན་ཝ་ཛྫ་ཨུ་ཉྪཱ་ཙ་རི་ཡཱ་དི་ནཱ ཨུ་དྡྷ་མུ་དྡྷ་མཱ་ནེ་ཏ་བྦཱ པཱ་པུ་ཎི་ཏ་བྦཱ. ཏེ པ་ན ས་མུ་དཱ་ནི་ཏཱ ས་མཱ་ཧ་ཏཱ ནཱ་མ ཧོ་ནྟཱི་ཏི ཨཱ་ཧ ‘‘ས་མཱ་ཧ་རི་ཏ་བྦཱ’’ཏི. དུ་ཀྑེ་ན ཨུ་པྤ་ཛྫ་ནྟཱིཏི སུ་ལ་བྷུ་པྤཱ་དཱ ན ཧོ་ནྟི. ཨེ་ཏེ་ན གོ་ཙ་ར་ཨ་ས་པྤཱ་ཡཱ་དི་བྷཱ་ཝཾ ད་སྶེ་ཏི. ར་ཏྟི་བྷཱ་གཾ ཝཱ དི་ཝ་ས་བྷཱ་གཾ ཝཱཏི བྷུ་མྨ་ཏྠེ ཨུ་པ་ཡོ་ག་ཝ་ཙ་ན་ནྟི ཨཱ་ཧ ‘‘ར་ཏྟི་ཀོ་ཊྛཱ་སེ ཝཱ དི་ཝ་ས་ཀོ་ཊྛཱ་སེ ཝཱ’’ཏི. ར་ཏྟིཾ་ཡེ་ཝ པ་ཀྐ་མི་ཏ་བྦཾ ས་མ་ཎ་དྷ་མྨ་སྶ ཏ་ཏྠ ཨ་ནི་པྥ་ཛྫ་ན་ཏོ. ས་ངྑཱ་པཱིཏི ‘‘ཡ་ད་ཏྠ་མ་ཧཾ པ་བྦ་ཛི་ཏོ, ན མེ་ཏཾ ཨི་དྷ ནི་པྥ་ཛྫ་ཏི, ཙཱི་ཝ་རཱ་དི པ་ན ས་མུ་དཱ་ག་ཙྪ་ཏི, ནཱ་ཧཾ ཏ་ད་ཏྠཾ པ་བྦ་ཛི་ཏོ, ཀིཾ མེ ཨི་དྷ ཝཱ་སེ་ནཱ’’ཏི པ་ཊི་ས་ངྑཱ་ཡ་པི. ཏེ་ནཱ་ཧ ‘‘སཱ་མ་ཉྙ་ཏྠ་སྶ བྷཱ་ཝ་ནཱ་པཱ་རི་པཱུ་རི་ཨ་ག་མ་ནཾ ཛཱ་ནི་ཏྭཱ’’ཏི. ཨ་ན་ནྟ་ར་ཝཱ་རེ ས་ངྑཱ་པཱིཏི ས་མ་ཎ་དྷ་མྨ་སྶ ནི་པྥ་ཛྫ་ན་བྷཱ་ཝཾ ཛཱ་ནི་ཏྭཱ. སོ པུ་གྒ་ལོ ཨ་ནཱ་པུ་ཙྪཱ པ་ཀྐ་མི་ཏ་བྦཾ, ནཱ་ནུ་བ་ནྡྷི་ཏ་བྦོཏི ‘‘སོ པུ་གྒ་ལོ’’ཏི པ་ད་སྶ ‘‘ནཱ་ནུ་བ་ནྡྷི་ཏ་བྦོ’’ཏི ཨི་མི་ནཱ ས་མྦ་ནྡྷོ. ཡ་སྶ ཡེ་ན ཧི ས་མྦ་ནྡྷོ, དཱུ་ར་ཊྛེ་ན་པི སོ བྷ་ཝ་ཏི. ཏཾ པུ་གྒ་ལནྟི སོ པུ་གྒ་ལོ་ཏི པ་ཙྩ་ཏྟ་ཝ་ཙ་ནཾ ཨུ་པ་ཡོ་ག་ཝ་སེ་ན པ་རི་ཎཱ་མེ་ཏྭཱ ཏཾ པུ་གྒ་ལཾ ཨ་ནཱ་པུ་ཙྪཱ པ་ཀྐ་མི་ཏ་བྦ་ནྟི ཨ་ཏྠོ. ཨ་ཏྠ་ཝ་སེ་ན ཧི ཝི་བྷ་ཏྟི་པ་རི་ཎཱ་མོ་ཏི. ཨཱ་པུ་ཙྪཱ པ་ཀྐ་མི་ཏ་བྦནྟི ཙ ཀ་ཏ་ཉྙུ་ཀ་ཏ་ཝེ་དི་ཏཱ་ཡ ནི་ཡོ་ཛ་ནཾ. ཨེ་ཝ་རཱུ་པོཏི ཡཾ ནི་སྶཱ་ཡ བྷི་ཀྑུ་ནོ གུ་ཎེ་ཧི ཝུ་དྡྷི་ཡེ་ཝ པཱ་ཊི་ཀ་ངྑཱ, པ་ཙྩ་ཡེ་ཧི ན པ་རི་སྶ་ཡོ, ཨེ་ཝ་རཱུ་པོ ད་ཎྜ་ཀ་མྨཱ་དཱི་ཧི ནི་གྒ་ཎྷཱ་ཏི ཙེ་པི, ན པ་རི་ཙྩ་ཛི་ཏ་བྦོ་ཏི ད་སྶེ་ཏི ‘‘ས་ཙེ་པཱི’’ཏི་ཨཱ་དི་ནཱ.

སེ་ཝ་ནཱ་སུ་ཏྟ་ཝ་ཎྞ་ནཱ ནི་ཊྛི་ཏཱ.