༡-༨. པ་ཋ་མ་ཝི་ན་ཡ་དྷ་ར་སུ་ཏྟཱ་དི་ཝ་ཎྞ་ནཱ

༧༥-༨༢. ཨ་ཊྛ་མ་སྶ པ་ཋ་མཾ དུ་ཏི་ཡ་ཉྩ ཨུ་ཏྟཱ་ན་ཏྠ་མེ་ཝ. ཏ་ཏི་ཡེ ཝི་ན་ཡ་ལ་ཀྑ་ཎེ པ་ཏི་ཊྛི་ཏོ ལ་ཛྫི་བྷཱ་ཝེ་ན ཝི་ན་ཡ་ལ་ཀྑ་ཎེ ཋི་ཏོ ཧོ་ཏི. ཨ་ལ་ཛྫཱི (པཱ་རཱ. ཨ་ཊྛ. ༡.༤༥) ཧི བ་ཧུ་སྶུ་ཏོ་པི ས་མཱ་ནོ ལཱ་བྷ་ག་རུ་ཀ་ཏཱ་ཡ ཏ་ནྟིཾ ཝི་སཾ་ཝཱ་དེ་ཏྭཱ ཨུ་དྡྷ་མྨཾ ཨུ་བྦི་ན་ཡཾ ས་ཏྠུ་སཱ་ས་ནཾ དཱི་པེ་ཏྭཱ སཱ་ས་ནེ མ་ཧ་ནྟཾ ཨུ་པ་དྡ་ཝཾ ཀ་རོ་ཏི, ས་ངྒྷ་བྷེ་ད་མྤི ས་ངྒྷ་རཱ་ཛི་མྤི ཨུ་པྤཱ་དེ་ཏི. ལ་ཛྫཱི པ་ན ཀུ་ཀྐུ་ཙྩ་ཀོ སི་ཀྑཱ་ཀཱ་མོ ཛཱི་ཝི་ཏ་ཧེ་ཏུ་པི ཏ་ནྟིཾ ཨ་ཝི་སཾ་ཝཱ་དེ་ཏྭཱ དྷ་མྨ་མེ་ཝ ཝི་ན་ཡ་མེ་ཝ ཙ དཱི་པེ་ཏི, ས་ཏྠུ་སཱ་ས་ནཾ ག་རུཾ ཀ་ཏྭཱ ཋ་པེ་ཏི. ཨེ་ཝཾ ཡོ ལ་ཛྫཱི, སོ ཝི་ན་ཡཾ ཨ་ཛ་ཧ་ནྟོ ཨ་ཝོ་ཀྐ་མ་ནྟོ་ཝ ལ་ཛྫི་བྷཱ་ཝེ་ན ཝི་ན་ཡ་ལ་ཀྑ་ཎེ ཋི་ཏོ ཧོ་ཏི པ་ཏི་ཊྛི་ཏོ.

ཨ་སཾ་ཧཱི་རོཏི ཨེ་ཏྠ སཾ་ཧཱི་རོ ནཱ་མ ཡོ པཱ་ལི༹་ཡཾ ཝཱ ཨ་ཊྛ་ཀ་ཐཱ་ཡཾ ཝཱ ཧེ་ཊྛཱ ཝཱ ཨུ་པ་རི་ཏོ ཝཱ པ་ད་པ་ཊི་པཱ་ཊི་ཡཱ ཝཱ པུ་ཙྪི་ཡ་མཱ་ནོ ཝི་ཏྠུ་ན་ཏི ཝི་པྥ་ནྡ་ཏི, ས་ཎྛཱ་ཏུཾ ན ས་ཀྐོ་ཏི, ཡཾ ཡཾ པ་རེ་ན ཝུ་ཙྩ་ཏི, ཏཾ ཏཾ ཨ་ནུ་ཛཱ་ནཱ་ཏི, ས་ཀ་ཝཱ་དཾ ཚ་ཌྜེ་ཏྭཱ པ་ར་ཝཱ་དཾ ག་ཎྷཱ་ཏི. ཡོ པ་ན པཱ་ལི༹་ཡཾ ཝཱ ཨ་ཊྛ་ཀ་ཐཱ་ཡཾ ཝཱ ཧེ་ཊྛུ་པ་རི་ཡ་ཝ་སེ་ན ཝཱ པ་ད་པ་ཊི་པཱ་ཊི་ཡཱ ཝཱ པུ་ཙྪི་ཡ་མཱ་ནོ ན ཝི་ཏྠུ་ན་ཏི ན ཝི་པྥ་ནྡ་ཏི, ཨེ་ཀེ་ཀ་ལོ་མཾ ས་ཎྜཱ་སེ་ན ག་ཎྷ་ནྟོ ཝི་ཡ ‘‘ཨེ་ཝཾ མ་ཡཾ ཝ་དཱ་མ, ཨེ་ཝཾ ནོ ཨཱ་ཙ་རི་ཡཱ ཝ་ད་ནྟཱི’’ཏི ཝི་སྶ་ཛྫེ་ཏི. ཡ་མྷི པཱ་ལི༹ ཙ པཱ་ལི༹་ཝི་ནི་ཙྪ་ཡོ ཙ སུ་ཝ་ཎྞ་བྷཱ་ཛ་ནེ པ་ཀྑི་ཏྟ་སཱི་ཧ་ཝ་སཱ ཝི་ཡ པ་རི་ཀྑ་ཡཾ པ་རི་ཡཱ་དཱ་ནཾ ཨ་ག་ཙྪ་ནྟོ ཏི་ཊྛ་ཏི, ཨ་ཡཾ ཝུ་ཙྩ་ཏི ཨ་སཾ་ཧཱི་རོ. ཡ་སྨཱ པ་ན ཨེ་ཝ་རཱུ་པོ ཡཾ ཡཾ པ་རེ་ན ཝུ་ཙྩ་ཏི, ཏཾ ཏཾ ནཱ་ནུ་ཛཱ་ནཱ་ཏི, ཨ་ཏྟ་ནཱ སུ་ཝི་ནི་ཙྪི་ནི་ཏཾ ཀ་ཏྭཱ ག་ཧི་ཏཾ ཨ་ཝི་པ་རཱི་ཏ་མ་ཏྠཾ ན ཝི་སྶ་ཛྫེ་ཏི, ཏ་སྨཱ ཝུ་ཏྟཾ ‘‘ན ས་ཀྐོ་ཏི ག་ཧི་ཏ་གྒ་ཧ་ཎཾ ཝི་སྶ་ཛྫཱ་པེ་ཏུ’’ནྟི. ཙ་ཏུ་ཏྠཱ་དཱི་ནི སུ་ཝི་ཉྙེ་ཡྻཱ་ནི.

པ་ཋ་མ་ཝི་ན་ཡ་དྷ་ར་སུ་ཏྟཱ་དི་ཝ་ཎྞ་ནཱ ནི་ཊྛི་ཏཱ.