༥. ཕཱ་སུ་ཝི་ཧཱ་ར་སུ་ཏྟ་ཝ་ཎྞ་ནཱ
༡༠༥. པ་ཉྩ་མེ མེ་ཏྟཱ ཨེ་ཏ་སྶ ཨ་ཏྠཱི་ཏི མེ་ཏྟཾ, ཏཾ་ས་མུ་ཊྛཱ་ནཾ ཀཱ་ཡ་ཀ་མྨཾ མེ་ཏྟཾ ཀཱ་ཡ་ཀ་མྨཾ. ཨེ་ས ན་ཡོ སེ་ས་དྭ་ཡེ་པི. ཨཱ་ཝཱིཏི པ་ཀཱ་ས་ནཾ. པ་ཀཱ་ས་བྷཱ་ཝོ ཙེ་ཏྠ ཡཾ ཨུ་དྡི་སྶ ཏཾ ཀཱ་ཡ་ཀ་མྨཾ ཀ་རཱི་ཡ་ཏི, ཏ་སྶ ས་མྨུ་ཁ་བྷཱ་ཝ་ཏོ་ཏི ཨཱ་ཧ ‘‘ས་མྨུ་ཁཱ’’ཏི. ར་ཧོཏི ཨ་པྤ་ཀཱ་སཾ. ཨ་པྤ་ཀཱ་ས་ཏཱ ཙ ཡཾ ཨུ་དྡི་སྶ ཏཾ ཀཱ་ཡ་ཀ་མྨཾ ཀ་རཱི་ཡ་ཏི, ཏ་སྶ ཨ་པ་ཙྩ་ཀྑ་བྷཱ་ཝ་ཏོ་ཏི ཨཱ་ཧ ‘‘པ་ར་མྨུ་ཁཱ’’ཏི. ཨི་མཱ་ནི མེ་ཏྟ་ཀཱ་ཡ་ཀ་མྨཱ་དཱི་ནི བྷི་ཀྑཱུ་ནཾ ཝ་སེ་ན ཨཱ་ག་ཏཱ་ནི ཏེ་སཾ སེ་ཊྛ་པ་རི་ས་བྷཱ་ཝ་ཏོ, གི་ཧཱི་སུ་པི ལ་བྦྷ་ནྟི་ཡེ་ཝ. བྷི་ཀྑཱུ་ན་ཉྷི མེ་ཏྟ་ཙི་ཏྟེ་ན ཨཱ་བྷི་ས་མཱ་ཙཱ་རི་ཀ་པཱུ་ར་ཎཾ མེ་ཏྟཾ ཀཱ་ཡ་ཀ་མྨཾ ནཱ་མ. གི་ཧཱི་ནཾ ཙེ་ཏི་ཡ་ཝ་ནྡ་ན་ཏྠཱ་ཡ བོ་དྷི་ཝ་ནྡ་ན་ཏྠཱ་ཡ ས་ངྒྷ་ནི་མ་ནྟ་ན་ཏྠཱ་ཡ ག་མ་ནཾ གཱ་མཾ པི་ཎྜཱ་ཡ པ་ཝི་ཊྛེ བྷི་ཀྑཱུ དི་སྭཱ པ་ཙྩུ་གྒ་མ་ནཾ པ་ཏྟ་པྤ་ཊི་གྒ་ཧ་ཎཾ ཨཱ་ས་ན་པ་ཉྙཱ་པ་ནཾ ཨ་ནུ་ག་མ་ན་ནྟི ཨེ་ཝ་མཱ་དི་ཀཾ མེ་ཏྟཾ ཀཱ་ཡ་ཀ་མྨཾ ནཱ་མ. བྷི་ཀྑཱུ་ནཾ མེ་ཏྟ་ཙི་ཏྟེ་ན ཨཱ་ཙཱ་ར་པ་ཉྙ་ཏྟི་སི་ཀྑཱ་པ་ནཾ ཀ་མྨ་ཊྛཱ་ན་ཀ་ཐ་ནཾ དྷ་མྨ་དེ་ས་ནཱ ཏེ་པི་ཊ་ཀ་མྤི བུ་དྡྷ་ཝ་ཙ་ནཾ མེ་ཏྟཾ ཝ་ཙཱི་ཀ་མྨཾ ནཱ་མ. གི་ཧཱི་ནཾ ‘‘ཙེ་ཏི་ཡ་ཝ་ནྡ་ནཱ་ཡ ག་ཙྪཱ་མ, བོ་དྷི་ཝ་ནྡ་ནཱ་ཡ ག་ཙྪཱ་མ, དྷ་མྨ་སྶ་ཝ་ནཾ ཀ་རི་སྶཱ་མ, དཱི་པ་མཱ་ལཾ པུ་པྥ་པཱུ་ཛཾ ཀ་རི་སྶཱ་མ, ཏཱི་ཎི སུ་ཙ་རི་ཏཱ་ནི ས་མཱ་དཱ་ཡ ཝ་ཏྟི་སྶཱ་མ, ས་ལཱ་ཀ་བྷ་ཏྟཱ་དཱི་ནི ད་སྶཱ་མ, ཝ་སྶཱ་ཝཱ་སི་ཀཾ ད་སྶཱ་མ, ཨ་ཛྫ ས་ངྒྷ་སྶ ཙ་ཏྟཱ་རོ པ་ཙྩ་ཡེ ད་སྶཱ་མ, ས་ངྒྷཾ ནི་མ་ནྟེ་ཏྭཱ ཁཱ་ད་ནཱི་ཡཱ་དཱི་ནི སཾ་ཝི་ད་ཧ་ཐ, ཨཱ་ས་ནཱ་ནི པ་ཉྙ་པེ་ཐ, པཱ་ནཱི་ཡཾ ཨུ་པ་ཊྛ་པེ་ཐ, ས་ངྒྷཾ པ་ཙྩུ་གྒ་ནྟྭཱ ཨཱ་ནེ་ཐ, པ་ཉྙ་ཏྟཱ་ས་ནེ ནི་སཱི་དཱ་པེ་ཐ, ཚ་ནྡ་ཛཱ་ཏཱ ཨུ་སྶཱ་ཧ་ཛཱ་ཏཱ ཝེ་ཡྻཱ་ཝ་ཙྩཾ ཀ་རོ་ཐཱ’’ཏི་ཨཱ་དི་ཀ་ཐ་ན་ཀཱ་ལེ མེ་ཏྟཾ ཝ་ཙཱི་ཀ་མྨཾ ནཱ་མ. བྷི་ཀྑཱུ་ནཾ པཱ་ཏོ་ཝ ཨུ་ཊྛཱ་ཡ ས་རཱི་ར་པྤ་ཊི་ཛ་གྒ་ནཾ ཀ་ཏྭཱ ཙེ་ཏི་ཡ་ངྒ་ཎཾ ག་ནྟྭཱ ཝ་ཏྟཱ་དཱི་ནི ཀ་ཏྭཱ ཝི་ཝི་ཏྟ་སེ་ནཱ་ས་ནེ ནི་སཱི་དི་ཏྭཱ ‘‘ཨི་མ་སྨིཾ ཝི་ཧཱ་རེ བྷི་ཀྑཱུ སུ་ཁཱི ཧོ་ནྟུ ཨ་ཝེ་རཱ ཨ་བྱཱ་པ་ཛྫཱ’’ཏི ཙི་ནྟ་ནཾ མེ་ཏྟཾ མ་ནོ་ཀ་མྨཾ ནཱ་མ, གི་ཧཱི་ནཾ ‘‘ཨ་ཡྻཱ སུ་ཁཱི ཧོ་ནྟུ ཨ་ཝེ་རཱ ཨ་བྱཱ་པ་ཛྫཱ’’ཏི ཙི་ནྟ་ནཾ མེ་ཏྟཾ མ་ནོ་ཀ་མྨཾ ནཱ་མ.
ཏ་ཏྠ ན་ཝ་ཀཱ་ནཾ ཙཱི་ཝ་ར་ཀ་མྨཱ་དཱི་སུ ས་ཧཱ་ཡ་བྷཱ་ཝ་ག་མ་ནཾ ས་མྨུ་ཁཱ ཀཱ་ཡ་ཀ་མྨཾ ནཱ་མ, ཐེ་རཱ་ནཾ པ་ན པཱ་ད་དྷོ་ཝ་ན་སི་ཉྩ་ན་བཱི་ཛ་ན་དཱ་ནཱ་དི་བྷེ་ད་མྤི ས་བྦཾ སཱ་མཱི་ཙི་ཀ་མྨཾ ས་མྨུ་ཁཱ ཀཱ་ཡ་ཀ་མྨཾ ནཱ་མ, ཨུ་བྷ་ཡེ་ཧི་པི དུ་ནྣི་ཀྑི་ཏྟཱ་ནཾ དཱ་རུ་བྷ་ཎྜཱ་དཱི་ནཾ ཏེ་སུ ཨ་ཝ་ཉྙཾ ཨ་ཀ་ཏྭཱ ཨ་ཏྟ་ནཱ དུ་ནྣི་ཀྑི་ཏྟཱ་ནཾ ཝི་ཡ པ་ཊི་སཱ་མ་ནཾ པ་ར་མྨུ་ཁཱ མེ་ཏྟཾ ཀཱ་ཡ་ཀ་མྨཾ ནཱ་མ. ‘‘དེ་ཝ་ཏྠེ་རོ ཏི་སྶ་ཏྠེ་རོ’’ཏི ཝུ་ཏྟཾ ཨེ་ཝཾ པ་གྒ་ཡ྄ཧ་ཝ་ཙ་ནཾ ས་མྨུ་ཁཱ མེ་ཏྟཾ ཝ་ཙཱི་ཀ་མྨཾ ནཱ་མ, ཝི་ཧཱ་རེ ཨ་ས་ནྟཾ པ་ན པ་ཊི་པུ་ཙྪ་ནྟ་སྶ ‘‘ཀུ་ཧིཾ ཨ་མྷཱ་ཀཾ དེ་ཝ་ཏྠེ་རོ, ཀུ་ཧིཾ ཨ་མྷཱ་ཀཾ ཏི་སྶ་ཏྠེ་རོ, ཀ་དཱ ནུ ཁོ ཨཱ་ག་མི་སྶ་ཏཱི’’ཏི ཨེ་ཝཾ པི་ཡ་ཝ་ཙ་ནཾ པ་ར་མྨུ་ཁཱ མེ་ཏྟཾ ཝ་ཙཱི་ཀ་མྨཾ ནཱ་མ. མེ་ཏྟཱ་སི་ནེ་ཧ་སི་ནི་དྡྷཱ་ནི པ་ན ན་ཡ་ནཱ་ནི ཨུ་མྨཱི་ལེ་ཏྭཱ པ་ས་ནྣེ་ན མུ་ཁེ་ན ཨོ་ལོ་ཀ་ནཾ ས་མྨུ་ཁཱ མེ་ཏྟཾ མ་ནོ་ཀ་མྨཾ ནཱ་མ, ‘‘དེ་ཝ་ཏྠེ་རོ ཏི་སྶ་ཏྠེ་རོ ཨ་རོ་གོ ཧོ་ཏུ ཨ་བྱཱ་པ་ཛྫོ’’ཏི ས་མ་ནྣཱ་ཧ་ར་ཎཾ པ་ར་མྨུ་ཁཱ མེ་ཏྟཾ མ་ནོ་ཀ་མྨཾ ནཱ་མ. ཀཱ་མ་ཉྩེ་ཏྠ མེ་ཏྟཱ་སི་ནེ་ཧ་སི་ནི་དྡྷཱ་ནཾ ན་ཡ་ནཱ་ནཾ ཨུ་མྨཱི་ལ་ནཾ, པ་ས་ནྣེ་ན མུ་ཁེ་ན ཨོ་ལོ་ཀ་ན་ཉྩ མེ་ཏྟཾ ཀཱ་ཡ་ཀ་མྨ་མེ་ཝ. ཡ་སྶ པ་ན ཙི་ཏྟ་སྶ ཝ་སེ་ན ན་ཡ་ནཱ་ནཾ མེ་ཏྟཱ་སི་ནེ་ཧ་སི་ནི་དྡྷ་ཏཱ, མུ་ཁ་སྶ ཙ པ་ས་ནྣ་ཏཱ, ཏཾ ས་ནྡྷཱ་ཡ ཝུ་ཏྟཾ ‘‘མེ་ཏྟཾ མ་ནོ་ཀ་མྨཾ ནཱ་མཱ’’ཏི. ས་མཱ་དྷི་སཾ་ཝ་ཏྟ་ན་པྤ་ཡོ་ཛ་ནཱ་ནི ས་མཱ་དྷི་སཾ་ཝ་ཏྟ་ནི་ཀཱ་ནི.
ས་མཱ་ན་སཱི་ལ་ཏཾ ག་ཏོཏི ཏེ་སུ ཏེ་སུ དི་སཱ་བྷཱ་གེ་སུ ཝི་ཧ་ར་ནྟེ་ཧི བྷི་ཀྑཱུ་ཧི ས་དྡྷིཾ ས་མཱ་ན་སཱི་ལ་ཏཾ ག་ཏོ. ཡཱ་ཡནྟི ཡཱ ཨ་ཡཾ མ་ཡ྄ཧ་ཉྩེ་ཝ ཏུ་མྷཱ་ཀ་ཉྩ པ་ཙྩ་ཀྑ་བྷཱུ་ཏཱ. དི་ཊྛཱིཏི ས་མྨཱ་དི་ཊྛི. ཨ་རི་ཡཱཏི ནི་དྡོ་སཱ. ནི་ཡྻཱ་ཏཱིཏི ཝ་ཊྚ་དུ་ཀྑ་ཏོ ནི་སྶ་ར་ཏི ནི་གྒ་ཙྪ་ཏི. ས་ཡཾ ནི་ཡྻ་ནྟཱི་ཡེ་ཝ ཧི ཏཾ་ས་མ་ངྒི་པུ་གྒ་ལཾ ཝ་ཊྚ་དུ་ཀྑ་ཏོ ནི་ཡྻཱ་པེ་ཏཱི་ཏི ཝུ་ཙྩ་ཏི. ཡཱ ས་ཏྠུ ཨ་ནུ་སི་ཊྛི, ཏཾ ཀ་རོ་ཏཱི་ཏི ཏ་ཀྐ་རོ, ཏ་སྶ, ཡ་ཐཱ་ནུ་སི་ཊྛཾ པ་ཊི་པ་ཛྫ་ཀ་སྶཱ་ཏི ཨ་ཏྠོ. དུ་ཀྑ་ཀྑ་ཡཱ་ཡཱཏི ས་བྦ་དུ་ཀྑ་ཀྑ་ཡ་ཏྠཾ. དི་ཊྛི་སཱ་མ་ཉྙ་ག་ཏོཏི ས་མཱ་ན་དི་ཊྛི་བྷཱ་ཝཾ ཨུ་པ་ག་ཏོ.
ཕཱ་སུ་ཝི་ཧཱ་ར་སུ་ཏྟ་ཝ་ཎྞ་ནཱ ནི་ཊྛི་ཏཱ.