(༡༡) ༡. ཝ་ལཱ་ཧ་ཀ་ཝ་གྒོ

༡-༢. ཝ་ལཱ་ཧ་ཀ་སུ་ཏྟ་དྭ་ཡ་ཝ་ཎྞ་ནཱ

༡༠༡-༢. ཏ་ཏི་ཡ་པ་ཎྞཱ་ས་ཀ་སྶ པ་ཋ་མེ ག་ཛྫི་ཏཱཏི ཐ་ནི་ཏཱ. ཏ་ཏྠ ག་ཛྫི་ཏྭཱ ནོ་ཝ་སྶ་ན་བྷཱ་ཝོ ནཱ་མ པཱ་པ་ཀོ. མ་ནུ་སྶཱ ཧི ཡ་དཱ དེ་ཝོ ག་ཛྫ་ཏི, ཏ་དཱ ‘‘སུ་ཝུ་ཊྛི་ཏཱ བྷ་ཝི་སྶ་ཏཱི’’ཏི བཱི་ཛཱ་ནི ནཱི་ཧ་རི་ཏྭཱ ཝ་པ་ནྟི. ཨ་ཐ དེ་ཝེ ཨ་ཝ་སྶ་ནྟེ ཁེ་ཏྟེ བཱི་ཛཱ་ནི ཁེ་ཏྟེ་ཡེ་ཝ ན་སྶ་ནྟི, གེ་ཧེ བཱི་ཛཱ་ནི གེ་ཧེ་ཡེ་ཝ ན་སྶ་ནྟཱི་ཏི དུ་བྦྷི་ཀྑཾ ཧོ་ཏི. ནོ་ག་ཛྫི་ཏྭཱ ཝ་སྶ་ན་བྷཱ་ཝོ་པི པཱ་པ་ཀོ. མ་ནུ་སྶཱ ཧི ཨི་མ་སྨིཾ ཀཱ་ལེ ‘‘དུ་བྦུ་ཊྛི་ཀཱ བྷ་ཝི་སྶ་ཏཱི’’ཏི ནི་ནྣ་ཊྛཱ་ནེ་སུ་ཡེ་ཝ ཝ་པྤཾ ཀ་རོ་ནྟི. ཨ་ཐ དེ་ཝོ ཝ་སྶི་ཏྭཱ ས་བྦ་བཱི་ཛཱ་ནི མ་ཧཱ་ས་མུ་དྡཾ པཱ་པེ་ཏི, དུ་བྦྷི་ཀྑ་མེ་ཝ ཧོ་ཏི. ག་ཛྫི་ཏྭཱ ཝ་སྶ་ན་བྷཱ་ཝོ པ་ན བྷ་དྡ་ཀོ. ཏ་དཱ ཧི སུ་བྷི་ཀྑཾ ཧོ་ཏི. ནོ་ག་ཛྫི་ཏྭཱ ནོ་ཝ་སྶ་ན་བྷཱ་ཝོ ཨེ་ཀ་ནྟ་པཱ་པ་ཀོ་ཝ. བྷཱ་སི་ཏཱ ཧོ་ཏི ནོ ཀ་ཏྟཱཏི ‘‘ཨི་དཱ་ནི ག་ནྠ་དྷུ་རཾ པཱུ་རེ་སྶཱ་མི, ཝཱ་ས་དྷུ་རཾ པཱུ་རེ་སྶཱ་མཱི’’ཏི ཀ་ཐེ་ཏི་ཡེ་ཝ, ན ཨུ་དྡེ་སཾ ག་ཎྷཱ་ཏི, ན ཀ་མྨ་ཊྛཱ་ནཾ བྷཱ་ཝེ་ཏི.

ཀ་ཏྟཱ ཧོ་ཏི ནོ བྷཱ་སི་ཏཱཏི ‘‘ག་ནྠ་དྷུ་རཾ པཱུ་རེ་སྶཱ་མི, ཝཱ་ས་དྷུ་རཾ ཝཱ’’ཏི ན བྷཱ་ས་ཏི, ས་མྤ་ཏྟེ པ་ན ཀཱ་ལེ ས་མ་ཏྟཾ ས་མྤཱ་དེ་ཏི. ཨི་མི་ནཱ ན་ཡེ་ན ཨི་ཏ་རེ་པི ཝེ་དི་ཏ་བྦཱ. ཨ་ཐ ཝཱ ས་བྦཾ པ་ནེ་ཏཾ པ་ཙྩ་ཡ་དཱ་ཡ་ཀེ་ཧེ་ཝ ཀ་ཐི་ཏཾ. ཨེ་ཀོ ཧི ‘‘ཨ་སུ་ཀ་དི་ཝ་སེ ནཱ་མ དཱ་ནཾ ད་སྶཱ་མཱི’’ཏི ས་ངྒྷཾ ནི་མ་ནྟེ་ཏི, ས་མྤ་ཏྟེ ཀཱ་ལེ ནོ ཀ་རོ་ཏི. ཨ་ཡཾ པུ་གྒ་ལོ པུ་ཉྙེ་ན པ་རི་ཧཱ་ཡ་ཏི, བྷི་ཀྑུ་ས་ངྒྷོ པ་ན ལཱ་བྷེ་ན པ་རི་ཧཱ་ཡ་ཏི. ཨ་པ་རོ ས་ངྒྷཾ ཨ་ནི་མ་ནྟེ་ཏྭཱ ས་ཀྐཱ་རཾ ཀ་ཏྭཱ ‘‘བྷི་ཀྑཱུ ཨཱ་ནེ་སྶཱ་མཱི’’ཏི ན ལ་བྷི, ས་བྦེ ཨ་ཉྙ་ཏྠ ནི་མ་ནྟི་ཏཱ ཧོ་ནྟི. ཨ་ཡ་མྤི པུ་ཉྙེ་ན པ་རི་ཧཱ་ཡ་ཏི, ས་ངྒྷོ་པི ལཱ་བྷེ་ན པ་རི་ཧཱ་ཡ་ཏི. ཨ་པ་རོ པ་ཋ་མཾ ས་ངྒྷཾ ནི་མ་ནྟེ་ཏྭཱ པ་ཙྪཱ ས་ཀྐཱ་རཾ ཀ་ཏྭཱ དཱ་ནཾ དེ་ཏི, ཨ་ཡཾ ཀི་ཙྩ་ཀཱ་རཱི ཧོ་ཏི. ཨ་པ་རོ ནེ་ཝ ས་ངྒྷཾ ནི་མ་ནྟེ་ཏི, ན དཱ་ནཾ དེ་ཏི, ཨ་ཡཾ པཱ་པ་པུ་གྒ་ལོ་ཏི ཝེ་དི་ཏ་བྦོ. དུ་ཏི་ཡཾ ཨུ་ཏྟཱ་ན་མེ་ཝ.

ཝ་ལཱ་ཧ་ཀ་སུ་ཏྟ་དྭ་ཡ་ཝ་ཎྞ་ནཱ ནི་ཊྛི་ཏཱ.

༣. ཀུ་མྦྷ་སུ་ཏྟ་ཝ་ཎྞ་ནཱ

༡༠༣. ཏ་ཏི་ཡེ རི་ཏྟ་ཀོཏི ཨ་ནྟོ རི་ཏྟོ. པི་ཧི་ཏ་མུ་ཁོཏི པི་ད་ཧི་ཏྭཱ ཋ་པི་ཏོ. ཨ་པཱ་རུ་ཏ་མུ་ཁོཏི ཝི་ཝ་རི་ཏྭཱ ཋ་པི་ཏོ, ཨུ་པ་མི་ཏ་པུ་གྒ་ལེ་སུ པ་ནེ་ཏྠ ཨ་ནྟོ་གུ་ཎ་སཱ་ར་ཝི་ར་ཧི་ཏོ ཙ ཏུ་ཙྪོ, བཱ་ཧི་ར་སོ་བྷ་ན་ཏཱ་ཡ པི་ཧི་ཏོ པུ་གྒ་ལོ་ཏི ཝེ་དི་ཏ་བྦོ. སེ་སེ་སུ་པི ཨེ་སེ་ཝ ན་ཡོ.

ཀུ་མྦྷ་སུ་ཏྟ་ཝ་ཎྞ་ནཱ ནི་ཊྛི་ཏཱ.

༤. ཨུ་ད་ཀ་ར་ཧ་ད་སུ་ཏྟ་ཝ་ཎྞ་ནཱ

༡༠༤. ཙ་ཏུ་ཏྠེ ཨུ་ད་ཀ་ར་ཧ་དོ ཛ་ཎྞུ་ཀ་མ་ཏྟེ་པི ཨུ་ད་ཀེ ས་ཏི པ་ཎྞ་ར་ས་ས་མྦྷི་ནྣ་ཝ་ཎྞ་ཏྟཱ ཝཱ བ་ཧ་ལ་ཏྟཱ ཝཱ ཨུ་ད་ཀ་སྶ ཨ་པ་ཉྙཱ་ཡ་མཱ་ན་ཏ་ལོ ཨུ་ཏྟཱ་ནོ ག་མྦྷཱི་རོ་བྷཱ་སོ ནཱ་མ ཧོ་ཏཱི་ཏི ཨཱ་ཧ ‘‘པུ་རཱ་ཎ་པ་ཎྞ་ར་ས…པེ… ག་མྦྷཱི་རོ་བྷཱ་སོ ནཱ་མཱ’’ཏི. ཏི་པོ་རི་ས་ཙ་ཏུ་པོ་རི་སེ པ་ན ཨུ་ད་ཀེ ས་ཏི ཨ་ཙྪ་ཏྟཱ ཨུ་ད་ཀ་སྶ པ་ཉྙཱ་ཡ་མཱ་ན་ཏ་ལོ ག་མྦྷཱི་རོ ཨུ་ཏྟཱ་ནོ་བྷཱ་སོ ནཱ་མ ཧོ་ཏཱི་ཏི ཨཱ་ཧ ‘‘ཨ་ཙྪ་ཝི་པྤ་ས་ནྣ་མ་ཎི་ཝ་ཎྞ་ཨུ་ད་ཀོ ཨུ་ཏྟཱ་ནོ་བྷཱ་སོ ནཱ་མཱ’’ཏི. ཨུ་བྷ་ཡ་ཀཱ་ར་ཎ་ས་མྦྷ་ཝ་ཏོ པ་ན ཨི་ཏ་རེ དྭེ ཝེ་དི་ཏ་བྦཱ. པུ་གྒ་ལེ་པི ཀི་ལེ་སུ་སྶ་ད་བྷཱ་ཝ་ཏོ གུ་ཎ་ག་མྦྷཱི་ར་ཏཱ་ཡ ཙ ཨ་བྷཱ་ཝ་ཏོ གུ་ཎ་ག་མྦྷཱི་རཱ་ནཾ ས་དི་སེ་ཧི ཨ་བྷི་ཀྐ་མ་ནཱ་དཱི་ཧི ཡུ་ཏྟོ ཨུ་ཏྟཱ་ནོ ག་མྦྷཱི་རོ་བྷཱ་སོ ནཱ་མ. ཨི་མི་ནཱ ན་ཡེ་ན སེ་སཱ ཝེ་དི་ཏ་བྦཱ.

ཨུ་ད་ཀ་ར་ཧ་ད་སུ་ཏྟ་ཝ་ཎྞ་ནཱ ནི་ཊྛི་ཏཱ.

༥-༦. ཨ་མྦ་སུ་ཏྟཱ་དི་ཝ་ཎྞ་ནཱ

༡༠༥-༦. པ་ཉྩ་མེ ཨཱ་མ་ཀཾ ཧུ་ཏྭཱཏི ཨ་ནྟོ ཨཱ་མཾ ཧུ་ཏྭཱ. པ་ཀྐཾ ཨཱ་མ་ཝ་ཎྞཱིཏི ཨ་ནྟོ པ་ཀྐཾ བ་ཧི ཨཱ་མ་ས་དི་སཾ. ཏ་ཏྠ ཡ་ཐཱ ཨ་མྦེ ཨ་པ་ཀྐ་བྷཱ་ཝོ ཨཱ་མ་ཏཱ ཧོ་ཏི, ཨེ་ཝཾ པུ་གྒ་ལེ་པི པུ་ཐུ་ཛྫ་ན་ཏཱ. ཡ་ཐཱ ཙ ཏ་ཏྠ པ་ཀྐ་ས་དི་ས་ཏཱ པ་ཀྐ་ཝ་ཎྞི་ཏཱ, ཨེ་ཝཾ པུ་གྒ་ལེ་པི ཨ་རི་ཡཱ་ནཾ ཨ་བྷི་ཀྐ་མ་ནཱ་དི་ས་དི་ས་ཏཱ པ་ཀྐ་ཝ་ཎྞི་ཏཱ་ཏི ཨི་མི་ནཱ ན་ཡེ་ན སེ་སཱ ཝེ་དི་ཏ་བྦཱ. ཚ་ཊྛཾ ཨུ་ཏྟཱ་ན་མེ་ཝ.

ཨ་མྦ་སུ་ཏྟཱ་དི་ཝ་ཎྞ་ནཱ ནི་ཊྛི་ཏཱ.

༧. མཱུ་སི་ཀ་སུ་ཏྟ་ཝ་ཎྞ་ནཱ

༡༠༧. ས་ཏྟ་མེ ཨཱ་ཝཱ་ཊཾ ཁ་ན་ཏཱིཏི ཨ་ཏྟ་ནོ ཨཱ་ས་ཡཾ བི་ལ་ཀཱུ་པཾ ཁ་ན་ཏི. ན ཙ ཏ་ཏྠ ཝ་ས་ཏཱིཏི ཏ་ཏྠ ཨ་ཝ་སི་ཏྭཱ ཀི་སྨི་ཉྩི་དེ་ཝ ཋཱ་ནེ ཝ་ས་ཏི, ཨེ་ཝཾ བི་ལཱ༹་རཱ་དི་ཨ་མི་ཏྟ་ཝ་སཾ ག་ཙྪ་ཏི. ཝ་སི་ཏཱ ནོ གཱ་དྷཾ ཀ་ཏྟཱཏི ས་ཡཾ ན ཁ་ན་ཏི, པ་རེ་ན ཀ་ཏེ བི་ལེ ཝ་ས་ཏི, ཨེ་ཝཾ ཛཱི་ཝི་ཏཾ ར་ཀྑ་ཏི. ཏ་ཏི་ཡཱ དྭེ་པི ཀ་རོ་ནྟཱི ཛཱི་ཝི་ཏཾ ར་ཀྑ་ཏི. ཙ་ཏུ་ཏྠཱི དྭེ་པི ཨ་ཀ་རོ་ནྟཱི ཨ་མི་ཏྟ་ཝ་སཾ ག་ཙྪ་ཏི. ཨི་མཱ་ཡ པ་ན ཨུ་པ་མཱ་ཡ ཨུ་པ་མི་ཏེ་སུ པུ་གྒ་ལེ་སུ པ་ཋ་མོ ཡ་ཐཱ སཱ མཱུ་སི་ཀཱ གཱ་དྷཾ ཁ་ན་ཏི, ཨེ་ཝཾ ན་ཝ་ངྒཾ ས་ཏྠུ་སཱ་ས་ནཾ ཨུ་གྒ་ཎྷཱ་ཏི. ཡ་ཐཱ པ་ན སཱ ཏ་ཏྠ ན ཝ་ས་ཏི, ཀི་སྨི་ཉྩི་དེ་ཝ ཋཱ་ནེ ཝ་ས་ནྟཱི ཨ་མི་ཏྟ་ཝ་སཾ ག་ཙྪ་ཏི, ཏ་ཐཱ ཨ་ཡ་མྤི པ་རི་ཡ་ཏྟི་ཝ་སེ་ན ཉཱ་ཎཾ པེ་སེ་ཏྭཱ ཙ་ཏུ་ས་ཙྩ་དྷ་མྨཾ ན པ་ཊི་ཝི་ཛ྄ཛྷ་ཏི, ལོ་ཀཱ་མི་ས་ཊྛཱ་ནེ་སུ ཝི་ཙ་ར་ནྟོ མ་ཙྩུ་མཱ་ར་ཀི་ལེ་ས་མཱ་ར་དེ་ཝ་པུ་ཏྟ་མཱ་ར་ས་ངྑཱ་ཏཱ་ནཾ ཝ་སཾ ག་ཙྪ་ཏི. དུ་ཏི་ཡོ ཡ་ཐཱ མཱུ་སི་ཀཱ གཱ་དྷཾ ན ཁ་ན་ཏི, ཨེ་ཝཾ ན་ཝ་ངྒཾ ས་ཏྠུ་སཱ་ས་ནཾ ན ཨུ་གྒ་ཎྷཱ་ཏི. ཡ་ཐཱ པ་ན པ་རེ་ན ཁ་ནི་ཏེ བི་ལེ ཝ་ས་ནྟཱི ཛཱི་ཝི་ཏཾ ར་ཀྑ་ཏི, ཨེ་ཝཾ པ་ར་སྶ ཀ་ཐཾ སུ་ཏྭཱ ཙ་ཏུ་ས་ཙྩ་དྷ་མྨཾ པ་ཊི་ཝི་ཛ྄ཛྷི་ཏྭཱ ཏི་ཎྞཾ མཱ་རཱ་ནཾ ཝ་སཾ ཨ་ཏི་ཀྐ་མ་ཏི. ཨི་མི་ནཱ ན་ཡེ་ན ཏ་ཏི་ཡ་ཙ་ཏུ་ཏྠེ་སུ་པི ཨོ་པ་མྨ་སཾ་ས་ནྡ་ནཾ ཝེ་དི་ཏ་བྦཾ.

མཱུ་སི་ཀ་སུ་ཏྟ་ཝ་ཎྞ་ནཱ ནི་ཊྛི་ཏཱ.

༨. བ་ལཱི་བ་དྡ་སུ་ཏྟ་ཝ་ཎྞ་ནཱ

༡༠༨. ཨ་ཊྛ་མེ བ་ལཱི་བ་དྡོ ཏཱ་ཝ ཡོ ཨ་ཏྟ་ནོ གོ་ག་ཎཾ གྷ་ཊྚེ་ཏི ཨུ་བྦེ་ཛེ་ཏི, པ་ར་གོ་ཎེ པ་ན སཱུ་ར་ཏོ སུ་ཁ་སཱི་ལོ ཧོ་ཏི, ཨ་ཡཾ ས་ག་ཝ་ཙ་ཎྜོ ནོ པ་ར་ག་ཝ་ཙ་ཎྜོ ནཱ་མ. པུ་གྒ་ལོ་པི ཨ་ཏྟ་ནོ པ་རི་སཾ གྷ་ཊྚེ་ནྟོ ཝི་ཛ྄ཛྷ་ནྟོ ཕ་རུ་སེ ས་མུ་དཱ་ཙ་ར་ནྟོ, པ་ར་པ་རི་སཱ་ཡ པ་ན སོ་ར་ཙྩཾ ནི་ཝཱ་ཏ་ཝུ་ཏྟི་ཏཾ ཨཱ་པ་ཛྫ་ནྟོ ས་ག་ཝ་ཙ་ཎྜོ ནཱ་མཱ་ཏི ཨི་མི་ནཱ ན་ཡེ་ན སེ་སཱ་པི ཝེ་དི་ཏ་བྦཱ.

བ་ལཱི་བ་དྡ་སུ་ཏྟ་ཝ་ཎྞ་ནཱ ནི་ཊྛི་ཏཱ.

༩. རུ་ཀྑ་སུ་ཏྟ་ཝ་ཎྞ་ནཱ

༡༠༩. ན་ཝ་མེ རུ་ཀྑོ ཏཱ་ཝ ཕེ་གྒུ སཱ་ར་པ་རི་ཝཱ་རོཏི ཝ་ན་ཛེ་ཊྛ་ཀ་རུ་ཀྑོ ས་ཡཾ ཕེ་གྒུ ཧོ་ཏི, པ་རི་ཝཱ་ར་རུ་ཀྑཱ པ་ན་སྶ སཱ་རཱ ཧོ་ནྟི. ཨི་མི་ནཱ ན་ཡེ་ན སེ་སཱ ཝེ་དི་ཏ་བྦཱ. པུ་གྒ་ལེ་སུ པ་ན སཱི་ལ་སཱ་ར་ཝི་ར་ཧི་ཏ་ཏོ ཕེ་གྒུ་ཏཱ, སཱི་ལཱ་ཙཱ་ར་ས་མ་ནྣཱ་ག་མེ་ན ཙ སཱ་ར་ཏཱ ཝེ་དི་ཏ་བྦཱ.

རུ་ཀྑ་སུ་ཏྟ་ཝ་ཎྞ་ནཱ ནི་ཊྛི་ཏཱ.

༡༠. ཨཱ་སཱི་ཝི་ས་སུ་ཏྟ་ཝ་ཎྞ་ནཱ

༡༡༠. ད་ས་མེ ཡ་སྶ ཝི་སཾ པ་ཛྫ་ལི་ཏ་ཏི་ཎུ་ཀྐཱ་ཡ ཨ་གྒི ཝི་ཡ སཱི་གྷཾ ཨ་བྷི་རུ་ཧི་ཏྭཱ ཨ་ཀྑཱི་ནི ག་ཧེ་ཏྭཱ ཁ་ནྡྷཾ ག་ཧེ་ཏྭཱ སཱི་སཾ ག་ཧེ་ཏྭཱ ཋི་ཏ་ནྟི ཝ་ཏྟ་བྦ་ཏཾ ཨཱ་པ་ཛྫ་ཏི མ་ཎི་ས་པྤཱ་དཱི་ནཾ ཝི་སཾ ཝི་ཡ, མ་ནྟཾ པ་ན པ་རི་ཝ་ཏྟེ་ཏྭཱ ཀ་ཎྞ་ཝཱ་ཏཾ ད་ཏྭཱ ད་ཎྜ་ཀེ་ན པ་ཧ་ཊ་མ་ཏྟེ ཨོ་ཏ་རི་ཏྭཱ ད་ཊྛ་ཊྛཱ་ནེ་ཡེ་ཝ ཏི་ཊྛ་ཏི, ཨ་ཡཾ ཨཱ་ག་ཏ་ཝི་སོ ན གྷོ་ར་ཝི་སོ ནཱ་མ. ཡ་སྶ པ་ན ཝི་སཾ ས་ཎི་ཀཾ ཨ་བྷི་རུ་ཧ་ཏི, ཨཱ་རུ་ལ༹ྷཱ་རུ་ལ༹ྷ་ཊྛཱ་ནེ པ་ན ཨཱ་སི་ཏྟ་ཨུ་ད་ཀཾ ཝི་ཡ ཧོ་ཏི ཨུ་ད་ཀ་ས་པྤཱ་དཱི་ནཾ ཝི་ཡ, དྭཱ་ད་ས་ཝ་སྶ་ཙྩ་ཡེ་ན་པི ཀ་ཎྞ་ཝི་དྡྷ་ཁ་ནྡྷ་པི་ཊྛི་ཀཱ་དཱི་སུ པ་ཉྙཱ་ཡ་ཏི, མ་ནྟ་པ་རི་ཝ་ཏྟ་ནཱ་དཱི་སུ ཙ ཀ་རི་ཡ་མཱ་ནེ་སུ སཱི་གྷཾ ན ཨོ་ཏ་ར་ཏི, ཨ་ཡཾ གྷོ་ར་ཝི་སོ ན ཨཱ་ག་ཏ་ཝི་སོ ནཱ་མ. ཡ་སྶ པ་ན ཝི་སཾ སཱི་གྷཾ ཨ་བྷི་རུ་ཧ་ཏི, ན སཱི་གྷཾ ཨོ་ཏ་ར་ཏི ཨ་ནེ་ལ༹་ཀ་ས་པྤཱ་དཱི་ནཾ ཝི་སཾ ཝི་ཡ, ཨ་ཡཾ ཨཱ་ག་ཏ་ཝི་སོ ཙ གྷོ་ར་ཝི་སོ ཙ. ཨ་ནེ་ལ༹་ཀ་ས་པྤོ ནཱ་མ མ་ཧཱ་ཨཱ་སཱི་ཝི་སོ. ཡ་སྶ ཝི་སཾ མ་ནྡཾ ཧོ་ཏི, ཨོ་ཧཱ་རི་ཡ་མཱ་ན་མྤི སུ་ཁེ་ནེ་ཝ ཨོ་ཏ་ར་ཏི ནཱི་ལ་ས་པྤ་དྷ་མ་ནི་ས་པྤཱ་དཱི་ནཾ ཝི་སཾ ཝི་ཡ, ཨ་ཡཾ ནེ་ཝ ཨཱ་ག་ཏ་ཝི་སོ ན གྷོ་ར་ཝི་སོ. ནཱི་ལ་ས་པྤོ ནཱ་མ སཱ་ཁ་ཝ་ཎྞོ རུ་ཀྑ་གྒཱ་དཱི་སུ ཝི་ཙ་ར་ཎ་ས་པྤོ.

ཨཱ་སཱི་ཝི་ས་སུ་ཏྟ་ཝ་ཎྞ་ནཱ ནི་ཊྛི་ཏཱ.

ཝ་ལཱ་ཧ་ཀ་ཝ་གྒ་ཝ་ཎྞ་ནཱ ནི་ཊྛི་ཏཱ.