༧. ས་ཏྟ་མོ པ་རི་ཙྪེ་དོ
ཝི་པཱ་ཀ་ཙི་ཏྟ་པྤ་ཝ་ཏྟི་ནི་དྡེ་སོ
༣༧༦. ཨ་ན་ནྟ་ཉཱ་ཎེ་ན ནི་ར་ངྒ་ཎེ་ན,
གུ་ཎེ་སི་ནཱ ཀཱ་རུ་ཎི་ཀེ་ན ཏེ་ན;
ཝུ་ཏྟེ ཝི་པཱ་ཀེ མ་ཏི་པཱ་ཊ་ཝ་ཏྠཾ,
ཝི་པཱ་ཀ་ཙི་ཏྟ་པྤ་བྷ་ཝཾ སུ་ཎཱ་ཐ.
༣༧༧. ཨེ་ཀཱུ་ན་ཏིཾ་ས ཀ་མྨཱ་ནི, པཱ་ཀཱ དྭ་ཏྟིཾ་ས ད་སྶི་ཏཱ;
ཏཱི་སུ དྭཱ་རེ་སུ ཀ་མྨཱ་ནི, ཝི་པཱ་ཀཱ ཚ་སུ དི་སྶ་རེ.
༣༧༨. ཀུ་ས་ལཾ ཀཱ་མ་ལོ་ཀ་སྨིཾ, པ་ཝ་ཏྟེ པ་ཊི་ས་ནྡྷི་ཡཾ;
ཏཾ ཏཾ པ་ཙྩ་ཡ་མཱ་ག་མྨ, ད་དཱ་ཏི ཝི་ཝི་དྷཾ ཕ་ལཾ.
༣༧༩. ཨེ་ཀཱ་ཡ ཙེ་ཏ་ནཱ་ཡེ་ཀཱ, པ་ཊི་ས་ནྡྷི པ་ཀཱ་སི་ཏཱ;
ནཱ་ནཱ་ཀ་མྨེ་ཧི ནཱ་ནཱ ཙ, བྷ་ཝ་ནྟི པ་ཊི་ས་ནྡྷི་ཡོ.
༣༨༠. ཏི་ཧེ་ཏུ་ཀཾ ཏུ ཡཾ ཀ་མྨཾ, ཀཱ་མཱ་ཝ་ཙ་ར་ས་ཉྙི་ཏཾ;
ཏི་ཧེ་ཏུ་ཀཾ དུ་ཧེ་ཏུ་ཉྩ, ཝི་པཱ་ཀཾ དེ་ཏྱ་ཧེ་ཏུ་ཀཾ.
༣༨༡. དུ་ཧེ་ཏུ་ཀཾ ཏུ ཡཾ ཀ་མྨཾ, ཏཾ ན དེ་ཏི ཏི་ཧེ་ཏུ་ཀཾ;
དུ་ཧེ་ཏུ་ཀ་མ་ཧེ་ཏུ་ཉྩ, ཝི་པཱ་ཀཾ དེ་ཏི ཨ་ཏྟ་ནོ.
༣༨༢. ཏི་ཧེ་ཏུ་ཀེ་ན ཀ་མྨེ་ན,
པ་ཊི་ས་ནྡྷི ཏི་ཧེ་ཏུ་ཀཱ;
དུ་ཧེ་ཏུ་ཀཱ་པི ཧོ་ཏེ་ཝ,
ན ཙ ཧོ་ཏི ཨ་ཧེ་ཏུ་ཀཱ.
༣༨༣. དུ་ཧེ་ཏུ་ཀེ་ན ཀ་མྨེ་ན,
པ་ཊི་ས་ནྡྷི དུ་ཧེ་ཏུ་ཀཱ;
ཨ་ཧེ་ཏུ་ཀཱ་པི ཧོ་ཏེ་ཝ,
ན ཙ ཧོ་ཏི ཏི་ཧེ་ཏུ་ཀཱ.
༣༨༤. ཨ་ས་ངྑཱ་ར་མ་ས་ངྑཱ་རཾ, ས་ས་ངྑཱ་ར་མྤི དེ་ཏི ཧི;
ས་ས་ངྑཱ་ར་མ་ས་ངྑཱ་རཾ, ས་ས་ངྑཱ་རཾ ཕ་ལཾ ཏ་ཐཱ.
༣༨༥. ཨེ་ཀཱ་ཡ ཙེ་ཏ་ནཱ་ཡེ་ཏྠ, ཀུ་ས་ལ་སྶ ཙ སོ་ལ༹་ས;
ཝི་དྷཱ ཝི་པཱ་ཀ་ཙི་ཏྟཱ་ནི, བྷ་ཝ་ནྟཱི་ཏི པ་ཀཱ་ས་ཡེ.
༣༨༦. ཨཱ་ར་མྨ་ཎེ་ན ཧོ་ཏེ་ཝ, ཝེ་ད་ནཱ་པ་རི་ཝ་ཏྟ་ནཾ;
ཏ་དཱ་ར་མྨ་ཎ་ཙི་ཏྟ་མྤི, ཛ་ཝ་ནེ་ན ནི་ཡཱ་མི་ཏཾ.
༣༨༧. ཀཱ་མཱ་ཝ་ཙ་ར་ཙི་ཏྟེ་ན, ཀུ་ས་ལེ་ནཱ་དི་ནཱ པ་ན;
ཏུ་ལྱེ་ན པཱ་ཀ་ཙི་ཏྟེ་ན, ག་ཧི་ཏཱ པ་ཊི་ས་ནྡྷི ཙེ.
༣༨༨. བ་ལ་ཝཱ་ར་མྨ་ཎེ ཨི་ཊྛེ, ཙ་ཀྑུ་སྶཱ་པཱ་ཐ་མཱ་ག་ཏེ;
མ་ནོ་དྷཱ་ཏུ བྷ་ཝ་ངྒ་སྨིཾ, ཏཱ་ཡ ཨཱ་ཝ་ཊྚི་ཏེ པ་ན.
༣༨༩. ཝཱི་ཐི་ཙི་ཏྟེ་སུ ཛཱ་ཏེ་སུ, ཙ་ཀྑུ་ཝི་ཉྙཱ་ཎ་ཀཱ་དི་སུ;
ཛཱ་ཡ་ཏེ ཛ་ཝ་ནཾ ཧུ་ཏྭཱ, པ་ཋ་མཾ ཀཱ་མ་མཱ་ན་སཾ.
༣༩༠. ས་ཏྟ་ཀྑ་ཏྟུཾ ཛ་ཝི་ཏྭཱ་ན, པ་ཋ་མེ ཀུ་ས་ལེ ག་ཏེ;
ཏ་དེ་ཝཱ་ར་མྨ་ཎཾ ཀ་ཏྭཱ, ཏེ་ནེ་ཝ ས་དི་སཾ པུ་ན.
༣༩༡. ཝི་པཱ་ཀཾ ཛཱ་ཡ་ཏེ ཙི་ཏྟཾ, ཏ་དཱ་ར་མྨ་ཎ་ས་ཉྙི་ཏཾ;
ས་ནྡྷི་ཡཱ ཏུ་ལྱ་ཏོ མཱུ་ལ-བྷ་ཝ་ངྒ་ནྟི པ་ཝུ་ཙྩ་ཏེ.
༣༩༢. ཏ་ཉྩ ས་ནྟཱི་ར་ཎཾ ཨེ་ཏྠ, ད་སྶ་ནཾ ས་མྤ་ཊི་ཙྪ་ནཾ;
ག་ཎ་ནཱུ་པ་ག་ཙི་ཏྟཱ་ནི, ཙ་ཏྟཱ་རེ་ཝ བྷ་ཝ་ནྟི ཧི.
༣༩༣. ཡ་དཱ ཧི དུ་ཏི་ཡཾ ཙི་ཏྟཾ, ཀུ་ས་ལཾ ཛ་ཝ་ནཾ ཏ་དཱ;
ཏེ་ན ཏུ་ལྱ་ཝི་པཱ་ཀ་མྤི, ཏ་དཱ་ར་མྨ་ཎ་ཀཾ སི་ཡཱ.
༣༩༤. ས་ནྡྷི་ཡཱ ཨ་ས་མཱ་ན་ཏྟཱ, དྭེ ནཱ་མཱ་ནི་སྶ ལ་བྦྷ་རེ;
‘‘ཨཱ་ག་ནྟུ་ཀ་བྷ་ཝ་ངྒ’’ནྟི, ‘‘ཏ་དཱ་ར་མྨ་ཎ་ཀ’’ནྟི ཙ.
༣༩༥. ཡ་དཱ ཧི ཏ་ཏི་ཡཾ པུ་ཉྙཾ, ཛ་ཝ་ནཾ ཧོ་ཏི ཏེ་ན ཙ;
ས་དི་སཾ ཏ་ཏི་ཡཾ པཱ་ཀཾ, ཏ་དཱ་ར་མྨ་ཎ་ཀཾ སི་ཡཱ.
༣༩༦. ‘‘ཨཱ་ག་ནྟུ་ཀ་བྷ་ཝ་ངྒ’’ནྟི, ཨི་ད་མྤི ཙ པ་ཝུ་ཙྩ་ཏི;
ཨི་མི་ནཱ པ་ན ས་དྡྷིཾ ཚ, པུ་རི་མཱ་ནི ཙ པ་ཉྩ་པི.
༣༩༧. ཡ་དཱ ཙ་ཏུ་ཏྠཾ ཀུ་ས་ལཾ, ཛ་ཝ་ནཾ ཧོ་ཏི ཏེ་ན ཙ;
ཏུ་ལྱཾ ཙ་ཏུ་ཏྠཾ པཱ་ཀཾ ཏུ, ཏ་དཱ་ར་མྨ་ཎ་ཏཾ ཝ་ཛེ.
༣༩༨. ཨཱ་ག་ནྟུ་ཀ་བྷ་ཝ་ངྒཾ ཏུ, ཏ་དཱ་ར་མྨ་ཎ་ནཱ་མ་ཀཾ;
པུ་རི་མཱ་ནི ཚ པཱ་ཀཱ་ནི, ཨི་མི་ནཱ ཧོ་ནྟི ས་ཏྟ ཏུ.
༣༩༩. ཏ་སྨིཾ དྭཱ་རེ ཡ་དཱ ཨི་ཊྛ-མ་ཛ྄ཛྷ་ཏྟཱ་ར་མྨ་ཎཾ པ་ན;
ཨཱ་ག་ཙྪ་ཏི ཏ་དཱ་པཱ་ཐཾ, ཏ་དཱ ཝུ་ཏྟ་ན་ཡེ་ནི་དྷ.
༤༠༠. ཨཱ་ར་མྨ་ཎ་ཝ་སེ་ནེ་ཝ, ཝེ་ད་ནཱ པ་རི་ཝ་ཏྟ་ཏི;
ཨུ་པེ་ཀྑཱ་ས་ཧི་ཏཾ ཏ་སྨཱ, ཧོ་ཏི ས་ནྟཱི་ར་ཎཾ མ་ནོ.
༤༠༡. ཨུ་པེ་ཀྑཱ་ས་ཧི་ཏེ་སྭེ་ཝ, ཛ་ཝ་ནེ་སུ ཙ་ཏཱུ་སུ་པི;
ཏེ་ཧི ཏུ་ལྱཱ་ནི ཙ་ཏྟཱ་རི, པཱ་ཀ་ཙི་ཏྟཱ་ནི ཛཱ་ཡ་རེ.
༤༠༢. ཝེ་ད་ནཱ་ཡཱ་ས་མཱ་ན་ཏྟཱ, ཨ་ཙྩ་ནྟཾ པུ་རི་མེ་ཧི ཏུ;
ཧོ་ནྟི པི་ཊྛི་བྷ་ཝ་ངྒཱ་ནི, ཙ་ཏྟཱ་རཱི་ཏི ཙ ནཱ་མ་ཏོ.
༤༠༣. པ་ཉྩི་མཱ་ནི ཝི་པཱ་ཀཱ་ནི, པུ་རི་མེ་ཧི ཙ ས་ཏྟ་ཧི;
ས་དྡྷིཾ དྭཱ་ད་ས པཱ་ཀཱ་ནི, བྷ་ཝ་ནྟཱི་ཏི ཝི་ནི་དྡི་སེ.
༤༠༤. ཙ་ཀྑུ་དྭཱ་རེ ཏ་ཐཱ ཨེ་ཝཾ, སོ་ཏཱ་དཱི་སྭ་པི ནི་དྡི་སེ;
དྭཱ་ད་ས དྭཱ་ད་ས པཱ་ཀཱ, ས་མ་ས་ཊྛི བྷ་ཝ་ནྟི་མེ.
༤༠༥. ཨེ་ཀཱ་ཡ ཙེ་ཏ་ནཱ་ཡེ་ཝ, ཀ་མྨེ ཨཱ་ཡཱུ་ཧི་ཏེ པ་ན;
ས་མ་ས་ཊྛི ཝི་པཱ་ཀཱ་ནི, ཨུ་པྤ་ཛྫ་ནྟི ན སཾ་ས་ཡོ.
༤༠༦. ག་ཧི་ཏཱ་ག་ཧ་ཎེ་ནེ་ཏྠ, ཙ་ཀྑུ་དྭཱ་རེ་སུ དྭཱ་ད་ས;
སོ་ཏ་ཝི་ཉྙཱ་ཎ་ཀཱ་དཱི་ནི, ཙ་ཏྟཱ་རཱི་ཏི ཙ སོ་ལ༹་ས.
༤༠༧. ཨེ་ཝ་མེ་ཝ ས་ས་ངྑཱ་ར-ཏི་ཧེ་ཏུ་ཀུ་ས་ལེ་ན་པི;
ཨ་ས་ངྑཱ་ར་ས་ས་ངྑཱ་རུ-པེ་ཀྑཱ་ས་ཧ་ག་ཏེ་ཧི་པི.
༤༠༨. ཀ་མྨེ ཨཱ་ཡཱུ་ཧི་ཏེ ཏེ་སཾ, ཝི་པཱ་ཀེ་ཧི ཙ ཏཱི་ཧི་པི;
ཨེ་སེ་ཝ ཙ ན་ཡོ ཏེ་ཧི, དི་ནྣཱ་ཡ པ་ཊི་ས་ནྡྷི་ཡཱ.
༤༠༩. པ་ཋ་མཾ ཨི་ཊྛ་མ་ཛ྄ཛྷ་ཏྟ-གོ་ཙ་ར་སྶ ཝ་སེ་ནི་དྷ;
པ་ཝ་ཏྟིཾ པ་ན ད་སྶེ་ཏྭཱ, ཨུ་པེ་ཀྑཱ་ས་ཧི་ཏ་དྭ་ཡེ.
༤༡༠. ད་སྶེ་ཏ་བྦཱ ཏ་པྤ་ཙྪཱ ཏུ, ཨི་ཊྛ་སྨིཾ གོ་ཙ་རེ ཨི་དྷ;
ཨེ་ཀེ་ཀ་སྨིཾ པ་ན དྭཱ་རེ, དྭཱ་ད་ས དྭཱ་ད་སེ་ཝ ཏུ.
༤༡༡. ག་ཧི་ཏཱ་ག་ཧ་ཎེ་ནེ་ཏྠ, པཱ་ཀ་ཙི་ཏྟཱ་ནི སོ་ལ༹་ས;
པུ་བྦེ ཝུ་ཏྟ་ན་ཡེ་ནེ་ཝ, ཉེ་ཡྻཾ ས་བྦ་མ་སེ་ས་ཏོ.
༤༡༢. ཏི་ཧེ་ཏུ་ཀེ་ན ཀ་མྨེ་ན, པ་ཊི་ས་ནྡྷི ཏི་ཧེ་ཏུ་ཀཱ;
བྷ་ཝ་ཏཱི་ཏི ཨ་ཡཾ ཝཱ་རོ, ཝུ་ཏྟོ ཨེ་ཏྟཱ་ཝ་ཏཱ མ་ཡཱ.
༤༡༣. ས་ནྡྷི་མེ་ཀཾ ཏུ ཀ་མྨེ་ཀཾ, ཛ་ནེ་ཏི ན ཏ་ཏོ པ་རཾ;
ཨ་ནེ་ཀཱ་ནི ཝི་པཱ་ཀཱ་ནི, ས་ཉྫ་ནེ་ཏི པ་ཝ་ཏྟི་ཡཾ.
༤༡༤. ཨེ་ཀ་སྨཱ ཧི ཡ་ཐཱ བཱི་ཛཱ, ཛཱ་ཡ་ཏེ ཨེ་ཀ་མ་ངྐུ་རཾ;
སུ་བ་ཧཱུ་ནི ཕ་ལཱ་ནི་སྶ, ཧོ་ནྟི ཧེ་ཏུ་པ་ཝ་ཏྟི་ཏོ.
༤༡༥. དུ་ཧེ་ཏུ་ཀེ་ན ཀ་མྨེ་ན, པ་ཊི་ས་ནྡྷི དུ་ཧེ་ཏུ་ཀཱ;
ཧོ་ཏཱི་ཏི ཧི ཨ་ཡཾ ཝཱ་རོ, ཨ་ནུ་པུ་བྦེ་ན ཨཱ་ག་ཏོ.
༤༡༦. དུ་ཧེ་ཏུ་ཀེ་ན ཀ་མྨེ་ན, སོ་མ་ན་སྶ་ཡུ་ཏེ་ནི་དྷ;
ཨ་ས་ངྑཱ་རི་ཀ་ཙི་ཏྟེ་ན, ཀ་མྨེ ཨཱ་ཡཱུ་ཧི་ཏེ པ་ན.
༤༡༧. ཏེ་ན ཏུ་ལྱེ་ན པཱ་ཀེ་ན, ག་ཧི་ཏཱ པ་ཊི་ས་ནྡྷི ཙེ;
ཨི་ཊྛེ ཨཱ་ར་མྨ་ཎེ ཙ་ཀྑུ-དྭཱ་རེ ཨཱ་པཱ་ཐ་མཱ་ག་ཏེ.
༤༡༨. སོ་མ་ན་སྶ་ཡུ་ཏེ ཉཱ་ཎ-ཧཱི་ནེ ཀུ་ས་ལ་མཱ་ན་སེ;
ས་ཏྟ་ཀྑ་ཏྟུཾ ཛ་ཝི་ཏྭཱ་ན, ག་ཏེ ཏ་སྨིཾ དུ་ཧེ་ཏུ་ཀེ.
༤༡༩. ཏ་དེ་ཝཱ་ར་མྨ་ཎཾ ཀ་ཏྭཱ, ཛཱ་ཡ་ཏེ ཏ་ད་ན་ནྟ་རཾ;
ཏཾ་ས་རི་ཀྑ་ཀ་མེ་ཀཾ ཏུ, ཨ་ས་ངྑཱ་རི་ཀ་མཱ་ན་སཾ.
༤༢༠. ཏཾ ཧི མཱུ་ལ་བྷ་ཝ་ངྒ་ནྟི, ཏ་དཱ་ར་མྨ་ཎ་མི་ཙྩ་པི;
ཨུ་བྷ་ཡ་མྤི ཙ ཏ་སྶེ་ཝ, ནཱ་མ་ནྟི པ་རི་དཱི་པི་ཏཾ.
༤༢༡. དུ་ཧེ་ཏུ་ཀ་ས་ས་ངྑཱ་རེ, ཛ་ཝི་ཏེ་པི ཙ ཏཾ་ས་མཾ;
ཧོ་ཏཱ་ག་ནྟུ་ཀ་ས་ངྑཱ་ཏཾ, ཏ་དཱ་ར་མྨ་ཎ་མཱ་ན་སཾ.
༤༢༢. ཏ་ཐེ་ཝ ཙ དུ་ཧེ་ཏཱུ་ནཾ, ཨི་ཊྛ་མ་ཛ྄ཛྷ་ཏྟ་གོ་ཙ་རེ;
དྭི་ནྣཾ ཨུ་པེ་ཀྑཱ་ཡུ་ཏྟཱ་ནཾ, ཛ་ཝ་ནཱ་ན་མ་ན་ནྟ་རཾ.
༤༢༣. དྭེ ཏཱ་དི་སཱ་ནི ཛཱ་ཡ་ནྟེ, ཏ་དཱ་ར་མྨ་ཎ་མཱ་ན་སཱ;
ཏེ་སཾ ‘‘པི་ཊྛི་བྷ་ཝ་ངྒ’’ནྟི, ནཱ་མཾ ‘‘ཨཱ་ག་ནྟུ་ཀ’’ནྟི ཙ.
༤༢༤. ས་ནྟཱི་ར་ཎ་དྭ་ཡ་ཉྩེ་ཝ, ད་སྶ་ནཾ ས་མྤ་ཊི་ཙྪ་ནཾ;
ཨི་མཱ་ནི ཙ བྷ་ཝ་ངྒཱ་ནི, ཙ་ཀྑུ་དྭཱ་རེ པ་ན་ཊྛ ཧི.
༤༢༥. ཨེ་ཝ་མ་ཊྛ་ཊྛ ཀ་ཏྭཱ་ན, དྭཱ་རེ་སུ་པི ཙ པ་ཉྩ་སུ;
ཙ་ཏྟཱ་ལཱི་ས ཝི་པཱ་ཀཱ་ནི, བྷ་ཝ་ནྟཱི་ཏི པ་ཝ་ཏྟི་ཡཾ.
༤༢༦. ག་ཧི་ཏཱ་ག་ཧ་ཎེ་ནེ་ཏྠ, ཙ་ཀྑུ་དྭཱ་རེ པ་ན་ཊྛ ཙ;
སོ་ཏ་གྷཱ་ནཱ་དི་ནཱ ས་དྡྷིཾ, དྭཱ་ད་སེ་ཝ བྷ་ཝ་ནྟི ཧི.
༤༢༧. ཨེ་ཀཱ་ཡ ཙེ་ཏ་ནཱ་ཡེ་ཝཾ, ཀ་མྨེ ཨཱ་ཡཱུ་ཧི་ཏེ པ་ན;
དྭཱ་ད་སེ་ཝ ཝི་པཱ་ཀཱ་ནི, བྷ་ཝ་ནྟཱི་ཏི པ་ཀཱ་སི་ཏཾ.
༤༢༨. དུ་ཧེ་ཏུ་ཀ་ཏྟ་ཡེ་ནཱ་པི, སེ་སེ་ན ས་དི་སེ་ན ཏུ;
པཱ་ཀེ་ནཱ་དི་ནྣ་ས་ནྡྷི་ཡཱ, ཨ་ཡ་མེ་ཝ ན་ཡོ མ་ཏོ.
༤༢༩. དུ་ཧེ་ཏུ་ཀེ་ན ཀ་མྨེ་ན, པ་ཊི་ས་ནྡྷི དུ་ཧེ་ཏུ་ཀཱ;
ཧོ་ཏཱི་ཏི་པི ཨ་ཡཾ ཝཱ་རོ, ཝུ་ཏྟོ ཨེ་ཏྟཱ་ཝ་ཏཱ མ་ཡཱ.
༤༣༠. དུ་ཧེ་ཏུ་ཀེ་ན ཀ་མྨེ་ན, པ་ཊི་ས་ནྡྷི ཨ་ཧེ་ཏུ་ཀཱ;
ཧོ་ཏཱི་ཏི ཙ ཨ་ཡཾ ཝཱ་རོ, ཨ་ནུ་པུ་བྦེ་ན ཨཱ་ག་ཏོ.
༤༣༡. དུ་ཧེ་ཏུ་ཀེ་སུ ཙི་ཏྟེ་སུ, ཀུ་ས་ལེ་སུ ཙ་ཏཱུ་སུ་པི;
ཏེ་སུ ཨ་ཉྙ་ཏ་རེ་ནེ་ཝ, ཀ་མྨེ ཨཱ་ཡཱུ་ཧི་ཏེ པ་ན.
༤༣༢. ཏ་སྶེ་ཝ པཱ་ཀ་བྷཱུ་ཏཱ་ཡ, ཨཱ་དི་ནྣ་པ་ཊི་ས་ནྡྷི་ནོ;
ཨུ་པེ་ཀྑཱ་ས་ཧི་ཏཱ་ཧེ་ཏུ, མ་ནོ་ཝི་ཉྙཱ་ཎ་དྷཱ་ཏུ་ཡཱ.
༤༣༣. པ་ཊི་ས་ནྡྷི ན ཝ་ཏྟ་བྦཱ, སཱ ཀ་མྨ་ས་དི་སཱ་ཏི ཧི;
ཀ་མྨཾ དུ་ཧེ་ཏུ་ཀཾ ཧོ་ཏི, པ་ཊི་ས་ནྡྷི ཨ་ཧེ་ཏུ་ཀཱ.
༤༣༤. ཏ་སྶ བུ་དྡྷི་མུ་པེ་ཏ་སྶ, ཨི་ཊྛ་མ་ཛ྄ཛྷ་ཏྟ་གོ་ཙ་རེ;
ཨཱ་པཱ་ཐ་མཱ་ག་ཏེ ཙ་ཀྑུ-དྭཱ་རེ པུ་ན ཙ དེ་ཧི་ནོ.
༤༣༥. དུ་ཧེ་ཏཱུ་ནཾ ཙ་ཏུ་ནྣ་མྤི, པུ་ཉྙཱ་ནཾ ཡ་སྶ ཀ་སྶ་ཙི;
ཛ་ཝ་ན་སྶཱ་ཝ་སཱ་ན་སྨིཾ, ཨ་ཧེ་ཏུ་ཀ་མི་དཾ མ་ནོ.
༤༣༦. ཏ་དཱ་ར་མྨ་ཎ་བྷཱ་ཝེ་ན, ཛཱ་ཡ་ཏེ ན་ཏྠི སཾ་ས་ཡོ;
ཏཾ ཏུ མཱུ་ལ་བྷ་ཝ་ངྒ་ཉྩ, ཏ་དཱ་ར་མྨ་ཎ་མེ་ཝ ཙ.
༤༣༧. ཝཱི་ཐི་ཙི་ཏྟེ་སུ ཛཱ་ཏེ་སུ, ཙ་ཀྑུ་ཝི་ཉྙཱ་ཎ་ཀཱ་དི་སུ;
ཨུ་པེ་ཀྑཱ་ས་ཧི་ཏཾ་ཡེ་ཝ, ཧོ་ཏི ས་ནྟཱི་ར་ཎ་མྤི ཙ.
༤༣༨. ཏེ་སུ ཨེ་ཀཾ ཋ་པེ་ཏྭཱ་ན, ག་ཧི་ཏཱ་ག་ཧ་ཎེ་ནི་དྷ;
ག་ཎ་ནཱུ་པ་ག་ཙི་ཏྟཱ་ནི, ཏཱི་ཎི་ཡེ་ཝ བྷ་ཝ་ནྟི ཧི.
༤༣༩. ཨི་ཊྛེ ཨཱ་ར་མྨ་ཎེ ཙ་ཀྑུ-དྭཱ་རེ ཨཱ་པཱ་ཐ་མཱ་ག་ཏེ;
ཏ་དཱ ས་ནྟཱི་ར་ཎ་ཉྩེ་ཝ, ཏ་དཱ་ར་མྨ་ཎ་མཱ་ན་སཾ.
༤༤༠. སོ་མ་ན་སྶ་ཡུ་ཏཾ་ཡེ་ཝ, ག་ཧེ་ཏྭཱ ཏེ་སུ ཨེ་ཀ་ཀཾ;
པུ་རི་མཱ་ནི ཙ ཏཱི་ཎཱི་ཏི, ཙ་ཏྟཱ་རོ་ཝ བྷ་ཝ་ནྟི ཧི.
༤༤༡. ཨེ་ཝཾ ཙ་ཏྟཱ་རི ཙི་ཏྟཱ་ནི, དྭཱ་རེ་སུ་པི ཙ པ་ཉྩ་སུ;
ཧོ་ནྟི ཝཱི་ས་ཏི ཙི་ཏྟཱ་ནི, ཝི་པཱ་ཀཱ་ནི པ་ཝ་ཏྟི་ཡཾ.
༤༤༢. ཙ་ཀྑུ་དྭཱ་རེ ཏུ ཙ་ཏྟཱ་རི, ག་ཧི་ཏཱ་ག་ཧ་ཎེ་ནི་དྷ;
སོ་ཏ་གྷཱ་ནཱ་དི་ནཱ ས་དྡྷིཾ, ཧོ་ཏེ་ཝཱ་ཧེ་ཏུ་ཀ་ཊྛ་ཀཾ.
༤༤༣. ཨ་ཧེ་ཏུ་པ་ཊི་ས་ནྡྷི་སྶ, ན ཏ་དཱ་ར་མྨ་ཎཾ བྷ་ཝེ;
དུ་ཧེ་ཏུ་ཀཾ ཏི་ཧེ་ཏུཾ ཝཱ, དུ་ཧེ་ཏུ་པ་ཊི་ས་ནྡྷི་ནོ.
༤༤༤. ཛཱ་ཏཱ སུ་ག་ཏི་ཡཾ ཡེ་ན, པཱ་ཀེ་ན པ་ཊི་ས་ནྡྷི ཏུ;
ཏེ་ན ཏུ་ལྱ་མྤི ཧཱི་ནཾ ཝཱ, ཏ་དཱ་ར་མྨ་ཎ་ཀཾ བྷ་ཝེ.
༤༤༥. མ་ནུ་སྶ་ལོ་ཀཾ ས་ནྡྷཱ་ཡ, ཝུ་ཏྟ་ཉྩཱ་ཧེ་ཏུ་ཀ་ཊྛ་ཀཾ;
ཙ་ཏཱུ་སུ་པི ཨ་པཱ་ཡེ་སུ, པ་ཝ་ཏྟེ པ་ན ལ་བྦྷ་ཏི.
༤༤༦. ཐེ་རོ ནེ་ར་ཡི་ཀཱ་ནཾ ཏུ, དྷ་མྨཾ དེ་སེ་ཏི ཝ་སྶ་ཏི;
ག་ནྡྷཾ ཝཱ་ཡུ་ཉྩ མཱ་པེ་ཏི, ཡ་དཱ ཏེ་སཾ ཏ་དཱ པ་ན.