༥. པ་ཉྩ་མོ པ་རི་ཙྪེ་དོ
བྷཱུ་མི་པུ་གྒ་ལ་ཙི་ཏྟུ་པྤ་ཏྟི་ནི་དྡེ་སོ
༡༨༢. ཨི་ཏོ པ་རཾ པ་ཝ་ཀྑཱ་མི, བུ་དྡྷི་ཝུ་དྡྷི་ཀ་རཾ ན་ཡཾ;
ཙི་ཏྟཱ་ནཾ བྷཱུ་མཱི་སུ་པྤ་ཏྟིཾ, པུ་གྒ་ལཱ་ནཾ ཝ་སེ་ན ཙ.
༡༨༣. དེ་ཝཱ་ཙེ་ཝ མ་ནུ་སྶཱ ཙ, ཏི་སྶོ ཝཱ་པཱ་ཡ་བྷཱུ་མི་ཡོ;
ག་ཏི་ཡོ པ་ཉྩ ནི་དྡི་ཊྛཱ, ས་ཏྠུ་ནཱ ཏུ ཏ་ཡོ བྷ་ཝཱ.
༡༨༤. བྷཱུ་མི་ཡོ ཏ་ཏྠ ཏིཾ་སེ་ཝ, ཏཱ་སུ ཏིཾ་སེ་ཝ པུ་གྒ་ལཱ;
བྷཱུ་མཱི་སྭེ་ཏཱ་སུ ཨུ་པྤ་ནྣཱ, ས་བྦེ ཙ པ་ན པུ་གྒ་ལཱ.
༡༨༥. པ་ཊི་ས་ནྡྷི་ཀ་ཙི་ཏྟཱ་ནཾ, ཝ་སེ་ནེ་ཀཱུ་ན་ཝཱི་ས་ཏི;
པ་ཊི་ས་ནྡྷི ཙ ནཱ་མེ་སཱ, དུ་ཝི་དྷཱ ས་མུ་དཱི་རི་ཏཱ.
༡༨༦. ཨ་ཙི་ཏྟ་ཀཱ ས་ཙི་ཏྟཱ ཙ, ཨ་ས་ཉྙཱི་ནམ་ཙི་ཏྟ་ཀཱ;
སེ་སཱ ས་ཙི་ཏྟ་ཀཱ ཉེ་ཡྻཱ, སཱ པ་ནེ་ཀཱུ་ན་ཝཱི་ས་ཏི.
༡༨༧. པ་ཊི་ས་ནྡྷི་ཝ་སེ་ནེ་ཝ, ཧོ་ནྟི ཝཱི་ས་ཏི པུ་གྒ་ལཱ;
ཨི་དྷ ཙི་ཏྟཱ་དྷི་ཀཱ་ར་ཏྟཱ, ཨ་ཙི་ཏྟཱ ན ཙ ཨུ་དྡྷ་ཊཱ.
༡༨༨. ཨ་ཧེ་ཏུ་དྭི་ཏི་ཧེ་ཏཱུ་ཏི, པུ་གྒ་ལཱ ཏི་ཝི་དྷཱ སི་ཡུཾ;
ཨ་རི་ཡཱ པ་ན ཨ་ཊྛཱ་ཏི, ས་བྦེ ཨེ་ཀཱ་ད་སེ་རི་ཏཱ.
༡༨༩. ཨེ་ཏེ་སཾ པ་ན ས་བྦེ་སཾ, པུ་གྒ་ལཱ་ནཾ པ་བྷེ་ད་ཏོ;
ཙི་ཏྟཱ་ནཾ བྷཱུ་མཱི་སུ་པྤ་ཏྟིཾ, བྷ་ཎ་ཏོ མེ ནི་བོ་དྷ་ཐ.
༡༩༠. ཏིཾ་ས་བྷཱུ་མཱི་སུ ཙི་ཏྟཱ་ནི, ཀ་ཏི ཛཱ་ཡ་ནྟི མེ ཝ་ད;
ཙུ་དྡ་སེ་ཝ ཏུ ཙི་ཏྟཱ་ནི, ཧོ་ནྟི ས་བྦཱ་སུ བྷཱུ་མི་སུ.
༡༩༡. ས་དཱ ཝཱི་ས་ཏི ཙི་ཏྟཱ་ནི, ཀཱ་མེ་ཡེ་ཝ བྷ་ཝེ སི་ཡུཾ;
པ་ཉྩ རཱུ་པ་བྷ་ཝེ་ཡེ་ཝ, ཙ་ཏྟཱ་རེ་ཝ ཨ་རཱུ་པི་སུ.
༡༩༢. ཀཱ་མ་རཱུ་པ་བྷ་ཝེ་སྭེ་ཝ, ཨ་ཊྛཱ་ར་ས བྷ་ཝ་ནྟི ཧི;
དྭེ་ཙ་ཏྟཱ་ལཱི་ས ཙི་ཏྟཱ་ནི, ཧོ་ནྟི ཏཱི་སུ བྷ་ཝེ་སུ་པི.
༡༩༣. ཋ་པེ་ཏྭཱ པ་ན ས་བྦཱ་སཾ, ཙ་ཏ་སྶོ་པཱ་ཡ་བྷཱུ་མི་ཡོ;
ཏེ་ར་སེ་ཝ ཙ ཙི་ཏྟཱ་ནི, ཧོ་ནྟི ཚ་བྦཱི་ས་བྷཱུ་མི་སུ.
༡༩༤. ཨ་པ་རཱ་ནི ཙ་ཏ་སྶོ་པི, ཋ་པེ་ཏྭཱ་རུ་པྤ་བྷཱུ་མི་ཡོ;
ཙི་ཏྟཱ་ནི པ་ན ཛཱ་ཡ་ནྟི, ཚ ཙ ཚ་བྦཱི་ས་བྷཱུ་མི་སུ.
༡༩༥. སུ་དྡྷཱ་ཝཱ་སི་ཀ་དེ་ཝཱ་ནཾ, ཋ་པེ་ཏྭཱ པ་ཉྩ བྷཱུ་མི་ཡོ;
པ་ཉྩ ཙི་ཏྟཱ་ནི ཛཱ་ཡ་ནྟེ, པ་ཉྩ་ཝཱི་ས་ཏི་བྷཱུ་མི་སུ.
༡༩༦. ཨ་པ་རཱ་ནི དུ་ཝེ ཧོ་ནྟི, པ་ཉྩ་ཝཱི་ས་ཏི་བྷཱུ་མི་སུ;
ཋ་པེ་ཏྭཱ ནེ་ཝ་ས་ཉྙ་ཉྩ, ཙ་ཏ་སྶོ་པཱ་ཡ་བྷཱུ་མི་ཡོ.
༡༩༧. དྭེ་པི ཙི་ཏྟཱ་ནི ཛཱ་ཡ་ནྟི, ཙ་ཏུ་ཝཱི་ས་ཏི་བྷཱུ་མི་སུ;
ཨཱ་ཀི་ཉྩ་ཉྙཾ ནེ་ཝ་ས་ཉྙ་ཉྩ, ཋ་པེ་ཏྭཱ་པཱ་ཡ་བྷཱུ་མི་ཡོ.
༡༩༨. ཨ་པཱ་ཡ་བྷཱུ་མི་ཡོ ཧི་ཏྭཱ, ཏི་སྶོ ཨཱ་རུ་པྤ་བྷཱུ་མི་ཡོ;
དྭེ་ཡེ་ཝ པ་ན ཙི་ཏྟཱ་ནི, ཧོ་ནྟི ཏེ་ཝཱི་ས་བྷཱུ་མི་སུ.
༡༩༩. ཨ་རཱུ་པེ ཙ ཨ་པཱ་ཡེ ཙ, ཋ་པེ་ཏྭཱ ཨ་ཊྛ བྷཱུ་མི་ཡོ;
ཨེ་ཀཱ་ད་ས་ཝི་དྷཾ ཙི་ཏྟཾ, ཧོ་ནྟི དྭཱ་ཝཱི་ས་བྷཱུ་མི་སུ.
༢༠༠. སུ་དྡྷཱ་ཝཱ་སེ ཨ་པཱ་ཡེ ཙ, ཋ་པེ་ཏྭཱ ན་ཝ བྷཱུ་མི་ཡོ;
ཨེ་ཀ་ཝཱི་སཱ་སུ ནི་ཙྩ་མྤི, ཙ་ཏྟཱ་རོ་ཝ བྷ་ཝ་ནྟི ཧི.
༢༠༡. ཨེ་ཀཾ ས་ཏྟ་ར་ས་སྭེ་ཝ, ཙི་ཏྟཾ ཛཱ་ཡ་ཏི བྷཱུ་མི་སུ;
སུ་དྡྷཱ་ཝཱ་སེ ཋ་པེ་ཏྭཱ ཏུ, ཨ་པཱ་ཡཱ་རུ་པྤ་བྷཱུ་མི་ཡོ.
༢༠༢. དྭཱ་ད་སེ་ཝ ཏུ ཛཱ་ཡ་ནྟེ, ཨེ་ཀཱ་ད་ས་སུ བྷཱུ་མི་སུ;
ཋ་པེ་ཏྭཱ པ་ན ས་བྦཱ་པི, བྷཱུ་མི་ཡོ ཧི མ་ཧ་གྒ་ཏཱ.
༢༠༣. ཀཱ་མཱ་ཝ་ཙ་ར་དེ་ཝཱ་ནཾ, མ་ནུ་སྶཱ་ནཾ ཝ་སེ་ན ཏུ;
ཨ་ཊྛ ཙི་ཏྟཱ་ནི ཛཱ་ཡ་ནྟེ, ས་དཱ ས་ཏྟ་སུ བྷཱུ་མི་སུ.
༢༠༤. པ་ཉྩ་མ་ཛ྄ཛྷཱ་ན་པཱ་ཀེ་ཀོ, ཛཱ་ཡ་ཏེ ཚ་སུ བྷཱུ་མི་སུ;
ཙ་ཏྟཱ་རི པ་ན ཙི་ཏྟཱ་ནི, ཏཱི་སུ ཏཱི་སྭེ་ཝ བྷཱུ་མི་སུ.
༢༠༥. ཙ་ཏྟཱ་རི པ་ན ཙི་ཏྟཱ་ནི, ཧོ་ནྟི ཨེ་ཀེ་ཀ་བྷཱུ་མི་སུ;
ཨ་རཱུ་པཱ་ཝ་ཙ་ར་པཱ་ཀཱ་ནཾ, ཝ་སེ་ན པ་རི་དཱི་པ་ཡེ.
༢༠༦. ཀུ་ས་ལཱ་ཀུ་ས་ལཱ ཀཱ་མེ,
ཏེ་སཾ པཱ་ཀཱ ཨ་ཧེ་ཏུ་ཀཱ;
ཨཱ་ཝ་ཛྫ་ན་དྭ་ཡ་ཉྩཱ་ཏི,
ས་ཏྟ་ཏིཾ་སེ་ཝ མཱ་ན་སཱ.
༢༠༧. ན་ར་ཀཱ་དཱི་སྭ་པཱ་ཡེ་སུ, ཙ་ཏཱུ་སུ་པི ཙ ཛཱ་ཡ་རེ;
དྭེ་པ་ཉྙཱ་སཱ་ཝ་སེ་སཱ་ནི, ནུ་པྤ་ཛྫ་ནྟི ཀ་དཱ་ཙི་པི.
༢༠༨. ཀཱ་མེ དེ་ཝ་མ་ནུ་སྶཱ་ནཾ, ན་ཝ པཱ་ཀཱ མ་ཧ་གྒ་ཏཱ;
ནེ་ཝ ཛཱ་ཡ་ནྟི ཛཱ་ཡ་ནྟི, ཨ་སཱི་ཏི ཧ་ད་ཡཱ ས་དཱ.
༢༠༩. ཀཱ་མེ ཨ་ཊྛ མ་ཧཱ་པཱ་ཀཱ, དོ་མ་ན་སྶ་དྭ་ཡ་མྤི ཙ;
ཏ་ཐཱ གྷཱ་ནཱ་དི་ཝི་ཉྙཱ་ཎ-ཏྟ་ཡཾ པཱ་ཀཱ ཨ་པུ་ཉྙ་ཛཱ.
༢༡༠. ན་ཏྠི ཨཱ་རུ་པྤ་པཱ་ཀཱ ཙ, རཱུ་པཱ་ཝ་ཙ་ར་བྷཱུ་མི་ཡཾ;
ཨི་མེ་ཧི ས་ཧ ཙི་ཏྟེ་ཧི, ཏ་ཡོ མ་གྒཱ ཕ་ལ་དྭ་ཡཾ.
༢༡༡. ཙ་ཏྟཱ་རོ དི་ཊྛི་སཾ་ཡུ་ཏྟཱ, ཝི་ཙི་ཀི་ཙྪཱ་ཡུ་ཏ་མྤི ཙ;
ཙ་ཏྟཱ་རོ ཧེ་ཊྛི་མཱ པཱ་ཀཱ, སུ་དྡྷཱ་ཝཱ་སེ ན ལ་བྦྷ་རེ.
༢༡༢. སེ་སཱ་ནི ཨེ་ཀ་པ་ཉྙཱ་ས, ཙི་ཏྟཱ་ནི པ་ན ལ་བྦྷ་རེ;
རཱུ་པཱ་ཝ་ཙ་རི་ཀཱ ས་བྦེ, ཝི་པཱ་ཀཱ ཀཱ་མ་དྷཱ་ཏུ་ཡཱ.
༢༡༣. དོ་མ་ན་སྶཱ་དི་མ་གྒོ ཙ, ཀྲི་ཡཱ ཙ དྭེ ཨ་ཧེ་ཏུ་ཀཱ;
ཏེ་ཙ་ཏྟཱ་ལཱི་ས ཙི་ཏྟཱ་ནི, ན་ཏྠི ཨཱ་རུ་པྤ་བྷཱུ་མི་ཡཾ.
༢༡༤. ཨེ་ཝཾ བྷཱུ་མི་ཝ་སེ་ནེ་ཝ, ཙི་ཏྟུ་པྤ་ཏྟིཾ ཝི་བྷཱ་ཝ་ཡེ;
ཏ་ཐཱ ཨེ་ཀཱ་ད་ས་ནྣ་མྤི, པུ་གྒ་ལཱ་ནཾ ཝ་སེ་ན ཙ.
༢༡༥. ཀུ་ས་ལཱ་ཀུ་ས་ལཱ ཀཱ་མེ,
ཏེ་སཾ པཱ་ཀཱ ཨ་ཧེ་ཏུ་ཀཱ;
ཨཱ་ཝ་ཛྫ་ན་དྭ་ཡ་ཉྩཱ་ཏི,
ས་ཏྟ་ཏིཾ་སེ་ཝ མཱ་ན་སཱ.
༢༡༦. ཨ་ཧེ་ཏུ་ཀ་སྶ ས་ཏྟ་སྶ, ཛཱ་ཡ་ནྟེ པ་ཉྩ་བྷཱུ་མི་སུ;
དྭེ་པ་ཉྙཱ་སཱ་ཝ་སེ་སཱ་ནི, ན ཛཱ་ཡ་ནྟི ཀ་དཱ་ཙི་པི.
༢༡༧. ཨ་ཧེ་ཏུ་ཀ་སྶ ཝུ་ཏྟེ་ཧི, ཀཱ་མ་པཱ་ཀཱ དུ་ཧེ་ཏུ་ཀཱ;
དུ་ཧེ་ཏུ་ཀ་སྶ ཛཱ་ཡ་ནྟེ, ཙ་ཏྟཱ་ལཱི་སཾ ཏ་ཐེ་ཀ་ཀཾ.
༢༡༨. ས་བྦེ མ་ཧ་གྒ་ཏཱ ཙེ་ཝ, ས་བྦེ་པི ཙ ཨ་ནཱ་ས་ཝཱ;
ཏི་ཧེ་ཏུ་ཀཱ ཝི་པཱ་ཀཱ ཙ, ཀཱ་མེ ན་ཝ ཀྲི་ཡཱ་པི ཙ.
༢༡༩. དུ་ཧེ་ཏུ་ནོ ན ཛཱ་ཡ་ནྟི, ཙ་ཏྟཱ་ལཱི་སཾ ཏ་ཐཱ་ཊྛ ཙ;
ཀཱ་མཱ་ཝ་ཙ་ར་ས་ཏྟ་སྶ, ཏི་ཧེ་ཏུ་པ་ཊི་ས་ནྡྷི་ནོ.
༢༢༠. པུ་ཐུ་ཛྫ་ན་སྶ ཛཱ་ཡ་ནྟེ, ཙ་ཏུ་པ་ཉྙཱ་ས མཱ་ན་སཱ;
དྭི་ཧེ་ཏུ་ཀ་སྶ ཝུ་ཏྟཱ་ནི, ཙ་ཏྟཱ་ལཱི་སཾ ཏ་ཐེ་ཀ་ཀཾ.
༢༢༡. ཙ་ཏྟཱ་རོ ཉཱ་ཎ་སཾ་ཡུ་ཏྟཱ, ཝི་པཱ་ཀཱ ཀཱ་མ་དྷཱ་ཏུ་ཡཱ;
རཱུ་པཱ་རཱུ་པེ་སུ པུ་ཉྙཱ་ནི, ཙ་ཏུ་པ་ཉྙཱ་ས མཱ་ན་སཱ.
༢༢༢. པུ་ཐུ་ཛྫ་ན་སྶ ཛཱ་ཡ་ནྟེ, པ་ཉྩ་ཏིཾ་ས ན ཛཱ་ཡ་རེ;
ཚ་དེ་ཝེ་སུ མ་ནུ་སྶེ་སུ, སོ་ཏཱ་པ་ནྣ་སྶ དེ་ཧི་ནོ.
༢༢༣. པ་ཉྙཱ་སེ་ཝསྶ ཙི་ཏྟཱ་ནི, ཛཱ་ཡ་ནྟཱི་ཏི ཝི་ནི་དྡི་སེ;
ན་ཝ་ཏིཾ་སེ་ཝ ཙི་ཏྟཱ་ནི, ནུ་པྤ་ཛྫ་ནྟཱི་ཏི དཱི་པ་ཡེ.
༢༢༤. སོ་ཏཱ་པ་ནྣ་སྶ ཝུ་ཏྟཱ་ནི, ཋ་པེ་ཏྭཱ པ་ཋ་མཾ ཕ་ལཾ;
ཨ་ཏྟ་ནོ་ཝ ཕ་ལེ་ན་སྶ, ས་ཀ་དཱ་གཱ་མི་ནོ སི་ཡུཾ.
༢༢༥. སོ་ཏཱ་པ་ནྣ་སྶ ཝུ་ཏྟཱ་ནི, ཋ་པེ་ཏྭཱ པ་ཊི་གྷ་དྭ་ཡཾ;
དུ་ཏི་ཡཾ ཙ ཕ་ལཾ ཧི་ཏྭཱ, ཡཱ་ནི ཙི་ཏྟཱ་ནི ཏཱ་ནི་ཏི;
ཨ་ནཱ་གཱ་མི་སྶ ས་ཏྟ་སྶ, ཛཱ་ཡ་ནྟཱི་ཏི ཝི་ནི་དྡི་སེ.
༢༢༦. ཀ་ཏི ཙི་ཏྟཱ་ནི ཛཱ་ཡ་ནྟེ, ཀཱ་མེ ཨ་ར་ཧ་ཏོ པ་ན;
ཙ་ཏྟཱ་རཱི་ས་ཉྩ ཙ་ཏྟཱ་རི, ཀཱ་མེ ཨ་ར་ཧ་ཏོ སི་ཡུཾ.
༢༢༧. མ་གྒ་ཊྛཱ་ནཾ ཙ་ཏུ་ནྣ་མྤི, པུ་གྒ་ལཱ་ནཾ ས་ཀཾ ས་ཀཾ;
མ་གྒ་ཙི་ཏྟཾ སི་ཡཱ ཏེ་སཾ, ཨེ་ཀ་ཙི་ཏྟ་ཀྑ་ཎཱ ཧི ཏེ.
༢༢༨. པུ་ཐུ་ཛྫ་ན་སྶ ཏཱི་སྭེ་ཝ, པ་ཋ་མ་ཛ྄ཛྷཱ་ན་བྷཱུ་མི་སུ;
པ་ཉྩ་ཏིཾ་སེ་ཝ ཙི་ཏྟཱ་ནི, ཛཱ་ཡ་ནྟེ་ཏི ཝི་ནི་དྡི་སེ.
༢༢༩. གྷཱ་ནཱ་དཱི་སུ ཙ ཝི་ཉྙཱ་ཎ-ཏྟ་ཡཾ ས་ཏྟ ཨ་པུ་ཉྙ་ཛཱ;
མ་ཧཱ་པཱ་ཀཱ ཏ་ཐཱ པཱ་ཀཱ, ཨུ་པ་རི་ཛ྄ཛྷཱ་ན་བྷཱུ་མི་ཀཱ.
༢༣༠. ཝི་པཱ་ཀཱ་པི ཙ ཨཱ་རུ་པྤཱ, དོ་མ་ན་སྶ་དྭ་ཡ་མྤི ཙ;
ཨ་ཊྛཱ་ར་ས ཀྲི་ཡཱ ཙེ་ཝ, ཨ་ཊྛ ལོ་ཀུ་ཏྟ་རཱ་ནི ཙ.
༢༣༡. པ་ཋ་མ་ཛ྄ཛྷཱ་ན་ནི་བྦ་ཏྟ-པུ་ཐུ་ཛྫ་ན་ས་རཱི་རི་ནོ;
ཨེ་ཏཱ་ནི ཙ་ཏུ་པ་ཉྙཱ་ས, ཙི་ཏྟཱ་ནི ན ཙ ལ་བྦྷ་རེ.
༢༣༢. སོ་ཏཱ་པ་ནྣ་སྶ ཙི་ཏྟཱ་ནི, ཏ་ཏྠེཀ་ཏིཾ་ས ཛཱ་ཡ་རེ;
པུ་ཐུ་ཛྫ་ན་སྶ ཝུ་ཏྟེ་སུ, ཧི་ཏྭཱ ཙཱ་པུ་ཉྙ་པ་ཉྩ་ཀཾ.
༢༣༣. ས་ཀ་དཱ་གཱ་མི་ནོ ཏ་ཏྠ, ཋ་པེ་ཏྭཱ པ་ཋ་མཾ ཕ་ལཾ;
ཨེ་ཀ་ཏིཾ་སེ་ཝ ཛཱ་ཡ་ནྟེ, པ་ཀྑི་པི་ཏྭཱ ས་ཀཾ ཕ་ལཾ.
༢༣༤. ཨ་ནཱ་གཱ་མི་སྶ ཏ་ཏྠེ་ཝ, ཋ་པེ་ཏྭཱ དུ་ཏི་ཡཾ ཕ་ལཾ;
ཨེ་ཀ་ཏིཾ་སེ་ཝ ཛཱ་ཡ་ནྟེ, ཕ་ལ་ཙི་ཏྟེ་ན ཨ་ཏྟ་ནོ.
༢༣༥. ཝི་ཉྙཱ་ཎཾ ཙ་ཀྑུ་སོ་ཏཱ་ནཾ, པུ་ཉྙ་ཛཾ ས་མྤ་ཊི་ཙྪ་ནཾ;
ས་ནྟཱི་ར་ཎ་དྭ་ཡ་ཉྩེ་ཝ, ཀྲི་ཡ་ཙི་ཏྟཱ་ནི ཝཱི་ས་ཏི.
༢༣༦. ཨ་ར་ཧ་ཏྟ་ཕ་ལཾ པཱ་ཀོ, པ་ཋ་མ་ཛ྄ཛྷཱ་ན་ས་མྦྷ་ཝོ;
ས་ཏྟ་ཝཱི་ས་ཏི ཙི་ཏྟཱ་ནི, ཨ་ར་ཧ་ནྟ་སྶ ཛཱ་ཡ་རེ.
༢༣༧. པུ་ཐུ་ཛྫ་ན་སྶ ཏཱི་སྭེ་ཝ, དུ་ཏི་ཡ་ཛ྄ཛྷཱ་ན་བྷཱུ་མི་སུ;
ཚ་ཏྟིཾ་ས དུ་ཏི་ཡ་ཛ྄ཛྷཱ་ན-ཏ་ཏི་ཡ་ཛ྄ཛྷཱ་ན་པཱ་ཀ་ཏོ.
༢༣༨. པུ་ཐུ་ཛྫ་ན་སྶ ཝུ་ཏྟེ་སུ, ཧི་ཏྭཱ ཝཱ་པུ་ཉྙ་པ་ཉྩ་ཀཾ;
སོ་ཏཱ་པ་ནྣ་སྶ བཱ་ཏྟིཾ་ས, ཕ་ལེ་ན ས་ཧ ཨ་ཏྟ་ནོ.
༢༣༩. སོ་ཏཱ་པ་ནྣ་སྶ ཝུ་ཏྟེ་སུ, ཋ་པེ་ཏྭཱ པ་ཋ་མཾ ཕ་ལཾ;
བཱ་ཏྟིཾ་ས ཕ་ལ་ཙི་ཏྟེ་ན, ས་ཀ་དཱ་གཱ་མི་སྶ ཨ་ཏྟ་ནོ.
༢༤༠. ས་ཀ་དཱ་གཱ་མཱི་སུ ཝུ་ཏྟེ་སུ, ཋ་པེ་ཏྭཱ དུ་ཏི་ཡཾ ཕ་ལཾ;
ཨ་ནཱ་གཱ་མི་ཕ་ལེ་ན་སྶ, བཱ་ཏྟིཾ་སེ་ཝ བྷ་ཝ་ནྟི ཧི.
༢༤༡. ཨ་ར་ཧ་ནྟ་སྶ ཏཱི་སྭེ་ཝ, ཨ་ཊྛ་ཝཱི་ས་ཏི ཨ་ཏྟ་ནོ;
ཕ་ལེ་ན དུ་ཏི་ཡ་ཛ྄ཛྷཱ་ན-ཏ་ཏི་ཡ་ཛ྄ཛྷཱ་ན་པཱ་ཀ་ཏོ.
༢༤༢. པ་རི་ཏྟ་ཀ་སུ་བྷཱ་དཱི་ནཾ, དེ་ཝཱ་ནཾ ཏཱི་སུ བྷཱུ་མི་སུ;
པ་ཉྩ་ཏིཾ་སེ་ཝ ཛཱ་ཡ་ནྟེ, ཙ་ཏུ་ཏྠ་ཛ྄ཛྷཱ་ན་པཱ་ཀ་ཏོ.
༢༤༣. སོ་ཏཱ་པ་ནྣ་སྶ ཏ་ཏྠེ་ཀ-ཏིཾ་ས ཙི་ཏྟཱ་ནི ཛཱ་ཡ་རེ;
ས་ཀ་དཱ་གཱ་མི་ནོ ཨེ་ཝཾ, ཏ་ཐཱ་ནཱ་གཱ་མི་ནོ་པི ཙ.
༢༤༤. ཁཱི་ཎཱ་ས་ཝ་སྶ ཏ་ཏྠེ་ཝ, ས་ཏྟ་ཝཱི་ས་ཏི མཱ་ན་སཱ;
ཏ་ཐཱ ཝེ་ཧ་པྥ་ལེ ཙཱ་པི, ས་བྦེ་སཾ ཧོ་ནྟི མཱ་ན་སཱ.
༢༤༥. ཨེ་ཀ་ཏིཾ་སེ་ཝ ཙི་ཏྟཱ་ནི, སུ་དྡྷཱ་ཝཱ་སི་ཀ་བྷཱུ་མི་སུ;
ཨ་ནཱ་གཱ་མི་ཀ་ས་ཏྟ་སྶ, ཧོ་ནྟཱི་ཏི པ་རི་དཱི་པ་ཡེ.
༢༤༦. ཨ་ར་ཧ་ཏོ པ་ན ཏ་ཏྠེ་ཝ, མཱ་ན་སཱ ས་ཏྟ་ཝཱི་ས་ཏི;
ཨེ་ཝཾ རཱུ་པཱི་སུ ཙི་ཏྟཱ་ནི, ཝི་ཉྙེ་ཡྻཱ་ནི ཝི་བྷཱ་ཝི་ནཱ.
༢༤༧. ཙ་ཏུ་ཝཱི་ས་ཏི ཙི་ཏྟཱ་ནི, པ་ཋ་མཱ་རུ་པྤ་བྷཱུ་མི་ཡཾ;
པུ་ཐུ་ཛྫ་ན་སྶ ས་ཏྟ་སྶ, ཛཱ་ཡ་ནྟཱི་ཏི ཝི་ནི་དྡི་སེ.
༢༤༨. སོ་ཏཱ་པ་ནྣ་སྶ ཏ་ཏྠེ་ཝ, ཋ་པེ་ཏྭཱ་པུ་ཉྙ་པ་ཉྩ་ཀཾ;
ས་མ་ཝཱི་ས་ཏི ཙི་ཏྟཱ་ནི, ཕ་ལེ་ན ས་ཧ ཨ་ཏྟ་ནོ.
༢༤༩. ས་ཀ་དཱ་གཱ་མི་ནོ ཏ་ཏྠ, ཏ་ཐཱ་ནཱ་གཱ་མི་ནོ་པི ཙ;
ཛཱ་ཡ་ནྟི ཝཱི་ས ཙི་ཏྟཱ་ནི, པུ་བྦ་པུ་བྦ་ཕ་ལཾ ཝི་ནཱ.
༢༥༠. ཁཱི་ཎཱ་ས་ཝ་སྶ ཏ་ཏྠེ་ཝ, ད་ས་པ་ཉྩ ཙ མཱ་ན་སཱ;
པུ་ཐུ་ཛྫ་ན་སྶ ས་ཏྟ་སྶ, དུ་ཏི་ཡཱ་རུ་པྤ་བྷཱུ་མི་ཡཾ.
༢༥༡. ཧོ་ནྟི ཏེ་ཝཱི་ས ཙི་ཏྟཱ་ནི, ཨི་ཏི ཝ་ཏྭཱ ཝི་བྷཱ་ཝ་ཡེ;
ཏི་ཎྞ་ནྣ་མྤེ་ཏྠ སེ་ཁཱ་ནཾ, ཙི་ཏྟཱ་ནེཀཱུ་ན་ཝཱི་ས་ཏི.
༢༥༢. ཙུ་དྡ་སེ་ཝ ཏུ ཙི་ཏྟཱ་ནི, དུ་ཏི་ཡཱ་རུ་པྤ་བྷཱུ་མི་ཡཾ;
ཀྲི་ཡཱ་དྭཱ་ད་ས པཱ་ཀེ་ཀོ, ཕ་ལཾ ཁཱི་ཎཱ་ས་ཝ་སྶ ཏུ.
༢༥༣. པུ་ཐུ་ཛྫ་ན་སྶ ས་ཏྟ་སྶ, ཏ་ཏི་ཡཱ་རུ་པྤ་བྷཱུ་མི་ཡཾ;