༤. ཙ་ཏུ་ཏྠོ པ་རི་ཙྪེ་དོ
ཨེ་ཀ་ཝི་དྷཱ་དི་ནི་དྡེ་སོ
༡༢༧. ཨི་ཏོ པ་རཾ པ་ཝ་ཀྑཱ་མི, ན་ཡམེ་ཀ་ཝི་དྷཱ་དི་ཀཾ;
ཨཱ་བྷི་དྷ་མྨི་ཀ་བྷི་ཀྑཱུ་ནཾ, བུ་དྡྷི་ཡཱ པ་ན ཝུ་དྡྷི་ཡཱ.
༡༢༨. ས་བྦམེ་ཀ་ཝི་དྷཾ ཙི་ཏྟཾ, ཝི་ཛཱ་ན་ན་ས་བྷཱ་ཝ་ཏོ;
དུ་ཝི་དྷཉྩ བྷ་ཝེ ཙི་ཏྟཾ, ཨ་ཧེ་ཏུ་ཀ་ས་ཧེ་ཏུ་ཏོ.
༡༢༩. པུ་ཉྙཱ་པུ་ཉྙ་ཝི་པཱ་ཀཱ ཧི, ཀཱ་མེ ད་ས ཙ པ་ཉྩ ཙ;
ཀྲི་ཡཱ ཏི་སྶོ་ཏི ས་བྦེ་པི, ཨ་ཊྛཱ་ར་ས ཨ་ཧེ་ཏུ་ཀཱ.
༡༣༠. ཨེ་ཀ་ས་ཏྟ་ཏི སེ་སཱ་ནི, ཙི་ཏྟུ་པྤཱ་དཱ མ་ཧེ་སི་ནཱ;
ས་ཧེ་ཏུ་ཀཱ་ཏི ནི་དྡི་ཊྛཱ, ཏཱ་དི་ནཱ ཧེ་ཏུ་ཝཱ་དི་ནཱ.
༡༣༡. ས་ཝ་ཏྠུ་ཀཱ་ཝ་ཏྠུ་ཀ་ཏོ, ཏ་ཐོ་བྷ་ཡ་ཝ་སེ་ན ཙ;
ས་བྦཾ ཝུ་ཏྟ་པ་ཀཱ་རཾ ཏུ, ཏི་ཝི་དྷཾ ཧོ་ཏི མཱ་ན་སཾ.
༡༣༢. ས་བྦོ ཀཱ་མ་ཝི་པཱ་ཀོ ཙ, རཱུ་པེ པ་ཉྩ་ད་སཱ་པི ཙ;
ཨཱ་དི་མ་གྒོ སི་ཏུ་པྤཱ་དོ, མ་ནོ་དྷཱ་ཏུ ཀྲི་ཡཱ་པི ཙ.
༡༣༣. དོ་མ་ན་སྶ་དྭ་ཡ་ཉྩཱ་པི, ཏེ་ཙ་ཏྟཱ་ལཱི་ས མཱ་ན་སཱ;
ནུ་པྤ་ཛྫ་ནྟི ཝི་ནཱ ཝ་ཏྠུཾ, ཨེ་ཀ་ནྟེ་ན ས་ཝ་ཏྠུ་ཀཱ.
༡༣༤. ཨ་རཱུ་པཱ་ཝ་ཙ་ར་པཱ་ཀཱ ཙ, ཨེ་ཀ་ནྟེ་ན ཨ་ཝ་ཏྠུ་ཀཱ;
དྭཱ་ཙ་ཏྟཱ་ལཱི་ས སེ་སཱ་ནི, ཙི་ཏྟཱ་ནུ་བྷ་ཡ་ཐཱ སི་ཡུཾ.
༡༣༥. ཨེ་ཀེ་ཀཱ་ར་མྨ་ཎཾ ཙི་ཏྟཾ, པ་ཉྩཱ་ར་མྨ་ཎ་མེ་ཝ ཙ;
ཚ་ལཱ༹་ར་མྨ་ཎ་ཀ་ཉྩེ་ཏི, ཨེ་ཝ་མྤི ཏི་ཝི་དྷཾ སི་ཡཱ.
༡༣༦. ཝི་ཉྙཱ་ཎཱ་ནི ཙ དྭེ་པ་ཉྩ, ཨ་ཊྛ ལོ་ཀུ་ཏྟ་རཱ་ནི ཙ;
ས་བྦཾ མ་ཧ་གྒ་ཏ་ཉྩེ་ཝ, ཋ་པེ་ཏྭཱ་བྷི་ཉྙ་མཱ་ན་སཾ.
༡༣༧. ཏེ་ཙ་ཏྟཱ་ལཱི་ས ཝི་ཉྙེ་ཡྻཱ, ཨེ་ཀེ་ཀཱ་ར་མྨ་ཎཱ པ་ན;
མ་ནོ་དྷཱ་ཏུ་ཏྟ་ཡཾ ཏ་ཏྠ, པ་ཉྩཱ་ར་མྨ་ཎ་མཱི་རི་ཏཾ.
༡༣༨. ཏེ་ཙ་ཏྟཱ་ལཱི་ས སེ་སཱ་ནི, ཚ་ལཱ༹་ར་མྨ་ཎི་ཀཱ མ་ཏཱ;
ཏ་ཐཱ ཙ ཏི་ཝི་དྷཾ ཙི་ཏྟཾ, ཀུ་ས་ལཱ་ཀུ་ས་ལཱ་དི་ཏོ.
༡༣༩. ཨ་ཧེ་ཏུཾ ཨེ་ཀ་ཧེ་ཏུ་ཉྩ, དྭི་ཧེ་ཏུ་ཉྩ ཏི་ཧེ་ཏུ་ཀཾ;
ཨེ་ཝཾ ཙ་ཏུ་བྦི་དྷཾ ཙི་ཏྟཾ, ཝི་ཉྙཱ་ཏ་བྦཾ ཝི་བྷཱ་ཝི་ནཱ.
༡༤༠. ཧེ་ཊྛཱ མ་ཡཱ་པི ནི་དྡི་ཊྛཱ, ཨ་ཊྛཱ་ར་ས ཨ་ཧེ་ཏུ་ཀཱ;
ཝི་ཙི་ཀི་ཙྪུ་དྡྷ་ཙྩ་སཾ་ཡུ་ཏྟཾ, ཨེ་ཀ་ཧེ་ཏུ་མུ་དཱི་རི་ཏཾ.
༡༤༡. ཀཱ་མེ དྭཱ་ད་ས་དྷཱ པུ་ཉྙ-ཝི་པཱ་ཀ་ཀྲི་ཡ་ཏོ པ་ན;
ད་ས་དྷཱ་ཀུ་ས་ལཱ ཙཱ་ཏི, བཱ་ཝཱི་ས་ཏི དུ་ཧེ་ཏུ་ཀཱ.
༡༤༢. ཀཱ་མེ དྭཱ་ད་ས་དྷཱ པུ་ཉྙ-ཝི་པཱ་ཀ་ཀྲི་ཡ་ཏོ པ་ན;
ས་བྦཾ མ་ཧ་གྒ་ཏ་ཉྩེ་ཝ, ཨ་པྤ་མཱ་ཎཾ ཏི་ཧེ་ཏུ་ཀཾ.
༡༤༣. རཱུ་པཱི་རི་ཡཱ་པ་ཐ་ཝི་ཉྙ་ཏྟི-ཛ་ན་ཀཱ་ཛ་ན་ཀཱ་དི་ཏོ;
ཨེ་ཝ་ཉྩཱ་པི ཧི ཏཾ ཙི་ཏྟཾ, ཧོ་ཏི ས་བྦཾ ཙ་ཏུ་བྦི་དྷཾ.
༡༤༤. དྭཱ་ད་སཱ་ཀུ་ས་ལཱ ཏ་ཏྠ, ཀུ་ས་ལཱ ཀཱ་མ་དྷཱ་ཏུ་ཡཱ;
ཏ་ཐཱ ད་ས ཀྲི་ཡཱ ཀཱ་མེ, ཨ་བྷི་ཉྙཱ་མཱ་ན་སཾ དྭ་ཡཾ.
༡༤༥. ས་མུ་ཊྛཱ་པེ་ནྟི རཱུ་པཱ་ནི, ཀ་པྤེ་ནྟི ཨི་རི་ཡཱ་པ་ཐཾ;
ཛ་ན་ཡ་ནྟི ཙ ཝི་ཉྙ་ཏྟིཾ, ཨི་མེ དྭ་ཏྟིཾ་ས མཱ་ན་སཱ.
༡༤༦. ཀུ་ས་ལཱ ཙ ཀྲི་ཡཱ ཙེ་ཝ, ཏེ མ་ཧ་གྒ་ཏ་མཱ་ན་སཱ;
ཨ་ཊྛཱ་ནཱ་ས་ཝ་ཙི་ཏྟཱ་ནི, ཚ་བྦཱི་ས་ཏི ཙ མཱ་ན་སཱ.
༡༤༧. ས་མུ་ཊྛཱ་པེ་ནྟི རཱུ་པཱ་ནི, ཀ་པྤེ་ནྟི ཨི་རི་ཡཱ་པ་ཐཾ;
ཙོ་པ་ནཾ ན ཙ པཱ་པེ་ནྟི, དྭི་ཀི་ཙྩཱ ནི་ཡ་ཏཱ ཨི་མེ.
༡༤༨. ཋ་པེ་ཏྭཱ ད་ས ཝི་ཉྙཱ་ཎེ, ཝི་པཱ་ཀཱ དྭཱི་སུ བྷཱུ་མི་སུ;
ཀྲི་ཡཱ ཙེ་ཝ མ་ནོ་དྷཱ་ཏུ, ཨི་མཱ་ནེ་ཀཱུ་ན་ཝཱི་ས་ཏི.
༡༤༩. ས་མུ་ཊྛཱ་པེ་ནྟི རཱུ་པཱ་ནི, ན ཀ་རོ་ནྟི་ཏ་ར་དྭ་ཡཾ;
པུ་ན དྭེ་པ་ཉྩ་ཝི་ཉྙཱ་ཎཱ, ཝི་པཱ་ཀཱ ཙ ཨ་རཱུ་པི་སུ.
༡༥༠. ས་བྦེ་སཾ ས་ནྡྷི་ཙི་ཏྟ་ཉྩ, ཙུ་ཏི་ཙི་ཏྟ་ཉྩཱ་ར་ཧ་ཏོ;
ན ཀ་རོ་ནྟི ཏི་ཀི་ཙྩཱ་ནི, ཨི་མེ སོ་ལ༹་ས མཱ་ན་སཱ.
༡༥༡. ཨེ་ཀ་དྭི་ཏི་ཙ་ཏུ་ཊྛཱ་ན-པ་ཉྩ་ཊྛཱ་ན་པ་བྷེ་ད་ཏོ;
པ་ཉྩ་དྷཱ ཙི་ཏྟ་མ་ཀྑཱ་སི, པ་ཉྩ་ནི་མྨ་ལ་ལོ་ཙ་ནོ.
༡༥༢. ཀུ་ས་ལཱ་ཀུ་ས་ལཱ ས་བྦེ, ཙི་ཏྟུ་པྤཱ་དཱ མ་ཧཱ་ཀྲི་ཡཱ;
མ་ཧ་གྒ་ཏཱ ཀྲི་ཡཱ ཙེ་ཝ, ཙ་ཏྟཱ་རོ ཕ་ལ་མཱ་ན་སཱ.
༡༥༣. ས་བྦེ་ཝ པ་ཉྩ་པ་ཉྙཱ་ས, ནི་པྤ་པ་ཉྩེ་ན ས་ཏྠུ་ནཱ;
ཛ་ཝ་ན་ཊྛཱ་ན་ཏོ་ཡེ་ཝ, ཨེ་ཀ་ཊྛཱ་ནེ ནི་ཡཱ་མི་ཏཱ.
༡༥༤. པུ་ན དྭེ་པ་ཉྩ་ཝི་ཉྙཱ་ཎཱ, ད་སྶ་ནེ ས་ཝ་ནེ ཏ་ཐཱ;
གྷཱ་ཡ་ནེ སཱ་ཡ་ནེ ཋཱ་ནེ, ཕུ་ས་ནེ པ་ཊི་པཱ་ཊི་ཡཱ.
༡༥༥. མ་ནོ་དྷཱ་ཏུ་ཏྟི་ཀཾ ཋཱ་ནེ, ཨཱ་ཝ་ཛྫ་ནེ པ་ཊི་ཙྪ་ནེ;
ཨ་ཊྛ་ས་ཊྛི བྷ་ཝ་ནྟེ་ཏེ, ཨེ་ཀ་ཊྛཱ་ནི་ཀ་ཏཾ ག་ཏཱ.
༡༥༦. པུ་ན དྭི་ཊྛཱ་ནི་ཀཾ ནཱ་མ, ཙི་ཏྟ་དྭ་ཡ་མུ་དཱི་རི་ཏཾ;
སོ་མ་ན་སྶ་ཡུ་ཏཾ པ་ཉྩ-དྭཱ་རེ ས་ནྟཱི་ར་ཎཾ སི་ཡཱ.
༡༥༧. ཏ་དཱ་ར་མྨ་ཎཾ ཚ་དྭཱ་རེ, བ་ལ་ཝཱ་ར་མྨ་ཎེ ས་ཏི;
ཏ་ཐཱ ཝོ་ཊྛ་བྦ་ནཾ ཧོ་ཏི, པ་ཉྩ་དྭཱ་རེ་སུ ཝོ་ཊྛ་བོ.
༡༥༨. མ་ནོ་དྭཱ་རེ་སུ ས་བྦེ་སཾ, ཧོ་ཏི ཨཱ་ཝ་ཛྫ་ནཾ པ་ན;
ཨི་དཾ དྭི་ཊྛཱ་ནི་ཀཾ ནཱ་མ, ཧོ་ཏི ཙི་ཏྟ་དྭ་ཡཾ པ་ན.
༡༥༩. པ་ཊི་ས་ནྡྷི་བྷ་ཝ་ངྒ་སྶ, ཙུ་ཏི་ཡཱ ཋཱ་ན་ཏོ པ་ན;
མ་ཧ་གྒ་ཏ་ཝི་པཱ་ཀཱ ཏེ, ན་ཝ ཏི་ཊྛཱ་ནི་ཀཱ མ་ཏཱ.
༡༦༠. ཨ་ཊྛ ཀཱ་མཱ མ་ཧཱ་པཱ་ཀཱ, པ་ཊི་ས་ནྡྷི་བྷ་ཝ་ངྒ་ཏོ;
ཏ་དཱ་ར་མྨ་ཎ་ཏོ ཙེ་ཝ, ཙུ་ཏི་ཊྛཱ་ན་ཝ་སེ་ན ཙ.
༡༦༡. ཙ་ཏུ་ཊྛཱ་ནི་ཀ་ཙི་ཏྟཱ་ནི, ཨ་ཊྛ ཧོ་ནྟཱི་ཏི ནི་དྡི་སེ;
ཀུ་ས་ལཱ་ཀུ་ས་ལ་པཱ་ཀཾ ཏུ-པེ་ཀྑཱ་ས་ཧ་ག་ཏ་དྭ་ཡཾ.
༡༦༢. ས་ནྟཱི་ར་ཎཾ བྷ་ཝེ པ་ཉྩ-དྭཱ་རེ ཚ་དྭཱ་རི་ཀེ་སུ ཙ;
ཏ་དཱ་ར་མྨ་ཎ་ཏཾ ཡཱ་ཏི, བ་ལ་ཝཱ་ར་མྨ་ཎེ ས་ཏི.
༡༦༣. པ་ཊི་ས་ནྡྷི་བྷ་ཝ་ངྒཱ་ནཾ, ཙུ་ཏི་ཊྛཱ་ན་ཝ་སེ་ན ཙ;
པ་ཉྩ་ཊྛཱ་ནི་ཀ་ཙི་ཏྟ་ནྟི, ཨི་དཾ དྭ་ཡ་མུ་དཱི་རི་ཏཾ.
༡༦༤. པ་ཉྩ་ཀི་ཙྩཾ དྭ་ཡཾ ཙི་ཏྟཾ, ཙ་ཏུ་ཀི་ཙྩཾ པ་ན་ཊྛ་ཀཾ;
ཏི་ཀི་ཙྩཾ ན་ཝ་ཀཾ དྭེ ཏུ, དྭི་ཀི་ཙྩཱ སེ་ས་མེ་ཀ་ཀཾ.
༡༦༥. བྷ་ཝ་ངྒཱ་ཝ་ཛྫ་ན་ཉྩེ་ཝ, ད་སྶ་ནཾ ས་མྤ་ཊི་ཙྪ་ནཾ;
ས་ནྟཱི་ར་ཎཾ ཝོ་ཊྛ་བྦ་ནཾ, ཛ་ཝ་ནཾ བྷ་ཝ་ཏི ས་ཏྟ་མཾ.
༡༦༦. ཚ་བྦི་དྷཾ ཧོ་ཏི ཏཾ ཚ་ནྣཾ, ཝི་ཉྙཱ་ཎཱ་ནཾ པ་བྷེ་ད་ཏོ;
ས་ཏྟ་དྷཱ ས་ཏྟ་ཝི་ཉྙཱ་ཎ-དྷཱ་ཏཱུ་ནཾ ཏུ པ་བྷེ་ད་ཏོ.
༡༦༧. ཨེ་ཀེ་ཀཱ་ར་མྨ་ཎཾ ཚ་ཀྐཾ, པ་ཉྩཱ་ར་མྨ་ཎ་བྷེ་ད་ཏོ;
ཚ་ལཱ༹་ར་མྨ་ཎ་ཏོ ཙེ་ཝ, ཧོ་ཏི ཨ་ཊྛ་ཝི་དྷཾ མ་ནོ.
༡༦༨. ཏ་ཏྠ དྭེ་པ་ཉྩ་ཝི་ཉྙཱ་ཎཱ, ཧོ་ནྟི ཨེ་ཀེ་ཀ་གོ་ཙ་རཱ;
རཱུ་པཱ་ར་མྨ་ཎི་ཀཱ དྭེ ཏུ, དྭེ དྭེ ས་དྡཱ་དི་གོ་ཙ་རཱ.
༡༦༩. ས་བྦཾ མ་ཧ་གྒ་ཏཾ ཙི་ཏྟཾ, པ་ཉྩཱ་བྷི་ཉྙཱ་ཝི་ཝ་ཛྫི་ཏཾ;
ས་བྦཾ ལོ་ཀུ་ཏྟ་ར་ཉྩེ་ཏི, ཨེ་ཀེ་ཀཱ་ར་མྨ་ཎཾ བྷ་ཝེ.
༡༧༠. ཨེ་ཀེ་ཀཱ་ར་མྨ་ཎཾ ཚ་ཀྐ-མི་དཾ ཉེ་ཡྻཾ ཝི་བྷཱ་ཝི་ནཱ;
པ་ཉྩཱ་ར་མྨ་ཎི་ཀཾ ནཱ་མ, མ་ནོ་དྷཱ་ཏུ་ཏྟ་ཡཾ བྷ་ཝེ.
༡༧༡. ཀཱ་མཱ་ཝ་ཙ་ར་ཙི་ཏྟཱ་ནི, ཙ་ཏྟཱ་ལཱི་སཾ ཏ་ཐེ་ཀ་ཀཾ;
ཨ་བྷི་ཉྙཱ་ནི ཙ ས་བྦཱ་ནི, ཚ་ལཱ༹་ར་མྨ་ཎི་ཀཱ་ནི་ཏི.
༡༧༢. ཙི་ཏྟཾ ན་ཝ་ཝི་དྷཾ ཧོ་ཏི, ས་ཏྟ་ཝི་ཉྙཱ་ཎ་དྷཱ་ཏུ་སུ;
པ་ཙྪི་མ་ཉྩ ཏི་དྷཱ ཀ་ཏྭཱ, ཀུ་ས་ལཱ་ཀུ་ས་ལཱ་དི་ཏོ.
༡༧༣. པུ་ཉྙཱ་པུ་ཉྙ་ཝ་སེ་ནེ་ཝ, ཝི་པཱ་ཀ་ཀྲི་ཡ་བྷེ་ད་ཏོ;
ཚ་ས་ཏྟ་ཏི་ཝི་དྷོ བྷེ་དོ, མ་ནོ་ཝི་ཉྙཱ་ཎ་དྷཱ་ཏུ་ཡཱ.
༡༧༤. མ་ནོ་དྷཱ་ཏུཾ དྭི་དྷཱ ཀ་ཏྭཱ, ཝི་པཱ་ཀ་ཀྲི་ཡ་བྷེ་ད་ཏོ;
ན་ཝ་དྷཱ པུ་བྦ་ཝུ་ཏྟེ་ཧི, ད་ས་དྷཱ ཧོ་ཏི མཱ་ན་སཾ.
༡༧༥. དྷཱ་ཏུ་དྭ་ཡཾ ཏི་དྷཱ ཀ་ཏྭཱ, པ་ཙྪི་མཾ པུ་ན པ་ཎྜི་ཏོ;
ཨེ་ཀཱ་ད་ས་ཝི་དྷཾ ཙི་ཏྟཾ, ཧོ་ཏཱི་ཏི པ་རི་དཱི་པ་ཡེ.
༡༧༦. མ་ནོ་ཝི་ཉྙཱ་ཎ་དྷཱ་ཏུ་མྤི, ཀུ་ས་ལཱ་ཀུ་ས་ལཱ་དི་ཏོ;
ཙ་ཏུ་དྷཱ ཝི་བྷ་ཛི་ཏྭཱ་ན, ཝ་དེ དྭཱ་ད་ས་དྷཱ ཋི་ཏཾ.
༡༧༧. བྷ་ཝེ ཙུ་དྡ་ས་དྷཱ ཙི་ཏྟཾ, ཙུ་དྡ་ས་ཊྛཱ་ན་བྷེ་ད་ཏོ;
པ་ཊི་ས་ནྡྷི་བྷ་ཝ་ངྒ་སྶ, ཙུ་ཏི་ཡཱ་ཝ་ཛྫ་ན་སྶ ཙ.
༡༧༨. པ་ཉྩ་ནྣཾ ད་སྶ་ནཱ་དཱི་ནཾ, ས་མྤ་ཊི་ཙྪ་ན་ཙེ་ཏ་སོ;
ས་ནྟཱི་ར་ཎ་སྶ ཝོ་ཊྛ་བྦ-ཛ་ཝ་ནཱ་ནཾ ཝ་སེ་ན ཙ.
༡༧༩. ཏ་དཱ་ར་མྨ་ཎ་ཙི་ཏྟ་སྶ, ཏ་ཐེ་ཝ ཋཱ་ན་བྷེ་ད་ཏོ;
ཨེ་ཝཾ ཙུ་དྡ་ས་དྷཱ ཙི་ཏྟཾ, ཧོ་ཏཱི་ཏི པ་རི་དཱི་པ་ཡེ.
༡༨༠. བྷཱུ་མི་པུ་གྒ་ལ་ནཱ་ནཱ་ཏྟ-ཝ་སེ་ན ཙ པ་ཝ་ཏྟི་ཏོ;
བ་ཧུ་དྷཱ པ་ནི་དཾ ཙི་ཏྟཾ, ཧོ་ཏཱི་ཏི ཙ ཝི་བྷཱ་ཝ་ཡེ.
༡༨༡. ཨེ་ཀ་ཝི་དྷཱ་དི་ན་ཡེ པ་ནི་མ་སྨིཾ,
ཡོ ཀུ་ས་ལོ མ་ཏི་མཱ ཨི་དྷ བྷི་ཀྑུ;
ཏ་སྶ་བྷི་དྷ་མྨ་ག་ཏཱ པ་ན ཨ་ཏྠཱ,
ཧ་ཏྠ་ག་ཏཱ་མ་ལ་ཀཱ ཝི་ཡ ཧོ་ནྟི.
ཨི་ཏི ཨ་བྷི་དྷ་མྨཱ་ཝ་ཏཱ་རེ ཨེ་ཀ་ཝི་དྷཱ་དི་ནི་དྡེ་སོ ནཱ་མ
ཙ་ཏུ་ཏྠོ པ་རི་ཙྪེ་དོ.