༣. ཏ་ཏི་ཡོ པ་རི་ཙྪེ་དོ
ཙི་ཏྟ་པ་ཝ་ཏྟི་པ་རི་དཱི་པ་ནོ
༡༡༦. ཙི་ཏྟཾ ཝི་ས་ཡ་གྒཱ་ཧཾ ཏཾ, པཱ་ཀཱ་པཱ་ཀ་ད་ཏོ དུ་དྷཱ;
ཀུ་ས་ལཱ་ཀུ་ས་ལཾ པུ་བྦཾ, པ་ར་མ་བྱཱ་ཀ་ཏཾ མ་ཏཾ.
༡༡༧. ཀུ་ས་ལཾ ཏ་ཏྠ ཀཱ་མཱ་དི་བྷཱུ་མི་ཏོ ཙ་ཏུ་དྷཱ སི་ཡཱ;
ཨ་ཊྛ པ་ཉྩ ཙ་ཏྟཱ་རི ཙ, ཙ་ཏྟཱ་རི ཀ་མ་ཏོ ཀ་ཐཾ.
༡༡༨. སོ་མ་ན་སྶ་མ་ཏི་ཡུ་ཏྟ་མ་ས་ངྑཱ་ར་མ་ན་མེ་ཀཾ;
ས་ས་ངྑཱ་ར་མ་ན་ཉྩེ་ཀཾ, ཏ་ཐཱ ཧཱི་ན་མ་ཏི་དྭ་ཡཾ.
༡༡༩. ཏ་ཐོ་པེ་ཀྑཱ་མ་ཏི་ཡུ་ཏྟཾ, མ་ཏི་ཧཱི་ན་ནྟི ཨ་ཊྛ་དྷཱ;
ཀཱ་མཱ་ཝ་ཙ་ར་པུ་ཉྙེཏྠ, བྷི་ཛྫ་ཏེ ཝེ་ད་ནཱ་དི་ཏོ.
༡༢༠. དཱ་ནཾ སཱི་ལ་ཉྩ བྷཱ་ཝ་ནཱ, པ་ཏྟི་དཱ་ནཱ་ནུ་མོ་ད་ནཱ;
ཝེ་ཡྻཱ་ཝ་ཙྩཱ་པ་ཙཱ་ཡ་ཉྩ, དེ་ས་ནཱ སུ་ཏི དི་ཊྛི་ཛུ.
༡༢༡. ཨེ་ཏེ་སྭེ་ཀ་མ་ཡཾ ཧུ་ཏྭཱ, ཝ་ཏྠུཾ ནི་སྶཱ་ཡ ཝཱ ན ཝཱ;
དྭཱ་ར་ཧཱི་ནཱ་དི་ཡོ་ནཱི་ནཾ, ག་ཏི་ཡཱ་དི་པྤ་བྷེ་ད་ཝཱ.
༡༢༢. ཏི་ཀཱ་ལི་ཀ་པ་རི་ཏྟཱ་དི་གོ་ཙ་རེ་སྭེ་ཀ་མཱ་དི་ཡ;
ཨུ་དེ་ཏི ཀཱ་ལ་མུ་ཏྟཾ ཝཱ, མ་ཏི་ཧཱི་ནཾ ཝི་ནཱ་མ་ལཾ.
༡༢༣. ཚ་གོ་ཙ་རེ་སུ རཱུ་པཱ་དི་པ་ཉྩ་ཀཾ པ་ཉྩ གོ་ཙ་རཱ;
སེ་སཾ རཱུ་པ་མ་རཱུ་པ་ཉྩ, པ་ཉྙ་ཏྟི ཚ་ཊྛ་གོ་ཙ་རོ.
༡༢༤. ཉཱ་ཎ་ཡུ་ཏྟ་ཝ་རཾ ཏ་ཏྠ, ད་ཏྭཱ ས་ནྡྷིཾ ཏི་ཧེ་ཏུ་ཀཾ;
པ་ཙྪཱ པ་ཙྩ་ཏི པཱ་ཀཱ་ནཾ, པ་ཝ་ཏྟེ ཨ་ཊྛ་ཀེ དུ་ཝེ.
༡༢༥. ཏེ་སུ་ཡེ་ཝ ནི་ཧཱི་ནཾ ཏུ, ད་ཏྭཱ ས་ནྡྷིཾ དུ་ཧེ་ཏུ་ཀཾ;
དེ་ཏི དྭཱ་ད་ས པཱ་ཀེ ཙ, པ་ཝ་ཏྟེ དྷཱི་ཡུ་ཏཾ ཝི་ནཱ.
༡༢༦. ཨེ་ཝཾ དྷཱི་ཧཱི་ན་མུ་ཀྐ་ཊྛཾ, ས་ནྡྷི་ཡ་ཉྩ པ་ཝ་ཏྟི་ཡཾ;
ཧཱི་ནཾ པ་ནུ་བྷ་ཡ་ཏྠཱ་པི, ཧེ་ཏུ་ཧཱི་ནེ་ཝ པ་ཙྩ་ཏི.
༡༢༧. ཀཱ་མ་སུ་ག་ཏི་ཡཾ་ཡེ་ཝ, བྷ་ཝ་བྷོ་ག་ད་དཾ ཨི་དཾ;
རཱུ་པཱ་པཱ་ཡེ པ་ཝ་ཏྟེ་ཝ, པ་ཙྩ་ཏེ ཨ་ནུ་རཱུ་པ་ཏོ.
༡༢༨. ཝི་ཏ་ཀྐ་ཙཱ་ར་པཱི་ཏཱི་ཧི, སུ་ཁེ་ཀ་གྒ་ཡུ་ཏཾ མ་ནཾ;
ཨཱ་དི ཙཱ་རཱ་དི་པཱི་ཏཱ་དི་སུ་ཁཱ་དཱི་ཧི པ་རཾ ཏ་ཡཾ.
༡༢༩. ཨུ་པེ་ཀྑེ་ཀ་གྒ་ཏཱ་ཡ་ནྟ་མཱ་རུ་པྤ་ཉྩེ་ཝ་མ་ངྒ་ཏོ;
པ་ཉྩ་དྷཱ རཱུ་པ་པུ་ཉྙཾ ཏུ, ཧོ་ཏཱ་ར་མྨ་ཎ་ཏོ པ་ན.
༡༣༠. ཨཱ་དི་སྶཱ་སུ་བྷ་མ་ནྟ་སྶུ-
པེ་ཀྑཱ མེ་ཏྟཱ་ད་ཡོ ཏ་ཡོ;
ཨཱ་དོ ཙ་ཏུ་ནྣཾ པ་ཉྩ་ནྣཾ,
ས་སྶཱ་ས་ཀ་སི་ཎཱ་ནི ཏུ.
༡༣༡. ན་བྷ་ཏ་མྨ་ན་ཏ་སྶུ་ཉྙ་ཏ་ཙྩི་ཏྟ་ཙ་ཏུ་གོ་ཙ་རེ;
ཀ་མེ་ནཱ་ཏི་ཀྐ་མཱརུ་པྤ་པུ་ཉྙཾ ཧོ་ཏི ཙ་ཏུ་བྦི་དྷཾ.
༡༣༢. ཨ་མ་ལཾ ས་ནྟི་མཱ་ར་བྦྷ, ཧོ་ཏི ཏཾ མ་གྒ་ཡོ་ག་ཏོ;
ཙ་ཏུ་དྷཱ པཱ་ད་ཀ་ཛ྄ཛྷཱ་ན་བྷེ་ད་ཏོ པུ་ན ཝཱི་ས་ཏི.
༡༣༣. དི་ཊྛི་ཀ་ངྑཱ་ནུ་དཾ ཨཱ་དི, ཀཱ་མ་དོ་ས་ཏ་ནཱུ་ཀ་རཾ;
པ་རཾ པ་རཾ ཏ་དུ་ཙྪེ་དཱི, ཨ་ནྟཾ སེ་ས་ཀ་ནཱ་ས་ཀཾ.
༡༣༤. ཨེ་ཝཾ བྷཱུ་མི་ཏྟ་ཡཾ པུ་ཉྙཾ, བྷཱ་ཝ་ནཱ་མ་ཡ་མེ་ཏྠ ཧི;
པ་ཋ་མཾ ཝ་ཏྠུཾ ནི་སྶཱ་ཡ, དུ་ཏི་ཡཾ ཨུ་བྷ་ཡེ་ན་པི.
༡༣༥. ཏ་ཏི་ཡེ ཨཱ་དི ནི་སྶཱ་ཡ,
སེ་སཱ ནི་སྶཱ་ཡ ཝཱ ན ཝཱ;
ཧོ་ནྟི ཨཱ་དི་དྭ་ཡཾ ཏ་ཏྠ,
སཱ་དྷེ་ཏི ས་ཀ་བྷཱུ་བྷ་ཝཾ.
༡༣༦. སཱ་དྷེ་ཏཱ་ནུ་ཏྟ་རཾ ས་ནྟིཾ, ཨ་བྷི་ཉྙཱ པ་ནི་དྷེ་ཝ ཏུ;
ཛྷཱ་ནཱུ་ད་ཡ་ཕ་ལ་ཏྟཱ ན, ཕ་ལ་དཱ་ནཱ་པི ས་མྦྷ་ཝཱ.
༡༣༧. ནཱ་ཉྙ་བྷཱུ་ཕ་ལ་དཾ ཀ་མྨཾ, རཱུ་པ་པཱ་ཀ་སྶ གོ་ཙ་རོ;
ས་ཀ་མྨ་གོ་ཙ་རོ་ཡེ་ཝ, ན ཙ་ཉྙོ་ཡ་མ་ས་མྦྷ་ཝོ.
༡༣༨. པཱ་པཾ ཀཱ་མི་ཀ་མེ་ཝེ་ཀཾ, ཧེ་ཏུ་ཏོ ཏཾ དྭི་དྷཱ པུ་ན;
མཱུ་ལ་ཏོ ཏི་ཝི་དྷཾ ལོ་བྷ-དོ་ས་མོ་ཧ་ཝ་སཱ སི་ཡཱ.
༡༣༩. སོ་མ་ན་སྶ་ཀུ་དི་ཊྛཱི་ཧི, ཡུ་ཏྟ་མེ་ཀ་མ་ས་ངྑ་རཾ;
ས་ས་ངྑཱ་ར་མ་ན་ཉྩེ་ཀཾ, ཧཱི་ན་དི་ཊྛི་དྭ་ཡཾ ཏ་ཐཱ.
༡༤༠. ཨུ་པེ་ཀྑཱ་དི་ཊྛི་ཡུ་ཏྟ་མྤི, ཏ་ཐཱ དི་ཊྛི་ཝི་ཡུ་ཏྟ་ཀཾ;
ཝེ་ད་ནཱ་དི་ཊྛི་ཨཱ་དཱི་ཧི, ལོ་བྷ་མཱུ་ལེཝ་མ་ཊྛ་དྷཱ.
༡༤༡. ས་དུ་ཀྑ་དོ་སཱ་ས་ངྑཱ་རཾ, ཨི་ཏ་རཾ དོ་ས་མཱུ་ལ་ཀཾ;
མོ་ཧ་མཱུ་ལམྤི སོ་པེ་ཀྑཾ, ཀ་ངྑུ་དྡྷ་ཙྩ་ཡུ་ཏཾ དྭི་དྷཱ.
༡༤༢. ཏ་ཏྠ དོ་ས་དྭ་ཡཾ ཝ་ཏྠུཾ, ནི་སྶཱ་ཡེ་ཝི་ཏ་རེ པ་ན;
ནི་སྶཱ་ཡ ཝཱ ན ཝཱ ཧོ་ནྟི, ཝ་དྷཱ་དི་ས་ཧི་ཏཱ ཀ་ཐཾ.
༡༤༣. ཕ་རུ་སྶ་ཝ་དྷ་བྱཱ་པཱ་དཱ, ས་དོ་སེ་ན ས་ལོ་བྷ་ཏོ;
ཀུ་དི་ཊྛི་མེ་ཐུ་ནཱ་བྷི་ཛ྄ཛྷཱ, སེ་སཱ ཀ་མྨ་པ་ཐཱ དྭི་བྷི.
༡༤༤. ས་ནྡྷིཾ ཙ་ཏཱུ་སྭ་པཱ་ཡེ་སུ, དེ་ཏི ས་བྦ་ཏྠ ཝུ་ཏྟི་ཡཾ;
པ་ཙྩ་ཏེ གོ་ཙ་རཾ ཏ་སྶ, ས་ཀ་ལཾ ཨ་མ་ལཾ ཝི་ནཱ.
༡༤༥. ཨ་བྱཱ་ཀ་ཏཾ དྭི་དྷཱ པཱ་ཀ-ཀྲི་ཡཱ ཏ་ཏྠཱ་དི བྷཱུ་མི་ཏོ;
ཙ་ཏུ་དྷཱ ཀཱ་མ་པཱ་ཀེ་ཏྠ, པུ་ཉྙ་པཱ་ཀཱ་དི་ཏོ དུ་དྷཱ.
༡༤༦. པུ་ཉྙ་པཱ་ཀཱ དྭི་དྷཱ་ཧེ་ཏུ-ས་ཧེ་ཏཱུ་ཏི དྭི་ར་ཊྛ་ཀཱ;
ཨ་ཧེ་ཏཱུ པ་ཉྩ ཉཱ་ཎཱ་ནི, ག་ཧ་ཎཾ ཏཱི་ར་ཎཱ ཨུ་བྷོ.
༡༤༧. ཀཱ་ཡ་ཉཱ་ཎཾ སུ་ཁཱི ཏ་ཏྠ, སོ་མ་ན་སྶཱ་དི ཏཱི་ར་ཎཾ;
སོ་པེ་ཀྑཱ་ནི ཚ སེ་སཱ་ནི, ས་པུ་ཉྙཾ་ཝ ས་ཧེ་ཏུ་ཀཾ.
༡༤༨. ཀེ་ཝ་ལཾ ས་ནྡྷི་བྷ་ཝ་ངྒ-ཏ་དཱ་ལ་མྦ་ཙུ་ཏི་བྦ་སཱ;
ཛཱ་ཡ་ཏེ སེ་ས་མེ་ཏ་སྶ, པུ་བྦེ ཝུ་ཏྟ་ན་ཡཱ ན་ཡེ.
༡༤༩. མ་ནུ་སྶ་ཝི་ནི་པཱ་ཏཱི་ནཾ, ས་ནྡྷཱ་དི ཨ་ནྟ་ཏཱི་ར་ཎཾ;
ཧོ་ཏི ཨ་ཉྙེ་ན ཀ་མྨེ་ན, ས་ཧེ་ཏུ་པི ཨ་ཧེ་ཏུ་ནཾ.
༡༥༠. པཱ་པ་ཛཱ པུ་ཉྙ་ཛཱ་ཧེ་ཏུ-ས་མཱ ཏཱི་རཾ ཝི་ནཱ་དི་ཀཾ;
ས་དུ་ཀྑཾ ཀཱ་ཡ་ཝི་ཉྙཱ་ཎཾ, ཨ་ནི་ཊྛཱ་ར་མྨ་ཎཱ ཨི་མེ.
༡༥༡. ཏེ སཱ་ཏ་གོ་ཙ་རཱ ཏེ་སུ, དྭི་ཊྛཱ་ནཾ ཨཱ་དི་ཏཱི་ར་ཎཾ;
པ་ཉྩ་ཊྛཱ་ནཱ་པ་རཱ དྭེ ཏེ, པ་རི་ཏྟ་ཝི་ས་ཡཱ་ཁི་ལཱ.
༡༥༢. ས་མྤ་ཊི་ཙྪ་དྭི་པ་ཉྩ་ནྣཾ, པ་ཉྩ རཱུ་པཱ་ད་ཡོ ཏ་ཧིཾ;
པ་ཙྩུ་པྤ་ནྣཱ་ཝ སེ་སཱ་ནཾ, པཱ་ཀཱ་ནཾ ཚ ཏི་ཀཱ་ལི་ཀཱ.
༡༥༣. རཱུ་པཱ་རཱུ་པ་ཝི་པཱ་ཀཱ་ནཾ, ས་བྦ་སོ ས་དི་སཾ ཝ་དེ;
ས་ཀ་པུ་ཉྙེ་ན ས་ནྡྷཱ་དི-ས་ཀི་ཙྩ་ཏྟ་ཡ་ཏཾ ཝི་ནཱ.
༡༥༤. ས་མཱ་ནུ་ཏྟ་ར་པཱ་ཀཱ་པི, ས་ཀ་པུ་ཉྙེ་ན ས་བྦ་སོ;
ཧི་ཏྭཱ མོ་ཀྑ་མུ་ཁཾ ཏཾ ཧི, དྭི་དྷཱ མ་གྒེ ཏི་དྷཱ ཕ་ལེ.
༡༥༥. ཀྲི་ཡཱ ཏི་དྷཱ་མ་ལཱ་བྷཱ་ཝཱ,
བྷཱུ་མི་ཏོ ཏ་ཏྠ ཀཱ་མི་ཀཱ;
དྭི་དྷཱ ཧེ་ཏུ་ས་ཧེ་ཏཱུ་ཏི,
ཏི་དྷཱ་ཧེ་ཏུ ཏ་ཧིཾ ཀ་ཐཾ.
༡༥༦. ཨཱ་ཝ་ཛྫ་ཧ་སི་ཏཱ་ཝ་ཛྫཱ, སོ་པེ་ཀྑ་སུ་ཁུ་པེ་ཀྑ་ཝཱ;
པ་ཉྩ་ཚ་ཀཱ་མཱ་ཝ་ཙ་རཱ, ས་ཀ་ལཱ་ར་མྨ་ཎཱ ཙ ཏེ.
༡༥༧. ས་ཧེ་ཏུ་རཱུ་པ་རཱུ་པཱ ཙ, ས་ཀ་པ་ཉྙཾ་ཝཱ་ར་ཧ་ཏོ;
ཝུ་ཏྟི་ཡཱ ན ཕ་ལེ པུ་པྥཾ, ཡ་ཐཱ ཚི་ནྣ་ལ་ཏཱ ཕ་ལཾ.
༡༥༨. ཨ་ནཱ་སེ་ཝ་ན་ཡཱ་ཝ་ཛྫ-དྭ་ཡཾ པུ་ཐུ་ཛྫ་ན་སྶ ཧི;
ན ཕ་ལེ ཝ་ཏྟ་མཱ་ན་མྤི, མོ་གྷ་པུ་པྥཾ ཕ་ལཾ ཡ་ཐཱ.
༡༥༩. ཏི་ས་ཏྟ དྭི་ཚ ཚ་ཏྟིཾ་ས, ཙ་ཏུ་པ་ཉྩ ཡ་ཐཱ་ཀྐ་མཾ;
པུ་ཉྙཾ པཱ་པཾ ཕ་ལཾ ཀྲི་ཡཱ, ཨེ་ཀཱུ་ན་ན་ཝུ་ཏཱི་ཝི་དྷཾ.
༡༦༠. ས་ནྡྷི བྷ་ཝ་ངྒ་མཱ་ཝ་ཛྫཾ, ད་སྶ་ནཱ་དི་ཀ་པ་ཉྩ་ཀཾ;
ག་ཧ་ཏཱི་ར་ཎ་ཝོ་ཊྛ་བྦ-ཛ་ཝ་ཏ་གྒོ་ཙ་རཾ ཙུ་ཏི.
༡༦༡. ཨི་ཏི ཨེ་སཾ དྭི་ས་ཏྟ་ནྣཾ, ཀི་ཙྩ་ཝུ་ཏྟི་ཝ་སཱ་དྷུ་ནཱ;
ཙི་ཏྟ་པྤ་ཝ་ཏྟི ཚ་དྭཱ་རེ, ས་ངྑེ་པཱ ཝུ་ཙྩ་ཏེ ཀ་ཐཾ.
༡༦༢. ཀཱ་མེ ས་རཱ་གི་ནཾ ཀ་མྨ-ནི་མི་ཏྟཱ་དི ཙུ་ཏི་ཀྑ་ཎེ;
ཁཱ་ཡ་ཏེ མ་ན་སོ་ཡེ་ཝ, སེ་སཱ་ནཾ ཀ་མྨ་གོ་ཙ་རོ.
༡༦༣. ཨུ་པ་ཊྛི་ཏཾ ཏ་མཱ་ར་བྦྷ, པ་ཉྩ་ཝཱ་རཾ ཛ་ཝོ བྷ་ཝེ;
ཏ་དཱ་ལ་མྦཾ ཏ་ཏོ ཏ་མྷཱ, ཙུ་ཏི ཧོ་ཏི ཛ་ཝེ་ཧི ཝཱ.
༡༦༤. ཨ་ཝི་ཛྫཱ་ཏ་ཎྷཱ་ས་ངྑཱ་ར-ས་ཧ་ཛེ་ཧི ཨ་པཱ་ཡི་ནཾ;
ཝི་ས་ཡཱ་དཱི་ན་ཝ་ཙྪཱ་དི-ན་མ་ན་ཀྑི་པ་ཀེ་ཧི ཏུ.
༡༦༥. ཨ་པྤ་ཧཱི་ནེ་ཧི སེ་སཱ་ནཾ, ཚཱ་ད་ནཾ ན་མ་ན་མྤི ཙ;
ཁི་པ་ཀཱ པ་ན ས་ངྑཱ་རཱ, ཀུ་ས་ལཱ་ཝ བྷ་ཝ་ནྟི་ཧ.
༡༦༦. ཀི་ཙྩ་ཏྟ་ཡེ ཀ་ཏེ ཨེ་ཝཾ, ཀ་མྨ་དཱི་པི་ཏ་གོ་ཙ་རེ;
ཏ་ཛྫཾ ཝ་ཏྠུཾ ས་ཧུ་པྤ་ནྣཾ, ནི་སྶཱ་ཡ ཝཱ ན ཝཱ ཏ་ཧིཾ.
༡༦༧. ཏ་ཛྫཱ ས་ནྡྷི སི་ཡཱ ཧི་ཏྭཱ, ཨ་ནྟ་ར་ཏྟཾ བྷ་ཝ་ནྟ་རེ;
ཨ་ནྟ་ར་ཏྟཾ ཝི་ནཱ དཱུ་རེ, པ་ཊི་ས་ནྡྷི ཀ་ཐཾ བྷ་ཝེ.
༡༦༨. ཨི་ཧེ་ཝ ཀ་མྨ་ཏ་ཎྷཱ་དི-ཧེ་ཏུ་ཏོ པུ་བྦ་ཙི་ཏྟ་ཏོ;
ཙི་ཏྟཾ དཱུ་རེ སི་ཡཱ དཱི་པ-པ་ཊི་གྷོ་སཱ་དི་ཀཾ ཡ་ཐཱ.
༡༦༩. ནཱ་ས་ཉྙཱ ཙ་ཝ་མཱ་ན་སྶ, ནི་མི་ཏྟཾ ན ཙུ་ཏཱི ཙ ཡཾ;
ཨུ་དྡྷཾ ས་ནྡྷི་ནི་མི་ཏྟཾ ཀིཾ, པ་ཙྩ་ཡོ་པི ཀ་ན་ནྟ་རོ.
༡༧༠. པུ་བྦ་བྷ་ཝེ ཙུ་ཏི དཱ་ནི, ཀཱ་མེ ཛཱ་ཡ་ན་ས་ནྡྷི་ཡཱ;
ཨ་ཉྙ་ཙི་ཏྟ་ནྟ་རཱ་བྷཱ་ཝཱ, ཧོ་ཏཱ་ན་ནྟ་ར་ཀཱ་ར་ཎཾ.
༡༧༡. བྷ་ཝ་ནྟ་ར་ཀ་ཏཾ ཀ་མྨཾ, ཡ་མོ་ཀཱ་སཾ ལ་བྷེ ཏ་ཏོ;
ཧོ་ཏི སཱ ས་ནྡྷི ཏེ་ནེ་ཝ, ཨུ་པ་ཊྛཱ་པི་ཏ་གོ་ཙ་རེ.
༡༧༢. ཡ་སྨཱ ཙི་ཏྟ་ཝི་རཱ་ག་ཏྟཾ, ཀཱ་ཏུཾ ནཱ་ས་ཀྑི ས་བྦ་སོ;
ཏ་སྨཱ སཱ་ནུ་ས་ཡ་སྶེ་ཝ, པུ་ནུ་པྤ་ཏྟི སི་ཡཱ བྷ་ཝེ.
༡༧༣. པ་ཉྩ་དྭཱ་རེ སི་ཡཱ ས་ནྡྷི, ཝི་ནཱ ཀ་མྨཾ དྭི་གོ་ཙ་རེ;
བྷ་ཝ་ས་ནྡྷཱ་ན་ཏོ ས་ནྡྷི, བྷ་ཝ་ངྒཾ ཏཾ ཏ་ད་ངྒ་ཏོ.
༡༧༤. ཏ་མེ་ཝ་ནྟེ ཙུ་ཏི ཏ་སྨིཾ, གོ་ཙ་རེ ཙ་ཝ་ནེ་ན ཏུ;
ཨེ་ཀ་ས་ནྟ་ཏི་ཡཱ ཨེ་ཝཾ, ཨུ་པྤ་ཏྟི་ཊྛི་ཏི་བྷེ་ད་ཀཱ.
༡༧༥. ཨ་ཐ་ཉྙཱ་ར་མྨ་ཎཱ་པཱ་ཐ-ག་ཏེ ཙི་ཏྟ་ནྟ་ར་སྶ ཧི;
ཧེ་ཏུ་ས་ངྑྱཾ བྷ་ཝ་ངྒ་སྶ, དྭི་ཀྑ་ཏྟུཾ ཙ་ལ་ནཾ བྷ་ཝེ.
༡༧༦. གྷ་ཊྚི་ཏེ ཨ་ཉྙ་ཝ་ཏྠུ་མྷི, ཨ་ཉྙ་ནི་སྶི་ཏ་ཀ་མྤ་ནཾ;
ཨེ་ཀཱ་བ་དྡྷེ་ན ཧོ་ཏཱི་ཏི, ས་ཀྑ་རོ་པ་མ་ཡཱ ཝ་དེ.
༡༧༧. མ་ནོ་དྷཱ་ཏུ་ཀྲི་ཡཱ་ཝ་ཛྫཾ, ཏ་ཏོ ཧོ་ཏི ས་ཀིཾ བྷ་ཝེ;
ད་སྶ་ནཱ་དི ས་ཀ་དྭཱ་ར-གོ་ཙ་རོ ག་ཧ་ཎཾ ཏ་ཏོ.
༡༧༨. ས་ནྟཱི་ར་ཎཾ ཏ་ཏོ ཏ་མྷཱ, ཝོ་ཊྛ་བྦ་ཉྩ ས་ཀིཾ ཏ་ཏོ;
ས་ཏྟ་ཀྑ་ཏྟུཾ ཛ་ཝོ ཀཱ་མེ, ཏ་མྷཱ ཏ་ད་ནུ་རཱུ་པ་ཏོ.
༡༧༩. ཏ་དཱ་ལ་མྦ་དྭི་ཀཾ ཏ་མྷཱ, བྷ་ཝ་ངྒཾ་ཏི་མ་ཧ་ནྟ་རི;
ཛ་ཝཱ མ་ཧ་ནྟེ ཝོ་ཊྛ་བྦཱ, པ་རི་ཏྟེ ནི་ཏ་རེ མ་ནཾ.
༡༨༠. ཝོ་ཊྛ་བྦ་སྶ པ་རི་ཏྟེ ཏུ, དྭ་ཏྟི་ཀྑ་ཏྟུཾ ཛ་ཝོ ཝི་ཡ;
ཝ་ད་ནྟི ཝུ་ཏྟིཾ ཏཾ པཱ་ཋེ, ཨ་ནཱ་སེ་ཝ་ན་ཏོ ན ཧི.
༡༨༡. ནི་ཡ་མོ་པི་དྷ ཙི་ཏྟ་སྶ, ཀ་མྨཱ་དི་ནི་ཡ་མོ ཝི་ཡ;
ཉེ་ཡྻོ ཨ་མྦོ་པ་མཱ་དཱི་ཧི, ད་སྶེ་ཏྭཱ ཏཾ སུ་དཱི་པ་ཡེ.
༡༨༢. མ་ནོ་དྭཱ་རེ་ཏ་རཱ་ཝ་ཛྫཾ, བྷ་ཝ་ངྒ་མྷཱ སི་ཡཱ ཏ་ཏོ;
ཛ་ཝོ་ཀཱ་མེ ཝི་བྷཱུ་ཏེ ཏུ, ཀཱ་མ་ཝ྄ཧེ ཝི་ས་ཡེ ཏ་ཏོ.
༡༨༣. ཀཱ་མཱི་ནཾ ཏུ ཏ་དཱ་ལ་མྦཾ, བྷ་ཝ་ངྒཾ ཏུ ཏ་ཏོ སི་ཡཱ;
ཨ་ཝི་བྷཱུ་ཏེ པ་རི་ཏྟེ ཙ, བྷ་ཝ་ངྒཾ ཛ་ཝ་ཏོ བྷ་ཝེ.
༡༨༤. ཨ་ཝི་བྷཱུ་ཏེ ཝི་བྷཱུ་ཏེ ཙ, པ་རི་ཏྟེ ཨ་པ་རི་ཏྟ་ཀེ;
ཛ་ཝཱ་ཡེ་ཝ བྷ་ཝ་ངྒཾ ཏུ, བྲ་ཧྨཱ་ནཾ ཙ་ཏུ་གོ་ཙ་རེ.
༡༨༥. མ་ཧ་གྒ་ཏཾ པ་ནཱ་ར་བྦྷ, ཛ་ཝི་ཏེ དོ་ས་སཾ་ཡུ་ཏེ;
ཝི་རུ་དྡྷ་ཏྟཱ བྷ་ཝ་ངྒཾ ན, ཀིཾ སི་ཡཱ སུ་ཁ་ས་ནྡྷི་ནོ.
༡༨༦. ཨུ་པེ་ཀྑཱ་ཏཱི་ར་ཎཾ ཧོ་ཏི, པ་རི་ཏྟེ་ནཱ་ཝ་ཛྫཾ ཀ་ཐཾ.
ནི་ཡ་མོ ན ཝི་ནཱ་ཝ་ཛྫཾ, མ་གྒ་ཏོ ཕ་ལ་ས་མྦྷ་ཝཱ.