༢. དུ་ཏི་ཡོ པ་རི་ཙྪེ་དོ
ཁ་ནྡྷ་ཏྟ་ཡ་ས་ངྑེ་པོ
༧༣. ཝེ་ད་ནཱནུ་བྷ་ཝོ ཏེ་དྷཱ, སུ་ཁ་དུ་ཀྑ་མུ་པེ་ཀྑ་ཡཱ;
ཨི་ཊྛཱ་ནི་ཊྛཱ་ནུ་བྷ་ཝ་ན་མ་ཛ྄ཛྷཱ་ནུ་བྷ་ཝ་ལ་ཀྑ་ཎཱ.
༧༤. ཀཱ་ཡི་ཀཾ མཱ་ན་སཾ དུ་ཀྑཾ, སུ་ཁོ་པེ་ཀྑཱ ཙ ཝེ་ད་ནཱ;
ཨེ་ཀཾ མཱ་ན་ས་མེ་ཝེ་ཏི, པ་ཉྩ་དྷི་ནྡྲི་ཡ་བྷེ་ད་ཏོ.
༧༥. ཡ་ཐཱ ཏ་ཐཱ ཝཱ ས་ཉྙཱ་ཎཾ, ས་ཉྙཱ ས་ཏི་ནི་བ་ནྡྷ་ནཾ;
ཚ་དྷཱ ཚ་དྭཱ་ར་ས་མྦྷཱུ་ཏ་ཕ་སྶ་ཛཱ་ནཾ ཝ་སེ་ན སཱ.
༧༦. ས་ངྑཱ་རཱ ཙེ་ཏ་ནཱ ཕ་སྶོ,
མ་ན་ཀྐཱ་རཱ་ཡུ ས་ཎྛི་ཏི;
ཏ་ཀྐོ ཙཱ་རོ ཙ ཝཱ་ཡཱ་མོ,
པཱི་ཏི ཚ་ནྡོ་དྷི་མོ་ཀྑ་ཀོ.
༧༧. ས་དྡྷཱ ས་ཏི ཧི་རོ་ཏྟ་པྤཾ, ཙཱ་གོ མེ་ཏྟཱ མ་ཏི པུ་ན;
མ་ཛ྄ཛྷ་ཏྟ་ཏཱ ཙ པ་སྶ་དྡྷཱི, ཀཱ་ཡ་ཙི་ཏྟ་ཝ་སཱ དུ་ཝེ.
༧༨. ལ་ཧུ་ཏཱ མུ་དུ་ཀ་མྨ་ཉྙ་པཱ་གུ་ཉྙ་མུ་ཛུ་ཏཱ ཏ་ཐཱ;
ད་ཡཱ མུ་དཱ མི་ཙྪཱ་ཝཱ་ཙཱ, ཀ་མྨ་ནྟཱ་ཛཱི་ཝ་སཾ་ཝ་རོ.
༧༩. ལོ་བྷོ དོ་སོ ཙ མོ་ཧོ ཙ, དི་ཊྛི ཨུ་དྡྷ་ཙྩ་མེ་ཝ ཙ;
ཨ་ཧི་རཱི་ཀཾ ཨ་ནོ་ཏྟ་པྤཾ, ཝི་ཙི་ཀི་ཙྪི་ཏ་མེ་ཝ ཙ.
༨༠. མཱ་ནོ ཨི་སྶཱ ཙ མ་ཙྪེ་རཾ, ཀུ་ཀྐུ་ཙྩཾ ཐི་ན་མི་དྡྷ་ཀཾ;
ཨི་ཏི ཨེ་ཏེ་ཝ པ་ཉྙཱ་ས, ས་ངྑཱ་ར་ཀྑ་ནྡྷ་ས་ཉྙི་ཏཱ.
༨༡. བྱཱ་པཱ་རོ ཙེ་ཏ་ནཱ ཕ་སྶོ, ཕུ་ས་ནཾ ས་ར་ཎཾ ཏ་ཧིཾ;
མ་ན་ཀྐཱ་རོ པཱ་ལ་ནཱ་ཡུ, ས་མཱ་དྷི ཨ་ཝི་སཱ་ར་ཏཱ.
༨༢. ཨཱ་རོ་པ་ནཱ་ནུ་མ་ཛྫ་ཊྛཱ, ཏ་ཀྐ་ཙཱ་རཱ པ་ནཱི་ཧ་ནཱ;
ཝཱི་རི་ཡཾ པཱི་ན་ནཱ པཱི་ཏི, ཚ་ནྡོ ཏུ ཀ་ཏྟུ་ཀཱ་མ་ཏཱ.
༨༣. ཨ་དྷི་མོ་ཀྑོ ནི་ཙྪ་ཡོ ས་དྡྷཱ,
པ་སཱ་དོ ས་ར་ཎཾ ས་ཏི;
ཧི་རཱི པཱ་པ་ཛི་གུ་ཙྪཱ ཧི,
ཨོ་ཏྟ་པྤཾ ཏ་སྶ བྷཱི་རུ་ཏཱ.
༨༤. ཨ་ལ་གྒོ ཙ ཨ་ཙ་ཎྜི་ཀྐཾ, ཙཱ་གོ མེ་ཏྟཱ མ་ཏི པ་ན;
ཡཱ་ཐཱ་ཝ་བོ་དྷོ མ་ཛ྄ཛྷ་ཏྟཾ, ས་མ་ཝཱ་ཧི་ཏ་ལ་ཀྑ་ཎཾ.
༨༥. ཚ ཡུ་གཱ་ནི ཀཱ་ཡ་ཙི་ཏྟ་ད་ར་གཱ་ར་ཝ་ཐ་དྡྷ་ཏཱ-
ཨ་ཀ་མྨ་ཉྙ་ཏྟ་གེ་ལ་ཉྙ་ཀུ་ཊི་ལཱ་ནཾ ཝི་ནོ་ད་ནཱ.
༨༦. ཏཱ་ནུ་དྡྷ་ཏཱ་དི་ཐི་ནཱ་དི་དི་ཊྛཱ་དཱི་ནཾ ཡ་ཐཱ་ཀྐ་མཾ;
སེ་ས་ཀཱ་དི་ཨ་ས་དྡྷཱ་དི་མཱ་ཡཱ་དཱི་ནཾ ཝི་པ་ཀྑི་ནོ.
༨༧. དུ་ཀྑཱ་པ་ན་ཡ་ན་ཀཱ་མཱ, ད་ཡཱ མོ་དཱ པ་མོ་ད་ནཱ;
ཝ་ཙཱི་དུ་ཙྩ་རི་ཏཱ་དཱི་ནཾ, ཝི་རཱ་མོ ཝི་ར་ཏི་ཏྟ་ཡཾ.
༨༨. ལོ་བྷོ དོ་སོ ཙ མོ་ཧོ ཙ,
གེ་དྷ་ཙ་ཎྜ་མ་ན་ནྡྷ་ནཱ;
ཀ་མེ་ན དི་ཊྛི དུ་གྒཱ་ཧོ,
ཨུ་དྡྷ་ཙྩཾ བྷ་ནྟ་ཏཾ མ་ཏཾ.
༨༩. ཨ་ཧི་རཱི་ཀ་མ་ལ་ཛྫ་ཏྟཾ, ཨ་ནོ་ཏྟ་པྤ་མ་ཏཱ་ས་ཏཱ;
སཾ་ས་ཡོ ཝི་ཙི་ཀི་ཙྪཱ ཧི, མཱ་ནོ ཨུ་ནྣ་ཏི་ལ་ཀྑ་ཎོ.
༩༠. པ་ར་སྶ་ཀ་ས་མྤ་ཏྟཱི་ནཾ,
ཨུ་སཱུ་ཡཱ ཙ ནི་གཱུ་ཧ་ནཱ;
ཨི་སྶཱ་མ་ཙྪེ་ར་ཀཱ ཏཱ་པོ,
ཀ་ཏཱ་ཀ་ཏ་སྶ སོ་ཙ་ནཱ.
༩༡. ཐི་ནཾ ཙི་ཏྟ་སྶ ས་ངྐོ་ཙོ, ཨ་ཀ་མྨ་ཉྙ་ཏྟ་ཏཱ པ་ན;
མི་དྡྷ་མི་ཙྩེ་ཝ་མེ་ཏེ་སཾ, ལ་ཀྑ་ཎ་ཉྩ ན་ཡེ བུ་དྷོ.
༩༢. ཝེ་ད་ནཱ་དི་ས་མཱ་དྷ་ནྟཱ, ས་ཏྟ ས་བྦ་གས་ཉྙི་ཏཱ;
ཏ་ཀྐཱ་དི་ཨ་དྷི་མོ་ཀྑ་ནྟཱ, ཚ པ་ཀི་ཎྞ་ཀནཱ་མ་ཀཱ.
༩༣. ས་དྡྷཱ་ད་ཡོ ཝི་ར་མ་ནྟཱ, ཨ་ར་ཎཱ པ་ཉྩ་ཝཱི་ས་ཏི;
ལོ་བྷཱ་དི་མི་དྡྷ་ཀ་ནྟཱ་ནི, ས་ར་ཎཱ་ནི ཙ་ཏུ་དྡ་ས.
༩༤. ཨི་སྶཱ་མ་ཙྪེ་ར་ཀུ་ཀྐུ་ཙྩ་དོ་སཱ ཀཱ་མེ ད་ཡཱ མུ་དཱ;
ཀཱ་མེ རཱུ་པེ ཙ སེ་སཱ ཚ-ཙ་ཏྟཱ་ལཱི་ས ཏི་དྷཱ་ཏུ་ཛཱ.
༩༥. ཚ་ནྡ་ནི་ཙྪ་ཡ་མ་ཛ྄ཛྷ་ཏྟ་མ་ན་ཀྐཱ་རཱ ས་ཨུ་དྡྷ་ཝཱ;
ད་ཡཱ་དཱི པ་ཉྩ མཱ་ནཱ་དཱི, ཚ ཡེ་ཝཱ་པ་ན སོ་ལ༹་ས.
༩༦. ཚ་ནྡཱ་དཱི པ་ཉྩ ནི་ཡ་ཏཱ, ཏ་ཏྠེ་ཀཱ་ད་ས ནེ་ཏ་རཱ;
ཨ་ཧི་རཱི་ཀ་མ་ནོ་ཏྟ་པྤཾ, ལོ་ཀ་ནཱ་ས་ན་ཀཾ དྭ་ཡཾ.
༩༧. ཨེ་ཏེ དྭེ མོ་ཧུ་དྡྷ་ཙྩཱ་ཏི, ཙ་ཏྟཱ་རོ པཱ་པ་ས་བྦ་གཱ;
ལོ་ཀ་པཱ་ལ་དུ་ཀཾ ཝུ་ཏྟཾ, ཧི་རི་ཨོ་ཏྟ་པྤ་ནཱ་མ་ཀཾ.
༩༨. ཨཱ་ར་མྨ་ཎཱུ་པ་ནི་ཛ྄ཛྷཱ་ནཱ, ཛྷཱ་ན་ངྒཱ ཏ་ཀྐ་ཙཱ་ར་ཀཱ;
པཱི་ཏི ཨེ་ཀ་གྒ་ཏཱ ཙེ་ཏི, ས་ཏྟ ཝི་ཏྟི་ཏྟ་ཡེ་ན ཝེ.
༩༩. ས་དྡྷཱ ས་ཏི མ་ཏེ་ཀ་གྒ-དྷི་ཏི ལོ་ཀ་ཝི་ནཱ་ས་ཀཱ;
པཱ་ལ་ཀཱ ན་ཝ ཙེ་ཏཱ་ནི, བ་ལཱ་ནི ཨ་ཝི་ཀ་མྤ་ཏོ.
༡༠༠. ཨེ་ཏྠ ས་དྡྷཱ་དི་པ་ཉྩཱ་ཡུ, ཀ་ཏྭཱ་ཏྲ ཙ་ཏུ་དྷཱ མ་ཏིཾ;
ཝེ་ད་ནཱ་ཧི དྭི་ས་ཏྟེ་ཏེ, ཨི་ནྡྲི་ཡཱ་ནཱ་དྷི་པ་ཙྩ་ཏོ.
༡༠༡. མ་ན་རཱུ་པི་ནྡྲི་ཡེ་ཧེ་ཏེ, ས་བྦེ ཨི་ནྡྲི་ཡནཱ་མ་ཀཱ;
བཱ་ཝཱི་ས་ཏི བྷ་ཝ་ནྟཱ་ཡུ་དྭ་ཡཾ ཀ་ཏྭེ་ཀ་ས་ངྒ་ཧཾ.
༡༠༢. དི་ཊྛཱི་ཧེ་ཀ་གྒ་ཏཱ་ཏ་ཀྐ་ས་ཏཱི་ཝི་ར་ཏི་ཡོ པ་ཐཱ;
ཨ་ཊྛ ནི་ཡྻཱ་ན་ཏོ ཨཱ་དི་ཙ་ཏུ་རོ བྷི་ཏྭཱ་ན དྭཱ་ད་ས.
༡༠༣. ཕ་སྶོ ཙ ཙེ་ཏ་ནཱ ཙེ་ཝ,
དྭེ་ཝེ་ཏྠཱ་ཧཱ་ར་ཎ་ཏྟ་ཏོ;
ཨཱ་ཧཱ་རཱ མ་ན་ཝོ་ཛཱ་ཧི,
བྷ་ཝ་ནྟི ཙ་ཏུ་རོ་ཐ་ཝཱ.
༡༠༤. ཧེ་ཏུ མཱུ་ལ་ཊྛ་ཏོ པཱ་པེ,
ལོ་བྷཱ་དི་ཏྟ་ཡ་མཱི་རི་ཏཾ;
ཀུ་ས་ལཱ་བྱཱ་ཀ་ཏེ ཙཱ་པི,
ཨ་ལོ་བྷཱ་དི་ཏྟ་ཡཾ ཏ་ཐཱ.
༡༠༥. དི་ཊྛི་ལོ་བྷ་དུ་སཱ ཀ་མྨ་པ་ཐཱ་པཱ་ཡ་སྶ མ་གྒ་ཏོ;
ཏ་བྦི་པ་ཀྑཱ སུ་ག་ཏི་ཡཱ, ཏ་ཡོ་ཏི ཚ པ་ཐཱི་རི་ཏཱ.
༡༠༦. པ་སྶ་དྡྷཱ་དི་ཡུ་གཱ་ནི ཚ, ཝ་གྒ་ཏྟཱ ཡུ་ག་ལཱ༹་ནི ཏུ;
ཨུ་པ་ཀཱ་རཱ ས་ཏི དྷཱི ཙ, བ་ཧཱུ་པ་ཀཱ་ར་བྷཱ་ཝ་ཏོ.
༡༠༧. ཨོ་གྷཱཧ་ར་ཎ་ཏོ ཡོ་གཱ,
ཡོ་ཛ་ནེ་ནཱ་བྷ་ཝ་གྒ་ཏོ;
ས་ཝ་ནེ་ནཱས་ཝཱ དི་ཊྛི-
མོ་ཧེ་ཛེ་ཏྠ དུ་དྷཱ ལུ་བྷོ.
༡༠༨. ད་ལ༹ྷ་གྒཱ་ཧེ་ན དི་ཊྛེ་ཛཱ, ཨུ་པཱ་དཱ་ནཾ ཏི་དྷཱ ཏ་ཧིཾ;
དི་ཊྛི དོ་སེ་ན ཏེ ག་ནྠཱ, ག་ནྠ་ཏོ དི་ཊྛི་ཧ དྭི་དྷཱ.
༡༠༩. པ་ཉྩཱ་ཝ་ར་ཎ་ཏོ ཀཱ་མ-ཀ་ངྑཱ་དོ་སུ་དྡྷ་ཝཾ ཏ་པོ;
ཐི་ན་མི་དྡྷ་ཉྩ མོ་ཧེ་ན, ཚ ཝཱ ནཱི་ཝ་ར་ཎཱ་ནིཐ.
༡༡༠. ཀ་ཏྭཱ ཏཱ་པུ་དྡྷ་ཝཾ ཨེ་ཀཾ, ཐི་ན་མི་དྡྷ་ཉྩ ཝུ་ཙྩ་ཏི;
ཀི་ཙྩ་སྶཱ་ཧཱ་ར་ཏོ ཙེ་ཝ, ཝི་པ་ཀྑ་སྶ ཙ ལེ་ས་ཏོ.
༡༡༡. དི་ཊྛེ་ཛུ་དྡྷ་ཝ་དོ་ས་ནྡྷ-
ཀ་ངྑཱ་ཐི་ནུ་ཎྞ་ཏཱི ད་ས;
ལོ་ཀ་ནཱ་ས་ཡུ་གེ་ནེ་ཏེ,
ཀི་ལེ་སཱ ཙི་ཏྟ་ཀླེ་ས་ཏོ.
༡༡༢. ལོ་བྷ་དོ་ས་མཱུ་ཧ་མཱ་ན-དི་ཊྛི་ཀ་ངྑི་སྶ་མ་ཙྪ་རཱ;
སཾ་ཡོ་ཛ་ནཱ་ནི དི་ཊྛེ་ཛཱ, བྷི་ཏྭཱ བ་ནྡྷ་ན་ཏོ དུ་དྷཱ.
༡༡༣. ཏཱ་ནི མོ་ཧུ་དྡྷ་ཝཾ་མཱ་ན་ཀ་ངྑཱ་དོ་སེ་ཛ་དི་ཊྛི་ཡོ;
དུ་དྷཱ་དི་ཊྛི ཏི་དྷཱ ལོ་བྷཾ, བྷི་ཏྭཱ སུ་ཏྟེ ད་སཱི་རི་ཏཱ.
༡༡༤. དི་ཊྛི་ལོ་བྷ་མཱུ་ཧ་མཱ་ན་དོ་ས་ཀ་ངྑཱ ཏ་ཧིཾ དུ་དྷཱ;
ཀ་ཏྭཱ ལོ་བྷ་མི་མེ ས་ཏྟཱནུ་ས་ཡཱ ས་མུ་དཱི་རི་ཏཱ.
༡༡༥. དི་ཊྛི ཨེ་ཝ པ་རཱ་མཱ་སོ, ཉེ་ཡྻོ ཨེ་ཝཾ ས་མཱ་ས་ཏོ;
ཨ་ཏྠོ ས་ངྑཱ་ར་ཀྑ་ནྡྷ་སྶ, ཝུ་ཏྟོ ཝུ་ཏྟཱ་ནུ་སཱ་ར་ཏོ.
ཨི་ཏི ས་ཙྩ་ས་ངྑེ་པེ ཁ་ནྡྷ་ཏྟ་ཡ་ས་ངྑེ་པོ ནཱ་མ
དུ་ཏི་ཡོ པ་རི་ཙྪེ་དོ.