ཙ་ཏུ་ཏྠོ པ་རི་ཙྪེ་དོ
༤. ཝཱི་ཐི་པ་རི་ཀ་མྨ་ཀ་ཐཱ
༡༢༦. པ་ཋ་མཱ་ཝ་ཛྫ་ནཾ པ་ཉྩ-ད་ས་ནྣཾ པ་ར་ཏོ བྷ་ཝེ;
དུ་ཏི་ཡཱ་ཝ་ཛྫ་ནཾ ཧོ་ཏི, ཨེ་ཀ་ཝཱི་ས་ཏི་ཏོ པ་རཾ.
༡༢༧. ཨེ་ཀ་མྷཱ པ་ཉྩ་ཝི་ཉྙཱ་ཎཾ, པ་ཉྩ་མྷཱ ས་མྤ་ཊི་ཙྪ་ནཾ;
སུ་ཁ་ས་ནྟཱི་ར་ཎཾ ཧོ་ཏི, པ་ཉྩ་ཝཱི་ས་ཏི་ཏོ པ་རཾ.
༡༢༨. ས་ཏྟ་ཏིཾ་ས་ཏི་ཏོ ཧོ་ཏི, ཨུ་པེ་ཀྑཱ་ཏཱི་ར་ཎ་དྭ་ཡཾ;
ཝོ་ཊྛ་བྦ་ན་ས་རཱུ་པཱ་ནཾ, དྭི་ནྣཾ ཀཱ་མ་ཛ་ཝཱ པ་རཾ.
༡༢༩. མ་གྒཱ་བྷི་ཉྙཱ པ་རཾ དྭི་ནྣཾ, ཏི་ཎྞ་ནྣཾ ལོ་ཀི་ཡ་པྤ་ནཱ;
ཕ་ལཱ ཙ་ཏུ་ནྣཾ པ་ཉྩ་ནྣཾ, ཨུ་པ་རི་ཊྛ་ཕ་ལ་དྭ་ཡཾ.
༡༣༠. བྷ་ཝ་ནྟི ཙ་ཏྟཱ་ལཱི་ས་མྷཱ, སུ་ཁ་པཱ་ཀཱ དྭི་ཧེ་ཏུ་ཀཱ;
ཏ་ཐེ་ཀ་ཙ་ཏྟཱ་ལཱི་ས་མྷཱ, ཨུ་པེ་ཀྑཱ་ཡ ས་མཱ་ཡུ་ཏཱ.
༡༣༡. ཧོ་ནྟི ས་ཏྟ་ཏི་ཏོ ཀཱ་མེ, སུ་ཁ་པཱ་ཀཱ ཏི་ཧེ་ཏུ་ཀཱ;
དྭཱ་ས་ཏྟ་ཏི་མྷཱ ཛཱ་ཡ་ནྟི, ཨུ་པེ་ཀྑཱ་ས་ཧི་ཏཱ པ་ན.
༡༣༢. ཨེ་ཀཱུ་ན་ས་ཊྛི་ཏོ རཱུ་པ-པཱ་ཀཱ པཱ་ཀཱ ཨ་རཱུ་པི་ནོ;
ཀ་མཱ་ཊྛ་ཙ་ཏྟཱ་ལཱི་ས་མྷཱ, ཏ་ཐེ་ཀ་དྭི་ཏི་ཧཱི་ན་ཏོ.
༡༣༣. པུ་བྦ་ས་ངྒ་ཧ་མི་ཙྩེ་ཝཾ, ཝི་ག་ཎེ་ཏྭཱ ཝི་ཙ་ཀྑ་ཎོ;
པ་ར་ས་ངྒ་ཧ་ས་ངྑྱཱ་དིཾ, ཝི་བྷཱ་ཝེ་ཡྻ ཝི་སཱ་ར་དོ.
༡༣༤. པ་ཉྩ་དྭཱ་རཱ་ཝ་ཛྫ་ན་ཏོ, ད་ས ཙི་ཏྟཱ་ནི དཱི་པ་ཡེ;
སེ་སཱ་ཝ་ཛྫ་ན་ཏོ པ་ཉྩ་ཙ་ཏྟཱ་ལཱི་ས་ནྟི བྷཱ་སི་ཏཾ.
༡༣༥. པ་ཉྩ་ཝི་ཉྙཱ་ཎ་ཏོ པཱ་པ་ཝི་པཱ་ཀཱ ས་མྤ་ཊི་ཙྪ་ནཱ;
པ་ར་མེ་ཀཾ དྭ་ཡཾ པུ་ཉྙ་ཝི་པཱ་ཀཱ ས་མྤ་ཊི་ཙྪ་ནཱ.
༡༣༦. ས་ནྟཱི་ར་ཎཱ དྭི་ཧེ་ཏུ་མྷཱ, པཱ་ཀཱ དྭཱ་ད་ས ཛཱ་ཡ་རེ;
ཏི་ཧེ་ཏུ་ཀཱ་མ་པཱ་ཀ་མྷཱ, ཨེ་ཀ་ཝཱི་ས་ཏི ལ་བྦྷ་རེ.
༡༣༧. རཱུ་པཱ་ཝ་ཙ་ར་པཱ་ཀ་མྷཱ, པ་ར་མེ་ཀཱུ་ན་ཝཱི་ས་ཏི;
ན་ཝ་ཊྛཱ་རཱུ་པ་པཱ་ཀ་མྷཱ, ས་ཏྟ ཚཱ་པི ཡ་ཐཱ་ཀྐ་མཾ.
༡༣༨. པ་ཊི་གྷ་མྷཱ ཏུ ས་ཏྟེ་ཝ, སི་ཏ་མྷཱ ཏེ་ར་སེ་རི་ཏཱ;
པཱ་པ་པུ་ཉྙ་དྭི་ཧེ་ཏུ་མྷཱ, ཨེ་ཀ་ཝཱི་ས་ཏི བྷཱ་ཝ་ཡེ.
༡༣༩. དྭི་ཧེ་ཏུ་ཀཱ་མ་ཀྲི་ཡ་ཏོ, ཨ་ཊྛཱ་ར་ས ཨུ་པེ་ཀྑ་ཀཱ;
ས་ཏྟ་ར་ས སུ་ཁོ་པེ་ཏཱ, ཝི་བྷཱ་ཝེ་ཡྻ ཝི་ཙ་ཀྑ་ཎོ.
༡༤༠. ཀཱ་མ་པུ་ཉྙ་ཏི་ཧེ་ཏུ་མྷཱ, ཏེ་ཏྟིཾ་སེ་ཝ ཨུ་པེ་ཀྑ་ཀཱ;
ཏེ་པ་ཉྙཱ་ས སུ་ཁོ་པེ་ཏཱ, བྷ་ཝ་ནྟཱི་ཏི པ་ཀཱ་སི་ཏཾ.
༡༤༡. ཏི་ཧེ་ཏུ་ཀཱ་མ་ཀྲི་ཡ་ཏོ, ཙ་ཏུ་ཝཱི་ས་ཏི་པེ་ཀྑ་ཀཱ;
སུ་ཁི་ཏ་མྷཱ ཏུ དཱི་པེ་ཡྻ, པ་ཉྩ་ཝཱི་ས་ཏི པ་ཎྜི་ཏོ.
༡༤༢. ད་ས་རཱུ་པ་ཛ་ཝ་མྷེ་ཀཱ-ད་ས་དྭཱ་ད་ས ཏེ་ར་ས;
ཡ་ཐཱ་ཀྐ་མཾ པ་ཉྩ་ད་ས, ཨཱ་རུ་པྤཱ པ་རི་དཱི་པ་ཡེ.
༡༤༣. ཕ་ལ་མྷཱ ཙུ་དྡ་སེ་ཝཱ་ཧུ, མ་གྒ་མྷཱ ཏུ ས་ཀཾ ཕ་ལཾ;
པ་རཾ ས་ངྒ་ཧ་མི་ཙྩེ་ཝཾ, ཝི་ག་ཎེ་ཡྻ ཝི་སཱ་ར་དོ.
༡༤༤. པུ་བྦཱ་པ་ར་ས་མོ་དྷཱ་ན-མི་ཏི ཉ་ཏྭཱ ཏ་ཏོ པ་རཾ;
ཝ་ཏྠུ་ཝཱི་ཐི་ས་མོ་དྷཱ་ནཾ, ཡ་ཐཱ་ས་མྦྷ་ཝ་མུ་དྡི་སེ.
༡༤༥. པ་ཉྩ ཝ་ཏྠཱུ་ནི ནི་སྶཱ་ཡ, ཀ་མ་ཏོ པ་ཉྩ་མཱ་ན་སཱ;
ཏེ་ཏྟིཾ་ས པ་ན ནི་སྶཱ་ཡ, ཧ་ད་ཡཾ མཱ་ན་སཱ སི་ཡུཾ.
༡༤༦. ཀཱ་མ་པཱ་ཀ་མ་ནོ་དྷཱ་ཏུ-ཧ་སི་ཏུ་པྤཱ་ད་མཱ་ན་སཱ;
དོ་ས་མཱུ་ལཱ་ནི མ་གྒོ ཙ, རཱུ་པ་ཛ྄ཛྷཱ་ནཱ་ཝ ས་བྦ་ཐཱ.
༡༤༧. ད་སཱ་ཝ་སེ་སཱ་པུ་ཉྙཱ་ནི, ཀཱ་མ་པུ་ཉྙ་མ་ཧཱ་ཀྲི་ཡཱ;
ཝོ་ཊྛ་བྦཱ་རཱུ་པ་ཛ་ཝ་ནཾ, ས་ཏྟ ལོ་ཀུ་ཏྟ་རཱ་ནི ཙ.
༡༤༨. དྭེ་ཙ་ཏྟཱ་ལཱི་ས ཙི་ཏྟཱ་ནི, པ་ཉྩ་ཝོ་ཀཱ་ར་བྷཱུ་མི་ཡཾ;
ནི་སྶཱ་ཡ ཧ་ད་ཡཾ ཧོ་ནྟི, ཨ་རཱུ་པེ ནི་སྶ་ཡཾ ཝི་ནཱ.
༡༤༩. ཨཱ་རུ་པྤ་པཱ་ཀཱ ཙ་ཏྟཱ་རོ, ཨ་ནི་སྶཱ་ཡེ་ཏི ས་བྦ་ཐཱ;
ཝི་ཏྠཱ་རེ་ན་ཊྛ་དྷཱ བྷི་ནྣཾ, ས་ངྑེ་པཱ ཏི་ཝི་དྷཾ བྷ་ཝེ.
༡༥༠. ཏེ་ཙ་ཏྟཱ་ལཱི་ས ནི་སྶཱ་ཡ, ཨ་ནི་སྶཱ་ཡ ཙ་ཏུ་བྦི་དྷཾ;
ནི་སྶི་ཏཱ་ནི་སྶི་ཏཱ སེ་སཱ, དྭེ་ཙ་ཏྟཱ་ལཱི་ས མཱ་ན་སཱ.
༡༥༡. པ་ཉྩ ཙི་ཏྟ་པྤ་ནཱ ཧོ་ནྟི, ཀ་མེ་ནེ་ཀེ་ཀ་ཝཱི་ཐི་ཡཾ;
མ་ནོ་དྷཱ་ཏུ་ཏྟི་ཀཾ ནཱ་མ, པ་ཉྩ་དྭཱ་རི་ཀ་མཱི་རི་ཏཾ.
༡༥༢. སུ་ཁ་ཏཱི་ར་ཎ་ཝོ་ཊྛ་བྦ-པ་རི་ཏྟ་ཛ་ཝ་ནཱ པ་ན;
ཨེ་ཀ་ཏིཾ་སཱ་པི ཛཱ་ཡ་ནྟེ, ཚ་སུ ཝཱི་ཐཱི་སུ ས་མྦྷ་ཝཱ.
༡༥༣. མ་ཧཱ་པཱ་ཀཱ པ་ན་ཊྛཱ་པི, ཨུ་པེ་ཀྑཱ་ཏཱི་ར་ཎ་དྭ་ཡཾ;
ཚ་སུ དྭཱ་རེ་སུ ཛཱ་ཡ་ནྟི, ད་ས མུ་ཏྟཱ ཙ ཝཱི་ཐི་ཡཱ.
༡༥༤. ཙུ་ཏི་ས་ནྡྷི་བྷ་ཝ་ངྒཱ་ནཾ, ཝ་སཱ པཱ་ཀཱ མ་ཧ་གྒ་ཏཱ;
ན་ཝ ཝཱི་ཐི་ཝི་མུ་ཏྟཱ་ཏི, ད་ས་དྷཱ ཝཱི་ཐི་ས་ངྒ་ཧོ.
༡༥༥. ཨེ་ཀ་དྭཱ་རི་ཀ་ཙི་ཏྟཱ་ནི, པ་ཉྩ་ཚ་དྭཱ་རི་ཀཱ ཏ་ཐཱ;
ཚ་དྭཱ་རི་ཀ་ཝི་མུ་ཏྟཱ ཙ, ཝི་མུ་ཏྟཱ་ཏི ཙ ས་བྦ་ཐཱ.
༡༥༦. ཚ་ཏྟིཾ་ས ཏ་ཡེ་ཀ་ཏིཾ་ས, ད་ས ཙེ་ཝ ན་ཝེ་ཏི ཙ;
ཉ་ཏྭཱ ཝཱི་ཐི་ས་མོ་དྷཱ་ནཾ, གོ་ཙ་ར་ཉྩ ས་མུ་དྡི་སེ.
༡༥༧. ཀ་མ་ཏོ པ་ཉྩ་ཝི་ཉྙཱ་ཎཱ, ལོ་ཀུ་ཏྟ་ར་མ་ཧ་གྒ་ཏཱ;
ཨ་བྷི་ཉྙཱ་ཝ་ཛྫི་ཏཱ ས་བྦཱ, པ་ཉྩ་ཏཱ་ལཱི་ས མཱ་ན་སཱ.
༡༥༨. ཡ་ཐཱ་ས་མྦྷ་ཝ་ཏོ ཧོ་ནྟི, རཱུ་པཱ་དེ་ཀེ་ཀ་གོ་ཙ་རཱ;
པ་ཉྩ་གོ་ཙ་ར་མཱི་རེ་ནྟི, མ་ནོ་དྷཱ་ཏུ་ཏྟི་ཀཾ པ་ན.
༡༥༩. ས་ནྟཱི་ར་ཎ་མ་ཧཱ་པཱ་ཀཱ, པ་རི་ཏྟ་ཛ་ཝ་ནཱ་ནི ཙ;
ཝོ་ཊྛ་བྦ་ན་མ་བྷི་ཉྙཱ ཙ, ཏེ་ཙ་ཏྟཱ་ལཱི་ས ས་མྦྷ་ཝཱ.
༡༦༠. ཚཱ་ར་མྨ་ཎེ་སུ ཧོ་ནྟཱི་ཏི, ཨ་ཊྛ་དྷཱ ཏི་ཝི་དྷཱ པུ་ན;
ཨེ་ཀཱ་ར་མྨ་ཎ་ཙི་ཏྟཱ་ནི, པ་ཉྩ་ཚཱ་ར་མྨ་ཎཱ་ནི ཙ.
༡༦༡. ས་ངྑེ་པཱ མཱ་ན་སཱ པ་ཉྩ-ཙ་ཏྟཱ་ལཱི་ས ཏ་ཡོ ཏ་ཐཱ;
ཏེ་ཙ་ཏྟཱ་ལཱི་ས ཙེ་ཝེ་ཏི, ས་ཏྟ་དྷཱ་པི སི་ཡུཾ ཀ་ཐཾ.
༡༦༢. ཀཱ་མ་པཱ་ཀ་མ་ནོ་དྷཱ་ཏུ-ཧ་སི་ཏུ་པྤཱ་ད་མཱ་ན་སཱ;
པ་ཉྩ་ཝཱི་ས ཡ་ཐཱ་ཡོ་གཾ, པ་རི་ཏྟཱ་ར་མྨ་ཎཱ མ་ཏཱ.
༡༦༣. ཀ་སི་ཎུ་གྒྷཱ་ཊི་མཱ་ཀཱ་སཾ, པ་ཋ་མཱ་རུ་པྤ་མཱ་ན་སཾ;
ཏ་སྶེ་ཝ ན་ཏྠི་བྷཱ་ཝཾ ཏུ, ཏ་ཏི་ཡཱ་རུ་པྤ་ཀཾ ཏ་ཐཱ.
༡༦༤. ཨཱ་ལ་མྦི་ཏྭཱ པ་ཝ་ཏྟ་ནྟི, ཨཱ་རུ་པྤཱ ཀ་མ་ཏོ ཏ་ཏོ;
དུ་ཏི་ཡ་ཉྩ ཙ་ཏུ་ཏྠ་ཉྩ, ཚ མ་ཧ་གྒ་ཏ་གོ་ཙ་རཱ.
༡༦༥. ཨ་པྤ་མཱ་ཎ་ས་མ་ཉྙཱ ཏེ, ནི་བྦཱ་ནེ པ་ན གོ་ཙ་རེ;
ཨ་ཊྛ ལོ་ཀུ་ཏྟ་རཱ དྷ་མྨཱ, ནི་ཡ་མེ་ན ཝ་ཝ་ཏྠི་ཏཱ.
༡༦༦. ཀ་སི་ཎཱ་སུ་བྷ་ཀོ་ཊྛཱ་སེ,
ཨཱ་ནཱ་པཱ་ནེ ཙ ཡོ་གི་ནོ;
པ་ཊི་བྷཱ་ག་ནི་མི་ཏྟ་མྷི,
ཨ་པྤ་མ་ཉྙཱ་ནུ་ཡུ་ཉྫ་ཏོ.
༡༦༧. ས་ཏྟ་པ་ཎྞ་ཏྟི་ཡ་ཉྩེ་ཝ, རཱུ་པ་ཛ྄ཛྷཱ་ནཾ པ་ཝ་ཏྟ་ཏི;
ཡ་ཐཱ་ཝུ་ཏྟ་ནི་མི་ཏྟ་མྷི, སེ་ས་མཱ་རུ་པྤ་ཀ་ནྟི ཙ.
༡༦༨. ཨ་བྷི་ཉྙཱ་ཝ་ཛྫི་ཏཱ ཨེ་ཀ་ཝཱི་ས མ་ཧ་གྒ་ཏཱ ས་བྦཱ;
ས་བྦེ པ་ཎྞ་ཏྟི་ས་ངྑཱ་ཏེ, ན་ཝ་ཏྟ་བྦེ པ་ཝ་ཏྟ་རེ.
༡༦༩. ཛཱ་ཡ་ནྟཱ་ཀུ་ས་ལཱ ཉཱ་ཎ་ཝི་པྤ་ཡུ་ཏྟ་ཛ་ཝཱ ཏ་ཐཱ;
ཨ་པྤ་མཱ་ཎཾ ཝི་ནཱ ཝཱི་ས, པ་རི་ཏྟཱ་དཱི་སུ ཏཱི་སུ་པི.
༡༧༠. ཏི་ཧེ་ཏུ་ཀཱ་མ་པུ་ཉྙཱ་ནི, པུ་ཉྙཱ་བྷི་ཉྙཱ ཙ པ་ཉྩི་མེ;
ཙ་ཏཱུ་སུ་པི པ་ཝ་ཏྟ་ནྟི, ཨ་ར་ཧ་ཏྟ་དྭ་ཡཾ ཝི་ནཱ.
༡༧༡. ཀྲི་ཡཱ་བྷི་ཉྙཱ ཙ ཝོ་ཊྛ་བྦཾ, ཀྲི་ཡཱ་ཀཱ་མེ ཏི་ཧེ་ཏུ་ཀཱ;
ཚ ས་བྦ་ཏྠཱ་པི ཧོ་ནྟཱི་ཏི, ས་ཏྟ་དྷཱ མཱ་ན་སཱ ཋི་ཏཱ.
༡༧༢. ཨེ་ཀ་ཏི་ཙྩ་ཏུ་ཀོ་ཊྛཱ་ས་གོ་ཙ་རཱ ཏི་ཝི་དྷཱ པ་ན;
ས་མ་ས་ཊྛི ཏ་ཐཱ ཝཱི་ས, ཀ་མེ་ནེ་ཀཱ་ད་སེ་ཏི ཙ.
༡༧༣. པ་ཉྩ་དྭཱ་རེ་སུ པ་ཉྩཱ་པི, པ་ཙྩུ་པྤ་ནྣཱ་ཝ གོ་ཙ་རཱ;
ཏེ་ཀཱ་ལི་ཀཱ ན་ཝ་ཏྟ་བྦཱ, མ་ནོ་དྭཱ་རེ ཡ་ཐཱ་ར་ཧཾ.
༡༧༤. ཨ་ཛ྄ཛྷ་ཏྟཱ ཙ བ་ཧི་དྡྷཱ ཙ, པ་ཉྩ་དྭཱ་རེ་སུ གོ་ཙ་རཱ;
མ་ནོ་དྭཱ་རེ ན་ཝ་ཏྟ་བྦོ, ན་ཏྠི་བྷཱ་ཝོ་པི ལ་བྦྷ་ཏི.
༡༧༥. པ་ཉྩ་དྭཱ་རེ་སུ པ་ཉྩ་ནྣ-མེ་ཀ་མེ་ཀོ ཙ གོ་ཙ་རོ;
ཚཱ་པི ཨཱ་ར་མྨ་ཎཱ ཧོ་ནྟི, མ་ནོ་དྭཱ་ར་མྷི ས་བྦ་ཐཱ.
༡༧༦. པ་ཉྩ་དྭཱ་རེ་སུ ག་ཧི་ཏཾ, ཏ་ད་ཉྙ་མྤི ཙ གོ་ཙ་རཾ;
མ་ནོ་དྭཱ་རེ ཝ་ཝ་ཏྠཱ་ནཾ, ག་ཙྪ་ཏཱི་ཏི ཧི དེ་སི་ཏཾ.
༡༧༧. ཨ་ཏཱི་ཏཱ ཝ་ཏྟ་མཱ་ནཱ ཙ, ས་མྦྷ་ཝཱ ཀཱ་མ་ས་ནྡྷི་ཡཱ;
ཚ་དྭཱ་ར་ག་ཧི་ཏཱ ཧོ་ནྟི, ཏི་ཝི་དྷཱ ཏེ་པི གོ་ཙ་རཱ.
༡༧༨. ཀ་མྨ་ནི་མི་ཏྟ་མེ་ཝེ་ཀཾ, མ་ནོ་དྭཱ་རེ ཨུ་པ་ཊྛི་ཏཾ;
ན་ཝ་ཏྟ་བྦ་མ་ཏཱི་ཏ་ཉྩ, དྷ་མྨཱ་ར་མྨ་ཎ་ས་ངྒ་ཧཾ.
༡༧༩. ཨཱ་ལ་མྦི་ཏྭཱ ཡ་ཐཱ་ཡོ་གཾ, པ་ཊི་ས་ནྡྷི་མ་ཧ་གྒ་ཏཱ;
ཨ་ནྟེ ཙུ་ཏི བྷ་ཝེ མ་ཛ྄ཛྷེ, བྷ་ཝ་ངྒ་མྤི པ་ཝ་ཏྟ་ཏཱི་ཏི.
ཨི་ཏི ཙི་ཏྟ་ཝི་བྷཱ་གེ ཝཱི་ཐི་པ་རི་ཀ་མྨ་ཀ་ཐཱ ནི་ཊྛི་ཏཱ.
ཙ་ཏུ་ཏྠོ པ་རི་ཙྪེ་དོ.