༢༥. ཝི་པ་སྶ་ནཱ་ཝུ་དྡྷི་ཀ་ཐཱ
༩༨༡. སཱི་ལ་ཙི་ཏྟ་དི་ཊྛི་ཀ་ངྑཱ་ཝི་ཏ་ར་ཎ་ཝི་སུ་དྡྷི་ཡོ;
པ་ཏྭཱ ཀ་ལཱ་པ་ཏོ ཏཱ་ཝ, ས་མྨ་སེ་ཡྻ ཏ་ཏོ པ་རཾ.
༩༨༢. ཀ་ལཱ་པ་ཏོ ས་མྨ་ས་ནཾ, ཨུ་ད་ཡ་བྦ་ཡ་ད་སྶ་ནཾ;
བྷ་ངྒ་ཉཱ་ཎཾ བྷ་ཡ་ཉཱ་ཎཾ, ཏ་ཐཱ་དཱི་ན་ཝ་ནི་བྦི་དཱ.
༩༨༣. མུ་ཙྩི་ཏུ་ཀ་མྱ་ཏཱ་ཉཱ་ཎཾ, པ་ཊི་ས་ངྑཱ་ནུ་པ་སྶ་ནཱ;
ས་ངྑཱ་རུ་པེ་ཀྑཱ་ནུ་ལོ་མ་མི་ཙྩཱ་ནུ་ཀྐ་མ་ཏོ ཋི་ཏཱ.
༩༨༤. ཝི་པ་སྶ་ནཱ་ཏི ཙ་ཀྑཱ་ཏཱ, ད་ས་ཉཱ་ཎ་པ་ར་མྤ་རཱ;
ལ་ཀྑ་ཎ་ཏྟ་ཡ་མཱ་ཧ་ཙྩ, ས་ངྑཱ་རེ་སུ པ་ཝ་ཏྟ་ཏི.
༩༨༥. ཏ་སྨཱ ཀ་ལཱ་པ་ཏོ ཏཱ་ཝ, ས་མྨ་སེ་ཡྻ ཏི་ལ་ཀྑ་ཎཾ;
ས་མྨ་སི་ཏྭཱ ཨ་ཏཱི་ཏཱ་དི་ཁ་ནྡྷཱ་ཡ་ཏ་ན་དྷཱ་ཏུ་ཡོ.
༩༨༦. ཨ་ནི་ཙྩཱ ཏེ ཁ་ཡ་ཊྛེ་ན, ཁ་ནྡྷཱ དུ་ཀྑཱ བྷ་ཡ་ཊྛ་ཏོ;
ཨ་ན་ཏྟཱ ཨ་སཱ་ར་ཀ་ཊྛེ་ན, ཨི་ཙྩཱ་བྷི་ཎྷཾ ཝི་ཙི་ནྟ་ཡཾ.
༩༨༧. ཏ་སྶེ་ཝཾ ས་མྨ་ས་ནྟ་སྶ, ཨུ་པ་ཊྛཱ་ཏི ཏི་ལ་ཀྑ་ཎཾ;
ས་ངྑཱ་རེ་སུ ཏ་ཏོ ཡོ་གཱི, ཁ་ཎ་ས་ནྟ་ཏི་ཨ་དྡྷ་ཏོ.
༩༨༨. པ་ཙྩུ་པྤ་ནྣཱ་ན དྷ་མྨཱ་ནཾ, ཨུ་ད་ཡ་ཉྩ ཝ་ཡཾ ཏ་ཐཱ;
པ་ཉྙཱ་སཱ་ཀཱ་ར་བྷེ་དེ་ཧི, ཨ་ནུ་པ་སྶ་ཏི ཏ་ཏྠ ཧི.
༩༨༩. ཨ་ཝི་ཛྫཱ་ཏ་ཎྷཱ་ཀ་མྨཱ་ནཾ, ཨུ་ད་ཡཱ ཙ ནི་རོ་དྷ་ཏོ;
ས་མུ་ད་ཡཱ ནི་རོ་དྷཱ ཙ, པ་ཉྩ་ནྣཾ ད་སྶི་ཏཱ ཏ་ཐཱ.
༩༩༠. རཱུ་པ་སྶཱ་ཧཱ་ར་ཏོ ཏི་ཎྞཾ, ཕ་སྶ་ཏོ ནཱ་མ་རཱུ་པ་ཏོ;
ཝི་ཉྙཱ་ཎ་སྶེ་ཏི ས་བྦེ་པི, ཙ་ཏྟཱ་ལཱི་ས ས་མི་སྶི་ཏཱ.
༩༩༡. ནི་བྦ་ཏྟི་ལ་ཀྑ་ཎཾ བྷ་ངྒ-
ལ་ཀྑ་ཎ་ཉྩེ་ཏྠ པ་སྶ་ཏོ;
ཁ་ཎ་ཏོ་ད་ཡ་ཏོ ཙེ་ཏི,
ས་མ་པ་ཉྙཱ་ས ཧོ་ནྟི ཏེ.
༩༩༢. ཨི་ཏི ཁ་ནྡྷ་མུ་ཁེ་ནེ་ཏེ, ཝི་བྷ་ཏྟཱ ཨུ་ད་ཡ་བྦ་ཡཱ;
ཨཱ་ཡ་ཏ་ནྣཱ་དི་བྷེ་དེ་ཧི, ཡོ་ཛེ་ཏ་བྦཱ ཡ་ཐཱ་ར་ཧཾ.
༩༩༣. ཨུ་ད་ཡ་ཉྩ ཝ་ཡ་ཉྩེ་ཝཾ, པ་སྶ་ཏོ ཏ་སྶ ཡོ་གི་ནོ;
ཝི་བྷཱུ་ཏཱ ཧོ་ནྟི ས་ངྑཱ་རཱ, ས་མུ་ཊྛཱ་ཏི ཏི་ལ་ཀྑ་ཎཾ.
༩༩༤. བོ་དྷི་པ་ཀྑི་ཡ་དྷ་མྨཱ ཙ,
ཏེ པ་སྶ་ནྟི ཝི་སེ་ས་ཏོ;
ཏ་ཏོ ཛཱ་ཡ་ནྟུ་པ་ཀླེ་སཱ,
ད་སོ་པ་ཀླེ་ས་ཝ་ཏྠུ་ཀཱ.
༩༩༥. ཨོ་བྷཱ་སོ པཱི་ཏི པ་སྶ་དྡྷི, ཨ་དྷི་མོ་ཀྑོ ཙ པ་གྒ་ཧོ;
སུ་ཁཾ ཉཱ་ཎ་མུ་པ་ཊྛཱ་ནཾ, ཨུ་པེ་ཀྑཱ ཙ ནི་ཀ་ནྟི ཙ.
༩༩༦. ཏ་ཎྷཱ་མཱ་ན་དི་ཊྛི་གྒཱ་ཧ་ཝ་སེ་ན ཏི་ཝི་དྷེ་པི ཏེ;
ཨ་སྶཱ་དེ་ནྟོ ཨུ་ནྣ་མ་ནྟོ, མ་མཱ་ཡ་ནྟོ ཀི་ལི་སྶ་ཏི.
༩༩༧. མ་གྒཾ ཕ་ལ་ཉྩ ནི་བྦཱ་ནཾ, པ་ཏྟོ་སྨཱི་ཏི ཨ་ཀོ་ཝི་དོ;
ཝེ་ཀྑ་བུ་ཛ྄ཛྷཱ་ཏི མ་ཉྙ་ནྟོ, པ་པྤོ་ཏི ཨ་དྷི་མཱ་ནི་ཀོ.
༩༩༨. མ་གྒཱ་ད་ཡོ ན ཧོ་ནྟེ་ཏེ,
ཏ་ཎྷཱ་གཱ་ཧཱ་དི་ཝ་ཏྠུ་ཏོ;
ཏ་ཎྷཱ་མཱ་ན་དི་ཊྛི་ཡོ ཙུ་པ་ཀླེ་སཱ པ་རི་པ་ནྠ་ཀཱ.
༩༩༩. པོ་རཱ་ཎ་མེ་ཝ ཁ་ནྡྷཱ་ནཾ, ཨུ་ད་ཡ་བྦ་ཡ་ད་སྶ་ནཾ;
ཏི་ལ་ཀྑ་ཎཱ་ར་མྨ་ཎ་ཏོ, མ་གྒོ ནི་བྦཱ་ན་པ་ཙྩ་ཡོ.
༡༠༠༠. ཨི་ཏི མ་གྒཾ ཨ་མ་གྒ་ཉྩ, ཝི་སོ་དྷེ་ནྟ་སྶ སི་ཛ྄ཛྷ་ཏི;
ཝི་སུ་དྡྷི ཙ མ་གྒཱ་མ་གྒ་ཉཱ་ཎ་ད་སྶ་ནནཱ་མི་ཀཱ.
༡༠༠༡. ཏ་ཐཱ་པ་རཱ ཝི་སུ་དྡྷཱི་ནཾ, ཨུ་ད་ཡ་བྦ་ཡ་ད་སྶ་ནཾ;
ཨཱ་དིཾ ཀ་ཏྭཱ པ་ཊི་པ་དཱ་ཉཱ་ཎ་ད་སྶ་ནནཱ་མི་ཀཱ.
༡༠༠༢. པ་ཙྪཱ སཾ་ཀླེ་ས་ཝི་ཀྑེ་པ་ཝི་སུ་དྡྷ་ནྟཾ ཡ་ཐཱ པུ་རེ;
པ་ཊི་པ་ཛྫ་ཏི མེ་དྷཱ་ཝཱི, ཨུ་ད་ཡ་བྦ་ཡ་ད་སྶ་ནཾ.
༡༠༠༣. ཨི་ཏི ཁོ་ད་ཡ་བྦ་ཡཱ་ནུ་པ་སྶ་ནཱ་ཉཱ་ཎ་ཝཱི་ཐི་ཡཾ;
སི་ཀྑ་ནྟ་སྶཱ་ཙི་རེ་ནེ་ཝ, པ་རི་པ་ཀྐཱ ཝི་པ་སྶ་ནཱ.
༡༠༠༤. པ་ཧཱ་ཡོ་ད་ཡ་ཝོ་ཧཱ་རཾ, ཝ་ཡ་མེ་ཝཱ་དྷི་མུ་ཙྩ་ཏོ;
ཨུ་པྤཱ་དཱ་བྷོ་ག་མོ་ཧཱ་ཡ, བྷ་ངྒ་མེ་ཝཱ་ནུ་ཏི་ཊྛ་ཏི.
༡༠༠༥. ཏ་ཏོ ནི་ཛ྄ཛྷ་ར་དྷཱ་རཱ་ཝ, ག་ངྒཱ་ཝཱ་རོ་ད་ཀཾ ཝི་ཡ;
བྷི་ཛྫ་མཱ་ན་ཏི་ཎཱ་ནི་ཝ, པ་ཊི་པ་ཛྫཱ སི་ཁཱ ཝི་ཡ.
༡༠༠༦. པ་ཏ་ནྟེ ཙ ཝ་ཡ་ནྟེ ཙ, བྷི་ཛྫ་ནྟི་ཙྩེ་ཝ ས་ངྑ་ཏེ;
པ་སྶ་ཏོ ཏ་སྶ བྷ་ངྒཱ་ནུ་པ་སྶ་ནཱ་ཉཱ་ཎ་མཱི་རི་ཏཾ.
༡༠༠༧. ཏ་ཏོ བྷ་ཡཱ་ནུ་པ་སྶ་ནཱ, ས་བྷ་ཡཱ་ཏི ཝི་པ་སྶ་ཏོ;
ཨཱ་དཱི་ན་ཝཱ་ནུ་པ་སྶ་ནཱ-ཉཱ་ཎཾ ཨཱ་དཱི་ན་ཝཱ་ཏི ཙ.
༡༠༠༨. ནི་བྦི་དཱ་ནུ་པ་སྶ་ནཱ ཙ, ནི་བྦི་ནྡ་ནྟ་སྶ ཡོ་གི་ནོ;
མུ་ཙྩི་ཏུ་ཀ་མྱ་ཏཱ་ཉཱ་ཎཾ, ཏ་ཏོ མུ་ཙྩི་ཏུ་མི་ཙྪ་ཏོ.
༡༠༠༩. ནི་ཙྩཱ ཙེ ན ནི་རུ་ཛ྄ཛྷེ་ཡྻ, ན བཱ་དྷེ་ཡྻ སུ་ཁཱ ཡ་དི;
ཝ་སེ ཝ་ཏྟེ་ཡྻ ཨ་ཏྟཱ ཙེ, ཏ་ད་བྷཱ་ཝཱ ན ཏེ ཏ་ཐཱ.
༡༠༡༠. སུ་ཊྛུ མུ་ཙྩི་ཏུ་མི་ཙྩེ་ཝཾ, པ་ཊི་པ་ཙྩ་ཀྑ་ཏོ ཏ་ཏོ;
པ་ཊི་ས་ངྑཱ་ནུ་པ་སྶ་ནཱ-ཉཱ་ཎཾ ཛཱ་ཏ་ནྟི ཝུ་ཙྩ་ཏི.
༡༠༡༡. སཱ་དྷུ་ཀཾ པ་ཊི་ས་ངྑཱ་ཡ, ས་ངྑཱ་རེ་སུ ཏི་ལ་ཀྑ་ཎཾ;
སུ་པ་རི་ཉྙཱ་ཏ་ས་ངྑཱ་རེ, ཏ་ཐེ་ཝ པ་ཊི་པ་སྶ་ཏི.
༡༠༡༢. ཨ་ནི་ཙྩཱ དུ་ཀྑཱ་ན་ཏྟཱ ཙ, ས་ངྑཱ་རཱ་ཝ ན ཙཱ་པ་རོ;
ཨ་ཏྟཱ ཝཱ ཨ་ཏྟ་ནཱི་ཡཾ ཝཱ, ནཱ་ཧཾ ན ཏུ མ་མཱ་ཏི ཙ.
༡༠༡༣. ཏ་ཏོ་ཝ ཏ་ཏྠ མ་ཛ྄ཛྷ་ཏྟོ, ན་ནྡི་རཱ་ག་ཝི་ནི་སྶ་ཊོ;
ཨ་ཏྟ་ཏྟ་ནི་ཡ་བྷཱ་ཝེ་ན, ས་ངྑཱ་རེ་སྭ་ཛ྄ཛྷུ་པེ་ཀྑ་ཏི.
༡༠༡༤. ས་ངྑཱ་རུ་པེ་ཀྑཱ་ས་ངྑཱ་ཏཾ, ཉཱ་ཎཾ ཏ་སྶ ཨི་ཏཱི་རི་ཏཾ;
ཏ་ཏོ ཝུ་ཊྛཱ་ན་གྷ་ཊི་ཏཾ, ཨ་ནུ་ལོ་མ་ནྟི ཝུ་ཙྩ་ཏི.
༡༠༡༥. སུ་པ་རི་ཉྙཱ་ཏ་ས་ངྑཱ་རེ, སུ་ས་མྨ་ཊྛ་ཏི་ལ་ཀྑ་ཎེ;
ཨུ་པེ་ཀྑ་ནྟ་སྶ ཏ་སྶེ་ཝ, སི་ཁཱ་པ་ཏྟཱ ཝི་པ་སྶ་ནཱ.
༡༠༡༦. ས་ངྑཱ་ར་དྷ་མྨེ ཨཱ་ར་བྦྷ, ཏཱ་ཝ ཀཱ་ལཾ པ་ཝ་ཏྟ་ཏི;
ཏཱི་ར་ད་སྶཱི་ཝ ས་ཀུ་ཎོ, ཡཱ་ཝ པཱ་རཾ ན པ་སྶ་ཏི.
༡༠༡༧. ཡ་དཱ པ་སྶ་ཏི ནི་བྦཱ་ནཾ, ཝུ་ཊྛཱ་ན་ག་ཧི་ཏཱ ཏ་དཱ;
ཝུ་ཊྛཱ་ན་གཱ་མི་ནཱི ནཱ་མ, སཱ་ནུ་ལོ་མཱ པ་ཝུ་ཙྩ་ཏི.
༡༠༡༨. ཨི་ཏི དྭཱི་ཧི ཝི་སུ་དྡྷཱི་ཧི, ཝི་སུ་དྡྷཱ་ཡ ཝི་པ་སྶ་ཏོ;
ཝི་པ་སྶ་ནཱ་པ་ཊི་པ་དཾ, པཱུ་རེ་ཏཱི་ཏི པ་ཝུ་ཙྩ་ཏཱི་ཏི.
ཨི་ཏི ནི་བྦཱ་ན་ཝི་བྷཱ་གེ ཝི་པ་སྶ་ནཱ་ཝུ་དྡྷི་ཀ་ཐཱ ནི་ཊྛི་ཏཱ.
པ་ཉྩ་ཝཱི་ས་ཏི་མོ པ་རི་ཙྪེ་དོ.