སོ་ལ༹་ས་མོ པ་རི་ཙྪེ་དོ
༡༦. ཙི་ཏྟུ་པྤཱ་ད་ཀ་ཐཱ
༥༣༣. ཙི་ཏྟུ་པྤཱ་དེ་སུ དྷ་མྨཱ་ནཾ, ཨི་ཏི ཉ་ཏྭཱ ཝི་ནི་ཙྪ་ཡཾ;
ཙི་ཏྟུ་པྤཱ་དཱ་ན་མེ་ཝཱ་ཐ, ཉཱ་ཏ་བྦོ བྷེ་ད་ས་ངྒ་ཧོ.
༥༣༤. ཝེ་ད་ནཱ་ཧཱ་ར་ཏོ ཙེ་ཝ, ཧེ་ཏཱ་དྷི་པ་ཏི་ཏོ ཏ་ཐཱ;
ཛྷཱ་ནི་ནྡྲི་ཡ་མ་གྒ་བ་ལཱ, ཡེ་ཝཱ་པ་ན་པ་ཐཱ་དི་ཏོ.
༥༣༥. ཏ་ཏྠ སུ་ཁཱ ཙ དུ་ཀྑཱ ཙ, ཨ་དུ་ཀྑ་མ་སུ་ཁཱ་ཏི ཙ;
ཏི་སྶོ ཙ ཝེ་ད་ནཱ ཝུ་ཏྟཱ, ས་མྦྷོ་ག་ཏྠ་ཝི་སེ་ས་ཏོ.
༥༣༦. སུ་ཁཾ དུ་ཀྑཾ སོ་མ་ན་སྶཾ, དོ་མ་ན་སྶ་མ་ཐཱ་པ་རཾ;
ཨུ་པེ་ཀྑི་ནྡྲི་ཡ་མི་ཙྩེ་ཝཾ, པ་ཉྩི་ནྡྲི་ཡ་ཝི་བྷཱ་ག་ཏོ.
༥༣༧. ཀཱ་ཡ་ཝི་ཉྙཱ་ཎ་ཡུ་ག་ལེ༹, སུ་ཁ་དུ་ཀྑཱ ཧི ཝེ་ད་ནཱ;
སོ་མ་ན་སྶཾ དོ་མ་ན་སྶཾ, ཨི་ཏི ནཱ་མཾ ལ་བྷ་ནྟི ན.
༥༣༨. ཨ་ཉྙ་ཏྠ པ་ན ས་བྦ་ཏྠ, སུ་ཁཱ དུ་ཀྑཱ ཙ ཝེ་ད་ནཱ;
སོ་མ་ན་སྶཾ དོ་མ་ན་སྶཾ, ཨི་ཏི ནཱ་མཾ ལ་བྷ་ནྟི ཙ.
༥༣༩. ཨ་དུ་ཀྑི ཨ་སུ་ཁོ་པེ་ཀྑཱ, མ་ཛ྄ཛྷ་ཏྟཱ་ཏི ཙ ཝེ་ད་ནཱ;
པ་ཉྩ་པ་ཉྙཱ་ས་ཙི་ཏྟེ་སུ, ཏ་ད་ཉྙེ་སུ པ་ཀཱ་སི་ཏཱ.
༥༤༠. སུ་ཁ་དུ་ཀྑི་ནྡྲི་ཡ་ཡུ་ཏྟཾ, ཀཱ་ཡ་ཝི་ཉྙཱ་ཎ་ཀ་དྭ་ཡཾ;
དོ་མ་ན་སྶི་ནྡྲི་ཡ་ཡུ་ཏྟཾ, པ་ཊི་གྷ་དྭ་ཡ་མཱ་ན་སཾ.
༥༤༡. ཨ་ཊྛཱ་ར་ས པ་རི་ཏྟཱ་ནི, ཙ་ཏུ་ཀྐ་ཛ྄ཛྷཱ་ན་མཱ་དི་ཏོ;
སོ་མ་ན་སྶི་ནྡྲི་ཡ་ཡུ་ཏྟཱ, དྭཱ་ས་ཊྛི་ཝི་དྷ མཱ་ན་སཱ.
༥༤༢. དྭ་ཏྟིཾ་ས ཙ པ་རི་ཏྟཱ་ནི, ཏེ་ཝཱི་ས ཛྷཱ་ན་པ་ཉྩ་མཱ;
ཧོ་ནྟི་པེ་ཀྑི་ནྡྲི་ཡ་ཡུ་ཏྟཱ, པ་ཉྩ་པ་ཉྙཱ་ས མཱ་ན་སཱ.
༥༤༣. སུ་ཁ་ཡུ་ཏྟཱ ཏུ ཏེ་ས་ཊྛི, དུ་ཀྑ་ཡུ་ཏྟཱ ཏ་ཡོ ཏ་ཧིཾ;
ཨ་དུ་ཀྑ་མ་སུ་ཁ་ཡུ་ཏྟཱ, པ་ཉྩ་པ་ཉྙཱ་སུ་པེ་ཀྑ་ཀཱ.
༥༤༤. ཨོ་ཛ་ཊྛ་མ་ཀ་རཱུ་པ་ཉྩ, ཝེ་ད་ནཾ ས་ནྡྷི་མཱ་ན་སཾ;
ནཱ་མ་རཱུ་པ་ཉྩ ཀ་མ་ཏོ, ཨཱ་ཧ་ར་ནྟཱི་ཏི དེ་སི་ཏཱ.
༥༤༥. ཨཱ་ཧཱ་རཱ ཀ་བ་ལཱི༹་ཀཱ་རོ, ཕ་སྶོ ས་ཉྩེ་ཏ་ནཱ ཏ་ཐཱ;
ཝི་ཉྙཱ་ཎ་ཉྩེ་ཏི ཙ་ཏྟཱ་རོ, ཨུ་པ་ཏྠ་མྦྷཱ ཙ ས་མྦྷ་ཝཱ.
༥༤༦. ཙི་ཏྟུ་པྤཱ་དེ་སུ ས་བྦ་ཏྠ,
ཨཱ་ཧཱ་རཱ་རཱུ་པི་ནོ ཏ་ཡོ;
ཀ་བ་ལཱི༹་ཀཱ་རོ ཨཱ་ཧཱ་རོ,
ཀཱ་མེ ཀཱ་ཡཱ་ནུ་པཱ་ལ་ཀོ.
༥༤༧. ཨ་ལོ་བྷོ ཙ ཨ་དོ་སོ ཙ,
ཨ་མོ་ཧོ ཙ ཏ་ཐཱ་པ་རོ;
ལོ་བྷོ དོ་སོ ཙ མོ་ཧོ ཙ,
ཧེ་ཏཱུ དྷ་མྨཱ ཚ དེ་སི་ཏཱ.
༥༤༨. ཀུ་ས་ལཱ་ཀུ་ས་ལཱ ཧེ་ཏཱུ, ཏ་ཡོ ཨ་བྱཱ་ཀ་ཏཱ་ཏི ཙ;
ན་ཝ་དྭཱ་ད་ས་དྷཱ ཏ་ཏྠ, ཝི་པཱ་ཀ་ཀྲི་ཡ་བྷེ་ད་ཏོ.
༥༤༩. ད་ས པ་ཉྩཱ་དྷི་ཀཱ ཧོ་ནྟི, བྷཱུ་མི་བྷེ་དཱ ཏ་ཏོ ཏ་ཧིཾ;
པུ་ཉྙ་པཱ་ཀ་ཀྲི་ཡཱ་བྷེ་དཱ, ཏཱ་ལཱི་ས ཙ་ཏུ་ནཱུ་ན་ཀཱ.
༥༥༠. ས་ནྟཱི་ར་ཎ་མ་ནོ་དྷཱ་ཏུ-པ་ཉྩ་ཝི་ཉྙཱ་ཎ་མཱ་ན་སེ;
ཝོ་ཊྛ་བྦ་ནེ ཙ ཧ་སི་ཏེ, ཧེ་ཏུ ནཱ་མ ན ཝི་ཛྫ་ཏི.
༥༥༡. ལོ་བྷ་མཱུ་ལེ་སུ ལོ་བྷོ ཙ,
མོ་ཧོ ཙ པ་ཊི་གྷ་དྭ་ཡེ;
དོ་སོ མོ་ཧོ ཙ ལ་བྦྷ་ནྟི,
མོ་ཧོ ཨེ་ཀོ་ཝ མོ་མུ་ཧེ.
༥༥༢. ཉཱ་ཎེ་ན ཝི་པྤ་ཡུ་ཏྟེ་སུ,
ཨ་ལོ་བྷཱ་དི་དྭ་ཡཾ བྷ་ཝེ;
ཏ་ཏོ སེ་སེ་སུ ས་བྦ་ཏྠ,
ཨ་ལོ་བྷཱ་དི་ཏ་ཡོ་པི ཙ.
༥༥༣. ཏི་ཧེ་ཏུ་ཀཱ ས་ཏྟ་ཙ་ཏྟཱ-ལཱི་ས ཧོ་ནྟི དྭི་ཧེ་ཏུ་ཀཱ;
བཱ་ཝཱི་ས དྭེ་ཀ་ཧེ་ཏུ་ཀཱ, ཨ་ཊྛཱ་ར་ས ཨ་ཧེ་ཏུ་ཀཱ.
༥༥༤. ཚ་ནྡོ ཙི་ཏྟ་ཉྩ ཝཱི་རི་ཡཾ, ཝཱི་མཾ་སཱ་ཏི ཙ་ཏུ་བྦི་དྷཱ;
ས་ཧ་ཛཱ་ཏཱ་དྷི་པཱ དྷ་མྨཱ, ཝུ་ཏྟཱདྷི་པ་ཏ་ཡོ སི་ཡུཾ.
༥༥༥. ཡ་མཱ་ལ་མྦཾ ག་རུཾ ཀ་ཏྭཱ, ནཱ་མ་དྷ་མྨཱ པ་ཝ་ཏྟ་རེ;
ཨཱ་ར་མྨ་ཎཱ་དྷི་པ་ནཱ་མེ་ན, ཏ་དཱ་ལ་མྦ་ཎ་མཱི་རི་ཏཾ.
༥༥༦. ཏི་ཧེ་ཏུ་ཀ་ཛ་ཝེ་སྭེ་ཀོ, ཙ་ཏཱུ་སུ་པི ཡ་ཐཱ་ར་ཧཾ;
དྭི་ཧེ་ཏུ་ཀེ་སུ ས་མྦྷོ་ཏི, ཝཱི་མཾ་སཱ་དྷི་པ་ཏིཾ ཝི་ནཱ.
༥༥༧. ཨ་ནུ་ཏྟ་རེ ཀཱ་མ་པུ་ཉྙེ, ཏི་ཧེ་ཏུ་ཀ་མ་ཧཱ་ཀྲི་ཡེ;
ལོ་བྷ་མཱུ་ལེ ཙ སཱ་ཝ་ཛྫེ, ལ་བྦྷ་ཏཱ་ལ་མྦ་ཎཱ་དྷི་པོ.
༥༥༨. ཏ་ཏྠ ཙཱ་ནི་ཡ་ཏཱ ཀཱ་མེ, ལ་བྦྷ་མཱ་ནཱ་པི ལ་བྦྷ་རེ;
མ་ཧ་གྒ་ཏཱ་ནུ་ཏྟ་རེ་སུ, ནི་ཡ་ཏཱ་ཝ ཡ་ཐཱ་ར་ཧཾ.
༥༥༩. ཀྲི་ཡཱ་དྭི་ཧེ་ཏུ་པ་ཊི་གྷེ,
ན་ཏྠེ་ཝཱ་ལ་མྦ་ཎཱ་དྷི་པོ;
མོ་མཱུ་ཧཱ་ཧེ་ཏུ་ཀེ པཱ་ཀེ,
ལོ་ཀི་ཡེ ཙ ན ཀོ་ཙི་པི.
༥༦༠. ཨུ་བྷ་ཡཱ་དྷི་པ་ཡུ་ཏྟཱ ཙ, ས་ཧ་ཛཱ་དྷི་པ་ཡོ་གི་ནོ;
ཨུ་བྷ་ཡཱ་ནི་ཡ་ཏཱ་དྷི་པྤཱ, ས་ཧ་ཛཱ་ནི་ཡ་ཏཱ་དྷི་པཱ.
༥༦༡. ཨུ་བྷ་ཡ་ཝི་པྤ་ཡུ་ཏྟཱ ཙ, པ་ཉྩ་དྷཱ ཏ་ཏྠ མཱ་ན་སཱ;
ཨ་ཊྛ་ཊྛཱ་ར་ས ཝཱི་སཾ ཚ, ས་ཏྟ་ཏིཾ་ས ཡ་ཐཱ་ཀྐ་མཾ.
༥༦༢. པ་ཉྩཱ་དྷི་པ་ཏི་ཡོ་གཱ ཙ, ཙ་ཏུ་རཱ་དྷི་པ་ཡོ་གི་ནོ;
ཏི་ཝི་དྷཱ་དྷི་པ་ཡུ་ཏྟཱ ཙ, ཝི་མུ་ཏྟཱ་པི ཙ ས་བྦ་ཐཱ.
༥༦༣. སོ་ལ༹་སཱ་ཐ ས་མ་ཏྟིཾ་ས, ཚ་ལེ༹་ཝཱ་ཐ ཡ་ཐཱ་ཀྐ་མཾ;
ས་ཏྟ་ཏིཾ་ས་ཏི་ཝི་དྷཱ་ཏི, ཙ་ཏུ་དྷེ་ཝ་མྤི ནི་དྡི་སེ.
༥༦༤. ཝཱི་མཾ་སཱ་དྷི་པ་ཡུ་ཏྟཱ ཙ, ས་ཧ་ཛཱ་དྷི་པ་ཡོ་གི་ནོ;
ཨཱ་ལ་མྦཱ་དྷི་པ་ཡུ་ཏྟཱ ཙ, ཝི་པྤ་མུ་ཏྟཱ་པི ས་བྦ་ཐཱ.
༥༦༥. ཙ་ཏུ་ཏྟིཾ་ས དྭི་པ་ཉྙཱ་ས, ཨ་ཊྛ་ཝཱི་ས ཡ་ཐཱ་ཀྐ་མཾ;
ས་ཏྟ་ཏིཾ་ས་ཏི ཙེ་ཝེ་ཏི, ཙ་ཏུ་དྷེ་ཝ་མྤི ནི་དྡི་སེ.
༥༦༦. ས་ཧ་ཛཱ་དྷི་པ་ལ་དྡྷཱ ཏུ, དྭེ་པ་ཉྙཱ་སེ་ཝ ས་བྦ་ཐཱ;
ཨཱ་ལ་མྦཱ་དྷི་པ་ལ་དྡྷཱ ཙ, ཨུ་བྷ་ཡཱ་དྷི་པ་ལཱ་བྷི་ནོ.
༥༦༧. ཨ་ཊྛ་ཝཱི་སེ་ཝ ས་བྦེ་པི, དྭེ་པ་ཉྙཱ་སེ་ཝ སཱ་དྷི་པཱ;
སེ་སཱ ནི་རཱ་དྷི་པཱ ས་བྦེ, ས་ཏྟ་ཏིཾ་སཱ་པི ས་བྦ་ཐཱ.
༥༦༨. ཝེ་ད་ནཱ་དི་ཝ་སེ་ནེ་ཝཾ, ཉ་ཏྭཱ བྷེ་དཾ ཙ་ཏུ་བྦི་དྷཾ;
ཛྷཱ་ནི་ནྡྲི་ཡ་མ་གྒ་བ་ལ-ཝ་སེ་ནཱ་པི ཝི་བྷཱ་ཝ་ཡེ.
༥༦༩. ཝི་ཏ་ཀྐ་ཧེ་ཊྛི་མཾ ཛྷཱ་ནཾ, མ་ནོ་པ་རཾ མ་ནི་ནྡྲི་ཡཾ;
ཧེ་ཏུ་པ་ར་ཉྩ མ་གྒ་ངྒཾ, བ་ལཾ ཝཱི་རི་ཡ་པ་ཙྪི་མཾ.
༥༧༠. ཨ་ཝི་ཏ་ཀྐེ པ་ཀ་ཏི་ཡཱ, ཏ་སྨཱ ཛྷཱ་ནཾ ན ཝི་ཛྫ་ཏི;
ཨ་ཧེ་ཏུ་ཀེ ཙ མ་གྒ་ངྒཾ, བ་ལ་ཉྩཱ་ཝཱི་རི་ཡེ ཡ་ཐཱ.
༥༧༡. ཨ་ཊྛ རཱུ་པི་ནྡྲི་ཡཱ་ནེ་ཏྠ, ཨ་ག་ཡ྄ཧ་ནྟེ་ཝ ས་བྦ་ཐཱ;
མ་གྒི་ནྡྲི་ཡ་བ་ལ་ཊྛེ་སུ, ས་མཱ་དྷི ཙ ན ཀ་ངྑི་ཏེ.
༥༧༢. ཀཱ་མ་པུ་ཉྙེ་སྭ་ནི་ཡ་ཏཱ, ཝི་ར་ཏཱི་པི ཨ་ནུ་དྡྷ་ཏཱ;
པ་ཉྙཱ་ནུ་ཏྟ་ར་ཙི་ཏྟེ་སུ, ཨི་ནྡྲི་ཡ་ཏྟ་ཡ་བྷཱ་ཛི་ཏཱ.
༥༧༣. སེ་སཱ ཝུ་ཏྟཱ་ནུ་སཱ་རེ་ན, ལ་བྦྷ་མཱ་ན་ཛ྄ཛྷཱ་ནཱ་དི་ཀཱ;
ཏེ་ཧི ཡུ་ཏྟཱ ཙ ཝི་ཉྙེ་ཡྻཱ, ཙི་ཏྟུ་པྤཱ་དཱ ཡ་ཐཱ་ཀྐ་མཾ.
༥༧༤. སོ་མ་ན་སྶ་ཡུ་ཏྟཱ ཀཱ་མེ, ལོ་ཀུ་ཏྟ་ར་མ་ཧ་གྒ་ཏེ;
པ་ཋ་མ་ཛ྄ཛྷཱ་ན་ཙི་ཏྟཱ ཙ, པ་ཉྩ་ཛྷཱ་ན་ངྒི་ཀཱ མ་ཏཱ.
༥༧༥. དུ་ཀྑུ་པེ་ཀྑཱ་ཡུ་ཏྟཱ ཀཱ་མེ, པ་ཉྩ་ཝི་ཉྙཱ་ཎ་ཝ་ཛྫི་ཏཱ;
དུ་ཏི་ཡ་ཛ྄ཛྷཱ་ན་ཙི་ཏྟཱ ཙ, ཙ་ཏུ་ཛྷཱ་ན་ངྒི་ཀཱ སི་ཡུཾ.
༥༧༦. ཛྷཱ་ན་ངྒ་ཏྟ་ཡ་སཾ་ཡུ་ཏྟཱ, ཏ་ཏི་ཡ་ཛ྄ཛྷཱ་ན་མཱ་ན་སཱ;
ཙ་ཏུ་ཏྠ་པ་ཉྩ་མཱ་རུ་པྤཱ, ཛྷཱ་ན་ངྒ་དྭ་ཡ་ཡོ་གི་ནོ.
༥༧༧. པ་ཉྩ་ཝི་ཉྙཱ་ཎ་ཡུ་ག་ལེ༹, ཛྷཱ་ན་ངྒཾ ན་ཏྠི ཀི་ཉྩི་པི;
ཨི་ཏྠཾ ཛྷཱ་ནཱ་ནཾ བྷེ་དེ་ན, པ་ཉྩ་དྷཱ མཱ་ན་སཱ ཋི་ཏཱ.
༥༧༨. ཨེ་ཀཱུ་ན་ཏིཾ་ས་ཏི ས་ཏྟ-ཏིཾ་ས ཙེ་ཀཱ་ད་སཱ་པ་རེ;
ཙ་ཏུ་ཏྟིཾ་ས ད་སེ་ཝཱ་ཐ, ག་ཎི་ཀཱ ཏུ ཡ་ཐཱ་ཀྐ་མཾ.
༥༧༩. ལོ་ཀུ་ཏྟ་རེ་སུ ས་བྦེ་སུ, ཨི་ནྡྲི་ཡཱ་ནི ན་ཝུ་ཙྩ་རེ;
ཏི་ཧེ་ཏུ་ཀེ་སུ ས་བྦེ་སུ, ལོ་ཀི་ཡེ་སུ པ་ན་ཊྛ་དྷཱ.
༥༨༠. ཉཱ་ཎེ་ན ཝི་པྤ་ཡུ་ཏྟེ་སུ, ས་ཏྟ་དྷཱ་ཝ ས་མུ་དྡྷ་རེ;
སི་ཏ་ཝོ་ཊྛ་བྦ་ནཱ པུ་ཉྙེ, པ་ཉྩ་དྷཱ་ཝ པ་ཀཱ་ས་ཡེ.
༥༨༡. ཝི་ཙི་ཀི་ཙྪཱ་ས་ཧ་ག་ཏེ, ཙ་ཏུ་དྷཱ་ཝ ཝི་ནི་དྡི་སེ;
ཏཱི་ཎི་ནྡྲི་ཡཱ་ནི ཝུ་ཏྟཱ་ནི, སེ་སཱ་ཧེ་ཏུ་ཀ་མཱ་ན་སེ.
༥༨༢. ཨ་ཊྛ ཙེ་ཀཱུ་ན་ཏཱ་ལཱི་ས, དྭཱ་ད་ས ཝཱ་ཐ ཏེ་ར་ས;
ཨེ་ཀ་ཉྩ སོ་ལ༹་ས ཙེ་ཏི, ཚ་བྦི་དྷཱ ཏ་ཏྠ ས་ངྒ་ཧོ.
༥༨༣. པ་ཋ་མཱ་ནུ་ཏྟ་རཾ ཛྷཱ་ནཾ, ཨ་ཊྛ་མ་གྒ་ངྒི་ཀཾ མ་ཏཾ;
ས་ཏྟ་མ་གྒ་ངྒི་ཀཾ ནཱ་མ, སེ་སཾ ཛྷཱ་ན་མ་ནུ་ཏྟ་རཾ.
༥༨༤. ལོ་ཀི་ཡཾ པ་ཋ་མཾ ཛྷཱ་ནཾ, ཏ་ཐཱ ཀཱ་མེ ཏི་ཧེ་ཏུ་ཀཾ;
པ་ཉྩ་མ་གྒ་ངྒི་ཀཱ ནཱ་མ, ཙི་ཏྟུ་པྤཱ་དཱ པ་ཀཱ་སི་ཏཱ.
༥༨༥. སེ་སཾ མ་ཧ་གྒ་ཏཾ ཛྷཱ་ནཾ, ས་མྤ་ཡུ་ཏྟཱ ཙ དི་ཊྛི་ཡཱ;
ཉཱ་ཎེ་ན ཝི་པྤ་ཡུ་ཏྟཱ ཙ, ཙ་ཏུ་མ་གྒ་ངྒི་ཀཱ མ་ཏཱ.
༥༨༦. དོ་ས་མཱུ་ལ་དྭ་ཡ་ཉྩེ་ཝ, ཨུ་དྡྷ་ཙྩ་ས་ཧི་ཏཾ ཏ་ཐཱ;
དི་ཊྛི་ཡཱ ཝི་པྤ་ཡུ་ཏྟཱ ཙ, མ་གྒ་ངྒ་ཏྟ་ཡ་ཡོ་གི་ནོ.
༥༨༧. ཝི་ཙི་ཀི་ཙྪཱ་ས་མྤ་ཡུ་ཏྟོ, ཝུ་ཏྟོ མ་གྒོ དུ་ཝ་ངྒི་ཀོ;
ཨ་མ་གྒཱ་ཧེ་ཏུ་ཀོ ཙེ་ཏི, ས་ཏྟ་དྷཱ ཏ་ཏྠ ས་ངྒ་ཧོ.
༥༨༨. ཨ་ཊྛ དྭ་ཏྟིཾ་ས་ཏི ཙེ་ཝ, ད་ས པ་ཉྩཱ་དྷི་ཀཱ་པ་རེ;
ཏཱ་ལཱི་ས ཀ་མ་ཏོ ས་ཏྟ, ཨེ་ཀ་ཉྩ་ཊྛ་ད་སཱ་པ་རེ.
༥༨༩. བ་ལཱ་ནི པ་ན ས་ཏྟེ་ཝ, ས་བྦ་ཏྠཱ་པི ཏི་ཧེ་ཏུ་ཀེ;
ཉཱ་ཎེ་ན ཝི་པྤ་ཡུ་ཏྟེ་སུ, ཚ བ་ལཱ་ནི ས་མུ་དྡི་སེ.
༥༩༠. ཙ་ཏུ་དྷཱ་ཀུ་ས་ལེ ཧོ་ནྟི, ཏི་ཝི་དྷཱ ཀ་ངྑི་ཏེ པ་ན;
དྭི་བ་ལཾ སི་ཏ་ཝོ་ཊྛ་བྦཾ, ཨ་བ་ལཾ སེ་ས་མཱི་རི་ཏཾ.
༥༩༡. ཚ་བྦི་དྷོ ས་ངྒ་ཧོ ཏ་ཏྠ, ས་ཏྟ་ཏཱ་ལཱི་ས་ཐཱ་པ་རེ;
དྭཱ་ད་སེ་ཀཱ་ད་སེ་ཀཾ དྭེ, སོ་ལ༹་སེ་ཏི ཡ་ཐཱ་ཀྐ་མཾ.
༥༩༢. ཨི་ཏྠཾ པ་ཉྩ ཚ ས་ཏྟ ཚ-ཀོ་ཊྛཱ་སཱ ཀ་མ་ཏོ ཋི་ཏཱ;
ཙ་ཏུ་ཝཱི་ས་ཏི ས་བྦེ་པི, ཛྷཱ་ན་ངྒཱ་དི་ཝ་སཱ ཀ་ཐཱ.
ཨི་ཏི ཙེ་ཏ་སི་ཀ་ཝི་བྷཱ་གེ ཙི་ཏྟུ་པྤཱ་ད་ཀ་ཐཱ ནི་ཊྛི་ཏཱ.
སོ་ལ༹་ས་མོ པ་རི་ཙྪེ་དོ.