༡༢. དྭཱ་ད་ས་མོ པ་རི་ཙྪེ་དོ
ད་སཱ་ཝ་ཏྠཱ་ཝི་བྷཱ་གོ
༡༦༤༢. ཨི་ཙྩ་ཊྛཱ་ར་ས་དྷཱ བྷི་ནྣཱ, པ་ཊི་པ་ཀྑ་པྤ་ཧཱ་ན་ཏོ;
ལ་ཀྑ་ཎཱ་ཀཱ་ར་བྷེ་དེ་ན, ཏི་ཝི་དྷཱ་པི ཙ བྷཱ་ཝ་ནཱ.
༡༦༤༣. ཀ་ལཱ་པ་ཏོ ས་མྨ་ས་ནཾ, ཨུ་ད་ཡ་བྦ་ཡ་ད་སྶ་ནཾ;
བྷ་ངྒེ ཉཱ་ཎཾ བྷ་ཡེ ཉཱ་ཎཾ, ཉཱ་ཎ་མཱ་དཱི་ན་ཝེ་པི ཙ.
༡༦༤༤. ཏ་ཐེ་ཝ ནི་བྦི་དཱ་ཉཱ་ཎཾ, ཉཱ་ཎཾ མུ་ཙྩི་ཏུ་ཀ་མྱ་ཏཱ;
པ་ཊི་ས་ངྑཱ ཙ ས་ངྑཱ་རུ-པེ་ཀྑཱ་ཉཱ་ཎཱ་ནུ་ལོ་མ་ཀཾ.
༡༦༤༥. ཨི་ཙྩཱཝ་ཏྠཱ་པ་བྷེ་དེ་ན, ད་ས་དྷཱ་པི ཝི་བྷཱ་ཝི་ཏཱ;
ས་བྷཱ་ག་ཏྠ་ཝི་སེ་སེ་ན, ཏི་དྷཱ ས་ངྒ་ཧི་ཏཱ པུ་ན.
༡༦༤༦. ཡ་ཐཱ་བྷཱུ་ཏཾ ནཱ་མ ཉཱ་ཎ་ཏྟ་ཡཾ ས་མྨ་ས་ནཱ་དི་ཀཾ;
བྷ་ཡཱ་དི་ཉཱ་ཎཾ ཏི་ཝི་དྷཾ, ནི་བྦི་དཱ་ཏི པ་ཝུ་ཙྩ་ཏི.
༡༦༤༧. ཏ་ཐཱ མུ་ཙྩི་ཏུ་ཀཱ་མཱ་དི, ཝི་རཱ་གོ་ཝ ཙ་ཏུ་བྦི་དྷཾ;
ལ་ཀྑ་ཎ་ཏྟ་ཡ་ནི་ཛ྄ཛྷཱ་ན་ཝ་སེ་ན པུ་ན ཝུ་ཊྛི་ཏཱ.
༡༦༤༨. སུ་ཉྙ་ཏ་ཉྩཱ་ནི་མི་ཏྟ་ཉྩ, ཏ་ཐཱ་པྤ་ཎི་ཧི་ཏ་ནྟི ཙ;
སཱ་དྷེ་ཏི མ་གྒ་ས་ངྑཱ་ཏཾ, ཝི་མོ་ཀྑ་ཏྟ་ཡམུ་ཏྟ་མཾ.
༡༦༤༩. ཨི་ཏི བྷཱ་ཝེ་ཏུ་ཀཱ་མ་སྶ, ཝི་བྷཱ་ཝེ་ཏི ཡ་ཐཱ་ཀྐ་མཾ;
ད་སཱ་ཝ་ཏྠཱ་ཝི་བྷཱ་གེ་ན, ས་མཱ་དཱ་ཡ ཡ་ཐཱ ཀ་ཐཾ.
༡༦༥༠. ཝི་སུ་དྡྷོ པ་ཋ་མཾ ཏཱ་ཝ, སཱ་དྷུ སཱི་ལ་ཝི་སུ་དྡྷི་ཡཱ;
ཨུ་པ་ཙཱ་ར་པྤ་ནཱ་ཡ་ཉྩ, ཋ་ཏྭཱ ཙི་ཏྟ་ཝི་སུ་དྡྷི་ཡཾ.
༡༦༥༡. ས་པྤ་ཙྩ་ཡཾ པ་རི་གྒ་ཡ྄ཧ, ནཱ་མ་རཱུ་པཾ ས་བྷཱ་ཝ་ཏོ;
དི་ཊྛི་ཀ་ངྑཱ་ཝི་ཏ་ར་ཎཾ, པ་ཏྭཱ སུ་དྡྷིཾ ཏ་ཏོ པ་རཾ.
༡༦༥༢. ཨ་ཏཱི་ཏཱ་ནཱ་ག་ཏེ ཁ་ནྡྷེ, པ་ཙྩུ་པྤ་ནྣེ ཙ སཱ་ས་ཝེ;
ཀ་ལཱ་པ་ཏོ ས་མྨ་སི་ཏྭཱ, ས་མྨ་སེ་ཡྻ ཏི་ལ་ཀྑ་ཎཾ.
༡༦༥༣. ཨཱ་དཱ་ན་ནི་ཀྑེ་པ་ན་ཏོ,
ཝ་ཡོ་ཝུ་དྡྷ་ཏྠ་གཱ་མི་ཏོ;
ཨཱ་ཧཱ་ར་ཏོ་པི ཨུ་ཏུ་ཏོ,
ཀ་མྨ་ཏོ ཙཱ་པི ཙི་ཏྟ་ཏོ.
༡༦༥༤. དྷ་མྨ་ཏཱ་རཱུ་པ་ཏོ ཙཱ་པི, རཱུ་པ་ས་ཏྟ་ཀ་ཏོ ན་ཡེ;
ཀ་ལཱ་པ་ཏོ ཡ་མ་ཀ་ཏོ, ཁ་ཎི་ཀཱ པ་ཊི་པཱ་ཊི་ཏོ.
༡༦༥༥. དི་ཊྛི་མུ་གྒྷཱ་ཊ་ཡ་ནྟོ ཙ, མཱ་ན་མུ་གྒྷཱ་ཊ་ཡཾ ཏ་ཐཱ;
ནི་ཀ་ནྟི་པ་རི་ཡཱ་དཱ་ནོ, ནཱ་མ་ས་ཏྟ་ཀ་ཏོ ན་ཡེ.
༡༦༥༦. ནི་ཙྩཱ ཙེ ན ནི་རུ་ཛ྄ཛྷེ་ཡྻུཾ, ན བཱ་དྷེ་ཡྻུཾ སུ་ཁཱ ཡ་དི;
ཝ་སེ ཝ་ཏྟེ་ཡྻུ་མ་ཏྟཱ ཙེ, ཏ་ད་བྷཱ་ཝཱ ན ཏཱ་དི་སཱ.
༡༦༥༧. ས་མྦྷ་ཝ་ནྟི ཧི ས་ངྑཱ་རཱ, ས་ཏི པ་ཙྩ་ཡ་ས་མྦྷ་ཝེ;
ཏ་ཏོ པ་ཙྩ་ཡ་ནི་པྥ་ནྣཱ, ཨ་ཝ་སྶཾ བྷེ་ད་གཱ་མི་ནོ.
༡༦༥༨. ཏ་ད་ནི་ཙྩཱ ཁ་ཡ་ཊྛེ་ན, དུ་ཀྑཱ ནཱ་མ བྷ་ཡ་ཊྛ་ཏོ;
ཨ་ན་ཏྟཱ་སཱ་ར་ཀ་ཊྛེ་ན, ས་ངྑཱ་རཱ་ཏི ཝི་བྷཱ་ཝ་ཡཾ.
༡༦༥༩. ཀཱ་ལེ་ན ས་མྨ་སེ རཱུ་པཾ, ནཱ་མཾ ཀཱ་ལེ་ན ས་མྨ་སེ;
ཨ་ཛ྄ཛྷ་ཏྟ་ཉྩ བ་ཧི་དྡྷཱ ཙ, ས་མཱ་ས་བྱཱ་ས་ཏོ ཏ་ཏོ.
༡༦༦༠. ཡ་ཐོ་པ་ཊྛི་ཏ་བྷེ་དེ་ན, ས་མྨ་ས་ནྟོ ས་མཱུ་ཧ་ཏོ;
ཀ་ལཱ་པ་ཏོ ས་མྨ་ས་ནམི་ཏི བྷཱ་ཝེ་ཏི པ་ཎྜི་ཏོ.
༡༦༦༡. ཏ་སྶེ་ཝཾ ས་མྨ་ས་ནྟ་སྶ, ཀ་མྨ་ཉྙཾ ཧོ་ཏི མཱ་ན་སཾ;
སཱུ་པ་ཊྛ་ནྟི ཙ ས་ངྑཱ་རཱ, ཝོ་དཱ་ཡ་ཏི ཙ བྷཱ་ཝ་ནཱ.
༡༦༦༢. ཏ་ཏོ པ་རཾ ཝི་པ་སྶ་ནྟོ, པ་རི་གྒ་ཎྷཱ་ཏི པ་ཎྜི་ཏོ;
པ་ཙྩུ་པྤ་ནྣ་ས་བྷཱ་ཝཱ་ནཾ, ཁ་ནྡྷཱ་ན་མུ་ད་ཡ་བྦ་ཡཾ.
༡༦༦༣. ཏ་ཎྷཱ་ས་མྨོ་ཧ་ཀ་མྨེ་ཧི,
ཁ་ནྡྷ་པ་ཉྩ་ཀ་ས་བྷཱ་ཝོ;
རཱུ་པ་མཱ་ཧཱ་ར་ཏོ ཧོ་ཏི,
ཕ་སྶ་ཏོ ཝེ་ད་ནཱ་ད་ཡོ.
༡༦༦༤. ཝི་ཉྙཱ་ཎཾ ནཱ་མ་རཱུ་པ་མྷཱ, ས་མྦྷོ་ཏཱི་ཏི ཙ པ་སྶ་ཏོ;
ཏ་སྶ པ་ཙྩ་ཡ་ཏོ ཧོ་ཏི, ཁ་ནྡྷེ་སུ་ད་ཡ་ད་སྶ་ནཾ.
༡༦༦༥. ཏ་ཎྷཱ་དཱི་ནཾ ནི་རོ་དྷཱ ཙ,
ནི་རོ་དྷོ ཧོ་ཏི པ་སྶ་ཏོ;
ཏ་ཐཱ ཝཱི་ས་ཏི་དྷཱ ཧོ་ཏི,
ཏ་ཏྠེ་ཝ ཝ་ཡ་ད་སྶ་ནཾ.
༡༦༦༦. ནི་བྦ་ཏྟི་ཝི་པ་རི་ཎཱ་མ་ལ་ཀྑ་ཎཾ པ་ན པ་སྶ་ཏོ;
ཁ་ཎ་ཏོ ད་ས་དྷཱ ནེ་ས་མུ་ད་ཡ་བྦ་ཡ་ད་སྶ་ནཾ.
༡༦༦༧. ཨི་ཏྠཾ པ་ཉྙཱ་ས་དྷཱ བྷེ་དོ,
ཁ་ནྡྷཱ་ན་མུ་ད་ཡ་བྦ་ཡོ;
ཨཱ་ཡ་ཏ་ནཱ་དི་བྷེ་དོ་པི,
ཡོ་ཛེ་ཏ་བྦོ ཡ་ཐཱ་ར་ཧཾ.
༡༦༦༨. ཏ་དེ་ཝ་མ་ནུ་པ་སྶ་ནྟོ, ཁ་ནྡྷཱ་ཡ་ཏ་ན་དྷཱ་ཏུ་ཡོ;
ཨ་ནི་ཙྩཱ དུ་ཀྑཱ་ན་ཏྟཱ་ཏི, བྷཱ་ཝེ་ཏི བ་ཧུ་དྷཱ བུ་དྷོ.
༡༦༦༩. བྷཱ་ཝ་ནཱ་པ་སུ་ཏ་སྶེ་ཝཾ, པ་སྶ་ཏོ བོ་དྷི་པ་ཀྑི་ཡཱ;
པཱ་ཏུ་བྷཱུ་ཏཱ པ་ཝ་ཏྟ་ནྟི, ཝི་སེ་སེ་ན ཝི་སཱ་ར་དཱ.
༡༦༧༠. ས་ལ་ཀྑ་ཎ་པ་རི་ཙྪི་ནྣེ, ཏི་ལ་ཀྑ་ཎ་ཝ་ཝ་ཏྠི་ཏེ;
ཚ་ནྡོ སཱ་ས་ཝ་ས་ངྑཱ་རེ, སཱ་ར་དཾ པ་རི་ཡེ་ས་ཏི.
༡༦༧༡. ཏ་ཏྠ པུ་བྦ་ངྒ་མཾ ཧུ་ཏྭཱ, སཾ་པ་ཀྑ་ནྡ་ཏི མཱ་ན་སཾ;
ས་ངྐ་པྤོ་བྷི་ནི་རོ་པེ་ཏི, ཨཱ་ཧ་ར་ནྟོ པུ་ན་པྤུ་ནཾ.
༡༦༧༢. ཡ་ཐཱ་ཝ་ཏྠུ་ས་བྷཱ་ཝེ་ན, ཏ་ཏོ ས་དྡྷཱ་དྷི་མུ་ཙྩ་ཏི;
ས་ཏི སཱུ་པ་ཊྛི་ཏཱ ཧོ་ཏི, པ་རི་གྒ་ཡ྄ཧ ས་བྷཱ་ཝ་ཏོ.
༡༦༧༣. པ་ཉྙཱ ས་མྤ་ཊི་ཝི་ཛ྄ཛྷ་ནྟཱི, ས་མཱ་ཧ་ཙྩ ཝི་པ་སྶ་ཏི;
པ་གྒ་ཧེ་ཏྭཱ་ན ཝཱ་ཡཱ་མོ, པ་ཊི་པཱ་དེ་ཏི བྷཱ་ཝ་ནཾ.
༡༦༧༤. ཏ་ཏོ པཱི་ཏི་མ་ནོ ཧོ་ཏི, ནི་པྥཱ་དི་ཏ་མ་ནོ་ར་ཐོ;
པཱ་མོ་ཛྫ་བ་ཧུ་ལོ ཧུ་ཏྭཱ, པ་སྶ་དྡྷ་ད་ར་ཐོ པ་ན.
༡༦༧༥. ཝི་ཀྑེ་པུ་དྡྷ་ཙྩ་ནི་ཏྟི་ཎྞོ, ས་མཱ་དྷི་ཡ་ཏི ནི་ཙྩ་ལོ;
ཨུ་པེ་ཀྑཱ བྷཱ་ཝ་ནཱ་ཝཱི་ཐིཾ, ཨ་དྷི་ཊྛཱ་ཏི ཏ་ཏོ པ་རཾ.
༡༦༧༦. ཨཱ་རུ་ལ༹ྷ་ཡོ་གྒཱ་ཙ་རི་ཡོ, ཨཱ་ཛཱ་ནཱི་ཡ་ར་ཐོ ཝི་ཡ;
ཝཱ་ཏཱ་བྷཱ་ཝེ པ་དཱི་པོ་ཝ, པ་ས་ནྣེ་ཀ་མུ་ཁ་ཊྛི་ཏཱ.
༡༦༧༧. སུ་ཁུ་མཱ ནི་པུ་ཎཱ་ཀཱ་རཱ, ཁུ་ར་དྷཱ་རཱ་ག་ཏཱ ཝི་ཡ;
ག་ཎྷ་ནྟཱི བྷཱ་ཝ་ནཱ་ག་བྦྷཾ, པ་ཝ་ཌྜྷ་ཏི ཝི་པ་སྶ་ནཱ.
༡༦༧༨. ས་མྤ་ཏྟ་པ་ཊི་ཝེ་དྷ་སྶ,
ཏ་སྶེ་ཝཾ ཏཾ ཝི་པ་སྶ་ཏོ;
ཛཱ་ཡ་ཏེ་ཀོ ཨུ་པ་ཀླེ་སོ,
ད་སོ་པ་ཀླེ་ས་ཝ་ཏྠུ་ཀཱ.
༡༦༧༩. ཨོ་བྷཱ་སོ པཱི་ཏི པ་སྶ་དྡྷི, ཨ་དྷི་མོ་ཀྑོ ཙ པ་གྒ་ཧོ;
སུ་ཁཾ ཉཱ་ཎ་མུ་པ་ཊྛཱ་ན་མུ་པེ་ཀྑཱ ཙ ནི་ཀ་ནྟི ཙ.
༡༦༨༠. ཛཱ་ཏེ་སྭེ་ཏེ་སུ ཡཾ ཀི་ཉྩི, ཨུ་ལཱ༹་རཾ ཛཱ་ཏ་ཝི་མྷ་ཡོ;
དི་སྭཱ ཝི་པ་སྶ་ནཱ་མ་གྒཱ, ཝོ་ཀྐ་མི་ཏྭཱ ཏ་ཏོ པ་རཾ.
༡༦༨༡. ཏ་མ་ཧཾ་ཀཱ་ར་ཝི་ཀྑི་ཏྟོ, ཨ་སྶཱ་དེ་ནྟོ མ་མཱ་ཡ་ཏི;
ཧོ་ཏཱ་དྷི་མཱ་ནི་ཀོ ཝཱ་ཐ, མ་ཉྙ་ནྟོ ཏ་མ་ནུ་ཏྟ་རཾ.
༡༦༨༢. སི་ཡཱ ཙེ་ཝ་མུ་པ་ཀླི་ཊྛཱ, པ་ཏི་ཏཱ ཝཱ་ཐ བྷཱ་ཝ་ནཱ;
ཏ་ཏྠེ་ཝཾ པ་ཊི་ས་ངྑཱ་ཡ, པ་ཊི་ཝི་ཛ྄ཛྷ་ཏི པ་ཎྜི་ཏོ.
༡༦༨༣. ན ཏ་ཎྷཱ་དི་ཊྛི་མཱ་ནེ་ཧི, པ་རི་ཡོ་གཱ་ཧ་ཧེ་ཏུ་ཏོ;
ལ་ཀྑ་ཎཱ་ལ་མྦ་ཎ་ཏྟཱ ཙ, ལོ་ཀི་ཡཱ་ཡཾ ཝི་པ་སྶ་ནཱ.
༡༦༨༤. དི་ཊྛི་མཱ་ན་ནི་ཀ་ནྟཱི ཙ, ཀུ་མྨ་གྒཱ པ་རི་པ་ནྠ་ཀཱ;
མ་གྒོ ཝི་སུ་དྡྷི་ཡཱ ནཱ་མ, ཝི་སུ་དྡྷཱ ཙ ཝི་པ་སྶ་ནཱ.
༡༦༨༥. སཱ་ར་ཐཱི་ཝ ར་ཐཾ བྷ་ནྟ་མི་ཏི ས་ངྑཱ་ཡ སཱ་དྷུ་ཀཾ;
པ་ཝི་ཊྛ་མ་གྒཾ ཝི་ཀྑི་ཏྟཾ, ས་མྤཱ་དེ་ཏི ཡ་ཐཱ པུ་རེ.
༡༦༨༦. ཨི་ཏྠཾ མ་གྒེ ཨ་མ་གྒེ ཙ, ཡཱ་ཐཱ་ཝ་པ་ཊི་ཝེ་དྷ་ཀཾ;
མ་གྒཱ་མ་གྒ་ཝི་སུ་དྡྷཱིཏི, ཉཱ་ཎ་ད་སྶ་ན་མཱི་རི་ཏཾ.
༡༦༨༧. ཙེ་ཏོ་པ་ཝ་ཏྟ་ནཱ་ཀཱ་ར་མི་ཏི ས་ལླ་ཀྑ་ཡཾ བུ་དྷོ;
སཱ་དྷུ་ཀཾ པ་ཊི་ཝི་ཛ྄ཛྷ་ནྟོ, སུ་ཁུ་མཾ ནི་པུ་ཎཾ ཏ་ཏོ.
༡༦༨༨. པ་རི་པ་ནྠེ ཝི་མོ་ཙེ་ཏྭཱ, བོ་དྷེ་ཏྭཱ བོ་དྷི་པ་ཀྑི་ཡེ;
བྷཱ་ཝ་ནཾ པ་ཊི་པཱ་དེ་ནྟོ, པུ་ན་དེ་ཝོ་ད་ཡ་བྦ་ཡཾ.
༡༦༨༩. ས་མ་དྷི་ཊྛཱ་ཡ མེ་དྷཱ་ཝཱི, ཝི་པ་སྶ་ཏི ཏི་ལ་ཀྑ་ཎཾ;
ཨུ་ད་ཡ་བྦ་ཡ་ཉཱ་ཎནྟི, ཏ་མཱི་རེ་ནྟི ཏ་ཏོ པ་རཾ.
༡༦༩༠. ས་ངྑཱ་རཱ་ནཾ ཝི་བྷཱུ་ཏ་ཏྟཱ, སཱ་ཀཱ་རཱ་ནཾ ཝི་སེ་ས་ཏོ;
ཏི་ལ་ཀྑ་ཎཱ་ནཾ དི་ཊྛ་ཏྟཱ, ས་ངྑཱ་རེ་སུ ས་བྷཱ་ཝ་ཏོ.
༡༦༩༡. པ་རི་པ་ནྠཱ ཝི་མུ་ཏྟ་སྶ, མ་གྒཱ་མ་གྒ་ཝི་སུ་དྡྷི་ཡཱ;
ཡ་ཐཱ་ཝཱི་ཐི་པྤ་ཝ་ཏྟ་སྶ, པ་ཊི་པ་ཏྟི་ཝི་སུ་དྡྷི་ཡཱ.
༡༦༩༢. ཨི་ནྡྲི་ཡཱ་ནཾ སུ་ཏི་ཀྑ་ཏྟཱ, པ་རི་པ་ཀྐཱ ཝི་པ་སྶ་ནཱ;
ཨུ་ད་ཡ་མྷཱ ཝི་མུ་ཙྩི་ཏྭཱ, བྷ་ངྒེ ཋཱ་ཏི ཡ་ཐཱ ཀ་ཐཾ.
༡༦༩༣. ཨུ་པྤཱ་དོ པ་ཙྩ་ཡཱ་ཡ་ཏྟོ, དྷ་མྨཱ་ན་མི་ཏི ནི་ཙྪི་ཏེ;
ནི་རོ་དྷཱ་ནུ་ག་ཏཱ ཛཱ་ཏི, སི་དྡྷཱ་ཝ་སྶཾ ནི་ཡཱ་མ་ཏོ.
༡༦༩༤. ཏ་ཏོ་ད་ཡཱ་ཝ པ་ཊྛཱ་ཡ, ཨ་ཏྠཱ་ཡ སཱུ་རི་ཡོ ཝི་ཡ;
ཝི་ནཱ་སཱ་ཡ པ་ཝ་ཏྟ་ནྟཱ, ཝ་ཡ་ནྟེ་ཝཱ་ཏི པེ་ཀྑ་ཏི.
༡༦༩༥. ཨུ་ད་ཡཱ་བྷོ་ག་མོ་ཧཱ་ཡ, ཝ་ཡ་ནྟི་ཙྩེ་ཝ ས་བྦ་ཐཱ;
བྷེ་ད་སྶ་བྷཱ་ཝ་མཱ་ར་བྦྷ, དྷ་མྨེ་སུ ས་ཏི ཏི་ཊྛ་ཏི.
༡༦༩༦. ཨ་ཏཱི་ཏཱ ཙ ནི་རུ་དྡྷཱ་ཝ, ནི་རུ་ཛ྄ཛྷི་སྶ་ནྟི་ནཱ་ག་ཏཱ;
ནི་རུ་ཛ྄ཛྷ་ནྟེ་ཝ ཝ་ཏྟ་ནྟཱ, ཨི་ཙྩེ་ཝ་མ་ནུ་པ་སྶ་ཏོ.
༡༦༩༧. ནི་ཛ྄ཛྷ་རོ་ཝ གི་ར་གྒ་མྷི, ཝཱ་རི་ཝོ་ཎ་ཏ་པོ་ཀྑ་རེ;
པ་དཱི་པོ ཝི་ཡ ཛྷཱ་ཡ་ནྟོ, ཨཱ་ར་གྒེ་རི་ཝ སཱ་ས་པོ.
༡༦༩༨. ཨཱ་ཏ་པེ ཝི་ཡ ཨུ་སྶཱ་ཝོ, པ་རི་སྶཱ་ཝེ ཛ་ལཾ ཝི་ཡ;
མ་དྡི་ཏཾ ཕེ་ཎ་པི་ཎྜཾ་ཝ, ལོ་ཎ་པི་ཎྜ་མི་ཝོ་ད་ཀེ.
༡༦༩༩. ཨུ་ད་ཀེ ད་ཎྜ་རཱ་ཛཱི་ཝ, ཝི་ཛྫུ་ཏཱ་ཝ ཝ་ལཱ་ཧ་ཀེ;
ཛ་ལཾ ཏ་ཏྟ་ཀ་པཱ་ལེ་ཝ, ས་ལི་ལེ ཝི་ཡ བུ་བྦུ་ལ༹ཾ.
༡༧༠༠. ཝཱ་ཏ་བྦྷཱ་ཧ་ཏ་ཏཱུ་ལཾ་ཝ, ཏཱི་རཾ པ་ཏྟཱ་ཝ ཝཱི་ཙི་ཡོ;
ཕ་ལཾ བ་ནྡྷ་ན་མུ་ཏྟཾ་ཝ, ཏི་ཎཱ་ནཱི་ཝ ཧུ་ཏཱ་ཝ་ཧེ.
༡༧༠༡. ཛཱ་ཡ་ནྟཱ་པི ཙ ཛི་ཡྻ་ནྟཱ, མི་ཡྻ་ནྟཱ ཙ ནི་ར་ནྟ་རཾ;
ནི་རོ་དྷཱ་ཡཱ་བྷི་དྷཱ་ཝ་ནྟཱ, བྷ་ངྒཱ་བྷི་མུ་ཁ་པཱ་ཏི་ནོ.
༡༧༠༢. ཝི་ག་ཙྪ་ནྟཱ་ཝ དི་སྶ་ནྟི, ཁཱི་ཡ་ནྟ་ནྟ་ར་དྷཱ་ཡི་ནོ;
ཝི་དྡྷཾ་ས་ཡ་ནྟཱ ས་ངྑཱ་རཱ, པ་ཏ་ནྟཱ ཙ ཝི་ནཱ་སི་ནོ.
༡༧༠༣. བྷ་ངྒ་ཉཱ་ཎཾ ཏ་མ་ཀྑཱ་ཏཾ, ཡེ་ན ཉཱ་ཎེ་ན པ་སྶ་ཏོ;
ཨ་ནི་ཙྩ་ནྟཱ་ནུ་དྷཱ་ཝ་ནྟི, ཏི་ཝི་དྷཱ་པི ཝི་པ་སྶ་ནཱ.
༡༧༠༤. ཨུ་ད་ཡ་བྦ་ཡ་བྷ་ངྒེ་སུ, པཱ་ཀ་ཊཱ ཧི ཨ་ནི་ཙྩ་ཏཱ;
བྷ་ཡཱ་དཱི་ན་ཝ་ནི་བྦེ་དེ, དུ་ཀྑ་ཏཱ་ན་ཏྟ་ཏཱ ཏ་ཏོ.
༡༧༠༥. ཨི་ཏྠཾ བྷ་ངྒ་མ་དྷི་ཊྛཱ་ཡ, པ་སྶ་ནྟ་སྶ ཏི་ལ་ཀྑ་ཎཾ;
ས་ངྑཱ་རཱ ས་བྷ་ཡཱ ཧུ་ཏྭཱ, ས་མུ་པ་ཊྛ་ནྟི ཡོ་གི་ནོ.
༡༧༠༦. ཝཱ་ལ༹་མི་གཱ་ནུ་བ་དྡྷཱ་ཝ, ནི་མྨུ་ཛྫ་ནྟཱ ཝི་ཡ་ཎྞ་ཝེ;
ཨ་མ་ནུ་སྶ་ག་ཧི་ཏཱ་ཝ, པ་རི་ཀྑི་ཏྟཱ་ཝ ཝེ་རི་ཧི.
༡༧༠༧. ཀ་ཎྷ་ས་པྤ་ས་མཱ་ལཱི་ལ༹ྷཱ, ཙ་ཎྜ་ཧ་ཏྠི་ས་མུ་ཊྛི་ཏཱ;
པ་པཱ་ཏཱ་ཝཱ་ཊ་པ་ཀྑ་ནྟཱ, པ་ཏ་ནྟཱ་ཝ ཧུ་ཏཱ་ཝ་ཧེ.
༡༧༠༨. ཝ་ཛ྄ཛྷ་པྤ་ཏྟཱ མ་ཧཱ་ཙོ་རཱ, ཚི་ཛྫ་ནྟཱ ཝི་ཡ སཱི་ས་ཏོ;
སཱུ་ལ་མཱ་རོ་པི་ཡ་ནྟཱ་ཝ, པ་བྦ་ཏེ་ནོ་ཏྠ་ཊཱ ཝི་ཡ.
༡༧༠༩. ཛཱ་ཏི་ས་ངྐ་ཊ་པ་ཀྑ་ནྟཱ, ཛ་རཱ་བྱཱ་དྷི་ནི་པཱི་ལི༹་ཏཱ;
མ་ར་ཎཱ་ས་ནི་ས་མྨ་དྡཱ, མ་ཧཱ་བྱ་ས་ན་བྷཱ་གི་ནོ.
༡༧༡༠. མ་ཙྩུ་ན་བྦྷཱ་ཧ་ཏཱ ནི་ཙྩཾ, དུ་ཀྑ་བྷཱ་ར་ས་མོ་ཏྠ་ཊཱ;
སོ་ཀོ་པཱ་ཡཱ་ས་ནི་སྶ་ནྡཱ, པ་རི་དེ་ཝ་པ་རཱ་ཡ་ཎཱ.