༡༡. ཨེ་ཀཱ་ད་ས་མོ པ་རི་ཙྪེ་དོ
ཝི་པ་སྶ་ནཱ་ཝི་བྷཱ་གོ
༡༥༠༦. དྭི་དྷཱ ས་མུ་ཊྛཱ་ན་དྷུ་རཱ, ཏི་ཝི་དྷཱ བྷཱུ་མི་ཡོ མ་ཏཱ;
ཏི་ཝི་དྷཱ་བྷི་ནི་ཝེ་སཱ ཙ, ས་རཱི་རཾ ཏུ ཙ་ཏུ་བྦི་དྷཾ.
༡༥༠༧. ཏི་ཝི་དྷཱ བྷཱ་ཝ་ནཱ ཏ་ཏྠ, ས་ངྑཱ་རེ་སུ ཡ་ཐཱ་ར་ཧཾ;
དུ་ཝི་དྷཱ་ཀཱ་ར་མཱ་ར་བྦྷ, ནི་ཛ྄ཛྷཱ་ཡ་ཏི ཏི་ལ་ཀྑ་ཎཾ.
༡༥༠༨. ཨ་ཊྛཱ་ར་སཱ་ཀཱ་ར་བྷི་ནྣཱ, ད་སཱ་ཝ་ཏྠཱ ཝི་བྷཱ་ཝི་ཏཱ;
ཏི་དྷཱ ཝི་བྷཱ་གཱ སཱ་དྷེ་ཏི, ཝི་མོ་ཀྑ་ཏྟ་ཡ་མུ་ཏྟ་མཾ.
༡༥༠༩. ཙ་ཏུ་ས་ཙྩ་པ་ཊི་ཝེ་དྷཱ, ས་ཏྟ་ཊྛཱ་རི་ཡ་པུ་གྒ་ལཱ;
ཀླེ་ས་ཧཱ་ནཱི ཡ་ཐཱ་ཡོ་གཾ, ཙ་ཏ་སྶོ པ་ཊི་ས་མྦྷི་དཱ.
༡༥༡༠. ཏི་ཝི་དྷཱ ཙ ས་མཱ་པ་ཏྟི, ནི་རོ་དྷཱ ཙ ཏ་ཐཱ་པ་རཱ;
ནི་སྶ་ནྡ་ཕ་ལ་མི་ཙྩཱ་ཧུ, ཏ་སྶཱ སཱ་ས་ན་ཀོ་ཝི་དཱ.
༡༥༡༡. ཝི་པ་སྶ་ནཱ་བྷཱ་ཝ་ནཱ་ཡ-མི་ཏི བྷཱ་ས་ནྟི པ་ཎྜི་ཏཱ;
ཏ་མི་དཱ་ནི པ་ཝ་ཀྑཱ་མི, ཡ་ཐཱ་ནུ་ཀྐ་མ་ཏོ ཀ་ཐཾ.
༡༥༡༢. བྷཱུ་མི་དྷ་མྨེ པ་རི་གྒ་ཡ྄ཧ, ཝི་ཙི་ན་ནྟ་སྶ ཡོ་གི་ནོ;
ས་ཏི་ཡཱ ས་མ་ཐཱ ཝཱ་ཐ, ས་མུ་ཊྛཱ་ཏི ཝི་པ་སྶ་ནཱ.
༡༥༡༣. ས་བྷཱ་ཝ་པ་ཊི་ཝེ་དྷེ ཙ, ས་དྡྷ་མྨ་པ་ཊི་པ་ཏྟི་ཡཾ;
པ་ཉྙཱ་ས་དྡྷཱ་དྭ་ཡཾ ཏ་སྶཱ, དྷུ་རམཱ་ཧུ དྷུ་ར་ནྡྷ་རཱ.
༡༥༡༤. ཏེ་བྷཱུ་མ་ཀ་ས་བྷཱ་ཝཱ་ནཾ, ས་པྤ་ཙྩ་ཡ་པ་རི་གྒ་ཧོ;
ཉཱ་ཏ་པ་རི་ཉྙཱ ནཱ་མཱ་ཡཾ, བྷཱུ་མཱི་ཏི པ་ཋ་མཱ མ་ཏཱ.
༡༥༡༥. ཀ་ལཱ་པ་ཏོ ས་མྨ་ས་ནཾ, ཨུ་ད་ཡ་བྦ་ཡ་ད་སྶ་ནཾ;
པ་རི་ཉྙཱ་ཏཱི་ར་ཎཱ ནཱ་མ, དུ་ཏི་ཡཱ བྷཱུ་མི བྷཱ་སི་ཏཱ.
༡༥༡༦. པ་ཧཱ་ན་པ་རི་ཉྙཱ བྷཱུ་མི, ཏ་ཏི་ཡཱ་ཧུ ཏ་ཏོ་པ་རཾ;
བྷ་ངྒཱ་དི་ཉཱ་ཎ་མི་ཙྩེ་ཝཾ, ཏི་ཝི་དྷཱ བྷཱུ་མི་ཡོ མ་ཏཱ.
༡༥༡༧. ཁ་ཎ་ས་ནྟ་ཏི་ཨ་དྡྷཱ་ན-ཝ་སེ་ནེ་ཏྠ ས་མཱི་རི་ཏཱ;
ཨ་ནི་ཙྩཱ དུ་ཀྑཱ་ན་ཏྟཱ་ཏི, ཏི་ཝི་དྷཱབྷི་ནི་ཝེ་ས་ནཱ.
༡༥༡༨. དི་ཊྛི་ཀ་ངྑཱ་ཝི་ཏ་ར་ཎཱ, མ་གྒཱ་མ་གྒ་པ་ཊི་པྤ་དཱ;
ཝི་སུ་དྡྷི་ཡོ ཙ་ཏ་སྶོ་པི, ས་རཱི་རནྟི ནི་ད་སྶི་ཏཱ.
༡༥༡༩. ས་ལ་ཀྑ་ཎ་ཝ་ཝ་ཏྠཱ་ནཾ, པ་ཙྩ་ཡཱ་ཀཱ་ར་ནི་ཙྪ་ཡོ;
ཀུ་མྨ་གྒ་པ་རི་ཧཱ་རོ ཙ, ཏི་ལ་ཀྑ་ཎ་ཝི་པ་སྶ་ནཱ.
༡༥༢༠. ཨི་ཏི ལ་ཀྑ་ཎ་བྷི་ནྣ་ཏྟཱ, ལ་བྦྷ་ནྟེ་ཀ་ཀྑ་ཎེ་པི ཙ;
དེ་སི་ཏཱ ཧེ་ཏུ་བྷཱུ་ཏེ་ན, ཀ་མེ་ནེ་ཝཾ ཝི་སུ་དྡྷི་ཡོ.
༡༥༢༡. སཱི་ལ་བྦི་སུ་དྡྷི་ཨཱ་དཱི་ནཾ, ཏ་ཐཱ སཱ་ཝ པ་ར་མྤ་རཱ;
ཙི་ཏྟ་བྦི་སུ་དྡྷི་ཨཱ་དཱི་ན་མ་ཏྠཱ་ཡཱ་ཏི པ་ཀཱ་སི་ཏཱ.
༡༥༢༢. དི་སྶ་མཱ་ན་ས་བྷཱ་ཝཱ་ནཾ, པ་སྶ་ནྟོ པ་ཙྩ་ཡ་ཊྛི་ཏི;
པ་རི་པ་ནྠ་ཝི་མུ་ཏྟོ ཧི, པ་ཊི་པཱ་དེ་ཏི བྷཱ་ཝ་ནཾ.
༡༥༢༣. ཏ་ཐཱ་པི ཙ ཝི་སེ་སེ་ན, པ་ཊི་པ་ནྣ་སྶ ཡོ་གི་ནོ;
ཏ་ཏྠ ཏ་ཏྠ ཝི་བྷཱུ་ཏ་ཏྟཱ, ཋཱ་ན་ཏོ བྷེ་དི་ཏཱ ཀ་ཐཾ.
༡༥༢༤. རཱུ་པ་པུ་བྦ་ངྒ་མཾ ཝཱ་ཐ, ནཱ་མ་པུ་བྦ་ངྒ་མཾ ཏ་ཐཱ;
ཨ་ཛ྄ཛྷ་ཏྟཾ ཝཱ བ་ཧི་དྡྷཱ ཝཱ, ཡ་ཐཱ་པཱ་ཀ་ཊ་དྷ་མྨ་ཏོ.
༡༥༢༥. ནཱ་མ་རཱུ་པཱ་དི་བྷེ་དེ་ན, བྷཱུ་མི་དྷ་མྨ་པ་རི་གྒ་ཧོ;
ཝུ་ཏྟཱ དི་ཊྛི་ཝི་སུ་དྡྷཱི་ཏི, ཨ་ཏྟ་དི་ཊྛི་པྤ་ཧཱ་ན་ཏོ.
༡༥༢༦. ཨཱ་ཧ་ཙྩ པ་ཙྩ་ཡུ་པྤ་ནྣཱ, ཏ་ཐཱ ཏ་བྦྷཱ་ཝ་བྷཱ་ཝི་ནོ;
པ་ཝ་ཏྟ་ནྟཱི་ཏི ས་ངྑཱ་རེ, པ་སྶ་ཏོ པ་ན ཡོ་ནི་སོ.
༡༥༢༧. པ་ཙྩ་ཡ་གྒཱ་ཧི་ནཱི པ་ཉྙཱ, ནཱ་མ་རཱུ་པ་པྤ་ཝ་ཏྟི་ཡཱ;
ཀ་ངྑཱ ཏ་ར་ནྟི ཏཱ་ཡཱ་ཏི, ཀ་ངྑཱ་ཝི་ཏ་ར་ཎཱ མ་ཏཱ.
༡༥༢༨. ཨ་ནི་ཙྩཱ དུ་ཀྑཱ་ན་ཏྟཱ་ཏི, པ་ཙྩ་ཡཱ་ཡ་ཏྟ་ཝུ་ཏྟི་ཏོ;
ས་ངྑི་པི་ཏྭཱ ཀ་ལཱ་པེ་ན, ས་མྨ་སཱི་ཡ་ནྟི ས་ངྑ་ཏཱ.
༡༥༢༩. ཨུ་པྤཱ་ད་ཝ་ཡ་བྷཱ་ཝོ་པི, ལ་ཀྑ་ཎ་ཏྟ་ཡ་སཱ་དྷ་ཀོ;
པ་ཙྩ་ཡཱ་ཀཱ་ར་མཱ་ར་བྦྷ, ལ་ཀྑཱི་ཡ་ཏི ཝི་སེ་ས་ཏོ.
༡༥༣༠. ཏ་སྨཱ ས་མྨ་ས་ན་ཉཱ་ཎཾ, ཨུ་ད་ཡ་བྦ་ཡ་ད་སྶ་ནཾ;
ཀ་ངྑཱ་ཝི་ཏ་ར་ཎཱ་ཡཾ ཏུ, ས་ངྒ་ཡ྄ཧ་ཏི ཝི་སུ་དྡྷི་ཡཾ.
༡༥༣༡. ཏ་ཏྠ སཾ་ཀླེ་ས་ཝི་ཀྑེ་པཾ, ཀུ་མྨ་གྒཾ པ་རི་ཝ་ཛྫ་ཏོ;
མ་གྒཱ་མ་གྒ་ཝི་སུ་དྡྷཱི་ཏི, ཉཱ་ཎ་ད་སྶ་ན་མཱི་རི་ཏཾ.
༡༥༣༢. ཏ་ཏོ ཀ་ཐེ་ནྟི ཨ་ཀླི་ཊྛ་མུ་ད་ཡ་བྦ་ཡ་ད་སྶ་ནཾ;
ཨཱ་དིཾ ཀ་ཏྭཱ པ་ཊི་པ་དཱ་ཉཱ་ཎ་ད་སྶ་ན་སུ་དྡྷི་ཡཾ.
༡༥༣༣. པ་ཙྩ་ཡ་པ་ཙྩ་ཡུ་པྤ་ནྣེ, ཡ་ཐཱ་ཝ་ཏྠུ་ཝ་ཝ་ཏྠི་ཏེ;
པ་ཧཱ་ཏུ་མཱི་ཧ་མཱ་ནཱ་ནཾ, ནི་ཡྻཱ་ན་པ་ཊི་པ་ཏྟི་ཏོ.
༡༥༣༤. ཨུ་པ་ཀླེ་ས་ཝི་སུ་དྡྷོ ཧི, པུ་ན་དེ་ཝོ་ད་ཡ་བྦ་ཡཾ;
ཨ་དྷི་ཊྛ་ཧི་ཏྭཱ བྷ་ངྒཱ་དི-ཉཱ་ཎེ་ཧི པ་ཊི་པ་ཛྫ་ཏི.
༡༥༣༥. ཏ་ཐཱ ཙཱ་བྷི་ན་ཝུ་པྤ་ནྣེ, བྷི་ཛྫ་མཱ་ནེ ཝི་པ་སྶ་ཏོ;
སཾ་ཝེ་ག་ཀ་ཌྜྷི་ཏཾ ཉཱ་ཎཾ, བྷ་ངྒཱ་དི་མ་ནུ་ཏི་ཊྛ་ཏི.
༡༥༣༦. ཏ་ཏོ པུ་བྦེ པ་ཝ་ཏྟཱ ཧི, སཾ་ཀླེ་སཱ་པཱ་ཡ་ས་མྦྷ་ཝཱ;
པ་ཊི་པ་ཏྟི་ཝི་སུ་དྡྷཱི་ཏི, ན ས་ངྒ་ཡ྄ཧ་ཏི བྷཱ་ཝ་ནཱ.
༡༥༣༧. ས་མྤཱ་དེ་ནྟོ པ་ནི་ཙྩེ་ཏཱ, ཙ་ཏ་སྶོ་པི ཝི་སུ་དྡྷི་ཡོ;
ཨ་ནི་ཙྩཱ དུ་ཀྑཱ་ན་ཏྟཱ་ཏི, བྷཱ་ཝེ་ཡྻ ཏི་ཝི་དྷཱ ཀ་ཐཾ.
༡༥༣༨. པ་ཙྩ་ཡ་པ་ཙྩ་ཡུ་པྤ་ནྣཱ, ཛཱ་ཏཱ་ན་ནྟ་ར་བྷེ་དི་ནོ;
ཨ་ནི་ཙྩཱ ཙ པ་བྷ་ངྒཱུ ཙ, པ་ལུ་ཛྫ་ནྟི ཙ་ཝ་ནྟི ཙ.
༡༥༣༩. ཨ་དྡྷུ་ཝཱ ཙ ཨ་སཱ་རཱ ཙ, ཝི་བྷ་ཝཱ ཙ ཝི་ནཱ་སི་ནོ;
ས་ངྑ་ཏཱ ཝི་པ་རི་ཎཱ་མ-དྷ་མྨཱ ཨི་ཏྟ་ར་ཀཱ་ལི་ཀཱ.
༡༥༤༠. ཁ་ཡ་དྷ་མྨཱ ཝ་ཡ་དྷ་མྨཱ, ལ་ཧུ་ཀཱ་ལ་པྤ་ཝ་ཏྟི་ནོ;
ཏཱ་ཝ་ཀཱ་ལི་ཀ་དྷ་མྨཱ ཙ, པ་རི་ཏྟ་ཊྛི་ཏི་ཀཱ ཏ་ཐཱ.
༡༥༤༡. ཁ་ཎ་ཏྟ་ཡ་པ་རི་ཙྪི་ནྣཱ, པུ་བྦཱ་པ་ར་ཝི་ཙི་ཏྟ་ཀཱ;
པུ་ར་ཀྑ་ཏཱ ནི་རོ་དྷ་སྶ, ས་སྶ་ཏཱ ན ཀུ་དཱ་ཙ་ནཾ.
༡༥༤༢. ཛཱ་ཡ་ནྟི པ་རི་ཧཱ་ནཱ་ཡ, ན ཏུ ཛཱ་ཡ་ནྟི ཝུ་དྡྷི་ཡཱ;
ཛི་ཡྻ་མཱ་ནཱ་ཝ ཏི་ཊྛ་ནྟི, ཛི་ཎྞཱ བྷ་ངྒ་པ་རཱ་ཡ་ཎཱ.
༡༥༤༣. ཨ་ཧུ་ཏྭཱ་ཡེ་ཝུ་པྤ་ཛྫ་ནྟི, ན ཀུ་ཏོ་ཙི་པི ཨཱ་ག་ཏཱ;
ཧུ་ཏྭཱ ཨ་ནྟ་ར་དྷཱ་ཡ་ནྟི, ན ཏུ ཀ་ཏྠ་ཙི ས་ཉྩི་ཏཱ.
༡༥༤༤. ཏཾ ཏཾ པ་ཙྩ་ཡ་སཱ་མ་གྒི-མ་ཏྟ་ལཱ་བྷཱ་ཡ ནི་སྶི་ཏཱ;
ནི་རོ་དྷ་དྷ་མྨཱ ཛཱ་ཡ་ནྟི, ཛཱ་ཏཱ བྱ་ནྟི བྷ་ཝ་ནྟི ཏེ.
༡༥༤༥. ཡ་ཐཱ ན་དཱི པ་བྦ་ཏེ་ཡྻཱ, ཡ་ཐཱ དཱི་པ་སི་ཁཱ ཏ་ཐཱ;
སཱི་གྷ་སཱི་གྷཾ པ་ཝ་ཏྟ་ནྟཱ, ཨུ་པྤ་ཛྫ་ནྟི ཝ་ཡ་ནྟི ཙ.
༡༥༤༦. ཛཱ་ཏཱ ཛཱ་ཏཱ ནི་རུ་ཛ྄ཛྷ་ནྟི, ཨ་ཉྙེ ཨ་ཉྙེ ཏུ ཛཱ་ཡ་རེ;
ཨ་ཝཱི་ཙི ཨ་ནུ་ས་མྦ་ནྡྷཱ, ན ཛཱ་ན་ནྟི ཝི་སེ་ས་ཏོ.
༡༥༤༧. ཨི་ཏི ནཱ་ན་པྤ་ཀཱ་རེ་ན, ཝི་པ་སྶ་ནྟོ ཝི་ཙ་ཀྑ་ཎོ;
ཨ་ནི་ཙྩ་བྷཱ་ཝ་ནཾ དྷཱི་རོ, པ་རི་པཱ་ཙེ་ཏི སཱ་དྷུ་ཀཾ.
༡༥༤༨. དུ་ཀྑཱ ཙ དུ་ཀྑ་ཝ་ཏྠཱུ ཙ, ཨ་བྷི་ཎྷ་པ་རི་པཱི་ལི༹་ཏཱ;
རོ་གཱ ག་ཎྜཱ ཙ ས་ལླཱ ཙ, ཨ་གྷ་ཏོ ཙ ཨུ་པ་དྡ་ཝཱ.
༡༥༤༩. བྷ་ཡོ་པ་ས་གྒཱ་གྷ་མཱུ་ལཱ,
སཱ་ས་ཝཱ་དཱི་ན་ཝཱི་ཏི་ཏཱ;
ཨ་ལེ་ཎཱ་ས་ར་ཎཱ་ཏཱ་ཎཱ,
ཝ་དྷ་ཀཱ མཱ་ར་ཀཱ་མི་སཱ.
༡༥༥༠. ཛཱ་ཏི་དྷ་མྨཱ ཛ་རཱ་བྱཱ་དྷི-
སོ་ཀོ་པཱ་ཡཱ་ས་བྷཱ་གི་ནོ;
པ་རི་དེ་ཝ་ས་བྷཱ་ཝཱ ཙ,
སཾ་ཀླེ་སཱ དུ་ཀྑ་བྷཱ་གི་ནོ.
༡༥༥༡. ཛེ་གུ་ཙྪཱ པ་ཊི་ཀཱུ་ལཱ ཙ, བཱི་བྷ་ཙྪཱ ཙ ཝི་རཱུ་པི་ནོ;
ཨ་ཛ་ཉྙཱ ཙ་པ་ལཱ ཧཱི་ནཱ, དུ་གྒ་ནྡྷཱ བཱ་ལ་སེ་ཝི་ཏཱ.
༡༥༥༢. སོ་ཀ་ནྟ་རི་ཀ་ཏཱ་ནི་ཙྩཾ, ཏ་ཎྷཱ་ཡ ཀ་ཌྜྷི་ཏཱ བྷུ་སཾ;
ཀ་པ་ཎཱ དུ་གྒ་ཏཱ དཱི་ནཱ, ཝི་པ་ནྣཱ ཙ ཝི་གྷཱ་ཏི་ནོ.
༡༥༥༣. ཨ་ཏྟ་ལཱ་བྷཾ ག་ཝེ་ས་ནྟི, ཏཾ་ཏཾ་པ་ཙྩ་ཡ་ནི་སྶི་ཏཱ;
དུ་ཀྑཱ་དྷི་ཊྛཱ་ན་མ་ཙྩ་ནྟཾ, ཛཱ་ཏཱ པུ་ན ཝི་ཧ་ཉྙ་རེ.
༡༥༥༤. ཨ་གྒི་ཀཱུ་པེ ནི་མུ་གྒཱ་ཝ, ཀླེ་ས་ས་ནྟཱ་པ་བྷཱ་གི་ནོ;
ཨོ་ཝི་དྡྷཱ ཝི་ཡ ས་ཏྟཱི་ཧི, ས་ངྑཱ་རཱ ནི་ཙྩ་དུ་ཀྑི་ཏཱ.
༡༥༥༥. ཛཱ་ཡ་མཱ་ནཱ ཙ ཛི་ཡྻ་ནྟཱ, མི་ཡྻ་ནྟཱ ཙ ཁ་ཎེ ཁ་ཎེ;
པ་སུ་ཀཱ ཝི་ཡ ནི་ཙྩ་མྨཱ, ཧ་ཉྙ་ནྟི སེ་རི་ཀཱ་ཏུ་རཱ.
༡༥༥༦. ཏི་ལཱ་ནི ཏི་ལ་ཡ་ནྟེ་ཝ, ཨུ་ཙྪུ་ཡ་ནྟེ་ཝ ཨུ་ཙྪུ་ཡོ;
ཨུ་ད་ཡ་བྦ་ཡཱ་ཝ་སྶཾ ཏེ, པཱི་ལ༹་ཡ་ནྟི ཨ་བྷི་ཎྷ་སོ.
༡༥༥༧. མ་ནོ་ར་མ་ན་ཝཱ་ཀཱ་རཱ, ཝི་པ་ལླཱ་ས་པ་རི་ཀྑ་ཏཱ;
ཨི་རི་ཡཱ་པ་ཐ་ས་ཉྪ་ནྣཱ, ནོ་པ་ཏི་ཊྛ་ནྟི དུ་ཀྑ་ཏོ.
༡༥༥༨. ས་ངྑཱ་རེ་སུ པ་ནེ་ཏེ་སུ, ཝེ་ད་ནཱ་སྶཱ་ད་རོ་དྷི་ནོ;
སཱ་ཝ ས་ནྡུ་ལ་ས་མྦ་དྡྷཱ, ས་མྨོ་ཧ་པ་རི་ཝཱ་རི་ཏཱ.
༡༥༥༩. ‘‘ཨ་དུཾ དུ་ཀྑ་མི་དཾ དུ་ཀྑ’’-མི་ཏི སཾ་སཱ་ར་ཙཱ་རི་ནོ;
དུ་ཀྑ་ཧེ་ཏུ་མ་ཛཱ་ན་ནྟཱ, ས་མྦྷ་མ་ནྟི ཨ་ཝི་དྡ་སུ.
༡༥༦༠. སུ་ཁཱ་ཀཱ་ར་མ་པ་སྶ་ནྟཱ, དུ་ཀྑ་བྷཱ་ར་ནི་པཱི་ལི༹་ཏཱ;
པ་ཏྠེ་ནྟི དུ་ཀྑ་མེ་ཝ་ཉྙཾ, བཱ་ལཱ བྱ་ས་ན་བྷཱ་གི་ནོ.
༡༥༦༡. ཙ་ཝ་ནྟཱ ཨུ་པ་པ་ཛྫ་ནྟཱ, རུ་ཀྑ་སཱ་ཁཾ་ཝ མ་ཀྐ་ཊོ;
དུ་ཀྑ་མེ་ཀཾ ཝི་མུ་ཙྩ་ནྟི, ཏ་ཏོ ག་ཎྷ་ནྟི ཙཱ་པ་རཾ.
༡༥༦༢. ཏེ དཱི་གྷ་ར་ཏྟཾ སོ་ཙ་ནྟི, ཏ་ཎྷཱ་ས་ལླ་ས་མ་པྤི་ཏཱ;
དི་ཊྛི་པཱ་ས་ས་མུ་པེ་ཏཱ, མཱ་ན་ཏྠ་མྦྷཱ་ནུ་སཱ་ཡི་ནོ.
༡༥༦༣. ཏ་མཱ་ཀཱ་རཾ པ་ནི་ཙྩེ་ཝཾ, ཝི་པ་སྶ་ནྟོ ཝི་སཱ་ར་དོ;
དུ་ཀྑཱ་ནུ་པ་སྶ་ནཾ ནཱ་མ, པ་རི་པཱ་ཙེ་ཏི བྷཱ་ཝ་ནཾ.
༡༥༦༤. དྷ་མྨ་ཊྛི་ཏི་ནི་ཡཱ་མཱ ཧི, ཁ་ནྡྷཱ་ཡ་ཏ་ན་དྷཱ་ཏུ་ཡོ;
ཨ་ན་ཏྟཱ་ས་སྶ་ཏ་ནྟཱ ཙ, ཨཱི་ཧཱ་བྷོ་ག་ཝི་ཝ་ཛྫི་ཏཱ.
༡༥༦༥. པ་ཡོ་ཛ་ན་མ་དྷི་ཊྛཱ་ཡ, ན ཏུ བྱཱ་པཱ་ར་ཡ་ནྟི ཙ;
པ་ཙྩ་ཡ་པ་ཙྩ་ཡུ་པྤ་ནྣཱ, ཛ་ནེ་ཏུཾ ཝཱ་ཐ ཛཱ་ཡི་ཏུཾ.
༡༥༦༦. ཏ་ཐཱ་པི ཧེ་ཏུ་སཱ་མ་གྒི-ས་མྦྷ་ཝེ ས་མྦྷ་ཝ་ནྟི ཏེ;
ཏ་བྦྷཱ་ཝ་བྷཱ་ཝི་བྷཱ་ཝེ་ན, ཨ་ཉྙ་མ་ཉྙ་པ་ཝ་ཏྟི་ཏཱ.
༡༥༦༧. ཨ་ཛཱ་ཡི་ཏུཾ ན ས་ཀྐོ་ནྟི, ས་ཏི པ་ཙྩ་ཡ་ས་མྦྷ་ཝེ;
པ་ཙྩ་ཡཱ་ན་མ་ལཱ་བྷེ ཏུ, ན ཛཱ་ཡ་ནྟི ཀུ་དཱ་ཙ་ནཾ.
༡༥༦༨. ན ཀི་ཉྩེ་ཏྠ ཨ་པེ་ཀྑི་ཏྭཱ, ས་མ་གྒཱ ཧོ་ནྟི པ་ཙྩ་ཡཱ;
ན ཛ་ནེ་ཏུཾ ན ས་ཀྐོ་ནྟི, ས་མ་གྒཱ ཙ ཀུ་དཱ་ཙ་ནཾ.
༡༥༦༩. ཡ་ཐཱ་པ་ཙྩ་ཡ་ལཱ་བྷེ་ན, པ་ཝ་ཏྟ་ནྟི ཡ་ཐཱ ཏ་ཐཱ;
ར་ཀྑི་ཏཱ ཝཱ ཝི་དྷཱ་ཏཱ ཝཱ, ན་ཏྠི ཨ་སྶཱ་མི་ཀཱ ཏ་ཐཱ.
༡༥༧༠. ‘‘ཨ་ཧཾ མ་མ’’ནྟི ག་ཎྷ་ནྟཱ, པ་རི་ཎཱ་མེ་ནྟི ཨ་ཉྙ་ཐཱ;
ཝི་སྶ་ས་ནྟཱ ཧ་ར་ནྟེ་ཏེ, པ་རཱ་བྷཱུ་ཏཱ པ་ལ་མྦྷི་ནོ.
༡༥༧༡. རི་ཏྟཱ ཏུ་ཙྪཱ ཙ སུ་ཉྙཱ ཙ, ཝི་ཝི་ཏྟཱ སཱ་ར་ཝ་ཛྫི་ཏཱ;
ས་ལ་ཀྑ་ཎ་པ་རི་ཙྪི་ནྣཱ, དྷ་མྨཱ ན་ཏྠེ་ཏྠ པུ་གྒ་ལོ.
༡༥༧༢. ཛཱ་ཡ་མཱ་ནཱ ཙ ཛི་ཡྻ་ནྟཱ, མི་ཡྻ་མཱ་ནཱ ཙ ས་ངྑ་ཏཱ;
ཝི་ཝ་སཱ པ་རི་ཝ་ཏྟ་ནྟི, ཝ་སོ ཏེ་སཾ ན ཀ་ཏྠ་ཙི.
༡༥༧༣. ན ཏེ་སུ ཀ་སྶ་ཙི་སྶེ་རཾ, ན ཏེ་ས་ཉྩ་ཏྠི ཀ་ཏྠ་ཙི;
ན ཙ་ཏྟ་ནཱི་ཏི ས་ངྑཱ་རཱ, ཨཱ་དྷི་པ་ཙྩ་ཝི་ཝ་ཛྫི་ཏཱ.
༡༥༧༤. ཀ་ད་ལཱི་པ་ཏྟ་ཝ་ཊྚཱི་ཝ, ཨ་ཉྙ་མ་ཉྙ་པ་ཏི་ཊྛི་ཏཱ;
ས་ཧ་ཛཱ་ཏ་གྒྷ་ནཱི་བྷཱུ་ཏཱ, ནོ་པ་ཊྛ་ནྟི ཨ་ན་ཏྟ་ཏོ.
༡༥༧༥. ཨ་རཱུ་པ་ནི་སྶི་ཏཾ རཱུ་པཾ, ཨ་རཱུ་པཾ རཱུ་པ་ནི་སྶི་ཏཾ;
ཛ་ཙྩ་ནྡྷ་པཱི་ཋ་ས་པྤཱི་ཝ, ཨ་ཉྙ་མ་ཉྙ་ཝ་ཝ་ཏྠི་ཏཾ.
༡༥༧༦. ཡ་ནྟ་སུ་ཏྟེ་ན ཡ་ནྟཾ་ཝ, ཀཱ་ཡ་ཡ་ནྟཾ པ་ཝ་ཏྟ་ཏི;
ནཱ་མཱ་ཝ་ཀ་ཌྜྷི་ཏཾ ཏ་ཏྠ, ན་ཏྠི ཨ་ཏྟཱ ས་ཡཾ་ཝ་སཱི.
༡༥༧༧. ཙེ་ཏོ་ཝི་པྥཱ་ར་ནི་པྥ་ནྣཱ, ཝཱ་ཡོ་དྷཱ་ཏུ་ས་མུ་ཊྛི་ཏཱ;
ཨི་རི་ཡཱ་པ་ཐ་ཝི་ཉྙ་ཏྟི་ཝི་ཀཱ་རཱ པཱ་ལ་ཀཱ མ་ཏཱ.