༡༠. ད་ས་མོ པ་རི་ཙྪེ་དོ
སེ་ས་ཀ་མྨ་ཊྛཱ་ན་ཝི་བྷཱ་གོ
༡༢༩༨. བྱཱ་པཱ་དཱ་དཱི་ན་ཝཾ དི་སྭཱ, ཁེ་མ་བྷཱ་ཝ་ཉྩ ཁ་ནྟི་ཡཾ;
ཨ་པྤ་མ་ཉྙཱ ཏུ བྷཱ་ཝེ་ནྟོ, ཝི་ནེ་ཡྻ པ་ཊི་གྷཾ ཀ་ཐཾ.
༡༢༩༩. ཙེ་ཏོ་ས་ནྟཱ་པ་ནོ ཀོ་དྷོ,
ས་མྤ་སཱ་ད་ཝི་ཀོ་པ་ནོ;
ཝི་རཱུ་པ་བཱི་བྷ་ཙྪ་ཀ་རོ,
མུ་ཁ་ཝ་ཎྞ་པྤ་དྷཾ་ས་ནོ.
༡༣༠༠. སཱི་ལ་ཀཱ་ལུ་སྶི་ཡུ་པྤཱ་དོ, ཙི་ཏྟ་ཝི་ཀྑེ་པ་ས་མྦྷ་ཝོ;
པ་ཉྙཱ་པ་ཛྫོ་ཏ་ཝི་དྡྷཾ་སཱི, པ་ཊི་པ་ཏྟི་ཝི་བ་ནྡྷ་ཀོ.
༡༣༠༡. ཨ་པཱ་ཡེ་ཀཱ་ཡ་ནོ མ་གྒོ, པཱ་པ་ཀ་ཎྚ་ཀ་བ་ནྡྷ་ཀོ;
དྷ་མྨ་མ་གྒ་ས་མུ་ཙྪེ་དཱི, མ་གྒ་དྭཱ་ར་པི་དྷཱ་ན་ཀོ.
༡༣༠༢. ཡ་སོ་ཝ་ཎྞ་ཝི་ས་ངྑཱ་རོ, གུ་ཎ་མཱུ་ལ་པྤ་བྷ་ཉྫ་ཀོ;
དུ་ཀྑ་དྷ་མྨ་ས་མོ་དྷཱ་ནོ, བྱ་ས་ནོ་པ་དྡ་ཝཱ་ཀ་རོ.
༡༣༠༣. དུ་ནྣི་མི་ཏྟ་མི་དཾ ཛཱ་ཏཾ, ས་བྦ་ས་མྤ་ཏྟི་དྷཾ་ས་ནཾ;
དྷཱུ་མ་ཀེ་ཏུ་ས་མུ་པྤཱ་དོ, ས་བྦ་ལོ་ཀ་ཝི་ནཱ་ས་ཀོ.
༡༣༠༤. ས་བྦ་ཀ་ལྱཱ་ཎ་དྷ་མྨཱ་ནཾ, ཨ་ཝ་མ་ངྒ་ལ་མུ་ཊྛི་ཏཾ;
ཧི་ཏཱ་ར་མྦྷ་ས་མུ་གྒྷཱ་ཏཱི, ཨ་ནྟ་རཱ་ཡ་ས་མཱ་ག་མོ.
༡༣༠༥. ས་བྦཱ་ཀཱ་ར་པ་ཊི་ཀྐཱུ་ལཾ, ས་བྦ་ཝི་དྡེ་ས་ཀཱ་ར་ཎཾ;
ཝི་པ་ཏྟི་མུ་ཁ་མུ་པྤ་ནྣཾ, ཨ་མི་ཏྟ་ཛ་ན་པ་ཏྠི་ཏཾ.
༡༣༠༦. ས་པ་ཏྟ་ཀ་ར་ཎཾ གྷོ་རཾ, ས་བྦཱ་ན་ཏྠ་ཝི་དྷཱ་ཡ་ཀཾ;
བྷ་ཡ་མ་ནྟ་ར་ཏོ ཛཱ་ཏཾ, ཏཾ ཛ་ནོ ནཱ་ཝ་བུ་ཛ྄ཛྷ་ཏི.
༡༣༠༧. ཁུ་ར་དྷཱ་རཾ ལི་ཧ་ནྟཱ་ཝ, གི་ལ་ནྟཱ་ཝ ཧུ་ཏཱ་ས་ནཾ;
ཏི་ཏྟ་ལཱ་བུཾ་ཝ ཁཱ་ད་ནྟཱ, ག་ཎྷ་ནྟཱ་དི་ཏྟ་མཱ་ཡུ་དྷཾ.
༡༣༠༨. བྱཱ་པཱ་ད་མ་ཏྟ་ས་མྦྷ་ཝ-མ་ཏྟ་གྷ་ཉྙཱ་ཡ ཀེ་ཝ་ལཾ;
ཨུ་པ་ལཱ་ལེ༹་ནྟི དུ་མྨེ་དྷཱ, གྷོ་ར་མཱ་སཱི་ཝི་སཾ ཡ་ཐཱ.
༡༣༠༩. དོ་ས་ཏེ་ཛེ་ན རུ་ཀྑོ་ཝ, སུ་སི་རཱ་རུ་ལ༹ྷ་པཱ་ཝ་ཀོ;
ཨ་ནྟོ་ནུ་ད་ཡ྄ཧ་མཱ་ནཱ་པི, ཝི་པྥ་ནྡ་ནྟི ཝི་གྷཱ་ཏི་ནོ.
༡༣༡༠. ནཱ་ཝ་བུ་ཛ྄ཛྷ་ནྟི དུ་མྨེ་དྷཱ, ཙེ་ཏོ་ས་ངྐ་པྤ་ཝཱ་ཡུ་ནཱ;
ཨུ་ཀྐཱ་མུ་ཁཱ་མི་ཝཱ་དི་ཏྟ-མུ་ཛྫ་ལ་ནྟཱ པུ་ན་པྤུ་ནཾ.
༡༣༡༡. བྷ་ཡ་མ་གྒ་ས་མཱ་རུ་ལ༹ྷཱ, ཁེ་མ་མ་གྒ་ཝི་རོ་དྷི་ནོ;
བྱཱ་པ་ནྣཱ ཀི་བྦི་སཱ་ཀི་ཎྞཱ, ཨ་ཏྠ་དྭ་ཡ་ཝི་རོ་དྷི་ནོ.
༡༣༡༢. ཨ་ནཱ་ཐཱ ས་ལླ་ཀཱ་ཝི་དྡྷཱ, ཝི་ས་ཊྚཱ ཨ་ནུ་སོ་ཙི་ནོ;
ཨ་ནྡྷཱ ཝི་ཡ མི་གཱ་ར་ཉྙེ, བྷ་མ་ནྟི ཧ་ཏ་ཙ་ཀྑུ་ཀཱ.
༡༣༡༣. ཨ་སཾ་ཝི་ཧི་ཏ་ཀ་མྨ་ནྟཱ, བཱ་ལཱ ཀོ་དྷ་ཝ་སཱ་ནུ་གཱ;
ཁི་པྤཾ ལ་ཀྑིཾ པ་རི་ཙྩ་ཏྟཱ, ཡ་སོ་བྷོ་གེ་ཧི དྷཾ་ས་རེ.
༡༣༡༤. དུ་པྤ་ཊི་པྤཱ་དི་ཏཱ་ར་མྦྷཱ, ཀོ་དྷ་ས་ངྑོ་བྷ་མོ་ཧི་ཏཱ;
དྷ་མྨཱ་མ་ཏ་ར་ས་སྶཱ་དཾ, ན ཝི་ནྡ་ནྟི ཨ་ཝི་དྡ་སུ.
༡༣༡༥. བ་ཧྭཱ་དཱི་ན་ཝ་མི་ཙྩེ་ཝ-མ་ནྟོ བྱཱ་དྷི་མི་ཝུ་ཊྛི་ཏཾ;
ཛཱ་ཏཱ་ན་ལ་མི་ཝུ་ཙྪ་ངྒེ, ཨ་ཛ྄ཛྷུ་པེ་ཀྑ་ནྟི དུ་ཛྫ་ནཱ.
༡༣༡༦. ཙོ་ད་ཡ་མཱ་ནཱ དུ་ཀྑེ་ཧི, ཀླེ་སཱ་ཙི་ཎྞ་མ་ལཱི་མ་ཧཱ;
པཱ་པ་ཀ་མྨེ་ཧི པཱུ་རེ་ནྟཱ, སེ་ནྟི མ་ཙྩུ་པ་ཐེ ཙི་རཾ.
༡༣༡༧. ཏ་མེ་ཝཾ པ་ཊི་ས་ངྑཱ་ཡ, པ་ཊི་གྷཾ པ་ན ཡོ་ནི་སོ;
ཝཱ་ལ༹་མི་གཾ་ཝ དྷཱ་ཝ་ནྟཾ, ཨཱ་ཝི་ས་ནྟཾ་ཝ ར་ཀྑ་སཾ.
༡༣༡༨. པཱ་ཝ་ཀཾ་ཝ པ་རི་བྱུ་ལ༹ྷཾ, བྷཱ་ཡ་མཱ་ན་སྶ ཡོ་གི་ནོ;
སོ་ཏྠི་བྷཱ་ཝཱ་ཡ ཁེ་མ་ནྟ-མུ་པ་ཉྙ་ཏྟཾ མ་ཧེ་སི་ནཱ.
༡༣༡༩. མཱ་ཏཱ ཀ་ལྱཱ་ཎ་དྷ་མྨཱ་ནཾ, ཁ་མཱ ནཱ་མ མ་ཧི་དྡྷི་ཀཱ;
ས་མ་པྤ་ཝ་ཏྟི ས་ཏྟེ་སུ, ས་བྦ་ས་མྤ་ཏྟི་སཱ་དྷི་ཀཱ.
༡༣༢༠. ཀོ་དྷཱ་ན་ལ་ཛ་ལཱ་སེ་ཀོ,
སོ་ཀོ་པཱ་ཡཱ་ས་ནཱ་ས་ནཾ;
ཨཱ་གྷཱ་ཏ་ས་ལླ་ནི་དྡྷཱ་རཱི,
ཨུ་པ་ནཱ་ཧ་ཝི་མོ་ཙ་ནཾ.
༡༣༢༡. ཝ་ཎྞ་ཀི་ཏྟི་ས་མུ་ཊྛཱ་ནཾ, གུ་ཎ་མཱུ་ལཱ་བྷི་སེ་ཝ་ནཾ;
ཨ་པཱ་རུ་ཏ་མུ་ཁཾ་ཝེ་ཏ-མ་ཏྠ་དྭ་ཡ་ས་མི་དྡྷི་ཡཱ.
༡༣༢༢. ཝི་གྷཱ་ཏ་པ་རི་ཡཱ་དཱ་ན-མཱ་ས་ཝཱ་ན་མ་སེ་ས་ཏོ;
པ་ཊི་པ་སྶ་མྦྷ་ནཾ ཙེ་ཏོ-པཱི་ཏི་ཀ་ར་ཎ་ཙ་ནྡ་ནཾ.
༡༣༢༣. ས་བྦ་དུ་ཀྑ་ས་མུ་གྒྷཱ་ཏི, སུ་ཁུ་པ་ཊྛཱ་ན་མུ་ཏྟ་མཾ;
བྱ་ས་ནོ་ད་ཡ་ཝི་ཙྪེ་དོ, བྷ་ཡ་བྷེ་ར་ཝ་ནི་གྒ་མོ.
༡༣༢༤. ཙེ་ཏོ་པ་སཱ་ད་ས་ནྡྷཱ་ནོ, པཱ་སཱ་དི་ཀ་ཕ་ལཱ་ཝ་ཧོ;
པ་ཝ་རོ བོ་དྷི་ས་མྦྷཱ་རོ, ན་རཱ་ན་ར་ནི་སེ་ཝི་ཏོ.
༡༣༢༥. པཱ་པ་ཀ་ནྟཱ་ར་ནི་ཏྠཱ་རོ, ཙ་ཏུ་རཱ་པཱ་ཡ་རོ་དྷ་ཀོ;
དྭཱ་རཱ་ཝཱ་པུ་ར་ཎ་ཉྩེ་ཏཾ, དེ་ཝ་ལོ་ཀཱུ་པ་པ་ཏྟི་ཡཱ.
༡༣༢༦. པ་ཉྙཱ་སཱི་ལ་ས་མཱ་དྷཱ་ནཾ, པ་ཊི་པ་ཏྟི་ཝི་སོ་དྷ་ནོ;
པི་ཡ་ངྐ་རོ སོ་མྨ་བྷཱ་ཝོ, དུ་ལླ་བྷོ བ་ཧུ་པ་ཏྠི་ཏོ.
༡༣༢༧. ཀླེ་ས་ས་ངྑོ་བྷ་ཝི་ཀྑེ་པ-ཝི་པྥ་ནྡ་པ་ཊི་བ་ནྡྷ་ནཾ;
ཏི་ཏི་ཀྑཱ་གུ་ཎ་མ་ཀྑཱ་ཏ-མཱ་ར་ཀྑ་ཝི་དྷི་མ་ཏྟ་ནོ.
༡༣༢༨. ཝི་ཧིཾ་སཱ་ར་ཏི་སཱ་ར་མྦྷ-པ་ཊི་རོ་དྷ་ཝི་མོ་ཙ་ནཾ;
ཝེ་རི་ཀི་བྦི་ས་ཝི་དྡྷཾ་སཱི, ལོ་ཀཱ་ནུ་གྒ་ཧ་ཀཱ་ར་ཎཾ.
༡༣༢༩. དྷ་མྨ་པ་ཛྫོ་ཏ་ཀ་ར་ཎཾ, སཾ་ཡོ་ག་མ་ལ་སོ་དྷ་ནཾ;
ས་མྨོ་ཧ་ཏི་མི་རུ་དྡྷཱ་རི, ས་མྤ་ཏྟི་པ་ཊི་པཱ་ད་ནཾ.
༡༣༣༠. ཨི་ཙྩ་ཏྟ་ཏྠཾ པ་ར་ཏྠ་ཉྩ, ས་མྤཱ་དེ་ཏྭཱ ཁ་མཱ་པ་རོ;
སཱ་དྷེ་ཏི ས་བྦ་ས་མྤ་ཏྟི-མི་དྷ ཙེ་ཝ པ་ར་ཏྠ ཙ.
༡༣༣༡. ཏི་ཏི་ཀྑཱ་གུ་ཎ་ས་མྤ་ནྣོ, པཱ་ཎ་བྷཱུ་ཏཱ་ནུ་ཀ་མྤ་ཀོ;
ཨ་ནཱ་ཀུ་ལི་ཏ་ཀ་མྨ་ནྟོ, སོ་ར་ཏོ ས་ཁི་ལོ སུ་ཙི.
༡༣༣༢. ནི་ཝཱ་ཏོ ས་མི་ཏཱ་ཙཱ་རོ, སུ་བྷ་གོ པི་ཡ་ད་སྶ་ནོ;
པ་ཊི་ས་ངྑཱ་བ་ལ་པྤ་ཏྟོ, དྷི་ཏི་མཱ མ་ཏི་པཱ་ཊ་ཝོ.
༡༣༣༣. ཨ་ཀྑོ་བྷོ ཨ་དྷི་ཝཱ་སེ་ནྟོ,
ས་བྦཱ་ན་ཏྠེ པ་རི་སྶ་ཡེ;
བྷཱི་མ་ས་ངྒཱ་མཱ་ཝ་ཙ་རོ,
ཧ་ཏྠི་ནཱ་གོ་ཝ སོ་བྷ་ཏི.
༡༣༣༤. ཨི་ཏྠཾ ས་མ་ནྟ་ཏོ བྷ་དྡཾ, ཏི་ཏི་ཀྑཾ པ་ཙྩ་ཝེ་ཀྑ་ཏོ;
པ་སྶ་མྦྷེ་ཏི ས་མུ་ཊྛཱ་ཡ, ཁ་མཱ བྱཱ་པཱ་ད་ས་མྦྷ་མཾ.
༡༣༣༥. དི་བྦོ་ས་དྷ་མི་ཝཱ་ཏ་ངྐཾ, མེ་གྷ་ཛྫ་ཝཾ ཧུ་ཏཱ་ས་ནཾ;
ཁི་པྤ་མ་ནྟ་ར་དྷཱ་པེ་ཏི, ཏི་ཏི་ཀྑཱ ཀོ་དྷ་མ་ཏྟ་ནོ.
༡༣༣༦. ཏ་ཏོ་ནེ་ཀ་གུ་ཎོ་པེ་ཏཾ, ནེ་ཀ་དོ་ས་པྤ་བྷ་ཉྫ་ནཾ;
ཁ་ནྟི་དྷ་མྨ་མ་དྷི་ཊྛཱ་ཡ, པ་ས་ནྣ་དྷཱི་ར་མཱ་ན་སོ.
༡༣༣༧. བྷཱ་ཝེ་ཡྻ པ་ཋ་མཾ ཏཱ་ཝ, མེ་ཏྟཱ་བྷཱ་ཝ་ནམུ་ཏྟ་མཾ;
ཨ་ཏྟཱ་ན་མུ་པ་མཾ ཀ་ཏྭཱ, ས་ཏྟེ་སུ ཧི་ཏ་ཝུ་ཌྜྷི་ཡཱ.
༡༣༣༨. ས་བྦེ ས་ཏྟཱ ཙ པཱ་ཎཱ ཙ, བྷཱུ་ཏཱ ཛཱི་ཝཱ ཙ པུ་གྒ་ལཱ;
ཨ་བྱཱ་པ་ཛྫཱ ཏ་ཐཱ་ཝེ་རཱ, ཨ་ནཱི་གྷཱ ཙ སུ་ཁེ་དྷི་ནོ.
༡༣༣༩. ཝི་ཛྫཱ་ས་མྤ་ཏྟི་བྷོ་གེ་ཧི, པ་ཝ་ཌྜྷ་ནྟུ ཡ་ས་སྶི་ནོ;
པ་རི་ཝཱ་ར་བ་ལ་པྤ་ཏྟཱ, བྷ་ཡོ་པ་དྡ་ཝ་ཝ་ཛྫི་ཏཱ.
༡༣༤༠. ས་ཁི་ལཱ སུ་ཁ་ས་མྦྷཱ་སཱ, ཨ་ཉྙ་མ་ཉྙཱ་ཝི་རོ་དྷི་ནོ;
མོ་ད་ནྟུ སུ་ཧི་ཏཱ ས་བྦེ, མཱ ཀི་ཉྩི པཱ་པ་མཱ་ག་མཱ.
༡༣༤༡. ས་དྡྷཱ་པཱ་མོ་ཛྫ་བ་ཧུ་ལཱ, དཱ་ན་སཱི་ལ་མ་ཧུ་སྶ་ཝཱ;
གུ་ཎ་བྷཱུ་སི་ཏ་ས་ནྟཱ་ནཱ, ཨཱ་ཡུཾ པཱ་ལེ་ནྟ་ནཱ་མ་ཡཾ.
༡༣༤༢. ས་མྨཱ་དི་ཊྛིཾ པུ་རོ་དྷཱ་ཡ, ས་དྡྷ་མྨ་པ་ཊི་པ་ཏྟི་ཡཱ;
ཨཱ་རཱ་དྷེ་ནྟུ ཧི་ཏོ་པཱ་ཡ-མ་ཙྩ་ནྟཾ སུ་ཁ་སཱ་དྷ་ནཾ.
༡༣༤༣. ཨི་ཏི ནཱ་ན་པྤ་ཀཱ་རེ་ན, ས་ཏྟེ་སུ ཧི་ཏ་མཱ་ན་སཾ;
མཱ་ཏཱ་ཝ པི་ཡ་པུ་ཏྟ་མྷི, པ་ཝ་ཏྟེ་ཡྻ ནི་ར་ནྟ་རཾ.
༡༣༤༤. སི་ནེ་ཧཾ པ་རི་ཝ་ཛྫེ་ནྟོ, བྱཱ་པཱ་ད་ཉྩ ཝི་ནཱ་ས་ཡཾ;
པ་རི་སུ་དྡྷེ་ན ཙི་ཏྟེ་ན, ཧི་ཏ་ཀཱ་མོ་ཝ ཀེ་ཝ་ལཾ.
༡༣༤༥. མེ་ཏྟཱ་ཡ མི་ཏྟེ མ་ཛ྄ཛྷ་ཏྟེ, ཝེ་རི་ཀེ ཙ ཡ་ཐཱ་ཀྐ་མཾ;
ཀ་རོ་ནྟོ སཱི་མ་ས་མྦྷེ་དཾ, ཨ་ཏྟ་ནི ཙ ས་མཾ ཕ་རེ.
༡༣༤༦. ཨཱ་སེ་ཝ་ནྟ་སྶ ཏ་སྶེ་ཝཾ, ཧི་ཏཱ་བྷོ་ག་ས་མཱ་ཧི་ཏཾ;
ས་ཏྟ་པ་ཉྙ་ཏྟི་མཱ་ར་བྦྷ, ས་མཱ་དྷི་ཡ་ཏི མཱ་ན་སཾ.
༡༣༤༧. ཏ་ཏོ ཨ་ནཱི་གྷོ ཨེ་ཀ་གྒོ, ཨུ་པ་ས་ནྟ་མ་ནོ་ར་ཐོ;
ཛྷཱ་ན་ཏྟི་ཀཾ ཙ་ཏུ་ཀྐཾ ཝཱ, མེ་ཏྟཱ་ཙེ་ཏོ་ཝི་མུ་ཏྟི་ཡཱ.
༡༣༤༨. བྷཱུ་མི་དེ་ས་དི་སཱ་ས་ཏྟ-བྷེ་ད་བྷི་ནྣེ་སུ ཨོ་དྷི་སོ;
ཡ་ཐཱ་ས་མྦྷ་ཝ་མ་པྤེ་ཏི, ས་བྦ་ས་ཏྟེ་སྭ་ནོ་དྷི་སོ.
༡༣༤༩. ཏ་དེ་ཝ་མེ་ཀ་ས་ཏྟ་མྷི, པ་རི་ཙྪེ་ད་ནི་ཡཱ་མ་ཏོ;
བ་ཧུ་ཀེ་སུ ཙ ས་ཏྟེ་སུ, ས་བྦེ་སུ ཙ པ་ཝ་ཏྟ་ཏི.
༡༣༥༠. ཏ་ཐཱ་སེ་ཝི་ཏ་ས་ནྟཱ་ནོ,
མེ་ཏྟཱ་ཙེ་ཏོ་ཝི་མུ་ཏྟི་ཡཱ;
ཀ་རུ་ཎཱ་བྷཱ་ཝ་ནཱཡོ་ག-
མཱ་ར་བྷེ་ཡྻ ཏ་ཏོ པ་རཾ.
༡༣༥༡. ས་ཏྟཱ་ནཾ དུ་ཀྑི་ཏཱ་ཀཱ་ར-མཱ་ཝ་ཛྫི་ཏྭཱ་ན ཡོ་ནི་སོ;
‘‘ཨ་ཧོ དུ་ཀྑཱ ཝི་མུ་ཙྩ་ནྟུ, ས་བྦེ ས་ཏྟཱ’’ཏི ཙི་ནྟ་ཡཾ.
༡༣༥༢. ཀ་ཐཾ མཱ་ཎ་ཝ་ཀོ་ཡ་ཉྩ, བྷ་ཡ་བྷེ་ར་ཝ་ཀ་མྤི་ཏོ;
བྱ་ས་ནོ་པ་དྡ་ཝཱ་ཝི་དྡྷོ, ཝི་པྥ་ནྡ་ཏི ཝི་གྷཱ་ཏ་ཝཱ.
༡༣༥༣. ཏ་ཐཱ ཧེ་ཏེ ཝི་མོ་སཱ་ཡ, པ་ཊི་པ་ནྣཱ ཝི་རོ་དྷི་ནོ;
ས་བྱཱ་པ་ཛྫཱ ཝི་ཧ་ཉྙ་ནྟི, ཙེ་ཏོ་དུ་ཀྑ་ས་མ་པྤི་ཏཱ.
༡༣༥༤. ཨ་ཐ་ཉྙེ པ་རི་དེ་ཝ་ནྟི, ཝི་པ་ཏྟི་ཝི་ནི་པཱ་ཏི་ཀཱ;
པ་དྷུ་པཱ་ཡི་ཀ་ས་ངྐ་པྤཱ, སོ་ཀོ་པཱ་ཡཱ་ས་བྷཱ་གི་ནོ.
༡༣༥༥. ཨ་ཐཱ་པ་རེ པ་རཱ་བྷཱུ་ཏཱ, ཀཱ་མ་ཀླེ་ས་ཝ་སཱི་ཀ་ཏཱ;
མོ་ཧ་ནྡྷ་ཀཱ་ར་པ་ཀྑ་ནྟཱ, ས་ཏྟཱ ག་ཙྪ་ནྟི དུ་གྒ་ཏིཾ.
༡༣༥༦. ཏེ ཏ་ཏྠ ཀ་ཊུ་ཀཾ གྷོ་ར་མ་ནུ་བྷོ་ནྟཱ ས་ཀཾ ཕ་ལཾ;
དུ་ཀྑ་སཱུ་ལ་ས་མཱ་ཝི་དྡྷཱ, བཱ་ཧཱ པ་གྒ་ཡ྄ཧ ཀ་ནྡ་རེ.
༡༣༥༧. དཱི་གྷ་ར་ཏྟཱ་དྷི་མུ་ཏྟཱ་ཡ, དེ་ཝ་ལོ་ཀ་ས་མི་དྡྷི་ཡཱ;
དེ་ཝ་ཀཱ་ཡཱ ཝི་ཧཱ་ཡ་ནྟི, ཨ་ཀཱ་མཱ པ་རི་ཝ་ཏྟི་ནོ.
༡༣༥༨. ཙི་ར་ཀཱ་ལཾ ཛ་ལི་ཏྭཱ་ན, སཱུ་རི་ཡོ་ཝ ན་བྷ་ནྟ་རེ;
བྲ་ཧྨཱ་ནོ་པི པ་ཏ་ནྟེ་ཝ, བྲ་ཧྨ་ལོ་ཀཱ་པ་རཱ་ཡ་ཎཱ.
༡༣༥༩. ཁ་ནྡྷ་པ་ཉྩ་ཀ་མི་ཙྩེ་ཝཾ, དུ་ཀྑཱ་གཱ་རཾ ས་མུ་བྦ་ཧཾ;
ནཱ་ནཱ་ག་ཏཱི་སུ ཝི་ཀྑི་ཏྟཾ, པཱ་ཎ་ཛཱ་ཏཾ ཝི་ཧ་ཉྙ་ཏི.
༡༣༦༠. ཨ་ནཱ་ཐ་མ་ན་ཡཱ་པ་ནྣཾ, པ་རི་ཧཱ་ནི་བྷ་ཡཱ་ཀུ་ལཾ;
ཝཱ་ཏ་མ་ཎྜ་ལི་ཀ་ཀྑི་ཏྟ་པ་ཀྑཱི་ཝ པ་རི་ཝ་ཏྟ་ཏི.
༡༣༦༡. ཨི་ཏི དི་སྭཱ་ན སུ་ཏྭཱ ཝཱ, ས་མྦྷཱ་ཝེ་ཏྭཱ་ན ཝཱ པུ་ན;
དུ་ཀྑཱ་པ་ག་མ་མི་ཙྪ་ནྟོ, དུ་ཀྑཱ་པ་ག་མ པ་ཏྠ་ཡཾ.
༡༣༦༢. སུ་ཁི་ཏེ་སུ ཙ མེ་དྷཱ་ཝཱི, དུ་ཀྑཱ་ཀཱ་ར་མ་ནུ་སྶ་རཾ;
པ་ཝ་ཏྟེ་ཡྻ ད་ཡཱ་པ་ནྣོ, ཀ་རུ་ཎཱ་བྷཱ་ཝ་ན་པྤ་ནཾ.
༡༣༦༣. ‘‘ཨ་ཧོ ས་ཏྟཱ ཝི་མུ་ཙྩ་ནྟུ, དུ་ཀྑ་དྷ་མྨེ་ཧི ས་བྦ་ཐཱ;
སཱ་དྷུ ས་མེ་ནྟུ་པཱ་ཡཱ་སཱ, སོ་ཀཱ ཙ པ་རི་དེ་ཝ་ནཱ.
༡༣༦༤. ‘‘ཁཱི་ཡ་ནྟུ པཱ་པ་དྷ་མྨཱ ཙ, པ་སྶ་མྦྷེ་ནྟཱ་མ་ཡཱ ཏ་ཐཱ;
སཾ་ཀླེ་སཱ པ་ལི་བོ་དྷཱ ཙ, ས་མུ་ཙྪི་ཛྫ་ནྟུ པཱ་ཎི་ནཾ.
༡༣༦༥. ‘‘བྱཱ་པཱ་དཱ ཙ ཝི་ཧཱ་ཡ་ནྟུ, ཝི་ནི་ཝ་ཏྟ་ནྟུ་པ་དྡ་ཝཱ;
བྱ་ས་ནཱ་ནི ཝི་ན་སྶ་ནྟུ, ཝི་ག་ཙྪ་ནྟུ ཝི་པ་ཏྟི་ཡོ.
༡༣༦༦. ‘‘ཝི་ཧེ་སཱ ཙ ཝི་གྷཱ་ཏཱ ཙ, ཁཱི་ཡ་ནྟུ བྷ་ཡ་བྷེ་ར་ཝཱ;
པ་ཊི་ཀྐ་མ་ནྟུ ཝི་སྶ་ཊྛཱ, སོ་ཏྠིཾ པ་སྶ་ནྟུ པཱ་ཎི་ནོ’’.
༡༣༦༧. ཨི་ཙྩེ་ཝ་མ་ནུ་ཀ་མྤ་ནྟོ, ས་བྦ་ས་ཏྟེ་པི ས་བྦ་ཐཱ;
ས་བྦ་དུ་ཀྑ་ས་མུ་གྒྷཱ་ཏཾ, པ་ཏྠེ་ནྟོ ཀ་རུ་ཎཱ་ཡ་ཏི.