༩. ན་ཝ་མོ པ་རི་ཙྪེ་དོ
ད་སཱ་ནུ་སྶ་ཏི་ཝི་བྷཱ་གོ
༡༡༠༠. ས་དྡྷཱ་པ་བྦ་ཛི་ཏོ ཡོ་གཱི, བྷཱ་ཝེ་ནྟོ་ནུ་སྶ་ཏིཾ པ་ན;
ད་སཱ་ནུ་སྶ་ཏི་བྷེ་དེ་སུ, བྷཱ་ཝེ་ཡྻ་ཉྙ་ཏ་རཾ ཀ་ཐཾ.
༡༡༠༡. ཨ་ར་ཧཾ སུ་ག་ཏོ ལོ་ཀེ, བྷ་ག་ཝཱ ལོ་ཀ་པཱ་ར་གཱུ;
ཝི་ཛྫཱ་ཙ་ར་ཎ་ས་མྤ་ནྣོ, ཝི་མུ་ཏྟི་པ་རི་ནཱ་ཡ་ཀོ.
༡༡༠༢. ཛེ་ཊྛོ ས་མྨཱ་བྷི་ས་མྦུ་དྡྷོ, སེ་ཊྛོ པུ་རི་ས་སཱ་ར་ཐཱི;
ས་ཏྠཱ དེ་ཝ་མ་ནུ་སྶཱ་ནཾ, བུ་དྡྷོ ཨ་པྤ་ཊི་པུ་གྒ་ལོ.
༡༡༠༣. ས་བྦ་ལོ་ཀ་ཧི་ཏོ བ་ནྡྷུ, ས་མ་ཏྟ་ར་ཏ་ནཱ་ལ་ཡོ;
ས་ཏྟཱ་ན་མ་ནུ་ཀ་མྤཱ་ཡ, ཛཱ་ཏོ ནཱ་ཐོ སི་ཝཾ་ཀ་རོ.
༡༡༠༤. ཙ་ཀྑུ་མཱ ཏི་ཏྠ་ཀུ་ས་ལོ, དྷ་མྨ་སྶཱ་མཱི ཏ་ཐཱ་ག་ཏོ;
མ་ཙྩུ་དྷེ་ཡྻ་ཝི་མོ་ཀྑཱ་ཡ, པ་ཊི་པཱ་ད་ཡི པཱ་ཎི་ནོ.
༡༡༠༥. ས་ཏྠ་ཝཱ་ཧོ མ་ཧཱ་ཡོ་གྒོ, མ་གྒཱ་མ་གྒ་ཡུ་དྷ་ནྡྷ་རོ;
སི་རི་ས་ཏྠ་མ་དྷི་གྒ་ཡ྄ཧ, ཝི་ཙ་རི་ཏྠ མ་ཧཱ་པ་ཐཾ,
༡༡༠༦. ཨ་ནོ་མོ ཨ་ས་མོ དྷཱི་རོ,
ལོ་ཀ་ཧཱི་ཏ་པ་ར་ཀྐ་མོ;
ས་བྦཱ་ཀཱ་ར་ཝ་རོ་པེ་ཏོ,
ཨ་ཙྪེ་ར་བྦྷུ་ཏ་པུ་གྒ་ལོ.
༡༡༠༧. ཨ་ཏྠ་བྷཱུ་ཏོ དྷ་མྨ་བྷཱུ་ཏོ,
བྲ་ཧྨ་བྷཱུ་ཏོ མ་ཧཱ་ཡ་སོ;
ཉཱ་ཎཱ་ལོ་ཀ་པ་རི་ཙྪི་ནྣ-
ཉེ་ཡྻཱ་སེ་ས་པ་རི་གྒ་ཧོ.
༡༡༠༨. ཨཱ་ནུ་བྷཱ་ཝ་ཝ་སི་པྤ་ཏྟོ, ཨཱ་ས་བྷ་ཎྜཱ་ན་ནི་ཙྩ་ལོ;
མ་ཧ་ནྟ་མ་རི་ཡཱ་དོ་ཡ་མ་ན་ནྟ་ག་ཏི་གོ་ཙ་རོ.
༡༡༠༩. ས་བྦཱ བྷི་ཉྙཱ་བ་ལ་པྤ་ཏྟོ, ཝེ་སཱ་ར་ཛྫ་ཝི་སཱ་ར་དོ;
ས་བྦ་ས་མྤ་ཏྟི་ནི་ཊྛཱ་ནོ, གུ་ཎ་པཱ་ར་མི་པཱུ་ར་ཀོ.
༡༡༡༠. ཨ་པྤ་མེ་ཡྻོ མ་ཧཱ་ནཱ་གོ, མ་ཧཱ་ཝཱི་རོ མ་ཧཱ་མུ་ནི;
མ་ཧེ་སཱི མ་ཧི་ཏཱ་ཙཱ་རོ, མ་ཧཱ་མ་ཧོ མ་ཧི་དྡྷི་ཀོ.
༡༡༡༡. ས་བྦ་ཏྠ་སི་དྡྷི་ས་ཉྩཱ་རོ, མ་ཧེ་སཱི་ག་ཎ་པཱུ་ཛི་ཏོ;
རཱ་ཛཱ་དྷི་རཱ་ཛ་མ་ཧི་ཏོ, དེ་ཝ་བྲ་ཧྨཱ་བྷི་ཝ་ནྡི་ཏོ.
༡༡༡༢. ཨ་བྷི་བྷཱུ་ཡ ཏ་ཡོ ལོ་ཀེ, ཨཱ་དི་ཙྩོ་ཝ ན་བྷ་ནྟ་རེ;
ཝི་རོ་ཙ་ཏི མ་ཧཱ་ཏེ་ཛོ, ཨ་ནྡྷ་ཀཱ་རེ པ་བྷ་ངྐ་རོ.
༡༡༡༣. བྱཱ་མ་པྤ་བྷཱ་པ་རི་ཀྑི་ཏྟོ, ཀེ་ཏུ་མཱ་ལཱ་ཧ་ལ་ངྐ་ཏོ;
དྭ་ཏྟིཾ་ས་ལ་ཀྑ་ཎཱ་སཱི་ཏི་ཨ་ནུ་བྱ་ཉྫ་ན་སོ་བྷི་ཏོ.
༡༡༡༤. ཚ་བྦ་ཎྞ་རཾ་སི་ལ་ལི་ཏོ, ར་ཏ་ན་གྒྷི་ཡ་ས་ནྣི་བྷོ;
ས་མི་དྡྷི་རཱུ་པ་སོ་བྷ་གྒོ, ད་སྶ་ནེ་ཡྻཾ་ཝ པི་ཎྜི་ཏཾ.
༡༡༡༥. ཕུ་ལླཾ པ་དུ་མ་ས་ཎྜཾ་ཝ, ཀ་པྤ་རུ་ཀྑོ་ཝ་ལ་ངྐ་ཏོ;
ན་བྷཾ་ཝ ཏཱ་ར་ཀཱ་ཀི་ཎྞཾ, ཨུ་ཏྟ་མོ པ་ཊི་དི་སྶ་ཏི.
༡༡༡༦. ས་ཏྠུ་ཀ་པྤ་མ་ཧཱ་ཝཱི་ར་པུ་ཏྟེ་ཧི པ་རི་ཝཱ་རི་ཏོ;
ས་བྦ་ལོ་ཀ་མ་ཧི་དྡྷཱ་ཡ, དྷ་མྨ་རཱ་ཛཱ ས་ཡཾ་ཝ་སཱི.
༡༡༡༧. ནི་དྡྷོ་ཏ་མ་ལ་ཙ་ནྡོ་ཝ, ན་ཀྑ་ཏྟ་པ་རི་ཝཱ་རི་ཏོ;
ཁ་ཏྟ་ས་ངྒྷ་པ་རི་བྱུ་ལ༹ྷོ, ཙ་ཀྐ་ཝ་ཏྟཱི་ཝ སོ་བྷ་ཏི.
༡༡༡༨. ཨི་ཙྩཱ་ན་ནྟ་གུ་ཎཱ་ཀི་ཎྞ་མ་སེ་ས་མ་ལ་ནི་སྶ་ཊཾ;
ས་བྦ་ས་མྤ་ཏྟི་དཱ་ཏཱ་རཾ, ཝི་པ་ཏྟི་ཝི་ནི་བ་ནྡྷ་ཀཾ.
༡༡༡༩. ད་ཡཱ་པ་ར་མ་ཧོ་ར་ཏྟཾ, བྷ་ག་ཝ་ནྟ་མ་ནུ་སྶ་རཾ;
བྷཱ་ཝེ་ཏི པ་ཉྙ་ཝཱ ཡོ་གཱི, བུ་དྡྷཱ་ནུ་སྶ་ཏི་བྷཱ་ཝ་ནཾ.
༡༡༢༠. སྭཱ་ཁཱ་ཏོ ཏེ་ན ས་དྡྷ་མྨོ, ས་མྦུ་དྡྷེ་ན ས་ཏཱི་མ་ཏཱ;
པ་ཙྩ་ཏྟ་པ་ཊི་ཝེ་དྷེ་ན, པ་སྶི་ཏ་བྦོ ཡ་ཐཱ་ར་ཧཾ.
༡༡༢༡. ཏ་ཎྷཱ་ད་ལི་དྡ་ནཱ་སཱ་ཡ, མ་ནོ་ར་ཐ་ས་མི་དྡྷི་ཡཱ;
ཀཱ་ལ་ནྟ་ར་མ་ནཱ་ག་མྨ, པ་ཙྩ་ཀྑ་ཕ་ལ་དཱ་ཡ་ཀོ.
༡༡༢༢. ཨུ་པ་ནི་སྶ་ཡ་ཝ་ནྟཱ་ནཾ, ‘‘ཨེ་ཧི པ་སྶཱ’’ཏི ད་སྶི་ཡོ;
པ་ཙྩ་ཏྟ་མེ་ཝ ཝི་ཉྙཱུ་ཧི, ཝེ་དི་ཏ་བྦོ ས་བྷཱ་ཝ་ཏོ.
༡༡༢༣. ས་བྦཱ་ས་ཝ་ས་མུ་གྒྷཱ་ཏཱི, སུ་དྡྷོ སོ་ཝ་ཏྠི་ཀོ སི་ཝོ;
པི་ཧི་ཏཱ་པཱ་ཡ་ཀུ་མྨ་གྒོ, མ་གྒོ ནི་བྦཱ་ན་པ་ཏྟི་ཡཱ.
༡༡༢༤. ཀླེ་ས་སཾ་ཀ་ཊ་དུ་གྒ་མྷཱ, དུ་ཀྑ་ཀྑ་ནྡྷ་མ་ཧ་བྦྷ་ཡཱ;
ཁེ་མ་ནྟ་བྷཱུ་མིཾ ནི་ཡྻཱ་ཏི, ཨ་ཙྩ་ནྟ་མ་ནུ་པ་དྡ་ཝཾ.
༡༡༢༥. པུ་ཉྙ་ཏི་ཏྠ་མི་དཾ ནཱ་མ, མ་ངྒ་ལ་ཉྩ སི་ཝ་ངྐ་རཾ;
ཧི་ཏོ་ད་ཡ་སུ་ཁཱ་དྷཱ་ན-མ་མ་ཏཱ་ཧཱ་ར་མུ་ཏྟ་མཾ.
༡༡༢༦. ཨ་ཝི་ཛྫཱ་པ་ཊ་ལུ་དྡྷཱ་ར་ཝི་ཛྫཱ་ནེ་ཏྟོ་ས་དྷཾ ཝ་རཾ;
པ་ཉྙཱ་དྷཱ་ར་མི་དཾ ས་ཏྠཾ, ཀླེ་ས་ག་ཎྜ་པྤ་བྷེ་ད་ཀཾ.
༡༡༢༧. ཙ་ཏུ་རོ་གྷ་ནི་མུ་གྒཱ་ནཾ, སེ་ཏུ་བ་ནྡྷོ ས་མུ་གྒ་ཏོ;
བྷ་ཝ་ཙཱ་ར་ཀ་རུ་དྡྷཱ་ནཾ, མ་ཧཱ་དྭཱ་རོ ཨ་པཱ་རུ་ཏོ.
༡༡༢༨. སོ་ཀོ་པཱ་ཡཱ་ས་ཝི་དྡྷཱ་ནཾ, པ་རི་དེ་ཝ་ས་མ་ངྒི་ནཾ;
ས་ལླ་ནཱི་ཧ་ར་ཎོ་པཱ་ཡོ, ཨ་ཙྩ་ནྟ་སུ་ཁ་མཱི་རི་ཏོ.
༡༡༢༩. བྱ་ས་ནོ་པ་དྡ་ཝཱ་པེ་ཏོ, སཾ་ཀླེ་ས་མ་ལ་ནི་སྶ་ཊོ;
ཨུ་ཛུ་ས་མྨ་ཏྟ་ནི་ཡ་ཏོ, པ་ཊི་པ་ཏྟི་ཝི་སུ་དྡྷི་ཡཱ.
༡༡༣༠. སུ་དྡྷ་སཱི་ལ་པ་རི་ཀྑཱ་རོ, ས་མཱ་དྷི་མ་ཡ་པ་ཉྫ་རོ;
ས་མྨཱ་ས་ངྐ་པྤ་ཙ་ཀྐ་ངྒོ, ས་མྨཱ་ཝཱ་ཡཱ་མ་ཝཱ་ཧ་ནོ.
༡༡༣༡. ས་ཏི་སཱ་ར་ཐི་སཾ་ཡུ་ཏྟོ, ས་མྨཱ་དི་ཊྛི་པུ་རེ་ཛ་ཝོ;
ཨེ་ས དྷ་མྨ་ར་ཐོ ཡཱ་ཏི, ཡོ་ག་ཀྑེ་མ་སྶ པ་ཏྟི་ཡཱ.
༡༡༣༢. ཝི་པ་ཏྟི་པ་ཊི་བཱ་ཧཱ་ཡ, ས་བྦ་ས་མྤ་ཏྟི་སི་དྡྷི་ཡཱ;
ས་བྦ་ཁ་ནྡྷ་ཝི་མོ་ཀྑཱ་ཡ, དྷ་མྨཾ དེ་སེ་སི ཙ་ཀྑུ་མཱ.
༡༡༣༣. ཧི་ཏེ་སཱི ས་བྦ་པཱ་ཎཱི་ནཾ, ད་ཡཱ་པ་ནྣོ མ་ཧཱ་མུ་ནི;
དྷ་མྨཱ་ལོ་ཀཾ པ་ཀཱ་སེ་སི, ཙ་ཀྑུ་མ་ནྟཱ་ན་མུ་ཏྟ་མོ.
༡༡༣༤. ཡཾ དྷ་མྨཾ ས་མྨ་ད་ཉྙཱ་ཡ, ཁེ་མ་མ་གྒ་པྤ་ཏི་ཊྛི་ཏཱ;
པཱ་པ་ཀཱ་པ་ག་ཏཱ དྷཱི་རཱ, པ་སྶ་དྡྷི་ད་ར་ཐཱ་ས་ཡཱ.
༡༡༣༥. བྷ་ཝ་ཡོ་གཱ ཝི་ནི་མུ་ཏྟཱ, པ་ཧཱི་ན་བྷ་ཡ་བྷེ་ར་ཝཱ;
ཨ་ཙྩ་ནྟ་སུ་ཁ་མེ་དྷེ་ནྟི, སོ་ཏྠི་པ་ཏྟཱ མ་ཧེ་ས་ཡོ.
༡༡༣༦. ཏ་མེ་ཝ་མུ་ཏྟ་མཾ དྷ་མྨཾ, ཙི་ནྟེ་ནྟོ པ་ན པ་ཎྜི་ཏོ;
བྷཱ་ཝེ་ཏཱི་ཏི པ་ཀཱ་སེ་ནྟི, དྷ་མྨཱ་ནུ་སྶ་ཏི་བྷཱ་ཝ་ནཾ.
༡༡༣༧. ཙ་ཏྟཱ་རོ ཙ པ་ཊི་པ་ནྣཱ, ཙ་ཏྟཱ་རོ ཙ ཕ་ལེ ཋི་ཏཱ;
ཨེ་ས ས་ངྒྷོ ཨུ་ཛུ་བྷཱུ་ཏོ, པ་ཉྙཱ་སཱི་ལ་ས་མཱ་ཧི་ཏོ.
༡༡༣༨. པ་ལཱ་པཱ་པ་ག་ཏོ སུ་དྡྷོ, པ་ཊི་པ་ཏྟི་པ་ཏི་ཊྛི་ཏོ;
པ་རི་གྒ་ཧི་ཏ་ས་དྡྷ་མྨོ, ས་མི་དྡྷི་གུ་ཎ་སོ་བྷི་ཏོ.
༡༡༣༩. པ་ཧཱི་ནཱ་པཱ་ཡ་ག་མ་ནོ, པཱ་པ་ཀླེ་ས་ཝི་ནི་སྶ་ཊོ;
པ་རི་པ་ནྠ་ས་མུ་ཙྪེ་དཱི, བྷ་ཝ་ཙཱ་ར་ཀ་བྷེ་ད་ཀོ.
༡༡༤༠. ཨུ་ཏྟ་མ་ད་མ་ཐ་པྤ་ཏྟོ, སུ་ཝི་ནཱི་ཏོ མ་ཧེ་སི་ནཱ;
ཝི་ཛྫཱ་ཝི་མུ་ཏྟི་ཝོ་དཱ་ཏོ, ཨཱ་ཛཱ་ནཱི་ཡ་པ་ཐེ ཋི་ཏོ.
༡༡༤༡. སུ་ག་ཏོ་ར་སི ས་མྦྷཱུ་ཏོ, སུ་ཙི་དྷ་མྨ་སི་རི་ནྡྷ་རོ;
པ་ཊི་པཱ་དི་ཏ་ས་མྤ་ཏྟོ, དྷ་མྨ་སཱ་ས་ན་སེ་ཝི་ཏོ.
༡༡༤༢. བྷ་ཡ་བྷེ་ར་ཝ་ནི་སྶ་ངྒོ, ཛི་ན་ཏེ་ཛཱ་ནུ་པཱ་ལི་ཏོ;
མོ་ནེ་ཡྻ་པ་ཐ་ས་ཉྩཱ་རོ, སུ་ག་ཏོ་ཝཱ་ད་བྷཱ་ཛ་ནོ.
༡༡༤༣. ཨ་པྤ་མཱ་ད་པ་རི་ཏྟཱ་ཎོ, སཱི་ལཱ་ལ་ངྐཱ་ར་བྷཱུ་སི་ཏོ;
ཙེ་ཏོ་ས་མཱ་དྷི་ས་ནྣ་དྡྷོ, པ་ཉྙཱ་ཡུ་དྷ་ས་མུ་ཛྫ་ལོ.
༡༡༤༤. ཨུ་ཛུ་མ་གྒ་མ་དྷི་ཊྛཱ་ཡ, མཱ་ར་ཀཱ་ཡ་པྤ་དཱ་ལ་ནོ;
ཨ་པ་རཱ་ཛི་ཏ་ས་ངྒཱ་མོ, ལ་ལི་ཏོ་དཱ་ཏ་ཝི་ཀྐ་མོ.
༡༡༤༥. མ་ཙྩུ་དྷེ་ཡྻ་མ་ཏི་ཀྐ་ནྟོ, བོ་དྷི་དྷ་མྨ་པྤ་ཏི་ཊྛི་ཏོ;
ཚ་ལཱ༹་བྷི་ཉྙཱ་བ་ལ་པྤ་ཏྟོ, ས་མཱ་རཱ་དྷི་ཏ་སཱ་ས་ནོ.
༡༡༤༦. ཨ་ནུ་བོ་དྷི་མ་ནུ་པྤ་ཏྟོ, པ་བྷི་ནྣ་པ་ཊི་ས་མྦྷི་དོ;
སཱ་མ་ཉྙ་པཱ་ར་མི་པྤ་ཏྟོ, ཏོ་སེ་ཏི ཛི་ན་མཱ་ན་སཾ.
༡༡༤༧. ནེ་ཀཱ་ཀཱ་ར་ཝ་རཱུ་པེ་ཏོ, ནཱ་ནཱ་ས་མྤ་ཏྟི་ཕུ་ལླི་ཏོ;
ཝི་པ་ཏྟི་པ་ཐ་ནི་ཏྟི་ཎྞོ, ཨ་བྷི་བུ་དྡྷི་པ་རཱ་ཡ་ཎོ.
༡༡༤༨. ཨཱ་ཧུ་ནེ་ཡྻོ པཱ་ཧུ་ནེ་ཡྻོ,
ད་ཀྑི་ཎེ་ཡྻོ སུ་དུ་ལླ་བྷོ;
ས་དེ་ཝ་ཀ་སྶ ལོ་ཀ་སྶ,
པུ་ཉྙ་ཀྑེ་ཏྟ་མ་ནུ་ཏྟ་རཾ.
༡༡༤༩. ཡ་ཏྠ སུ་དྡྷི་མྷི ནི་དྡོ་སེ, ས་དྡྷཱ་བཱི་ཛཾ པ་ཏི་ཊྛི་ཏཾ;
ཨ་ཙྩ་ནྟཾ པ་རི་པཱ་ཙེ་ཏི, ས་མྤ་ཏྟི་ཕ་ལ་མུ་ཏྟ་མཾ.
༡༡༥༠. ཡཾ ཕ་ལཾ པ་རི་བྷུ་ཉྫ་ནྟཱ, ཝི་མུ་ཏྟི་ར་ས་སེ་ཝ་ནཾ;
ཨ་ཙྩ་ནྟ་སུ་ཁི་ཏཱ དྷཱི་རཱ, བྷ་ཝ་ནྟི ཨ་ཛ་རཱ་མ་རཱ.
༡༡༥༡. ཏཾ ཕ་ལཾ པ་ཏྠ་ཡ་ནྟེ་ན, ས་ངྒྷཱ་ནུ་སྶ་ཏི་བྷཱ་ཝ་ནཱ;
བྷཱ་ཝེ་ཏ་བྦཱ པ་ནི་ཙྩེ་ཝ་མི་ཏི བྷཱ་ས་ནྟི པ་ཎྜི་ཏཱ.
༡༡༥༢. པ་ཉྩ་སཱི་ལཾ ད་ས་སཱི་ལཾ, པཱ་ཏི་མོ་ཀྑ་མུ་པོ་ས་ཐཾ;
ཙཱ་ཏུ་པཱ་རི་སུ་དྡྷི་སཱི་ལཾ, དྷུ་ཏ་ངྒ་པ་རི་ཝཱ་རི་ཏཾ.
༡༡༥༣. ཨེ་ཝ་མེ་ཏེ་སུ ཡཾ ཀི་ཉྩི, ས་མཱ་དཱ་ཡ ར་ཧོ་ག་ཏོ;
ཏ་མཱ་ནི་སཾ་སཾ གུ་ཎ་ཏོ, ཕ་ལ་ཏོ ཙ ཝི་ཙི་ནྟ་ཡེ.
༡༡༥༤. ཨཱ་དི ཙེ་ཏཾ པ་ཏི་ཊྛཱ ཙ, མུ་ཁཾ པ་མུ་ཁ་མུ་ཏྟ་མཾ;
མཱུ་ལཾ ཀུ་ས་ལ་དྷ་མྨཱ་ནཾ, པ་བྷ་ཝཾ པ་ཊི་པ་ཏྟི་ཡཱ.
༡༡༥༥. སཱ་ས་ནོ་ཏ་ར་ཎ་དྭཱ་རཾ, ཏི་ཏྠཾ ས་དྡྷ་མྨ་ཝཱ་པི་ཡཱ;
པཱ་རི་སུ་དྡྷི་པ་ད་ཊྛཱ་ནཾ, མ་གྒོ ཁེ་མ་ནྟ་པཱ་པ་ཀོ.
༡༡༥༦. སཱ་དྷུ སི་ཀྑཱ་ས་མཱ་དཱ་ནཾ, བཱ་ཧུ་ས་ཙྩ་ཝི་བྷཱུ་ས་ནཾ;
ཨ་རི་ཡཱ་ཙཱ་ར་ཙཱ་རི་ཏྟ-མ་ཝ་ཎྞ་མ་ལ་ཝ་ཛྫ་ནཾ.
༡༡༥༧. ཀུ་ལ་པུ་ཏྟ་ཨ་ལ་ངྐཱ་རོ, པཱ་པ་ཛ་ལླ་པ་ཝཱ་ཧ་ནཾ;
ཨ་ན་པཱ་ཡི སུ་ག་ནྡྷ་ཉྩ, མ་ཧཱ་པུ་རི་ས་སེ་ཝི་ཏཾ.
༡༡༥༨. པ་ཙྪཱ་ནུ་ཏཱ་པ་ཧ་ར་ཎཾ, པཱི་ཏི་པཱ་མོ་ཛྫ་ཝ་ཌྜྷ་ནཾ;
ནེ་ཀྑ་མྨ་བྷཱ་ཝ་ནོ་པེ་ཏཾ, པ་བྦ་ཛྫཱ་ཝེ་ས་སོ་བྷ་ནཾ.
༡༡༥༩. སོ་པཱ་ནཾ ས་གྒ་ལོ་ཀ་སྶ, ད་ལ༹ྷཱ་པཱ་ཡ་ཝི་དྷཱ་ན་ཀཾ;
ཨ་ནུ་པ་དྡ་ཝ་ས་མྤ་ཏྟི, ས་མ་ཏྠ་གུ་ཎ་སཱུ་ད་ནཱི.
༡༡༦༠. ཀླེ་ས་པ་ཉྫ་ར་ཝི་ཙྪེ་དི, ཝི་པ་ཏྟི་པ་ཐ་ཝཱ་ར་ཎཾ;
སོ་ཏྠི་ཀ་མྨ་ས་མུ་ཊྛཱ་ནཾ, ཨ་སཱ་དྷཱ་ར་ཎ་མ་ངྒ་ལཾ.
༡༡༦༡. ‘‘སུ་ལ་དྡྷཱ ཝ་ཏ མེ ལ་དྡྷཱ, ས་དྡྷཱ སུ་ག་ཏ་སཱ་ས་ནེ;
སཱི་ལཾ མེ ཡ་སྶ ཀ་ལྱཱ་ཎཾ, པ་རི་སུ་དྡྷ་མ་ཁ་ཎྜི་ཏཾ.
༡༡༦༢. ‘‘དུ་ལླ་བྷོ ཝ་ཏ མེ ལ་དྡྷོ,
མ་ཧཱ་ལཱ་བྷོ ཨ་ན་པྤ་ཀོ;
ཡོ་ཧ་མ་ཀྑ་ལི་ཏཱ་ཙཱ་རོ,
ཨུ་པ་གྷཱ་ཏ་ཝི་ཝ་ཛྫི་ཏོ.
༡༡༦༣. ‘‘དྷ་མྨ་ངྐུ་རི་ཏ་ས་ནྟཱ་ནོ, མཱུ་ལ་ཛཱ་ཏོ་སྨི སཱ་ས་ནེ;
ཨུ་ཛུ་མ་གྒཾ ས་མཱ་རུ་ལ༹ྷོ, པི་ཧི་ཏཱ ས་བྷ་ཡཱ དི་སཱ.
༡༡༦༤. ‘‘ཨ་ཝ་ཉྩཱ ཝ་ཏ མེ ཛཱ་ཏི, ཨཱ་ར་དྡྷཱ ཁ་ཎ་ས་མྤ་དཱ;
པ་ཏི་ཊྛི་ཏོ་མྷི ས་དྡྷ་མྨེ, ས་ཕ་ལཾ མ་མ ཛཱི་ཝི་ཏཾ’’.
༡༡༦༥. ཨི་ཏྠཾ ནཱ་ན་པྤ་ཀཱ་རེ་ན, ཙི་ནྟེ་ནྟོ གུ་ཎ་མ་ཏྟ་ནོ;
སཱི་ལ་ཀྑ་ནྡྷ་སྶ བྷཱ་ཝེ་ཏི, སཱི་ལཱ་ནུ་སྶ་ཏི་བྷཱ་ཝ་ནཾ.
༡༡༦༦. ས་དྡྷཱ་ཡ སཱི་ལ་ཝ་ནྟེ་སུ, ད་ཏྭཱ དཱ་ནཾ ཡ་ཐཱ་ར་ཧཾ;
ནི་དྡྷོ་ཏ་མ་ལ་མ་ཙྪེ་རོ, ཝི་ཝི་ཏྟོ ཏ་མ་ནུ་སྶ་རེ.
༡༡༦༧. དཱ་ནཾ ནི་དྷཱ་ན་མ་ནུ་གཾ, ཨ་སཱ་དྷཱ་ར་ཎ་མུ་ཏྟ་མཾ;
ཨ་ཝི་ནཱ་ས་སུ་ཁཱ་དྷཱ་ནཾ, ཨ་ཙྩ་ནྟཾ ས་བྦ་ཀཱ་མ་དཾ.
༡༡༦༨. ཀོ་པ་དཱ་ཧོ་པ་ས་མ་ནཾ, མ་ཙྪེ་ར་མ་ལ་སོ་དྷ་ནཾ;
པ་མཱ་ད་ནི་དྡཱ་ཝུ་ཊྛཱ་ནཾ, ལོ་བྷ་པཱ་ས་ཝི་མོ་ཙ་ནཾ.
༡༡༦༩. ཙེ་ཏོ་ཝི་ཀཱ་ར་ད་མ་ནཾ, མི་ཙྪཱ་མ་གྒ་ནི་ཝཱ་ར་ཎཾ;
ཝི་ཏྟི་ལཱ་བྷ་སུ་ཁ་སྶཱ་དོ, ཝི་བྷ་ཝོ་ད་ཡ་མ་ངྒ་ལཾ.