༨. ཨ་ཊྛ་མོ པ་རི་ཙྪེ་དོ
ཀ་སི་ཎཱ་སུ་བྷ་ཝི་བྷཱ་གོ
༨༨༠. ཨི་ཏོ པ་རཾ པ་ཝ་ཀྑཱ་མི, བྷཱ་ཝ་ནཱ་ན་ཡ་མུ་ཏྟ་མཾ;
ནཱ་མ་རཱུ་པཾ པ་རི་གྒ་ཡ྄ཧ, པ་ཊི་པ་ཛྫི་ཏུ་མཱི་ཧ་ཏོ.
༨༨༡. བྷཱ་ཝ་ནཱ དུ་ཝི་དྷཱ ཏ་ཏྠ, ས་མ་ཐོ ཙ ཝི་པ་སྶ་ནཱ;
ས་མ་ཐོ དུ་ཝི་དྷོ ཏ་ཏྠ, པ་རི་ཏྟོ ཙ མ་ཧ་གྒ་ཏོ.
༨༨༢. ཨུ་པ་ཙཱ་ར་མ་ནུ་པྤ་ཏྟོ, པ་རི་ཏྟོ་ཏི པ་ཝུ་ཙྩ་ཏི;
མ་ཧ་གྒ་ཏ་པྤ་ནཱ་པ་ཏྟོ, ས་མ་ཐོ ལོ་ཀི་ཡོ མ་ཏོ.
༨༨༣. ཀ་སི་ཎཱ་ནི ད་སཱ་སུ་བྷཱ, ད་ས་དྷཱ་ནུ་སྶ་ཏཱི ཏ་ཐཱ;
ཨ་པྤ་མ་ཉྙཱ ཙ ས་ཉྙཱ ཙ, ཝ་ཝ་ཏྠཱ་རུ་པྤ་ཀཱ་ནི ཙ.
༨༨༤. ཀ་མྨ་ཊྛཱ་ནཱ་ནི ཏ་ཏྠཱ་ཧུ, ཙ་ཏྟཱ་ལཱི་ས ཝི་ཙ་ཀྑ་ཎཱ;
ཡ་ཏྠཱ་ནུ་ཡོ་གཾ ཀུ་བྦ་ནྟཱ, བྷཱ་ཝེ་ནྟི ས་མ་ཐ་དྭ་ཡཾ.
༨༨༥. ཏཾ པ་ཡོ་ག་ཝི་སུ་དྡྷེ་ན, པ་ཏྭཱ་ནོ་པཱ་ཡ་ས་མྤ་དཾ;
ཨ་ཛ྄ཛྷཱ་ས་ཡཾ ཝི་སོ་དྷེ་ཏྭཱ, བྷཱ་ཝེ་ཏ་བྦ་ནྟི བྷཱ་སི་ཏཾ.
༨༨༦. ཀ་ཐཾ ཀ་རོ་ནྟོ ཙཱ་རི་ཏྟཾ, ཝཱ་རི་ཏྟ་ཉྩ ཝི་ཝ་ཛྫི་ཡ;
པཱ་ཏི་མོ་ཀྑཾ ས་མཱ་དཱ་ཡ, ས་དྡྷཱ་ཡ པ་རི་པཱུ་ར་ཡེ.
༨༨༧. པ་ཊི་ས་ངྑཱ་ཡ སོ་དྷེ་ཏྭཱ, ཚ་དྭཱ་རེ་སུ མ་ལཱ་ས་ཝཾ;
ཚ་ལི༹་ནྡྲི་ཡཱ་ནི མེ་དྷཱ་ཝཱི, ས་ཏཱ་ར་ཀྑེ་ན གོ་པ་ཡེ.
༨༨༨. པཱ་པ་ཀཱ་ཛཱི་ཝ་ནི་སྶ་ངྒོ, ཀུ་ཧ་ཀཱ་ཙཱ་ར་ནི་སྶ་ཊོ;
ཨཱ་ཛཱི་ཝཾ པ་རི་སོ་དྷེ་ཡྻ, པ་ཧི་ཏ་ཏྟེ་ཊྛི་སུ་དྡྷི་ཡཱ.
༨༨༩. ཨི་ད་མ་ཏྠི་ཏ་མཱ་ར་བྦྷ, པ་ཊི་ས་ངྑཱ་ཡ ཡོ་ནི་སོ;
པ་ཉྙ་ཝཱ ས་མྤ་ཛ་ཉྙེ་ན, པ་རི་བྷུ་ཉྫེ་ཡྻ པ་ཙྩ་ཡེ.
༨༩༠. སཾ་ཝ་རཾ པཱ་ཏི་མོ་ཀྑེ ཙ, སཱི་ལ་མི་ནྡྲི་ཡ་སཾ་ཝ་རཾ;
ཨཱ་ཛཱི་ཝ་པཱ་རི་སུ་དྡྷི་ཉྩ, ཏ་ཐཱ པ་ཙྩ་ཡ་ནི་སྶི་ཏཾ.
༨༩༡. ས་མཱ་དཱ་ཡ ཙ་ཏུ་དྡྷེ་ཝ-མ་དྷི་ཊྛེ་ཡྻ ཏ་ཏོ པ་རཾ;
ཏ་སྶེ་ཝ པ་རི་ཝཱ་རཱ་ཡ, དྷུ་ཏ་ངྒཱ་ནི ཡ་ཐཱ་ར་ཧཾ.
༨༩༢. པཾ་སུ་ཀཱུ་ལི་ཀ་མ་ངྒཾ ཏི-ཙཱི་ཝ་རཾ ཙཱི་ཝ་རཱ་ཡུ་གཾ;
པི་ཎྜ་པཱ་ཏི་ཀ་མ་ངྒ་ཉྩ, ས་པ་དཱ་ནི་ཀ་མུ་ཏྟ་མཾ.
༨༩༣. ཁ་ལུ་པ་ཙྪཱ་བྷ་ཏྟི་ཀ་ངྒཾ, དྷུ་ཏ་ངྒཾ པ་ཏྟ་པི་ཎྜི་ཀཾ;
ཨེ་ཀཱ་ས་ནི་ཀ་མི་ཙྩེ་ཝཾ, པ་ཉྩ་དྷཱ བྷོ་ཛ་ནེ ཋི་ཏཾ.
༨༩༤. ཨཱ་ར་ཉྙི་ཀཾ ཡ་ཐཱ་ས་ནྠ-
ཏི་ཀ་ངྒཾ རུ་ཀྑ་མཱུ་ལི་ཀཾ;
ཨ་བྦྷོ་ཀཱ་སི་ཀ་སོ་སཱ་ནི-
ཀ་ངྒཱ ནེ་ས་ཛྫི་ཀཾ ཏ་ཐཱ.
༨༩༥. ཚ སེ་ནཱ་ས་ན་མཱ་ར་བྦྷ, དྷུ་ཏ་ངྒཱ་ནཱི་ཏི ཏེ་ར་ས;
ཀ་པྤི་ཡེ་པི ཙ ལོ་ལུ་པྤ-ས་མཱ་ཙཱ་ར་ཝི་མུ་ཏྟི་ཡཱ.
༨༩༦. སཱ་མཱི་ཙི་པ་ཊི་པ་ཏྟཱི་ཏི, ཀ་ཏྭཱ ས་ལླེ་ཁ་ཝུ་ཏྟི་ཡཱ;
པ་ཙྩ་ཡ་ཏྟ་ཡ་མཱ་ཧ་ཙྩ, པ་ཉྙ་ཏྟཱ་ནི མ་ཧེ་སི་ནཱ.
༨༩༧. ཙ་ཏུ་པཱ་རི་སུ་དྡྷི་སཱི་ལཾ, དྷུ་ཏ་ངྒ་པ་རི་ཝཱ་རི་ཏཾ;
པཱུ་རེ་ཏྭཱ་ན ཝི་སུ་དྡྷེ་ཝཾ, པ་ཡོ་ག་པ་རི་སུ་དྡྷི་ཡཱ.
༨༩༨. ཏ་ཏོ པ་ཎི་དྷི་ས་མྤ་ནྣོ, བྷཱ་ཝ་ནཱ་ཡ ཝི་སཱ་ར་དོ;
ཨུ་པཱ་ཡཾ པ་ཊི་པཱ་དེ་ཡྻ, པ་ཝི་ཝེ་ཀ་ར་ཏོ ཀ་ཐཾ?
༨༩༩. ཨཱ་ཝཱ་སོ ཙ ཀུ་ལཾ ལཱ་བྷོ,
ག་ཎོ ཀ་མྨ་ཉྩ པ་ཉྩ་མཾ;
ཨ་དྡྷཱ་ནཾ ཉཱ་ཏི ཨཱ་བཱ་དྷོ,
ག་ནྠོ ཨི་དྡྷཱི་ཏི ཏེ ད་ས.
༩༠༠. ཚེ་ཏྭཱ་ན ནི་པ་ཀོ ཡོ་གཱི,
པ་ལི་བོ་དྷེ ཡ་ཐཱ་ར་ཧཾ;
ནི་རཱ་ལ་ཡོ ནི་རཱ་ར་མྦྷོ,
པ་པ་ཉྩོ་པ་ས་མེ ར་ཏོ.
༩༠༡. པི་ཡཾ ག་རུཾ བྷཱ་ཝ་ནི་ཡཾ, ཝ་ཏྟཱ་རཾ ཝ་ཙ་ན་ཀྑ་མཾ;
ཀ་ཏྟཱ་ར་མ་ཏི་ག་མྦྷཱི་ར་ཀ་ཐཾ ཋཱ་ན་ནི་ཡོ་ཛ་ཀཾ.
༩༠༢. བ་ཧུ་སྶུ་ཏཾ གུ་ཎ་ཝ་ནྟ-མཱ་ག་མྨཱ་ཙ་རི་ཡཾ བུ་དྷོ;
ཁ་མོ པ་ད་ཀྑི་ཎ་གྒཱ་ཧཱི, ནི་ཡྻཱ་ཏ་ཏྟུ་ཛུ བྷ་དྲ་ཀོ.
༩༠༣. ཨཱ་རཱ་དྷེ་ཏྭཱ་ན ག་ཎྷེ་ཡྻ, ཏཾ ཀ་མྨ་ཊྛཱ་ན་དཱ་ཡ་ཀཾ;
ཀ་མྨ་ཊྛཱ་ནཾ པ་རི་ཀྑི་ཏྭཱ, ཙ་རི་ཡཱ་ར་ཧ་མ་ཏྟ་ནོ.
༩༠༤. རཱ་གོ དོ་སོ ཙ མོ་ཧོ ཙ,
ཙ་རི་ཡཱ ཏཱི་ཧི པ་ཎྜི་ཏཱ;
ས་དྡྷཱ་བུ་དྡྷི་ཝི་ཏ་ཀྐེ་ཧི,
ཚ་བྦི་དྷཱ ཙ ཝི་བྷཱ་ཝ་ཡུཾ.
༩༠༥. རཱ་གུ་སྶ་ནྣ་སྶ ས་པྤཱ་ཡཱ, ཀོ་ཊྛཱ་སཱ་སུ་བྷ་བྷཱ་ཝ་ནཱ;
དོ་སུ་སྶ་ནྣ་སྶ་པྤ་མ་ཉྙཱ, ནཱི་ལཱ་དི ཙ ཙ་ཏུ་བྦི་དྷཱ.
༩༠༦. ཝི་ཏ་ཀྐཾ མོ་ཧུ་སྶ་ནྣཱ་ནཾ, ཨཱ་ནཱ་པཱ་ནཾ པ་ཀཱ་སི་ཏཾ;
ཚ ས་དྡྷཱ་ཙ་རི་ཏ་སྶཱ་ཧུ, བུ་དྡྷཱ་ནུ་སྶ་ཏི་ཨཱ་ད་ཡོ.
༩༠༧. མ་ར་ཎོ་པ་ས་མཱ་ས་ཉྙཱ་ཝ་ཝ་ཏྠཱ་ནཱ་ནི བུ་དྡྷི་ནོ;
སེ་སཱ་ནི པ་ན ས་བྦེ་སཾ, ཏ་ཏྠཱ་པི ཀ་སི་ཎཾ བུ་དྷཱ.
༩༠༨. ཝི་ཏ་ཀྐ་པ་ཀ་ཏི་ཀ་སྶ, པ་རི་ཏྟཾ མོ་ཧ་ཙཱ་རི་ནོ;
མ་ཧ་ནྟ་མི་ཏི ས་པྤཱ་ཡཾ, ག་ཧེ་ཏྭཱ་ན ཏ་ཏོ པ་རཾ.
༩༠༩. མ་ཧཱ་ཝཱ་སཾ ན་ཝཾ ཛི་ཎྞཾ, པ་ནྠ་སོ་ཎྜི་ཀ་ས་ནྟི་ཀཾ;
པ་ཎྞ་པུ་པྥ་ཕ་ལཱ་ཀི་ཎྞཾ, བ་ཧུ་ས་མྨཱ་ན་པ་ཏྠི་ཏཾ.
༩༡༠. སཱི་མ་ནྟ་དཱ་རུ་ན་ག་ར-ཀྑེ་ཏྟ་པ་ཙྩ་ནྟ་ནི་སྶི་ཏཾ;
ཝི་ས་བྷཱ་ག་མ་ས་པྤཱ་ཡཾ, པ་ཊྚ་ནཾ མི་ཏྟ་དུ་ལླ་བྷཾ.
༩༡༡. ཋཱ་ནཱ་ནི་ཊྛཱ་ར་སེ་ཏཱ་ནི, པ་རི་ཝ་ཛྫེ་ཡྻ པ་ཎྜི་ཏོ;
སེ་ཝེ་ཡྻ བྷཱ་ཝ་ནཱ་ཡོ་གྒཾ, སེ་ནཱ་ས་ན་མ་ཏ་ནྡི་ཏོ.
༩༡༢. ནཱ་ཏི་དཱུ་རཾ ནཱ་ཙྩཱ་ས་ནྣཾ, ཨ་པྤ་ས་དྡ་མ་ནཱ་ཀུ་ལཾ;
ག་མ་ནཱ་ག་མ་ན་ས་མྤ་ནྣཾ, ཨ་པྤ་ཌཾ་སཱ་ནུ་པ་དྡ་ཝཾ.
༩༡༣. ཨ་ཀི་ཙྪ་པ་ཙྩ་ཡུ་པྤཱ་དཾ, ལ་ཛྫཱི་བྷི་ཀྑུ་ག་ཎོ་ཙི་ཏཾ;
ཝི་ཝེ་ཀ་ཊྛཱ་ན་བ་ཧུ་ལཾ, བ་ཧུ་སྶུ་ཏ་ནི་སེ་ཝི་ཏཾ.
༩༡༤. ཨ་པྤ་བྷ་ཡཾ ནི་རཱ་ས་ངྐཾ, ཨ་པྤ་དོ་སཾ མ་ཧཱ་གུ་ཎཾ;
ཝི་ཧཱ་ར་མ་ནུ་སེ་ཝ་ནྟོ, ཏ་ཏྠ ནི་སྶ་ངྒ་ཙེ་ཏ་སཱ.
༩༡༥. ཏ་ཏོ ཀེ་ས་ན་ཁ་ཙྪེ་ད-ར་ཛ་ནཱ་དི་མ་སེ་ས་ཏོ;
ཁུ་དྡ་ཀཾ པ་ལི་བོ་དྷ་ཉྩ, ཚི་ནྡི་ཏྭཱ་ན ཡ་ཐཱ་ར་ཧཾ.
༩༡༦. ཨཱ་ཝཱ་སཾ གོ་ཙ་རཾ བྷ་སྶཾ, པུ་གྒ་ལཾ བྷོ་ཛ་ནཾ ཏ་ཐཱ;
ཝ་ཛྫེ་ནྟོ་ཏུ་མ་ས་པྤཱ་ཡཾ, ཨི་རི་ཡཱ་པ་ཐ་མ་ཏྟ་ནོ.
༩༡༧. སེ་ཝ་ནྟོ ས་ཏྟ ས་པྤཱ་ཡེ, ཏེ ཨེ་ཝཱ་ཏི པ་དྷཱ་ན་ཝཱ;
བྷཱ་ཝ་ནཱུ་པཱ་ཡ་ས་མྤ་ནྣོ, ཝཱུ་པ་ཀ་ཊྛོ ར་ཧོ་ག་ཏོ.
༩༡༨. ཀཱ་མེ་སྭཱ་དཱི་ན་ཝཾ དི་སྭཱ, ནེ་ཀྑ་མྨཾ ད་ཊྛུ ཁེ་མ་ཏོ;
པ་རི་ཡུ་ཊྛཱ་ན་ནི་བྦི་ནྡོ, སོ་དྷེ་ཡྻ་ཛ྄ཛྷཱ་ས་ཡཾ ཀ་ཐཾ.
༩༡༩. ཨ་པྤ་སྶཱ་དཱ མ་ཧཱ་དུ་ཀྑཱ, ཀཱ་མཱ ཧི ཀ་ཊུ་ཀ་པྥ་ལཱ;
དུ་སྶཾ་ཧཱ་རཱ དུ་རཱ་ར་ཀྑཱ, བ་ཧྭཱ་དཱི་ན་ཝ་ས་ཎྛི་ཏཱ.
༩༢༠. ཨ་ཊྛི་ཀཱ ཁ་ཛྫ་མཱ་ནཱ་ཝ, ཝི་གྷཱ་ཏཱ་ཡ པ་བྷི་ཛྫི་ཏཱ;
ག་ཡ྄ཧ་ནྟ་ཏྟ་ཝ་དྷཱ་ཡེ་ཏེ, མཾ་ས་པེ་སཱི་ཝ པ་ཀྑི་བྷི.
༩༢༡. པ་ཊི་ཝཱ་ཏེ ཏི་ཎུ་ཀྐཱ་ཝ, པ་རི་གྒཱ་ཧ་ཀ་དཱ་ཧི་ནོ;
ཨ་ངྒཱ་ར་ཀཱ་སུ་ས་ངྐཱ་སཱ, ས་བྦ་ངྒ་པ་རི་ཏཱ་ས་ཀཱ.
༩༢༢. སུ་པི་ནེ པ་རི་བྷུ་ཏྟཱ་ཝ, ནཱ་ལཾ ཀ་སྶ་ཙི ཏི་ཏྟི་ཡཱ;
ན ཏུ ཀ་སྶ་ཙི ཨ་ཙྩ་ནྟཱ, ཨ་ལ་ངྐཱ་རཱ་ཝ ཡཱ་ཙི་ཏཱ.
༩༢༣. ཚ་ཛྫ་ནྟཱ ཕ་ལ་རུ་ཀྑཱ་ཝ, པ་ཊི་པ་ནྣ་པ་བྷ་ཉྫི་ནོ;
ཨ་སི་སཱུ་ནཱུ་པ་མཱ ནི་ཙྩ-མ་དྷི་ཀོ་ཊྚེ་ནྟི པཱ་ཎི་ནོ.
༩༢༤. ས་ཏྟི་སཱུ་ལཱུ་པ་མཱ ད་ལ༹ྷཾ, ཏ་ཎྷཱ་ས་ལླཱ་ནུ་ཝེ་དྷི་ནོ;
གྷོ་རཱ་ན་ཏྠ་ཝི་སཱ་ཀི་ཎྞཱ, ཀ་ཎྷ་ས་པྤ་སི་རཱུ་པ་མཱ.
༩༢༥. ས་བྦཱ་ས་ཝ་པ་རི་ཀླི་ཊྛཱ, ས་བྦཱ་སཾ་ཀླེ་ས་ཝ་ཏྠུ་ཀཱ;
ག་མྨཱ ཙ ཙ་པ་ལཱ ནཱི་ཙཱ, པུ་ཐུ་ཛྫ་ན་མ་མཱ་ཡི་ཏཱ.
༩༢༦. བ་ཧུ་སཱ་དྷཱ་ར་ཎཱ ཙེ་ཏེ, ས་པ་ཏྟ་ཛ་ན་པ་ཏྠི་ཏཱ;
མ་ཧོ་པ་དྡ་ཝུ་པ་ཡ་ཊྛཱ, བ་ཧྭཱ་ཡཱ་སཱ བྷ་ཡཱ་ཝ་ཧཱ.
༩༢༧. མ་ཧཱ་ར་མྦྷ་ས་མཱ་ར་དྡྷཱ, ཁི་པྤཱ་ཀཱ་ར་ཝི་དྷཾ་སི་ནོ;
སོ་ཀ་ས་ལླཾ པ་ཝེ་སེ་ནྟཱ, ཝི་ག་ཙྪ་ནྟི སུ་ཝེ སུ་ཝེ.
༩༢༨. ནཱ་ལཾ ཀ་སྶ་ཙི ཏཱ་ཎཱ་ཡ, ནཱ་ལ་མ་སྶཱ་ས་ནཱ་ཡ ཙ;
ཨ་ཝི་སཱ་ས་ནི་ཡཱ་ཝ་སྶཾ, ཀི་ཏ་ཝཱ མཱ་ར་ཀིཾ་ཀ་རཱ.
༩༢༩. ས་ཏྟཱ་ན་མུ་པ་གྷཱ་ཏཱ་ཡ, མ་དྷུ་རཱ་ཀཱ་ར་ནི་མྨི་ཏཱ;
ར་ཀྑ་སཱི ཝི་ཡ ས་ནྟཱ་ན-མཱ་ཝི་ས་ནྟི མ་ནོ་ཧ་རཱ.
༩༣༠. ཨཱ་ཝི་ཊྛཱ ཡེ་ཧི དུ་མྨེ་དྷཱ, བྱ་ས་ནཱ་ཧི་ཏ་ས་མྦྷ་ཝཱ;
ཝི་པ་ལླཱ་ས་པ་རཱ་བྷཱུ་ཏཱ, བྱཱ་པ་ཛྫ་ནྟཱ ཝི་ཧ་ཉྙ་རེ.
༩༣༡. ཙེ་ཏོ་ས་ངྐ་པྤ་ར་ཙི་ཏཱ, ན་ནྡི་རཱ་གོ་པ་སེ་ཝ་ནཱ;
མ་དྷུ་ལི་ཏྟཱ་སི་དྷཱ་རཱ་ཝ, བྱཱ་པཱ་རེ་ནོ་པ་སེ་ཝི་ཏཱ.
༩༣༢. མ་ནོ་ར་མ་སུ་བྷཱ་ཀཱ་རཱ, པི་ཡ་རཱུ་པོ་པ་ལ་མྦྷི་ནོ;
མི་ཏྟ་མུ་ཁཾ ས་པ་ཏྟཱ་ཝ, ཝ་ཉྩ་ཡ་ནྟི མ་ཧཱ་ཛ་ནཾ.
༩༣༣. ཝ་ཉྩི་ཏཱ ཡེ་ཧི དུ་མྨེ་དྷཱ, ས་བྦ་ས་མྤ་ཏྟི་དྷཾ་སི་ཏཱ;
ཁེ་མ་མ་གྒཱ པ་རི་བྦྷ་ཊྛཱ, དྷཱ་རེ་ནྟི ཝ་དྷ་མ་ཏྟ་ནོ.
༩༣༤. ཝི་རཱུ་པ་རཱུ་པཱ་ཀཱ་རེ་ན, ནི་མྨ་ཐེ་ནྟཱ པ་ལོ་བྷི་ནོ;
ཨ་བྷཱ་ཝི་ཏཱ་ནཾ བཱ་ལཱ་ནཾ, མཱ་ན་སཾ ནི་ཧ་ན་ནྟི་མེ.
༩༣༥. ཡ་ཏྠ རཱ་ག་ས་ལླ་ཝི་དྡྷཱ, ས་ལླེ་ནེ་ཝ ཝ་ནེ མི་གཱ;
ཏ་ཏྠ ཏ་ཏྠཱ་ནུ་དྷཱ་ཝ་ནྟཱ, ཝི་པྥ་ནྡ་ནྟི ནི་ར་ནྟ་རཾ.
༩༣༦. མ་མཾ་ཀཱ་རེ་ན ཝུ་ཌྜྷ་ནྟཱ, གྷོ་ར་མཱ་སཱི་ཝི་སཾ ཡ་ཐཱ;
ཝི་སྶ་ཊྛཱ བྷོ་ག་དྷ་མྨེ་སུ, ཨ་སྶཱ་དེ་ནྟི ཨ་ཝི་དྡ་སུ.
༩༣༧. ཨ་ན་ཡ་བྱ་ས་ནཱ་ཡེ་ཏེ, ཝ་སཱི ཀུ་བྦ་ནྟི པཱ་ཎི་ནོ;
ཝི་ཙི་ཏྟཱ་ཀཱ་ར་ས་ཎྛཱ་ནཱ, པི་སཱ་ཙ་ན་ག་རཾ ཡ་ཐཱ.
༩༣༨. ཨ་ན་ཏྠཱ་ཝ་ཧི་ཏཱ བཱ་ལཱ, ཝཱ་གུ་རཾ ནཱ་ཝ་བུ་ཛ྄ཛྷ་རེ;
ཏ་ཏྠེ་ཝ པ་ཊི་ཝ་མ་ནྟི, ཡ་ཐཱ ཧ་ཉྙ་ནྟི མུ་ཙྪི་ཏཱ.
༩༣༩. སཱི་གྷ་ཝཱ་ཧཱི མ་ཧོ་གྷོ་ཡཾ, ཀླེ་ས་ཝ་ཊྚཾ མ་ཧ་བྦྷ་ཡོ;
ས་ཀ་ཎྚ་ཀ་ཉྩ ག་ཧ་ནཾ, པ་ངྐོ་ཝ དུ་ར་ཏི་ཀྐ་མོ.
༩༤༠. ཙེ་ཏོ་སཾ་མོ་ཧ་ན་ཊྛཱ་ནཾ, པ་མཱ་ད་པ་ཊི་ས་ནྡྷི་ཏཾ;
ཨོ་ཧཱ་རི སི་ཐི་ལཾ ཙེ་ཏཾ, དུ་པྤ་མུ་ཉྩ་ཉྩ བ་ནྡྷ་ནཾ.
༩༤༡. ཛཱ་ལཾ་ཝ ཝི་ཏྠ་ཏཾ ལོ་ཀེ,
མཱ་ར་པཱ་སོ ས་མོ་ཌྜི་ཏོ;
པ་ཉྫ་རཾ ཙཱ་ར་ཀོ ཙེ་སོ,
ས་ཏྟཱ་ན་མ་ན་ཡཱ་ཝ་ཧོ.
༩༤༢. ཡ་ཏྠཱ་ནུ་རཱ་ག་ས་མྦ་དྡྷཱ, པ་ལི་གུ་ཎྛི་ཏ་སཱ་ཡི་ནོ;
མ་ཀྐ་ཊཱ་ལེ་པ་བ་དྡྷཱ་ཝ, ནི་ཏྠུ་ན་ནྟི ཝི་གྷཱ་ཏི་ནོ.
༩༤༣. བ་ལི༹་སཾ་ཝཱ་མི་ས་ཙྪ་ནྣཾ, ས་ཝི་སཾ ཝི་ཡ བྷོ་ཛ་ནཾ;
མི་ག་ལུ་དྡ་ནི་ཝཱ་པོ་ཝ, ཝི་ནཱ་སཱ་ཡ ས་མོ་ཌྜི་ཏཱ.
༩༤༤. མཱི་ན་ཀཱ ཝ་ངྐ་གི་དྡྷཱ་ཝ, ཡེ གི་ལི་ཏྭཱ པུ་ཐུ་ཛྫ་ནཱ;
གྷོ་རཾ མ་ཙྩུ་མུ་ཁཾ པ་ཏྭཱ, སོ་ཙ་ནྟཱ་པཱ་ཡ་བྷཱ་གི་ནོ.
༩༤༥. པཱ་པ་ཀྑེ་ཏྟ་མི་དཾ ཋཱ་ནཾ, མི་ཙྪཱ་ལོ་བྷ་ནི་སེ་ཝ་ནཾ;
དུ་ཙྩ་རཱི་ཏ་ངྐུ་རཱ་རོ་ཧཾ, ཨ་པཱ་ཡ་ཕ་ལ་པཱུ་ར་ཎཾ.
༩༤༦. ཨ་ཛ྄ཛྷོ་སི་ཏཱ པ་ནེ་ཏྠ ཙ, ལོ་བྷ་མུ་ཙྪཱ་ཝི་དཱ་ཧི་ནོ;
ཀོ་དྷཱུ་པ་ནཱ་ཧ་ཛ་ལི་ཏཱ, ཨི་སྶཱ་མ་ཙྪེ་ར་དྷཱུ་པི་ཏཱ.
༩༤༧. སཱ་ར་མྦྷཱ་ཡུ་དྷ་ས་ནྣ་དྡྷཱ, ཝི་པྥུ་ར་ནྟཱ མ་ནོ་ར་ཐཱ;
ཨཱ་བ་ནྡྷི་ཙྪཱ མ་ཧཱ་ཀ་ཙྪཱ, ཋ་ནྟི ལོ་ཀ་ཝི་པ་ཏྟི་ཡཱ.
༩༤༨. ཨ་ཝ་ཛྫཾ ན་ཏྠི ཨེ་ཏེ་ས-མ་ཀ་ཏྟ་བྦཾ ན ཝི་ཛྫ་ཏི;
ས་མྨུ་ཊྛ་ས་ཙྩ་ཏཱ ཏེ་སུ, ན པ་ཏི་ཊྛཱ་ཏི སཱ་དྷུ་ཏཱ.