༢. དུ་ཏི་ཡོ པ་རི་ཙྪེ་དོ

ཙེ་ཏ་སི་ཀ་ནི་དྡེ་སོ

༦༧. ཙི་ཏྟཱ་ན་ནྟ་ར་མུ་དྡི་ཊྛཱ, ཡེ ཙ ཙེ་ཏ་སི་ཀཱ མ་ཡཱ;

ཏེ་སཾ དཱ་ནི ཀ་རི་སྶཱ་མི, ཝི་བྷཱ་ཛ་ན་མི་ཏོ པ་རཾ.

ཏ་ཏྠ ཙི་ཏྟ་ས་མྤ་ཡུ་ཏྟཱ, ཙི་ཏྟེ བྷ་ཝཱ ཝཱ ཙེ་ཏ་སི་ཀཱ. ཏེ་པི ཙི་ཏྟཾ ཝི་ཡ སཱ་ར་མྨ་ཎ་ཏོ ཨེ་ཀ་ཝི་དྷཱ, ས་ཝི་པཱ་ཀཱ་ཝི་པཱ་ཀ་ཏོ དུ་ཝི་དྷཱ, ཀུ་ས་ལཱ་ཀུ་ས་ལཱ་བྱཱ་ཀ་ཏ་བྷེ་ད་ཏོ ཏི་ཝི་དྷཱ, ཀཱ་མཱ་ཝ་ཙ་རཱ་དི་བྷེ་ད་ཏོ ཙ་ཏུ་བྦི་དྷཱ.

ཏ་ཏྠ ཀཱ་མཱ་ཝ་ཙ་ར་ཙི་ཏྟ་ས་མྤ་ཡུ་ཏྟཱ ཀཱ་མཱ་ཝ་ཙ་རཱ. ཏེ་སུ ཀཱ་མཱ་ཝ་ཙ་ར་པ་ཋ་མ་མ་ཧཱ་ཀུ་ས་ལ་ཙི་ཏྟ་ས་མྤ་ཡུ་ཏྟཱ ཏཱ་ཝ ནི་ཡ་ཏཱ ས་རཱུ་པེ་ན ཨཱ་ག་ཏཱ ཨེ་ཀཱུ་ན་ཏིཾ་ས དྷ་མྨཱ ཧོ་ནྟི. སེ་ཡྻ་ཐི་དཾ – ཕ་སྶོ ཝེ་ད་ནཱ ས་ཉྙཱ ཙེ་ཏ་ནཱ ཝི་ཏ་ཀྐོ ཝི་ཙཱ་རོ པཱི་ཏི ཙི་ཏྟེ་ཀ་གྒ་ཏཱ ས་དྡྷཱ ས་ཏི ཝཱི་རི་ཡཾ པ་ཉྙཱ ཛཱི་ཝི་ཏི་ནྡྲི་ཡཾ ཨ་ལོ་བྷོ ཨ་དོ་སོ ཧི་རཱི ཨོ་ཏྟ་པྤཾ ཀཱ་ཡ་པྤ་སྶ་དྡྷི ཙི་ཏྟ་པྤ་སྶ་དྡྷི ཀཱ་ཡ་ལ་ཧུ་ཏཱ ཙི་ཏྟ་ལ་ཧུ་ཏཱ ཀཱ་ཡ་མུ་དུ་ཏཱ ཙི་ཏྟ་མུ་དུ་ཏཱ ཀཱ་ཡ་ཀ་མྨ་ཉྙ་ཏཱ ཙི་ཏྟ་ཀ་མྨ་ཉྙ་ཏཱ ཀཱ་ཡ་པཱ་གུ་ཉྙ་ཏཱ ཙི་ཏྟ་པཱ་གུ་ཉྙ་ཏཱ ཀཱ་ཡུ་ཛུ་ཀ་ཏཱ ཙི་ཏྟུ་ཛུ་ཀ་ཏཱ་ཏི. པུ་ན ཚ་ནྡོ, ཨ་དྷི་མོ་ཀྑོ, ཏ་ཏྲ་མ་ཛ྄ཛྷ་ཏྟ་ཏཱ, མ་ན་སི་ཀཱ་རོ ཙཱ་ཏི ཙ་ཏྟཱ་རོ ནི་ཡ་ཏ་ཡེ་ཝཱ་པ་ན་ཀཱ ཧོ་ནྟི. ཨི་མེ་ཧི ཙ་ཏཱུ་ཧི ཏེ་ཏྟིཾ་ས ཧོ་ནྟི. པུ་ན ཀ་རུ་ཎཱ མུ་དི་ཏཱ ཀཱ་ཡ་དུ་ཙྩ་རི་ཏ་ཝི་ར་ཏི ཝ་ཙཱི་དུ་ཙྩ་རི་ཏ་ཝི་ར་ཏི མི་ཙྪཱ་ཛཱི་ཝ་ཝི་ར་ཏི ཙེ་ཏི ཨི་མེ པ་ཉྩ ཨ་ནི་ཡ་ཏཱ. ཨི་མེ པ་ན ཀ་དཱ་ཙི ཨུ་པྤ་ཛྫ་ནྟི.

ཨི་མེ་སུ པ་ན ཀ་རུ་ཎཱ་མུ་དི་ཏཱ་ཝ་སེ་ན བྷཱ་ཝ་ནཱ་ཀཱ་ལེ ཀ་རུ་ཎཱ་པུ་བྦ་བྷཱ་གོ ཝཱ མུ་དི་ཏཱ་པུ་བྦ་བྷཱ་གོ ཝཱ ཨེ་ཏཱ ཨུ་པྤ་ཛྫ་ནྟི, ན པ་ནེ་ཀ་ཏོ ཨུ་པྤ་ཛྫ་ནྟི. ཡ་དཱ པ་ན ཨི་མི་ནཱ ཙི་ཏྟེ་ན མི་ཙྪཱ་ཀ་མྨ་ནྟཱ་དཱི་ཧི ཝི་ར་མ་ཏི, ཏ་དཱ ས་མྨཱ་ཀ་མྨ་ནྟཱ་དཱི་ནི པ་རི་པཱུ་རེ་ནྟི, ཨེ་ཀཱ ཝི་ར་ཏི ཨུ་པྤ་ཛྫ་ཏི, ཀ་རུ་ཎཱ་མུ་དི་ཏཱ་ཧི ས་ཧ, ཨ་ཉྙ་མ་ཉྙེ་ན ཙ ན ཨུ་པྤ་ཛྫ་ནྟི. ཏ་སྨཱ ཨེ་ཏེ་སུ ཨེ་ཀེ་ན ས་ཧ ཙ་ཏུ་ཏྟིཾ་སེ་ཝ དྷ་མྨཱ ཧོ་ནྟི.

༦༨. ཨཱ་དི་ནཱ པུ་ཉྙ་ཙི་ཏྟེ་ན, ཏེ་ཏྟིཾ་ས ནི་ཡ་ཏཱ མ་ཏཱ;

ཀ་རུ་ཎཱ་མུ་དི་ཏེ་ཀེ་ན, ཙ་ཏུ་ཏྟིཾ་ས བྷ་ཝ་ནྟི ཏེ.

༦༩. ཀ་སྨཱ པ་ནེ་ཏྠ མེ་ཏྟཱ ཙ, ཨུ་པེ་ཀྑཱ ཙ ན ཨུ་དྡྷ་ཊཱ;

ཡེ་ཝཱ་པ་ན་ཀ་དྷ་མྨེ་སུ, དྷ་མྨ་རཱ་ཛེ་ན ས་ཏྠུ་ནཱ.

༧༠. ཨ་བྱཱ་པཱ་དེ་ན མེ་ཏྟཱ་པི, ཏ་ཏྲ་མ་ཛ྄ཛྷ་ཏྟ་ཏཱ་ཡ ཙ;

ཨུ་པེ་ཀྑཱ ག་ཧི་ཏཱ ཡ་སྨཱ, ཏ་སྨཱ ན ག་ཧི་ཏཱ ཨུ་བྷོ.

༧༡. ཀ་སྨཱ ཡེ་ཝཱ་པ་ནཱ དྷ་མྨཱ, བུ་དྡྷེ་ནཱ་དི་ཙྩ་བ་ནྡྷུ་ནཱ;

ས་རཱུ་པེ་ནེ་ཝ ས་བྦེ་ཏེ, པཱ་ལི༹་ཡཾ ན ཙ ཨུ་དྡྷ་ཊཱ.

༧༢. ཡ་སྨཱ ཨ་ནི་ཡ་ཏཱ ཀེ་ཙི, ཡ་སྨཱ རཱ་སིཾ བྷ་ཛ་ནྟི ན;

ཡ་སྨཱ ཙ དུ་བྦ་ལཱ ཀེ་ཙི, ཏ་སྨཱ ཝུ་ཏྟཱ ན པཱ་ལི༹་ཡཾ.

༧༣. ཚ་ནྡཱ་དྷི་མོ་ཀྑ་མུ་དི་ཏཱ མ་ན་སི ཙ ཀཱ་རོ,

མ་ཛ྄ཛྷ་ཏྟ་ཏཱ ཙ ཀ་རུ་ཎཱ ཝི་ར་ཏི་ཏྟ་ཡཾ ཙ;

པུ་ཉྙེ་སུ ཏེ་ན ནི་ཡ་ཏཱ་ནི་ཡ་ཏཱ ཙ ས་བྦེ,

ཡེ་ཝཱ་པ་ནཱ མུ་ནི་ཝ་རེ་ན ན ཙེ་ཝ ཝུ་ཏྟཱ.

༧༤. ཀ་སྨཱ པ་ནེ་ཏྠ ཕ་སྶོ་ཝ, པ་ཋ་མཾ ས་མུ་དཱི་རི་ཏོ;

པ་ཋ་མཱ་བྷི་ནི་པཱ་ཏ་ཏྟཱ, ཙི་ཏྟ་སྶཱ་ར་མྨ་ཎེ ཀི་ར.

༧༥. ཕུ་སི་ཏྭཱ པ་ན ཕ་སྶེ་ན, ཝེ་ད་ནཱ་ཡ ཙ ཝེ་ད་ཡེ;

ས་ཉྫཱ་ནཱ་ཏི ཙ ས་ཉྙཱ་ཡ, ཙེ་ཏ་ནཱ་ཡ ཙ ཙེ་ཏ་ཡེ.

༧༦. བ་ལ་ཝ་པ་ཙྩ་ཡ་ཏྟཱ ཙ, ས་ཧ་ཛཱ་ཏཱ་ན་མེ་ཝ ཧི;

ཕ་སྶོ་ཝ པ་ཋ་མཾ ཝུ་ཏྟོ, ཏ་སྨཱ ཨི་དྷ མ་ཧེ་སི་ནཱ.

༧༧. ཨ་ཀཱ་ར་ཎ་མི་དཾ ས་བྦཾ, ཙི་ཏྟཱ་ནཾ ཏུ ས་ཧེ་ཝ ཙ;

ཨེ་ཀུ་པྤཱ་དཱ་དི་བྷཱ་ཝེ་ན, ཙི་ཏྟ་ཛཱ་ནཾ པ་ཝ་ཏྟི་ཏོ.

༧༨. ཨ་ཡཾ ཏུ པ་ཋ་མུ་པྤ་ནྣོ, ཨ་ཡཾ པ་ཙྪཱ་ཏི ན་ཏྠི་དཾ;

བ་ལ་ཝ་པ་ཙྩ་ཡ་ཏྟེ་པི, ཀཱ་ར་ཎ་ཉྩ ན དི་སྶ་ཏི.

༧༩. དེ་ས་ནཱ་ཀྐ་མ་ཏོ ཙེ་ཝ, པ་ཋ་མཾ ས་མུ་དཱི་རི་ཏོ;

ཨི་ཙྩེ་ཝཾ པ་ན ཝི་ཉྙེ་ཡྻཾ, ཝི་ཉྙུ་ནཱ ན ཝི་སེ་ས་ཏོ.

༨༠. ན ཙ པ་རི་ཡེ་སི་ཏ་བྦོ་ཡཾ, ཏ་སྨཱ པུ་བྦཱ་པ་ར་ཀྐ་མོ;

ཝ་ཙ་ན་ཏྠ་ལ་ཀྑ་ཎཱ་དཱི་ཧི, དྷ་མྨཱ ཨེ་ཝ ཝི་ཛཱ་ན་ཏཱ.

ཡ་སྨཱ པ་ན ཨི་མེ དྷ་མྨཱ ཝ་ཙ་ན་ཏྠ་ལ་ཀྑ་ཎཱ་དཱི་ཧི ཝུ་ཙྩ་མཱ་ནཱ པཱ་ཀ་ཊཱ ཧོ་ནྟི སུ་ཝི་ཉྙེ་ཡྻཱ་ཝ, ཏ་སྨཱ ཏེ་སཾ ཝ་ཙ་ན་ཏྠ་ལ་ཀྑ་ཎཱ་དཱི་ནི པ་ཝ་ཀྑཱ་མི. སེ་ཡྻ་ཐི་དཾ – ཕུ་ས་ཏཱི་ཏི ཕ་སྶོ. སྭཱ་ཡཾ ཕུ་ས་ན་ལ་ཀྑ་ཎོ, ས་ངྒྷ་ཊྚ་ན་ར་སོ, ས་ནྣི་པཱ་ཏ་པ་ཙྩུ་པ་ཊྛཱ་ནོ, ཕ་ལ་ཊྛེ་ན ཝེ་ད་ནཱ་པ་ཙྩུ་པ་ཊྛཱ་ནོ ཝཱ, ཨཱ་པཱ་ཐ་ག་ཏ་ཝི་ས་ཡ་པ་ད་ཊྛཱ་ནོ. ཨ་ཡཾ ཧི ཨ་རཱུ་པ་དྷ་མྨོ་པི ས་མཱ་ནོ ཨཱ་ར་མྨ་ཎེ་སུ ཕུ་ས་ནཱ་ཀཱ་རེ་ནེ་ཝ པ་ཝ་ཏྟ་ཏི, སོ དྭི་ནྣཾ མེ་ཎྜཱ་ནཾ ས་ནྣི་པཱ་ཏོ ཝི་ཡ ད་ཊྛ་བྦོ.

སུ་ནྡ་རཾ མ་ནོ་ཏི སུ་མ་ནོ, སུ་མ་ན་སྶ བྷཱ་ཝོ སོ་མ་ན་སྶཾ, སོ་མ་ན་སྶ་མེ་ཝ ཝེ་ད་ནཱ སོ་མ་ན་སྶ་ཝེ་ད་ནཱ. སཱ ཝེ་ད་ཡི་ཏ་ལ་ཀྑ་ཎཱ, ཨི་ཊྛཱ་ཀཱ་རཱ་ནུ་བྷ་ཝ་ན་ར་སཱ རཱ་ཛཱ ཝི་ཡ སུ་བྷོ་ཛ་ན་ར་སཾ, ཙེ་ཏ་སི་ཀ་ཨ་སྶཱ་ད་པ་ཙྩུ་པ་ཊྛཱ་ནཱ, པ་སྶ་དྡྷི་པ་ད་ཊྛཱ་ནཱ.

ནཱི་ལཱ་དི་བྷེ་དཾ ཨཱ་ར་མྨ་ཎཾ ས་ཉྫཱ་ནཱ་ཏཱི་ཏི ས་ཉྙཱ. སཱ ས་ཉྫཱ་ན་ན་ལ་ཀྑ་ཎཱ, པ་ཙྩཱ་བྷི་ཉྙཱ་ཎ་ཀ་ར་ཎ་ར་སཱ ཝ་ཌྜྷ་ཀི་སྶ ཨ་བྷི་ཉྙཱ་ཎ་ཀ་ར་ཎ་མི་ཝ, ཡ་ཐཱ་ག་ཧི་ཏ་ནི་མི་ཏྟ་ཝ་སེ་ན ཨ་བྷི་ནི་ཝེ་ས་ཀ་ར་ཎ་པ་ཙྩུ་པ་ཊྛཱ་ནཱ, ཡ་ཐོ་པ་ཊྛི་ཏ་ཝི་ས་ཡ་པ་ད་ཊྛཱ་ནཱ.

ཙེ་ཏ་ཡ་ཏཱི་ཏི ཙེ་ཏ་ནཱ. ས་དྡྷིཾ ཨ་ཏྟ་ནཱ ས་མྤ་ཡུ་ཏྟ་དྷ་མྨེ ཨཱ་ར་མྨ་ཎེ ཨ་བྷི་ས་ནྡ་ཧ་ཏཱི་ཏི ཨ་ཏྠོ. སཱ ཙེ་ཏ་ཡི་ཏ་ལ་ཀྑ་ཎཱ, ཨཱ་ཡཱུ་ཧ་ན་ར་སཱ, སཾ་ཝི་ད་ཧ་ན་པ་ཙྩུ་པ་ཊྛཱ་ནཱ ས་ཀ་ཀི་ཙྩ་པ་ར་ཀི་ཙྩ་སཱ་དྷ་ཀཱ ཛེ་ཊྛ་སི་སྶ་མ་ཧཱ་ཝ་ཌྜྷ་ཀི་ཨཱ་ད་ཡོ ཝི་ཡ.

ཝི་ཏ་ཀྐེ་ཏཱི་ཏི ཝི་ཏ་ཀྐོ. ཝི་ཏ་ཀྐ་ནཾ ཝཱ ཝི་ཏ་ཀྐོ. སྭཱ་ཡཾ ཨཱ་ར་མྨ་ཎེ ཙི་ཏྟ་སྶ ཨ་བྷི་ནི་རོ་པ་ན་ལ་ཀྑ་ཎོ, ཨཱ་ཧ་ན་ན་པ་རི་ཡཱ་ཧ་ན་ན་ར་སོ, ཨཱ་ར་མྨ་ཎེ ཙི་ཏྟ་སྶ ཨཱ་ན་ཡ་ན་པ་ཙྩུ་པ་ཊྛཱ་ནོ.

ཨཱ་ར་མྨ་ཎེ ཏེ་ན ཙི་ཏྟཾ ཝི་ཙ་ར་ཏཱི་ཏི ཝི་ཙཱ་རོ. ཝི་ཙ་ར་ཎཾ ཝཱ ཝི་ཙཱ་རོ. ཨ་ནུ་ས་ཉྩ་ར་ཎ་ནྟི ཝུ་ཏྟཾ ཧོ་ཏི. སྭཱ་ཡཾ ཨཱ་ར་མྨ་ཎཱ་ནུ་མ་ཛྫ་ན་ལ་ཀྑ་ཎོ, ཏ་ཏྠ ས་ཧ་ཛཱ་ཏཱ་ནུ་ཡོ་ཛ་ན་ར་སོ, ཙི་ཏྟ་སྶ ཨ་ནུ་པ་བ་ནྡྷ་པ་ཙྩུ་པ་ཊྛཱ་ནོ.

པི་ན་ཡ་ཏཱི་ཏི པཱི་ཏི. སཱ ས་མྤི་ཡཱ་ཡ་ན་ལ་ཀྑ་ཎཱ, ཀཱ་ཡ་ཙི་ཏྟ་པཱི་ཎ་ན་ར་སཱ, ཕ་ར་ཎ་ར་སཱ ཝཱ, ཨོ་ད་གྱ་པ་ཙྩུ་པ་ཊྛཱ་ནཱ.

ཙི་ཏྟ་སྶ ཨེ་ཀ་གྒ་བྷཱ་ཝོ ཙི་ཏྟེ་ཀ་གྒ་ཏཱ. ས་མཱ་དྷི་སྶེ་ཏཾ ནཱ་མཾ. སོ ཨ་ཝི་སཱ་ར་ལ་ཀྑ་ཎོ, ཨ་ཝི་ཀྑེ་པ་ལ་ཀྑ་ཎོ ཝཱ, ས་ཧ་ཛཱ་ཏཱ་ནཾ ས་མྤི་ཎྜ་ན་ར་སོ ནྷཱ་ནི་ཡ་ཙུ་ཎྞཱ་ནཾ ཨུ་ད་ཀཾ ཝི་ཡ, ཨུ་པ་ས་མ་པ་ཙྩུ་པ་ཊྛཱ་ནོ, ཝི་སེ་ས་ཏོ སུ་ཁ་པ་ད་ཊྛཱ་ནོ.

ས་དྡ་ཧ་ནྟི ཨེ་ཏཱ་ཡ, ས་ཡཾ ཝཱ ས་དྡ་ཧ་ཏི, ས་དྡ་ཧ་ན་མ་ཏྟ་མེ་ཝ ཝཱ ཨེ་སཱ་ཏི ས་དྡྷཱ. སཱ པ་ནེ་སཱ ས་དྡ་ཧ་ན་ལ་ཀྑ་ཎཱ, པ་སཱ་ད་ན་ར་སཱ ཨུ་ད་ཀ་པྤ་སཱ་ད་ཀ་མ་ཎི ཝི་ཡ, ཨ་ཀཱ་ལུ་སི་ཡ་པ་ཙྩུ་པ་ཊྛཱ་ནཱ, ས་དྡྷེ་ཡྻ་ཝ་ཏྠུ་པ་ད་ཊྛཱ་ནཱ.

ས་ར་ནྟི ཨེ་ཏཱ་ཡ, ས་ཡཾ ཝཱ ས་ར་ཏི, ས་ར་ཎ་མ་ཏྟ་མེ་ཝ ཝཱ ཨེ་སཱ་ཏི ས་ཏི. སཱ ཨ་པི་ལཱ་པ་ན་ལ་ཀྑ་ཎཱ, ཨ་ས་མྨོ་ས་ར་སཱ, ཨཱ་ར་ཀྑ་པ་ཙྩུ་པ་ཊྛཱ་ནཱ, ཐི་ར་ས་ཉྙཱ་པ་ད་ཊྛཱ་ནཱ.

ཝཱི་ར་བྷཱ་ཝོ ཝཱི་རི་ཡཾ. ཝཱི་རཱ་ནཾ ཝཱ ཀ་མྨཾ ཝཱི་རི་ཡཾ. ཏཾ པ་ནེ་ཏཾ ཨུ་སྶཱ་ཧ་ན་ལ་ཀྑ་ཎཾ, ས་ཧ་ཛཱ་ཏཱ་ནཾ ཨུ་པ་ཏྠ་མྦྷ་ན་ར་སཾ, ཨ་སཾ་སཱི་ད་ན་བྷཱ་ཝ་པ་ཙྩུ་པ་ཊྛཱ་ནཾ, སཾ་ཝེ་ག་པ་ད་ཊྛཱ་ནཾ.

པ་ཛཱ་ནཱ་ཏཱི་ཏི པ་ཉྙཱ. སཱ པ་ནེ་སཱ ཝི་ཛཱ་ན་ན་ལ་ཀྑ་ཎཱ, ཝི་ས་ཡོ་བྷཱ་ས་ན་ར་སཱ པ་དཱི་པོ ཝི་ཡ, ཨ་ས་མྨོ་ཧ་པ་ཙྩུ་པ་ཊྛཱ་ནཱ ཨ་ར་ཉྙ་ག་ཏ་སུ་དེ་ས་ཀོ ཝི་ཡ.

ཛཱི་ཝ་ནྟི ཏེ་ན ཏཾ་ས་མྤ་ཡུ་ཏྟ་དྷ་མྨཱ་ཏི ཛཱི་ཝི་ཏཾ. ཏཾ པ་ན ཨ་ཏྟ་ནཱ ཨ་ཝི་ནི་བྦྷུ་ཏྟཱ་ནཾ དྷ་མྨཱ་ནཾ ཨ་ནུ་པཱ་ལ་ན་ལ་ཀྑ་ཎཾ, ཏེ་སཾ པ་ཝ་ཏྟ་ན་ར་སཾ, ཏེ་སཾ་ཡེ་ཝ ཋ་པ་ན་པ་ཙྩུ་པ་ཊྛཱ་ནཾ, ཡཱ་པ་ཡི་ཏ་བྦ་དྷ་མྨ་པ་ད་ཊྛཱ་ནཾ. ས་ནྟེ་པི ཙ ཏེ་སཾ ཨ་ནུ་པཱ་ལ་ན་ལ་ཀྑ་ཎཱ་དི་མྷི ཝི་དྷཱ་ནེ ཨ་ཏྠི་ཀྑ་ཎེ་ཡེ་ཝ ཏཾ ཏེ དྷ་མྨེ ཨ་ནུ་པཱ་ལེ་ཏི ཨུ་ད་ཀཾ ཝི་ཡ ཨུ་པྤ་ལཱ་དཱི་ནི, ཡ་ཐཱ་ས་ཀཾ པ་ཙྩ་ཡུ་པྤ་ནྣེ་པི ཙ དྷ་མྨེ ཨ་ནུ་པཱ་ལེ་ཏི དྷཱ་ཏི ཝི་ཡ ཀུ་མཱ་རཾ, ས་ཡཾ་པ་ཝ་ཏྟི་ཏ་དྷ་མྨ་ས་མྦ་ནྡྷེ་ནེ་ཝ པ་ཝ་ཏྟ་ཏི ནི་ཡཱ་མ་ཀོ ཝི་ཡ, ན བྷ་ངྒ་ཏོ ཨུ་དྡྷཾ པ་ཝ་ཏྟ་ཡ་ཏི ཨ་ཏྟ་ནོ ཙ པ་ཝ་ཏྟ་ཡི་ཏ་བྦཱ་ན་ཉྩ ཨ་བྷཱ་ཝཱ, ན བྷ་ངྒ་ཀྑ་ཎེ ཋ་པེ་ཏི ས་ཡཾ བྷི་ཛྫ་མཱ་ན་ཏྟཱ ཁཱི་ཡ་མཱ་ནོ ཝི་ཡ ཝ་ཏྟི་སྣེ་ཧོ་ཝ པ་དཱི་པ་སི་ཁ་ནྟི.

ན ལུ་བྦྷ་ནྟི ཏེ་ན, ས་ཡཾ ཝཱ ན ལུ་བྦྷ་ཏི, ཨ་ལུ་བྦྷ་ན་མ་ཏྟ་མེ་ཝ ཝཱ ཏ་ནྟི ཨ་ལོ་བྷོ. སོ ཨཱ་ར་མྨ་ཎེ ཙི་ཏྟ་སྶ ཨ་ལ་གྒ་བྷཱ་ཝ་ལ་ཀྑ་ཎོ ཀ་མ་ལ་ད་ལེ ཛ་ལ་བི་ནྡུ ཝི་ཡ, ཨ་པ་རི་གྒ་ཧ་ར་སོ མུ་ཏྟ་བྷི་ཀྑུ ཝི་ཡ, ཨ་ན་ལླཱི་ན་བྷཱ་ཝ་པ་ཙྩུ་པ་ཊྛཱ་ནོ ཨ་སུ་ཙི་མྷི པ་ཏི་ཏ་པུ་རི་སོ ཝི་ཡ.

ན དུ་སྶ་ནྟི ཏེ་ན, ས་ཡཾ ཝཱ ན དུ་སྶ་ཏི, ཨ་དུ་སྶ་ན་མ་ཏྟ་མེ་ཝ ཝཱ ཏ་ནྟི ཨ་དོ་སོ. སོ ཨ་ཙ་ཎྜི་ཀྐ་ལ་ཀྑ་ཎོ, ཨ་ཝི་རོ་དྷ་ལ་ཀྑ་ཎོ ཝཱ ཨ་ནུ་ཀཱུ་ལ་མི་ཏྟོ ཝི་ཡ, ཨཱ་གྷཱ་ཏ་ཝི་ན་ཡ་ན་ར་སོ, པ་རི་ལཱ༹་ཧ་ཝི་ན་ཡ་ན་ར་སོ ཝཱ ཙ་ནྡ་ནཾ ཝི་ཡ, སོ་མྨ་བྷཱ་ཝ་པ་ཙྩུ་པ་ཊྛཱ་ནོ པུ་ཎྞ་ཙ་ནྡོ ཝི་ཡ.

ཀཱ་ཡ་དུ་ཙྩ་རི་ཏཱ་དཱི་ཧི ཧི་རཱི་ཡ་ཏཱི་ཏི ཧི་རཱི. ལ་ཛྫཱ་ཡེ་ཏཾ ཨ་དྷི་ཝ་ཙ་ནཾ. ཏེ་ཧི་ཡེ་ཝ ཨོ་ཏྟ་པྤ་ཏཱི་ཏི ཨོ་ཏྟ་པྤཾ. པཱ་པ་ཏོ ཨུ་བྦེ་ག་སྶེ་ཏཾ ཨ་དྷི་ཝ་ཙ་ནཾ. ཏ་ཏྠ པཱ་པ་ཏོ ཛི་གུ་ཙྪ་ན་ལ་ཀྑ་ཎཱ ཧི་རཱི, ཨོ་ཏྟཱ་ས་ལ་ཀྑ་ཎཾ ཨོ་ཏྟ་པྤཾ. ཨུ་བྷོ་པི པཱ་པཱ་ནཾ ཨ་ཀ་ར་ཎ་ར་སཱ, པཱ་པ་ཏོ ས་ངྐོ་ཙ་ན་པ་ཙྩུ་པ་ཊྛཱ་ནཱ, ཨ་ཏྟ་གཱ་ར་ཝ་པ་ར་གཱ་ར་ཝ་པ་ད་ཊྛཱ་ནཱ. ཨི་མེ དྷ་མྨཱ ལོ་ཀ་པཱ་ལཱ་ཏི ད་ཊྛ་བྦཱ.

ཀཱ་ཡ་པ་སྶ་མྦྷ་ནཾ ཀཱ་ཡ་པ་སྶ་དྡྷི. ཙི་ཏྟ་པ་སྶ་མྦྷ་ནཾ ཙི་ཏྟ་པ་སྶ་དྡྷི. ཀཱ་ཡོཏི ཙེ་ཏྠ ཝེ་ད་ནཱ་ད་ཡོ ཏ་ཡོ ཁ་ནྡྷཱ. ཨུ་བྷོ་པི པ་ནེ་ཏཱ ཨེ་ཀ་ཏོ ཧུ་ཏྭཱ ཀཱ་ཡ་ཙི་ཏྟ་ད་ར་ཐ་ཝཱུ་པ་ས་མ་ལ་ཀྑ་ཎཱ, ཀཱ་ཡ་ཙི་ཏྟ་ད་ར་ཐ་ནི་མྨ་ད་ན་ར་སཱ, ཀཱ་ཡ་ཙི་ཏྟཱ་ནཾ ཨ་པ་རི་པྥ་ནྡ་ན་སཱི་ཏི་བྷཱ་ཝ་པ་ཙྩུ་པ་ཊྛཱ་ནཱ, ཀཱ་ཡ་ཙི་ཏྟ་པ་ད་ཊྛཱ་ནཱ, ཀཱ་ཡ་ཙི་ཏྟཱ་ནཾ ཨ་ཝཱུ་པ་ས་མ་ཏཱ་ཨུ་དྡྷ་ཙྩཱ་དི་ཀི་ལེ་ས་པྤ་ཊི་པ་ཀྑ་བྷཱུ་ཏཱ་ཏི ཝེ་དི་ཏ་བྦཱ.

ཀཱ་ཡ་ལ་ཧུ་བྷཱ་ཝོ ཀཱ་ཡ་ལ་ཧུ་ཏཱ. ཙི་ཏྟ་ལ་ཧུ་བྷཱ་ཝོ ཙི་ཏྟ་ལ་ཧུ་ཏཱ. ཀཱ་ཡ་ཙི་ཏྟཱ་ནཾ ག་རུ་བྷཱ་ཝ་ཝཱུ་པ་ས་མ་ལ་ཀྑ་ཎཱ, ཀཱ་ཡ་ཙི་ཏྟ་ག་རུ་བྷཱ་ཝ་ནི་མྨ་ད་ན་ར་སཱ, ཀཱ་ཡ་ཙི་ཏྟཱ་ནཾ ཨ་ད་ནྡྷ་ཏཱ་པ་ཙྩུ་པ་ཊྛཱ་ནཱ, ཀཱ་ཡ་ཙི་ཏྟ་པ་ད་ཊྛཱ་ནཱ, ཀཱ་ཡ་ཙི་ཏྟཱ་ནཾ ག་རུ་བྷཱ་ཝ་ཀ་ར་ཐི་ན་མི་དྡྷཱ་དི་ཀི་ལེ་ས་པྤ་ཊི་པ་ཀྑ་བྷཱུ་ཏཱ་ཏི ཝེ་དི་ཏ་བྦཱ.

ཀཱ་ཡ་མུ་དུ་བྷཱ་ཝོ ཀཱ་ཡ་མུ་དུ་ཏཱ. ཙི་ཏྟ་མུ་དུ་བྷཱ་ཝོ ཙི་ཏྟ་མུ་དུ་ཏཱ. ཀཱ་ཡ་ཙི་ཏྟཱ་ནཾ ཐ་དྡྷ་བྷཱ་ཝ་ཝཱུ་པ་ས་མ་ལ་ཀྑ་ཎཱ, ཀཱ་ཡ་ཙི་ཏྟཱ་ནཾ ཐ་དྡྷ་བྷཱ་ཝ་ནི་མྨ་ད་ན་ར་སཱ, ཨ་པྤ་ཊི་གྷཱ་ཏ་པ་ཙྩུ་པ་ཊྛཱ་ནཱ, ཀཱ་ཡ་ཙི་ཏྟ་པ་ད་ཊྛཱ་ནཱ, ཀཱ་ཡ་ཙི་ཏྟཱ་ནཾ ཐ་དྡྷ་བྷཱ་ཝ་ཀ་ར་དི་ཊྛི་མཱ་ནཱ་དི་ཀི་ལེ་ས་པྤ་ཊི་པ་ཀྑ་བྷཱུ་ཏཱ་ཏི ཝེ་དི་ཏ་བྦཱ.

ཀཱ་ཡ་ཀ་མྨ་ཉྙ་བྷཱ་ཝོ ཀཱ་ཡ་ཀ་མྨ་ཉྙ་ཏཱ. ཙི་ཏྟ་ཀ་མྨ་ཉྙ་བྷཱ་ཝོ ཙི་ཏྟ་ཀ་མྨ་ཉྙ་ཏཱ. ཀཱ་ཡ་ཙི་ཏྟཱ་ནཾ ཨ་ཀ་མྨ་ཉྙ་བྷཱ་ཝ་ཝཱུ་པ་ས་མ་ལ་ཀྑ་ཎཱ, ཀཱ་ཡ་ཙི་ཏྟཱ་ནཾ ཨ་ཀ་མྨ་ཉྙ་བྷཱ་ཝ་ནི་མྨ་ད་ན་ར་སཱ, ཀཱ་ཡ་ཙི་ཏྟཱ་ནཾ ཨཱ་ར་མྨ་ཎ་ཀ་ར་ཎ་ས་མྤ་ཏྟི་པ་ཙྩུ་པ་ཊྛཱ་ནཱ, ཀཱ་ཡ་ཙི་ཏྟ་པ་ད་ཊྛཱ་ནཾ, ཀཱ་ཡ་ཙི་ཏྟཱ་ནཾ ཨ་ཀ་མྨ་ཉྙ་བྷཱ་ཝ་ཀ་ར་ཨ་ཝ་སེ་ས་ནཱི་ཝ་ར་ཎཱ་དི་ཀི་ལེ་ས་པྤ་ཊི་པ་ཀྑ་བྷཱུ་ཏཱ་ཏི ཝེ་དི་ཏ་བྦཱ.

ཀཱ་ཡ་པཱ་གུ་ཉྙ་བྷཱ་ཝོ ཀཱ་ཡ་པཱ་གུ་ཉྙ་ཏཱ. ཙི་ཏྟ་པཱ་གུ་ཉྙ་བྷཱ་ཝོ ཙི་ཏྟ་པཱ་གུ་ཉྙ་ཏཱ. ཀཱ་ཡ་ཙི་ཏྟཱ་ནཾ ཨ་གེ་ལ་ཉྙ་བྷཱ་ཝ་ལ་ཀྑ་ཎཱ, ཀཱ་ཡ་ཙི་ཏྟཱ་ནཾ གེ་ལ་ཉྙ་ནི་མྨ་ད་ན་ར་སཱ, ནི་རཱ་དཱི་ན་ཝ་པ་ཙྩུ་པ་ཊྛཱ་ནཱ, ཀཱ་ཡ་ཙི་ཏྟ་པ་ད་ཊྛཱ་ནཱ, ཀཱ་ཡ་ཙི་ཏྟཱ་ནཾ གེ་ལ་ཉྙ་བྷཱ་ཝ་ཀ་ར་ཨ་སྶ་དྡྷཱ་དི་ཀི་ལེ་ས་པྤ་ཊི་པ་ཀྑ་བྷཱུ་ཏཱ་ཏི ད་ཊྛ་བྦཱ.

ཀཱ་ཡ་སྶ ཨུ་ཛུ་ཀ་བྷཱ་ཝོ ཀཱ་ཡུ་ཛུ་ཀ་ཏཱ. ཙི་ཏྟ་སྶ ཨུ་ཛུ་ཀ་བྷཱ་ཝོ ཙི་ཏྟུ་ཛུ་ཀ་ཏཱ. ཀཱ་ཡ་ཙི་ཏྟཱ་ནཾ ཨ་ཀུ་ཊི་ལ་བྷཱ་ཝ་ལ་ཀྑ་ཎཱ, ཀཱ་ཡ་ཙི་ཏྟཱ་ནཾ ཨ་ཛྫ་ཝ་ལ་ཀྑ་ཎཱ ཝཱ, ཀཱ་ཡ་ཙི་ཏྟཱ་ནཾ ཀུ་ཊི་ལ་བྷཱ་ཝ་ནི་མྨ་ད་ན་ར་སཱ, ཨ་ཛི་མྷ་ཏཱ་པ་ཙྩུ་པ་ཊྛཱ་ནཱ, ཀཱ་ཡ་ཙི་ཏྟ་པ་ད་ཊྛཱ་ནཱ, ཀཱ་ཡ་ཙི་ཏྟཱ་ནཾ ཀུ་ཊི་ལ་བྷཱ་ཝ་ཀ་ར་མཱ་ཡཱ་སཱ་ཋེ་ཡྻཱ་དི་ཀི་ལེ་ས་པྤ་ཊི་པ་ཀྑ་བྷཱུ་ཏཱ་ཏི ད་ཊྛ་བྦཱ.

ཚ་ནྡོཏི ཀ་ཏྟུ་ཀ་མྱ་ཏཱ་ཡེ་ཏཾ ཨ་དྷི་ཝ་ཙ་ནཾ. ཏ་སྨཱ སོ ཀ་ཏྟུ་ཀ་མྱ་ཏཱ་ལ་ཀྑ་ཎོ ཚ་ནྡོ, ཨཱ་ར་མྨ་ཎ་པ་རི་ཡེ་ས་ན་ར་སོ, ཨཱ་ར་མྨ་ཎེ་ན ཨ་ཏྠི་ཀ་ཏཱ་པ་ཙྩུ་པ་ཊྛཱ་ནོ, ཏ་དེ་ཝ་སྶ པ་ད་ཊྛཱ་ནོ.

ཨ་དྷི་མུ་ཙྩ་ནཾ ཨ་དྷི་མོ་ཀྑོ. སོ ས་ནྣི་ཊྛཱ་ན་ལ་ཀྑ་ཎོ, ཨ་སཾ་ས་པྤ་ན་ར་སོ, ནི་ཙྪ་ཡ་པ་ཙྩུ་པ་ཊྛཱ་ནོ, ས་ནྣི་ཊྛེ་ཡྻ་དྷ་མྨ་པ་ད་ཊྛཱ་ནོ, ཨཱ་ར་མྨ་ཎེ ནི་ཙྩ་ལ་བྷཱ་ཝེ་ན ཨི་ནྡ་ཁཱི་ལོ ཝི་ཡ ད་ཊྛ་བྦོ.

ཏེ་སུ ཏེ་སུ དྷ་མྨེ་སུ མ་ཛ྄ཛྷ་ཏྟ་བྷཱ་ཝོ ཏ་ཏྲ་མ་ཛ྄ཛྷ་ཏྟ་ཏཱ. སཱ ཙི་ཏྟ་ཙེ་ཏ་སི་ཀཱ་ནཾ ས་མ་ཝཱ་ཧི་ཏ་ལ་ཀྑ་ཎཱ, ཨཱུ་ནཱ་དྷི་ཀ་ཏཱ་ནི་ཝཱ་ར་ཎ་ར་སཱ, པ་ཀྑ་པཱ་ཏུ་པ་ཙྪེ་ད་ན་ར་སཱ ཝཱ, མ་ཛ྄ཛྷ་ཏྟ་བྷཱ་ཝ་པ་ཙྩུ་པ་ཊྛཱ་ནཱ.

ཀི་རི་ཡཱ ཀཱ་རོ, མ་ན་སྨིཾ ཀཱ་རོ མ་ན་སི་ཀཱ་རོ. པུ་རི་མ་མ་ན་ཏོ ཝི་ས་དི་སཾ མ་ནཾ ཀ་རོ་ཏཱི་ཏི ཙ མ་ན་སི་ཀཱ་རོ.

སྭཱ་ཡཾ ཨཱ་ར་མྨ་ཎ་པ་ཊི་པཱ་ད་ཀོ, ཝཱི་ཐི་པ་ཊི་པཱ་ད་ཀོ, ཛ་ཝ་ན་པ་ཊི་པཱ་ད་ཀོ་ཏི ཏི་པྤ་ཀཱ་རོ. ཏ་ཏྠ ཨཱ་ར་མྨ་ཎ་པ་ཊི་པཱ་ད་ཀོ མ་ན་སྨིཾ ཀཱ་རོ མ་ན་སི་ཀཱ་རོ. སོ སཱ་ར་ཎ་ལ་ཀྑ་ཎོ, ས་མྤ་ཡུ་ཏྟཱ་ནཾ ཨཱ་ར་མྨ་ཎེ སཾ་ཡོ་ཛ་ན་ར་སོ, ཨཱ་ར་མྨ་ཎཱ་བྷི་མུ་ཁ་བྷཱ་ཝ་པ་ཙྩུ་པ་ཊྛཱ་ནོ, ཨཱ་ར་མྨ་ཎ་པ་ད་ཊྛཱ་ནོ, ས་ངྑཱ་ར་ཀྑ་ནྡྷ་པ་རི་ཡཱ་པ་ནྣོ ཨཱ་ར་མྨ་ཎ་པ་ཊི་པཱ་ད་ཀ་ཏྟེ་ན ས་མྤ་ཡུ་ཏྟཱ་ནཾ སཱ་ར་ཐཱི ཝི་ཡ ད་ཊྛ་བྦོ. ཝཱི་ཐི་པ་ཊི་པཱ་ད་ཀོཏི པ་ཉྩ་དྭཱ་རཱ་ཝ་ཛྫ་ན་སྶེ་ཏཾ ཨ་དྷི་ཝ་ཙ་ནཾ, ཛ་ཝ་ན་པ་ཊི་པཱ་ད་ཀོཏི མ་ནོ་དྭཱ་རཱ་ཝ་ཛྫ་ན་སྶེ་ཏཾ ཨ་དྷི་ཝ་ཙ་ནཾ, ན ཏེ ཨི་དྷ ཨ་དྷི་པྤེ་ཏཱ.

ཀ་རུ་ཎཱཏི པ་ར་དུ་ཀྑེ ས་ཏི སཱ་དྷཱུ་ནཾ ཧ་ད་ཡ་ཀ་མྤ་ནཾ ཀ་རོ་ཏཱི་ཏི ཀ་རུ་ཎཱ, ཀི་ནཱ་ཏི ཝི་ནཱ་སེ་ཏི ཝཱ པ་ར་དུ་ཀྑ་ནྟི ཀ་རུ་ཎཱ. སཱ པ་ར་དུ་ཀྑཱ་པ་ན་ཡ་ནཱ་ཀཱ་ར་པྤ་ཝ་ཏྟི་ལ་ཀྑ་ཎཱ, པ་ར་དུ་ཀྑཱ་ས་ཧ་ན་ར་སཱ, ཨ་ཝི་ཧིཾ་སཱ་པ་ཙྩུ་པ་ཊྛཱ་ནཱ, དུ་ཀྑཱ་བྷི་བྷཱུ་ཏཱ་ནཾ ཨ་ནཱ་ཐ་བྷཱ་ཝ་ད་སྶ་ན་པ་ད་ཊྛཱ་ནཱ.

མོ་ད་ནྟི ཏཱ་ཡ, ས་ཡཾ ཝཱ མོ་ད་ཏཱི་ཏི མུ་དི་ཏཱ. སཱ པ་མོ་ད་ན་ལ་ཀྑ་ཎཱ, ཨ་ནི་སྶཱ་ཡ་ན་ར་སཱ, ཨ་ར་ཏི་ཝི་གྷཱ་ཏ་པ་ཙྩུ་པ་ཊྛཱ་ནཱ, ས་ཏྟཱ་ནཾ ས་མྤ་ཏྟི་ད་སྶ་ན་པ་ད་ཊྛཱ་ནཱ. ཀེ་ཙི པ་ན མེ་ཏྟུ་པེ་ཀྑཱ་ཡོ་པི ཨ་ནི་ཡ་ཏེ ཨི་ཙྪ་ནྟི, ཏཾ ན ག་ཧེ་ཏ་བྦཾ. ཨ་ཏྠ་ཏོ ཧི ཨ་དོ་སོ ཨེ་ཝ མེ་ཏྟཱ, ཏ་ཏྲ་མ་ཛ྄ཛྷ་ཏྟུ་པེ་ཀྑཱ་ཡེ་ཝ ཨུ་པེ་ཀྑཱ་ཏི.

ཀཱ་ཡ་དུ་ཙྩ་རི་ཏ་ཏོ ཝི་ར་ཏི ཀཱ་ཡ་དུ་ཙྩ་རི་ཏ་ཝི་ར་ཏི. ཨེ་སེ་ཝ ན་ཡོ སེ་སེ་སུ་པི དྭཱི་སུ. ལ་ཀྑ་ཎཱ་དི་ཏོ པ་ན ཨེ་ཏཱ ཏི་སྶོ་པི ཝི་ར་ཏི་ཡོ ཀཱ་ཡ་དུ་ཙྩ་རི་ཏཱ་དི་ཝ་ཏྠཱུ་ནཾ ཨ་ཝཱི་ཏི་ཀྐ་མ་ལ་ཀྑ་ཎཱ, ཀཱ་ཡ་དུ་ཙྩ་རི་ཏཱ་དི་ཝ་ཏྠུ་ཏོ ས་ངྐོ་ཙ་ན་ར་སཱ, ཨ་ཀི་རི་ཡ་པ་ཙྩུ་པ་ཊྛཱ་ནཱ, ས་དྡྷཱ་ཧི་རི་ཨོ་ཏྟ་པྤ་ཨ་པྤི་ཙྪ་ཏཱ་དི་གུ་ཎ་པ་ད་ཊྛཱ་ནཱ. ཀེ་ཙི པ་ན ཨི་མཱ་སུ ཨེ་ཀེ་ཀཾ ནི་ཡ་ཏཾ ཝི་ར་ཏིཾ ཨི་ཙྪ་ནྟི. ཨེ་ཝཾ ཀཱ་མཱ་ཝ་ཙ་ར་པ་ཋ་མ་མ་ཧཱ་ཀུ་ས་ལ་ཙི་ཏྟེ་ན ཨི་མེ ཏེ་ཏྟིཾ་ས ཝཱ ཙ་ཏུ་ཏྟིཾ་ས ཝཱ དྷ་མྨཱ ས་མྤ་ཡོ་གཾ ག་ཙྪ་ནྟཱི་ཏི ཝེ་དི་ཏ་བྦཱ.

ཡ་ཐཱ ཙ པ་ཋ་མེ་ན, ཨེ་ཝཾ དུ་ཏི་ཡ་ཙི་ཏྟེ་ནཱ་པི. ས་ས་ངྑཱ་ར་བྷཱ་ཝ་མ་ཏྟ་མེ་ཝ ཧི ཨེ་ཏྠ ཝི་སེ་སོ. པུ་ན ཏ་ཏི་ཡེ་ན ཉཱ་ཎ་ཝི་པྤ་ཡོ་ག་ཏོ ཋ་པེ་ཏྭཱ ཨ་མོ་ཧཾ ཨ་ཝ་སེ་སཱ དྭ་ཏྟིཾ་ས ཝཱ ཏེ་ཏྟིཾ་ས ཝཱ ཝེ་དི་ཏ་བྦཱ. ཏ་ཐཱ ཙ་ཏུ་ཏྠེ་ནཱ་པི ས་ས་ངྑཱ་ར་བྷཱ་ཝ་མ་ཏྟ་མེ་ཝ ཝི་སེ་སོ, པ་ཋ་མེ ཝུ་ཏྟེ་སུ པ་ན ཋ་པེ་ཏྭཱ པཱི་ཏིཾ ཨ་ཝ་སེ་སཱ པ་ཉྩ་མེ་ན ས་མྤ་ཡོ་གཾ ག་ཙྪ་ནྟི. སོ་མ་ན་སྶ་ཊྛཱ་ནེ ཙེ་ཏྠ ཨུ་པེ་ཀྑཱ་ཝེ་ད་ནཱ པ་ཝི་ཊྛཱ. སཱ པ་ན ཨི་ཊྛཱ་ནི་ཊྛ་ཝི་པ་རཱི་ཏཱ་ནུ་བྷ་ཝ་ན་ལ་ཀྑ་ཎཱ, པ་ཀྑ་པཱ་ཏུ་པ་ཙྪེ་ད་ན་ར་སཱ. ཡ་ཐཱ ཙ པ་ཉྩ་མེ་ན, ཨེ་ཝཾ ཚ་ཊྛེ་ནཱ་པི. ས་ས་ངྑཱ་ར་མ་ཏྟ་མེ་ཝ ཧོ་ཏི ཝི་སེ་སོ. ས་ཏྟ་མེ་ན པ་ན ཋ་པེ་ཏྭཱ པ་ཉྙཾ ཨ་ཝ་སེ་སཱ ཨེ་ཀ་ཏིཾ་ས ཝཱ དྭ་ཏྟིཾ་ས ཝཱ དྷ་མྨཱ ཧོ་ནྟི, ཏ་ཐཱ ཨ་ཊྛ་མེ་ནཱ་པི. ས་ས་ངྑཱ་ར་མ་ཏྟ་མེ་ཝ ཝི་སེ་སོ. ཨེ་ཝཾ ཏཱ་ཝ ཀཱ་མཱ་ཝ་ཙ་ར་ཀུ་ས་ལ་ཙེ་ཏ་སི་ཀཱ ཝེ་དི་ཏ་བྦཱ.

༨༡. ཨུ་པེ་ཀྑཱ་ཡུ་ཏྟ་ཙི་ཏྟེ་སུ, ན དུ་ཀྑ་སུ་ཁ་པཱི་ཏི་ཡོ;

ཛཱ་ཡ་ནྟེ་ཝ ཝི་སུཾ པ་ཉྩ, ཀ་རུ་ཎཱ་མུ་དི་ཏཱ་ད་ཡོ.

ཨ་ཝ་སེ་སེ་སུ པ་ན རཱུ་པཱ་ཝ་ཙ་ར་ཙི་ཏྟ་ས་མྤ་ཡུ་ཏྟཱ རཱུ་པཱ་ཝ་ཙ་རཱ, ཏ་ཏྠ པ་ཋ་མ་ཙི་ཏྟ་ས་མྤ་ཡུ་ཏྟཱ ཏཱ་ཝ ཀཱ་མཱ་ཝ་ཙ་ར་པ་ཋ་མ་ཙི་ཏྟེ ཝུ་ཏྟེ་སུ ཋ་པེ་ཏྭཱ ཝི་ར་ཏི་ཏྟ་ཡཾ ཨ་ཝ་སེ་སཱ ཝེ་དི་ཏ་བྦཱ. ཝི་ར་ཏི་ཡོ པ་ན ཀཱ་མཱ་ཝ་ཙ་ར་ཀུ་ས་ལ་ལོ་ཀུ་ཏྟ་རེ་སྭེ་ཝ ཨུ་པྤ་ཛྫ་ནྟི, ན ཨ་ཉྙེ་སུ. དུ་ཏི་ཡེ་ན ཝི་ཏ་ཀྐ་ཝ་ཛྫཱ དྭ་ཏྟིཾ་ས ཝཱ ཏེ་ཏྟིཾ་ས ཝཱ. ཏ་ཏི་ཡེ་ན ཝི་ཙཱ་ར་ཝ་ཛྫཱ ཨེ་ཀ་ཏིཾ་ས ཝཱ དྭ་ཏྟིཾ་ས ཝཱ. ཙ་ཏུ་ཏྠེ་ན ཏ་ཏོ པཱི་ཏི་ཝ་ཛྫཱ ཏིཾ་ས ཝཱ ཨེ་ཀ་ཏིཾ་ས ཝཱ. པ་ཉྩ་མེ་ན ཏ་ཏོ ཀ་རུ་ཎཱ་མུ་དི་ཏཱ་ཝ་ཛྫཱ ཏིཾ་ས ཧོ་ནྟི, སོ་མ་ན་སྶ་ཊྛཱ་ནེ ཨུ་པེ་ཀྑཱ པ་ཝི་ཊྛཱ. ཨེ་ཝཾ རཱུ་པཱ་ཝ་ཙ་ར་ཀུ་ས་ལ་ཙེ་ཏ་སི་ཀཱ ཝེ་དི་ཏ་བྦཱ.

ཨ་རཱུ་པཱ་ཝ་ཙ་ར་ཙི་ཏྟ་ས་མྤ་ཡུ་ཏྟཱ ཨ་རཱུ་པཱ་ཝ་ཙ་རཱ, ཏེ པ་ན རཱུ་པཱ་ཝ་ཙ་ར་པ་ཉྩ་མེ ཝུ་ཏྟ་ན་ཡེ་ན ཝེ་དི་ཏ་བྦཱ. ཨ་རཱུ་པཱ་ཝ་ཙ་ར་བྷཱ་ཝོ་ཝེ་ཏྠ ཝི་སེ་སོ.

ལོ་ཀུ་ཏྟ་ར་ཙི་ཏྟ་ས་མྤ་ཡུ་ཏྟཱ ལོ་ཀུ་ཏྟ་རཱ, ཏེ པ་ན པ་ཋ་མ་ཛ྄ཛྷཱ་ནི་ཀེ མ་གྒ་ཙི་ཏྟེ པ་ཋ་མ་རཱུ་པཱ་ཝ་ཙ་ར་ཙི་ཏྟེ ཝུ་ཏྟ་ན་ཡེ་ན དུ་ཏི་ཡ་ཛ྄ཛྷཱ་ནི་ཀཱ་དི་བྷེ་དེ་པི མ་གྒ་ཙི་ཏྟེ དུ་ཏི་ཡ་རཱུ་པཱ་ཝ་ཙ་ར་ཙི་ཏྟཱ་དཱི་སུ ཝུ་ཏྟ་ན་ཡེ་ནེ་ཝ ཝེ་དི་ཏ་བྦཱ. ཀ་རུ་ཎཱ་མུ་དི་ཏཱ་ན་མ་བྷཱ་ཝོ ཙ ནི་ཡ་ཏ་ཝི་ར་ཏི་བྷཱ་ཝོ ཙ ལོ་ཀུ་ཏྟ་ར་བྷཱ་ཝོ ཙེ་ཏྠ ཝི་སེ་སོ. ཨེ་ཝཾ ཏཱ་ཝ ཀུ་ས་ལ་ཙི་ཏྟ་ས་མྤ་ཡུ་ཏྟ་ཙེ་ཏ་སི་ཀཱ ཝེ་དི་ཏ་བྦཱ.

ཨ་ཀུ་ས་ལཱ པ་ན ཙེ་ཏ་སི་ཀཱ བྷཱུ་མི་ཏོ ཨེ་ཀ་ཝི་དྷཱ ཀཱ་མཱ་ཝ་ཙ་རཱ་ཡེ་ཝ, ཏེ་སུ ལོ་བྷ་མཱུ་ལ་པ་ཋ་མཱ་ཀུ་ས་ལ་ཙི་ཏྟ་ས་མྤ་ཡུ་ཏྟཱ ཏཱ་ཝ ནི་ཡ་ཏཱ ས་རཱུ་པེ་ནཱ་ག་ཏཱ པ་ནྣ་ར་ས, ཡེ་ཝཱ་པ་ན་ཀཱ ནི་ཡ་ཏཱ ཙ་ཏྟཱ་རོ་ཏི ཨེ་ཀཱུ་ན་ཝཱི་ས་ཏི ཧོ་ནྟི. ཨ་ནི་ཡ་ཏཱ ཚ ཡེ་ཝཱ་པ་ན་ཀཱ་ཏི ས་བྦེ པ་ཉྩ་ཝཱི་ས་ཏི ཧོ་ནྟི. སེ་ཡྻ་ཐི་དཾ – ཕ་སྶོ སོ་མ་ན་སྶ་ཝེ་ད་ནཱ ས་ཉྙཱ ཙེ་ཏ་ནཱ ཝི་ཏ་ཀྐོ ཝི་ཙཱ་རོ པཱི་ཏི ཙི་ཏྟ་སྶེ་ཀ་གྒ་ཏཱ ཝཱི་རི་ཡཾ ཛཱི་ཝི་ཏཾ ཨ་ཧི་རི་ཀཾ ཨ་ནོ་ཏྟ་པྤཾ ལོ་བྷོ མོ་ཧོ མི་ཙྪཱ་དི་ཊྛཱི་ཏི ཨི་མེ ས་རཱུ་པེ་ནཱ་ག་ཏཱ པ་ནྣ་ར་ས, ཚ་ནྡོ ཨ་དྷི་མོ་ཀྑོ ཨུ་དྡྷ་ཙྩཾ མ་ན་སི་ཀཱ་རོ་ཏི ཨི་མེ ཙ་ཏྟཱ་རོ ནི་ཡ་ཏ་ཡེ་ཝཱ་པ་ན་ཀཱ, ཨི་མེ པ་ན པ་ཊི་པཱ་ཊི་ཡཱ ད་ས་སུ ཙི་ཏྟེ་སུ ནི་ཡ་ཏཱ ཧོ་ནྟི, མཱ་ནོ ཨི་སྶཱ མ་ཙྪ་རི་ཡཾ ཀུ་ཀྐུ་ཙྩཾ ཐི་ན་མི་དྡྷ་ནྟི ཨི་མེ ཚ་ཡེ་ཝ ཨ་ནི་ཡ་ཏ་ཡེ་ཝཱ་པ་ན་ཀཱ.

༨༢. ཨེ་ཝཾ ཡེ་ཝཱ་པ་ནཱ ས་བྦེ, ནི་ཡ་ཏཱ་ནི་ཡ་ཏཱ ད་ས;

ནི་དྡི་ཊྛཱ པཱ་པ་ཙི་ཏྟེ་སུ, ཧ་ཏ་པཱ་པེ་ན ཏཱ་དི་ནཱ.

ཏ་ཏྠ ཕ་སྶོཏི ཨ་ཀུ་ས་ལ་ཙི་ཏྟ་ས་ཧ་ཛཱ་ཏོ ཕ་སྶོ. ཨེ་ས ན་ཡོ སེ་སེ་སུ་པི. ན ཧི་རཱི་ཡ་ཏཱི་ཏི ཨ་ཧི་རི་ཀོ, ཨ་ཧི་རི་ཀ་སྶ བྷཱ་ཝོ ཨ་ཧི་རི་ཀཾ. ཀཱ་ཡ་དུ་ཙྩ་རི་ཏཱ་དཱི་ཧི ཨོ་ཏྟ་པྤ་ཏཱི་ཏི ཨོ་ཏྟ་པྤཾ, ན ཨོ་ཏྟ་པྤཾ ཨ་ནོ་ཏྟ་པྤཾ. ཏ་ཏྠ ཀཱ་ཡ་དུ་ཙྩ་རི་ཏཱ་དཱི་ཧི ཨ་ཛི་གུ་ཙྪ་ན་ལ་ཀྑ་ཎཾ, ཨ་ལ་ཛྫཱ་ལ་ཀྑ་ཎཾ ཝཱ ཨ་ཧི་རི་ཀཾ, ཨ་ནོ་ཏྟ་པྤཾ ཏེ་ཧེ་ཝ ཨ་སཱ་ར་ཛྫ་ན་ལ་ཀྑ་ཎཾ, ཨ་ནུ་ཏྟཱ་ས་ལ་ཀྑ་ཎཾ ཝཱ.

ལུ་བྦྷ་ནྟི ཏེ་ན, ས་ཡཾ ཝཱ ལུ་བྦྷ་ཏི, ལུ་བྦྷ་ན་མ་ཏྟ་མེ་ཝ ཝཱ ཏ་ནྟི ལོ་བྷོ. སོ ཨཱ་ར་མྨ་ཎ་ག་ཧ་ཎ་ལ་ཀྑ་ཎོ མ་ཀྐ་ཊཱ་ལེ་པོ ཝི་ཡ, ཨ་བྷི་ས་ངྒ་ར་སོ ཏ་ཏྟ་ཀ་པཱ་ལེ པ་ཀྑི་ཏྟ་མཾ་ས་པེ་སི ཝི་ཡ, ཨ་པ་རི་ཙྩཱ་ག་པ་ཙྩུ་པ་ཊྛཱ་ནོ ཏེ་ལ་ཉྫ་ན་རཱ་གོ ཝི་ཡ, སཾ་ཡོ་ཛ་ནི་ཡེ་སུ དྷ་མྨེ་སུ ཨ་སྶཱ་ད་ད་སྶ་ན་པ་ད་ཊྛཱ་ནོ.

མུ་ཡ྄ཧ་ནྟི ཏེ་ན, ས་ཡཾ ཝཱ མུ་ཡ྄ཧ་ཏི, མུ་ཡ྄ཧ་ན་མ་ཏྟ་མེ་ཝ ཝཱ ཏ་ནྟི མོ་ཧོ. སོ ཙི་ཏྟ་སྶ ཨ་ནྡྷ་བྷཱ་ཝ་ལ་ཀྑ་ཎོ, ཨ་ཉྙཱ་ཎ་ལ་ཀྑ་ཎོ ཝཱ, ཨ་ས་མྤ་ཊི་ཝེ་དྷ་ར་སོ, ཨཱ་ར་མྨ་ཎ་ས་བྷཱ་ཝ་ཙྪཱ་ད་ན་ར་སོ ཝཱ, ཨ་ནྡྷ་ཀཱ་ར་པ་ཙྩུ་པ་ཊྛཱ་ནོ, ཨ་ཡོ་ནི་སོ་མ་ན་སི་ཀཱ་ར་པ་ད་ཊྛཱ་ནོ.

མི་ཙྪཱ པ་སྶ་ནྟི ཏཱ་ཡ, ས་ཡཾ ཝཱ མི་ཙྪཱ པ་སྶ་ཏི, མི་ཙྪཱ་ད་སྶ་ན་མ་ཏྟ་མེ་ཝ ཝཱ ཨེ་སཱ་ཏི མི་ཙྪཱ་དི་ཊྛི. སཱ ཨ་ཡོ་ནི་སོ་ཨ་བྷི་ནི་ཝེ་ས་ལ་ཀྑ་ཎཱ, པ་རཱ་མཱ་ས་ར་སཱ, མི་ཙྪཱ་བྷི་ནི་ཝེ་ས་པ་ཙྩུ་པ་ཊྛཱ་ནཱ, ཨ་རི་ཡཱ་ནཾ ཨ་ད་སྶ་ན་ཀཱ་མ་ཏཱ་དི་པ་ད་ཊྛཱ་ནཱ.

ཨུ་དྡྷ་ཏ་བྷཱ་ཝོ ཨུ་དྡྷ་ཙྩཾ. ཏཾ ཨ་ཝཱུ་པ་ས་མ་ལ་ཀྑ་ཎཾ ཝཱ་ཏཱ་བྷི་གྷཱ་ཏ་ཙ་ལ་ཛ་ལཾ ཝི་ཡ, ཨ་ན་ཝ་ཊྛཱ་ན་ར་སཾ ཝཱ་ཏཱ་བྷི་གྷཱ་ཏ་ཙ་ལ་དྷ་ཛ་པ་ཊཱ་ཀཱ ཝི་ཡ, བྷ་ནྟ་ཏྟ་པ་ཙྩུ་པ་ཊྛཱ་ནཾ པཱ་སཱ་ཎཱ་བྷི་གྷཱ་ཏ་ས་མུ་དྡྷ་ཏ་བྷ་སྨཾ ཝི་ཡ, ཨ་ཡོ་ནི་སོ་མ་ན་སི་ཀཱ་ར་པ་ད་ཊྛཱ་ནཾ.

མ་ཉྙ་ཏཱི་ཏི མཱ་ནོ. སོ ཨུ་ཎྞ་ཏི་ལ་ཀྑ་ཎོ, ས་མྤ་གྒ་ཧ་ཎ་ར་སོ, ཀེ་ཏུ་ཀ་མྱ་ཏཱ་པ་ཙྩུ་པ་ཊྛཱ་ནོ, དི་ཊྛི་ཝི་པྤ་ཡུ་ཏྟ་ལོ་བྷ་པ་ད་ཊྛཱ་ནོ.

ཨི་སྶ་ཏཱི་ཏི ཨི་སྶཱ. སཱ པ་ར་ས་མྤ་ཏྟཱི་ནཾ ཨུ་སཱུ་ཡ་ན་ལ་ཀྑ་ཎཱ, ཏ་ཏྠེ་ཝ ཨ་ན་བྷི་ར་ཏི་ར་སཱ, ཏ་ཏོ ཝི་མུ་ཁ་བྷཱ་ཝ་པ་ཙྩུ་པ་ཊྛཱ་ནཱ, པ་ར་ས་མྤ་ཏྟི་པ་ད་ཊྛཱ་ནཱ.

མ་ཙྪ་ར་བྷཱ་ཝོ མ་ཙྪ་རི་ཡཾ. ཏཾ ཨ་ཏྟ་ནོ ས་མྤ་ཏྟཱི་ནཾ ནི་གུ་ཧ་ཎ་ལ་ཀྑ་ཎཾ, ཏཱ་སཾ་ཡེ་ཝ པ་རེ་ཧི སཱ་དྷཱ་ར་ཎ་བྷཱ་ཝ་ཨ་ཀྑ་མ་ན་ར་སཾ, ས་ངྐོ་ཙ་ན་པ་ཙྩུ་པ་ཊྛཱ་ནཾ, ཨ་ཏྟ་ས་མྤ་ཏྟི་པ་ད་ཊྛཱ་ནཾ.

ཀུ་ཙྪི་ཏཾ ཀ་ཏཾ ཀུ་ཀ་ཏཾ, ཏ་སྶ བྷཱ་ཝོ ཀུ་ཀྐུ་ཙྩཾ. ཏཾ པ་ཙྪཱ་ནུ་ཏཱ་པ་ལ་ཀྑ་ཎཾ, ཀ་ཏཱ་ཀ་ཏཱ་ནུ་སོ་ཙ་ན་ར་སཾ, ཝི་པྤ་ཊི་སཱ་ར་པ་ཙྩུ་པ་ཊྛཱ་ནཾ, ཀ་ཏཱ་ཀ་ཏ་པ་ད་ཊྛཱ་ནཾ.

ཐི་ན་ཏཱ ཐི་ནཾ. མི་དྡྷ་ཏཱ མི་དྡྷཾ. ཨ་ནུ་སྶཱ་ཧ་ན་སཾ་སཱི་ད་ན་ཏཱ, ཨ་ས་ཏྟི་ཝི་གྷཱ་ཏོ ཙཱ་ཏི ཨ་ཏྠོ. ཐི་ན་ཉྩ མི་དྡྷ་ཉྩ ཐི་ན་མི་དྡྷཾ. ཏ་ཏྠ ཐི་ནཾ ཨ་ནུ་སྶཱ་ཧ་ན་ལ་ཀྑ་ཎཾ, ཝཱི་རི་ཡ་ཝི་ནོ་ད་ན་ར་སཾ, སཾ་སཱི་ད་ན་བྷཱ་ཝ་པ་ཙྩུ་པ་ཊྛཱ་ནཾ. མི་དྡྷཾ ཨ་ཀ་མྨ་ཉྙ་ཏཱ་ལ་ཀྑ་ཎཾ, ཨོ་ན་ཧ་ན་ར་སཾ, ལཱི་ན་ཏཱ་པ་ཙྩུ་པ་ཊྛཱ་ནཾ, ཨུ་བྷ་ཡ་མྤི ཨ་ཡོ་ནི་སོ་མ་ན་སི་ཀཱ་ར་པ་ད་ཊྛཱ་ནཾ. སེ་སཱ ཀུ་ས་ལེ ཝུ་ཏྟ་ན་ཡེ་ན ཝེ་དི་ཏ་བྦཱ.

ཨེ་ཏྠ པ་ན ཝི་ཏ་ཀྐ་ཝཱི་རི་ཡ་ས་མཱ་དྷཱི་ནཾ མི་ཙྪཱ་ས་ངྐ་པྤ་མི་ཙྪཱ་ཝཱ་ཡཱ་མ་མི་ཙྪཱ་ས་མཱ་དྷ་ཡོ ཝི་སེ་ས་ཀཱ. ཨི་ཏི ཨི་མེ ཨེ་ཀཱུ་ན་ཝཱི་ས་ཏི ཙེ་ཏ་སི་ཀཱ པ་ཋ་མཱ་ཀུ་ས་ལ་ཙི་ཏྟེ་ན ས་མྤ་ཡོ་གཾ ག་ཙྪ་ནྟཱི་ཏི ཝེ་དི་ཏ་བྦཱ. ཡ་ཐཱ ཙ པ་ཋ་མེ་ན, ཨེ་ཝཾ དུ་ཏི་ཡེ་ནཱ་པི. ས་ས་ངྑཱ་ར་བྷཱ་ཝོ ཙེ་ཏྠ ཐི་ན་མི་དྡྷ་སྶ ནི་ཡ་ཏ་བྷཱ་ཝོ ཙ ཝི་སེ་སོ. ཏ་ཏི་ཡེ་ན པ་ཋ་མེ ཝུ་ཏྟེ་སུ ཋ་པེ་ཏྭཱ དི་ཊྛིཾ སེ་སཱ ཨ་ཊྛཱ་ར་ས ཝེ་དི་ཏ་བྦཱ. མཱ་ནོ པ་ནེ་ཏྠ ཨ་ནི་ཡ་ཏོ ཧོ་ཏི, དི་ཊྛི་ཡཱ ས་ཧ ན ཨུ་པྤ་ཛྫ་ཏཱི་ཏི. ཙ་ཏུ་ཏྠེ་ན དུ་ཏི་ཡེ ཝུ་ཏྟེ་སུ ཋ་པེ་ཏྭཱ དི་ཊྛིཾ ཨ་ཝ་སེ་སཱ ཝེ་དི་ཏ་བྦཱ. ཨེ་ཏྠཱ་པི ཙ མཱ་ནོ ཨ་ནི་ཡ་ཏོ ཧོ་ཏི. པ་ཉྩ་མེ་ན པ་ཋ་མེ ཝུ་ཏྟེ་སུ ཋ་པེ་ཏྭཱ པཱི་ཏིཾ ཨ་ཝ་སེ་སཱ ས་མྤ་ཡོ་གཾ ག་ཙྪ་ནྟཱི་ཏི. སོ་མ་ན་སྶ་ཊྛཱ་ནེ པ་ནེ་ཏྠ ཨུ་པེ་ཀྑཱ པ་ཝི་ཊྛཱ. ཚ་ཊྛེ་ནཱ་པི པ་ཉྩ་མེ ཝུ་ཏྟ་ས་དི་སཱ ཨེ་ཝ. ས་ས་ངྑཱ་ར་ཏཱ, ཐི་ན་མི་དྡྷ་སྶ ནི་ཡ་ཏ་བྷཱ་ཝོ ཙ ཝི་སེ་སོ. ས་ཏྟ་མེ་ན པ་ཉྩ་མེ ཝུ་ཏྟེ་སུ ཋ་པེ་ཏྭཱ དི་ཊྛིཾ ཨ་ཝ་སེ་སཱ ཝེ་དི་ཏ་བྦཱ. མཱ་ནོ པ་ནེ་ཏྠ ཨ་ནི་ཡ་ཏོ. ཨ་ཊྛ་མེ་ན ཚ་ཊྛེ ཝུ་ཏྟེ་སུ ཋ་པེ་ཏྭཱ དི་ཊྛིཾ ཨ་ཝ་སེ་སཱ ཝེ་དི་ཏ་བྦཱ. ཨེ་ཏྠཱ་པི མཱ་ནོ ཨ་ནི་ཡ་ཏོ ཧོ་ཏི. ཨེ་ཝཾ ལོ་བྷ་མཱུ་ལ་ཙེ་ཏ་སི་ཀཱ ཝེ་དི་ཏ་བྦཱ.

དོ་མ་ན་སྶ་ས་ཧ་ག་ཏེ་སུ པ་ཊི་གྷ་ས་མྤ་ཡུ་ཏྟེ་སུ དོ་ས་མཱུ་ལེ་སུ དྭཱི་སུ པ་ཋ་མེ་ན ཨ་ས་ངྑཱ་རི་ཀེ་ན ས་མྤ་ཡུ་ཏྟཱ ནི་ཡ་ཏཱ ས་རཱུ་པེ་ནཱ་ག་ཏཱ ཏེ་ར་ས. སེ་ཡྻ་ཐི་དཾ – ཕ་སྶོ དོ་མ་ན་སྶ་ཝེ་ད་ནཱ ས་ཉྙཱ ཙེ་ཏ་ནཱ ཙི་ཏྟེ་ཀ་གྒ་ཏཱ ཝི་ཏ་ཀྐོ ཝི་ཙཱ་རོ ཝཱི་རི་ཡཾ ཛཱི་ཝི་ཏཾ ཨ་ཧི་རི་ཀཾ ཨ་ནོ་ཏྟ་པྤཾ དོ་སོ མོ་ཧོ ཙེ་ཏི ཨི་མེ ཏེ་ར་ས དྷ་མྨཱ ཚ་ནྡཱ་དཱི་ཧི ཙ་ཏཱུ་ཧི ནི་ཡ་ཏ་ཡེ་ཝཱ་པ་ན་ཀེ་ཧི ས་ཏྟ་ར་ས ཧོ་ནྟི ཨི་སྶཱ་མ་ཙྪ་རི་ཡ་ཀུ་ཀྐུ་ཙྩེ་སུ ཨ་ནི་ཡ་ཏེ་སུ ཏཱི་སུ ཨེ་ཀེ་ན ས་ཧ ཨ་ཊྛཱ་ར་ས ཧོ་ནྟི, ཨེ་ཏེ་པི ཏ་ཡོ ན ཨེ་ཀ་ཏོ ཨུ་པྤ་ཛྫ་ནྟི.

ཏ་ཏྠ དུ་ཊྛུ མ་ནོ་ཏི དུ་མ་ནོ, དུ་མ་ན་སྶ བྷཱ་ཝོ དོ་མ་ན་སྶཾ, དོ་མ་ན་སྶ་ཝེ་ད་ནཱ་ཡེ་ཏཾ ཨ་དྷི་ཝ་ཙ་ནཾ. ཏེ་ན ས་ཧ་ག་ཏཾ དོ་མ་ན་སྶ་ས་ཧ་ག་ཏཾ. ཏཾ ཨ་ནི་ཊྛཱ་ར་མྨ་ཎཱ་ནུ་བྷ་ཝ་ན་ལ་ཀྑ་ཎཾ, ཨ་ནི་ཊྛཱ་ཀཱ་ར་ས་མྦྷོ་ག་ར་སཾ, ཙེ་ཏ་སི་ཀཱ་བཱ་དྷ་པ་ཙྩུ་པ་ཊྛཱ་ནཾ, ཨེ་ཀ་ནྟེ་ནེ་ཝ ཧ་ད་ཡ་ཝ་ཏྠུ་པ་ད་ཊྛཱ་ནཾ.

དུ་སྶ་ནྟི ཏེ་ན, ས་ཡཾ ཝཱ དུ་སྶ་ཏི, དུ་སྶ་ན་མ་ཏྟ་མེ་ཝ ཝཱ ཏ་ནྟི དོ་སོ. སོ ཙ་ཎྜི་ཀྐ་ལ་ཀྑ་ཎོ པ་ཧ་ཏཱ་སཱི་ཝི་སོ ཝི་ཡ, ཝི་ས་པྤ་ན་ར་སོ ཝི་ས་ནི་པཱ་ཏོ ཝི་ཡ, ཨ་ཏྟ་ནོ ནི་སྶ་ཡ་ད་ཧ་ན་ར་སོ ཝཱ དཱ་ཝ་གྒི ཝི་ཡ, དུ་སྶ་ན་པ་ཙྩུ་པ་ཊྛཱ་ནོ ལ་དྡྷོ་ཀཱ་སོ ཝི་ཡ ས་པ་ཏྟོ, ཨཱ་གྷཱ་ཏ་ཝ་ཏྠུ་པ་ད་ཊྛཱ་ནོ. ཨ་ཝ་སེ་སཱ ཧེ་ཊྛཱ ཝུ་ཏྟ་པྤ་ཀཱ་རཱ་ཝ. ཨི་ཏི ཨི་མེ ས་ཏྟ་ར་ས ཝཱ ཨ་ཊྛཱ་ར་ས ཝཱ ན་ཝ་མེ་ན ས་མྤ་ཡོ་གཾ ག་ཙྪ་ནྟཱི་ཏི ཝེ་དི་ཏ་བྦཱ. ཡ་ཐཱ ཙ ན་ཝ་མེ་ན, ཨེ་ཝཾ ད་ས་མེ་ནཱ་པི. ས་ས་ངྑཱ་ར་ཏཱ, པ་ནེ་ཏྠ ཐི་ན་མི་དྡྷ་ས་མྦྷ་ཝོ ཙ ཝི་སེ་སོ.

དྭཱི་སུ པ་ན མོ་ཧ་མཱུ་ལེ་སུ ཝི་ཙི་ཀི་ཙྪཱ་ས་མྤ་ཡུ་ཏྟེ་ན ཨེ་ཀཱ་ད་ས་མེ་ན ས་མྤ་ཡུ་ཏྟཱ ཏཱ་ཝ ཕ་སྶོ ཨུ་པེ་ཀྑཱ་ཝེ་ད་ནཱ ས་ཉྙཱ ཙེ་ཏ་ནཱ ཝི་ཏ་ཀྐོ ཝི་ཙཱ་རོ ཝཱི་རི་ཡཾ ཛཱི་ཝི་ཏཾ ཙི་ཏྟ་ཊྛི་ཏི ཨ་ཧི་རི་ཀཾ ཨ་ནོ་ཏྟ་པྤཾ མོ་ཧོ ཝི་ཙི་ཀི་ཙྪཱ་ཏི ས་རཱུ་པེ་ནཱ་ག་ཏཱ ཏེ་ར་ས, ཨུ་དྡྷ་ཙྩཾ མ་ན་སི་ཀཱ་རོ་ཏི དྭེ ཡེ་ཝཱ་པ་ན་ཀཱ ནི་ཡ་ཏཱ. ཏེ་ཧི ས་དྡྷིཾ པ་ནྣ་ར་ས ཧོ་ནྟི.

ཏ་ཏྠ པ་ཝ་ཏྟ་ཊྛི་ཏི་མ་ཏྟཱ ཨེ་ཀ་གྒ་ཏཱ. ཝི་ག་ཏཱ ཙི་ཀི་ཙྪཱ་ཏི ཝི་ཙི་ཀི་ཙྪཱ. ས་བྷཱ་ཝཾ ཝི་ཙི་ན་ནྟོ ཨེ་ཏཱ་ཡ ཀི་ཙྪ་ཏི ཀི་ལ་མ་ཏཱི་ཏི ཝི་ཙི་ཀི་ཙྪཱ. སཱ སཾ་ས་ཡ་ལ་ཀྑ་ཎཱ, ཀ་མྤ་ན་ར་སཱ, ཨ་ནི་ཙྪ་ཡ་པ་ཙྩུ་པ་ཊྛཱ་ནཱ, ཨ་ཡོ་ནི་སོ་མ་ན་སི་ཀཱ་ར་པ་ད་ཊྛཱ་ནཱ. སེ་སཱ ཝུ་ཏྟ་ན་ཡཱ ཨེ་ཝ.

དྭཱ་ད་ས་མེ་ན ཨུ་དྡྷ་ཙྩ་ས་མྤ་ཡུ་ཏྟེ་ན ས་མྤ་ཡུ་ཏྟཱ ས་རཱུ་པེ་ནཱ་ག་ཏཱ ཝི་ཙི་ཀི་ཙྪཱ་ས་ཧ་ག་ཏེ ཝུ་ཏྟེ་སུ ཝི་ཙི་ཀི་ཙྪཱ་ཧཱི་ནཱ ཨུ་དྡྷ་ཙྩཾ ས་རཱུ་པེ་ན ཨཱ་ག་ཏཾ, ཏ་སྨཱ ཏེ་ར་སེ་ཝ ཧོ་ནྟི. ཝི་ཙི་ཀི་ཙྪཱ་ཡ ཨ་བྷཱ་ཝེ་ན པ་ནེ་ཏྠ ཨ་དྷི་མོ་ཀྑོ ཨུ་པྤ་ཛྫ་ཏི, ཏེ་ན ས་དྡྷིཾ ཙུ་དྡ་ས ཧོ་ནྟི. ཨ་དྷི་མོ་ཀྑ་ས་མྦྷ་ཝ་ཏོ ས་མཱ་དྷི བ་ལ་ཝཱ ཧོ་ཏི, ཨ་དྷི་མོ་ཀྑ་མ་ན་སི་ཀཱ་རཱ དྭེ ཡེ་ཝཱ་པ་ན་ཀཱ, ཏེ་ཧི ས་ཧ པ་ནྣ་ར་སེ་ཝ ཧོ་ནྟི. ཨེ་ཝཾ ཏཱ་ཝ ཨ་ཀུ་ས་ལ་ཙེ་ཏ་སི་ཀཱ ཝེ་དི་ཏ་བྦཱ.

ཨི་དཱ་ནི ཨ་བྱཱ་ཀ་ཏཱ ཝུ་ཙྩ་ནྟི, ཨ་བྱཱ་ཀ་ཏཱ པ་ན དུ་ཝི་དྷཱ ཝི་པཱ་ཀ་ཀི་རི་ཡ་བྷེ་ད་ཏོ. ཏ་ཏྠ ཝི་པཱ་ཀཱ ཀུ་ས་ལཱ ཝི་ཡ བྷཱུ་མི་ཝ་སེ་ན ཙ་ཏུ་བྦི་དྷཱ ཀཱ་མཱ་ཝ་ཙ་རཾ རཱུ་པཱ་ཝ་ཙ་རཾ ཨ་རཱུ་པཱ་ཝ་ཙ་རཾ ལོ་ཀུ་ཏྟ་ར་ཉྩེ་ཏི. ཏ་ཏྠ ཀཱ་མཱ་ཝ་ཙ་ར་ཝི་པཱ་ཀཱ ས་ཧེ་ཏུ་ཀཱ་ཧེ་ཏུ་ཀ་ཝ་སེ་ན དུ་ཝི་དྷཱ. ཏ་ཏྠ ས་ཧེ་ཏུ་ཀ་ཝི་པཱ་ཀ་ས་མྤ་ཡུ་ཏྟཱ ས་ཧེ་ཏུ་ཀཱ. ཏེ ས་ཧེ་ཏུ་ཀ་ཀཱ་མཱ་ཝ་ཙ་ར་ཀུ་ས་ལ་ས་མྤ་ཡུ་ཏྟ་ས་དི་སཱ. ཡཱ པ་ན ཀ་རུ་ཎཱ་མུ་དི་ཏཱ ཨ་ནི་ཡ་ཏཱ, ཏཱ ས་ཏྟཱ་ར་མྨ་ཎ་ཏྟཱ ཝི་པཱ་ཀེ་སུ ནུ་པྤ་ཛྫ་ནྟི. ཀཱ་མཱ་ཝ་ཙ་ར་ཝི་པཱ་ཀཱ་ནཾ ཨེ་ཀ་ནྟ་པ་རི་ཏྟཱ་ར་མྨ་ཎ་ཏྟཱ ཝི་ར་ཏི་ཡོ པ་ནེ་ཏྠ ཨེ་ཀ་ནྟ་ཀུ་ས་ལ་ཏྟཱ ན ལ་བྦྷ་ནྟི. ཝི་བྷ་ངྒེ ‘‘པ་ཉྩ སི་ཀྑཱ་པ་དཱ ཀུ་ས་ལཱ་ཡེ་ཝཱ’’ཏི ཧི ཝུ་ཏྟཾ. ཨེ་ཝཾ ཀཱ་མཱ་ཝ་ཙ་ར་ས་ཧེ་ཏུ་ཀ་ཝི་པཱ་ཀ་ཙེ་ཏ་སི་ཀཱ ཝེ་དི་ཏ་བྦཱ.

༨༣. ཏེ་ཏྟིཾ་སཱ་དི་དྭ་ཡེ དྷ་མྨཱ, དྭ་ཏྟིཾ་སེ་ཝ ཏ་ཏོ པ་རེ;

བཱ་ཏྟིཾ་ས པ་ཉྩ་མེ ཚ་ཊྛེ, ཨེ་ཀ་ཏིཾ་ས ཏ་ཏོ པ་རེ.

ཨ་ཧེ་ཏུ་ཀ་ཙི་ཏྟ་ས་མྤ་ཡུ་ཏྟཱ པ་ན ཨ་ཧེ་ཏུ་ཀཱ. ཏེ་སུ ཙ་ཀྑུ་ཝི་ཉྙཱ་ཎ་ས་མྤ་ཡུ་ཏྟཱ ཏཱ་ཝ ཕ་སྶོ ཨུ་པེ་ཀྑཱ་ཝེ་ད་ནཱ ས་ཉྙཱ ཙེ་ཏ་ནཱ ཛཱི་ཝི་ཏཾ ཙི་ཏྟ་ཊྛི་ཏཱི་ཏི ས་རཱུ་པེ་ནཱ་ག་ཏཱ ཚ, མ་ན་སི་ཀཱ་རེ་ན ཙ ས་ཏྟ ཧོ་ནྟི. སོ་ཏ་གྷཱ་ན་ཛི་ཝ྄ཧཱ་ཀཱ་ཡ་ཝི་ཉྙཱ་ཎ་ས་མྤ་ཡུ་ཏྟཱ་པི ས་ཏྟ ས་ཏྟེ་ཝ ཙེ་ཏ་སི་ཀཱ. ཏ་ཏྠ ཀཱ་ཡ་ཝི་ཉྙཱ་ཎ་ས་མྤ་ཡུ་ཏྟེ་སུ པ་ན ཨུ་པེ་ཀྑཱ་ཋཱ་ནེ སུ་ཁ་ཝེ་ད་ནཱ པ་ཝི་ཊྛཱ. སཱ ཀཱ་ཡི་ཀ་སཱ་ཏ་ལ་ཀྑ་ཎཱ, པཱི་ཎ་ན་ར་སཱ, སེ་སཱ ཝུ་ཏྟ་ན་ཡཱ ཨེ་ཝ.

༨༤. ཨི་ཊྛཱ་ར་མྨ་ཎ་ཡོ་ག་སྨིཾ, ཙ་ཀྑུ་ཝི་ཉྙཱ་ཎ་ཀཱ་དི་སུ;

ས་ཏི ཀ་སྨཱ ཨུ་པེ་ཀྑཱ་ཝ, ཝུ་ཏྟཱ ཙ་ཏཱུ་སུ ས་ཏྠུ་ནཱ.

༨༥. ཨུ་པཱ་དཱ་ཡ ཙ རཱུ་པེ་ན, ཨུ་པཱ་དཱ་རཱུ་པ་ཀེ པ་ན;

ས་ངྒྷ་ཊྚ་ནཱ་ནི་གྷཾ་ས་སྶ, དུ་བྦ་ལ་ཏྟཱ་ཏི དཱི་པ་ཡེ.

༨༦. པ་སཱ་དཾ པ་ན་ཏི་ཀྐ་མྨ, ཀཱུ་ཊཾ་ཝ པི་ཙུ་པི་ཎྜ་ཀཾ;

བྷཱུ་ཏ་རཱུ་པེ་ན བྷཱུ་ཏཱ་ནཾ, གྷ་ཊྚ་ནཱ་ཡ སུ་ཁཱ་དི་ཀཾ.

ཏ་སྨཱ ཀཱ་ཡ་ཝི་ཉྙཱ་ཎཾ སུ་ཁཱ་དི་ས་མྤ་ཡུ་ཏྟ་ནྟི ཝེ་དི་ཏ་བྦཾ. མ་ནོ་དྷཱ་ཏུ་ནཱ ས་མྤ་ཡུ་ཏྟཱ ས་རཱུ་པེ་ནཱ་ག་ཏཱ ཙ་ཀྑུ་ཝི་ཉྙཱ་ཎེ་ན ས་དྡྷིཾ ཝུ་ཏྟཱ ཚ, ཝི་ཏ་ཀྐ་ཝི་ཙཱ་རེ་ཧི ས་ཧ ཨ་ཊྛ, ཨ་དྷི་མོ་ཀྑ་མ་ན་སི་ཀཱ་རེ་ཧི དྭཱི་ཧི ཡེ་ཝཱ་པ་ན་ཀེ་ཧི ད་ས དྷ་མྨཱ ཧོ་ནྟི. ཏ་ཐཱ མ་ནོ་ཝི་ཉྙཱ་ཎ་དྷཱ་ཏུ་ཨུ་པེ་ཀྑཱ་ས་ཧ་ག་ཏེ་ན. སོ་མ་ན་སྶ་ས་ཧ་ག་ཏེ་ན པཱི་ཏི་ཨ་དྷི་ཀཱ ཝེ་ད་ནཱ་པ་རི་ཝ་ཏྟ་ན་ཉྩ ནཱ་ན་ཏྟཾ. ཏ་སྨཱ་ཝེ་ཏྠ ཨེ་ཀཱ་ད་ས དྷ་མྨཱ ཧོ་ནྟི. ཨེ་ཝཾ ཨ་ཧེ་ཏུ་ཀཱ་པི ཀཱ་མཱ་ཝ་ཙ་ར་ཝི་པཱ་ཀ་ཙེ་ཏ་སི་ཀཱ ཝེ་དི་ཏ་བྦཱ.

རཱུ་པཱ་ཝ་ཙ་ར་ཝི་པཱ་ཀ་ཙི་ཏྟ་ས་མྤ་ཡུ་ཏྟཱ པ་ན རཱུ་པཱ་ཝ་ཙ་རཱ. ཨ་རཱུ་པཱ་ཝ་ཙ་ར་ཝི་པཱ་ཀ་ཙི་ཏྟ་ས་མྤ་ཡུ་ཏྟཱ ཨ་རཱུ་པཱ་ཝ་ཙ་རཱ. ཏེ ས་བྦེ་པི ཨ་ཏྟ་ནོ ཨ་ཏྟ་ནོ ཀུ་ས་ལ་ཙི་ཏྟ་ས་མྤ་ཡུ་ཏྟ་ཙེ་ཏ་སི་ཀེ་ཧི ས་དི་སཱ་ཡེ་ཝཱ་ཏི.

ལོ་ཀུ་ཏྟ་ར་ཝི་པཱ་ཀ་ཙི་ཏྟ་ས་མྤ་ཡུ་ཏྟཱ ལོ་ཀུ་ཏྟ་རཱ. ཏེ ས་བྦེ ཏེ་སཾ་ཡེ་ཝ ལོ་ཀུ་ཏྟ་ར་ཝི་པཱ་ཀ་ཙི་ཏྟཱ་ནཾ ས་དི་སཱ ཀུ་ས་ལ་ཙི་ཏྟ་ས་མྤ་ཡུ་ཏྟེ་ཧི ཙེ་ཏ་སི་ཀེ་ཧི ས་དི་སཱ. ཨེ་ཝཾ རཱུ་པཱ་ཝ་ཙ་རཱ་རཱུ་པཱ་ཝ་ཙ་ར་ལོ་ཀུ་ཏྟ་ར་ཝི་པཱ་ཀ་ཙེ་ཏ་སི་ཀཱ ཝེ་དི་ཏ་བྦཱ.

ཨ་ཀུ་ས་ལ་ཝི་པཱ་ཀ་ཙི་ཏྟ་ས་མྤ་ཡུ་ཏྟཱ པ་ན ཨ་ཀུ་ས་ལ་ཝི་པཱ་ཀ་ཙེ་ཏ་སི་ཀཱ ནཱ་མ. ཏེ པ་ན ཀུ་ས་ལ་ཝི་པཱ་ཀཱ་ཧེ་ཏུ་ཀ་ཙི་ཏྟེ་སུ ཙ་ཀྑུ་ཝི་ཉྙཱ་ཎཱ་དཱི་སུ ཝུ་ཏྟ་ཙེ་ཏ་སི་ཀ་ས་དི་སཱ. ཨེ་ཏྠ པ་ན ཀཱ་ཡ་ཝི་ཉྙཱ་ཎེ དུ་ཀྑ་ཝེ་ད་ནཱ པ་ཝི་ཊྛཱ. སཱ ཀཱ་ཡི་ཀཱ་བཱ་དྷ་ལ་ཀྑ་ཎཱ. སེ་སཱ ཝུ་ཏྟ་ན་ཡཱ་ཡེ་ཝཱ་ཏི. ཨེ་ཝཾ ཚ་ཏྟིཾ་ས ཝི་པཱ་ཀ་ཙི་ཏྟ་ས་མྤ་ཡུ་ཏྟ་ཙེ་ཏ་སི་ཀཱ ཝེ་དི་ཏ་བྦཱ.

ཀི་རི་ཡཱ་བྱཱ་ཀ་ཏཱ ཙ ཙེ་ཏ་སི་ཀཱ བྷཱུ་མི་ཏོ ཏི་ཝི་དྷཱ ཧོ་ནྟི ཀཱ་མཱ་ཝ་ཙ་རཱ རཱུ་པཱ་ཝ་ཙ་རཱ ཨ་རཱུ་པཱ་ཝ་ཙ་རཱ་ཏི. ཏ་ཏྠ ཀཱ་མཱ་ཝ་ཙ་རཱ ས་ཧེ་ཏུ་ཀཱ་ཧེ་ཏུ་ཀ་ཏོ དུ་ཝི་དྷཱ ཧོ་ནྟི. ཏེ་སུ ས་ཧེ་ཏུ་ཀ་ཀི་རི་ཡ་ཙི་ཏྟ་ས་མྤ་ཡུ་ཏྟཱ ས་ཧེ་ཏུ་ཀཱ, ཏེ པ་ན ཨ་ཊྛ་ཧི ཀཱ་མཱ་ཝ་ཙ་ར་ཀུ་ས་ལ་ཙི་ཏྟ་ས་མྤ་ཡུ་ཏྟེ་ཧི ས་མཱ་ནཱ ཋ་པེ་ཏྭཱ ཝི་ར་ཏི་ཏྟ་ཡཾ ཨ་ནི་ཡ་ཏ་ཡེ་ཝཱ་པ་ན་ཀེ་སུ ཀ་རུ་ཎཱ་མུ་དི་ཏཱ་ཡེ་ཝ ཨུ་པྤ་ཛྫ་ནྟི. ཨ་ཧེ་ཏུ་ཀ་ཀི་རི་ཡ་ཙི་ཏྟ་ས་མྤ་ཡུ་ཏྟཱ ཨ་ཧེ་ཏུ་ཀཱ, ཏེ ཀུ་ས་ལ་ཝི་པཱ་ཀཱ་ཧེ་ཏུ་ཀ་མ་ནོ་དྷཱ་ཏུ་མ་ནོ་ཝི་ཉྙཱ་ཎ་དྷཱ་ཏུ་ཙི་ཏྟ་ས་མྤ་ཡུ་ཏྟེ་ཧི ས་མཱ་ནཱ. མ་ནོ་ཝི་ཉྙཱ་ཎ་དྷཱ་ཏུ་དྭ་ཡེ པ་ན ཝཱི་རི་ཡི་ནྡྲི་ཡཾ ཨ་དྷི་ཀཾ. ཝཱི་རི་ཡི་ནྡྲི་ཡ་ས་མྦྷ་ཝ་ཏོ པ་ནེ་ཏྠ བ་ལ་པྤ་ཏྟོ ས་མཱ་དྷི ཧོ་ཏི. ཧ་སི་ཏུ་པྤཱ་ད་ཙི་ཏྟེ་ན ས་མྤ་ཡུ་ཏྟཱ དྭཱ་ད་ས དྷ་མྨཱ ཧོ་ནྟི པཱི་ཏི་ཡཱ ས་ཧ. ཨ་ཡ་མེ་ཏྠ ཝི་སེ་སོ.

རཱུ་པཱ་ཝ་ཙ་ར་ཀི་རི་ཡ་ཙི་ཏྟ་ས་མྤ་ཡུ་ཏྟཱ པ་ན རཱུ་པཱ་ཝ་ཙ་རཱ. ཨ་རཱུ་པཱ་ཝ་ཙ་ར་ཀི་རི་ཡ་ཙི་ཏྟ་ས་མྤ་ཡུ་ཏྟཱ ཨ་རཱུ་པཱ་ཝ་ཙ་རཱ. ཏེ ས་བྦེ་པི ས་ཀ་ས་ཀ་བྷཱུ་མི་ཀུ་ས་ལ་ཙི་ཏྟ་ས་མྤ་ཡུ་ཏྟེ་ཧི ས་མཱ་ནཱ་ཏི. ཨེ་ཝཾ ཝཱི་ས་ཏི ཀི་རི་ཡ་ཙི་ཏྟ་ས་མྤ་ཡུ་ཏྟཱ ཙ ཙེ་ཏ་སི་ཀཱ ཝེ་དི་ཏ་བྦཱ.

ཨེ་ཏྟཱ་ཝ་ཏཱ ཀུ་ས་ལཱ་ཀུ་ས་ལ་ཝི་པཱ་ཀ་ཀི་རི་ཡ་བྷེ་ད་བྷི་ནྣེ་ན ཨེ་ཀཱུ་ན་ན་ཝུ་ཏི་ཡཱ ཙི་ཏྟེ་ན ས་མྤ་ཡུ་ཏྟཱ ཙེ་ཏ་སི་ཀཱ ནི་དྡི་ཊྛཱ ཧོ་ནྟི.

༨༧. ཀུ་ས་ལཱ་ཀུ་ས་ལེ་ཧི ཝི་པཱ་ཀ་ཀྲི་ཡཱ-

ཧ་ད་ཡེ་ཧི ཡུ་ཏཱ པ་ན ཙེ་ཏ་སི་ཀཱ;

ས་ཀ་ལཱ་པི ཙ སཱ་དྷུ མ་ཡཱ ཀ་ཐི་ཏཱ,

སུ་ག་ཏེ་ན མ་ཧཱ་མུ་ནི་ནཱ ཀ་ཐི་ཏཱ.

༨༨. ཨ་ཝ་ག་ཙྪ་ཏི ཡོ ཨི་མཾ ཨ་ནུ་ནཾ,

པ་ར་མཾ ཏ་སྶ ས་མ་ནྟ་ཏོ མ་ཏི;

ཨ་བྷི་དྷ་མྨ་ན་ཡེ དཱུ་རཱ་ས་དེ,

ཨ་ཏི་ག་མྦྷཱི་ར་ཋཱ་ནེ ཝི་ཛ་མྦྷ་ཏེ.

ཨི་ཏི ཨ་བྷི་དྷ་མྨཱ་ཝ་ཏཱ་རེ ཙེ་ཏ་སི་ཀ་ནི་དྡེ་སོ ནཱ་མ

དུ་ཏི་ཡོ པ་རི་ཙྪེ་དོ.